دعواتكم لزميلنا المفكر د.الباقر العفيف بالشفاء العاجل
|
|
 ياجماعة كدي بالمهلة , دة السودان ولا الفاتيكان ؟؟؟؟
|
لولا أنني متأكدة تماما من صوت المذيعة الناعم كصفير البلبل يعلن عن قيام رحلة رقم 757 طيران الإتحاد المتجهة إلى الخرطوم حيث تدافع الركاب كعادتهم رغم علمهم أن لكل واحد منهم مقعدا يحمل رقما ومضيفة تلبي حاجته ومحتاجته لوجدت لهم عذرا , لكن التدافع أصبح صفة مو ابتداء من المدافرة في البص ,,البكسي,, صف الرغيف ,, صف البنزين ,, بيت العرس ,,, بيت البكا,,, بيت الأشباح ,, المهم نتدافر لكي نثبت أنناسودانيون بالمدافرة وليس بالميلاد .. المهم ياأولاد أمي وبنات أمي عشان ما تزعلن ,أنا كلو ولا زعلكن ولو لا زعلكن ماكان الشاعر قطع ليكن غنية ما تزعلي يالسمحة قومي استعجلي ,, وشوفو عادا لعفش ,,, الشنط الماخمج ,,, الكراتين ,,, شنط الحديد والهاندباق ولاباك زي ما بقولو!!! الشوالات ,,, الكراكيب الناقصن العناقريب,,, الشفع الجارين شمال ويمين ,,, واحدين آخر أدب وواحدين طبعهم زي الطين ,,, يطيرو من الكرسي ويقعو جوة العين ,,, النسوان الكبار ومتان ولابسات الدهب هبر وكيمان ,,, المودعين باكين وفرحانيين ,,, المودعات جكسيس وجكسويات ,,, كل هذه الإشارات والعلامات الدالة تؤكد أنني في طريقي إلى مطار الخرطوم الذي يحمل مجازا إسم دولي ,, أقلعت الطائرة في مواعيدها بالدقيقة والثانية فبكيت حزنا على الخطوط الجوية السودانية التي لا تعترف بالوقت حتى جاءت المضيفة الحنونة مش زي بتاعتنا الملعونة تسألني ما الخطب فقلت لها تذكرت طائرتنا السودانية اللي ما بتعلن مواعيدها سرا ولا علانية خلتناقدام الناس زي العطشقية ,,, ضحكت بلطف ثم انصرفت لتتركني مع أحزاني الأبدية ,, صوت أجش يشبه صوت الحمير يعلن عن وصول الطائرة رقم 757 القادمة من أبوظبي ليوقظني من غفوتي القصيرة فأذا بي وجها لوجه مع مطار الخرطوم الشين العفين ( ولا مؤاخذة) كله شيء كما هو نفس الناس والوجوه العابسة التي لا تعرف البسمة إليها سبيلا ,,, ولأنني لم أكن أحمل متاعا خرجت على عجل وسط لعنة الحمالين وصبية الحمالين والمعلمين اللي في اللقف والبلع شاطرين لأجد نفسي بعدساعة في نص الحوش وسط الأهل ,,, وفي المساء نفسه , قالت لي إبنة أختي يا خالتو الحمدلله إنك جيتي الليلة عشان تحضري معاي عيد ميلاد صاحبتي نوسة في قاعة الصداقة,,, نعم ؟؟؟ عيد ميلاد !! وين ؟؟؟ قاعة الصداقة ! يابت اتكلمي عدل !! والله ياخالتو وحتى كمان جايبة عشرة فنانين وفنانات وعازمة كل صاحباتهاوأصحابها وطيب أنا دخلي شنو في الدوشة الفارغة دي ؟ ؟ بنات ما عندكن شغلة وأهلكن عايزين ضرب بالبسطونة,,, خالتو عليك الله أنا عايزة أقشر بيكي قلت ليهن عندي خالتي صحفية ستايل مواكبة وناقشة ,,, أجي يابنات أمي أنا حالتي قلت خليت ناس واو وياي في أبو ظبي أجي ألقاهم في السودان ؟؟؟ طبعا لزوم الشمشرة اللي طلعنا بيها من شغل الصحافة قمت مشيت وعينكم ما تشوف إلا النور ,, أولاد وبنات ,,, خالات استايل ,, عمات واو وأكل وشراب من مالا عين رأت ولا أذن سمعت ... طلعنابعد نهاية الحفلة وقد أوشكت الشمس أن تشرق وتعال شوف العربات الواقفة برة كلها فور ويل آخر موديل,,, واااو!!! يا جماعة كدي وروني بالظبط أنا وين في السودان ولا في الفاتيكان؟؟ ولما أقول الفاتيكان , لأنها أصغر دولة في العالم لذلك يتمتع سكانها بالرفاهية والعيشة الهنية ...
الحدث التاني عرس ناس من اللي حدث ولا حرج أول حاجة البيت مكسي بلمبات الزينة التي لو تم ترشيدها لأضاءت بيوت الخرطوم لمدة خمس سنوات قادمة ,,, أهل العروس ما حدش يقدر يكلمهم فوق زينم وعديلم فاكين الشغالات للضيوف وعاد أريتن شغالات الهنا اللغة فلونت أنجلش ,,, الزي موحد ,,, التسريحة ,, الإكسسورات ,, كله تمام كلام ونظام,, أما الأكل والسيرفس عاد ما بقدر أقول ليكم شنو المافي قالو أبو العروس جاب الحاجات من برة بطيارتو الخاصة ونحن قاعدين نعاين بعيوناونشوف في المحن الفي الصحن الماشات وبردحن ,,,, بعد شوية سمعنا الزغاريد والزفة قالو العروس وصلت جايبنها في الهودج يعني كوشة متحركة شيالنها أربعة فتوات من فتوات حي شبرا الله يرحمك يا محمد رضا وقامت أم العريس من ما شافتها تزغرد وتشتت في الدولارات واليورو والين والمارك فوق الناس وأبو العروس شال ليكم ديك يا البندقية البتشبه البيه وتزيد عليه والرصاص يقول يا ليل لامن ناس الأمن جو جارين قايلين في أنقلاب ,, المهم نزلت العروس من الهودج وقعدت في الكوشة و طبعا في فرق كبير بين كوشتنا وكوشتم ,,, كوشتم كلها أزهار ورياحين وليزر وكوشتنا ملاح بامية بايت وقراصة مخمرة و ريش جداد والكدايس تقول يا غربتي ,,, بعد شوية بدت الحفلة الفنانين من شدة ما كتار كله واحد قالو ليه بس المقطع الأول من الغنية المفضلة وتنزل بدون كلام أصلك قابض العشرة مليون مقدم ,,, البنات عاد زي الفراشات والأولاد يتحشقو ويتمشوقو والساحة تئن وتون من الكشف والحت شي رقصة القرد وشيى رقصة الحصان وشي رقصة الغنماية غايتو أنا أديت ربي العجب وقلت لو دة حال السودان, الرماد كال حماد ,, يعني الملايين اللي اتصرفت في الفنانين والأكل والشيلة القالو كله حاجة ستة وتلاتين ديل لو شالو ربعهم واشترو بيهم مواد غذائية لناس الشرق والغرب البحصل شنو ؟؟؟ كان العروس بتحرد العرس ولا العريس بفكها عكس الهوا يا جماعة ما تتقوا الله وتشوفو مصيبة الناس اللي من لحمكم ودمكم ليه تخلو الدول ناس الأجنبية اللي بتقولو عليهم زورا وبهتانا كفار يأكلوهم ويشربوهم ويعالجوهم؟؟؟ والله عندهم إنسانية أكتر منكم ولا شنو يا بنات امي ؟؟؟ فتكم بعافية لكني حزينة حتى النخاع ..
(عدل بواسطة عواطف ادريس اسماعيل on 02-27-2007, 01:59 PM)
|
|
 
|
|
|
|
|
|
|
 Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
قال الفنان عبد الله عبد القادر البعيو وهو يرفرف بي عيونو ويرقص في حواجبينو للحضور في حفلة حضرناها ملح كشأننا في حضور الحفلات كافة،
الماعندو القرش
فيردد الكورس خلفه بنشوة القرييييييييش
فتعجب الحكاية البعيو وتكبر في دماغه فيكررها ليعيد الكورس التكرار ، وبعد أن يقطع نفسنا ونتوجس خيفة من الذي يأتي بإعتبار أننا حفنة وزمرة من المفلسين في الأرض الذين لا يملكون القرش ، فيشفي غليلنا مردداً
"من البنات يتغبن تحرقو العبره ويتعوض دمعو الكبن"
فنجد أن الأمر عادي ونأخذ نفس عميق لأنه لم يأت بجديد ولأن المفلس هذه الأيام البحرقو كتير إبتداء من حرارة شمس نص نهارنا كان لابد للمقرش أن يفعل العجب متباهياً على الأقل في نظر المفلسين في الأرض ، فيسوي هيصه وعيد ميلاد لكديسه.
حال سكان العاصمة يمكن إختصاره في كلمات أعجبتني لعنوان مقال في جريدة شايله الهوا كنت أسرع من الغنماية في الفوز بها غنيمة يقول العنوان "الخرطوم عاصمة المول الركشة والمس كول".
سألت أحد العارفين ببواطن الأمور يا أخي ليه مفاهيم الناس إتغيرت وبقت العاملة المنزلية أندونيسية والممرضة فلبينية والممثلة سورية والمخده بدون روسيه ، فقال لي يا وهم ده العولمه globalization فقلت ليهو قلوب شنويا أخوي قال لي لايزيشن وقلت ليهو لايزيشن دي من ذوات الثدي ولا ذوات الدم البارد ، قال لي لا دي من ذوات الحسب والنسب.
طيب يا أبو العريف الناس بتجيب القروش الكثيرة دي من وين ،
قال لي شغل مخك تاكل هوا ، أبقي كوز تنيش بالجوز ، أعمل أهبل تكسب أكتر . بترول شنو البجيب قروش قدر دي ، دي يا سيدي إسمها money laundering موني عرفتها قروش أها التانيه شنو ، قال لي غسيل ياخخخ غسيل ، قلت ليهو يعني الجمله تكون قروش غسيل ، يا مخك يا أخي غسيل أموال ، والأموال يا أخوي يغسلوها من شنو ، قال لي من قذارتها يا ....... أكلتها في حناني وقلت إنت زعلت ولا شنو لا ...... ورددت في سري يمكن عشان عندنا ثروة مائية ضخمة دايرين يغسلوا عندنا لكين ما قدرت أعرف حا يشروا وين بس برضو ما عجبني الكلام لأنو مويتنا عكرانه والغسيل ما حا يكون نضيف ولغاية هنا نقيف ولو في واحد عايز يضيف يضيف بس على مسئوليته واحد قال لي في مثل بيقول
"العندو قرش محيرو يشتري حمام ويطيرو" فعلق أحد الظرفاء قائلاً المفروض يشتري حمام ونبله ولمن يطير الحمام ينيشو بالنبله.
الناس في البلد بين طيران الحمام وبين النبله
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: almulaomar)
|
النبي يا عواطف يا اختي دا في السودان ؟؟!!
واغربتك يادومه واااااااااااااكربتك ( دموعي عشره عشره وقلبي يقطر في الدم )
وااااااااااكربه وليداتك البتحاسبيهم بالقرش والتعريفه وعيد الميلاد اصحي الدغش قبال يمرقوا للمدارس اطبع علي خد الواحد فيهم قبله واقول ليهم عيد ميلاد سعيد ولما يرجعوامن المدرسه يلقوني عملت ليهم كيكه بي 4 حبات جداد و150 جرام سكر و100 جرام زبده و200 جرام دقيق واقول ليهم احمدوا ربكم النعم لا تدوم
| |
|
|
|
|
|
|
|
|
 Re: ياجماعة كدي بالمهلة , دة السودان ولا الفاتيكان ؟؟؟؟ (Re: doma)
|
دوووووووووووومة!!!
يافتيل المايقومة تبري من الكر يا طويلة العمر والله كل دة في السودان لو دايرة العنوان وبعدين يا بت أمي ناس السودان بقت حفلات عرسم بأصالة نصري وعمرو دياب وفي ناس ممكن ما تصدق الكلام البنقولو دة
لكن والله في التمنينات كان في ناس لمن يكون عندهم عرس أهلهم بشحنو ليهم كل حاجات العزومة من أبوظبي
حتى الخبز يا دومة من هنا لزوك الفشخرة وحكاية رش الفلوس دي شفتها بعيني في عدة حفلات وكمان في واحدة من أبوظبي مشت عرست لي بتها في السودان عملت البدع وزعت أنصاص جنيه كان كنت عارفة كان قطعت تذكرة ومشيت حرستها هناك ,,,
اما أعياد الميلاد يا ما ناقشة كلها بقت في الصالات والقاعات ولمن مشيت إجازة في واحدة صحبتي عملت لي عزومة عشا في الهيلتون وأنا المسكينة النعجة لمن طلعنا مع بعض قلت ليها نمشي أي مكان قريب مطعم كافتيريا ضحكت بلطف وقالت لي أنا كلمت صاحباتي يجونا في الهيلتون وبعدين ما تبكي وتستغفري يا دومة أنا أولادي زيك كيكة بنفس المقادير بتاعتك ومرات بتفولح وبضيف ليها أناناس عشان دي الفاكهة الوحيدة البحبوها وبخت جنبها نقانق ( هوت دوق) ( كلب ساخن ) محبتي ...
| |
|
|
|
|
|
|
|
|
 Re: ياجماعة كدي بالمهلة , دة السودان ولا الفاتيكان ؟؟؟؟ (Re: almulaomar)
|
الملا عمر!!
معزتي ..
وينك ياراجل ؟؟ أنا هسة قايلاك في تورايورا و خفت أسأل عليك الناس ومن إيديا إنت تضيع وأعيش بعدك حياتي جفاف مواسم بينا مافي ربيع ,,,
يا واد يا جميل وأنا بالي طويل مداخلتك رايعة عديل وكلامك سمح بلحليل .. وبعدين الناس تاريها بتغسلفي القروش ونحنا بي جاي نغسل في العدة والهدوم والفلس كاتلنا ؟؟؟ وبيني بينك البنات جنهن
وجن الراجل المفلس تقول ليك دة لا بيجيب لي هوم دلفري ولا بعزمني في هوتيل فايف استار أعمل بيه شنو وزمان قالو اذا دخل الفقر من الباب خرج الحب من الشباك عشان كدا البعيو معاه حق عارف البنات عايزات شنو أما الهيصة وعيد ميلاد الكديسة دي والله شفتها بعيني عندي بت صاحبتي عندها قطة سيامية بتعمل ليها كلو سنة عيد ميلاد لغاية عيد ميلادها الستاشر بعد داك الكديسة ماتت فعملت ليها مأتم وحفل تأبين تقول لي بالضرا إنشاء الله راجل مرة ؟؟؟؟
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
ياللا ياعواطف حضرتي ليك مناسبة غير
( بكرة ياوادي الغلابة يسعدو الناس التعابة....)
ود المحرب:
أنا عارف القروش بتجي من وين كلامي جد ماغسيل كلام
غربتنا الحقيقية والله يكضب الشينة شكلها حاتكون لما نرجع في المغيرب
هوأخر الزمن دا إلا يزيعو ليكم في الجزيرة
دا إنتو شفتو حاجة
صلو ركعتين وأرجو الدائم
أمراض إشلون
وغني كيف كيف
والطريق للجامعة يمر بالكوفير
والعزاء بالمرطبات
وساكني
ومسكل لي وامسكل ليك
ويالطيف بالحال
واستغفرتك يامالك روحي
وعقدو اللوم
وجافو الراي
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: nourelhadi awad)
|
نور الهادي !!!
مداخلتك سبب إسعادي !!
عاد ما قلت إلا الصح نحنا عاد كان ما قالو لينا في حصاد اليوم يلا هوووونا ما بنمشي !! عاد نمشي وين
مع ناس إنت مسكل لي وأناأرد عليك ويا مغترب أرجى الجاييك .. والأمراض أشكال وألوان في ناس تمشي
الجامعة بالبرادو وناس بالتو ويل وأنا برضه يا بعد عمري بقول استغفرتك يا مالك روحي !! تحياتي .
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
المتداخلين الأحباء قبل ماأرد عليكم يجب أن أشكر كل الذين اتصلوا ليثنوا على فكرة سودانيز أون لاين
التي أصبحت ملاذهم في الغربة كما نشكر أخونا الحبيب الجميل بكري سيد الحوش ومن الذين اتصلو طارق من امريكا , عادل السعودية , محسن من مصر , عبدالعزيز عيسى ماليزيا , الدكتورة .. من السودان وأخيرا أخونا الجميل جدا أحمد صالحين الذي يقول أنه يعيش في بلجيكا منذ 30 عاما ولما رجع السودان لحضور زواج إحدى قريباته لم يصدق ما شاهده من اسراف وبذخ ومظاهر فغفل راجعا( حردان) مؤكداأن الغربة أفضل بكتير مما رأه من مفارقات وعلى فكرة الزول الجميل دة طلع قريب أبو بكر سيد أحمد سبحان الله نفس الصوت والطيبة والمشية ذاتها وقدلتو !!!
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
عطوفه الحلاوه الفي رفوفا ( جمع رف يا حبان )
عاد تاني لو سمعتي بي نوع دا
| Quote: يا دومة من هنا لزوك الفشخرة وحكاية رش الفلوس دي شفتها بعيني في عدة حفلات وكمان في واحدة من أبوظبي مشت عرست لي بتها في السودان عملت البدع وزعت أنصاص جنيه |
عليك الخوه طوالي ترسلي لي نمش نحرسهم انا بجيب ليك التياب الحرير لزوم ا لفشخره والدهب الفالصو ونقول كدي يا يمه نمش الكوفير نصبغ الشيبات ونقشر قشره تمام عشان نلقط لينا انصاص جنيهات يااختي الدهب طالع السماء الايام دي .
الخازوق تبقي انصاص فالصو.
اخير نلم القروش الا لو بقيت بالسوداني تكون سفرتنا وقشرتنا خسرانه
تعال نعمل اغنيه
نقول
يا يابه ياود دروو
الرش التمام ما سوداني
الرش يورو
| |
|
|
|
|
|
|
|
|
 Re: ياجماعة كدي بالمهلة , دة السودان ولا الفاتيكان ؟؟؟؟ (Re: doma)
|
دووومة !!!
حلاتة صاحية وبعد النومة !!!
خلاص يا بت أمي تياب الحرير عليكي والشمار علي أنا قبل ما ناس العريس يقومو باسبوع نقوم فللي قدامن
نسبقن عشان نحجز لينا مواقع متقدمة وبعدين دهب نسوان الخليج دة كله بقى فالصو ماتغرك الحنة والقدلة دي لكن الانصاص يا بت أمي دهب عيار 24 لزوم الدعاية المجانية بس خليك جاهزة وإن بقت قروش نقوم نقطع
غنية للعريس نقول :
عريسنا ود الهناوالسرور
الرشة اليورو قبل الفليردامور ( بيني وبينك هي الفلور ولا الفرير) ؟؟؟ معزتي ..
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: mamkouna)
|
الأستاذة عواطف صاحبة القلم الشفيف
الظواهر السالبة في مجتمعنا أصبحت مألوفة .. الغالبية تموت جوعا وكمدا ، والأقلية من أصحاب الحظوة تموت من التخمة
رغم أن الموت واحد لكن شتان بين أحمد وحاج أحمد.. لا بد من يد إلاهية تأخذ بحق الغلابة .. ولو نظرنا للتاريخ لنتعلم لرأينا كيف بادت الحضارات السالفة بسبب فساد الملك وظلم الرعية
..
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: mamkouna)
|
ممكوووووونة!!!
ست الرفقة المأمونة!!!
معقولة أجي الأيامات دي وما أشوفك يالدانيات قطوفك ؟؟؟؟ الكلام دة كان شهر اتناشر ويا بت أمي رقصة
القرد دي شنو القايمين فيها دي التقول نحنا ساكنين في غابة !!! تصدقي ناس برة بفتكرو كدة يعني
بتخيلو نحنا ماشين وسط الأسود والنمور يعني لو سمعوا برقصة القرد دي واااسجمنا وااارمادنا!!!
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
| Quote: تحضري معاي عيد ميلاد صاحبتي نوسة في قاعة الصداقة |
| Quote: وعينكم ما تشوف إلا النور ,, أولاد وبنات ,,, خالات استايل ,, عمات واو وأكل وشراب من مالا عين رأت ولا أذن سمعت ... طلعنابعد نهاية الحفلة وقد أوشكت الشمس أن تشرق وتعال شوف العربات الواقفة برة كلها فور ويل آخر موديل,, |
| Quote: عرس ناس من اللي حدث ولا حرج أول حاجة البيت مكسي بلمبات الزينة التي لو تم ترشيدها لأضاءت بيوت الخرطوم لمدة خمس سنوات قادمة ,,, أهل العروس ما حدش يقدر يكلمهم فوق زينم وعديلم فاكين الشغالات للضيوف وعاد أريتن شغالات الهنا اللغة فلونت أنجلش ,,, الزي موحد ,,, التسريحة ,, الإكسسورات ,, كله تمام كلام ونظام,, أما الأكل والسيرفس عاد ما بقدر أقول ليكم شنو المافي قالو أبو العروس جاب الحاجات من برة بطيارتو الخاصة ونحن قاعدين نعاين بعيوناونشوف في المحن الفي الصحن الماشات وبردحن |
| Quote: وقامت أم العريس من ما شافتها تزغرد وتشتت في الدولارات واليورو والين والمارك فوق الناس |
غايتو جنس حقد طبقي!!!!!
قالوا: الما بتلحقو ..جدعو
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: Kamal Abdu)
|
كيمو !!!!
كيفنك ؟؟؟
نورت البوست ,,, شرفت وآنست ,,, والله لا حاقدين ,,, لا حاسدين ,,, لا بغرانين لكن جنس الخمج دة ما بعجبنا!!
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
والله يا جماعة دا انا اكتر زول مسطح في الحاجات دي.. دا انا كنت معترضة على حاجات بسيطة وكتبت عنها.. اجي القاكم عندكم جنس حاجات.. انا لو شفتها كان جاتني صدمة حضارية الزمتني سرير المستشفي..
رغم تواضع تجربتى وملاحظتي في المجال دا.. بس كدي فجوا لي فرقة بيناتكم وقولو لي بعد داكم يا اخوانا انا صاح ولا ما غلط؟
اهاجاهزين؟
هاكم ملاحظاتي.. (اصبروا عليها شوية اصلها طويييييييييلة..!
فتيات...كافتيريات...كافتيات....
اعترف بانني شعرت بالخوف..وقررت متابعة سرب اولئك الفتيات في ميدان (ابو خنزير) حتي انتهي بي المطاف في إستاد الخرطوم حيث تتجمع معظم مواصلات ريف الخرطوم..
فتيات في عمر الزهور..لن اتجرأ واقول انهن كن يرتدين اخر صرعة في عالم الموضة.. بس الموضة بقت موضة.. لبس الموضة ذاتو ما موضة.. !! اجتهدن في تفعيل بشرتهن.. في جعل التفاوت بين الوجه واقرب المناطق اليه، مثل التفاوت بين الليل والنهار..
وليس هنا مربط الفرس..
آخر صيحة في عالم الماكياج والغريب، يبدو إنهن مصرات علي الالتزام بأغنية خلف الله حمد، عليه رحمة الله، أقيس الفم بودعة والقي الودع واسع.. شفائف مذمومة بقوة وقد ابتلع الداخل معظمها وقد برز ماكياج قبيح علي المتبقي منها..
قربنا من مربط الفرس..
الكتب في اليدين تدل علي أنها طالبة.. والتوقيت الذي تتحاوم فيه تلك الطالبة، المفروض فيه أن يكون وقت عمل وإنتاج لتلك الطالبة؟
إذا دعونا نتساءل ماذا تفعل مثل تلك الطالبة في مثل تلك الساعة ؟
كافتيريات تمثل برنامج ربوع السودان..كل أنواع الاغاني.. وكتر خيرها في دي.. وكمان جزء يقدم المدائح لزوم تحديد لونه الديني.. أنا لا أتكلم عن البنات العاملات في الكافتيريات ولست ضد ذلك النوع من العمل.. بامكان المرأة فرض احترامها لذاتها وعملها أينما وجدت، ولست ضد تناول مشروب أو سندوتش في أي كافتيريا.. أنا ذاتي بسوي كدي..ولا أجد في ذلك غضاضة.. بس ذلك الكم الهائل من البنات.. وفي ساعة يفترض بها أن تكون ساعة عطاء.. زائغات أو مواعدات أو زهجانات..دي برضو تبقي مصيبة.. مصيبة عدم معرفة ماذا نريد..ومصيبة أن لا نريد استغلال تلك الثروة الطبيعية والنعمة الإلهية.. نعمة الصحة والشباب.. والمقدرة علي التعلم والعطاء..
هل وصلت الميس؟
زميلتي صحفية حكت لي أنها فوجئت حينما ذهبت لتخريج بنتها الطبيبة، لتكتشف ان البنات صرن أكثر جرأة في اللبس من مذيعات بعض القنوات التي سماها البعض تهكماً (البسي).. أو البسن..كانت المرأة مدهوشة وعدتني بدهشتها.. بس انا الدهشة قادتني من أبو خنزير إلي استاد الخرطوم وأنا أتأمل في الفتيات الحايمات في البر ندات او الجالسات علي عتبات بعض الكافتيريات مع رفقاهن أصحاب حلاقة المارينز وقليل من الكاري و الكري..
اه لو ان الزمان يعود القهقرى...!!
*******
جلس أمامي يحكي عن حفلة تخريج فلانة الفلانية.. وكيف أنها كانت حاجة راقية بشكل.. كنت ابحث عن ذلك الرقي..
والله كان شفتي جابو لينا تلاتة حافلات ودتنا الخرطوم.. أهل البت كانوا حاجزين استراحة حاجة ما بتخلص.. تناولنا فيها جنس بيبسي .. شفتي كل زول ناولوه قزازة بألف(يقصد ألف جنيه). لم أستطيع السكوت فسألته.. انتو كم؟ فأجاب حوالي أربعين.. والاستراحة بكم؟. عاودت السؤال..
فزهج..
اسمعي دايرة تسمعي ولا تسالي.. ما تطممي بطني اسمعي ساكت.. ولا هسع بقوم.. صمت وقررت مواصلة الاستماع وابتلاع لساني في لغلوغه.
بعدين مشينا استراحة أكلنا فيها بيرغر..وووشنو يا ربي..
ماكدونادز؟
ده شنو ده لقطيهو من وين..
قررت ممارسة الاستماع بجدية..
اها وبعدين حصل شنو..؟
ايوة خليك كدا.. بعدينا مشينا استراحة تانية لاقينا شلة تانية وبدت الحفلة والمكسرات والباسطة وغايتو أكلنا جنس حاجات.. غايتو عرفت الباسطة وبنات عمها الا الباقي دا ذاتو بياكلوهو كيف.. ما عرفت .. غايتو انا كنت قاعد في أول الصف.. الدور طوالي بادي مني..كل مرة أغلط .. مرة أجي أشيل الصحن كلو يقولو لي خليهو.. ومرة اشيل حتي يقولوا لي شيل الصحن كلو.. المهم من تالا الشبع دا ما فضل لينا فرضا ناقص.. عليك امان الله شبعة نتذكر فيها ليوم الليلة.. بدل بوش الفول الكل يوم داك .. ذاتو امي لما تمرق الالفين من مفحضتها ، تحدر لينا وتسب لينا: الله يجننكم التاكلوا اكل الصُرفة.. وتقذف بها إلي الأرض وتغطي وجهها بيديها بعد ان تكون قد ذمت شفتيها بقوة.. ونسرع باختطافه قبل ان تغير رايها..
اها قول لي بعدين الحفلة ما وصفتها لي؟
آ زولة ها .. هي لكن جنس حفلة ولا جنس بنات ولا جنس لبس ... تبكي بس..
لم ادرِ ما الذي يبكيني الحفلة التي فاتتني ولم افهم حتى الآن شئ فيها أم اللبس الذي ولي زمانه..
المهم مارست الصبر وقررت الاستماع بالحفلة علي علاتها..
الحفلة كانت بالفنانة فلانة الفلانية .. والله كان شفتي عربيتها الوصلت بيها يمين ما في أي زول عندو زيها..
سمح هي البت اتخرجت شنو؟ طبيبة ولا مهندسة؟
هو الزول الا يتخرج دكتور او طبيب حتي يكون قرا جامعة ولا اتخرج؟
سمح اتخرجت شنو؟
ما بعرف شنو؟ لكن اتخرجت بدبلوما...!
دبلوما؟ كل الخمج دا دبلوما؟ حافلات وهيصة واستراحات وفنانة وعشا هنا، وهضم هناك وتحلي بهنوك وكلو دبلوما..؟
آي دبلوما.. مالك انتي دافعة من جيبك.. انشاء الله ما تتخرج كلو كلو انتي مالك؟
صحيح انا مالي ..
انا كان مالي وجنس القصص دي.. بس ميلي بعرفو براي..
اودي اولادي وين من جنس المفاهيم دي؟؟؟؟
الله يكضب الشينة..!
ودمتم...
حليمة
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: حليمة محمد عبد الرحمن)
|
حليمة ,, العظيمة!!!
معزتي ..
والله يا ست الكل كل ما جاء في مداخلتك صحيحا وهناك الأسوأ من ذلك وما يحيرني يا حبيبتي أن ألأهل لم
يعد لهم دورا في حياة أبنائهم يعني فاكين ليهم الحبل على الغارب والجمل بما حمل طالماهم شايلين
روحهم وما مغلبنهم وناس عصاميين إنشاء يجوا البيت الصباح ما مشكلة وبعدين حكاية البنات والأولاد
وأعياد الميلاد دي ظاهرة فعلا غريبة أضف إلى ذلك بتلاقي الطلبة والطالبات طول اليوم شايلين دفاترهم
وحايمين في الشوارع ما عارفاهم بمشو الجامعة ولا بذاكروا متين نحنا كنا غير شارع الجامعة والمين
روود ما بنعرف ولا سمعناعموما أشكرك والحزن يعصر قلبي على مرورك الجميل أيتها الصحفية الأنيقة ..
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
في السودان شوف عيني - البقي لي سهر -عربيه نيسان مورانو full option لا وإيه لكزس يقدل في شارع الدومة ده غير الهمر والبنطلون الناصل أو ما يعرف بـ low waist وبدون كمر ، والألوان بعد ما كانت جريدة بقت وفي العربات لون فوشي زي ما بقولو الجماعة وحليل زمن تويوتا بوكس 76 أبيض وكورولا وكريسيدا يغنو ليها عديل كده ويغنو لي سيدا بالإضافة "عربية كريسدا سمحه وسمح سيدا" وكلو أبيض نظام السوق عاوز كده ، والصورة إتغيرت تماماً بعد أن أصبح ........ و......... عاوزين كده فساد اللون الأورنج والكشميري واللؤلؤي والماسترده والبصلي وفتحت سقف وفتحت أنف وهلم جرا.
وفي ناس بتشرب شيشه بي ماهيتي وماهيتك غير الأكل التيك أوي والتيك أوف و take or leave ولأننا زارعين ليف وماكلين ليف وبنستحم بالليف إذا وجد الماء وغالباً ما نتيمم لضعف المياه وبرودة الجو في أيام خلت فكان لابد أن نأخذ بالخيار التاني الواقع بعد or في جملة الفرنجة والمتفرنجين.
لقد سرت إشاعه مفادها أن مثل هذه الأعراس والزيجات والمناسبات الخاصه جدا أصبحت النقطة فيها بالعملات الصعبة جداً جداً ، لقد إنتهي سيد الحيشان التلاته ، وإنتهت صلاحية قدور الصندلية والريحة النيه وأرادب العشاء والغدا فكثر الجياع وأزدادو فقراً بعد أن كفر الشيخ بمشيخته وأصبح السيد أو الأستاذ والمستر فهم عدد محدود من المعازيم الهاي كواليتي أو الـ vip وبالرغم من خصوصية الأكل إلا أن المعازيم وإمعاناً في الحنكشة يرفضون أو ربما يأكلون بأطراف أصابعهم شئ قليل إمعاناً في تعضيد وتأطير مكانتهم في المجتمع فكان لابد أن تكون المشاركة بأسهم في شركة كنارتيل وسوداتيل وموبينيل وفودافون حتى وكلو مس كول في النهاية. وبدلاً من أن تزغرد النسوة في هذه الأفراح أصبحن يقلن وبخشلعة بينة بعد أن يذيع المذيع الداخلي ، فلان الفلاني 130 سهم في شركة ..... و30 سهم في شركة بالإضافة إلى ...... فيأتي صوت النسوة "ياااااي بس" وزمان الغبش الواحد لو دفع جنيه يزغردو ليك زغروده يفضل صداها يتردد في أضانك لمدة أسبوع.
القروش كتيره في البلد والناس بتشتري والبلد غاليه بدرجة فظيعه ومع ذلك الناس بتشتري وبتأكل وبتشرب وبتعمل كل حاجه ربما ، لكين الملاحظ أنه أصبح للبلد قمة تمترس حولها ثلة من النفعيين والمنتفعين وأصحاب الـ .... وبعض الشطار والمحظوظين فأثروا ثراء فاحش بالقدر الذي جعل القاعدة – مش حقت أحداث سبتمبر – كبيرة وعريضة وأكثر فلساً وتعاسة وبرضو still عايشين بس عيشة عدوك.
واحد قال لي يا أخي إنت حارق رزك ليه ، العندو الحنه بحنن دقنو ، وربما أغوار غير مسبورة على رأي أديبنا أبا جهينة.
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: almulaomar)
|
أخي الحبيب الملا عمر!!!
محبتي ...
بصراحة وإعجاب شديد مداخلاتك لوحة جميلة أو رسم بالكلمات لواقع مجتمعنا المعاصر الذي يعج بالمفارقات يعني زي قصيدة الشاعر الراحل اسماعيل حسن بتاعة بين الديوم والإمتداد شارع ظلطوالتي تحدث فيها عن الفرق بين سكان الديوم والإمتداد . فعلا أصبح السودان ناس في السما التامنة وناس أسفل سافلين وربنا يستر ويعين ,, دحين يالملا ,, ما شفت البنات الراكبات الفور ويل وشيالات مبوايلات آخرموديل ديل تلقاهن سايقات ويتكلمن والشرطة ما تقدر تقول ليهم تلت التلاتة كم ؟؟ بس المساكين الغبش طوالي يوقفوهم ويحرروا ليهم مخالفات ومعاها نهزرة كمان إنت ماعرف المبايل ممنوع مع السواقة ولو كترتو معاهم يا ويلك وسواد ليلك مخالفات بالجملة تدفع راتب الشهر كله وتبيت القوى .. , آآآه يابلد شكرا على مرورك الجميل ..
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
الغاليه عواطف
قبل ربع ساعه بالضبط شاهدت فتاه لابسه إسكيرت فةق الركبه وماشه في الخرطوم وفي رابعة النهار والغريبه مع إنو الإسكيرت فوق الركبه إلا إنو برضو في فتحه للخطوه مع إنو هنا تنتفي أهمية تلك الفتحه لأنو ماشاء الله الخطوه مافي أي حاجه بتوقفها ....
المهم بالنسبه للبذخ الإنتي شاهدتيهو ده فالسودان دخلتو في الفتره الأخيره أموال وإستثمارات ضخمه جدا والوضع الإقتصادي العام تحسن بشكل كبير جداً وفي نفس الوقت ظهرت فجوه ضخمه بين الأغنياء والفقراء لكن بشكل عام الوضع أفضل كثيراً مما كان عليه ..
مشكلة الكثيرين منا نحن السودانيين عقدة شوفوني والمشكلة دي أكتر عند السيدات عشان كده في أموال كتيره جداً بتضيع في الثانويات قبل الساسيات ونجد أسر مالاقيه تاكل وتشكي الوضع لطوب الأرض وبعد ده كلو تلقى أفراد الأسره شايلين موبايلات فخمه وغاليه جداً في تناقض وغريب وفعلاً حاجه تحير ..
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: محمد فرح)
|
تحياتي .... نعم سمعنا بكل ذلك
ولكننا نحن نملك قوه و عزيمه تكفينا لو أتحدنا وتضامنا يداً بيد على كسر قيود الجهل تلك و نتحرر من براثن تلك العادات الذميمة...فلنبدا بأنفسنا .
كمان في إحدى الحفلات جابو أصالة نصري للحفل بخمسون الف دولار
ورجال الأمن المكلفين بحراستها عشرة الف دولار
وأبو العروس جاب ليها فيل من الهند - وهذا يمكن أن يضاف لأكثر قصص الفيل شهرة ألا وهي أصحاب الفيل، يارب الفيل ده بيعملوا فيه الهودج لكي تركبه العروس وهي ترتدي الساري -
-------
حكت لي بعض الأخوات أنها قد حضرت عرس ...... شخصية مشهورة ...... وزير في عهد مايو .....لا داعي لذكر الأسماء .... الصالة في عفراء مؤجرة بخمسة وسبعون مليون جنيه ... الحفل نسائي رقصت فيه العروس ... رقصات"الفلاتة-الهدندوة-الهندية-الصومالية-رقبة-نقارة-مردوم-........45 رقصة... ,اجادت الرقص العربي "عشرة بلدي" وحينما علقت الأخت بأن العروس قد أجادت الرقصة الشرقية كان رد خالتها... أخدناهاالقاهرة أتعاقدنا مع فيفي عبده لمدة اسبوعين بيش تدربها!!!! عالم وهم!!! ولا نحن الوهم.. مش عارف..!!!!!!!!!!!!!!وبالمناسبة هذه الأخت كانت الأخت الوحيدة التي ترتدي الثوب السوداني داخل الحفل
الأب يتفشخر والله خسرنا بس غطيناالخسارات لأن الكشف كان بالملايين،،،وزراء ومش عارف إيه
أما السودانية فلنا معها شأن آخر ... مضيفات لا يتوارين في إحراجك إن طلبت منهن شيئاً .... خلقة الله بنحترمها لكن شنات الطبع هي المؤسفة ......اذكر أنني طلبت من أحد المضيفات شرائح من الجبن واستبدالها بكل ما لدي بها لآنني أعاني من فرط حموضة مرتفعة....فكان الجواب... لا محسوبة على عدد الركاب.... إجابة كتمت فيها غيظي ولم آكل شيئاً داخل الطائرة وتشكلت لي حالة نفسية مع ذلك النوع من الجبن فكل ما أراه ... أتنرفز من غير سبب وأسباب..... قال السودانية قال!!!! بعد أن أكملت توزيع الحصة .. رجعت إلى وأحساس بالندم ويدها مليئة... تفضل... أخذتها منها ووضعتها بجاني ورردتها كماهي... أعتقد درس أفيد من رفضها والصيحان في وجها ... وردت اليها بضاعتها وهي تنظر الي شذراً... حتى نزلت لأرض المطار... واناأحني راسي ولكن بهيبة
أبو داؤود عليه رحمة الله كان مسافرا لآداء حفلات في الخليج - لاقاه صديقه - قال ليه. وصل معاك الحاجة ماشة تنفس بتها ...بيستقبلوها في المطار - وبدأت رحلة التلتلة والعتالة والشنط المليئة... بالحطب...ووصل وتأخر أهلها في استقبالها وأبو داؤود قرفان من العتالة.. سأل أحد المستقبلين لأبو داؤود.. الحاجة المعاك دي شنو..
فأجاب دي... دي...دي ما حمالة الحطب)
......
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: othman mohmmadien)
|
أخي الحبيب عثمان !!!
سعيدة بمرورك الجميل ومداخلتك الجادة , تصدق بعد شوية حتكون الزفة بمختلف أنواع الحيوانات يعني
ما تستغرب لو جات واحد مزفوفة بحمار وحش ولا نمر ولا وحيد القرن طالما أن هناك أمهات وآباء يجرون وراء البدع للفت الأنظار وإغاظة الناس المساكين اللي ليهم الله وعيشة السوق و طبعا أصالة نصري اعتقدت أن السودان أجمل بلد وينعم أهلة بالرفاهية وتوقعت أن تتم دعوتها لفرح عثمان محمدين ومحمدفرح وكل أعضاء المنبر والله دي مسخرة.. فعلا اللي عنده حنة بحنن دقنو والناس ديل بقولو علينا حاقدين وبنعاني من أزمة طبقية ولكن لا يهمنا رأيهم فينا عموما أنا عايزة من أعضاء المنبر من غير المتزوجين أن يبدأوا بأنفسهم وان يرفضو كل ما هو غير منطقي أو يشكل عبء مادي عليهم سوى على المدى البعيد أو القريب ,,, شكرا محمد ...
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: محمد فرح)
|
العزي محمد فرح !!!
تحية خاصة وشكرا على مرورك الجميل ,,,
وبعدين معاك يا محمد ؟؟؟ اسكيرت فوق الركبة !!! دة طويل جدا في هذا الأيام وبعدين الفتحة دي لزوم التهوية فقط ما تسرحو بخيالكم بعيد خصوصا أن اللبس حرية شخصية والأهل موافقين على أن تقدم إبنتهم عرض أزياء في الهواء الطلق ,,, يعني بعد شوية حتلاقي بلوزة بدون اسكيرت أو العكس أها حتعمل شنو؟
فرح :ما تستغرب في زمن العجب والصيام في آذار والفطور في رجب !!!
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: صابرين الصباغ)
|
الجميلة صابرين !!!
صباح الفل والياسمين ,,,
طلتك البهية ومرورك الأنيق تزيدني زهوا وفرحا .. صدقت يا ست الحبايب فيما ذهبت إليه وكما يقول أحد الشعراء :
تموت الأسد في الغابات جوعا **** ولحم الضأن يطرح للكلاب .
صابرين ... عندك رائحة شم قوية جدا وأتمنى أن أكون عند حسن ظنك يا كاتبتنا الرقيقة ..
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
Quote: يا دوووومة يا برلومة!!!
عشان بتك تعرس لازم تعملي دعاية في المنبر إنك خاتة ليهاأرصدة في البنوك وعندها أسهم لا ليها أول
ولا آخر و مسجلة ليها عمارتين وبعد داك تعالي شوفي الطلبات ,,, ناديني أفرزهن معاكي نشيل الدايرنو
والباقي نوديه الخور ... مودتي .. |
عطوفه الماكنتوش الفي رفوفا
هي كان عملناالدعايه وجونا ناس تقال واكتشفواالحله وغطياتها
وبت دومه وعطوف خالتها
ولقونا افلس من فار الكنيسه
مابتبقي فضيحتنا سايبريه
لي جنس الكلام دا لا بدخل بتي في حاله نفسيه لا شئ
بشوف ليها واحد صيني من هنا وخلاص
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: doma)
|
دووووووووووومة يا نعومة !!!
مودة ...
عاد لمن يصل العريس لغاية عندنا ,,, بنقدر نقنعه بإنه الفلوس ما كل حاجة المهم التربية والأخلاق
ما تشيلي هم أختك دبلوماسية من العيار التقيل بعدين الصيني دة تقومو تجيبيوه في دقداق السودان دة يقع يتكسر ونبقى في مشكلة ,,, معزتي ...
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
الاستاذة عواطف
تحية واحترام
غايتو قدر ما فتشت لي مقدمات ما لقيت عشان كده النخش ليك في الحاجة الواقفة لي في حلقي وبعد داك لو لقيت مقدمات بقولا ليك 
انا ماغصني اللبس الشين القعد يقولو ده ,والمستغرب ليهو انو الواحدة بتستفيد شنو لمن تلبس كده؟! والمستغرب ليهو اكتر انو زي دي قالو لو شاغلتها بتبهدلك , المعنى انها ما لابسة كده عشان تلفت نظر الاولاد
غايتو نفسي اصاحب لي واحدة من النوع ده يمكن تديني اجابات مقنعة , اها انا بفتش وانتو كمان ساعدوني من هناك يمكن القى لي واحدة
| |
|
|
|
|
|
|
|
|
 Re: ياجماعة كدي بالمهلة , دة السودان ولا الفاتيكان ؟؟؟؟ (Re: يحى الشريف)
|
ود الشريف الراقي الظريف !!!
تحية وشكر على مرورك الجميل ,,, مافي داعي للمقدمات إنت تشرف وتنور وبعدين يا ودأمي البتلبس
جنس دة بتفكر حالة متحضرة شوية ولمن ما تهببو ليها لازم تعمل ليك مشكلة عشان البضاعة المعروضة دي ما تبور أوعك تفكر تصادق جنس ديل وجع قلب ساكت وربنا يستر بناتنا وأولادنا...
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
العزيزة عواطف ...
نحن في العام 2007 .... وقصتي هذه حدثت في ثمانينات القرن الماضي.
أتى إلي أحد الأصدقاء ليحكي عن حفل عرس حضره قبل يومين في هيلتون الخرطوم. وبعد أن تحدث عن بهرجة المدعوين، وكمية الفنانين، والغناء والرقيص، يقول في نهاية الحفل أتوا بتورته تتكون من عدد من الطوابق (وتحت تحت عرفنا إنو فيها أسانسير من جوة). التورتة كانت لا تشبه التورتات التي رأيناها بأم العين، أو تلك التي عُرضت أمامنا خلال الشاشة البلورية، وتم الإعلان بأنها وصلت في التو من مطار الخرطوم، حيث أتت على طائرة خاصة من أحد البيوتات الشهيرة بباريس.
ظل صديقي يسهب في الوصف، وكل جارحة فيه تعكس إنفعاله ودهشته، وأنا جالس مرخياً جفوني في لا مبالاة. وعند إنتهائه من حكايته، سألته، ومتى سيتطلّق العرسان؟
صرخ قائلاً: إذاً أنت تعرف القصة. فلما أجبته بالنفي، قال أنهم تطلقوا فعلاً صباح اليوم التالي.
أختي عواطف ...
هذه المهرجانات لا علاقة لها بإحتفالات الزواج أو أعياد الميلاد. هي فقط فرصة ليمارس أناس فارغين فراغهم.
مودتي
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: ابوبكر يوسف إبراهيم)
|
أخي العزيز أبوبكر !!!
معزة ...
بتصدق إنه في ناس لغاية الملح بشيلوه معاهم ولمن يرجعوا البجيبوه معاهم خليه ساكت ,,, مرة في واحدة في مطار هيثرو صادروا منها فسيخ وجبنة بكل أنواعها وأشكالها وشرموط وبصل محمر وويكة عشان الكلب البوليسي نبح في شنطتها الكلام دة بعد سبتمبر 11 وعاد هي قربت تموت من العياط قالت ليهم دي أمانة ردوا عليها سوري ..وفي مطار أبوظبي أصبحنا مادة للتندر تصدق في واحدة قالت لي إنت ما شايلة كتير خليني أوزن معاك وزنت معاي كل شنطها الزايدة بعد شوية جاتني قالت لي هاتي البورجنج كارد بتاعك قلت ليها ليها قالت لي عندي جواز رايح مني ويمكن دخلته في الشنط المع عفشك ولازم يرجعو العفش كله وأفتش الجواز وين ,,, بتصدق تأخرت ساعة من الناس قربت الطيارة تفوتني بسببهاتقول لي نحن شعب راقي ؟؟؟
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
الفاضلة عواطف
وضيوفها الكرام
دخلت باحثاً عن صوت اجراس الكنائس وترانيم الصلاة ووقع خطوات
الكاردينال والراهبات، فحتماً قد تم تشييد مبني ليسوع علي ارض ابو جنزير.
فاذا بي اطالع اضغاث احلام زارت اختنا عواطف علي ما اظن بعد مساجلة كلامية مع
ابو الاولادأسفرت عن نوم مضطرب وحردان لوجبة العشاء، مما نتج عنه كوابيس طعامية
في فضاءات حالمة وسعيدة وفقاً للقاعدة السودلنية الازلية (حلم الجيعان عيش).
ونسبة لمشاكسةعصافير بطني وجدتني مستمتعاً بما لذ وطاب في متن كوابيسك الطعامية،
ولكني دهشت غاية الاندهاش عندما ادركت ان كل ضيوفك الافاضل فد اعتراهم نفس الكابوس
ما عدا شخصي الغلبان وحينها ادركت انني لم اخلد للنوم بعد، وبما انني ضيفك لهذا
المساء فمن المؤكد انني سوف استمتع بفاخر الطعام علي انغام كاظم الساهر وانا اراقص
احدي حسان السودان من نوع جكسة في خط سته ده لو ما تلقيت وجباتي اليومية من رفس
ودفير من قبل حرمنا او ابنتي التي لا تبارح القفا المضروب بنية وشلوت.
عليه أفضل اليقطة علي الأحلام واناشدكم أخوتي الكرام فرداً فرداً اما ان تستيقظوا او
تجزموا لي بأن ما سكب مداداً وسطر كلاماً هو الحقيقة بعينها وان الله شهيد علي ذلك
حتي اكذب وافضح وهم الحلم الامريكي واحزم حقائبي مهاجراً الي وطني حتي
أحقق امالي واحلامي علي أرض الجدود وادعو رفاقي الواقفين علي شوطئ
العذاب وموانئ الاغتراب الي حضن بلادي ليستجموا من تعب الرحيل واهات الليل
الطويل، ونشد الساعد ونبنيه حقيقة بعد تطهيره من رجس الانقاذ واثام النبت الشيطاني
العشعش فينا كابوس وفساد سجم ورماد ويبقي الحلم سوداني.
كضبوا الشينة وطمنونا او اكدوا الشينة وخبرونا
عشان نعرف نجيكم.................... او تجونا
أمين حمد
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: Amin Hamad)
|
الأخت الرائعة عواطف
تحياتي
والله العظيم انتي نياشة نيش , أقول ليك شنو ؟؟ ما عارف ؟؟؟ واصلي وبس .
وأهديك هذه الأبيات للوزير الشاعر مانع سعيد العتيبة .
يا من رمي سهم الهوي
ومضي علي درب النوي
ماكان سهمك طائشاً
بدمي تخضب وأرتوي
هل كنت حين رميته
تدري بما قلبي حوي
هل كنت تعلم أنه عافي التجارب وانزوي
فأصبته متعمداً أن تستثير به الجوي
ماضيه جرح غائراً فكن أنت الدواء
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: هاشم أحمد خلف الله)
|
هشومي الحبيب
تحية ...
لكن ما تقول لي عندك أم أولاد عسل ,,, ربنا يخليها ليك بلغها تحياتي وشكري الجزيل على مكالمتها
الحلوة وخليها تكون معانا عشان الإنتخابات بتاعة البورد قربت عايزين الحسان الغيد من داخل البرودوخارجه يساندونا ويخلونا نفوز بأكبر عدد من المقاعد ,,, شكرا هاشم على الكلمات الحلوة
أصله مانع سعيد دة شاعري المفضل بعد نزار قباني ..
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: Amin Hamad)
|
أخي العزيز أمين !!
معزتي ...
والله نحنا لابنحلم ولا حاجة والحلم دة فارقناه زمان من ساعة ميدان أبوجنزير زي ما بتقول حليمة تحول
إلى أبو خنزير والكلام موجع وكتير لكن خايفين عليكم من المطر والزمهرير عشان كدة بنديكم ليه جرعات
خايفين عليكم من الصدمات عشان هيك يا بعد عمري ما تستعجل وتفضح الحلم الأمريكي لأننا لا بنقدر نجيكم لا بتقدرو تجونا لكن شماراتنا حتوصل لغاية عندكم عشان تشوفو العجب والصيام الفي نيسان وليس رجب وكان عايز تراقص أم بلوزة بدون اسكيرت موجودة ولا أم أسكيرت بدون بلوزة برضه بكثرة بس حدد موقفك .. فتك بعافية ..
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: Haitham El Galal)
|
تصور يا هيثومي في واحد جاب لي دوا مستعجل وكان خاتيه في الفريزر وقال لي حيجي صاحبه يشيلو منك
في المطار بدون ما يديني رقم تلفون ولما وصلت قعدت منتظراه تلاتة ساعات ما جا وتعال شوف التعب التعبته على بال ما أعرف مكانه اتصالات لأبو ظبي وبحث وتفتيش وبع أسبع حتى عرفت مكان الراجل وكله يوم يديني موعد وما يجي خلاني أحلف ما أشيل حاجة ...
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: عواطف ادريس اسماعيل)
|
الحبيبة عواطف
كل الحاصل دهـ في الوطن الحبيب السودان
من العليهو ..
اهو الفاتيكان تعيش جميلة ،،،
لكن السودان ؟؟؟
احياناً نجدلهم العذر لينهبو .. ويسرقو ..
و.....
في الاخر مافي موضوع ناس جياع وناس دايشه
ناس عايشه وناسما لاقية وظائف وكله ملل في ملل ...
انثري جمالك عواطف وفرحينا ...
واجعلينا نبني قصور آمال ...
ترفرف فوقها مساحات الفرح المستدام...
تضيق عندها مساحات الالم حتى تزول ...
الواقع المر هو سبب ما نحن فيه وأجيالنا ...
يا رب نقمض عينا ونفتحها نجد سوداننا .. السودان ..
مودتي ،،،
| |
|
|
|
|
|
|
|
|
|
Re: ياجماعة كدي بالمهلة , دة السودان ولا الفاتيكان ؟؟؟؟ (Re: خالدة البدوي)
|
الكاتبة الرائعة د. خالدة!!1!
معزتي ...
أشكرك على مداخلتك ذات النكهة الخاصة وأتمنى للجميع سودانا يحسدهم الآخرون عليه أما حكاية الناس
العايشة والناس الدايشة دي ما عرفنا ليها حل غايتو إلا يجي حل من السما وبعدين ياخالدة أنا بحلم
دايما أحلام وردية وفي كل حلم أو مشروع دائما بكونو أعضاء سودانيز أون لاين معاي يعني مثلا بفكر في مشروعات مختلفة تحت اسم سودانيز أون لاين ويكون الشركاء من الداخل والخارج ,, بفكر في حي خاص بأعضاء سودانيز أون لاين ,,, بفكر في زواج أبنائي من بنات الأعضاء والعضوات يعني سودانيز أون لاين بقت هاجس أصحى وأنوم عليه ما عارفة الحالة دي من شنو ؟؟ كدي أنسأل بكري يمكن يعرف ليها تشخيص !!!
| |
|
|
|
|
|
|
| |
عواطف ادريس اسماعيل
almulaomar
doma
خالد المحرب
mamkouna
؟؟!!!!
عاطف عبدالله
حليمة محمد عبد الرحمن
محمد فرح
othman mohmmadien
صابرين الصباغ
يحى الشريف
محمد أبوالعزائم أبوالريش
هاشم أحمد خلف الله
خالدة البدوي
فيس بوك
تويتر
انستقرام
يوتيوب
بنتيريست