|
دعواتكم لزميلنا المفكر د.الباقر العفيف بالشفاء العاجل
|
|
 Re: مصادفة جميلة .. (Re: Rawia)
|
واجهته واجهنــي وبي عواطفي كلــمته
أحمد محمد الشيخ السهل الممتنع،
يا راويه ، لا أدري لماذا يذكرني هذا البيت الصريح ، بمعركة اليرموك أو ووترلو كأضعف الإيمان.
ربما المواجهة..
| |
 
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
بـي سهامه المــني وأبى ما يكالمــــني
في هواه ظالمـــني وانا برضه سالــــــمته
هرون،
مساء الخير يا أمير،
قوات الصفوة Special Troops
ماشه معاك لبن وعيني بارده،
في أقل من أسبوعين 2/0 و 2022
عاشت قطر ،
والله فرحنا التقول ستنظمه المسالمه..
مودتي
| |
|
|
|
|
|
|
|
|
|
Re: مصادفة جميلة .. (Re: عمار زكي)
|
د.عمار،
كيفك يا أبو النسب،
البيت الذي أوردته للجاغريو وليس من عندياتي،
قال المعتصم بن صمادح:
مُنعتُ شيئا فأكثرت الولوع به وأحب شئ للإنسان ما منعا.. 
| |
|
|
|
|
|
|
|
|
|
Re: مصادفة جميلة .. (Re: خالد المحرب)
|
ودالمحرب،
السِنّه دي أنا من ناسا ،
إنت قايل بلوغ مرحلتا ما بتجي إلا بالسلاف إياه؟
يا حبيب هسه لما تسمع بادي يقول عن سيد عبدالعزيز في ( نظره يا السمحه ام عجن) :
أرحمونى مارِضنى الظعن
آمالى جور لى قاطَعن
أحشاي هديل أتقطَّعن
وبالفرقة نشَّابِك طَعن
يقوم بادي يكورك ،عووووووك، علي كالله ما بتقوم يسَنَِدوك عشان تقيف على حيلك؟
دا كان قِدِرت تقيف من أصلو..
يمين يا خالد في نوع غنا أثرو علينا جوني ووكر بالنسبه ليهو كباية لبن ساكت.
| |
|
|
|
|
|
|
|
|
|
Re: مصادفة جميلة .. (Re: Balla Musa)
|
يا د. بله ، لكي نكون أكثر دقة أقول لك أن هذا البوست (ما حق العجايز) ،
والدليل الشباب الخطيرين اللي زارونا ناس الأخضر محمد سني وشيقوق ، لكن
كل هذا لن ينجينا من وصف موفاز بسبب أنه لايستطيع النفاذ إلى هنا.
أصلو جرى عليه المثل القائل العين بصيره والكيبورد حصيره
تَكَتِّر تَقَلِّل بكلِّم ليك جوليان أسانج وماهي إلا ثوان ونلقاك في ويكيليكس.
| |
|
|
|
|
|
|
|
|
|
Re: مصادفة جميلة .. (Re: saadeldin abdelrahman)
|
Quote: Quote: | Quote: ما بتقوم يسَنَِدوك |
يا مولانا قال أميل ثملان بس |
عارف يا سعد، كثير من ناس (الَشربَه) تجدهم في
هدوء عجيب عقب احتسائهم قدرا معتبرا من الكحول وربما
لاتلحظ عليهم أدنى تغيير ، لكن ذات الناس الحلوين ديل شاهدتهم
، وهم بدون شرب ، يترنحون ويصيحون ويتمايلون عندما يأخذ بهم
الطرب مأخذه وفي ذلك دليل على أن درجة الإسكار لاعلاقة لها بالسوائل،
وزي ما قلت لود المحرب أغنية زي غنية الحجروك لأحمد المصطفى والجاغريو
يا البيك انتشـــــــــاي ولَجَنك يزيد طربــــي
لايهمك أســــــــــايا وما تسمع وشايـــــه
حاكِمني في ضــراك وريني إيـــــــه ذنبي
أها ، زي الكلام دا مع تطريب أحمد العالي يكون أثره كأثر الكحول المتحلل في الدم إلى
نسبة تصل إلى 0.1% وبرَّاحه تدخل ال Tipsiness وبالهنا والشَفا.
| |
|
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
ود خالتي مرتضي ...وينك يا صفوه ...
هسع يا ود خالتي( بحشمه سالمتو) دي نلقاهاوين في الزمن ده ...
امس شوف عيني في واحده (خمشت) ليك حبيبها لامن قرب يطير !!!... انا لله
بحشمه دي ذكرتني قصة واحد (متيم) ما قادر يشوف محبوبته لانها ما قاعده تطلع ولا بخلوها زاتو... زولنا لملم شفع الحله وقال ليهم كوركو قولو حريقاااا ... والحله فتحت ابوابها وزولتو جات مارقه سالت الشفع: هسع وينا الحريقه?? وزولنا جاري ورا الشفع يدق في سدرو وياشر لمحل قلبو ويقول ليها الحريقه هنا ده ....
تقول لي انترنت واسكايب يا مرتضي ...!!!
عمنا بتاع حي المسالمه لاقوه يوم العيد يقشقش في دموعو... الجماعه سالوه قالوا ليهو ياحاج الدنيا عيد البكا لزومو شنو ... قال ليهم انا ببكي لي عمرنا الفات وزمنا الكان فيهو البنات بيشوفوهم يوم العيد بس ومن مسافة ميتين متر ... ولو المسافه قصرت التكك بتتفرتق ...
قال بحشمه سالمتو قال !!!
____________________________________
البتاع رسلتو ليك ... وتعال لي فيهو بالامسيات ...
| |
|
|
|
|
|
|
|
|
|
Re: مصادفة جميلة .. (Re: رانيه محمد الشيخ)
|
Quote: أها ، زي الكلام دا مع تطريب أحمد العالي يكون أثره كأثر الكحول المتحلل في الدم إلى
نسبة تصل إلى 0.1% وبرَّاحه تدخل ال Tipsiness وبالهنا والشَفا. |
بالهناء والشفاء؟
عييييييييييييك
| |
|
|
|
|
|
|
|
|
|
Re: مصادفة جميلة .. (Re: رانيه محمد الشيخ)
|
| Quote: اغنيه حلوووووووووووووووووووووووووووووووه شديد |
أهلا رانيه،
تقريبا كل أغاني الجاغريو وأحمد المصطفى تحمل ذات الروح ،
سهولة ويسر وبساطه تَسَغرِب وتطرِب.
صادفني الحـــــبيب بي حشمه سالمني
تركني اميل ثمــلان ليه قـــلبي سلمته
-
بـي سهامه المــني وابي ما يكالمــــني
في هواه ظالمـــني وانا برضه سالمته
-
فردوسه في ذهني وطهره المنزهنـــي
واجهته واجهنــي وبي عواطفي كلــمته
-
بي ضميره كاشفنــي وهدم املي نشفنــي
سبأ عمري كاد يفني وانا مغمي ما علمته
-
انا ريده بادلنـــــــي وهو العاطفه بادلنــي
لكنه بهدلنــــــــــي قال لي حظك وقسمته
بالله شوفي الشطر الأخير دا كيف،
عرضحال..
| |
|
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
يا مولانا
الأغنية دي لو إنها ما كانت موثقة بختم الجاغريو عالي الجودة و لولا مفردات الوصف الحسي و الثمالة المعنوية
لقلت إنها من تأليف الجنس الناعم لما تعج به من صدق العاطفة و الخفر المحبب و رقة الأحساس و رهافتها مما لا يتيسر لحاملي كروموزم Y
و أنى لنا بمثل هذا لولا عبقرية الجاغريو ..
الراحل إبراهيم عوض عرف عنه أنه صاحب تقليعات و مجدد في الفن السوداني
و الموضة و قيل أنه أول من أضاف إستخدام الجيتارات في الاوركسترا السودانية..شاهدت له لقاء تلفزيوني حكى فيه أن كيف أحد الصحفيين هاجمه
حين رقص ذات حفل كاتبا : إبراهيم عوض يترنح على المسرح
و كان غاضبا و هو يروي رغم مرور عشرات السنين على ذلك الحدث
و لا أستبعد أنه قد يكون إلتقى هذا الصحفي سيء الحظ و عالج الأمر معه..
| |
|
|
|
|
|
|
|
|
|
Re: مصادفة جميلة .. (Re: ندى عثمان حسن)
|
Quote: المزاج رايق
ربنا يدوم
الروقة والمحبة
ودام صفانا |
أستاذنا الأخضر محمد سني،
ياخ مبروك 2022
بالله هسه يا العزيز الغنيه الشغاله دي لامن تسمعا
بسماعات نضيفه وأمبلفاير معاهو sub wooferأو بال headset حاف كده
مش الكيميا بتاعتك كلها بتنعدل ومزاجك يبقى نيلي وقت السَحَر؟
هسه طلبت غنية طار قلبي للجاغريو وأداء لأحمد المصطفى بتسجيل
متفرد سمعتو عند زول ويبتزني به وكل ما ارتفع هذا البوست يرفع
في المقابل حتى كادت الأغنية تلامس مزيج برنت.
تعذيب ارواحنا بيها ومجـــــــونا
نظراتها المـن دانـا بعالجونــــا
محبة بدون شروط يا سني.
| |
|
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
Quote: هسع يا ود خالتي( بحشمه سالمتو) دي نلقاهاوين في الزمن ده ...
امس شوف عيني في واحده (خمشت) ليك حبيبها لامن قرب يطير !!!... انا لله |
بدرالسنوسي،
أهلا يا ابن خاتي،
الجاغريو ده لما قال بي حشمه سالمتو كان قاصد يهتك حجب ستر وقارنا ويجهجهنا،
يا بدر إنت عارف وانا عارف والله عارف إنو سلام الحبيب بي حشمه بيكون عميق الأثر
والتقدير لمستوى لايمكن معه تنسى أي كسر من الثانية من تلك المقابله خلافا للسلام
ال ( بالخمش) الذي لايقل في أثره على المرء عن الجنك فود.
السلام بالحشمه ترك زولك يميل ثملان ولكن لو نزع عن ذلك الحياء كانت النتيجة
( تركني أهيم قرفان)،
الحياء والرفق مهم يا ابن خالتي،
مهم وأساسي..
محبتي..
| |
|
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
سلام يا صاحبنا وحبرنا الاعظم
الجاغريو مجنون جِن
والأمي اجن منو
وناس الحقيبة كلهم- الشعراء- دراويش
ولاقوا مُداح- مفنيين الزمن داك-
اها يا صاحبي انا في بيت من اغنية
(اظنو ابو أمنة) ده محيرني رسمي
وشعبي وكل ما اسمعه بقول لو زول
سالني قال لي حكمة سودانية عاجباك
بقول ليهو:-
الرهيف قبلو بيعيش في شكو اكتر من يقينو
هذا مع السلام والمحبة.
| |
|
|
|
|
|
|
|
|
|
Re: مصادفة جميلة .. (Re: رانيه محمد الشيخ)
|
قال شنو ؟
قال : الحجروك حبى وعملو السبب حبى
كيف تنزع الصورة المرسومة فى قلبى ؟
.. عندنا يا محمد صاحب كان مكتول فى الأغنية دى . وأول ما يسمع
الحجروك . كان يقول لناس الحفلة فى الصف القدامو MOVE ههههههه
ويدخل يسكسك يسكسك لا حدد ما اليوم التانى يكون جاو وجع
بلابيط . الحجروك عجيبة والجاغريو صعب يا محمد صعب .
| |
|
|
|
|
|
|
|
|
|
Re: مصادفة جميلة .. (Re: سفيان بشير نابرى)
|
Quote: اها يا صاحبي انا في بيت من اغنية
(اظنو ابو أمنة) ده محيرني رسمي
وشعبي وكل ما اسمعه بقول لو زول
سالني قال لي حكمة سودانية عاجباك
بقول ليهو:-
الرهيف قبلو بيعيش في شكو اكتر من يقينو |
الله يفتح عليك دنيا وأخرى يا سفيان،
(ما نسيناك) دي حاجه تانيه،
ياخ الجابري كلو حاجه تانيه خالص خالص،
حقيقة (الرهيف قلبو) مشاكلو كتيره لدرجة تستعصي على الحصر،
كانت بتكون ساهله لو أنها انحصرت في جزئية الشك لكنها أبعد من ذلك،
لا أدري يا سفياننا الرقيق ما إذا كانت القصيدة لأبي آمنه أم
كامل عبدالماجد لكنها يغلب عليها (نَفَس) الأول.
الجابري زاتو العملو في الغنيه دي ..
بعدما وَدِّرتنا..
غايتو..
| |
|
|
|
|
|
|
|
|
|
Re: مصادفة جميلة .. (Re: ندى عثمان حسن)
|
Quote: سِفر من الجمال
كتابة ومداخلات ترد الروح |
أهلا بالندى،
يا العزيزة ، الجاغريو واحد من مؤسسات الجمال وكان من أمناء العموم
لتلك المؤسسة العميد أحمد المصطفى ، غشيت قبريهما شآبيب الرحمة،
نحن يا ندى هنا لادور لنا في هذا الجمال غير التذكير به من حين إلى آخر،
وكما قال سعد الدين (أنى لنا بمثل هذا لولا عبقرية الجاغريو ..)
أسعدتنا (الشوفه) بعد البعادِ الطال،
| |
|
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
Quote: الناس لما تميل هنا
بجلوا أي شيء : |
سـلامى محمد المرتضى و ضيوفه
ديوان من دواووين عمد أمدرمان القديمة
و الناس فعلاًَ مجلية أى حاجة..
محيرنى من زمان أسم (لقب) الجاغريو (أصلو و معناهو) و ما لقيت لي حاجة مقنعة
متابعين..
| |
|
|
|
|
|
|
|
|
|
Re: مصادفة جميلة .. (Re: willeim andrea)
|
مولانا ورائك شنو فى كلام عمنا الجاغريو
والحب غذاء الارواح يتلوه جيل عن جيل
وبعد انتهاء الاجيال فى قبرى ليه سكون
سيدة شباب الكون ومدينة احلامى
انا بالغرام مفتون..
يارب لطفك،،،
| |
|
|
|
|
|
|
|
|
|
Re: مصادفة جميلة .. (Re: صديق الموج)
|
Quote: مولانا ورائك شنو فى كلام عمنا الجاغريو
والحب غذاء الارواح يتلوه جيل عن جيل
وبعد انتهاء الاجيال فى قبرى ليه سكون
سيدة شباب الكون ومدينة احلامى
انا بالغرام مفتون..
يارب لطفك،،، |
يا الموج،
ياخ إنت من كل شاعر ما بتجيب إلا الكلام والأشعار المحرمه دوليا،
لاحولا،
هسه لو طارق جبرين ما كان في الخرطوم مشغول بالشيشه كان قال ليك : إنعل أبوالجمكسين زاتو..
عثمان موسى بقول دا نوع الغنا المزروع في إقليم التفاح ومحروس بالسلاح،
عليك الله شوف (مدينة أحلامي) دي كيف!!
رئاية البلديه طنافس ومخدات للسمحه بس..
يا موج لما شاعر زي الجاغريو يقول سيدة شباب الكون ، طوالي تشوف ال Big Bang وبعد تكوُّن السدم
تكون السمحه موهطه في قلب الإنفجار وخلق الله يهبهبو ليها بريش نعام..
حكومة يا موج،
حكومه منتخبه والله..
| |
|
|
|
|
|
|
|
|
|
Re: مصادفة جميلة .. (Re: willeim andrea)
|
الفنان أندريه،
يا سلام على شوفتك،
لازم تكون هنا وتشوف أسباب طيران القلب
طار قلبي مني وقال ماهو عايد
مادام مفارقك لي أرواحنا سايد
يا قلبي تعذيبك ماهو فايد
اصبر عسي المحبوب يبقي جايد
قال كيف اصبر وانا جمري زايد
وكيف اسلي الغصن المن طبعه مايد
إذا الوداع يا قلبي وحبيبي
وأهلا ضنــاي الحــــير طبيبـي
فارقني حبي إرتاح يا رقيبي
ويانجوم سعـــودي اتلاش غيبــي
دي المن دلالها دايما وجوله
قاسيه وطموحه ونافره وخجولـه
شكت الالم من لمسان حجوله
وليه بـي بعــاده الأيام عـجولـــه
مابنسلا ريدها مهما ازانا
بنعشق عفافها المازجـه الرزانـــا
بنهواها موتنا اخر جزانا
آه لـــو تناجـــي قلوبنا الحزانـا
ضاعت قلوبنا الخلان نعوها
وأسباب حزنـــا ليه ما وعوهـــا
ياقلوبنا بالصد ما تدعوها
موتكم وداعها وهيـا ودعوهـــا
أيام فراق ستمايه أزعجونا
يا أيام اللقـا آهـ لامتين تجونـا
تعذيب أرواحنا بيها ومجونا
نظراتها المـن دانـا بعالجونـا
قلت ليك السهل الممتنع بس.
| |
|
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
ده بوست عجايز يا مولانا
أحلى عبارة إتقالت فوق
ياخي الحمد لله الخلانا نسمع جنس ده
حنان الموسيقى بعود الغائب الحاضر بجمال إبتسامته وشموخ صوته أحمد مصطفى
مره قلتَ لي خدر مرات كتيرة الموسيقى والغنا فيهو نوع كده بنقضي بيهو الحوائج
أن يكون مساءكـ ندياً بعد التواجد هنــا فتلكـ (حاجة ) تم قضائها 
Quote: عارف يا سعد، كثير من ناس (الَشربَه) تجدهم في
هدوء عجيب عقب احتسائهم قدرا معتبرا من الكحول وربما
لاتلحظ عليهم أدنى تغيير |
شفتَ الغُنى السمِح بجيب الونسة السمحة كيف ؟؟ مرة إتونست سراً قائلاً البتاعة دي IF كانت حلال ما كان أحسن ؟
خُفتَ من (لو) يا مولانــا
السنونسي بدر فوق قال : | Quote: هسع يا ود خالتي ( بحشمه سالمتو) دي نلقاها وين في الزمن ده ... |
تلقاها وين يا دكتور كيف يعني ؟!
دي أصلو كان لقيته تاني بتسمع غُنا زي ده ؟؟ | Quote: ببكي لي عمرنا الفات وزمنا الكان فيهو البنات بيشوفوهم يوم العيد بس ومن مسافة ميتين متر ... ولو المسافه قصرت التكك بتتفرتق ... |
وبدل التكك تتفرتق كانوا برشو زي الكلام البسيط الجميل الفوق ده
لسع جاييكـ تاني .
_________________
لونكـ الأخدر سمح في الكتابة
| |
|
|
|
|
|
|
|
|
|
Re: مصادفة جميلة .. (Re: عمران حسن صالح)
|
علي سيرة الجابري وسنينو
النكلمك يا صاحبي ...
شاذلي الفانوب (وده شاب من ولاد أم درمان وصغير السن
تلتينات وكده ويحب التوثيق للحقيبة ومغنيها والتوثيق
لكافة الغناء السوداني وهو من ابناء حي العرب ) حكي
لي مرة انو سمع من الجابري ذات نفسه بيقول انو اغنية
(هوج الرياح) دي لحنها مشترك مابين الجابري وبين
(الصناجة) خليل اسماعيل وانو خليل لحن الجزء الاول منها
والجابري لحن الكسرة بتاعة العشرة بلدي .
شفته كيف!!!! اها شِن قولك !!!؟
| |
|
|
|
|
|
|
|
|
|
Re: مصادفة جميلة .. (Re: سفيان بشير نابرى)
|
بداية الغُنية فيها ترتيب منطقى
بدت بـالصدفة أولاً
وبعدين سهامو آلمــني ، ومرت بـ فردوسو ( قوية فردوسو دي ) والضمير قبل الريدة النهائية
ذكاء في ترتيب أبيات الأغنية ما جاء بالصدفه !! الريده عندهم كانت حااااااارة
كدي راجعه تاني يا محمد المرتضى وشوف ترتيب المشاعر كان كيف ؟؟
---
عشان كده عند احمد المصطفى أعمق
وعند الشاب الجميل ده أحلى لأن الموسيقى تعانقها ككل أضغط واسمعه عند أحمد المصطفى
___________
ياخي شكرا للمشاركة الرائعة
مسائي كده أحلى
| |
|
|
|
|
|
|
|
|
|
Re: مصادفة جميلة .. (Re: الطيب شيقوق)
|
| Quote: محيرنى من زمان أسم (لقب) الجاغريو (أصلو و معناهو) و ما لقيت لي حاجة مقنعة |
صدقت يا أباذر،
حتى الذين ينتمون لمنطقة الدبيبات أو الذين عاصروا الجاغريو تتضارب
إفاداتهم حول منشأ اللقب رغم أن معظهم اتفقوا على رواية صديقه الذي
قيل أنه أطلق عليه اللقب.
لكنه لقب جميل وأنا ما عارف معناهو ومدلوله بالدارجه أو الفصحى لكن قال:
في الليل المعتم محياك بدري بان
لونك زاهي اسمر وقامتك غصن بان
اردافك بخصرك ياحبيب لاعبان
وقدام ناعســــاتك الفـــارس جبـــان
بالله عليك الله رغم عدم معرفتي بمعنى (جاغريو) لكن بكلامو ده مش فعلا جاغريو؟
| |
|
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
Quote: عليك الله شوف (مدينة أحلامي) دي كيف!!
رئاية البلديه طنافس ومخدات للسمحه بس..
يا موج لما شاعر زي الجاغريو يقول سيدة شباب الكون ، طوالي تشوف ال Big Bang وبعد تكوُّن السدم
تكون السمحه موهطه في قلب الإنفجار وخلق الله يهبهبو ليها بريش نعام..
حكومة يا موج،
حكومه منتخبه والله.. |
مولانا جيتك صاد ...
لعل هذه هى المدينة الفاضلة التى عناها افلاطون او كما قال..
احكى ليك شى عن عمك الجاغريو:
حكى لى الفنان محمد حسنين عليه الرحمه..
ان الجاغريو بعد ان اعطى اغنية سميرى المرسوم فى ضميرى للفنان احمد المصطفى..
وكان قد تغنى فيها لبنات الخرطوم وعدد احيائها وتغنى لاسر فاضلة فيها
صادفنه بنات منديل وعاتبنه انه تغنى لكل بنات الخرطوم ولم يرد ذكرهن.
فذهب الى شركة ابو العلاء حيث يعمل احمد المصطفى وقال له: هل سوف تغنى
يوم الخميس على المسرح؟فاجاب بالطبع نعم.
وقد كانت وزارة الثقافه حينئد تقيم حفلا شهريا.وكان ذلك منسجما مع منطق الاشياء
حين ذاك،وكانت الخرطوم وارفه خضله كعروس اخرجت للناس،كحلت الاهداب ونشرت الخمر
بضم الخاء اصلحكم الله...
فقال له الجاغريو ارجوك ان تحفظ هذا البيت وتضيفه لاغنية سميرى.
حبيب روحى اهديلى
ومن عنبك اديلى
فلايكى عديلى
انا نسيت مناديلى
وقدكان..
هذه شاعرية فذة وقد قال عنها عمك محمد ود الرضى ان الجاغريو شيطان شعره حاضر..
نعم هذا شيطان مقيم بين جوانح صاحبه..
رحم الله الجاغريو ورحمك الله انت يا مسكون،،،
| |
|
|
|
|
|
|
|
|
|
Re: مصادفة جميلة .. (Re: صديق الموج)
|
Quote: سلام محمد
الجاغريو ده مجنون عديل كده
فى زول بقول
امات البنات اتلمو بقوا يلدن عليه ويسمو
؟ |
حبيبنا النصري،
الغنيه دي ممكن تكون بديل لجهاز التدفئة القاعد في البيزمنت في بردكم الكافر داك،
يا نصري الإستماع لقصائد الجاغريو عموما يقلل من فواتير الغاز والوقود ،
والله لم أك أدري أن (أمات البنات اتلمو بقوا يلدن عليه ويسمو) كتبها الجاغريو،
أها هسه أضفت لينا شئ ما كان عندنا ، يا نصري ، وما طالبني حليفه ، البيت
دا كنت زمان بشغِّل شريط مخصوص عشان أسمعو ،
زمن يا نصري ، مما طلبت تسجيل للمقرئ الجميل الراحل عوض عمر ما لاقيناك،
تسلم
| |
|
|
|
|
|
|
|
|
|
Re: مصادفة جميلة .. (Re: صديق الموج)
|
Quote: فقال له الجاغريو ارجوك ان تحفظ هذا البيت وتضيفه لاغنية سميرى.
حبيب روحى اهديلى
ومن عنبك اديلى
فلايكى عديلى
انا نسيت مناديلى
وقدكان.. |
الموج الحبيب ،
هذه الرواية لا يرقى إليها الشك وسبق أن سمعتها من سيدة فاضلة معروفة
كانت من المقربات وتعرف كثير من القصص عن تلك الفترة لأنها كانت جزء منها،
ربما اهتمام الجاغريو بال (مناديل) هو ما حفزه أن يكتب قصيدته الشهيرة
(منديلي ضاع مني) راثيا المنديل داعيا على من أخذه بأقسى الكلمات (مازحا)
قائلا:
منديلي ضاع مني الشالو ما يتَنّي
مايشيل خلافـــــــــــه
يا ابو فركة أبوي والي في حمو اللهيب اصلي
مايشيل خلافـــــــــــه
ياودحسونــــه الحـار يا صاحب الــــــدردار
حيبر ديري في البــــــــدار اخلو من الدار
مايشيل خلافـــــــــــه
ودريا الرابعـــــــــه يا اب فيضا نابعـا
سل روحه تابعـــــــــه يشيلوه الاربعـه
مايشيل خلافـــــــــــه
يارجال اب حــــــــراز مافيكم انفــــــراز
هيا اطلعوا البـــــراز خلوه يمشــي راز
مايشيل خلافــــــــــه
يالعركيين ســــــــوا ابلوه شيلو الــــــــدوا
يشرب من غــــــــــير روا طيرو بيهو في الهــوا
مايشيل خلافــــــــــه
ود عيسي الفي المسيــــد زروق الماك كسيـــــد
منديلي ما تقلــــــــيد الشاله شيل لي الايـــد
مايشيل خلافــــــــــــه
حامد اب عصاة سيـــــف هيا للمنديل اقيـــــــــف
الشاله يصبح ضيــــــــف في الشبر الما نضيــف
مايشيل خلافـــــــــــــه
ياراجل ام مرحــــــــي قول للرخا افرحــــــي
ماتسهي وتسرحـــــــــي الشاله يمحـــــــــي
مايشيل خلافــــــــــــــه
ياالشيخ ود ام مريـــــوم خليه اليعيش مسقـــوم
منديلي مامسيــــــــــــوم يبقي له اخر يـــــــــوم
مايشيل خلافــــــــــــــه
يابرير والنقــــــــــــر الشاله لي ما قــــر
يضوق سم الدقـــــــــــــر ابوه يكون عقـــــر
مايشيل خلافـــــــــــــــه
دي هديه جات تهـــــوش فينا وتسوي البــــوش
الشاله راســــــــه يدوش والبومه تحرس الحوش
مايشيل خلافـــــــــــــــه
يااهل الله بيهو همــــــــو ومن مكه اتلمــــوا
القشه بيه فمــــــــــــه تحرق حشا امـــه
مايشيل خلافــــــــــــــــه
صليت علي الرســـــــول عد مافي الكون محصول
الشاله غير اصـــــــــول من البشر مفصـــول
مايشيل خلافـــــــــــــــه
(نقلا عن الفيسبوك)
| |
|
|
|
|
|
|
|
|
|
Re: مصادفة جميلة .. (Re: الطيب شيقوق)
|
| Quote: البوست دا ناسو كوووووووووولهم ناس بنادر عيني باردة يا ناس التكك ( بكسر وتشديد التاء) |
إنت يا الطيب لسه مصدق إنو السودان دا فيهو بندر وضهاري؟
| |
|
|
|
|
|
|
|
|
|
Re: مصادفة جميلة .. (Re: Rawia)
|
بالضبط كده،
وبرضو ، يا راويه ، قال :
الحفله مبــــــــــداها الازهار شـــــــذاها
ديك جَبَدت رِداهـــــا وديك وقعن فــِــــــداها
الحفله في جنــــــــه وأنا قادح زنــــــادي
++++
الظبية الوسيمــــــة نادي رطب جِسيمــــه
الراح في بِسيمـــــه والروح من نسيمــــه
يالمامون تتهـــــني في قرب المنــــــــادي
غايتو..
المامون إتلوَّم..
| |
|
|
|
|
|
|
|
|
|
Re: مصادفة جميلة .. (Re: سفيان بشير نابرى)
|
Quote: شاذلي الفانوب (وده شاب من ولاد أم درمان وصغير السن
تلتينات وكده ويحب التوثيق للحقيبة ومغنيها والتوثيق
لكافة الغناء السوداني وهو من ابناء حي العرب ) حكي
لي مرة انو سمع من الجابري ذات نفسه بيقول انو اغنية
(هوج الرياح) دي لحنها مشترك مابين الجابري وبين
(الصناجة) خليل اسماعيل وانو خليل لحن الجزء الاول منها
والجابري لحن الكسرة بتاعة العشرة بلدي .
شفته كيف!!!! اها شِن قولك !!!؟ |
يا سفيان، لو لم تورد إسم ذلك الشاب لقلت أنه هيثم لبيب،
هيثم ، رغم صغر سنه ، مرجع في الأغنيات السودانية مع تخصص حقيبة،
شايف أولاد المسالمه كيف؟
هوج الرياح دي عالم تاني ، الجابري دا في جزئية (الليل الليل
الليل الليل .. الليل يهوِّد بيّ ) وشغل العشره بلدي قدم عملا أتمنى لو
يكتب عنه أهل الموسيقى في المنبر وكثيرا ما أندم أنني لا أعرف
فيها شيئا وإلا لشرحت لخلق الله ناس الجابري عملو شنو،
يا سفيان ، صدق أو لاتصدق ، إستمعت كثيرا لأغنية (عطشان يا صبايا)
على ألسنة مطربين عرب لكن الجابري بزَّهم جميعهم في أدائها،
يعني بس زي الفارق بين الفوكرز وال Airbus A 380 .
| |
|
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
Quote: Quote: Quote: عارف يا سعد، كثير من ناس (الَشربَه) تجدهم في
هدوء عجيب عقب احتسائهم قدرا معتبرا من الكحول وربما
لاتلحظ عليهم أدنى تغيير |
شفتَ الغُنى السمِح بجيب الونسة السمحة كيف ؟؟ مرة إتونست سراً قائلاً البتاعة
دي IF كانت حلال ما كان أحسن ؟ |
الغنا (المَغنَى) السمح والونسه السمحه لابديل عنهما في هذا الزمن غير السمح،
يا عمران ما شايف النوستالجيا المدوِّره هنا في المنبر والتي تشي بفقر
الحاضر ورفض الواقع رأسيا وأفقيا؟ هسه كلامك الفوق دا ممكن يقبل الأخذ
والرد ، رغم قطعية الدلالة في نص التحريم ، لكن فقط لتوطيد العقيده والمبدأ،
لكن لو قلتو في مكان تاني يضبحوك نهارا ويقولوا جهاد، وكأن "جادلهم بالتي هي
أحسن دي " ما جات كأمر أو كأنها ليست قطعية الدلالة. ما علينا، أها يا بركه
أنا من الناس الكان طربت ممكن تسرق نضارتي بدون ما أحس، البلاك ليبل والكورفوازير
ديل ما بشتغلوا معانا تب، إنت بس جيب زول يغني لي:
إيه يعني المــــرايه مع خدك الذهبــــــــي
انا من دون درايــه أهتف بيك بـــــــــراي
قـــــــدامي ووراي حبك أعلن حــــــربي
وخلِّي الباقي على الحرامي
| |
|
|
|
|
|
|
|
|
|
Re: مصادفة جميلة .. (Re: محمد أبوالعزائم أبوالريش)
|
Quote: صادفني الحـــــبيب بي حشمه سالمني
تركني اميل ثمــلان ليهو قـــلبي سلمته
-
برضو تقول لي احمد شوقي امير الشعراء ......... طيب ده شنو .... |
عمر عثمان سلامات ياودود،
زمان كنت بسمع البيت ده غلط ، كنت قايلو بقول تركني أمين سملان وكنت أحار في تفسيرها
يعني ما جايه معاي، قلت يمكن قاصد ب (أمين ) يعني في أمن لكن (سملان) دي يعني عيونو مقدده،
يعني خلاهو أعمى مستكين، وعندما قرأت النص عرفت أنها زي ما إنت شايف، سلام ، إنحراف بزاويه ،
ترنَّح ، ثملان والباقي معروف..
ياخ الشاعر الجاغريو ده الحمدلله يوميها ما كان سايق كرّاكه أو قندران، مع سلام بحشمه زي ده
كان هسه البلد صعيدا زلقا..
طبعا أحمد شوقي مستوى (غير) لكن يا عمر الشعر حقّنا ( يشق القلوب قبل الجلود) وكأنه
صنع خصيصا على مقاس قلوبنا..
محبتي
| |
|
|
|
|
|
|
|
|
|
Re: مصادفة جميلة .. (Re: محمد المرتضى حامد)
|
العزيز محمد المرتضى و بقية العمد و الأميرات
تحياتى
Quote: في الليل المعتم محياك بدري بان
لونك زاهي اسمر وقامتك غصن بان
اردافك بخصرك ياحبيب لاعبان
وقدام ناعســــاتك الفـــارس جبـــان
بالله عليك الله رغم عدم معرفتي بمعنى (جاغريو) لكن بكلامو ده مش فعلا جاغريو؟ |
بالحــيل!!
** أما على ذكر هوج الرياح فأنا أستمع لهذه الأغنية بلا توقف أو ملل.
أحمد الجابرى لم ينصف إلى هذه اللحظة ولا رأيكم شنو؟؟
لازالت نفحات هذه الجلسة تتدفق و لازلنا ننتظر المزيد..
دمتم جميعاً
| |
|
|
|
|
|
|
|
|
|
Re: مصادفة جميلة .. (Re: Abuzar Omer)
|
دامع لجّ طرفي .. يا اب طرفاً سحَر
و البسم المفلّج .. للأكباد نحَر
لا يبرد حميمي .. لو أحَسَى البحَر
داري و ماكَ مداري .. يا سمح النحَر
ــــــ
شادي الحفلة طنّ .. و الإكليل سفَر
و النشاب توتّر .. للفاطر غفَر
ظبي الريم تبختر .. للآساد ظفَر
معنى الحفلة كاين في واحد نفَر
ــــــ
من فولاذ قليبك .. و كبدك من حجَر
ما أحلاك عندي .. إن زُرْ أو هَجَر
كلْ أذى يا طبيبي .. في جوفي انحصر
حبك خلى عقلي .. و العود إنصهر
مالي إليكَ إلا .. قولاً مختصر
العند الله أقرب .. من لمح البصَر
ـــــ
مره و مره أجدعو .. في طي الضَمَر
الكتف المهدّل .. و الجسم إنتبَر
و الصاد المزمزم .. و الغيم و التبَر
و الضهر المتنّى .. و التيه و الأبَر
ده الخلاني ساهر .. ماء عينيَ تَبَر
ــــ
لاحم كتفو كفلو .. ماج جيدو الوفَر
عمعم ديسو درعو .. في بعض إنضَفر
حاكي الغيم تنَقُلْ .. يا غالي النفَر
قول للوزه غوري .. في عينك ضفَر
* ود الرضي : ( الناحر فؤادي مولع جوفي حر )
.........
يزازي بيك يا مرتضي بركة المولى ، إنت و الجاغريو و ود الرضي ..
يا كافر يا الما بتخاف الله .
| |
|
|
|
|
|
|
|
|
|
Re: مصادفة جميلة .. (Re: محمد أبوالعزائم أبوالريش)
|
Quote: الله يهديك ياخ ..
كلما الواحد يغفل ليهو غفلة، يلقاك جايب ليك (مصيبة)، ومبشتن المنبر كلو ... |
أبوالريش سلامات،
(المصائب) دي موجوده سلفا ، نحن فقط ننبه الناس أن يأخذوا حذرهم،
إنت بالذات أقول لك ما يردده أهلنا الخلايجه:
دير بالك.
| |
|
|
|
|
|
|
| |
محمد المرتضى حامد
Rawia
haroon diyab
عوض عبدالله طه
خالد المحرب
saadeldin abdelrahman
Balla Musa
محمد سنى دفع الله
Elsanosi Badr
الطيب شيقوق
سفيان بشير نابرى
Osman Musa
Abuzar Omer
willeim andrea
صديق الموج
عمران حسن صالح
omer osman
محمد أبوالعزائم أبوالريش
Emad Abdulla
فيس بوك
تويتر
انستقرام
يوتيوب
بنتيريست