|
|
|
 Re: أجمل تسجيل لهذه الأغنية الإستثنائية.. (Re: نصر الدين عثمان)
|
عاين يا مرتضى ( حقوقك محفوظة يا عثمان موسي)
أكان جيتنا في الدندر بلبستك السمحي دى قطع شك الجماعة بلهموك البرلمان بالتزكية
ما تقول لي مجلس ولايات ، ولا برلمانات ولائية - لالالا حاشاك انت من الصغار ديل ، ناسنا بلهموك البرلمان المجاور لمحلات سمك عوضية شرط
| |
 
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: khaleel)
|
الموج
| Quote: غناء زى ده بنشم، بنضاق،بنحس |
وحياة ربي انت ابو المسانيح ذاتم
| Quote: انت ما بتعرف جلابية بيضاء مكوية زى جلابيتك دى؟؟ |
عليك بباب شريف بجدة - لكن القماش دا ببيعوهو بالدس بس - ما عارف ليش اصلو ....؟
المرتضى
عليك النبي صورة زيدان دى جبتها من وين ؟
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
Quote: ( تصفير )
(صفر )
صفارة
ما سامعين ادونا فلوسنا |
 أستاذنا الجميل محمد سني،
ذكرتني الوطنيه امدرمان لامن الفيلم يقطع،
أرجو أن تكون سمعت التسجيل من الرابط الثاني أو ما أضافه مشكورا
طارق جبريل كرابط حفظ.
زيدان زول تاني يا أبا السهروردي،
مزيل للكدر ومجمِّل لدواخل البشر ،
صديقي الفاتح ميرغني قال لي كان أهم لينا من البترول..
لكن لانقل إلا ما يرضي الله..
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
Quote: ومغبون..
صدقني يا طارق بسأل نفسي هل بعد فراق زيدان لسه النيلين بيتلاقوا؟ |
وددت ان اراهما بعد زيدان .. وبعد الاحزان المترعه علي شطآنهما .. لا بد انهما يتعانقان
في حرقة واسي علي فتي العباسية الممتدة جذوره الي رهيد البردي والذي نثر علي السودان كله
كنوزا من المحبة والرفق لو نهلنا منها ما اصابتنا فرقة ولا كدر
ياشيخي سابكي مجددا ثم اعود اليك بما ينوء به قلبي المحب لهذا الساحر الفنان .. الذي رحل
عمر علي حسن
حاشيه: التكنولوجيا بتاعتك مابتفتح عندي .. لكنني سمعت بقلبي
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: عمر علي حسن)
|
عمر على حسن
| Quote: حاشيه: التكنولوجيا بتاعتك مابتفتح عندي .. لكنني سمعت بقلبي |
غير المتصفح
ممكن Google Chrome يا رئيس
لانو الاغنيه سمحة متل اقوان سادومبا فى المريخ
و التسجيل رائع روعة تمريرات البرنس القاتله ديك
............................. القلب براهو ماااا بنفع
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: سيف الدولة كامل)
|
طارق الكوتش
Quote: ممكن Google Chrome يا رئيس
لانو الاغنيه سمحة متل اقوان سادومبا فى المريخ
و التسجيل رائع روعة تمريرات البرنس القاتله ديك
............................. القلب براهو ماااا بنفع |
بحس في إستايل كتاباتك لونية مرتضى
قريبك ولا mere coincidence منهجي ؟
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: الطيب شيقوق)
|
Quote: أسعد الله صباحاتكـ وأيامكـ كلها!!
_
والحنان الفي عيونا أصلوا نابع من عيونكـ!! |
عارف يا ود الصائم، قبل شويه كان بيتكلم معاي صديقي د. علي عوض يوسف
عن مشاهدته على قناة فضائية حفل تأبين تم في العباسية لزيدان ، قال لي أن منظم الحفل حكى
أن بعض الأشقاء الجنوبيين ممن غادروا إلى الجنوب عندما بلغهم نبأ رحيل الحبيب زيدان
أرسلوا مشاركات ماليه ل (كشف العزاء) عن طريق تحويل أرصدة هاتف لإخوانهم ممن بقوا في
الشمال وقد وصلت المساهمات إلى حيث أريد لها..
زيدان ياودالصائم لم يكن مغنيا ولا مطربا بل كان مؤسسة إجتماعية كاسحة جمعت حولها كل السودانيين
على اختلاف أعراقهم ومشاربهم السياسية وطوائفهم وهذا ما فشل فيه كل ساسة السودان وأحزابهم بلا استثناء..
أغنية زي (كنوز محبة) لها مفعول نووي ولكن - سبحان الله - مضاد للتشظي وأثر وحدوي يفوق كافة المؤتمرات
منذ المستديرة وحتى المستطيرة..
إنت قايل زيدان رحل (جسدا) من هيِّن!!
سمعت بالغبينه يا محمد؟
حكوا ليك عن الفشفاش المهرود و حَش الكبِد والحشا المحروق؟
يحفظك مولاي ..
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
Quote: زيدان ياودالصائم لم يكن مغنيا ولا مطربا بل كان مؤسسة إجتماعية كاسحة جمعت حولها كل السودانيين
على اختلاف أعراقهم ومشاربهم السياسية وطوائفهم وهذا ما فشل فيه كل ساسة السودان وأحزابهم بلا استثناء..
أغنية زي (كنوز محبة) لها مفعول نووي ولكن - سبحان الله - مضاد للتشظي وأثر وحدوي يفوق كافة المؤتمرات
منذ المستديرة وحتى المستطيرة.. |
اصدقك القول اخي المرتضى وتاني ما تزيد عليك النبي
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: الطيب شيقوق)
|
| Quote: والنجوم تلمع بعيد تسخر من السهران وحيد |
بالله شوف..
أتصورها في مجراتها بنصف إبتسامة أسى وبنصف حزن لما رأت صاحبنا اليتيم(المستجد) في دنيا الأرق..
والله يا الأمير بدر ، تعبير (الليل يبقى ليل) لايفي معنى ظلمات البحر اللجي البعضها فوق بعض وحسب
بل الضياع الخرافي الأبدي في نفق الثقوب السوداء ..
عارف هنا ، وسيلة الرؤية الوحيدة هي القلب ..
(ثم أغمض عينيك حتى تراني)..
عشان كده زيدان في التسجيل دا قال إن شاء الله تصل للناس من جوه القلب لجوه القلب ..
بالصوره البتعجبني..
بالصوره البتحبوني بيها..
شي صعب ..
صعب ..
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
| Quote: عندما كنا في النهود الجميلة (المدينة أقصد) |
مولانا!!!!!
ياخى دعنا نشكلها كما نحب..
ونقرأها كما نريد...
واعفنا من الدخول دهاليز النحويين ..
والشسرح المفسد الذى اكره ويمقت الكثيرون ممن مروا من هنا..
وخلينا نعالجها كل حسب اثر كبسولة الفرح
التى تخلقت في دواخله من غناء الطروب زيدان..
بالله انتو ناس فى دنيا واللا حور فى جنان؟؟
لاحولالالالالالالالالالالالالالالالالالالا،،،
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: الطيب شيقوق)
|
| Quote: والمحبة فيها لو ما إنت ما كانت محبة .... |
وزيدان عارف الكلام دا كويس يا نصر ،
يعرف أن هناك أناسا يمنحون الأشياء معناها، لذا تجده يغني :
من بعدِك أنتِ يعيش منو ومين تاني مين يتمنى العمر..
المسأله ببقى مافي ليها داعي ..
كلو كلو..
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: الطيب شيقوق)
|
Quote: ياخ انت اكبر مسنوح في الدنيا
شوف خمشا كيف ؟ زى الحدية |
هسه فى زمتك المسنوح منو فينا؟؟
غايتو جنس غايتوهات!!
بس زى ماقال شاغل الدنيا المتنبى:
و جــرم جـــرّه ســفــهــاء قــــوم*** فـَـحـَـلّ بـغـيـر جـارمــه الــعــذاب
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: صديق الموج)
|
| Quote: غايتو جنس غايتوهات!! |
ههههههها جننتها جن - إيمين سيبويه ما بجمعها كدا
Quote: بس زى ماقال شاغل الدنيا المتنبى:
و جــرم جـــرّه ســفــهــاء قــــوم*** فـَـحـَـلّ بـغـيـر جـارمــه الــعــذاب |
صدق زهير إبن أبي سلمى حين قال :
وإنَّ سفاه الشيخ لا حلم بعَدهُ وإن الفتى بعد السفاهة يحلُمُ
عيييييييييييك خم وصر يا ود الموج
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: الطيب شيقوق)
|
Quote: صدق زهير إبن أبي سلمى حين قال :
وإنَّ سفاه الشيخ لا حلم بعَدهُ وإن الفتى بعد السفاهة يحلُمُ
عيييييييييييك خم وصر يا ود الموج |
ود القبائل ..حبابك
لا اكابر فبنا طمسه لم تستطيع السنون ان تمحها..
يخاويها شوق لبعض نزق ومآرب قضاها الشباب هناك تحبب
الينا الاوطان، لا فكاك منهما وما انا براغب،،،
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: ناصر يوسف)
|
| Quote: مولانا غايتو ماخفت فينا الله.. |
يا موج ، لزيدان - كالأوطان - يد سلفت ودين مستحق ، زيدان بنريدو في غنائه وهذره وروحه الجميلة
، أحبه كل من عمل معه ومن استمع إليه . عندما اختلف مع عمر الشاعر تملك المستمعين شعور كما لو أن هناك أزمة
قومية تستدعي التئام مجلس الأمن القومي وإعلان الأحكام العرفية ، شعرنا بأن هذا الثنائي في دواخلنا
لايقل عن Xavi وIniesta للحالة الإسبانية في نهائيات المونديال الأخير . كان لابد أن يعودا لبعضهما لأنهما
ظاهرة فلكية لاتتكرر كثيرا ، كمرور المذنب هالي بجوار الأرض لايحدث إلا مرة في كل 75 عاما. كانت من الثنائيات
الأسطورية في تاريخ فننا السوداني الخصب العجيب.
زيدان يا عزيز لملمنا في مشهد كمشهد مارلون براندو في (القيامة الآن) ، جمع كل المحبين أمامه ليكتبوا على
ألواحهم ما تيسر من سيرة (اللهفة والريد والعذاب) وبعده ضاعت الأقلام واندلقت الأحبار وكُسرت الألواح.
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: طارق الكوتش)
|
الطيب شيقوق
Quote: بحس في إستايل كتاباتك لونية مرتضى
قريبك ولا mere coincidence منهجي ؟ |
ياخ الراجل ده مااااا بتقدر > ظلمتنى ياخ >
مرتضى انيق ورائع فى كتاباته للمدى البعيد ..
لكن ذلك الاحساس .... ربما هنالك قليلا من
الاهتمامات المشتركة زيدان ... الهلال ...
وحاجات تانية حاميانى > لوووووووولز
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: طارق الكوتش)
|
اخي محمد المرتضي
الاستاذ بشير عبد الماجد لمن لا يعرفه شاعر مجيد ومقل
وهو شقيق وزير الثقافة السابق عبد الباسط عبد الماجد
وهو من ضمن من يعرفون بشعراء الاغنية الواحدة امثال
الطيب محمد سعيد العباسي " يا فتاتي"
عبد العزيز جمال الدين " لو تصدق "
د. عبد الله محمد سليمان " عود لينا يا ليل الفرح "
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: طارق ميرغني)
|
Quote: بحث يارئيس
ثم تحميل ف تثبيت
ثم فتح اى موقع من خلاله > سريع
|
ياكوتش
انا كان بعرف قدر ده كنت شاركت بيل جيتس ..
واحد زميلنا بعد ما قرأ ورقه الاسئلة في امتحان الترقي وقف انتباه وحيا وراح طالع .. المراقب
لحقه وسأله مالك طالع ؟ فرد عليه بغضب شديد : (نص زايد ربع ليه ؟ انا لو بعرف زي ده كنت
أروح جامعة الخرطوم مش اجي عندكم)
نحن يكوتش يادوووووووووووووووووبك نفك الخط
عمر علي حسن
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: طارق ميرغني)
|
Quote: رحمه الله بقدر ما أمتع وأطرب وبقدر ما قدم لدنيانا من محبة..
وبقدر ما تفعله فينا مثل هذه الأغنية,,
هذه الإغنية دُرَة نادرة من درر زيدان... |
عارف يا أيمن ، لم أر فنانا طوال مشواره الفني انتقى كلمات
أغنياته بعناية كزيدان ، ربما لحظت أن جل - إن لم يكن كل - أغنياته تنضح
تفاؤلا حتى لو تسبب فراق الحبيب بلوعة 3000 ميجاوات أو كان مستوى الحريق من
الدرجة الرابعة ، لذا اجتمع الناس حوله في حياته وانفرط عقد المحبين برحيله
فهو بحق ( مقياس رسم للتواصل والرحيل) كما قال العزيز شمو.
| |
|
|
|
|
|
|
|
|
 Re: أجمل تسجيل لهذه الأغنية الإستثنائية.. (Re: طارق الكوتش)
|
المرتضى،
والله قدرما أقول دي
القى غيرا تكورك احتجاجاَ
الله يرحمك يا زيدان
ـ
بالجنبه،
وإن كان فيها فكت بعض آخر
أوّل رجفت قلِب كان سببا ليه كل العذاب، كلمات، أدتني ياها فِلاني، يطراها الله بالخير، في محطة الباص البودينا المدرسه
ـ
إييه،
دنيا
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: ناظم ابراهيم)
|
Quote: كتبها د / بشير عبدالماجد فابدع
وراهن عليها بشير عباس
وكســبها زيــــدان
واهداها لنا ... اغنية لا ينتهى سحرها ابــدا" |
يا عبد الدائم أخوي مثل هذه القصائد لايكتبها الشاعر بل هي تكتبه،
زي ما قال طارق ميرغني إنو ما كتب غيرها ووالله لو لم يكتب غيرها لكفته،
كلمات ولحن وأداء بس مثلث برمودا..
دا ما سحر يا سيدي ديل فتحوا مدرسة لهاروت زاتو ..
سمعت بالريده الفارده جناحا تشتاق للربيع ؟؟
سمعت الربيع قال ليها (خلي من حضنك ضرايا)؟؟
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
ناس امس استثنايين جدا وسودان امس ونيله لم يحصل فيهم اى تغيير غير المرتادين
اسمح لى استاذى ان اشرح الارتياد مرتادى النيل كانو يستمتعون به ويضيف اليهم النيل
ويخرجوا لنا لحن اوقصيده وانعكست الايه الان مرتادى النيل اصبحو شبه حتى لو كان من ناس امس
لان الحابل بالنابل اختلط والعكس صحيح شكرا المرتضى حامد على هذا التميز لكن الله غالب نعمل ايه
مع هذا المشروع الذى قال للنيل اسكن ولا تجرى يانيل الحياه بعد الساعه 11 مساء
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: الطيب شيقوق)
|
| Quote: وكيف نضيع احلي ما اهديت يا غالي |
الخليل،
(لم يكن زيدان إبراهيم فنانا عاديا، ولعله الفنان الثاني بعد إبراهيم عوض الذي يتحول
إلى نجم وظاهرة فنية واجتماعية، قبل إبراهيم عوض لم يعرف الفنانون ظاهرة النجومية بمعناها
ومحتواها الأجنبي، إذ لا يستمع الناس لغناء الفنان فقط، لكنه يتحول لرمز اجتماعي وثقافي،
يقلدونه في لبسه وطريقة تصفيف شعره ومشيته وكلامه) هذا بعض مما كتب أخي فيصل محمد صالح
عن زيدان ، أذكر جيدا الموجتين الزيدانيتين اللتين عاصرناهما وكل منهما تضارع إيفيرست
في ارتفاعها، ( في الليله ديك) ما كانت موجة وحسب بل تسونامي بحاله سأعود إليه أما
منتصف الثمانينيات فقد إجتاحت
الشباب الموجة الثانية تحمل معها مجموعة من الأغنيات حتى القديم منها وكان شباب الجامعات
وغيرهم يتبادلون المعلومة عن مكان الحفل ويكونوا أول من يوقع على دفتر الحضور وزيدان
يراقب بابتسامة لاتغيب ولايمكن أن يمر الحفل دون أن يتحفهم ب (ليه ياسمير ما جيتا
حجبوك ولا نسيتا) والتي كان يختم الكوبليه فيها بعبارات من عنده يتم تداولها بين الشباب
في اليوم التالي وحتى الآن..
دخل السسسينما..
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
محمد المرتضي سلام وكل المتداخلين
ياخي والله كنوز محبة دي أنا كان عندي ليها شريط.. المرحومة المبدعة ليلي المغربي بتلقي فيه شعر الأغنية دي.
جاني واحد زيارة وسرق الشريط (إنت عارف طبعاً سرقة السودانيين للأقلام والأشرطة والولاعات ، وكيس الصعود)
ومن ديك أنا ما لميت تاني في الشريط دا.
فا بالله عليكم العندو طريقة للتسجيل دا ينزلوا لينا.. نزله الله
مع فائق الشكر مقدماً
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد ادم الحسن)
|
Quote: يا الله ...
حمدا لله على السلامة ... |
الله يسلمك من كل شر يا تيسير* ،
والله يا بت المبارك ، في الواقع تمثل الكتابه عن زيدان كتابة لتاريخ جيلنا في كل مناحي حياته السياسية
والإجتماعية والثقافيه ، فصورة زيدان إبراهيم - على أي شكل أتت - تتطابق مع رسم القلب ECG لمعظم مجايلينا،
، ومن خلال عرض الحقبة الزيدانية يمكنك مشاهدة عرض بانورامي فيه كافة تفاصيل يومنا من لحظة تلاوة الشيخ عوض عمر
أو صديق أحمد حمدون مفتتحا الإرسال الإذاعي وحتى انتهاء حفل على وش الصباح بعد أن (وفقك الله) بإزالة تعب النهار
بشوفةً ترد الروح وابتسامة من عيون الحبيب قُبَّال لملمة الكراسي .. لذا تكون الكتابة عن الرحيل هنا يا تيسير صعبه
بالحيل وزي ما قال فادح الروعة أرنست هيمنجواي :
“There's nothing to writing. All you do is sit down at a typewriter and open a vein وبتعبير شباب اليومين ديل:
( تبكي بس)..
__
*
تيسير عووضه وتيسير المبارك في برنامج واحد؟
يا اخوانا واحد يصحي تيسير النوراني ..
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
ود المرتضى عودا حميدا مستطاب
كل التيسيرات معاك الله يسر امرك فى كل خطوة تمشيها
والله كنوز محبة زى ما بقولوا ناس الزار دى خيطى عدييل كده
لكن التكنلوجيا دى صعبة خلاص ما خلتنى اسمعها
خالص
| Quote: يا اخوانا واحد يصحي تيسير النوراني .. |
صاحييييييييييييين ومسجليييييييييييين حضور وادى حتلة فى البوست ده
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: tayseer alnworani)
|
Quote: لما سألوا بشير عبد الماجد عن مناسبة قصيدة "كنوز محبة"
قال ليهم : أسألوا القصيدة...
....
ابقى أسأل عن قلوبنا |
أسألي بشير عبدالماجد
-
وقتها كانت الأحوال هادئة في منطقة العاصمة والخرطوم عموم والناس رضيانه بالبيها والعليها سوى جيوب مقاومة
يسارية وتهديدات يمينية بين الفينة والأخرى ، لكن الململة كانت في مهدها ، وفي وسط ذلك الهدوء الحذر يقوم
ينفلت عقال الشارع برائعة الشاعر بابكر الطاهر وشاعرية عمر الشاعر الملحن (في الليله ديك) .. لا أريد الكتابة عن
الأغنية يا ممكونه لأن كل الممكونين من رصفاء الزمن الأخضر لايحفظون الأغنية وحسب بل يعرفوا السيره الذاتيه
لجيران كاتبها وعندهم كم شجره في الشارع وعمر الشاعر زاتو فصيلة دمو شنو وآخر قميص حقو كان مشجَّر كيف،
أما زيدان .. زيدان ؟ زيدان أصبح في ألسنة كل السودانيين وبأكبر مما كان عليه زيدان فرنسا في أفئدة
حضور الشانزلزيه وهو يدمر فريق البرازيل بهدفي الكروز توماهوك الشهيرين في نهائي مونديال 2002.
كثير من الأصحاب وقتذاك كانوا سيقدموا مقترحا لنميري أثناء مروره بشارع ودالبصير في طريقه لبيت الأسرة
في ودنوباوي لتغيير النشيد الوطني للبلاد من نحن جند الله جند الوطن إلى (مديت يميني بلا كلام ما قدرت قدامك أقيف)
ويبقى مارسليز سوداني جديد ويقفل على كده.
زيدان !! بعد رحيلك مديت يميني ويسراي بلا كلام وما قدرت قدام نعشك أقيف.
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: DKEEN)
|
Quote: دي كنوز محبة ؟؟؟؟
يا ود حامد ياخ دي كل ما في باطن الأرض من درر من اليمن لي الشام . |
ياها يا عثمان،
جزيرة الكنز،
مناجم الماس،
أو قل إنه المثلث الذهبي ، عندما تكون هناك كلمات ترتقي بالنفس وتخليك
تحس إنك تسير على وسادة هوائية وتقوم تصادف ملحن أمو داعيه ليهو وبقلبه
يعرف إنو اللحن دا قُد على حُنجرة وحبال صوتيه لزول معين دون خلايق الله في
المجموعه الشمسيه ويديها ليهو يغنيها ، أها هنا يحدث ال Big Bang..
ياخ القصيدة واللحن ديل كانا رتقا وفتقهما زيدان وجعل منهما بصوته كائنا حيا
يتمطى في وجداننا ويتمدد في العمر ويمشي في شوارع القلب يوزع الأزهار والورود
بين المهدودين والمشلهتين والشحادين والمغلوبين بالطول والعرض، يمسح عنهم
كآبتهم وفواجعهم ويغسل عنهم الأدران والأحزان وينسيهم الوالي والألم المتوالي،
لكن برضو ممكن يقلقل مرهفي القلوب فيهم مستهدفا جهازم العصبي المركزي فتتجافي
جنوبهم عن المضاجع، وحتى كان رقدوا تجدهم يتقلبوا في الأسِرَة زي اللقيمات في الصاج و
في عز ليل الشتاء يسامرون الأنين يتأوهون مرددين : أحي الحر ..
زيدان من أهل الكرامات يا عثمان ..
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
والله يا ناس مسقط والخليج حالتكم تحنن، دخلت البوست لقيت رجال عجايز بيقولوا للزمان أرجع يا زمان قلت أكابركم ،، ولكن هيهات بس ناقصين صاحبي دالي الحبوب،، بعدين يا ود شيقوق وود المرتضى قولي أحبك تستبين كهولتي بتاعت أول أمس شكلها ما جابت دخل،،أها يا ود المرتضى وقع ليك كلامي
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: Afraa Sanad)
|
Quote: والله ما عارف أقول شنو!
بالجد كدا!
مرتضى ازيك ياااخ! |
نعم يا الباهي،
كأديب تدرك جيدا أن ما يحتشد بالداخل من مشاعر يتطلب زمنا طويلا ليهدأ أولا ليتم
ترتيبه ثانيا ثم التعامل معه ، ظللت لفترة أتأمل ما قاله زيدان عفويا قبل أن
يشرع في ترتيل (كنوز محبه القصيدة) ، كلماته كانت تعبر عن فنان فنان ، زيدان كان
فنانا أصيلا ، الفنان الحقيقي هو الذي يتمثل الفن في كل حركة وسكنة في حياته العادية ،
كان زي الضوء البيتلموا الناس حوله يتسامرون ويبثون أشجانهم ثم يتفرقوا يغمرهم إحساس بالرضا..
قرأت - يا زاكي - أن زيدان لم يقلد أي فنان في بداياته الفنية ، يعني جاء إلى عكاظ الفن والطرب
ثم الشهرة بي حقُّو عديل وحفر في الصخر ليعبد طريقا على أرقى المستويات الهندسية والمواصفات
العالمية لم يعاني من تشققات أو صدوع ولم تجرفه السيــول حتى مغادرته الفانية ، وبعد أن أصبح
رقما يجلس على قمة لاتطالها النسور تغنى لمطربين عاصروه إكراما لهم وبرا بالزمالة ، وبلفتاته تلك
ألغى بشكل حاسم وبالبيان العملي مقولة (سمح الغنا في خشم سيدو) ..
إستمع إليه يغني (الذكريات) للشفيع مثلا أو (يا خاين) لإبراهيم عوض وغيرهما وتلك هي القوة الحقيقية.
والله يا زاكي ما عارف ليه تغنيه بأغاني الغير يذكرني ب (العفو عند المقدرة) !!
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
Quote: مرور من اجل السلام و التحية
والتشكرات البنفسجية
على هذه الالحان الندية |
تسلم يا كوتش ، بس بالله حكِّم ضميرك جوه الجوه واستفتِ قلبك وراجع يومية
الأحوال ودفتر العيادة الخارجية للشعب الســـوداني وشوف زيدان في مسيرتو الفنيه شاف
كم زول عيان يندب حظو وبقدرة جالينوس وإرادة المولى شفي على صوته.. ياطارق
قيل إن الموسيقى حديث الملائكة واللغة التي لاتحتاج دكشنري وزيدان كان
من عماليقها ومن أمهر المعالجين الروحيين الذين جادت بهم المليون
ميل معذَّب.. في أعلى حالات الجفاف والجفاء والجدب يجئ صوته مبشرا:
باكر بيعود القاش.
له الفردوس بإذن المولى..
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
Quote: اما هنا فتسيل كنوز المحبة
اودية وافلاجا....... |
عساها لاتبلغ (قونو) و (فيت)]
شكرا مولانا عبدالحافظ على ( الفحص) و (الإفادة) ..
يهمني كثيرا أن يستمع كل من يمر بهذا البوست لكلام زيدان قبل القصيدة
ويهمني أن يسرِّي النفس بالموسيقى والصوت القادم من السماء لذلك الراحل..
والله يا مولانا نحن مقصرين مع أفذاذنا كتير.. نعم نكرمهم في حياتهم لكن
ليس بالقدر المطلوب وبمجرد رحيلهم نجزع لانهيار مأرب..
(وردة واحدة لإنسان على قيد الحياة أفضل من باقة كاملة على قبره)
- قول مأثور-
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: willeim andrea)
|
Quote: وددت ان اراهما بعد زيدان .. وبعد الاحزان المترعه علي شطآنهما .. لا بد انهما يتعانقان
في حرقة واسي علي فتي العباسية الممتدة جذوره الي رهيد البردي والذي نثر علي السودان كله
كنوزا من المحبة والرفق لو نهلنا منها ما اصابتنا فرقة ولا كدر
ياشيخي سابكي مجددا ثم اعود اليك بما ينوء به قلبي المحب لهذا الساحر الفنان .. الذي رحل
عمر علي حسن |
صدقني ياأبا أكرم، كلما هوى نجم من سماء بلادنا تصبح مصيبتنا أكبر من أن تحتمل ..
نعم ، بعض من التكوين الجيني فينا حبنا لأرض بلادنا غض النظر عما يحدث فيها وتبدل الناس
والحال .. لكن حين تهوي أنجم كزيدان والخالدي وهاشم ميرغني وغيرهم يصبح
السُرى في صحراء العمر أمرا صعبا ، تاني يا سعادتك با GPRS زاتو مامكن نسافر ،
قلَ الزاد وتزايدت الرزايا والأرزاء وتمدد الربع الخالي وانغلق درب (الأربعين) وتكاثر قطاع الطرق ..
ود العباسيه ورهيد البردي كان وزارة للريده والتسامح وخفة الروح ، وبحق لا أدري كيف حال
ملتقى النيلين وعناقهما الأبدي بعده ومتى سيرفع حال الحداد وكيف هو حال تراب أمدرمان التي عشقته..
غايتو يا سيدي الكريم الحال بقى صعب بالحيل لكننا لانيأس من رحمة المولى ولا نقل إلا ما يرضيه..
سَقى الغَيثُ غَيثاً وارَتِ الأَرضُ شَخصَهُ وَإِن لَـم يَـكُن فيهِ سَحابٌ وَلا قَطرُ
وَكَـيفَ اِحـتِمالي لِلسَحابِ صَنيعَةً بِـإِسقائِها قَـبراً وَفـي لَـحدِهِ البَحرُ
مَـضى طـاهِرَ الأَثوابِ لَم تَبقَ رَوضَةٌ غَـداةَ ثَـوى إِلّا اِشـتَهَت أَنَّـها قَبرُ
ثَوى في الثَرى مَن كانَ يَحيا بِهِ الثَرى وَيَـغمُرُ صَـرفَ الـدَهرِ نائِلُهُ الغَمرُ
عَـلَيكَ سَـلامُ الـلَهِ وَقـفاً فَـإِنَّني رَأَيـتُ الـكَريمَ الـحُرَّ لَيسَ لَهُ عُمرُ
(أبوتمام)
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: الطيب شيقوق)
|
| Quote: زيدان نسمة رقيقة جميلة معتقة عطرت الساحة الفنية بأجمل الالحان . |
سيف الدوله،
هسه بالله الأغنيه دي براها مش أهل؟
مش آلة زمن؟
هسه لامن تسمعا في أمريكتكم الهناك ديك مش بتنقلك - كصرح بلقيس -
لقلب بلادك الحبيبه وتلقاها فارده يديها عشان تاخدك في حضنها تحت الرذاذ؟
سألتك بالله مش غنيه وطن؟
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
Quote: Quote| Quote: : عندما كنا في النهود الجميلة (المدينة أقصد) |
مولانا!!!!!
ياخى دعنا نشكلها كما نحب..
ونقرأها كما نريد...
واعفنا من الدخول دهاليز النحويين ..
والشسرح المفسد الذى اكره ويمقت الكثيرون ممن مروا من هنا..
وخلينا نعالجها كل حسب اثر كبسولة الفرح
التى تخلقت في دواخله من غناء الطروب زيدان..
بالله انتو ناس فى دنيا واللا حور فى جنان؟؟
لاحولالالالالالالالالالالالالالالالالالالا،،، |
على رسلك يا هذا ..
والله يا ابن معديكرب خشيت أن تصمني العرب بما لم يرد بخاطري فتوخيت الإستثناء
وسيلة سيما أن مضارب بني بكري تحتشد هذه الأيام بعلوم التشريح حتى غدا المنبر
مرجعا يضارع أجعص Atlas of Pelvic Anatomy and Gynecologic Surgery ..
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
Quote: هسه بالله الأغنيه دي براها مش أهل؟
مش آلة زمن؟
هسه لامن تسمعا في أمريكتكم الهناك ديك مش بتنقلك - كصرح بلقيس -
لقلب بلادك الحبيبه وتلقاها فارده يديها عشان تاخدك في حضنها تحت الرذاذ؟
سألتك بالله مش غنيه وطن؟ |
دي أهل وبس يا محمد المرتضي...
دي فيها كل الحنين والحنان...معبأة في كل
كلمة وجملة موسيقية بداخلها...
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: nazar hussien)
|
وصلتني - اخي المرتضى - هذه الرسالة من الاخ سعد ابو نورة وردت اليه من عزيز لديه فضل عدم الكشف عن اسمه
Quote: زيدان إبراهيم والشارلستون والحزن النبيل
الحزن الذي عم السودانيين بكافة توجهاتهم الفكرية وأطيافهم السياسية وهم يودعون الفنان زيدان إبراهيم ، يؤكد بأن الفنان الراحل من الصالحين . فقد وحد زيدان السودانيين في فاجعة رحيله بأكثر مما فعلت السياسة ، وذلك لأن تيار الحياة الدفاق الذي بثه صوته الجميل في وجدان الناس وأحاسيسهم قد ارتبط في أذهان الناس بأيام لم يعرفوا فيها ذل وهوان الحياة في زمن الإنقاذ . أيام عرف فيها الناس معنى الوفاء : الوفاء للمحبوب والوفاء للوطن والوفاء للقيم السامية ، التي إندثرت في زمننا هذا . وهي كلها قيم غنى لها زيدان ، لأنه قد كان وفياً : وفياً للشعب السوداني ، وفياً لوطنه ،، وفياً لأمه ، وفياً لمعجبيه .
لقد حزنت غاية الحزن لرحيل زيدان إبراهيم ، وإنداحت في داخلي نوستالجيا امتدت طيلة اليوم وامتلكت عقلي وقلبي ، فقد كان زيدان نسمة معطرة لفترة شبابنا في غنائه ، كما قد كان ظاهرة جذبت حوله الكثير من المعجبين الشباب ، الذين طرز وجدانهم بشفافيته التي اقتحمت حياتهم في فترة كانت تموج بالكثير من التحديث والتغيير ، فكانت كلمات أغانيه وألحانه قفزة في سلم الغناء السوداني . كان زيدان ظاهرة بالمعنى الذي مثله (الفيس بريسلي) وفرقة الخنافس بالنسبة للأمريكيين والأوربيين ، فقد كان إعجاب معجبي زيدان يتجاوز إعجابهم بأغانيه لإعجابهم بشخصيته ولطفه وأناقته وأسلوب تصفيف شعره . لقد استوى زيدان في ذلك الوقت نجماً كامل الدسم تدور حول محوره حفلات المسرح وليالي التلفزيون الساهرة وحفلات الغناء في بيوت الأعراس . وتمدد في كل مدينة في السودان أشخاص يرددون آخر أغاني زيدان ، بل إن حفلات الأعراس في العاصمة والأقاليم لم يكن لها أي طعم بدون أغاني زيدان . لقد تزامن تربع زيدان فوق عرش نجوميته مع دخولنا أول مراحل المراهقة في بداية السبعينات ، فمن حيث المجايلة أجد نفسي أنتمي للجيل الذي غنى له زيدان الأغاني التي صاغت مشاعره وشكلت وجدانه .. لقد كانت أغاني مثل (قصر الشوق) و(غربة وشجن) و(وسط الزهور متصور) تفعل فعل السحر في أبناء جيلي .. لقد حلقت بهم هذه الأغاني في سماوات عاطفية تقود مشاعرهم في جميع حالات الفرح واليأس والإحباط ..
لقد كانت فترة بداية السبعينات فترة تفتح وحركة وثورة على مستوى العالم ، فهي الفترة التي أعقبت فترة ثورات الشباب في نهاية الستينات في أوروبا وبروز حركات الرفض والهيبيز في قلب المدن الأمريكية والأوربية . ولقد انتقلت هذه الحركات لنا في شكل صرعات الموضة التي غزت شوارع المدن الكبرى في السودان ، حيث بدأ الشباب في لبس الشارلستون والقمصان المشجرة وإطالة شعورهم ، وهي صرعة من صرعات الموضة التي قاومها الكبار ، خصوصاً الآباء ، بكل شراسة . ارتدينا الشارلستون في البداية على استحياء ، وعندما استقوى عود الظاهرة وانتشرت ، كان الشارلستون نفحة من نفحات التحرر التي زامنت أغاني زيدان . زيدان أيضاً بكل وسامته ونبله قد ارتدى الشارلستون وأصبح أيقونة لشباب جيلنا من حيث الوسامة والغناء والنجومية . وإذا كان الجيل الذي سبقنا قد طرب للفنان الكبير (عثمان حسين) في أغنية (الفراش الحائر) ، فإن حيرة أبناء جيلي قد تبددت وهي تطرب لزيدان في أغنيته الشهيرة (فراش القاش) .. وبنفس القدر الذي مثل فيه (عثمان) حسين ثورة في اللحن الموسيقي في أغنية (الفراش الحائر) ، فإن لحن (فراش القاش) قد كان أيضاً ثورة في اللحن والتطريب به إمتلك زيدان قلوب كل جمهور الشباب . هؤلاء الشباب الذين اكتهل عمرهم اليوم في زمن الإنقاذ ، من الذي يداوي نارهم والتياعهم لرحيل زيدان .. داوي ناري والتياعي ، هكذا غنى زيدان ، ولكن لا يداوي نار والتياع معجبي زيدان ، إلا نفس الداء : وداوني بالتي كانت هي الداء ، كما قال الشاعر .. فإن عودة الزمن الجميل الذي برز فيه صوت زيدان الساحر والقيم التي غنى لها هي الداء والدواء ، وهي النسمة الملطفة لعذابات أهل السودان اليوم .
أمران شدا انتباهي في زيدان : أولهما حبه ووفائه الشديد لأمه . وثانيهما ما روي عنه بأنه قد اعتزل الناس لفترة ثلاثة أيام بدون أكل وشرب ، حزناً على تنفيذ الحكم على الأستاذ محمود محمد طه . هذان الأمران يدلان على الشفافية المفرطة لزيدان وعلى رهافة الحس الإنساني عنده ، فلا عجب أن العندليب الذي يغرد في صوته ممدود من هذه الشفافية والرهافة الإنسانية . هذا النوع من الحب الإنساني العظيم هو الذي يشغف الفؤاد ويحرق الحشا ، فشخص مثل زيدان لا يمكن أن يعيش بدون أن يغرد ، كما لا يمكن لقيس بن الملوح أن يعيش بدون ليلاه :
ذكرتك والحجيج له ضجيج بمكة والقلوب لها وجيج
فقلت ونحن في بلد حرام به لله أخلصت القلوب
أتوب إليك يا مولاي عما جنيت فقد تكاثرت الذنوب
وأما عن هوى ليلى وتركي زيارتها فإني لا أتوب
غرد زيدان بالغناء والذي كان حبه الأول والأخير حتى آخر لحظة في حياته ، وتوفى بدون أي حبيبة أو زوجة أو أولاد يسندون ظهره في مستقره الأخير بمقابر الشقلة بالحاج يوسف .. ألا رحم الله الفنان زيدان إبراهيم وأغدق عليه من المنح والعطايا بقدر ما منح من الفرح للشعب السوداني ، وجعل حب كل الشعب السوداني له شفاعة ترقى به المقامات العلا . |
احييك اخي اسعد واحيي اخي الكريم الذى تفضل بإرسال هذه المداخلة الينا عبرك
| |
|
|
|
|
|
|
|
|
|
Re: أجمل تسجيل لهذه الأغنية الإستثنائية.. (Re: محمد المرتضى حامد)
|
Quote: بالجنبه،
وإن كان فيها فكت بعض آخر
أوّل رجفت قلِب كان سببا ليه كل العذاب، كلمات، أدتني ياها فِلاني، يطراها الله بالخير، في محطة الباص البودينا
المدرسه
إييه،
دنيا |
(ليه كل العذاب) والأسئلة الدائرية المشروعة المماثلة كانت من الموجات التي تذكرني بأيام
الدوره المدرسية - برضو ما عارف ليه وما تسألني – وعندما أقول أسئلة دائرية أعني أنها بتمشي وتلف وتجي
ولاجديد ولا من يهتم .. زي سير العفش في مطار الخرطوم .. التجاني حاج موسى شاعر مرهف ولكنه أعاد ذات السؤال
الذي طرحه محجوب سراج في (ليه بتسأل عني تاني) وسيف الدسوقي ( ليه تقول لي انتهينا) ولاتنتهي دائرة (الليهات)
حتى جاء من قال (من غير ليه) ، لكن بيني وبينك هي من الأغاني التي توهطت في القلب رغم الماسوشية الحميدة
التي تتبدى في قوله:
عذِّب فيني بالـِغ وزيد منو الكتير
لو يرضيك أذاي عــــذب يا أمير
قالو البهوا دايماً ياما يشوف كتير
وشفــت غلاوتي عندك وحبيت الألم
عارف يا محمد ، زيدان كان يعطي الكلمات ألقها غض النظر عن درجة قبول المستمع للقصيدة إذا ما تغنى بها
شخص غيره وفي هذا مستوى من السيطرة واحتكار الوجدان بصورة حصرية لاتتأتى إلا للمبدعين ..
قلت لي في محطة باص المدرسه؟
يعني ما من الروضه؟
اللَخَّرَك شنو يا محمد؟
| |
|
|
|
|
|
|
| |
محمد المرتضى حامد
طارق جبريل
عمار محمد ادريس
Rawia
الطيب شيقوق
محمد سنى دفع الله
محمد أبوالعزائم أبوالريش
محمد عبد الماجد الصايم
بدر الدين الأمير
تيسير عووضة
نصر الدين عثمان
صديق الموج
أيمن الطيب
عبد الدائم سيد أحمد
khaleel
mamkouna
Osman Musa
الزاكى عبد الحميد
سيف الدولة كامل
محمد عبدالرحمن محمد
ناظم ابراهيم
خالد المحرب
محمد ادم الحسن
saadeldin abdelrahman
Afraa Sanad
عماد الشبلي
willeim andrea
د.محمد حسن
محمد زكريا
osman righeem
كمال سالم
فيس بوك
تويتر
انستقرام
يوتيوب
بنتيريست