دعواتكم لزميلنا المفكر د.الباقر العفيف بالشفاء العاجل
|
|
 نصحية أم لأبنتها الجزء الثاني ( إحذري الفشار والنهار والشكاك والناشف زي المسواك ) !!!
|
جمعة مباركة يا أمة الأمجاد في مشارق الأرض ومغاربها مع أطيب الأمنيات لكم بشريك عمر لطيف وظريف ودمو
خفيف وما تزعلو لو سلطنا الضوء على صفانتا الماحلوة فكلنا خطاءون ومن كان منا بلا خطيئة فليرمها
بحجر ,,, يعني أنا مثلا ما زعلت لمن الإبن البرلم عيدروس حجر قال لي تلاقيكي طفشت راجلك من البيت
وقعدتي تكتبي بالعكس ضحكت من أعماقي لأني بطفش عشرة زيه في يوم واحد وخايفة أطفشكم وبكري معاكم
وبدل سودانيز أون لاين تبقى سودانيز أون هاي واي ( on high way) .
إلى البنات الحلوات المقبلات على الزواج وليس الزوجات المتورطات وما لاقيات مخرج سوى مطار الخرطوم
الدولي أو شارع الصحافة ظلط عايزة أقول ليكم البساهر دة بكون أهون كتير من الفشار الماعندو شغلة
غير أنا وأنا يعني حداث وما سواي وطبعا زي دة بكون كضاب شديد و يخليكي طول اليوم مغيوظة من فيشيرو
ومن كضبو لكن ما بتقدري تقولي حاجة لو زعلتي ومشيتي ناس أمك بيقولو ليك طالما ما مقصر معاك خليه
يتبوبر ويتفشسر ,, ويقول ليك لو جينا للبوبار تلقي ناسو كتار!!!عندنا واحد هنا في أبوظبي يا لطيف
قال كان الياور الخاص بتاع نميري ولمن يقول ليك أنا وجعفر عملنا وعملنا ولمن قلت لبثينة مشتهي لي
ملاح ورق بي بامية وحكايات وروايات غايتو نميري لو قام كدة وقال ليه عمري ما شفتك ماعارفاه حيعمل
شنو إلا يخلي الإمارات السبعةويمشي جزيرة كش في إيران .
نجي عاد للراجل النهار دة عاد صوتو يجيب الرايحة ولمن ينهر يطير رحمان القلب وبعدين العجيبة ما
بفرز مرتو من أولاده في النهير ولا بعرف في ضيوف ولا مافي وبينهر في الفارغة والمليانة لكن قلبو
بيكون أبيض بس طيبة قلبو بتعملي بيها شنو لمن يخليك قدام الناس أقل من سمسمة ولا لمن يفرج عليك
خلق الله في مناسبة ولي موضوه=ع هايف أنا غايتو الراجل البنهر بيني وبينو ضحوة لو لقيتو في الدرب
ما بسلم عليه أخاف يرد علي بي نهرة وأقوم أبكي أصلي ما بتحمل غلط الرجال كلو كلو وبالذات النوع
دة مهما تحاولي معاه ما فيش فايدة بعتقد إنه بيفرض شخصيتو ووجودو بالنهير والصوت العالي يعني دة
نوع بيقول الراجل لازم لو دخل ينخاف ولو مرق ينشاف !!
أما الشكاك دة فراجل ما عندو ثقة في نفسو ولا في زوجتو ولا في المجتمع عشان كدة دة المفروض تدقي ليه
خروج بدون عودة من اول لحظة شك عشان الحكاية بتكون باظت وما ببتعالج والجرح اللي بيسببو ليك ما
بندمل مهما عمل مع العلم أن صفة الشك من الصفات المو وليست مكتسبة لذا سوف تلازمه حتى الممات .
ونجي بعد دة للناشف زي المسواك ولا أعني به النحيل عشان النحافة بقت موضة لكن بقصد أبوكلام ناشف
زي الحطب يا جماعة الزول الزي دة بكون مالو ؟ مهما زوجتو تقول ليه كلام ناعم ورقيق بيكون ردة ناشف
وما بتبلع لدرجة تخلي الزوجة تشك في نفسها تفتكر روحها ثقيلة وبايخة وما عندها سالفة على فكرة
معظم الزوجات اللي أزواجهم ناشفين تجدهن يبحثن عن السلوى والكلام اللطيف في مكان آخر حتى ولو كانت
صداقة بريئة لكنها حتما ستشبع الغرور وتلطف الجو ويكون أخونا آخر من يعلم بس يستاهل وفتكم
بعافية !!!
|
|
 
|
|
|
|
|
|
|
 Re: نصحية أم لأبنتها الجزء الثاني ( إحذري الفشار والنهار والشكاك والناشف زي المسواك ) !!! (Re: عواطف ادريس اسماعيل)
|
اها يا عواطف ..الكضاب عايز اكتر من كدة ...؟ الكضابيين كتار و الضحايا من الزوجات والخطيبات كتار ومطلقات ذنبهن انهن صدقن واحد كضاب عمل من البحر طحينة وكلام معسول ( عسل اسود بنيلة) .. خايفيين علي بناتنا واخواتنا من الكضاب الما بيتعرف كضبو الا بعد الفاس تقع في الراس ..الناس اشتت ومن الصعب معرفة تفاصييل الشخص الا بعد معاشرة .. اها زمانك الواحد كان بيلقي البيعرفو الزول واحوالو ولو كضاب واللا لا ..هسع كلو واحد في بلد وكلو واحد في همو والجماعة الكضابيين بيستغلوالوضع دةة وهاك ياقصص وحكاوي ودموع ....
| |
|
|
|
|
|
|
|
|
|
Re: نصحية أم لأبنتها الجزء الثاني ( إحذري الفشار والنهار والشكاك والناشف زي المسواك ) !!! (Re: عواطف ادريس اسماعيل)
|
الأخت عواطف.. بعد ما صلينا الجمعة وربنا يتقبل.. قلنا نتاوق..
لقينا المنبر مولع نار بموضوعين ليك طازة من الفرن...الظاهر
مفروكين مع مفروكة الجمعة...
لكن يا عواطف ياأختي كلو كوم وفشر الرجال كوم...
يعني الفشر في الرجال أصلو ما خايل... وحاجة كدة يعني ما ماشة مع الرجولة
يعني.. البوبار.. والفشر مع إنو غير محمود لا في الراجل ولا في المرأة..
لكن في الراجل شكلو كتر (بضم الكاف والتاء وتسكين الراء) وخاصة إذا عرفنا
إنو الفشر عشان يكون فشر مظبوط لازم يكون معاه حركات باليدين والحاجبين
ومرات بالتلاليش.. ويمكن بغز اليد في الصفحة (يعني جنبة الجسم).. ولكي أن تتخيلي
راجل بالصورة دي.. يعني مبلوعة عند المرأة وإن كان غير مطلوب
بس كيفن مع الراجل..
وزولك زول نميري ده.. عليك الله فشروا ذاتو مشاتر.. هسع نميري ده أكان أنا لاقيتو في
الشارع بعاين ليهو.. بعد العملو في السودان.. يعني ما لقى كمان إلا نميري
وحتى في الفشر زولك طلع (OFF POINT ).. لكن في النهاية إنو بقول الظاهرة بتاعة الفشر
دي ظاهرة سايكوباتية .. حمانا الله وإياكم...
معليش عايز أمشي أجيب العيش.. أم العيال قالت لي يا راجل ما عندنا عيش للغذاء والأولاد
مافيشين.. وخلي البتعمل فيه ده وقوم جيب لينا العيش.. بس والله ما نهرتها.. وأها ماشي
أجيب العيش.. والكسرة كمان..
تحياتي
| |
|
|
|
|
|
|
|
|
|
Re: نصحية أم لأبنتها الجزء الثاني ( إحذري الفشار والنهار والشكاك والناشف زي المسواك ) !!! (Re: عواطف ادريس اسماعيل)
|
عطوفة... أها رجعت
الخبز لقيتو لكن مالقيت الكسرة..
قلت أتصل بصاحبك زول نميري ده.. أكان يناغم لبثينة أكان ترسل
لينا طرقة طرقتين بأي كورير حتى لو بالDHL يعني فيها شنو؟؟؟
ما تعملي فينا معروف تكلمي لينا.. عليك الله هو بثينة لو كان بتعمل
ملاح ورق وسبروق أكان راجلها ضيع السودان.. ديل كان بيأكلو كشري
آل ملاح ورق آل.. بس أكيد مش A4
أها يا عطفطف.. نحن قصة النهرة دي ما عندنا.. ولمن نضطر ونعملها
للأولاد يومنا كلو يتكدر..
بس برضو بيني وبينك في نسوان دايرات النهرة.. والحمد لله هن
حوالينا ولا علينا.. يا ربي ليك الحمد.. لا نهرنا ولا أنتهرنا..
لأنو الزواج مودة ورحمة.. ودي عكس النهرة.. والزعرنة.. وعلى مين؟
على أم العيال.. مش ممكن أبدا!!!
أها عملت لي شنو في موضوع الكسرة.. طيب لو ما في أكيد زول نميري\
بيعرف منقستو هيلا ميريام.. مش كان ياوران.. خليه يتصل بيه ويشوف
لي طرقة أنجيرا..وبالمرة.. شوية زغني.. الله لا تكسب الفشر
تحياتي
| |
|
|
|
|
|
|
|
|
 Re: نصحية أم لأبنتها الجزء الثاني ( إحذري الفشار والنهار والشكاك والناشف زي المسواك ) !!! (Re: Kamal Karrar)
|
كيمو صباح الخير !!!
يعني هسة أم العيال تقوم وتقع وتعمل ملاح ورق أيه فايف وما تجيب ليها الكسرة أمانة ما بتستحق
النهرة وبعدين يا سيد أبوك ما كل الناس متذكرين إنو الزواج مودة ورحمة قايلنو صرخة ونهرة وبتصدق
الزول الفشار دة يقول ليك بثينة عاد منتظرة متين أطلب منها وهاك يا طبيخ وأكلات ما حصلت أأي ما
جعفر كان بعزني شديد وبثينة عاد تحلف بحياتي ,, غايتو حأكلمو يرسل ليك الكسرة وعاد كسرة بثينة
ما عينة زي تياب الشيفون بتاعتهاالرهيبة ديك ,,, شكرا كيمو ياحنين يالمافشار ولا نهار إنتظر
الكسرة على الدي اتش أل ,,
| |
|
|
|
|
|
|
|
|
 Re: نصحية أم لأبنتها الجزء الثاني ( إحذري الفشار والنهار والشكاك والناشف زي المسواك ) !!! (Re: عيدروس حجر)
|
إبني البرلم عيدروس !!!
محبتي ,,,
الفاشار هو الراجل البتبوبر على الفاضي يعني حداث وما سواي ,,, أوعك تقوم تطفش أصلي بطفش
الرجالة ,,, شكرا ما عاش من يزعل منك ,,,
| |
|
|
|
|
|
|
| |
عواطف ادريس اسماعيل
abubakr
Kamal Karrar
mamkouna
علاء الدين حيموره
سجيمان
salma subhi
محمد المختار الزيادى
شهاب الفاتح عثمان
فيصل نوبي
AbuAla
أبوذر بابكر
مجدي عبدالرحيم فضل
الطيب شيقوق
فيس بوك
تويتر
انستقرام
يوتيوب
بنتيريست