.. الحقيقة الواحد فعلاً يلاحظ أن الأغاني السودانية متنوعة، وأصوات الفنانين زاتها متميزة بإختلافاتها الصارخة.. كما أن الأغنية ذاتها تجد كوبليهاتها متنوعة وأغلبها ليست ذات ألحان دائرية مملة ..وذلك يجعلها جاذبة للمستمع الشرق أفريقي ..
ثم ثانياً، ربما كان سر جاذبية اللحن السوداني لهذه الشعوب هو وجود القافية العربية في كلمات الأغاني .. ولربما كانت القافية تضيف بعداً إضافياً ينتبه لها الآخرون ويستحسنونها فتسهِّل عليهم حفظ اللحن وأداءه رغم عدم معرفتهم باللغة ، بينما المستمع السوداني لا يعير القافية إهتماماً كبيرا بحكم أنها من المعطيات البديهية لإحساسه الموسيقي ..
01-20-2012, 03:07 PM
Munir Munir
تاريخ التسجيل: 02-11-2002
مجموع المشاركات: 10496
.. كما نجد أن الفن السوداني منتشر جداً في الجارة تشاد حتي أنك لتحسب أن تشاد جزء من السودان !! .. وكذلك تسرب الفن السوداني في أعماق غرب أفريقيا - ليس بذات مستوي الإنتشار في تشاد - .. ولكننا لا نري أي إنتشار للفن السوداني في الجيران الجنوبيين - الكونغو أوغندا كينيا - ولا الجيران الشماليين - مصر وليبيا - !!!..
01-20-2012, 03:31 PM
Kabar Kabar
تاريخ التسجيل: 11-26-2002
مجموع المشاركات: 18547
عارف يا منير يا صديقي.. الواحد دايما مع المستضعفين..و في شعوب المنطقة ديك يعجبني صدق اثنية الأرومو...طبعا اهلك السودانيين كلهم بيعجبهم اللون (عاملين فيها جلابة و كده)..زي ناس دار الرياضة امدرمان و تشجيعهم بتاع (اضرب اللون).. هنا الليجند على بيرا..
ياخي شذا زهرو دي يا منير ، انا اثنين و تلاتين سنة في السودان.. لو قالوا لي ارقص فيها ما بقدر.. لكن الفيرشن بتاع على بيرا خلاها تكون رشيقة..و الجكس ذاتو ممكن ينطرب فيها.. شفت كيف الشعب السوداني د مسكين؟ ياخي عمري ما شفتي لي شعب الشعوب التانية بتحترموا لحد التقديس..و الحكاية دي هو في نفسو ما جايب ليها خبر..!! حبش شنو يا منير و تشاد شنو.. على بالحلال افريقيا كلها بتردد في غنا الشعب السوداني..و لمن تقول ليهم اشمعنا.. يقولوا ليك لأنو ده شعب مثقف و متحضر..و غناهم اي افريقي مستعد يسمعوا..!!! حصل شفتا ناس الكاميرون بيغنوا غنا المرحوم خليل اسماعيل؟..
بالمناسبة.. دكتور خالد عطا المنان.. عاش في كانو..و كان دفعتنا في جامعة الخرطوم..و حاليا في مقاطعة سسكتشوان في مدينة سسكتون..و حا احاول اشف ليهو سكة تلمني بيهو.. لأني رحلت لمقاطعة تانية و اخباره انقطعت مني..! كبر
01-21-2012, 11:34 AM
Munir Munir
تاريخ التسجيل: 02-11-2002
مجموع المشاركات: 10496
عزيزي كبر .. سلامات وشكراً علي المشاركة .. الوجه السوداني الذي يعرفه العالم الخارجي الأفريقي هو شكل المجتمع المختلط الذي تبلور في الوسط وتخصيصاً في العاصمة .. وهذا الوجه الوسطي لم ينل فقط إعجاب الشعوب الجارة بل ظل دائماً محل إعجاب أقاليمنا القريبة والبعيدة .. فأهلنا في الشرق والغرب والشمال والجنوب ظلُّوا يحلمون بعيش العاصمة ولباس العاصمة وأضواء العاصمة وغناء العاصمة .. فيأتون إليها ليتغنوا ألحانها .. أهلنا النوبة والشوايقة يأتون فيها فيخلعون جلباب الرطانة والصفقة والطمبور ليشدوا بألحان وردي ومحمدالأمين وكمال ترباس وإبن البادية ورمضان زايد .. وكذا أهلنا في الشرق - ولولا إسحق الحلنقي لما كان هناك غناء سوداني ذاته :).. لولا هذا الرجل كان واطاتنا أصبحت .. وكذلك أهلنا في الغرب يخلُّوا أم كيكي في محيطها الشعبي ويشدون بأغاني عثمان حسين وصديق عباس وعبدالقادر سالم وخوجلي عثمان .. هذه الهوية الموسيقية ظلت مقبولة وظلت عاملاً موَّحداً لكل ثقافات البلد ..وهي ذاتها التي يعرفنا بها جيراننا من الشرق والغرب .. وفي إعتقادي أن السبب هو أن هؤلاء الأقوام يجدون أنفسهم فينا .. فالقرن الأفريقي هو إمتداد لأهلنا في الشرق بكل ملامح الوجه واليد واللسان.. وكذا الأهل في الغرب يتمددون حتي أعماق غرب أفريقيا .. . . لكين للأسف تجد أن النعرات الجديدة تسعي لتمزيق هذا الخليط بعنف وشراسة ..
01-22-2012, 01:17 PM
Munir Munir
تاريخ التسجيل: 02-11-2002
مجموع المشاركات: 10496
.. فماهو سر جاذبية الأغاني السودانية للأذن الأجنبية .. أعتقد أن السبب الأول هو تنوع الميلودية - تكرارها وتنويعها في نفس الأغنية - خاصة الأغاني القديمة ذات السلم الخماسي الخالص .. فهي يسهل استيعابها وحفظها .. ثانياً : الوزن الشعري و القافية العربية التي تفصِّل اللحن فيقع عذباً ومفصَّلاً علي الأذن الغير عربية فيكون له إيقاع متميز .. ثالثاً : حروف المدد التي تزيد اللحن نداوة وflexibility .. وأجيب مثال بأغنية حمد الريح .. أحلي منك قايلة بلقي واللا غيرِك إنتي ببقي .. فهنا نلقي القافية باهرة وتفصِّل المقدمة فتجعلها سهلة الوقع والحفظ .. ثم في داخل الأغنية نجد الإستعمال الباهر لحروف المد في الصعود والهبوط في ميلودية اللحن .. مثلاَ "واللا غييييرك إنتي بلقي" أو "غيرها مكتوووب لي أشقي" .. أو "إنتي يا يا يا أملي ومنايا" .. حروف متنوعة .. مرات ألف ممدودة .. مرات ياء .. مرات واو .. غايتو أغنية الفنان حمدالريح دي أبداع رهيب نعيد إكتشافه في أداء هذا المغني الأثيوبي أدناه ..
طبعاً عذراً ياجماعة ده كلام عنقالي ساي وأكيد فطاحلة الموسيقي والنغم والحروف أكثر فائدة في هذا المجال ..
01-22-2012, 11:07 PM
Munir Munir
تاريخ التسجيل: 02-11-2002
مجموع المشاركات: 10496
. . .. الحصل أن الغناء المعاصر بدأ يخرج من منظومة السلم الخماسي ذو السلاسة المبسطة ويدخل في المتاهات السباعية والألحان المعقدة الغير مموسقة بميلودية رتيبة يسهل ترديدها.. وبذا أظن أن حظها في الإنتشار خارجياً سيكون ضعيفاً .. ومما يزيد الطين بلة أن كلمات الأغاني أصبحت تعتمد علي الشعر الحر الذي لا يلتزم بالقافية ولا يعتمد علي موسقة الحروف بقدر ما يركِّز علي رمزية الكلمات وفذلكة المعاني .. وذلك ما سيفقد الأغنية السودانية جاذبيتها وإنسيابها الساهل في الأحاسيس الأفريقية .. ولذلك لا نشهد إنجذاباً أفريقياً للأغاني الحديثة والفنانين الشباب في الخارج ، رغم جماهيرية الفنانين وإنتشار أغانيهم بالداخل !.. ورغم إنتشار وسائط الإتصال وميديا الإنتشار، مقارنة بالإنتشار المحدود للإذاعة السودانية في الماضي والتي إستطاعت أن توَّصل أغانينا للعالم الأفريقي في الشرق والغرب !! ..
لهذا السبب أعتقد أن فرصة الفنانين الحديثين زي ناس محمودعبدالعزيز وفرفور و..و.. في نقل اللحن السوداني للخارج ضعيفة جداً .. بل سيسهل إنتشار الأغاني الرديئة الخفيفة ذات الطابع الهجيجي والتي تحتفظ بمقومات الذيوع القديمة وهي الميلودية الرتيبة والكلمة السهلة المقفاة .. وهذه نجدها في أغاني راجل المرة حلو حلاة والشريف مبسوط مني وما شابهها.. وكثير من الأغاني التي ينشرنها ناس ندي القلعة وحنان بلولو ومين مين ما عارف !.. رحم الله مني الخير وعائشة الفلاتية ومهلة العبادية ..
01-23-2012, 00:14 AM
Mahjob Abdalla Mahjob Abdalla
تاريخ التسجيل: 10-05-2006
مجموع المشاركات: 9160
الهبيب منير انت تعرف لمن مزاجك يروق و تتكلم في المزيكة بتروق دمك و بعيد من انك تلعن ابليس في مكانو. عموما الموسيقي السودانية و الصومالية و الاثيوبية و التشادية و لغاية مالي هي نفس السلم و لذلك تجدهم يستمعون لها. في احدي المرات ذهبنا الي مطعم اثيوبي و جلسنا في تيبل قريب من المغنية و طبعا كحلتنا و عرفت انو سودانيين و طوالي دورت اغنية المرحوم سيد خليفة (ازيكم ....). تعرف ما تقول لي سيد خليفة و لا اي مغني سوداني تاني. في اياماتي الاولي بهذا البلد مرة مشيت محل بتاع (used furniture) و اشتريت طربيزة كمبيوتر كرسي و كان في واحد افريقي بعربيتو متخصص نقل الاشياء للمسافات القصيرة و اتقفت معاهو لنقل الحاجيات. المهم لم بدينا المشوار سألني من اي بلد و عندما عرف اني سوداني طوالي طلع شريط محمد الامين و شغلو. هو من دولة بنين.
01-23-2012, 00:56 AM
Munir Munir
تاريخ التسجيل: 02-11-2002
مجموع المشاركات: 10496
: الهبيب العزيز محجوب .. مشكور علي المشاركة .. غريبة الدورة دي ما جيت عملت لينا شنكل :).. يعني تاني نعتزل أي حاجة ونكتب في الفنون والاّ شنو؟؟ .. بعدين ياخوي لعن إبليس ده زاتو ناخد فيهو حسنات ، إنت قايل شنو؟ .. وذلك لأنو تذكرك لإبليس هو إعتراف بالذنب .. مش كده ؟.. وإبليس زاتو ما قاعد يزعل من اللعنات .. مو هو أصلو مسخَّر للعنات .. ههه ..
إحترام الشعوب الشرق أفريقية والغرب أفريقية للسودان شئ مثبت ويظهر في إحتفائهم بالأغاني السودانية .. وكما كتبت في العنوان فإن تنغيم هؤلاء القوم لألحاننا يجعلنا نحسها بمذاق مختلف .. فأغنية المرحوم سيد خليفة إزيكم هذه بعدما تسمعها من مغني أفريقي تنتبه لجودة اللحن وطلاوته .. يخيل لي أننا مستسهلنها ولا نضعها في رتبتها التي تليق بها بسبب مقدمتها وكلمات 'إزيكم' و'كيفنكم' التي تدخلها في نمط الكلام العادي والونسة .. ولكن الأذن الأجنبية ذات الثقافة المختلفة لا تتلقي هذه الكليمات بنفس المعاني التي نتلقاها بها .. ثم إن الأداء الموسيقي بآلات مختلفة تجعلنا نتذوق اللحن بطعم مختلف ..
أنا برضو كان عندي صديق أريتري كان مجنون بمحمدالأمين وكان يلح عليّ بأن أجيب ليهو شريط لمحمد الأمين .. في وكت أنا لي رقبتي كنت في منطقة بفتش فيها لشريط سوداني فتيش وما لاقيهو .. طبعاً هسة النت واليوتيوب أشبعت عطش العطشانين وأروت جوعهم ..
01-23-2012, 00:57 AM
Munir Munir
تاريخ التسجيل: 02-11-2002
مجموع المشاركات: 10496
أووو خالد العبيد شخصياً جاي يشارك - وأنا قلت الراجل جاي يشاكلني ..ههه .. شكراَ يا حبيب جيتني في هذا الجو الرايق في هذا الليل البهيم (بتوقيتنا) والدنيا بي جاي سكون في سكون .. ياخي إنتابني شعور بالخوة قلت الواحد لو هسه لقي ليهو كباية شاي بلبن كاربة مع ودالعبيد نتشاكل فيها ونتصالح مالو ..؟؟ .. الظاهر البوست ده فوقو البركة جاب الأعادي القدامي محجوب وخضر وخالد العبيد ..
الشابة تيقست دي أن بتكيفني في أغنية 'العجب حبيبي' .. وطبعاً يازول ياقديم إنت تكون عارف إنو 'العجب حبيبي' دي من أغاني البنات القديمة زمن الحب المكتوم .. زمن 'دموعي سالت والمنام أبي لي' ..
فعلاً توقفت عند كلمة أحباش وقلت يمكن تكون غير مناسبة .. لكني قصدت كل سكان الحبشة حسب منطوق كتب التاريخ والجغرافيا القديمة .. وأردت أن تشمل أثيوبيا و اريتريا معاها .. ولم يكن أبداً المقصود أي لقب سالب .. فيا أخي أنا في خلال غربتي هذه لم أصاحب سوي الأريتريين والأثيوبيين .. وخاصة الأريتريين .. كانوا شايليني فوق راسهم عديل ..
01-23-2012, 03:12 AM
Munir Munir
تاريخ التسجيل: 02-11-2002
مجموع المشاركات: 10496
وهذه الأغنية منغَّمة علي وزنة إزيكم وكيفنكم - أغنية أثيوبية في قالب أغنية سيد خليفة إزيكم كيفنكم مهداة للهبيب محجوب عبدالله .. أنظر كيف أن اللحن بديع ومتنوِّع .. وكيف أننا حين ننظر للأغنية في المرآة الأثيوبية نكتشف جمالها وألقها الذي بذل فيه المرحوم سيد خليفة كل إحساسه وحماسه وإنفعاله بكل جسمه وطيبته وبشاشته وبسمته العريضة حتي أوصله لأعماق أحاسيس هؤلاء القوم فأحبوه وأحبونا لأجله .. رحمك الله يا سيد ..
الجميل في الأمر هو أن الأثيوبيين يطعِّمون الأغنية بكوبليهات بلغتهم فينتجون مزيجاً فريداً يعزف علي أحاسيس أثيوبيا والسودان .. فنتلذذ بكلماتهم مهضومة بكلماتنا ، ويهضمون كلماتنا مطعَّمة بكلماتهم .. ونلاحظ الخلفية الموسيقية الأثيوبية مع بعض التغيير والإضافات التي كست الأغنية بثوب جديد .. لم أتشبع بعد من أعادة الإستماع لهذه التحفة ..
التعديل لبعض الإضافة وإعادة تحميل الفيديو من اليوتيوب لسرعة الداون-لود ..
Quote: لازم نقابلهم بالمزيد من الاحترام والتعامل الراقي
والحبشي البي يدورك أحسن من (العربي) البي تدوروا...!
الأخ مكي .. سلام معطَّر ..
هؤلاء القوم يستاهلوا كل الخير .. رغم قسوة الحياة التي تجعلنا نتعامل بجلافة معهم - وطبعاً نحن زاتنا لا نسلم من أذية بعضنا بعضاً كما هو بائن - إلاْ أنهم حين يقابلوننا بالخارج فإنهم يعاملوننا بكل إمتنان .. خاصة أولئك الذين كان السودان أحد محطات حياتهم ..
01-23-2012, 03:08 AM
حسن حماد محمد حسن حماد محمد
تاريخ التسجيل: 08-08-2009
مجموع المشاركات: 3451
يا أخي العزيز خالد العبيد .. حتي الضبيحة عاوز تعملها كنغر أحمر؟!! .. ياخي إنت شيوعي مخلص !! .. تعرف بإخلاصك ده لو مشيت في درب التصوف حتبقي ولي عديل نتبرَّك فيك :) .. تعرف أنا الشيوعيين بالنسبة لي 'أقربون' لأنهم لأنهم ليسوا أعداء لأولياء الله الصالحين زي الجماعة ديلاك الإنت عارفهم .. : : بالنسبة لحكاية القِدم دي قلنا نشاغلك بيها ساي عشان نقحم أقدمية الأغنية بس :).. الصورة ماشاء الله شباب .. ربنا يديك العافية ..
01-23-2012, 12:14 PM
عبد الناصر الخطيب عبد الناصر الخطيب
تاريخ التسجيل: 10-25-2005
مجموع المشاركات: 5180
بوست مميز ياهندسة ومتابع باستمتاع شديد , مع أني من هواه سماع الغناء الإثيوبي بلغاتوا المختلفة أمهرنجة , تجرنجة أرومنجه ... والبفهموا منو والبتم شرح كلماتوا لي كلو غني ملان ... وفيهوا كمية من المضامين زي غنانا زمان ... لاحظته كلامك عن أنو ممكن يكون من سر جاذبية غنانا للناس ديل وجود القافية ( الشعر المقفي ) الكلام ده فعليا ممكن في غني إثيوبي كتير عدا (( الأحباش )) العنونته بيهم البوست لانو شعر التجرنجة ( مقفي ) ... وفي بعض فروعهم عندهم شعر زي الدوبيت في البيئية الرعويه ... ومعها صيحات زي هيعععععع .................. بتاعتنا حتى لو ما طابقته تماما على أى حال الغناء السوداني مسموع في شرق أفريقيا وغربها , ممكن أكترنا عندهم ميل يسمعوا غني عربي و أكتر هم برضوا عندهم ميل يسمعوا غني سوداني وفي برنامج في تلفزيون أرتريا ( شنقروا ) ده برنامج مواهب زي نجوم الغد عندنا أي غني غير غناهم حتلقاهو غني سوداني
ملاحظة المكرم / خالد عبيد انو الناس ديل بزعلوا من كلمة (( أحباش)) الكلام ده حاصل فعلا ..........لكين من منو !!! في بوست للمهندس / بريمة محمد أتداخل أخونا / أمير جابر وهو بخت صور معلق (( الحبشية دي ممكن تكون من الامهرة ))... الكلام ده بالضبط زي تقول الدنقلاوية دي ممكن تكون من الهدندوه !!!!!
ومع انو الامهر والتجراى اقرب قوميات لبعض لكين كل قومية قائمة بذاته وليها لغته وثقافته المختلفة والكلام ده كجزء من الخلط العام إننا بنسمي كل ناس الهضبة الإثيوبية بالحبش والحبش فعليا هم قومية من قوميات الهضبة الثمانين فما أى إثيوبي حيرضي كلمة حبشي لا لشي بس لانك نسبتوا لقومية هو ما منها الرفض لاختلاف القوميات فقط وليس لعيب في اللفظ , وكتار من الاحباش كلمة حبشي جزء من الاسم أو لقب بالنسبة ليهم بفخروا بيها بصورة ما عادية
والأحباش هم سكان إقليم تجراى في شمال إثيوبيا وسكان المرتفعات في ارتريا !!! وعادي تسمع في اديس الزول ده مسافر الحبشة يعني ماشي شمال جهات مغلى واكسوم وعدوه _ إقليم تجراى _
في بوستك رغم أنو معنون بالأحباش ماظن فيهو حبش غير الارتري الغني لحمد الريح , الإثيوبية المخضرمه دي بتغني سمسم القضارف , وده ممكن يوريك انو الاثر بعيد في زمانو ما شي جديد ولا مستحدث لانو الغنية دي قديمة وأصدقاء اعزاء من إثيوبيا كانت القضارف مولدهم وطفولتهم وأورثتهم لهجة سودانية صميمه , وحب للثقافة والفن السوداني وبالتاكيد في سودانيين كتار ببادلوهم الاهتمام ده بالثقافة والفن الاثيوبي
الأخ العزيز عبدالناصر الخطيب سلامات .. يازول إنت مختفي ليك مدة .. لعلك بخير .. شكراً علي هذا التنوير والإضاءة حول صفة الحبشة .. والله يا عزيز أنا لم تكن لي خلفية عميقة عن دلالات الكلمة في جغرافية اليوم فقلت أسلم شئ إني أرجعها للمتعارف عليه من السيرة النبوية وأعتبر الصفة التي أطلقت علي البلاد التي هاجر إليها الصحابة .. فقد درسناها 'الهجرة إلي الحبشة' .. و بهذه الصفة نحن زاتنا نريد أن ننافس في هذا الشرف - شرف الأرض التي هاجر إليها الصحابة - إذ أنها مفخرة ..
بالنسبة للقافية .. كلامك صاح فأنا زاتي شدتني النغمة المقفاة في أغنية إزيكم كيفنكم حينما يقلب من العربي للتقرنجة .. فالقافية العجمية برضو حافظت علي الوزنة وعذوبة اللحن ..
ياخي أنا الأريتريين ديل كانوا معاي في السويد أعز أصدقاء.. وأرقي ناس .. والله كانت هناك عائلات صديقة مرات يجيبوا لينا الأنجيرا والزقني المدنكل في البيت بدون أي مقدمات .. ولو لقونا ما موجودين يخلوها لينا معلقة في الباب !! .. عليك الله السودانيين ممكن يعملوا معاك كده؟؟ !! .. ديل ناس مبالغة ياخ ..
و زي ما الواحد لقي سودانيين أولاد رجال الواحد تخته فوق الجرح يبرأ، لكين برضو الواحد لاقي واحدين قدر ما تحسن إليهم يسيئون إليك من حيث لا تحتسب !! ..
01-23-2012, 08:01 PM
Munir Munir
تاريخ التسجيل: 02-11-2002
مجموع المشاركات: 10496
الكلام في الموسيقى يا منير، الجيتار والساكسفون يا خي كابلي دا عندو شريط مشهور بين الناس بإسم (كابلي واشنطن) لو لقيتو اسمعوا، كابلي استعان بعازفين اثيوبيين، فدا ادي الموسيقي رونق آخر.
01-24-2012, 05:39 PM
Munir Munir
تاريخ التسجيل: 02-11-2002
مجموع المشاركات: 10496
الصادق سلامات يا رجل .. الموسيقي والنغم يلامسان اعصاب الحس الرقيق بينما كلام السياسة يستثير عصب الغضب والحقد والعنف (ده إجتهاد مني ساي فأنا لست عالم أعصاب :)).. عليك الله عاين البركة الجابت لي خالد العبيد ده بعد ما كان بيقول لي يا لوح، جاء قال لي يا فنان:) .. ياخي ماعارف ليه فجأة كده إنتابني إحساس صادق وعميق بخوة صادقة لخالد ده ؟ .. يمكن لأن الأنغام دي عملت لي غسيل داخلي .. حسيت بأننا جميعاً ضعفاء متفرعنين في الفارغة وكل زول جايط وعامل غبار كثيف، وهو في النهاية لا يساوي جناح بعوضة في هذا الكون الوسيع .. ما تقول لي عمر البشير أو أوباما أو ديفيد كاميرون .. كلهم سيصبحون جيف - شوف مصير القذافي ، بعد أن كان لا ينظر للأرض من شدة التعالي علي الناس ، صار يستجدي الرحمة من الثوار - كل يعمل لما يسِّر له ياخ .. هسه في المنبر ده تتكلم سياسة تلقي مليون واحد حقد عليك وممكن تلقاهو بيسب ليك ويلعن فيك .. لكين الواحد يسوِّي شنو .. لا بد مما ليس منه بد .. كل واحد يكتب آراءه التي يظنها صائبة وحسب نيته لربما أراد إصلاحاً أو إفساداً .. ربنا فقط هو العليم بذات الصدور .. قال ليك الحلاَّج شهيد قتله مجاهدون !!! .. شوف العبارة دي كيف بالله .. !! .. وهكذا الحياة ..
المهم : أنا شايف إنو غناء الحبش للأغاني السودانية بتطعيمها بمقاطع رطانة ومع التعديلات الطفيفة في التوزيع الموسيقي عبارة عن لفتة بارعة منهم تجعل الأغنية خاتفة لونين تسعد السودانيين والحبش .. نحن كمان نستحسن تكسيرهم للكلمات العربية فتزيد تركيزنا فيها وربما إستكشافها من جديد ..
ياريت إعلامنا السوداني يذيع لينا هذه الأغاني السودانية التي يؤديها فنانون أثيوبيون أو أريتريون - طبعاً ربما كان السبب في عدم عرض الفيديو كليب بتاعهم هو كثرة المناظر العارية فيها - . في نفس الوقت ليت الفنانين السودانيين يقتحموا أغانيهم ويطعموها بمقاطع عربية حتي تجتذب المستمع السوداني .. فعلي العموم الجمهور الحبشي يعرف كثير من اللغة العربية ولذلك يتقبلون أغانينا العربية ولكن نحن معرفتنا بلغاتهم زيرو ولذلك يجب تطعيم ألحانهم بالعربي إذا حاول فنانونا التغني بها ..
01-24-2012, 06:15 PM
محمد زكريا محمد زكريا
تاريخ التسجيل: 09-01-2009
مجموع المشاركات: 4909
طبعاً عذراً ياجماعة ده كلام عنقالي ساي وأكيد فطاحلة الموسيقي والنغم والحروف أكثر فائدة في هذا المجال ..
الاخ Munir شاهدت وسمعت كل المواد الفنيه الجبتها فى هذا البوست وقرأت لك كل كلمه كتبتها... صدقنى هذا ليس كلام عنقاله بل يفوق كلام مدعى الفطحله ابداع يا راجل يا فنان واصل الفن ذوق واحساس بالجمال ياخ
01-25-2012, 00:35 AM
Munir Munir
تاريخ التسجيل: 02-11-2002
مجموع المشاركات: 10496
الأخ العزيز محمد زكريا .. أسعدتني كلماتك وشكراً للمرور .. يازول خليني أقول ليك أنك من وجوه البورد المشرقة التي أعجب بروحها المرحة الودودة التي تظهر في مشاركاتك ..
.. وياريتك بما إنك فنان - من أسياد الشئ - بحسك الموسيقي أن تدلو لينا بدلوك ومقارناتك في هذا الموضوع .. طبعاً أخوك اليومين ديل معلِّق في هذه الإبداعيات .. ويمكن أعدت مشاهدة الفيديوهات النزلتها في البوست ده زي عشرمية مرة .. أصلو الواحد ساعة يكون مشجون ويفيض بيهو الحنين بيقعد يتعلق بالكلام الإنساني الملحن فالنغم يغسل الروح .. مرات الواحد يساهر الليل في سماع مثل هذا الغناء، مرات تقعد تفتش للطيب عبدالله وليل الفرح، ومرات إبراهيم عوض وتذكار عزيز، ومرات أولاد حاج الماخي ، ومرات أولاد البرعي ، ومرات فِل كولن، ومرات ألحان من الصين - هل جربت تستمع للآلات الصينية الفلكلورية ؟ (try this) - و مرات ومرات ومرات ..
المهم .. الفيوض الملحنة دي بحور ماليها سواحل .. نحاول نغسل منها حواسنا متي ما أتيحت الفرص ..
01-24-2012, 06:20 PM
الصادق اسماعيل الصادق اسماعيل
تاريخ التسجيل: 01-14-2005
مجموع المشاركات: 8620
Quote: ياخي ماعارف ليه فجأة كده إنتابني إحساس صادق وعميق بخوة صادقة لخالد ده ؟ .. يمكن لأن الأنغام دي عملت لي غسيل داخلي .. حسيت بأننا جميعاً ضعفاء متفرعنين في الفارغة وكل زول جايط وعامل غبار كثيف، وهو في النهاية لا يساوي جناح بعوضة في هذا الكون الوسيع .. ما تقول لي عمر البشير أو أوباما أو ديفيد كاميرون .. كلهم سيصبحون جيف - شوف مصير القذافي ، بعد أن كان لا ينظر للأرض من شدة التعالي علي الناس ، صار يستجدي الرحمة من الثوار - كل يعمل لما يسِّر له ياخ ..
منير والله هذا من أجمل ما قرات مؤخراً في هذا المنبر، وفقط أهديك هذا الفديو اسمع وأمتلئ فرحاً وحباً ودهشة
01-25-2012, 01:16 AM
الصادق اسماعيل الصادق اسماعيل
تاريخ التسجيل: 01-14-2005
مجموع المشاركات: 8620
صديقي الفنان منير ياخي ذكرتني قعدتنا قدام بيتكم في الشعبية و انت تنقرش بالطمبور و ننتظرك نص ساعة تظبط الايقاعات تتحرك اصابعك و تشد قطع القماش البتشد الاوتار و ترخي اضانك و تنقرش و ترجع تاني ترخي شويية و في النهاية تبدا العزف و نبدا الطرب (ياخي الحلبي خالد بقى يطرب للطمبور اكتر من بعض الشايقية!!).طلبت من زميل في المكتب سوداني يمر على البوست و اصلو مكسر في الحبش قال لي ياخي صاحبك دا فنان قلت ليهواقول ليك حاجة لو مسك الريشة و رسم كمان ابداعو ما ليهو حدود و حكيت ليهو عن لوحتك الرسمتها في الاميرية 2 و تخيلت فيها ابو الطيب المتنبئ و تفاصيل التفاصيل في اللوحة و حتى (و القى الشرق على ثيابي دنانير تفر من البنان) و اليوم داك استاذ عطا شال اللوحة و لف بيها المدرسة فصل فصل و مكتب مكتب و لو لقى طريقة كان لف الدناقلة شمال بيت بيت و زنقة زنقة..غايتو بعد فتحت البوست دا نسيت انو انا في المكتب و المدير الايطالي اتصل بي ما اشتغلت بيهو شغلة الا جاني بالدرب.
Quote: ياخي ذكرتني قعدتنا قدام بيتكم في الشعبية و انت تنقرش بالطمبور
صديقي العزيز الراقي الحاج حمد .. مالك يا خوي عاوز تكتلنا بالحنين للماضي .. شوف بالله الزمن يا صاحبي ساقني بعيد كيف .. إندردرت واتبهدلت كل صيف يعقبه خريف (أنا هين ، شوف خالد العبيد الدرادر ودته في آخر الدنيا كيف؟ أستراليا عديل كده؟؟).. داير أجر الساعة للوراء شوية لكين عاد بي وين .. قال شنو.. لو عايز ترجع زي زمان قل للزمان أرجع يا زمان ..
حليل الطنابير وقعاداً بالليل في شارعنا المضلِّم .. مرة كنت قاعد براي بطنبوري أنقرش ، فقامت النغمات جابت ليها شاب كده كان جاي من الشارع الورانا .. فقام فجأة غير إتجاهه وجاء كاسر خاشي في شارعنا .. وجاء ماشي بقدامي ووصل لغاية نهاية الشارع وتاني جاء راجع فوقف قدامي وسلَّم فدعوته لجلوس .. فقال لي ياخ أنا بس جابني حس الطمبور .. وقعد إستمع لفترة .. ثم استأذن ولكنه طلب مني أن أسلفه الطمبور لعدة أيام .. في الآخر اكتشفت إنو الزول ده كان الشاعر حميد !! .. ما أظنه يتذكر الموقف ولا أظنه يتذكرني .. غايتو كانت أيام جميلة .. بالنسبة للرسم والتلوين أتذكر برضو وأنا برلوم في بحري الحكومية رسمت لوحة لجمعية الفنون .. فقام أستاذ رستم - رئيس الشعبة - تاني يوم جاء في فصلنا - أولي خالد - وقال وينو منير .. فقام يازول شال اللوحة ولف بي الفصول - يقاطع الحصة ويعرض اللوحة للفصل ثم نمشي للفصل البعده ، حتي قلت ليته توقف .. في الآخر أصرَّ يشيل اللوحة لنفسه .. وين نحن هسه من رهافة الحس الزمان والبراءة والنفس الصفية .. بقينا نلهث وراء غثاء الدنيا واختلفت الإهتمامات يا حليلنا ..
تعرف أخونا خالد عبدالحميد -الحلبي ده - من أطيب خلق الله .. ياخي الزول ده يتفاني في إرضاء أصحابه بأي ثمن .. طبعاً كان أصحابنا أبوعبدة وطارق ابن ادريس مجانين بالفنان محمدالأمين .. فيقوم خالد يمشي يفتش ليك أشرطة محمدالأمين ويشتريها عشان يجيبها يسمعها لناس أبوعبدة في جلساتنا تلك في راس الشارع ويمشي يحضر حفلات محمدالأمين مخصوص لكي يسجِّل بعض الأغنيات ويجيبها للجماعة .. كان يحاول إسعاد أصحابه بأي ثمن .. وطبعاَ برضو كان دائم الجلوس معي للإستماع للطمبور .. وعندما عرف أني مغرم بأغاني الفنان صديق أحمد بالذات، ظل يسعي ويفتش يجيب لي شرايط صديق من تحت الواطة .. زول نقي و عجيب ياخ !! .. تتذكر يا الحاج لمن عمل لي حفلة عيد ميلاد ؟ عمل لي الحفل مفاجأة وعزم أولاد الحلة وأنا آخر من يعلم .. وداك كان الإحتفال الوحيد بميلادي (شوف كمان آخر الزمن بقينا عيد ميلاد !! .. جدودنا زمان لو شافوا الحنكشة دي كان سكونا بالعكاكيز :)).. وطبعاً في الآخر الحفل إتقلب لإحتفال براس السنة .. طبعاً العبدلله مولود يوم ٣١ ديسمبر منتصف الليل .. ولذلك بقينا كل راس سنة نعتبره إحتفال بنقصان سنة من العمر :) ..
01-25-2012, 04:31 PM
Munir Munir
تاريخ التسجيل: 02-11-2002
مجموع المشاركات: 10496
شكراً يا أخي الصادق إسماعيل علي التفاعل معي في هذه الواحة.. غايتو حفلة وردي في أديس أبابا دي أنا زاتي مستغرب في الجمهور بتاعها ده أيما استغراب .. ده تسنامي جماهيري عديل كده ..!! .. ياخي ده لو في السودان ما حتجيب زي ده(أقرأ جابت ماجابت بتاعة تاج السر الملك ..ههه) .. وبالمناسبة طبعاً جمهورهم طروب وممكن يهجج ويرقص عادي .. نحن طبعاً جمهورنا بيكون قاعد كأن علي رؤوسهم الطير .. إلاّ الزول يكون مشعشع حتي يعبِّر عن نفسه بأريحية .. اللهمَّ إلا كان صقرية أو عرضة أو مردوم !! ولازم تكون معاها عكاكيز وسيوف وجلد بالسوط ودم أحمر.. !! الشئ شنو هو؟؟!!..
عاين الشاب الأثيوبي ده جضم نفس أغنية وردي الجبتها دي كيف ..
01-25-2012, 07:03 AM
قلقو قلقو
تاريخ التسجيل: 05-13-2003
مجموع المشاركات: 4742
الأخ منيروضيوفه الكرام, شكرا على هذا البوست الممتع والذى اراه مهما جدا وقد اعجبنى على وجه الخصوص كلمة صغيرة لكنها كبيرة المضمون قالها الأخ الصادق اسماعيل فى سياق مداخلته:
Quote: ليتنا نعزف السياسة موسيقى لكنا جمعنا الفرقاء.
صدقت اخى الصادق وشكرا على الجملة المعبرة.
Quote: شفت كيف الشعب السوداني د مسكين؟ ياخي عمري ما شفتي لي شعب الشعوب التانية بتحترموا لحد التقديس..و الحكاية دي هو في نفسو ما جايب ليها خبر..!!
ومصداقا الكلام الأخ كبر فتحضرنى قصة صغيرة حكتها لى الأخت هادية طلسم فى اثناء دراستها العليا بالمجر , عندما كانوا هى وشقيقاتها آمال وحياة يكونون فرقة البلابل وكيف انهم قد زاروا الدول الأفريقية شرقا وغربا وحكت عن الأستقبال الخرافى بل والأسطورى والذى فاق استقبال الملوك والرؤساء الذى قابلتهم بها شعوب تلك الدول وقد قالت ان ذلك كله كوم ماقابلهم به الشعب الأثيوبى (كوم براهو). انا لا أدرى لماذا ننجر خلف وهم لايشبهنااسمه السلم السباعى ؟ فالسلم السباعى لديه شعوبه ولديه فنانيه ومعجبيه بل حتى فى اوساط الشعب السودانى الفنان الذى يطرب ايضا يطرب السباعى , لكن هذا لايعنى ان نتماهى ونذوب في السلم السباعى بأيهام انفسنا انه الطريق الى العالمية او على الأقل هو الطريق لأذن المستمع العربى , ونسسى سلمنا الخماسى الجميل. آسف يامنير على الأطالة لكن المسألة نحتاج الى دراسة اكثر تعمقا واكرر لك شكرى على البوست .
01-26-2012, 02:55 PM
Munir Munir
تاريخ التسجيل: 02-11-2002
مجموع المشاركات: 10496
الأخ قلقو أشكرك علي العبور والمشاركة .. ما كل مت تشتهي النفس تدركه تأتي الرياح بعكس ما تشتهي السفن .. لكين مفروض التواصل ما عايز يجي من القمة مفروض تأتي من القاعدة .. if not top-down then let it be bottom-up .. الساسيون تحركهم شهوة السلطة وحب النفس بينما الفنانون تحركهم الأحاسيس المرهفة المسالمة ومشاعر المحبة .. الواحد فعلاً يحس بأن متاهات السلم السباعي كتيرة ومحتاجة التجويد الموسيقي بالآلات ومهارة العزف (بصراحة العزف بتاعنا ده عشوائي وجربندي ساي).. وفوق ذلك لا يمكن نشره بسهولة لصعوبة تعلقه بذاكرة المتلقي - خاصة المتلقي الغير سوداني - وذلك بعكس اللحن الخماسي - سهل الهضم سريع الذوبان - عاين مثلاً تلقي أن أكتر أغنية منتشرة هي أغنية إزيكم كيفنكم .. لأن وزنها بسيط وموسيقتها بسيطة وكلماتها سهلة ..
01-25-2012, 08:09 AM
Zomrawi Alweli Zomrawi Alweli
تاريخ التسجيل: 08-04-2007
مجموع المشاركات: 3368
أخونا منير: عندما ذهبنا على ايام الشباب للدراسة في بلداً طيره عجم ـ حملنا ما استطعنا من كاسيت ـ الغريب أنه عندما نفقد أحد أشرطة الغناء السوداني ـ لا نبحث عنها في غرف السودانيين ـ كنا نبحث عنها عند اخواننا الصوماليين والأثيوبيين والأرتريين ـ وأذكر أن لي صديق من مالي ـ أسمه داودا تيكتي ـ كان يحضر إلى الغرفة ويفتح أغنية دكاكينية بصوت الفنان زيدان ابرهيم وعندما تنتهي يعيد تشغيلها ـ ولا يسمع غيرها إلى أن يغادرنا ـ فعلاً : مجالنا الحيوي ـ في شرق وغرب أفريقيا ـ
الأخ صلاح هاشم السعيد .. تحياتي .. تأثير السودان علي هذه الشعوب ظاهر وقد كان إيجابياً لأن هؤلاء الأقوام عبروا من خلال السودان في أوقات كانت بلادهم تمر بظروف عصيبة ، فكان السودان الفسيح ملاذاً رحيباً لهم رغم أن السودان ذاته كان يعاني قسوة الحياة التي تعكرها الشمس الحارة والأتربة والغبار ..
01-25-2012, 08:45 PM
Munir Munir
تاريخ التسجيل: 02-11-2002
مجموع المشاركات: 10496
Quote: منير والله اليوم اتحفتنا بجملة من الشجون والحان تنساب في العروق وتفعل افاعيلها
زمراوي الولي: إنت الظاهر عليك برضك مشجون شديد وكايس لك سبب للبكاء ساي .. .. أصلو الواحد لو ما ماعونو نضيف ولامع لا يمكن أن تنعكس فيه هذه الأنوار ..
هاك دي: ليلي إنا الله الليل ليل والليل الله هوووي يابا شيخ زمراوي الولي .. يارايقة هووي شيخ منور ولدك علي .. رايقة هووي خلوا بالكم يا سيادي للبنية الشايلة بالي .. يا رايقة هووووي .. ليلي إنا الله الليل ليل والليل يا الله هوووي ..
يقال أن بعض أهلنا الشايقية حين انتقلوا من الشمالية وسكنوا عزابة في أحد نواحي العاصمة.. فظلوا كل ليل يشربوا الصافي ويغنوا كما الأشعار أعلاه .. الليل كله شغالين صفقة وغناء ليلي إنا الله الليل ليل والليل الله هوووي .. قاموا الجيران إشتكوهم للسلطات .. فعندما جاء البوليس ليتحقق من الدعوي وبقي بالجوار يستمع لهؤلاء الشباب وهم ينشدون طول الليل: ليلي إنا الله الليل ليل والليل الله هوووي .. قال لناس الشكوي : الشباب نحن ما شايفين منهم أي شئ غلط !! .. ناس شغالين طول الليل في ذكر الله - يعني نمنعهم من الذِكِر ..؟؟!! ..
01-29-2012, 09:34 PM
أمير قناوي أمير قناوي
تاريخ التسجيل: 01-24-2009
مجموع المشاركات: 618
العزيز منير بوست ممتع إتابعه منذ أيام. وعجبتني مقولتك: حين تسمع للمغنيات عندنا تحس إنو الواحدة لسانها قدر ده (وبسط ذراعه للأمام) .. مع إستثناءات كتيرة طبعاً ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Munir
Kabar
Mahjob Abdalla
خضر الطيب
خالد العبيد
mekki
حسن حماد محمد
الصادق اسماعيل
محمد زكريا
الحاج حمد الحاج
قلقو
Zomrawi Alweli
صلاح هاشم السعيد
أمير قناوي
فيس بوك
تويتر
انستقرام
يوتيوب
بنتيريست