|
|
 حاج ماجد سوار vs علي محمود حسنين ١٠/٥ لصالح سوار
|
كما توقعت فإن علي محمود ظل يكرر ويجتر ويستهلك كلام أكل منه الدهر وشرب، وليس به أي جديد .. كلام الناس حافظاهو صم من كثرة الترديد لأكثر من عشرين سنة .. وما كان في أي break through في خطته الحوارية ..
إذا كان هناك سبب قوي لثورات الشعوب فهي الفساد والغلاء وشظف العيش وإختلال العدالة الصارخ والمحسوبية .. وكان مفروض يركِّز عليها .. وهو قد حاول إقحامها ، ولكن طبيعة البرنامج وضيق الوقت لا يسمح بالتطويل والقراءة من الورق ..
حاج ماجد سوار وجد الأسئلة ساهلة يسهل الإجابة عليها ، بل إستطاع أن يقلب الإنتقاد لصالحه..
فيصل القاسم كانت أسئلته لحاج ماجد سوار كأنها كورة معكوسة سهَّلت علي حاج ماجد التهديف ..
|
|
 
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: Munir)
|
هسه عليك الله يا منير انت جادى دا رايك فى سوار ؟
كلامو دا دخل راسك ؟
بسألك جادة والله لانى بثق فى موضوعيتك ..
لو كلامو دا عجبك
ففعلا الشايقيي اهل طارق كلامهم صاح
بقولوا كل زول عاجبو الصارى !!
هسه انا عندى راى فى كلام محمود حسنين
لكن كلام سوار دا ما بدخل لى طرف اضانى
ياخ لما هو ذاتو ارتبك فى نهاية الحلقة وشعر بالهزيمة ...
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: Adil Ali)
|
والله يا منير يااخوى الا لو كنت بتشاهد فى مناظره تانيه ؟؟؟؟
اولا اسم المناظره براهو بيهزم الانقاذ كلها
ثانيا كانت كل دفوعات حاج ماجد بان على محمود عميل وعاوز يعمل انقلاب متناسيا بان الانقاذ انقلبت على النظام الذى كانت جزء منه بشهاده رئيس الحركه الترابى بان انتخابات 86 كانت من انزهه الانتخابات التى جرت بالسودان
ثالثا.. كانت كل دفوعاته بان العالم على خظأ وان الانقاذ هى الصاح ( دارفور عدد القتلى مبالغ فيه, ازمه اقتصاديه معدومه..حريات لا توجد فى دول الجوار متناسيا الحراك الديمقراطى والتعبوى وحق المواطن فى التظاهر فى القاهره وتونس)
رابعا: كم تمنيت ان يكون محاور حاج ماجد فى سنه ودفعته ونمنيت ان اكون ذاك المحاور
خامسا: كان الاستاذ على محمود مؤدبا اكثر من اللازم بكثير (كم تمنيت ان يفنت انجازات الانقاذ الاقتصاديه سد 3 شوارع 5 كبارى فى 24 سنه مقابل استلام اكثر من 50 بليون دولار من البترول فى الاثنى عشر سنه الاخيره اين ذهبت القروش مع العلم بان السد مبنى بالدين) والله يا منير الانقاذ دى لو جابو اى زول من الشارع يهزم منطقهم ناهيك عن الاستاذ على محمود....لان الحرامى ما عندو اى منطق خلاف الاقرار بالجريمه وطلب الرحمه والعفو من اصحاب الحق (الشعب السودانى)
دودى
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: Mohamed Doudi)
|
| Quote: رابعا: كم تمنيت ان يكون محاور حاج ماجد فى سنه ودفعته ونمنيت ان اكون ذاك المحاور |
يا أخي محمد دودي .. المناظرات الزي دي متشعبة ولا يمكن حصرها في ساعة .. يعني علي محمود حسنين لو لقي زمن عشان يعدد مساوئ الحكومة يوم كامل ما حيكفيه .. وكذلك لو سوار أدوهو زمن عشان يشكِّر الإنقاذ حيردم المشاهد حتي يقول ليته سكت .. فالشغلة محتاجة تركيز علي النقاط الصارخة وليس الكلام المعتاد الذي اكتسب المواطن مناعة ضده ..
ياخي في أركان نقاش الجامعة تلقي قيادات فطاحلة ورؤساء في احزابهم، لكين يجوا يقيفوا في ركن النقاش قدام الطلبة يقعدوا يتلعثموا وتلقي كلامهم مشتت وغير منطقي .. وفي نفس الوكت تلقي البعض في التنظيم ما عنده مؤهلات قيادية غير فصاحته ومهارته في أركان النقاش وحلقات المناظرة .. فكل فولة ليها كيَّال .. يعني مثلاً الجبهة العريضة دي أكتر زول مناضل فيها منو؟ مش د. مصطفي محمود؟؟ خليه كان يمشي البرنامج بدل علي محمود، شوف لو ما عملها لينا كلها التجاهل التجاهل ..
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: Ahmed musa)
|
سلامات أحمد موسي .. الأستاذ علي محمود رجل محامي ربما اعتاد علي التروي في القضايا - وشغل القضايا يحتاج للبال الطويل وصبر أيوب .. يكون ما مستعد للمرافعة يمشي يؤجل الجلسة .. وهذا عكس طبيعة الإتجاه المعاكس الذي يحتاج للفطنة وسرعة البديهة والآكشن السريع والهجوم بدل الدفاع .. غايتو أنا بالجد حنيت علي الأستاذ علي محمود حسنين ..
ياخي الراجل مشي يدافر في الخارج في جبهة عريضة وما أدراك لغاية ما بقي ملطشة لناس زي د. مصطفي محمود وأشباهه ..
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: دينا خالد)
|
مرحبتين دينا ..
أساساً محاور المناظرة معروفة سلفاً سواءً كانت من الحكومة أو المعارضة .. فإذا تكلمت المعارضة عن الدكتاتورية أو الفساد فذلك كله منطقي ومعروف - يعني الجمهور ما محتاج لحوار في برنامج مدته ساعة عشان يكلموهو بيهو .. إذن كلام علي محمود حسنين كان معروف ومتوقع .. أنا شخصياً قبل يوم كتبت عن ماذا سيتكلم علي محمود ولم يخِّيب ظني .. ظل يردد كلام سودانيزأون لاين عن أوكامبو والحرب في دارفور وكردفان والنيل الأزرق .. وقال عنها أنها ثورات .. وهذه النقطة حاج ماجد طفأها ليهو بأن سماها تمرد وليس ثورات ، وهو محق .. أراد علي محمود أن يحاجج بالفساد - وتلك كانت ستكون ورقته الرابحة لو أحسن إلقاءها - لكنه بدأ يقرأ من الورق .. وتلك نقطة ضعف .. الجمهور يحتاج فقط لرؤوس المواضيع فيتذكر الباقي ، فكان يمكن تعبئته بذلك والتركيز علي مفارقات الفساد والمحسوبية والظلم .. ياخ حادثة إعتقال محمدحسن عالم براها كان ممكن تسكِّت سوار .. بس كان يعزف عليها بإلحاح ..
حاج ماجد الظاهر عليهو بتاع أركان نقاش - حيث الحجة تعتمد علي التركيز علي نقاط القوة وتكبير اللفة من نقاط الضعف، مع تكتيك الصوت العالي .. وقد نجح في ذلك .. وكما أن للمعارضة محاور كثيرة يمكنها بها الضغط فإن للحكومة برضو نقاط قوة كثيرة .. فحسب رؤيتي فإن الحروب الدائرة هذه كلها صنيعة أجنبية وهي تمرد وليست ثورات ..
المهم .. كل نقاط المناظرة محفوظة سلفاً للمشاهد - وزمن البرنامج لا يسمح بسردها كلها ، والحريف هو من يشد إنتباه المشاهد لنقاط في صالحه .. يعني التفاصيل الدقاقة ما بتجيب دخل ..
ثم ثانياً إختلافك معاي يجعلني اتحسس نفسي ياخ :).. ما ظنيت في إختلاف كتير .. إنما هي رؤي بزوايا مختلفة .. فأنا أنظر للكليات والمآلات .. فلنقل الحكومة كعبة .. بالنسبة لي لا الحكومة لا المعارضة تسيطيع تغيير الواقع .. وذلك لقناعتي أن السياسة والظروف أعتي من السودانيين ، ولأن البلد كبيرة ومتنوعة عن تنافر و..و.. والتنظير الكتير بتاع السياسيين ده كله كلام والسلام .. وعند المحك كل زول حيقعد يعملها تبريرات لفشله .. أقرب مثال عندك هذه الجبهة العريضة بتاعة علي محمود ده ذاته فإنها إنقسمت قبل أن تقيف علي حيلها .. نشهد كذلك المنافسات علي أموال ومناصب في منظمات حقوق الإنسان التي تدعي سعيها لإستعادة الحقوق .. نشهد يومياً المنافسات والإنشقاقات في الحركات المسلحة علي كل الأصعدة .. شئ خلافات عنصرية وشئ قبلية و حتي الإختلاف في إدارة الإذاعات الجهوية بالخارج التي تدعمها دول غربية ، يتصارعون علي المواقع ذات المرتباب الأعلي .. وهكذا ..
فبقول شنو؟؟ مافيش فايدة .. كله محصل بعضه .. ويبقي من العباطة إعادة إنتاج العجلة ..
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: Munir)
|
شكرا دكتور منير
اكتر تحليل واقعي للذي جرى
ثورات يقودها مندوب قوقل ونوارة نجم ووتوكل كرمان وشباب زي الورد ( علم وثقافه ومواقف صلبة)
ثورات يقودها جيل يتعامل مع مصطلحات عصره ولغته وشعره وحزنه وفرحه وزيه، انسانيته، خياله ونجومه.
جيل له مغنييه وشعراؤهـ ، شيخوخه وفتواه .. تدينه وطرائق عبادته ...
جبل له منطقه في الحياة حزنها وفرحا
جيل له نظرته وحبه لرسوله الكريم
جيل له منهجه في تحويل الحياة وصناعتها والتمتع بها ( البعض عبادة والبعض متعة ساي كدة)
جايين تحاطبوه بالطريقة دي
زول من زمن الاستقلال
أدواته أكل عليها الدهر وشرب
بغض النظر عن كل شئ استطاع حاج ماجد ان يخاطب الجيل الحالي بلغته
وبضع المصطلحات الصحيحية في سياقها ـ لتمرد & الثورة - ( مقارنات المظاهرات في وول ستريت وكيفية التعامل معها، انهيار الاقتصاد العالمي) صورة الخطاب الذي بعث به حسنين لاحدى السفارت
تحالفه مع نظام حسني مبارك ضد السودان ,,,, الخ هذه كلها ...
لان هذا الجيل يقارن ويفهم
هذا الجيل اصلاً ضد الديناصورات القاعدة دي كلها على قيادات الاحزاب (ص +ت+م )
حسنين في هذا البورد مسحتو بيه الارض ايام الجبهة كتبتم عنه كثيرا عن دكتاتوريته وعن مركزيته وعن الصراعات صراعات القوى والنفوذ والمال..
وبعد كدة يتخت كبدبل لجيل من احفاده .. كيف يخاطبهم؟
الجيل دا صبووووور كان بينتظر كابتن ماجد خمسة حلقات علشان يجيب القون ,,,
لكن بطريقته الخاصة ...
سلام
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: القلب النابض)
|
منير
من اصبحت مريت تقريبا على كل البوستات البتتكلم عن حلقه امبارح لكتي وجدت هذا اقربها توصيفا وتحليلا لما جري بعيد عن نظريه الكسب بين الحكومه والمعارضه وانا هنا اقرب للنظام من قربي من هؤلاء المتشرزمين لعشرين جهه ووجهه
لم يقنعني حسنين ولا يقنع كثير من جيلي
تعرف يا منير اتذكرت كرتون توم وجيري لمن جيري مره من المرات ورغم قسوه توم معاهو لكنه لمن مشي المدينه الكبيره والعربات قربت تدوسوا والبوليس فتح فيهو النار جاء راجع جري لتوم الكان نايم وشرط الجواب الكان كتبه قبل ما يمشي المدينه هاربا من توم يا زول شرط الجواب وقعد يبوس في توم الصحي من النوم مخلوع
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: فدياس نجم الدين)
|
Quote: من اصبحت مريت تقريبا على كل البوستات البتتكلم عن حلقه امبارح لكتي وجدت هذا اقربها توصيفا وتحليلا لما جري بعيد عن نظريه الكسب بين الحكومه والمعارضه وانا هنا اقرب للنظام من قربي من هؤلاء المتشرزمين لعشرين جهه ووجهه
لم يقنعني حسنين ولا يقنع كثير من جيلي
تعرف يا منير اتذكرت كرتون توم وجيري لمن جيري مره من المرات ورغم قسوه توم معاهو لكنه لمن مشي المدينه الكبيره والعربات قربت تدوسوا والبوليس فتح فيهو النار جاء راجع جري لتوم الكان نايم وشرط الجواب الكان كتبه قبل ما يمشي المدينه هاربا من توم يا زول شرط الجواب وقعد يبوس في توم الصحي من النوم مخلوع |
يافدياس ياخي علي محمودحسنين إنسان مطبوع علي التمرد وحب الرياسة .. ظهر ذلك منذ عهد الديمقراطية السابقة حين شق الحزب الإتحادي الديمقراطي وأضعفه كوَّن حزب منفصل.. ثم هو الآن ينتمي لنفس الحزب (الإتحادي الديمقراطي) ولكنه يلعب لصالح ورقه فقط ولا يحترم حزبه الأصلي .. ولسوء إختياره أراد أن يتزعَّم شراذم معارضي الخارج الما عندهم شغلة غير الكيد للبلد فرفدوه وجعلوه مسخرة ووصفوه بالديكتاتور في عضمه ده - قال شنو؟ يذيل قرارات الجبهة العريضة بعبارة صدر تحت توقيعي !! - وأصبح مطية لحركات الخارج يستفيدون من إسمه التأريخي ..
ياخوي لولا إستفادة معارضي الخارج من الدعم الخارجي - لجوء وإعلام وإيواء - كانوا زمان فرتقوا ..
أنا بالجد أمبارح حنيت عليهو وتمنيت أن يفكر مرتين وتلاتة ويعاين للدرب الماشي فيهو ده .. الناس المتابعهم في الخارج كلهم يحملون إقامات دائمة وجوازات أجنبية وعايشين بضمانات أجنبية .. هو ما حيقدر يستمر في العيش الخارجي بدون إمتيازات خاصة تمنحها له الدول التي يتجول بها .. وتلك الامتيازات تستمر بإستمرار دوره العدائي لبلده ..
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: Mohamed Yassin Khalifa)
|
تحياتي أستاذ منير
ده أفضل تحليل أقرأه للحلقه بصراحه
وبالإضافه لمداخلة القلب النابض فقد رسمتم اللوحه كامله للوضع الحالي
علي محمود جاء مصطحباً معه عشرات الأوراق إن أتيح له النظر لقراءتها جميعاً (مع وضع الإعتبار لإنو الراجل نظرو ضعف بحكم عامل السن) لإحتاجت الجزيره ليومين من البث
لم يراعي الرجل لضيق زمن البرنامج وإحتياج مثل هذه البرامج لضربات سريعه وخاطفه تلجم الطرف الآخر وهو الأمر الذي إستفاد منه حاج ماجد من قولة تيت حين ألجمه بالوثائق التي تثبت عمالته وارتزاقه
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: Mohamed Yassin Khalifa)
|
Quote: نقول؟ يعني مجازاً ولا عن قناعة يا منير؟
هي حكومة فاسدة وفاشلة ومستبدة.. ولا يختلف طفل او شاب او شيخ في هذا
اللهم إلا من شاركهم في الاثم وسرق أو قتل أو إغتصب معهم! |
الحكومة يا محمد يسين خلبفة لها أوجهها الكعبة وأوجه كويسة .. ليست هناك حكومة في العالم خير محض ولا شر محض ..
أنت كناشط ضد الحكومة تجتهد في تدبير الشهادات والعمل الدؤوب مع أوكامبو ، مثلاًَ، ماهو نشاطك ودورك في دور حكومتك الأمريكية في قتل ملايين العراقيين والأفغان والفلسطينيين؟؟ وما دورك في مناصرة المظلومين المجدوعين في غوانتنامو بدون محاكمة وبدون إتهامات .. أليست أمريكا هي بلدك برضو ؟ لماذا تلتزم الصمت وسجناء غوانتانامو يئنون من التعذيب تحت مرمي حجر من مخدعك ؟؟ ما تكلم ليهم أوكامبو وكده ..
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: القلب النابض)
|
مرحباً بالقلب النابض ..
حاج ماجد سوار بادر بالهجوم فشلَّ فعالية علي محمود حسنين الذي يحتاج لقاضي باله طويل يقعد ساعات يستمع له لغاية ما يكمل قراءة أوراقه - مش زول زي فيصل القاسم يعزف علي وتر الإثارة وخفة الحركة ..
كلنا يعرف مساوئ الحكم .. ولكنا لا نري حلاً جذرياً في معارضة همها الوحيد هو إسقاط النظام ولا يهمها ما يحدث بعد ذلك .. وللسخرية أن الوسيلة الرئيسية للمعارضة للتغيير هو لغة السلاح .. عشان يرجعوا بينا لمربع0 .. يعني بعد عشرين سنة وبعد ما الحكومة استكانت وجنحت للديمقراطية جاية المعارضة تجر الساعة للوراء .. ونلاحظ أن كل دعاوي العنف والحرب ضد البلد تأتي من القابعين بالخارج ذوي الجوازات الأجنبية ولا ينوون الرجوع للبلد إلاّ علي أشلاء البشر .. وبالمقارنة نجد أن المعارضة الوطنية المسئولة ذات الثقل الجماهيري الحقيقي تدير معارضتها من الداخل وتدعو للتغيير السلمي الذي يتجنب إراقة الدماء ..
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: عمر صديق)
|
قالوا عن الحقيقة :
تحكي قصة صينية قديمة عن ثلاثة عميان، صادفوا فيلا فبدأ كل واحد منهم بتحسس جزء منه: فالأول تحسس خرطومه فقال إن الفيل عبارة عن ثعبان، والثاني صادف وتحسس أذنه فقال إنه عبارة عن مروحة، اما الثالت فتحسس قدمه الضخمة فقال إنه عبارة عن جذع شجرة.
عشان كده كل واحد في المنبر شايف الانتصار لاحدهم من المنطلق ده ..ده غير انه الموقف من المعارضة والحكومة يشكل حكم غير منصف حتى لو اظهر غير ذلك ...
تحياتي منير ..
| |
|
|
|
|
|
|
|
|
|
Re: حاج ماجد سوار vs علي محمود حسنين ١٠/٥ لصالح سوار (Re: فايزودالقاضي)
|
Quote: الحكومة يا محمد يسين خلبفة لها أوجهها الكعبة وأوجه كويسة .. ليست هناك حكومة في العالم خير محض ولا شر محض ..
أنت كناشط ضد الحكومة تجتهد في تدبير الشهادات والعمل الدؤوب مع أوكامبو ، مثلاًَ، ماهو نشاطك ودورك في دور حكومتك الأمريكية في قتل ملايين العراقيين والأفغان والفلسطينيين؟؟ وما دورك في مناصرة المظلومين المجدوعين في غوانتنامو بدون محاكمة وبدون إتهامات .. أليست أمريكا هي بلدك برضو ؟ لماذا تلتزم الصمت وسجناء غوانتانامو يئنون من التعذيب تحت مرمي حجر من مخدعك ؟؟ ما تكلم ليهم أوكامبو وكده .. |
عزيزي منير.. أنا سألتك هل فعلاً مقتنع بأنو دي حكومة كعبة، قمتا جيتني بنفس منطق الدباب سوار لمن سألوهو عن دمار الإقتصاد السوداني.. رد بأين إقتصاد أمريكا.. وول إستريت؟ الجميل إنو المذيع إستغرب وقال ليهو بالله ده ردك؟!! دي يا منير حكومة كعبة، وكلمة كعبة شوية عليها.. وصدقني أنا بتحدث عن تقارير هي النشروها عن حجم فسادهم الأهلهم أن يحتلوا أسفل قائمة الدول التي بها شفافية في العالم.
ده نظام فاسد ومفسد.. ولا أدري من أين أتيت أنت يا صديقي المثقف بأي نسبة من الكواسة ليهم. بالأمس القريب كنت في ندوة إقتصادية بجامعة كولمبيا بنيويورك عن تكلفة الحرب قدمها باحث إقتصادي مرموق وأستاذ جامعي مستشار لعدد من الجهات.. تعرف أدانا أرقام موثقة تفوق الخيال عن تكلفة حرب دارفور. والمشكلة في ده كله إنو تكلفة الفساد والعمولات مما جناه لوردات الحرب داخل المؤتمر اللاوطني تعادل تقريباً قيمة الصرف على الأسلحة التدميرية التي تم إستخدامها لقتل أهلنا في دارفور وتدمير البنية التحتية بها.
أما عن دورنا نحن هنا في أمريكا.. فده ليس مكان للتساؤل.. ومرة تانية هو نفس التاكتيك الفقير الإستخدمه الدباب سوار أمام القامة حسنين والذي تجاوزه لأنه عنده رسالة محددة قام ببثها للمواطن العربي وقادة الدول العربية بذكاء. وأكيد إنو نحج في تحفيز الشعب السوداني نحو الثورة القادمة والآتية (حتماً) لإقتلاع هذا النظام الباغي.
وعشان ما تظن بنا السوء.. فحـ أقول ليك يا سيدي نحن نساهم في تحفيذ ودفع المجتمع الامريكي والرأي العام هنا للدخول لإتفاقية روما. وهناك تحرك واسع بهذا الصدد ينبئ بأقترابنا من تحقيقه. أما قضية "غتمو" فأنا ناقشت فيها الكاتب الصحفي "توم فريدمان" والذي كتب بعدها مقالة الرائع "أغلقوها فقد صارت رائحتها نتنة". فهؤلاء المعتقلون هم مجرمي حرب وجبت محاسبتهم عبر القضاء المدني العادل إنفاذاً للقانون وتحقيقاً للعدالة التي تسري على الجميع.
أتمنى يا منير، وأنت تعلم تقديري لك، أن نرتقي بحوارنا هذا نحو المفيد.. وأن ننقاش سبل خلاص وطننا من هذة الفئة المستحوزة على السلطة بالحديد والنار، لكي ننعتق منهم ولنقدمهم للعدالة السودانية الحقة.. كابيش؟
| |
|
|
|
|
|
|
| |
Munir
دينا خالد
Ahmed musa
Adil Ali
Mohamed Doudi
القلب النابض
فدياس نجم الدين
doma
Mohamed Yassin Khalifa
محمد فرح
عمر صديق
فايزودالقاضي
فيس بوك
تويتر
انستقرام
يوتيوب
بنتيريست