دعواتكم لزميلنا المفكر د.الباقر العفيف بالشفاء العاجل
|
|
 وووب عليا العريس نارو حية !!! ثقافة النيران الحية في وجدان الأغاني السودانية !!!
|
أخوتي وأخواتي قراء وأعضاء سودانيز أون لاين !!!
جمعة مباركة وسعيدة وحافلة بكل خير ,,,
كنت أستمع بالأمس إلى بعض الأغاني السودانية فوجدتها حافلة بالثكلي والنيران المشتعلة يعني مافي
أغنية من السمعتهم ما كان فيهاووب ولا نار لذلك قررت كتابةالبوست دة عشان اغير ليكم شوية من
المواضيع ( البايخخخخخخخخخخخخا ) اللي هريت بيها كبدتكم الأيامات الفاتت دي لا سيماوإني وجدت أن
أغلب الأغاني المعنية أغاني بنات عسل ودمهم شربات وكمان ليس لها شاعر وما بتجرح شعور زول شاعرا
كان أم مؤديا فتوكلت على الحي الذي لا يموت وقلت أرضي كل الأذواق لا سيما وأن بوست ( دق الباب وجانا
جريت لي حفيانة ) عمل لي نفسه سعر . تصورو لما تأملت هذه المشتعلة والقابلة للإشتعال قلت لي نفسي
ياربي الأغاني دي ألفوها في محطة بترول ولا مدينة أم النار حيث توجد حقول تنقيب النفط و بعدين
دخلتني خوفة كدا قلت هسة لو قامت الدول الأوربية وأمريكااللي بتشتعل الحرائق في غاباتها بدون سبب
زي غابات أستراليا وأسبانيا وكاليفورنيا وغيرها لو سمعت الأغاني دي ما حتقيد الجريمة ضد مجهول بل
حتشير بأصابع الإتهام إلى الأغاني السودانية المشتعلة عبر السنين .
مرات بقول لنفسي الشعرا المجهولين الحرقوا مشاعرنا ديل أكيد إتأثروا برائعة أحمد شوقي ( مجنون
ليلى )التي قتلناها تمثيلا في مدرسة أم درمان الثانوية لدرجة أن الطالبات أطلقوا على البنات نفس
أسماء الناس اللي مثلو أدوارهم ,, المهم في مقطع مشتعل من هذه الرواية الشعرية عاجبني جدا ومازلت
حافظاه مثلماأحفظ الكثير من أبياتها ,, يدور المقطع حول زيارة قيس السرية لوداع حبيبته ليلى بعد
أن رحل ذووه إلى مضارب أخرى فأكتشف سر هذه الزيارة عمه والد ليلى فباغته قائلا :
قيس !! فيما وقوفك والفتيان قد ساروا ؟
فرد عليه قيس بقوله :
في الدار حتى خلت من نارنا الدار !
فنادى عمه إبنته ليلى قائلا :
ليلي ! خذي الوعاء وأملئيه لابن عمك حطبا!
فجاءت ليلى مهرول ,, مرحبة لتقول :
قيس ابن عمي هنا يا مرحبا ! يا مرحبا !
فذهب الوالد بعيدا احتراما لمشاعر العاشقين مش زينا نحنا الحشريين بتاعين الشمارات !
فظل العاشقان يتناجيان حتى اشتعلت النار في كم جلابية قيس البيضا المكوية فصاحت ليلى قائلة :
( ماقالت ووب ) طبعا بل قالت :
قيس !! أنت غاد على خطر !!!
إدرك النار يا فتى ..
في كمك الأيمن إنتشر !
فرد عليها قائلا :
أنت أججت في الحشا ..
لاعج الشوق فاستعر ..
ثم تخشين جمرة ..
تأكل الجلد والشعر ؟؟
تصورو نار قيس اللي بتحرق الجلد والشعر ونارنا المشتعلة في وجدان الأغاني وليس في الفؤاد .
أخواني وأخواتي العزيزات أرجو من كل واحد منكم أن يمدنا بكلمات مشتعلة من الأغاني السودانية التي
تزيد البوست إشتعالا بس رجاء يابت الخليفة أوعى تقولي لينا ( جرب نار الغيرة ) خلاص جربناها و
انتهينا عايزين غنية سودانية وياريت عفاريت النت ناس د. مصطفى محمود والباش مهندس تمبس وأنور كنج
وكل الذين لديهم خبرة في تنزيل الإغاني لو يمدونامشكورين بأغاني أكثر إشتعالا لإثراء النقاش غير
الجاد .
خارج النص :
أشكر كل القراء الذين كلفوا نفسهم عناء الإتصال لأنهم إفتكروا إني حأسيب البورد و أقول ليهم أسيبوا
أمشي وين ؟ هسة أنا قررت أفك بيتي حق الإيجار دة بعد ما كان بخمسين ألف بقى بخمسة وتمنين وأجي
أسكن في حوش حاج بكري الكبير السمح دة بالمجان أصلي بحب ( البلوشي ) .
* الباش مهندس أسامة شكرا لك ..
* إبن الأخت العزيز هشام ما قصرت ..
اتصالاتكم أكدت لي أنكم لا زلتم تتابعون سودانيز أون لاين في السودان وهذا مكسب كبير بالنسبة لنا
كأعضاء . وفتكم بعافية ..
|
|
 
|
|
|
|
|
|
|
 Re: وووب عليا العريس نارو حية !!! ثقافة النيران الحية في وجدان الأغاني السودانية !!! (Re: ناذر محمد الخليفة)
|
الأخ الحبيب ناذر !!!
جمعة مبارك يا عريس ,,,
ممكن دة أيه ؟ ممكن ونص وخمسة ,,,
الوست بوستك ,,,
نورت وشرفت ,,,
تحياتي لعروسك الحلوة ... طبعا شفت الفيدو مع ماجدة عوض يا بختكم استمتعتو بالحفلة ,, بتصدق يا ن
ناذر الاغنية ما فتحت عندي لكن سمعتها سمع بس وريني الصبر والنوم غلبوك ليه ياعريس ؟
| |
|
|
|
|
|
|
|
|
 Re: وووب عليا العريس نارو حية !!! ثقافة النيران الحية في وجدان الأغاني السودانية !!! (Re: الطيب شيقوق)
|
الأخت عواطف
تحياتي
لو قسْنا الكلمات : ووووب علي العريس نارو حية :
بمقياس المعاني التي في بطن الشاعر أو الشاعرة .. فربما أخذتْنا إلى مناحي أخرى غير المعنى المطروح في مقدمة ليالي الأفراح و الليالي الملاح ..
فالعريس من بداية العرس : فتح الخشم و سد المال و العقد و الحنة و ليلة الدخلة : كلها أيام تجعل من نيرانه تحيا سرمديا بل و يكون لهيبها كما اللهب الخارج من منصات آبار البترول لا تنطفيء.
و لكن المعنى الآخر الراقد في بطن الشعراء هو أن هذه النيران يمكن أن تكون بسبب جيوب العريس التي تسخن من كثرة إدخال يده و إخراج رُزَم المال يومياً من فتح الخشم و حتى يوم فطور العريس الذي لا يذوق من هذا الفطور و لا ( فتفوتة ) ...
و بما أن الجو في السودان أصلا ملهلب و مولع .. فإن أي أقل نار في فؤاد العريس تزيد من إشتعال بقية الفتيل.
و لا أدري لماذا تقول تلك المغنية ووووب ... مع أنو النيران لا تصل مياهها الإقليمية لا من بعيد و لا من قريب ...
سنعود كان ربنا أبعد العوارض
| |
|
|
|
|
|
|
|
|
|
Re: وووب عليا العريس نارو حية !!! ثقافة النيران الحية في وجدان الأغاني السودانية !!! (Re: ابو جهينة)
|
الرائع جدا أبو جهينة !!!
أسعدتني ربنا يسعدك ,,,
بتصدق ضحكت جنس ضحك ما عادي مع إني ما بضحك بالساهل خصوصا في حكاية النار ما بتصل مياهها الإقليمية
عارف كلامك دة ذكرني باستراحة كتبها أخونا سابقا جعفر عباس لمن كان صحفي في جريدة الإتحاد قبال كم
سنة كدة ,, عنوان الإستراحة ( على نفسها جنت براقش ) كان بحكي عن نفسه يوم زفافو كيف الناس فرحانة
تنطط وترقص بعدما أكلت وشبعت على حسابو وهو يسب ويلعن فيهم وماكان حاسي أبدا بوجود العروس القاعدة
جنبو لأنه كان مغيوظ منها وبعتبرها سبب البلاوي كلها المهم جعفر قال الناس فرحانة وهو النار ملهلبة
فيه وقاعد يحسب في الديون البنك الفلاني عايز منو كم والبنك العلاني عايز كم وهل النقطة حتغطي ربع
الخسارة إلى آخره ليصل في نهاية المطاف إلى أن براقش قد جنت على نفسهابالفعل ,,
شكرا مرورك يسعدني ,,,
| |
|
|
|
|
|
|
|
|
|
Re: وووب عليا العريس نارو حية !!! ثقافة النيران الحية في وجدان الأغاني السودانية !!! (Re: هاشم أحمد خلف الله)
|
هشووووووووومي !!!
سلامات ,,,
البت دي شفتها في بيت الحفلة بتاعة العريس النارو حية !!
وين الأغاني المولعة ,,, في الإنتظار على المدار ,,, ودي ,,,
| |
|
|
|
|
|
|
|
|
|
Re: وووب عليا العريس نارو حية !!! ثقافة النيران الحية في وجدان الأغاني السودانية !!! (Re: عواطف ادريس اسماعيل)
|
الاخت العزيزه عواطف
سلام مربع
تعرفى انا لى زمن قاعده اسمع بس اغانى بنات وكل يوم بتاكد بانو النسوان او البنات ديل ما سهلات والله واكاد اجزم انو اغلبية الشعب السودانى وفى الزمن الصعب دا ما برتاح الا لى غنى البنات ديل , لانهن بعبرن عن الداخل بكل سهوله وبدون لف ودوران
نرجع للنار
عندك مثلا اغنية :
النار النار يا حبيبى
قلبى الشمال ولا كتفى ما عارفه مليان بالنار يا حبيبى
النار النار يا حبيبى قلبى او كتفى اليمين مطعون سكين يا حبيبى
النار النار
ودى طبعا اغنيه لرقيص العروس ولمن ترقصها العروس بتكون مولعه والعريس يشتعل كمدا ...هاها ها
تانى فى اغنية :
نيرانو وجاجه
وبلالى وجرى دمعى
انا ما متذكراها كلها
المهم كل مره بديك جزء من اغانى النيران
بجى راجعهلمن اطفى نارى دى واجى
تحياتى
حليمه2
| |
|
|
|
|
|
|
|
|
|
Re: وووب عليا العريس نارو حية !!! ثقافة النيران الحية في وجدان الأغاني السودانية !!! (Re: Halema2)
|
حلوم يا الخاتية اللوم !!!
محبتي ,,,
شكرا على هذا المرور الرائع والمولع نار ,,,
بتصدق الإغاني دي كلها ذكرتني باللذي مضى يا حليل أغاني زمان لكن يا حليمة رقيص العروس هنا شي
أساسي يعني بجيبو ليهو قسمة من السودان وتعاي شوفي :
بلالي .. بلالي ..
بلالي انا ونااااري !!
أنا يا بلالي ,,,
شكرا حليمة العظيمة مرورك يسعد الخاطر ,و آسفةعلى التأخير عشان كنت قاعدة في خط النار بي غادي
ولا ما شفتي النيران المولعة ديك ... !!!
| |
|
|
|
|
|
|
| |
عواطف ادريس اسماعيل
ناذر محمد الخليفة
malik_aljack
هاشم أحمد خلف الله
Nader Abu Kadouk
حيدر حسن ميرغني
عبدالكريم الامين احمد
الطيب شيقوق
ابو جهينة
Halema2
فيس بوك
تويتر
انستقرام
يوتيوب
بنتيريست