ما الذي جرى لحسين خوجلي؟
التفكير الاستراتيجي و التفكير الآني - بين العصيان المدني و المقاطعة الجزئية آراء و مقارنات
الحزب الشيوعي بالمملكة المتحدة وايرلندا يدعوكم لندوة يوم السبت 3 ديسمبر بلندن
سقف العصيان ، زوال النظام ..هكذا يقول فقه الثورات !
منتديات سودانيزاونلاين    تحديث الصفحة    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مرحبا Guest [دخول]
اخر زيارك لك: 12-02-2016, 08:04 PM الصفحة الرئيسية

مكتبة عواطف ادريس اسماعيل عبدالله(عواطف ادريس اسماعيل عبدالله)
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »

ميتة وخراب ديار

01-31-2007, 04:51 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
ميتة وخراب ديار

    لم أشاهد في قاموس أمة لا إله إلا الله شعبا تتشابه لديه البقر وتختلط عليه
    الأمور كأمة الأمجاد( إسم أطلقه الجنرال أحمد طه على الجالية السودانية بأبوظبي وأنا أطلقه عل الشعب السوداني كافة) هذا الشعب اللطيف الودود دائماما يحيرني ويضع على رأسي ألف علامة إستفهام حائرة دون إجابة فمن أكمل المرحلة الثاتوية, حاز على شهادة أو لم يحز يعتقد أنه الوحيد الذي أكمل هذه المرحلة ومن أكمل الجامعة يظن أنه جضم العلم وأنه النجم الأوحد ومن حصل على الماجستير أو الدكتوراة, ما حدش يقدر يكلمه لأن اللي زيه ما اتخلئش إتنين دون أن يدرك ( وما أوتيتم من العلم إلا قليلا وأن فوق كل ذي علم عليم طبعا يا جماعة الخير المسألة نسبية وهناك حالات لا يجوزأن ينوبها من الحب جانب لأنها تعرف قدر نفسها.
    خليكم من العلم تعالو لمناسباتنا الأجتماعية هنا تتشابه البقر والغنم والخراف والحمير يعني فتح الخشم ( وما عارفة فاتحنو لي شنو لا يقل بهرجة ومظاهرا وضجة عن يوم الخطوبةوالقيدومة هذه المناسبة البدعة هي نوع من أنواع الترف المعاصر أما الفرح فعينك ما تشوف إلا النور الكروت الماخمج والفنانين أشكال وألوأن , حقيبة , حديث , غنا بنات , حمادة بت قسمة,أصالة نصري ألخ دة كله كوم يا أمة الأمجاد وعزانا الذي لا يختلف شيئا عن فرحنا في شيء سوى أن الفنانين بجوا كمعزيين وليس مغنيين والفنانات بكايات نعيات ولسن مطربات لكن بعد كدة كله حاجة هي هي (الضبايح ,الطباخين, الصيوان والمعزيين هم نفس المعازيم وأكتر لأن الفرح بكروت دعوة والعزاء الدعوة مفتوحة والبوفيه أيضا مفتوح والحشاش يملا شبكته أقصدعموده.
    توفيت خالة من خالاتي العزيزات فقررت السفر لتقديم العزاء وهذا أقل شيء يمكن القيام به. أخواني ... أخواتي... .زميلاتي ( أمم متحدة)... جاراتي رغم أنكن فلسطينيات وأناالوحيدة بينك كالنقطة السوداء في الثوب الأبيض لكن معليش تعالو شوفوا البدع أكل من كل لون وصنف دا حتى التحليات أشكال وألوان من أم علي إلى الترايفل أما النسوان فحدث ولا حرج حنن , دهب , دخاخين , تياب آخر صيحة وكأن المرحومة خرجت في نزهة قصيرة على الشاطئي عيب ياجماعة والله عيب أهل الميت ماذنبهم ؟؟؟ لماذا لا نحترم مشاعرهم ونقدر ظروفهم التعيسة ؟ ليه ميتة وخراب ديار وعدم إحترام مشاعر ؟
    استرقت السمع لأستمع لهذا الحوار:
    * لكن ما تقولي لي يا سلوى حنتك ما رهيبة... ودخانك يقول يا ليل.!!!
    - الحالة دي حنة بكاودخان على السريع ومال لو شفتي حنتي حقت العرس تقولي شنو؟ لكن تعالي هنا ياخاينةغيرتي دهبك وما قلت لي ؟
    * والله غيرته من زمان وماجات أي مناسبة لمن سمعنا خبر المرحومة جريت جري على الدولاب وطلعته قلت دي مناسبة .
    * أصبري يأختي إنت ود المرحومة الكبير صحي طلقت مرته ؟؟
    - والله سمعت الخبر دامن بدري ولمن ما شفتها في البكا إتأكدت من صحته. اسمعي القاعدة هناك ديك مش بت أخت المرحومة الجات من أبوظبي ؟
    _ ياها شوفيها حزنانة وبتبكي كأنه ما مات ليها زول قبال كدي هسي كما ساكت لزوم قطع التذاكر والجية شنو المرحومة الله يغفر ليهاويرحمها.
    * والله باين عليها الروقة والترطيب ياختي ديل ناس مكيفات ساكت ونحنا الشمس هرتنا
    - عليك الله ياختي خليني منهم يقعدوا معانا أسبوع واحد يبقوا زينا وأكتر. نظرت إليهن باستغراب فقامت أحداهن لتشرب كابتشينو بينما انصرفت الأخرى لتشرب نسكافيه بحليب أما أنا فبكيت مرتين مرة على خالتي التي تحول مأتمهاإلى فرح والمرة الثاتية على قيمنا المو
    التي دفنت مع موتانا.

    (عدل بواسطة عواطف ادريس اسماعيل on 01-31-2007, 05:05 PM)

                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

01-31-2007, 05:18 PM

abubakr
<aabubakr
تاريخ التسجيل: 04-22-2002
مجموع المشاركات: 16044

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    عواطف ..
    مرة زمان زمان زميلي العراقي -الله يرحمه - قال لي "السودانيين يتاعيين مبالغات ؟ " ..
    ومرة واحد من اهل البلد وبرضو زمان (قبل القناة السودانية) علق علي شراء واحد زميلنا سوداني لاخر موديل مرسيدس (الزمن داك ما كان في اكس فايف ولاليكزس البيوقفوها السودانيين البيجو زيارات بيزنس في الباركنغز المؤجرنها ببيزات كتيرة بشان يستعملوها لمشاويرهم من الاوتيل الي المطار ) " ليش الواحد يودر بيزاتو في بلد غير بلدو هنا منو البيعرفو ما يشتري اي سيارة ؟ "
    وقالو والعهدة علي الرواة ان مسئولا خليجيا كبيرا عندما اتي اليه جماعة يطلبو منه اعانة للسودان لمواجهة ازمة من الازمات " هادول اغني منا .. بيزاتم وايد وواحد بس منهم مشتري فلل وايد في النخلة "

    وواحدة صديقتي بتمشي السودان وكل نرة تجي بقصص اقعد اسمع بشان اعرف يمكن لو رجعت علي اتنين يوما ما اضيع " في جلسات الفطور ..دي جلسات للنساء ..بيعزمن بعضن ..اليوم في بيت فلانة وبكرة في بيت فرتكانة ..والاكل من كل مطاعم الفاست فود الكترت في الخرتوم وفي واحد شاطر عمل بيزنس انو بيوصل الطلبات مجمعة من كل المطاعم .. القعدة فيها لبس لاخر الموضات واحيانا الازواج بيكونو موصليين زوجاتن وبيجتمعو برة الباب في سيارات اشكال والوان "
    ياعواطف .. الظواهر دي من فراغ في فراغات المخيخ خصوصي في ناس الشوبز السودانيين ....ومهما كانت فهي اكيد لا تمثل الغالب الاعظم المكافح في الداخل والخارج لكن ظواهر مستفزة وتافهة ...
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

01-31-2007, 05:34 PM

خالد المحرب
<aخالد المحرب
تاريخ التسجيل: 01-14-2007
مجموع المشاركات: 5712

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: abubakr)

    الاخت عواطف تحياتى
    فى كثير من الاحيان بتكون
    ماليها بواقع الشخص اى صلة
    وبتكون لحظة فشخره نتيجتها سلبيه جدا
    تحياتى لك وشكرا ياام مجاهد
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

01-31-2007, 10:31 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: خالد المحرب)

    أخي العزيز خالد
    مودتي
    عارف ياخالد الفشخرة دي قاعد تودينا في داهية يعني أهل الميت ذنبهم شنو
    عشات يستلفو من البنك ويقيم سرادق عزاء و يأكلوا البلد كلها ما لذ وطابوهم في غاية الحزن ؟ شكرا على عبورك الجميل
    .
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

01-31-2007, 10:27 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: abubakr)

    أخي العزيز أبوبكر
    سلامتك وما تشوف شر عرفت إنك محموم إنشاءالله عدوينك طبعاالظواهر العجيبةكثيرةيا أبوبكر
    والغريب نحنا السودانيين فقط لم نزل نتمسك بالكثير من العادات البالية.. شكراأبوبكر على مرورك الطيب
    .
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

01-31-2007, 06:15 PM

Adil Osman
<aAdil Osman
تاريخ التسجيل: 07-27-2002
مجموع المشاركات: 10193

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    Quote: توفيت خالة من خالاتي العزيزات فقررت السفر لتقديم العزاء وهذا أقل شيء يمكن القيام به

    البركة فيكم يا عواطف..
    السودان مش بقى دولة نفطية؟ والمواطنين بقوا اغنياء ومبحبحين؟ والنساء مرتاحات وقاعدات فى الفلل والبيوت الكبيرة؟ لا شغل ولا مشغلة؟
    مش داماس عنده فروع هناك؟ والمولات ملت البلد من مارينا مول الى عفراء مول الى الزومة شوبينق سنتر؟ والاسواق الحرة فى الشعبية؟
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

01-31-2007, 10:39 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: Adil Osman)

    العزيز عادل

    تحياتي
    والله صدقت المولات والكوفي شوب والنت في كل ركن أما داماس فدا حديث الساعة
    العايزة تعرس تقول شبكتها لازم من داماس والعايزة تولد تحلف ستين يمين لو ما جابوليها دهب من داماس ما تولد ابدا وتعال شوف أعياد الميلاد الماخمج في قاعة الصداقة ولمن تعزم ليك صاحبة في نسوان عندهم اصطاف كامل مع العدة الفاخرة يعملو ليك الكاترنج بدع عجيبة
    ياعادل الله يعين بس المفروض نحنا نحارب العادات دي ولا شنو رأيك .. شكرا على مرورك الجميل وآحر الأحزان للجميع يا رب .

    (عدل بواسطة عواطف ادريس اسماعيل on 01-31-2007, 10:40 PM)

                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 07:45 AM

Yasir Elsharif
<aYasir Elsharif
تاريخ التسجيل: 12-09-2002
مجموع المشاركات: 21061

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    البركة فيكم يا عواطف..

    تصوير جميل لواقع محزن.. بمناسبة أصالة تذكرت قصة العرس اللي جات ليهو قبل سنوات وجاءت أخباره لينا هنا في الأسافير، قالوا فيهو ركوب فيل؟؟ شر البلية ما يضحك.. فيل عديل كدا!!!


                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 08:00 AM

حيدر حسن ميرغني
<aحيدر حسن ميرغني
تاريخ التسجيل: 04-19-2005
مجموع المشاركات: 18346

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: Yasir Elsharif)

    العزيزة/ عواطف

    البركة فيكم

    د. فتح العليم عبد الله (عجائب الخرطوم السبع)

    يا السايق الكراون يا أب مدفعا هاون- وينك لينا؟

    لفت نظري قبل ثلاثة أسابيع في منزل ضخم واسع بوسط محافظة الخرطوم حيث ذهبنا

    لتعزية صديق في والده, لفت انتباهي مرور امرأتين في حالة بكاء وعويل وهما تدوران حول المبنى الداخلي

    وبالتفرس في وجهيهما وسحنتيهما أيقنت أنهما ليستامن أقارب المرحوم ولا حتى من معارفه, ولما اشتد بي

    الشمارسألت أحد أقارب المرحوم من الشباب عنهما فقال لي: ديل يا عمو (بكايات) يعني ببكن بالقروش،

    المستطيع يأجرهن طوال أيام المأتم والعاجز يكتفي باليوم الأول فقط. لاحظ العاجز دي.. تحضر النائحة إلى

    منزل العزاء وتطلب الـ CVأي السيرة الذاتية للميت من زوجته أو ابنته الكبرى:

    العمر: 70 عاما.

    لمهنة: ضابط معاش وله وكالة سفر وسياحة.

    المستوى التعليمي: دبلوم الحربية زائدا بعض الكورسات في الترجمة والحاسوب.

    أسماء أكبر الأبناء والبنات: فيصل, أحلام, رابحة, عواطف.

    هل قام بأي عمل بطولي: نعم, محاولة انقلابية فشلت في فترة الرئيس نميري.

    تأخذ النائحة المعلومات وتعقد اجتماعا عاجلا بزميلاتها وبعد التداول يخرجن

    للملأ وهن يرددن:
    الليلة ياب دقنا دايرة وخدودا نايرة وقدرة فايرة وشيكاتا طايرة- كتلنا فيك

    الليلة يا أبو أحلام يا الشالوك للصالح العام وحكموا عليك بالإعدام – مو دايم

    إلا الله

    الليلة يا السايق الكراون يا أب مدفعا هاون- وينك لينا؟

    وهنا يهج البيت ويفور بالعويل والنواح وتميل النائحة يسارا ثم تنحني ضاغطة

    بيدها اليسرى على أنفها ثم تنظر إلى ابنته الكبرى نظرة ذات فحوى: لقيتيني كيف؟ أو: دا الشغل..

    الليلة يا الساكن ديم لطفي أب كلمة تشفي

    البجيك بتجبرو والواقع بتشيلو يا السايق الباجيرو – مو دار عمار

    فقدتك السكرتيرة والطربيزة المستديرة والمرسيدس الخنزيرة – خليتنا لمنو؟!

    لاحظ العربة قبل دقائق كانت كراون!).

    بعد ذلك تذهب النائحات إلى غرفة قصية حيث يؤتى لهن بالثريد والإدام والزواحف

    والبارد والساخن وعند الانتهاء من هذه المأدبة تنقد البنت الكبيرة النائحات

    مبلغ 300 ألف جنيه وتقول لهن همسا

    ضروري حضوركن بكرة المغرب عشان ناس السعودية والبلد جايين.. كويس


    Re: وياما نشوف فى عهد الزعاطة .... عجائب الخرطوم السبع
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 11:07 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: حيدر حسن ميرغني)

    أخي العزيز حيدر

    مودتي

    والله موتني من الضحك ولو كان معاي 300000 كنت مت بالجد عشان أخلي النعايات يشتغلن
    كويس إنت عارف الموت كتر الأيام دي شديد ياربي البكايات ديل اتعاقدن مع نكير ولا شنو الله يكضب الشينة لسة في حاجات كتيرة ما سويناها الليدونا فرصة شوية تصور ديل بكونن بزورن المستشفيات وبالذات العناية المركزة عشان يشيلن أسماء وعناوين المرضى شكراياحيدر مرورك يسعدالخاطر .
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 10:58 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: Yasir Elsharif)

    أخي العزيز د. ياسر

    تحياتي ولا أراكم الله مكروها في عزيز لديكم

    تصدق في أشياء غريبةجدا بتحصل في السودان كلمة بدع ذاتها شوية عليهالكن
    المشكلة إنه المتعلمين بساهمو في هذه البدع ويجارونها يعني الحنة الكانت
    عادية بقت عندها أسماء مثلا حنة المناسبات العادية , حنة الأعراس , حنة أعيادالميلاد , حنة البكاودي الرسمة بتكون خفيفةة لكن ظاهرة عشات الناس يشوفوها فأيه رأيك يادكتور؟
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 08:21 AM

مجاهد عبد الرحمن
<aمجاهد عبد الرحمن
تاريخ التسجيل: 08-30-2006
مجموع المشاركات: 1190

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    الغالية أم مجاهد
    تحياتي وتقديري
    لكن ما تقولي لي ...
    البكا ما عندكم ...
    الكبتشينو ...
    النسكافيه بالحليب ...
    وعساه يكون بالحليب المكثف ...
    ويبدو إنو بدل كباية المويه الحارة عندكم عصائر طبيعية طازجة ...
    ياخي البكا أصبح ذاتو أنواع ...
    1/ بكا سياحي ( وطبعاً دا فيه كل ذكر في بوستكم كنموذج ... وهذا يجب أن يدخل تحت المظلة الضريبية )
    2/بكا شعبي (ود الفيه المويه الحاره من البرميل ( وأحياناً من الزير ( التيبار يعني ) ما الزير سالم... وبكون الشاي زي شاي الزول القارصاه عقرب ... وكان إحترموا الناس بيضبحو ليهم عتود ولا شاةً عجوز . ( وهذا يجب أن يدخل تحت مظلة ديوان الزكاة )
    3/ بكا بدون وجيع ... ( وديل ليهم الله )...
    4/ بكا والميت كلب ... ( ديل زي المراهقة النضالية الحالية لأدعياء الفكر البائد)...
    مودتي
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 09:32 AM

احمد حماد ادريس

تاريخ التسجيل: 11-05-2006
مجموع المشاركات: 292

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: مجاهد عبد الرحمن)


    الاخت / عواطف -ام المجاهد- صبحك الله بالخير ويقية الاسرة

    ادروب صادفه عزاء من ناس الفشخرة وفوجىء بدسامة الطعام وتنويعه فسالهم انتو المرحوم دا مات وين قالوا ليهو مات فى لندن فرد ادروب والله راحات -

    عندما زار الرئيس ليونيد بريجينيف السودان ايام عبود وفى طريقهم الى مدنى مروا على ناس عرس غشوهم فهنوا وفى قرية اخرى على الطريق وجدوا بيت بكا نزلوا وعزوا - اعحب ليونيد بهذا التقليد الاحتماعى الراقى فصاح فى عبود هذه هى الاشتراكية التى نريد بناءها فى روسيا ويقال ان بريجينيف اوعز للحزب الشيوعى بدخول المجلس المركزى الذى قاطعته كل القوى السياسية وخاصة الشيوعيين وقد دخل الحزب الشيوعى المجلس بسبب هذه التوصية لان بريجينيف اعجب باشتراكيتنا وتكافلنا -

    يا ريت يا ام مجاهد قروش الفشخرة دى يلموها ويتصدقوا بيها للمرحوم ويعملوا ليهو او ليها صدقة جارية لان هذا هو الافيد -

    الظواهر المشوهة التى ذكرتيها فى مقالك الممتاز ظهرت ايام ناس هى لله لانها اموال سحت وفساد ومال حرام وان شاء الله تزول بزوالهم وما الصبح عنا ببعيد -لك جليل مودتى يا ام مجاهد
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 11:24 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: احمد حماد ادريس)

    أخي العزيز جدا أحمد
    مودتي

    مداخلتك رائعة فقد صدقت في كل ما قلته والبدع دي كلها جات مع الانقاذ متين
    كان في حد بجيب طباخ في البكا أو اصالة نصري في الفرح ؟ ولا متين كان النسوان بجرن يتحنن لما يسمعن الخبر ؟ والله يا حماد لو شفت تياب الشيفون والحرير ولا الدهب تدي ربك العجب آل تكافل آل دا جهل يا بعد عمري نحنا فين والناس فين شوف المصريين تلقى الواحدة معلقة الفستان الأسود والبالطو الأسود جاهزين للعزا وهاك يا قهوة سادة وقرآن كريم ونحن نلبس زفة ألوان وكانه اليوم زفاف الميت وليس وفاته عجبي !!!!
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 09:56 AM

فاروق حامد محمد
<aفاروق حامد محمد
تاريخ التسجيل: 08-07-2006
مجموع المشاركات: 4648

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: مجاهد عبد الرحمن)



    عواطف أم مجاهد النبيلة

    إن شاءالله البركة فيكم ....

    حرم ماسمعت ببكا خالتك إلا من البوست ده !!!!!

    تصدقي كلام حيدر ده صح !!! فقد أصبح في الخرطوم

    (عدادات) و(عدادين) وهم وهن فرق جمع فرقة زي فرقة

    الأصدقاء وفرقة أولاد البيت وأولاد أم جكو !!! وهذه

    الفرق تؤجر وعندهم مخرج ...!!! والله جد !!! مثلا يرسم

    دور العدادة (النائحة) ست البنات : ست البنات تنزل

    من تاكسي ... أمام بيت البكا وهي معنكشة دهب "مؤجر"

    وهي تتنخج بعد ان تدفع لبتاع التاكسي وهو عضو بالفرقة أيضا

    تضرب السكاليب بعد الدفع مباشرة ثم تتكتح بالتراب ي راسها

    تقع على الآرض ثم تتدردق عدة دردقات وهي تعدد مناقب الفقيد

    وخاصة عرباته ... تتطوع زوجة الفقيد أو ابنته وتقول دي أخت

    المرحوم بت خالته لزم جات من البلد ... ثم تجئ سعدية المرة دي

    بعربية وسواقها ثم تتم أدوار الدردقة ألى أن تصل لخيمة التباخين

    حيث يتطوع تباخ شية الجمر وهو عضو أيضا في الفرقة مع التباخين

    الآخرين باعطائها كمية من الرماد البارد فتترمد من رأسها الى أخمص

    قدميها ويتطوع أحدهم أوإحداهن بتقديم العدادة التي تطلع بت أخت المرحوم

    أو المرحومة ... بقي دور عباس الذي يصل البيت بكرعينه وهو لابس جلابية

    دمورية ومعه ولد صغيّر فيتدردق عباس في "الرماضة" وهو يعدد أفضال المرحوم

    وتبنيه لقضايا الوطن وهموم المواطن وتكفله بمصاريف أولاده في الجامعات

    والمدارس !!!! ويتطوع أحدهم بتقديمه فيقول ده عباس ود عم المرحوم من حلة

    حشرو الجعليين .....وهكذا يقدم أعضاء الفرقة عروضهم وأدوارهم المرسومة

    بعناية حتي اليوم التالت !!!!

    بالله يا عواطف لو اليوم تم جيبوا ليّ فرقة فنانة ! مش أي كلام ...!!!!

    وما تنسوا عليك الله تقدموا الآيس كريم لكل معز !!! يكون مشكل عليك الله !!!!!
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 11:38 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: فاروق حامد محمد)

    أخي العزيز أبو ناصر

    تحياتي

    وتبرة من الموت إنشاء الله بعد خرف طبعا أم ناصر حتقول لي خرف أكتر من كدة؟

    والله خالتي إتوفت قبل العيد وأنا ما بحب أعمل ضجة إعلامية عشان الناس مشغولة جدا ثانيا

    ما شاهدته في السودان سوف يجعلني أخلي أي مكروه يلم بي في منتهى السرية لأني وإنت

    عارفني ما بحب الكلام الفاضي وعارف النسوان في ابوظبي أول ما يجي الخبر يجرن جري

    استديو ومحلات السلام والهايبر ماركت وهاك يا كريستال وياصواني ما بعرف ايه حتى يفتحو

    البكا لدرجة إنه عندنا صديقة نكتة قالت الله يلعن الكريستال الكمل ناس السودان شكرا

    أبو ناصر على مرورك الجميل وإذا مصر على فرقة العزا حنجيب ليك هويدا ولد وفرقتها بدل

    حمادة بت والتراب والرماد حنجيبو مستورد أما الأكل فخليه ساكت الفطور من روتانا بيش

    والغداء من الهلتون والعشا من رويال مريديان ولو كتبت في وصيتك من قصر الامارت أو برج

    العرب أنا عارفة أم ناصر ما بتقصر بس وريها القريشات مدكنن وين وبطل الحسادة
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 11:16 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: مجاهد عبد الرحمن)

    أبني الحبيب مجاهد

    ليك وحشة والله البكا ما عندنا لكن كانو مضطرين يجاروا الواقع رغم الغلط اللي فيه وبعدين الكابتشينو والنسكافيه ديل ما كانو جوة القائمة لكن العزايات الجريئات دخلن المطبخ وعينك ما تشوف الأ النور أما العصاير دي خليها ساكت لو ما جبتها بقولو ما عزيت الميت يعني رخصته وخليته ما يسوى قرش .
    وفعلا البكا خشم بيوت يا مجاهد ناس بكاها فايف استار وناس تموت وهم او فطيس ناس مقابرها من السرميك وناس ما يلقوا ليهم حفرة يدفنوهم فيها وناس المعزيين ياكلو في التحلية كريم كرميل وناس يغدو المعزيين كسرة بي موية وياهو دا السودان أنا دا كله ما واجعني يا مجاهد زي القطيعة العينك عينك ياربي دا من شنو؟
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 10:13 AM

Yasir Elsharif
<aYasir Elsharif
تاريخ التسجيل: 12-09-2002
مجموع المشاركات: 21061

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    أود أن أشكر الأخ حيدر حسن على نقل المادة بتاعة النائحات بالأجرة ، وطرافة طريقة الكتابة التي نقلها عن عبد العليم..

    غايتو المعايش جبارة فيك يا سودان العزة التي كانت..

    طبعا ظاهرة المادحات وقارئات القرآن بالإيجار دي دايرة يحكوها.. وتحتاج لصحفية مثلك يا عواطف تنقلها لنا.. في سفرتي إلى السودان بعد غياب طويل [حزمة ونص كما يقول أبو جهينة] لاحظت الظاهرة..
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 10:54 AM

Haitham El Galal

تاريخ التسجيل: 07-18-2005
مجموع المشاركات: 227

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: Yasir Elsharif)

    الاخت الفاضله عواطف
    الدوام لله, اللهم ارحمها و اغفر لها واختم بالصالحات اعمالها و اجعلها من اصحاب اليمين
    و البركه فيكم

    لا اخفى عليك مثل الظواهر دى موجوده لدى قشره من المجتمع ليست شريحه كامله لكن والحمد لله تحارب داخليا.. لا تقلقى و الاخوه و الاخوات المغتربين لانها ستندثر انشا الله

    احترامى
    هيثم
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 11:48 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: Haitham El Galal)

    هيثوم الخاتي اللوم

    تحية خاصة لحرمكم المصون تلك السيدة الجميلة إن اند أوت

    شكرا على مداخلتك الطيبة ونأمل أن تختفي كل الظواهر السلبية من سودانا الحبيب

    لاننابصراحة يا هيثم مش ناقصين .. مودتي .
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 11:44 PM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: Yasir Elsharif)

    والله يا دكتور ياسر كله بقى بالايجار زمان بقولو البكا بحرروه ناسو لكن الايامات دي البكا بتحرره الفرقة وقائدة الاوركسترا لازم تكون عزاية نعاية والفرقة لازم تبكي بكا السنين عشان الدفع ذاتو مختلف في ناس تدفع بالجنيه وفي ناس باليورو بس ماعرفة حكاية المارك كيف اصبر لي لمن امشي واجي ولا أراك الله مكروها في عزيز لديك مع تحياتي للجميلة الهام.
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-01-2007, 01:43 PM

عاطف عمر
<aعاطف عمر
تاريخ التسجيل: 11-26-2004
مجموع المشاركات: 10945

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    تحياتي أختي العزيزة عواطف

    أولاً
    البركة فيكم ورحم الله خالتك وأسكنها فسيح جناته وألهمكم الصبر الجميل .
    ثانياً
    هل أتاك حديث المغتربة ؟؟
    في زمان بعيد وقبل ما تظهر سوداتل وموبيتل وزمن كان أخبار الوفيات تأتي بالتلغراف .
    جاء تلغراف لأحد الأزواج المغتربين ( وقيل في أبوطبي ) أن والد زوجته قد توفى . احتار الرجل كيف ينقل الخبر لزوجته وهو يعرف تعلقها الشديد بأبيها . أرسل تلغراف لإخوتها أن إنتظروا حضور ( -- ) في المطار يوم غد . ذهب اشترى التذكرة وحجز لها وجاءها ليخبرها أنه قد استلم تلغراف من أخيه أن والده هو ( تعبان شوية ) وإنتي شايفة ظروف الشغل كيف ؟ وناس ضرائب المغتربين عاوزين مني ضرائب خمسة سنين لو مشيت ما حا اتفكا منهم . عشان كدا أمشي إنتي بدلي أقيفي مع أخواتي . في ظن الزوج أن إخوانها سوف يستقبلونها في المطار ويخبروها ( بطريقتهم ) .
    أعلنت الزوجة لجاراتها خبر سفرها المفاجئ . وكثرت التعليقات ، مسافرة كدا بي حالتك دي ؟؟ يا بتي أحسن تمشي الكوفير ؟؟ هسي تلقي أخواتو وجيرانكم آخر موضة وآخر قيافة وإنتي حالتك مغتربة .
    ترد هي في تمنع : يا أخواتي لازم أراعي شعور زوجي وهو مسفرني عشان أكون بدلو
    ترتد إليها التعليقات : ياختي راعي مشاعرو بس ما تبهدلي روحك .
    أقنعت النسوة الزوجة وذهبت للكوفير والتسريح الماخمج ، ونقشة الحنة الماخمج ، والعطور الماخمج .
    حضر الزوج من العمل ليأخذ زوجته للمطار ففوجئ بها عروساً في ليلة دخلتها .
    - دا شنو العملتيهو دا
    وكان ردها جاهزاً
    - يعني كت عاوزني أسافر مبشتنة عشان أخواتك يشبعوا فيني تريقة ؟؟؟
    فلم يتمالك نفسه وألقى عليها بقنبلته
    - أها يا بت الناس ما دام قلتي كدا . أنا والله أبوي شديد والحمد لله . أنا مسفرك عشان أبوكي إنتي مات . البركة فيكم وأمشي قابلي أخواتك بحنتك دي .

    ويا سادتي
    عينكم ما تشوف إلا النور والهيستيريا
    ولم يكن ثمة وقت متبق ، فالباقي على موعد الطائرة ساعة فقط .
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-02-2007, 00:01 AM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عاطف عمر)

    أخونا الحبيب عاطف

    مودتي ولا اراك الله مكروها في عزيز لديكم

    والله رغم إنه القصة حقيقة وحصلت في أبو ظبي لكن طريقة سردك الممتعة خلتني أموت من

    الضحك قلت معليشس الموت مع ناس عاطف عرس بس عليك الله يا عاطف كان مت ما تجيبو غير

    موية مسافي ولا جلفا وبعدين الأكل يسمهن خليهم ياكلو في بيوتهم أنا مت في عز شبابي

    وخليت وليداتي زغب الحواصل لا ماء ولا شجر هن الماكلات ليها شنو كمان ما تنسى ياعاطف

    الشاي والقهوة يكونو سادة وتلم كل الحاجات الفي المطبخ لاتخلي نسكافيه ولا عصير خليهم

    يموتو بيغيظهم طبعا حيقولو المرحومة حاسدة جنس حسادة إنت و لايهمك قول ليهم كتبت في

    الوصية انه عاطف هو مسئول العلاقات العامة والتموين في البكا فتك بي عافية يالحبيب ما

    تنسى الوصية النوم موت هسة الساعة تلاتة صباحا وماشة علي سريري والوصية في الذمة.
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-02-2007, 11:13 PM

mamkouna
<amamkouna
تاريخ التسجيل: 12-05-2004
مجموع المشاركات: 2246

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    ربنا يديك طولة العمر يا عطوفة...
    و تشوفي جديد وليداتك.
    البركة فيكم في خالتك العزيزة....
    ربنا يرحمها و يغفر ليها.

    -----------------------------
    قصتك دي ذكٌرتني موقف عجيب حصل لي..
    إتوفت حبوبةً لينا لمن أولادي كانوا صُغار..و إضطريت أسوقهم معاي بيت البكا..
    طبعاً لقوا ليك هناك أولاد خالاتهم..و أولاد خيلانهم و كمية من الأطفال و لعبوا لعب ما عادي
    جوا من هناك مبسوطين..!!
    بعديها بإسبوع كنت عاوزة أرفه عنهم....
    قلت ليهم يللا يا أولاد ..نحن مارقين نتفسح..عايزين تتفسحوا وين؟؟؟

    ردوا كلهم بصوت واحد....(( بيت البكااااااااااااا ))!!!
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-03-2007, 08:44 AM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: mamkouna)

    الحبيبة ممكونة

    مودتي وخالص حبي

    اشكرك على شعورك النبيل وما تشوفي شر إنشاء الله

    الأولاد أطفال ولا يدركون معنى الموت فلهم العذر أما الكبار كيف أصبحوا صغارا وجهلاء ؟؟ هل لم يعد

    للموت حرمة؟ أكيد حبيبتي شفت كيف النسوان بقشروا في بيت البكاء والبتجي لافحة توبها وجارية بقولو

    عليها مبهدلة رغم إنها تصرفت بطريقة عفوية أو بحجم المناسبة ... دمت بعد عمري أحببتك قبل ما أشوف

    فهل صحيح أن .... تعشق قبل العين أحيانا ؟؟؟؟
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-03-2007, 12:39 PM

حليمة محمد عبد الرحمن
<aحليمة محمد عبد الرحمن
تاريخ التسجيل: 11-02-2006
مجموع المشاركات: 4048

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    عواطف البركة فيكم..
    بما انك في حالة حد وحزن خلي نعرج بيك شوية من بيت البكا الماغسك دا، الى المفردات البكائية حسب المهن.. ولنبدأ بالاخوة الميكانيكيين..
    يحكي ان احد الميكانيكيين فقد والده.. فذهب اليه جمع من المناطق الصناعية لشيل الفاتحة.. المهم بعد الفاتحة والمطايبة والشاي والقهوة.. حاولوا تجاذب اطراف الحديث، فساله احدهم..
    - اسمع يا خينا، المعلم دا جر الشفاطة متين؟ يقصد متى توفي والدك..
    فرد ابن المرحوم قائلاَ:
    - والله ياخي انعل ميتين العارف..
    شعر بشوية الم..
    وديناهو المستشفي..
    ركبوا ليه درب، بعد شوية كان بَطَّل..
    وقصة اخرى عكستها جماعة محمد نعيم سعد وتصب في صلب موضوعك..
    ذهب اثنان لاداء واجب العزاء في وفاة والد احد زملائهم..
    وطبعا كالعادة اندمجوا في الونسة عن الكورة ومنو الغلب منو والتسجيلات وفكها.. والشاي مدور وكذلك الكورة ..
    لف عليهم بتاع الشاي والقهوة اكتر من اربعة مرات..وهم ما جايبين خبر لبيت البكا والايادي التي ترتفع وتنزل بالفاتحة..
    المهم فجاة واحد مشاتر قام علق على الشاي اللافي عليهم..
    - اسمعوا يا جماعة الزول دا اظن دي المرة الرابعة يجينا بالشاي.. بالله شوف العوير دا التقول نحن قاعدين في بيت بكا...!!!!!!
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-04-2007, 06:05 AM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: حليمة محمد عبد الرحمن)

    الحبيبة حليمة

    ليك وحشة ... نورتي البوست بمداخلتك الجميلة جمال روحك والله رغم الحزن ضحكت من كل قلبي تصدقي في

    السودان طلعت مفردات عجيبة وغريبة جدا كلها نابعة من صميم البيئة ... أشكرك حبيبتي وما تشوفي

    شر يا بعد عمري ...
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-03-2007, 01:30 PM

خالدة البدوي
<aخالدة البدوي
تاريخ التسجيل: 03-05-2006
مجموع المشاركات: 1816

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    الحبيبة عواطف

    البركة فيك والعمر كله ليك



    العزاء بالمقابر


    ويطفو الدش في يد الجميع




    لي عودة ،،،


    مودتي ،،،
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-04-2007, 06:09 AM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: خالدة البدوي)

    العزيزة د. خلودة

    مودتي

    شكرا على مرورك الجميل ... لا أراك الله مكروها في عزيز لديك ... طبعا العزا في المقابر دي فكرة

    جميلةويا ريت يتم تطبيقها على الجميع .. دمت يا بعد عمري .
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-04-2007, 06:51 AM

Abdlaziz Eisa
<aAbdlaziz Eisa
تاريخ التسجيل: 02-03-2007
مجموع المشاركات: 21629

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    سلام يا أخت عواطف
    أتحفتينا جد بهذا الإضاءات النيرة في عالم أمة الأمجاد..
    في ظاهرة سودانية غريبة بتحصل من أخوانا زوار كوالالمبور..
    إستطعنا بكل سهولة نميز من أي بقعة في بلاد الدنيا أتى منها
    هذا أو ذاك من بني جلدتنا السودانيين..
    فالقادمون من الخليج أول ما عينو تقع على سوداني يتظاهر بأنه مشغول
    بالنظر إلى أي ناحية أخرى حتى يتفادى الزون الخطر الفيهو
    سوداني.. التجار ورجيلات الأعمال لا يقتربوا من مكاتب البزنس السودانية
    هنا.. يفضلوا أن يفيدوا التجار العرب وأي كان غير السوداني (أنا ما تاجر).
    رجالات السياسة والمسؤولين ترى هاماتهم تلامس الثريا إذا قدر الله ولاقى سوداني.
    أي سوداني يقابلك بوجه بشوش وسلام فتأكدي أنه قادم من أوربا أو أمريكا..
    طبعا في موضة كمان:
    حكاية شهر العسل في ماليزيا.. العروس تلاحق بعينيها كل مظهر سوداني إلا أن
    حامي الحمى يحاصرها بكل ما أوتي لإبعادها عن ما هو سوداني..
    والله نحن ينستغرب كثير جدا في الحاصل ده.. مع أنه السودانيين هنا يتمتعوا
    بسمعة طيبة يحسدها عليهم أهل البلد..
    مع تحياتي
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-04-2007, 09:17 AM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: Abdlaziz Eisa)

    أخي العزيز عزو

    مودتي

    صدقت فيما ذهبت إليه فأمة الأمجاد تتصرف حسب الموقف وللضرورة أحكام فمثلا في الإمارات لما تشوف

    سودانية بتسلم على الآخرين بقولو عليها جديدة لنج في البلد ولما ترفع حاجب وتنزل حاجب بقولو

    عليها زوجة مسئول كبير ولما تتجاهلك عمدا بقولو ليها أكثر من عشرين سنة في البلد يعني باقي

    ليها الجواز الإماراتي فقط ولمن تكون لابسة توب ما عليك بيه بقولو عليها قروية ساذجة إلخ هذا

    هو حال أمة الأمجاج ياعبدالعزيز ... شكرا على مداخلتك الطيبة .
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-04-2007, 10:31 AM

Abdlaziz Eisa
<aAbdlaziz Eisa
تاريخ التسجيل: 02-03-2007
مجموع المشاركات: 21629

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    العزيزة عواطف

    شاعر أمة الأمجاد هذا مع الإحترام الجد جد ليهو كان سابق لزمانه.. ما كان يدري أنه في
    سيارة إسمها أمجاد يأتي يوم وتصبح ضمن إهتمامات أمة الشعب السوداني.. أمة الماضي
    العريق.. أقصد الغريق والحاضر الغارق..
    في إحترام متناهي للزمن.. أخدونا من المدارس في أول الصباح لإستقبال الرئيس القائد
    في حجر عسلاية.. الذهاب قبل الفسحة.. النميري وصل الموقع الساعة الثالثة ظهرا..
    بعد البهدلة ديك لم ولن أذهب لإستقبال مسؤول سوداني قط..
    ظننت الأمر في ماليزيا شبيها بحال أمة الأمجاد حيث كان لقاء مهاتير محمد بالطلاب
    الأفارقة قد حدد في الساعة الثانية ظهرا.. تأخرت نصف ساعة فقط أتجول خارج الصالة المكيفة
    وليست في كتاحة عسلاية.. 30 دقيقة لأجد أن الرئيس على المنصة..
    هذا هو الفارق.. إحترام الناس في إحترام الزمن..
    مع تحياتي
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-04-2007, 11:07 AM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: Abdlaziz Eisa)

    عزو الحبيب

    مودتي

    دا والله الرئيس نميري كتر خيرو الجاكم الساعة تلاتة دلوقت الرؤساء في السودان لو قالو الساعة 12 بجو

    بعد صلاة المغرب لزوم القندفة دون أن يتذكروا شعب الله المحتار وليس المختار واقف في الشمس من دغش

    الرحمن هم الملوك ونحن الرعية ... مودتي
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-04-2007, 09:02 AM

امير عوض الجمري
<aامير عوض الجمري
تاريخ التسجيل: 04-25-2006
مجموع المشاركات: 2560

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: عواطف ادريس اسماعيل)

    عواطف البركة فيكم (طبعاً بقولها وانا بضحك)
    لأنكم كتلتوني بالضحك انتي وحيدر ..

    تعرفي مرة زمان معانا واحد في الشغل في الأسوق الحرة
    كان معاي بالليل وقال لي نكتة انا فتفت من الضحك وهو ذاتو
    بالرغم من انو هو القاله لي كان بضحك معاي ضحك هستيري ولغاية
    ما اتفارقنا نحن بنضحك بنفس القوة .. المهم يا زولة تاني يوم الصباح
    جيت الشغل سمعت انو عمو اتوفى .. اها قمنا شلة مشينا البكاء .. وبتذكر
    لما شلنا الفاتحة وكنا كمية يعني ،، قام هو رافع ايديهو وعمل مسحة كده بي نظرو
    عشان يشوف الجاهو منو .. ويا عواطف اول ما عينو جات في عيني انا غلبني امسك نفسي
    ويا الله يا الله ضغطت بي شلاليفي (طبعاً العندي ديل لا يمكن يكونوا شفايف) ضغطت بيهم على
    بعض بشدة عشان ما اضحك .. اكان زولك يديها بسمة وحاتك تاني انا وهو ما سكتنا الا
    وراء الصيوان بتاع البكاء واتبهدلنا بهدلة والناس يعاينوا لينا وانا طبعا ما رجعت الصيوان
    وطوالي مشيت قعدت في الحافلة الجينا بيها .. لكن العرفتو انو الجماعة الجو معاي كلهم استغلوا ضحك صاحبنا وقالوا اصلو وقت ما هاميهو موت عمو النوريهو وقلبوها نقاش في مريخ هلال وأصواتم علت والناس
    كلهم بقوا يتفرجوا فيهم ومنهم الشاركم ومنهم الامتعض وقام مرق وكل ما يجي زول يشيل الفاتحة يسكتوا شوية وتاني يفتحوا الموضوع .. ولمن جو ركبوا قلت ليهم مالكم اتأخرتوا كده قالوا لي الشغلانية بقت غلاط في الكورة قلت ليهم ياخي بالغتوا والله ده محل تتناقشوا فيهو في الكورة قالو لي هو انت وصاحبك عملتوها ضحك عديل تقول لينا نقاش كورة .. المهم جريت نفس وقلت ليهم النكتة السواق من الضحك قرّب يقلبنا وهم ماتوا عديل قلت ليهم ده الضحكنا ذاتو .. وقلت ليهم لكن والله فاتتني مناكفة الكورة والله مرق الهلالاب مني كنت اتفشيت فيهم .. يا جماعة بعدين العصر ما نتلاقى عندهم تاني رايكم شنو .. قالوا لي .. حلاة لقلق .
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

02-04-2007, 09:23 AM

عواطف ادريس اسماعيل
<aعواطف ادريس اسماعيل
تاريخ التسجيل: 08-11-2006
مجموع المشاركات: 8006

للتواصل معنا

FaceBook
تويتر Twitter
YouTube

كيف احذف مداخلة من بوستى
Re: ميتة وخراب ديار (Re: امير عوض الجمري)

    أخي العزيز أمير

    تحياتي ... مرورك أسعدني

    تصدق أنا رغم أني ما عرفت النكتة شنو اللي موتتك من الضحك لكن فتفتفت من الضحك وزي مابقولو شر

    البلية ما يضحك لكن أيه رايك في تقاليع حنة البكا وحنة عيد الميلاد وحنة السماية وحنة الخطوبة

    وحنة الدخلة وحنة الصبحية الخ من الحنن .
                   <=====للزوار: للتعليق على هذا الخبر او المقال اضغط رد |Articles |News |مقالات |بيانات

[رد على الموضوع] صفحة 1 „‰ 1:   <<  1  >>

· دخول · ابحث · ملفك ·

اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات
فيديوهات سودانيزاونلاين Sudanese Online Videos
صور سودانيزاونلاين SudaneseOnline Images
ويكيبيديا سودانيز اون لاين
Sudanese Online Wikipedia
فيس بوك جوجل بلس تويتر انستقرام يوتيوب بنتيريست Google News
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de