|
|
 دقولك يا البشير شن قولك يالبشير ؟؟؟
|
صبحكم الله بالخير يا أمة الأمجاد في مشارق الأرض ومغاربها وأسمحو لي الليلة أكتب الموضوع دة باللهجة العامية من الألف للياء عشان في الحقيقة يعني وزي ما تقولو موضوع بلدي خالص وما ممكن يتكتب الإ بالعامية طبعا في ناس حيقروا العنوان دة ويفتكروني حأتكلم عن الريس لكن معليش إذا خيبت ظنكم أنا الليلة عايزة اتكلم عن الظار عشان أي واحدة عندها ظار في المنبر دة نعرفها وننفذ ليها كل طلباتهاونكلم بكري أبو بكر ما يزعلها أبدا ولا يودي ليها أي موضوع الخور حتى لو اتشاكلت معاه شخصيا .
بعد المقدمة الغير لطيفة دي عايزة أقول ليكم في أربعة حاجات محيرني حيرة شديدة وعايزة أعرف كيف حبوباتنا قدرن يخلقن ليهن منها موضوع . الحاجة الأولى الحلو مر تفتكرو منو الأخترعت هذا المشروب بهذه الطريقة المعقدة والعجيبة؟ الحاجة التانية الدخان برضو منوالاخترعتو؟ كيف وليه ؟؟ الحاجة التالتة الدلكة وهي برضو لا تقل تعقيدا عن الحلو مر والحاجة الرابعة الظار هذه الظاهرة العجيبة الماموجودة إلا في السودان ومصر وبعض دول العالم العاشر ,, أنا غايتو أول مرة أشوف لي ظار وفتح علبة لمن كنت في الإبتدائي مشيت مع جارتنا في أمدرمان بيت ظار لأنو الفضول كان كاتلني عايزة أعرف النسوان ديل بسون شنو وفي الحقيقة لمن مشيت لقيت نسوان ورجال وزي مابقولو فيلم هندي عشان الرجال ذاتهم ما ياهم آخر مياصة ومياعة قعدنا شوية جات شيخة الظار داخلة وسط تهليل وفرحة شديدة يعني لو كان الريس دخل ماكان لقى الفرحة والتهليل ديل بعد شوية ولعوا البخور الجاولي وبخور التيمان والبخور الحلو وقامت شيخة الظار فتحت العلبة وشالت ليها شوية بخور ظار كبتو في المبخر ودقت الدلوكة وقعدت تغني بصوت أشبه بصوت الحمير دقولك ياالبشير شن قولك يا البشير وفجأة جات داخلة ست البيت العاملة الرجبية لابسة بنطلون أسود وقميص أبيض وبرنيطة حمرا وشايلة عصاية قالوا متلبسهاانجليزي المهم الست دي قعدت ترقص بجدية شديدة وتتمم ببعض الكلمات الغريبة لتؤكد أنها بتعرف لغة انجليزية رغم إنها ما بتعرف إذ من واظ لكن عشان الجماعة كلهم ما ناقشين فاكرينها بتعرف انجليزي من سيد الظار البريطاني المتلبسها وكلما تمتمت بالكلمات الغريبة رفعت الشيخة صوتها وصوت دلوكتها لتنتفض الراقصة ثم تقع أرضا بحركة بهلوانية فيقوم صبي شيخة الظار برفعها من الأرض و يسألها عن طلباتها فتقول سيجارة فيسابق الريح ويجيب السيجارة ويشعلها لكنها تبدو غير راضية تقوم واحدة من النسوان الحشريات تقول طلباتكم يا أولاد ماما فترد كاس ويسكي فيركض الصبي ويجيب كاس الويسكي لتشربه جرعة جرعة وتبدأ في الحديث الغير مفهوم إلا لشيخة الظار فترد عليهابحماس: إنشاء الله ما حيعرس فيك وحنبوظو ليه كل الترتيبات وحنخلو الدايرة تعرسو تشرب ما تروى فتنفرج اساريرها فتزغرد النسوان وتشتعل أعواد الكبريت لتشعل السجاير وتتبادل النسوان نخب الانتصار على الغريمة اللئيمة خطافة الرجالة بعد شوية جا صبي المعلمة ومعاه خروف أبيض لكن محنن من راسو لي رجليه شعرو أحمر جدا عشان كدة بقيت أعرف ليه خالتي لما تشوف واحدة عندها شيب وتحنن راسها بتقول دي عاملة شعرها زي خروف الظار و الخروف كمان ملبسنو جرتق اتقول ماشين يزفوه لنعجة المهم قامت ست الظار بخرت الخروف شوية ورشتو بالريحة وساقوه برة عشان يضبحوه المسكين ما كان عارف مصيره طلع مستغرب جدا وفرحان من المشهد الغريب اللي شافو لأول مرة في حياتو بعد دة قامت شيخة الظار تغني اللول اللول يا لولية بسحروك يالولي الحبشية في الوقت دة أي واحدة لابسة جن حبشي قامت علي حيلها وهاك يا نطيط وكلام باللهجة الحبشية لكن أغرب حاجة قامت واحدة من المتلبسن الظار الحبشي تلف على النسوان واحدة واحدة ياتقول ليها أنا زعلان من إنت عشان إنت يقول فينا كلام مش كويس أو تقول لواحدة تانية البوابي ( الزوج) بتاعكم مش كويس هو يعرف حريم كتير وإنت ما جايب خبر ( خراب بيوت ) ,, عموماياجماعة الخير أنا كنت فاكرة الظار دة ظاهرة عند النسوان الجاهلات بس لكين لقيت حتى المتعلمات بفتحن العلب وبدقن الظار وفي أبوظبي هنا حضرت لي كم رجبية لزوم الشمشرة آخر ظار كان في واحدة جات زيارة عشان تشتغل وما اتوفقت قامت شيخة الظار قالت ليها لازم تعملي ليهم رجبية لأنها قالت عندها ظار ويمكن الجماعة يكونو زعلانين منها وما دايرين أبوظبي وكان من حسن حظي مدير التحرير طالب مني موضوع عن الظار ما عارفة اختارني للمهمة دي ليه ياربي عشان أنا سودانية ولا شايف عندي ظار غايتو مشيت وقدرت أصورو ليكم لايف وكان يوم وعينكم ما تشوف الا النور وخلو الطبق مستور وفتكم بعافية ,,
|
|
 
|
|
|
|
|
|
|
 Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
عطووووفة , يسعد صباحك يا رب
والله ظاهرة الظار دي محيرة عديل كده !! لكن للاسف لم احضر يوم واحد هذه الطقوس العجيبة وإن كنت أعتقد إنها نوع من العبادة للشيطان , حسب وصفك للطقوس , يعني شرب الخمر والذبيحة لغير وجه الله
ذكرت في القران بإنها شرك بالله سبحانه وتعالي والعياذ بالله .
اما موضوع الطلبات ده أعتقد انو دي كلها رواسب داخل النفس , يعني شنو شراب سيجارة !! ما ممكن اي
واحدة تشرب سيجارة في بيتها ولا حتي في الحمام الله يكرم السامعين , وكذلك مياعة الرجال والذين هم
في الأصل يحبون هذه الأجواء الغير نظيفة لان المجتمع يرفض ما يعرف بالجنس الثالث ما عدا بعض الدول
العربية والغربية .
عطوووفة كعادتك تاتين بالشماررررات الحارة والمواضيع التي تهمنا كمجتمع سوداني تتفاوت فيهو وجهات
النظر والثقافات المختلفة , اها فوتك بعافية المطر .
| |
|
|
|
|
|
|
|
|
 Re: دقولك يا البشير شن قولك يالبشير ؟؟؟ (Re: هاشم أحمد خلف الله)
|
هشومي !!!
إنت المصحيك بدري كدي شنو؟؟ المهم يا هاشم حصل سمعت ليك بي واحدة إنجليزية عندها ظار يا ربي
حتكون طلباتها شنو لما السودانية تقول عايزة ويسكي أكيد الخواجية يكون لابسها سوداني وتقول عايزة
حلو مر !!! شكر هشومي علي المرور السريع وهذا عهدي بك !!
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
عواطف جمعة ، صباحك خيرا ، وكل جمعة وإنت بخير..
أصبح موضوع الجمعة لديك سنة يلتزم بقراءتها كل المريدين
أو المتابعين لموضوع الجمعة ... طبعا خارج (المنابر ) وقبل أن
أقرأه أقول إن شاء الله مايكون فيه هجوم والله نقد لظاهرة .. ولو أننا
تعودنا كتاباتك الهادئة دائما حتى من خلال النقد ... موضوع الظار هذا
أذكر أنى تعجبت عندما أكد ظواهره أطباء نفسيين منهم دكتور حسبو عليه
رحمة الله ودكتور بحشر وغيرهم من الأطباء النفسيين بل أذكر أن دكتور حسبو
كانت له حلقات عديدة فى برنامج التلفزيون عندما كانت برامج التلفزيون
برامج !!!! ... لكن السؤال الذى أطرحه عليك وعلى المتداخلين :
هو لماذا لانجد هذه الظاهرة عند الرجال ؟؟ بصرف النظر عن الرجال المشبوهين
القلة الذين يرتادونه فهؤلاء خارج المنظومة .. أم أنها ظاهرة تتلبس الأنثى
دون الذكر .. ولى عودة ... شكرا .. شكرا جزيلا عواطف ...
محمد مختار جعفر
| |
|
|
|
|
|
|
|
|
 Re: دقولك يا البشير شن قولك يالبشير ؟؟؟ (Re: محمد مختار جعفر)
|
أخي العزيز حمادة !!!
جمعة مياركة ,,,
الظار يا حمودي ظاهرة نسائية بحتة ولا أدري لماذا لا تصيب إلا النساء أتمنى من د. ناهد الدكتورة
النفسية بالمنبر أن تحلل لنا أشباب هذه الظاهرة ولماذا تصيب النساء دون غيرهم ولماذا لا تصيب
الأجنبيات ,, شكرا محمد على دخولك الأنيق ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
الأخت عواطف ، تحياتى ...
Quote: حصل سمعت ليك بي واحدة إنجليزية عندها ظار يا ربي
حتكون طلباتها شنو لما السودانية تقول عايزة ويسكي أكيد الخواجية يكون لابسها سوداني وتقول عايزة |
+
تكون طلبت (( مريسه )) يا عواطف !!!!! ليه يعنى منتجاتناالمزاجيه أقل من الويسكى ول شنو ؟؟
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: بشير حسـن بشـير)
|
سلام يا أولاد ماما ..
والله يا أستاذة دخلت دون أن أقرأ العنوان جيداً,,
شفت في دق والبشير ,, قلت منو القلبه حار مسك
الزول ده أداهو علقة !!!؟
زمااااااان واحد صاحبنا مغترب عرس واحدة اختاروها ليهو
أخواته ورسلوها ليه "طرد" المسكينة عندها ظار وهو ما عارف !
بعد كم شهر ظهرت عليها أعراض الحمل .. فرح صاحبنا لكنه لم
يتهنا كتير .. المرة بقت تطلب حاجات غريبة جدا والراجل مدوّر
من سوق لسوق حتى كلّ جيبه .. ! بس في طلب واحد غلبه شديد ..
قالت ليه عايزة مريسة وعنقريب مقدود .. وكان هذا سببا كافيا
لإرجاعها لأهلها نهاااااااااااااااااااااااااااائي !!!!!
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
{إنشاء الله ما حيعرس فيك وحنبوظو ليه كل الترتيبات وحنخلو الدايرة تعرسو تشرب ما تروى}
طيب .. الظار عرفناهو .. لاكن البيغنو عن راجل المرة الحلو حلا .. ديل في ياتو صنف
داخلين ...
العجيب ..أنو حتى في بلاد كانت تعتنق الإلحاد مذهبا .. وتكفر بكل ما هو خارج نطاق
التجربة والقياس المادي ..زي روسيا ..انتشرت ظاهرة ما يمسى بالمعالجين الروحيين
أو الروحانيين ( ما عارف كيف ) ..وحتى السحر بكل ألوانه .. الأبيض والأسود .. وظهرت
كثير من العيادات والمشعوذين والمشعوذات المتخصصين في تقديم خدماتهم " الظارية " لمن يدفع ..والطقوس طبعا مشابهة لما تفضلت بذكره في مقالك الشيق .. يعني بخور وسبح وحجارة وجلود حيوانات وشموع .. وغيرو وغيرو ..شاهدت بنفسي أكثر من برنامج تلفزيوني عن مثل هذه الأمور ...
أما بالنسبة للبلدان " المتحضرة " .. فعندك شبيه ذلك ما يحدث في ساحات الرقص
والديسكوهات ..من جنون .. يخلي الجن الحبشي ..زاتو يصنقر ويتمحن..
شفتوا كيف ..
شكرا على متعة السرد..
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: ibrahim fadlalla)
|
Quote: حصل سمعت ليك بي واحدة إنجليزية عندها ظار يا ربي
حتكون طلباتها شنو لما السودانية تقول عايزة ويسكي أكيد الخواجية يكون لابسها سوداني وتقول عايزة
حلو مر !!! |
لوووووول خيط عسل يا عطوفه وما تنسي باقي الخيوط بشير الهندوي توبو توب حرير الهدندوي وهناك خيط لسف السعوط واغرب الخيوط هو النربي ناس تشتهي الموت ، والدردقه بالواطه وتقول الا تمش الكوشه تاكل ليها فطيسه الا يحنسوها ويقولوا ليها البواب اسه سيذبح خروفا محجل وتقوم من مرمطتها وتمرغها بالارض .
تكمن الاجابه في عدم اصابه الخواجيه بالزار عن وجود ظاهره الزار عندنا والتي تمثل كسرا مؤقتا لسياج التابوهات في حياه المراه السودانيه وافتكر كلما انفرج احكام هذاالسياج النفسي كلما قلت ممارسه المراه لهذه الظاهره .وكلما كانت المراه مفموعه نفسيا كلما كان التقمص لهذه الشخصيات والادوار حقيقيا حيث تدخل المراه في حالهtrance عديل كدا متل حاله الدراويش تماما وتقوم بافعال هستريه وتغيب عن وعيها تماما حتي يمتلك العقل الباطن زمامها فتشرب الويسكي او تسف الصعوط او تدخن السيكاره او تقوم بشق جلابيتها العاديه مطالبه بتوب حرير او فستان قطيفه احمر وما ان تصحو من حالتها اللوليه تعود الي طبيعتها وبها بعض مظاهر الانهاك الجسدي .
وبالطبع هناك نساء اخريات يمارسنه كترف اجتماعي ليس الا وقعده نسوانيه كما تفضلتي بها بعض الرجال النا يصين .
| |
|
|
|
|
|
|
|
|
 Re: دقولك يا البشير شن قولك يالبشير ؟؟؟ (Re: doma)
|
لوووووووول يا دومة الناس أهالي وإنت الحكومة !!!
شكرا جزيلا على هذه المداخلة الرائعة يا رايعة وفعلا معلومات مفيدة جدا عن هذه الحالة العجيبة التي
تعبر عن الكبت الذي تعاني منه بعض النساء السودانيات ولا يجدن مخرج سوى تقمص شخصيات أخرى ,, تسلمي
يا حبيبة القسا ,,,
| |
|
|
|
|
|
|
|
|
 Re: دقولك يا البشير شن قولك يالبشير ؟؟؟ (Re: مرتضى الصادق)
|
ست عواطف الحبيبة
الظار من الطقوس المميزة للمرأة السودانية التى أنتشرت في الحقبة الماضية
في فترة الاحتفال بيوم المرأة العالمي عملت مع أماني الجندرية على إعداد فقرة عن طقوس في حياة المرأة السودانية وكان للظار نصيب الأسد فيها
ومن إرشيف سودانيز أون لاين استخرجت معلومات مهمة عن هذا الطقس
ممكن ترجعي للأرشيف حتلقي معلومات مفيدة
مودتي
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
حياك الله يا أستاذتنا..
زي ما قال خالد العبيد أنا قايل البشير دا سيد الاسم
موضوع الظار دا عندو علاقة كبيرة بتعلق الذهنية السودانية بالخرافة و حب الغيبيات الحاضرة المتعلقة بالشيوخ و الأولياء حلالين العقد و الشبك... و معاهو في نفس (القفه) ظاهرة الفكي و زيارة القبب و القبور و الأضرحة و النديهة و غيرها من العقائد الخاطئة التي ربما تصل لدرجة الشرك بالله...
فحتى لو ثبت أن المرأة المعينة مصابة بمس جني شيطاني فليست هذه هي طريقة الشفاء من هذا المس..
الرقية الشرعية الثابتة عن الحبيب المصطفى صلى الله عليه و سلم هي الشفاء المقرر و الناجع..
و معلوم في عالم السحر مسألة (النشرة) و هي فك السحر بالسحر و لكن النبي صلى الله عليه و سلم نهى عن ذلك.. فعليه يمكن القول أن الزار ربما يحل مشكلة السحر لكن بطريقة غير شريعة و ربما أدت هذه الطقوس بالكيفية المعروفة إلى حدوث مس جديد للمعالجة أو الحضور..
بصورة عامة هذه الظاهرة في انحسار و الحمد لله
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: الواثق الصادق)
|
أخي الحبيب الواثق !!!
تحية لك وللأمور الفي الصورة ربنا يخليه ,,
صدقت في كل ما قلت ولكن مازالت بعض النساء تمارس هذه العادة كنوع من الترف وذلك بتحضير كل مايلزم
وما لا يلزم لزوم الشو والاستعراض وهذا أيضا جهل فاضح عموما أشكرك مرورك الزاهي ,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
(صبحكم الله بالخير يا أمة الأمجاد في مشارق الأرض ومغاربها وأسمحو لي الليلة أكتب الموضوع دة باللهجة العامية من الألف للياء عشان في الحقيقة يعني وزي ما تقولو موضوع بلدي خالص وما ممكن يتكتب الإ بالعامية طبعا في ناس حيقروا العنوان دة ويفتكروني حأتكلم عن الريس لكن معليش إذا خيبت ظنكم أنا الليلة عايزة اتكلم عن الظار )
الله يسعد صباحك زي ما ضحكتيني هذا الصباح
وانا بقول ياربي ان لي 17 سنة مدستر مالي
والحمدلله اكتشفت خيتي الرايح اليوم
شكرا ليك عواطف
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
سلام وتحية
لا حولااااااا ما كان تسوقينى معاك قلتى لى المعلمة فاكها فى الجماعة انها بتعرف انجليزى وكده دى والله زكرتنى بفكتى اللى اسى ما فى زول نقشا انى بعرف اسبانى وكده
والله يعلم ما بعرف فيو الا (هل تتحدث الاسبانية)اى كانت الاجابة الواحد بعرج للغة تانية
ما اعرفة ان اصول الظار ترجع الى ارض الحبشة يعنى جمبنا ما بعيد
انا قلت ليييك قبل كده انت ما بتكتبى فى الجرايد السودانية ليه؟؟؟
فهى فعلا تعوز مثل هذه الكتابات التى تناقش المواضيع والمشاكل الاجتماعية السالبة
وهى كثيرة جدا جدا حتى لا تكون هذه المشكلات عاهة مستديمة؟؟؟؟؟؟؟؟
اسلوبك فى الكتابة سردى قصصى مشوق وفى نفس الوقت مستفز
طبعا مستفز ل(لناس البوبار والبحبو الشمار والبحلفو بالطلاق وكل البوستات الجميلة
الاستمتعنا بيها)
| Quote: دقولك يا البشير شن قولك يالبشير |
كســـــــــرة
لما قريت عنوان البوست قلت عواطف دى خلاص بقت مناضلة كيبورد ولا شنو
يعنى العنوان فيو نكهه (هشاميه ) الحكاية طلعت ظار وشاهد عيان
تحياتى ودام الود
مخو
| |
|
|
|
|
|
|
|
|
 Re: دقولك يا البشير شن قولك يالبشير ؟؟؟ (Re: محمد المختار الزيادى)
|
حمادة يا الشاي السادة !!!
شكرن جزيلن على كلماتك الحلوة الزولة لقت ليك النسوان طرش وبقت ترطن رطانة السواد والرماد قدري
ما حاولت ألقط لي كلمة من هنا ولا هناك غلبني تب عشان الكلمات بون حروف ,, الجرايد السودانية
موفرنها للرجعة النهائية لو خيتنا حق السودان جا ,, طبعا ما بقيت مناضلة كيبورد عشان أنا ما بحب
الحلول الوسط يا أحمل سلاح دمار شامل يا غصن زيتون فأيه رايك ؟؟ ودي ,,
شاهد عيان ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
| Quote: الجرايد السودانية موفرنها للرجعة النهائية لو خيتنا حق السودان جا |
الوضع حرج حرج يحتاج لكل المعالجات والكتابات وماهى الا ثوانى ويصل الموضوع الى المطبعه
كده راجعى نفسك شويه
اراهن بك كما راهنت على الكثيرين من قبل فى مجالات ابداع اخرى
على اليمين بكره كل النسوان المتعلمات ديل يتونسن بيك عواطف قالت وعواطف فعلت
تحياتى ودام الود
مخو
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: محمد المختار الزيادى)
|
أخي الحبيب حمودي !!!
محبتي ,,,
تصدق من يوم ما جينا بنفكر في الرجعة لكن الأوضاع هناك ما بتسر حبيب ولا حتى عدو مستوى الخدمات
في الأرض يعني حتى الناس العايزين يستثمروا هناك لم يجوا راجعين بقولو لينا الناس دي عايشة هناك
كيف وليكم حق ما ترجعوا وكمان عندكم بترول ؟؟
أشكرك على مراهنتك وهي دليل على معدنك الزي الدهب وعيار 24 كمان ,, أما النسوان المتعلمات جاياهم
عشان يكملن الخياطة بالحرير ,, شكرا حمادة مرورك يسعدني ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عبد الدائم سيد أحمد)
|
تعرفي يا عواطف الحكاية الحكيتيها دي أنا شفتها بضبانتها في زار خالتي ، و خالتي دي كانت زولة كدة بتاعت وهمات زي دي لكن الله هداها ، المهم ما أذكره أن خالتي أقامت زاراً عظيماً توافدت عليه الحريم من كل صوب و حدب و حتى نحن أطفال ذلك الزمان ألبسونا أبهى ما لدينا في ذلك اليوم و كأنه يوم عيد لكن أمي حذرتنا من أن نأكل شيئاً في بيت الزار و أخذت لنا سندوتشات من البيت ، كان الزار في بيت جدي الذي كان مسافراً فأنتهزن الفرصة ، و إن كنت أنسى فأنا لا أنسى خالتي و هي تلبس الزي العسكري و تحمل رشاش لعب لعب أغتصبته عنوة من أخي الذي أحضره له عمي من الحج و أذكر أنها كانت تتكلم كلاماً مبهماً و تصدر أوامر حالاً ما تنفذ لها و كانوا يغنون ( سلطان الحبش يا منيليك .. وقفولو الحرس ) و كانت خالتي تؤدي التحية العسكرية بطريقة لا زلنا نقلدها حتى اليوم.. ، رأيت كذلك واحدة من حريم حلتنا و قد أعتقدت أنها تحولت إلى نمر أو لبوة لست أدري لكنها كانت تزمجر و تنط و تشوح بأصابعها ثم تقوس ظهرها و تطاردنا في حوش البيت بغية إفتراسنا لكنها كانت كضااابة ساكت و الدليل أنها لم تفترسنا و نحن لا زلنا أحياء ،، أما الويسكي فقد كان بعضهن يشربنه كما يشربن الشاي و قد قام إبن خالتي ببيع الزجاجات الفارغة للراجل البيقول ( المعاه قزاز ) و أكلنا بعائدها حلاوة لكوم ،، و في ذلك الزار شاهدت إحدى الحريم و قد قامت بخلع غويشاتها من يدها و شتتها بعيداً و كانت تقول كما أذكر ( نهاس دا أنا ما داير ) ( لا تريد هذا النحاس ) و أذكر أن إبنتها التي كانت حاضرة قامت بزعل و لقطت الغويشات سرعة سرعة من بين الحريم و كانت تقول ( بلا زار بلا كلام فارغ ) ..
ياااه كان قعدت أتكلم زيادة شكلي حأقوم أنزل ليك في البوست دي ..
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عصام دهب)
|
عصومي !!!
سعيدة بي جيتك بي جاي ربنا يسعدك الظار دة شكلو حيجيب لي ناس كتار متلبسين حبشي وانجليزي ,, لكن
ما تقول لي زار خالتك ما عينة بس ما عرفت أمك حمتكم تاكلو من بيت الزار ليه وكمان في حاجة تانية
عايزة أقولها كنتو عفاريت بشكل !! بتصدق يا عصام لغاية هسة ما عارفة علاقة الويسكس بالظار شنو ؟؟
والله دي حركات ساكت نسوان عايزات يسكرن و ما لاقيات طريقة ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
بمناسبة ناس النظام العام احكى ليك قصة بطلتها والدتى
فى يوم جمعة والدتى لابسة وماشة صلاة الجمعة قابلتها جارتنا
فى الحلة وقالت ليها :
** يا عرفة ماشة وين ، ارح معاى بيت الظار ده .
** ردت عليها آمى بحرقة ، استغفر الله انا ماشة صلاة الجمعة ، وانا ما بتاعت ظيران
** ردت عليها الولية : ياخى امشى الــعــن ديييييييينــك ؟
امى قعدت تبكى ومشت الصلاة ، وخطبة الجمعة شغالة والديسكو بيجاى شغال
وقامو نسوان الجامع سمعوا بالديسكو اثناء الصلاة ، مشوا كلموا بتاعين اللجان
وجابو ليك ( كومرين ) من نقطة البوليس ووقعوا فى النسوان ديل دق ولبع
تعالى شوفى الفساتين المستور فيهم كم اه كم لا ، والطويل يا دوب فى خط 6
هسه الجارة ماشاء الله عليها بقت اول وحدة فى الصف .
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
الأخت العزيزة عواطف
لك الود والتحية.. مشتاقين
بالمناسبة يا عواطف اللآبسا ده جن إنجليزي ( سَـكّة) كما يقول أهلنا المصريين ، لأن الإنجليز الأصليين أصحاب مزاج خاصة لما تجي في موضوع (الإسكوتش) يقولوا على الواحد( ويسكي مان) وطبعاً صاحبنا دا ( ويسكي جان)!!.. المشكلة شيخة الظار ما وضحت لينا ماركة الويسكي شنو هل هو ( بلاك ليبل) أو ( رد ليبل) أو ( وايت هورس) أو (بلاك أند وايت) أو الشهير جوني المشّاي (جوني ووكر)!!.. المهم أنا حضرت جلسات ظار أيام الشباب من باب التسلية وشفت زي ما قلتي صبيان شيخة الظار والله كان منهم واحد عامل ليهو حجل في رجلو من سدادات الليموناته وكان يلف في الحلقة ويدق رجلو في الأرض فتحدث صوتاً يطير الفي الراس!! والكان غايظني منو فتحة الجلابية البجنبات!! والمياصة والمياعة وكان برضو بشارك في الزغاريد.. وديل كانوا بيشربوا الويسكي كلو لأنهم في العادة بتاعين (عرقي) وده عيد بالنسبة ليهم يشربوا فيهو الما شافوهو قبل كده .. رزق الهبل على المجانين!! .. زمان ما كان في بيبسي البيبسي ده " طلع جديد" وطلع جديد كان تعبير يستعمل للشيء غير المألوف وفي الوقت داك كان في( ليموناته وسينالكو وكيتي كولا) طبعاً دي معلومة بيعرفها المخضرمين فقط!! والله ضحكتينا رغم الهم والغم .. شكراً
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: ابوبكر يوسف إبراهيم)
|
الأخت العزيزة الأستاذة عواطف
تحيتي الخالصة
| Quote: بعد دة قامت شيخة الظار تغني اللول اللول يا لولية بسحروك يالولي الحبشية في الوقت دة أي واحدة لابسة جن حبشي قامت علي حيلها وهاك يا نطيط وكلام باللهجة الحبشية لكن أغرب حاجة قامت واحدة من المتلبسن الظار الحبشي تلف على النسوان واحدة واحدة ياتقول ليها أنا زعلان من إنت عشان إنت يقول فينا كلام مش كويس |
يؤرقني سؤال في هذه المسألة
فمن المعروف أن الظار إفراز نفسي و إنعكاس لكبت معين و لأسباب قد تكون قهرية
و الظار أيضاً تنفيس عن مكنونات لأشخاص في معظمهم لم يكن قادراً في فترة حرجة أن يبوح بما يضمر أو ينال ما يطلب
هذا هو التفسير النفسي للظار
فلماذا بالتحديد أغلب الظار ينتمي لهذه ( اللولي الحبشية ؟؟؟؟ ) ...
في مصر الظار مستوطن بطريقة مصرية
و كذا في المغرب
و في دول أخرى .. مستوطنة ( بهوية أهل البلد )
فلماذا تتقمص الحبشية هوية شخصيات الظار عندنا؟
سؤال يبحث عن إجابة
دمت
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: ابو جهينة)
|
أخي العزيز جدا أبو جهينة !!!
مرورك دوما يسعدني لما فيه من شرح وتحليل علمي لظواهر إجتماعية متفشية في المجتمع السوداني على
وجه الخصوص ,, فعلا الظار حالة نفسية مزمنة تظهر تداعياته لدى بعض النساء اللواتي يستخدمنه كوسيلة
لتحقيق رغباتهن غير المنطقية مثل شرب الخمر و السجاير أما لولي الحبشية دي عايز بحث وتنقيب ,,
مودتي ,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: ابوبكر يوسف إبراهيم)
|
د.أبوبكر !!!
مودتي ,,,
وأنا أيضايا أخي مشتاقة وبي لوعة لكن مثلي لايذاع له سر ,,
أبوبكر ضحكتني جدا بحكاية صبي المعلم والجلابية المفتحة بي الجنبات دي طبعا حيكون مكحل عيونو وراسم
حواجبو ,,, شكرا على مرورك الجميل ,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
(قامت شيخة الظار قالت ليها لازم تعملي ليهم رجبية لأنها قالت عندها ظار ويمكن الجماعة يكونو زعلانين منها وما دايرين أبوظبي )
ما كلمتينى من بدرى كنت فى الدوحة السن قبل الماضية لنفس الغرض لكن ناس قطر كل مرة بقولو (يصير خير)
لو كنت عارفة كان سويت لى (رجبية )
الحبيبة عواطف اول مرة اشوف زار شفتو فى فيلم الراحل على عبد القيوم(زار ) وكنت فى معهد الموسيقى كبيرة يعنى
وعلى ذكر المعهد ، فى عرض صغير فى خشبة المسرح وكنا فى سنه اولى عملنا (مشهد زار ) فى موظغة طارت ووقعت لمن جابوا البخور قامت زى الما حصلت حاجة ، اها دا نسميهو شنو ؟
ولقيت الزار فى مصر والعراق واثيوبيا واليونان ، بدرجات متفاوته لكن نفس الايقاعات ، نفس الحركات
وفى دول افريقية عديدة (تنزانيا ، كينيا ،زيمبابوى ، جنوب افريقيا ) على الاقل ديل قريت انه عندهم،
القاسم المشترك هو الايقاع والرقص المتزامن مع الايقاع وبنفس الطريقة ؟؟؟؟
طلباتكم يا اولاد ماما
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: سلمى الشيخ سلامة)
|
سلوم !!!
كيفك ياحبيبة القسا,,,
تصوري نفس المشهد دة حصل في نادي سيدات أبوظبي كان في واحدة عاملة صبحية لبنتها وفي نهاية الحفلة قامت قسمة الجايبنها من السودان قالت دقولك يالبشير شن قولك في تلاتة نسوان طارن في الهوا وقعن وسط الساحة بتاعة الرقيص تصوري الفلبينيات البعملن السيرفس قامن جاريات صوف وهن آخر جقلبة ورقيص في ا لامن جابوا ليهن البخور حتى اتنفضن وقامن ,, محن يا سوسو يا بت امي !!
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
عواطف ..سلام ..وعلى حس الجاولى ..طلبات ظار عديل كده ..
اولا ..مافى راجل يخش البوست ده ..
ثانيا ..ما تعلى نعمل لينا زار لكل البوردابيات ونفتو ..نشرب , نخمس على كيفنا .. فترنا من لا وعيب وصاح ..و
ثالثا ..عواطف ادريس فى السودان والسودانى ..واحشنا ياجميل ..
ولا شن قولك يا البشير ؟
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: د.ناهد محمد الحسن)
|
ناهد !!!
محبتي ,,,
واحشني يا جميل ,, أيه الطلة الحلوة دي يا دكتورة ,, والله الجاولي هنا عامل مشكلة السودانيات عملن
أزمة والتجار محتارين بسو بيهو شنو .. فكرة ظار البوردابيات دي عجبتني خالص خصوصا الطشمي والتخميس
لزوم نسيان الواقع بس ديري بالك الكلام دة يكون بيني وبينك وبين البوردابيات عشان بكرة ما نلقى
أخبارنا في نشرة ستة ,, سعيدة بطلتك الحلوة !!
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
Quote: اختى / عواطف
تحياتى والله بصراحه وانا بقراء الموضوع ده رجعت الى عام 1970 يعنى قبل 37 عاما بالتمام والكمال فى منطقه كرمه النزل وانا مشيت احمل فى حمارى لمؤاخذه نصف جوال قمح ماشى الطاحونه وهى الطاحونه الوحيده فى تلك المنطقه فى تلك الفتره ايضا المهم ونحن فى الطاحونه ومعى مجموعه من الشباب وكلنا تقريبا فى سن بعض وسمعنا اصوات دلوكه عاليه جدا وغناء غير مفهوم والوقت حوالى الساعه الرابعه عصرا واحد قال فى حفله انا قلت ياجماعه الوقت ده ما وقت حفلات يعنى الحفله دائما بالليل المهم مشينا الى المكان المقصود ووجدنا غرائب لم نراها من قبل طبعا نسبنا الطاحونه والدقيق الى ان اغلقت الطاحونه ونحن فى هذا المكان نرى العجائب ولكن اكثر شى تاثرنا اليه نحن جميعا باننا اخذنا علقه بجريد النخيل لاننالم نذهب لاهلنا بالدقيق بل رجعنا بدون دقيق وبدون قمح نسبه لاغلاق الطاحونه بمافيها.
مع خالص مودتى ونحن فى انتظار المزيد لمثل هذه المواضيع القيمه
محمد ادريس عثمان زمراوى |
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: AbuAla)
|
حمودي !!!
يسعد صباحك ,,,
والله ضحكتني جدا على العلقة الأخدتوها بسبب الظار لكن معليش أهو شفتو حاجة غريبة وزي ما بقولو دقة
تفوت ولا حدي يموت وعشان تنسى العلقة اللي ليها 37 سنة حأعزمك على أول رجبية في أبوظبي عشان تشوف
المحن الفي الصحن ماشات وبردحن ,, شكرا أبوعلاء مرورك يسعدني ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
عواطف، تحية.. انا بفتكر انه الموضوع كله عبارة عن "فشفشه".. يعني الواحده بتكون نفسها تعمل حاجات.. وتحت مظلة المجتمع والعيب والممنوع.. ما بتعملها.. الكبت يا عواطف صعب على المرأة.. قامت (عشان هي فالحة) عملت فيها مجنونة.. وسوت العايزاه.. يعني مانعنهن يلبسن بناطلين.. ومانعنهن من الكيف والسيجاير.. لقن ليهن مخرج... هيع، عفيت منهن..
بعدين الخواجيات الناقصهن شنو.. البنطلون ولابساتنّه.. والويكسي وبشربنّه.. والسيجار وبيدخننه..
بنت الحسين
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: مريم بنت الحسين)
|
بت الحسين يالصباح السمح وزين !!!
والله كلامك في محلو هسة أنا ذاتي لو بقدر أعمل رجبية كنت عملتها عشان في حاجات كتيرة عايزة أعملها
و ما قادرة إلا أعمل مجنونة ,, غايتو البنطلون ولبستو باقي لي الويسكي والسيجارة ديل عايزات ظار
شكرا بت الحسين على مرورك الأنيق ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
ياعواطف ..الظار او الزار اها حاجة بنسمع بيها لكن لا شفتها الا في الافلام المصرية وقالو الزار السوداني اها زي الانتي وصفتيهو فوق يعني ما زي المصري يعني زي الفول السوداني والفول المصري فرق كبير ..وزي ما قالت بت الحسين العملية "فش خلق"واها فرصة الواحدة وفي مجتمع ذكوري ضاغط وخانق تحاول تلقي ليها حاجة باسم العلاج تروح بيها عن نفسها ..يعني الراجل لو عرض ونطط زي ما عايز وخلص سجاير الدنيا كلها واخد ليهو كام جغمة من ريد او بلاك ليبل ما في زول بيقول ليهو البغل في الابريق اما الواحدة لو هفت روحا الي حاجة من دييل ياها كدة وكدة ...
انا في كتاب عن طقوس السحر والتقاليد الافريقية اسمو بالعري روح افريقيا ولقيت فيهو اشكال والوان من نوع الزار واكيد الزار اخد من تلك الطقوس .. وفي كل بلد افريقي طقوس سحر مختلفة مرتبطة بنشاطات الحياة المختلفة من ولادة وزواج وطهور ومرض وموت وكلها فيها شيخ او شيخة (كجور) تقوم بالترتيبات اللازمة ويبدو والله اعلم ان الزار خلطة من الطقوس الافريقية المختلفة ...
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: abubakr)
|
كل ماهو يبدو غير صادق للآخرين..
لا يعني بالضروره انه غير صادق لمن يشعر به..
والظار ظاهره اجتماعيه ولها تحليلاتها الثقافيه والقتصاديه والنفسيه..وبالتالي فتحت لها منذ امد باب دراستهاالهادفه..
والظار لم يبتدع في السودان فهي ظاهره منتشره في شرق وغرب افريقيا..ولها ما يماثلها في بعض دول امريكا اللأتينيه..
ولها قطعا أسبابها والتي يتضح بعض منها في طقوسها الممارسه..
تحياتي توفي
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: abubakr)
|
ود سيد أحمد !!!
كيفك يا باشمهندس ياخي روق المنقة شوية الشغل ما بخلص ودير بالك على حالك ولنفسك عليك حق ولا لازم
نعمل ليك فشة خلق بي ظار حتى تريح شوية عموما أنا وسناء جعفر قررنا نعمل ليك رجبية شنو رايك ؟؟
فعلا الزار مثل الكجور في الدول الإفريقية وهو نوع من أنواع التنفيس في زمن الكبت والقهر شكرا
لمرورك العبق ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
ياعواطف كيفنك
ياسلام ذكرتيني زمن الطفولة
زمان يقولو ليك الليلة الطمبرة عند ناس فلانة
والله يرحمك ياشمة شيخة الطمبرة
والله يرحمك يا ام النصر
الزار المافيهو ام النصر كان ناقص
وكنا لامن ندخل بيت الزار(الطمبرة)
ونقعد نعاين بالشبابيك
عينك ماتشوف الا النور
العرقي والسيجار لانو زمان مافي مرا بتدخن
الا المرا العندها دستور (دستور يااولادماما)
انت دحين ياعواطف بشير ماياهو بشير الحبشي
والله واحدا تاني باقي الغربة دي نستنا حاجات كتيرة
زمان الكلام ده كان كتير خلاس
لكن زمنا ده شايفو بقى مازي زمان
انا الناس بقولو لي انت ترباية حبوبات
وانا كلام الحبوبات ده بلحيل بعجبني
وانت شكلك كدة زاتك ترباية حبوبات
انت عارفة اولاد الايام دي مابلحيل كدي في الحاجات دي
والله امكن الزار تطور وبقى اسموا حاجة تانية .
الله يخليك ياعواطف ويديك العافية
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: حافظ العشا)
|
العزيزة عواطف
تحياتى
التجانى الماحى سألوه من الزار قال نحن نفسنا بنعاج بالموسيقى , وقال إنهم سجلوا موسيقى الزار والنتائج كانت إيجابية .
| Quote: دقولك يا البشير شن قولك يالبشير ؟؟؟ |
العنوان برضوا لايق على الريس بعد ما بلع طلاقوا
حقوا تدقوا ليه برضو .
| Quote: و الخروف كمان ملبسنو جرتق اتقول ماشين يزفوه لنعجة المهم قامت ست الظار بخرت الخروف شوية ورشتو بالريحة وساقوه برة عشان يضبحوه المسكين ما كان عارف مصيره طلع مستغرب جدا وفرحان من المشهد الغريب اللي شافو لأول مرة في حياتو |
مسكين
محبتى
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: طلال عفيفي)
|
طلال !!!
طلتك بالدنيا ,, يا فنان يا رايع ,,,
مرورك جميل كجمال فنك وإبداعك ,, شكرا طلال ,,الكاتب ,, المصور ,, الفنان ,, و .. و ..
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: طلال عفيفي)
|
خيبت ظني في ناحيتين
كنت قايلو الياهو
وكنت سأعترض عليك الجنوح للكتابة السياسية
كون المواضيع الاجتماعية التي تسهم في تطور مجتمعنا المدني وحواراته وتطويرها وبالتالي نتائجها التي تصب في خانة تقدم مجتمعاتنا والتي تعد لبنة من لبنات التحديث وبناء المجتمع السوداني المتحضر وعلاقة إرتباط مصيري تصل مجتمعاتنا بالقيم الوطنية والنظام والقانون والممارسة السليمة والنظام حتى فيما نلبس وليس ما نأكل يشبهك كثيراً.
إذا خاب ظني في الحديث عن الياهو والهوت ميل
وخاب رجائي في أن أرجوك عدم الخوض في المواضيع التي لا تشبهك
ليه؟ خيبت رجائي وظني
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: othman mohmmadien)
|
ود محمدين ,,الراجل الزين ابوالحلوين !!!
كيفك ؟ ومرحبتين حبابك البوست السعيد الليلة جابك ,,,
عاد يا ود أمي أنا مكجنة الكلام في السياسة قبال كدي في فيلسوف زمانو قال السودان ما ينصلح حالو
الا إذا السودانيين خلو الكلام في السياسة, معليش يالحبيب إنشاء الله ظنك ما يخيب وتسافر
وتجيب ,,التياب والجلاليب وتكسي البعيد والقريب وخاطرك إنشاء الله دايما يطيب ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: رأفت ميلاد)
|
ريري !!!
ودي ,,,
العلاج بالموسيقى هو أحدث أنواع العلاجات وكمان موسيقى وأغاني الظار لها إيقاع مختلف وخاص جدا يعني
بتخلي خيتك يجي على طول وتنزل في الساحة بدون ما تشعر أو تعرف إنت منو ولا وين ! هسة حلفت الطلاق
دي كان في ليها داعي ياجماعة كيف يعرفونا سودانيين كان ما حلفنا الطلاق بالتلاتة والحرام لكن
للضرورة أحكام طالما في فقه ضرورة اخترعو لينا شيخنا الترابي نحلف علي كيفنا يمين وشمال والغاية
تبرر الوسيلة ,, مشكور يا بعد عمري على هالطلة .
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: حافظ العشا)
|
ود العشا !!!
معزتي وشكري على مرورك الرائع لكن ما تقول لي جنس شمشرة عليك فعلا ود حبوبات وبعدين بشير دة فعلا
هو الحبشي ذاتو وعلوماتك مية بالمية يعني الغربة ما أثرت في الذاكرة والزار الأيام دي بقى فشار
( بوب كورن ) وسجاير بالنعناع وريد ليبل وآخر منجهة ,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
عطووووووووفه
أنا دستوري نازل في أمتداد الدرجة الثالثة
أنت دستورك أكيد في الخرطوم وين الموقع حددي
طبعا أنادستوري نازل في الخرطوم تلاته دي لأن الخرطوم (3)
فيها أرتال من الحبوش يقطنون ذاك الحي المتوسط الخرطوم
ويمكن حتي الآن .
والظاهر الظار دي بيفتش محل الخمور والبخور حقيقي المسأله محتاجه
وقفه لكل زول بيعرف زول أو زوله عندها هذا الطار ويقوم يدقوا أويكسروا
وينهي هذة المسأل وهي شرك عظيم يجب الأقلاع عنه والتوبه والرجوع الي الله
تسلمي ياأستاذة عواطف .
،،،أبوقصي،،،
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: doma)
|
العواطف كيفك
اديكم معلومة جديدة
بالمناسبة حطب الدخان لازم يكون من شجر الطلح ولا يصلح قطع الشجرة الخضراء منه وتجفيفها ولا يصلح قطع فرع وتجفيفه ولا يصلح اى جزء من الشجرة خلاف الساق الاساسي والساق الاساسي نفسه لا يصلح لعمل الدخان مالم تكن الشجرة مقطوعة وعاولة يعنى مقطوعة ليها فترة حتى نشف الساق وبعدئذ يمكن تكسير الساق او كما يقولون تشقيق الساق او تفليخ الساق .
السؤال المحير والذى يمكن ادارجه في قائمة اسئلتك الفوق هو من اكتشف سر الطلح هذا ؟
لنا عودة
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: الطيب شيقوق)
|
ود شيقوق يالكلك ذوق !!!
هاي ,,,
الدخان دي لو عرفناها كان دخلناها موسوعة جينيس في الاكتشافات العبقرية,, تسلم يالحبيب ,,
(عدل بواسطة عواطف ادريس اسماعيل on 06-18-2007, 09:27 AM)
(عدل بواسطة عواطف ادريس اسماعيل on 06-18-2007, 09:27 AM)
(عدل بواسطة عواطف ادريس اسماعيل on 06-18-2007, 09:28 AM)
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: doma)
|
دوما !!!
فتيل المايقوما,,,
واله ظارك دة شكلو أسلحة دمار شامل عشان كدي أنا من الصباح اقول الإنفجارات الفي المنبردي جاية
من وين ,,, غايتو البوست الماعجبك فجري سيدو ,,, ست الظار يحق لها ما لايحق لغيرها ,,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: الفاتح يوسف جبرا)
|
الفاتح !!!
كيفك يا دكتور ,,,
هو الشرك دة لازم يكون للفيران ؟؟ وبعدين الشرك خشم بيوت ,, ما عرفت أجمع شرك كيف ؟؟ بعدين الناس
تمشي الأمم المتحدة ليه وتاخد المشوار دة كلو ما الأمم المتحدة جات لغاية عندنا ولا شنو رايك ؟؟
شكرا على الطلة الحلوة ,,, بالمناسبة في واحد إسمو دكتور الطيب أستاذ في الجامعة معجب بيك شديد
كل ما يشوفلو زول يقول ليه أمشي أقرا للفاتح يوسف جبرا وأنا كلما يقرا لي موضوع يقولي أقري للفاتح
يوسف جبرا عشان تستفيدي من كتابتو ,, شايف الاذن تعشق قبل العين احيانا !
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
Quote: بالمناسبة حطب الدخان لازم يكون من شجر الطلح ولا يصلح قطع الشجرة الخضراء منه وتجفيفها ولا يصلح قطع فرع وتجفيفه ولا يصلح اى جزء من الشجرة خلاف الساق الاساسي والساق الاساسي نفسه لا يصلح لعمل الدخان مالم تكن الشجرة مقطوعة وعاولة يعنى مقطوعة ليها فترة حتى نشف الساق وبعدئذ يمكن تكسير الساق او كما يقولون تشقيق الساق او تفليخ الساق .
السؤال المحير والذى يمكن ادارجه في قائمة اسئلتك الفوق هو من اكتشف سر الطلح هذا ؟ |
هسع عليك الله يا ود شيقوق ياخوى (الإكتشفو ذاتو) بيكون عندو جنس المعلومات دى ؟؟
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: الفاتح يوسف جبرا)
|
الاستاذ الفاتح جبرا
كيفنك ياخي
| Quote: هسع عليك الله يا ود شيقوق ياخوى (الإكتشفو ذاتو) بيكون عندو جنس المعلومات دى ؟؟ |
انت عارف يا استاذ الفاتح الكلام الكاتبه انا ده بيعيدنى لايام الطفولة ايام التوازن البيئي وايام الحطب بيكون مجدع ساااااااى مافي حد يرفع عود مرمي لانو الناس كانت غير محتاجة تحرق الشجر للفحم .
اذكر ايام طفولتي بنمشى الزراعة مع الوالد وفي العصرية عند العودة للقرية اجى راكب ليك مع ابوى في الدابة من خلف وماسك ليك السرج وكان من ضمن برامج العودة هذه ضرورة نزول الوالد في الطريق لتكسير اعواد طلح ...... وكانت اطرافها حادة دائما عامله لى مشاكل بالتجريح .
طيلة ذهابي معاهو لم اشاهد الوالد قطع شجرة خضراء ولا حتى فرع يابس الا بالوصف السالف ذكره .
عواطف تابعي بدون محاذير لانو لا حياء في الدين .
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
عطوفي صباحاتك عسل
اليو م انا باص (اعلم انو هذا ماموضوعنا بس حبيت . ان تفتحي بوسط عن هذا الموضوع )
من الجميل أن يكون لديك سيارة مرسيدس جديدة ..
ومن الرائع أن تكون لديك فيلا عظيمة وزوجة جميلة وأموال لا حصر لها ..
ولكن ..
الأجمل من هذه كله أن تكون لديك أم تقبلها كل صباح ..
فتقول لك: الله يرضى عليك يا ولدي
يخجل الكثير من الأبناء من أمهاتهم ويحسون بالخزي وهم يمشون معها ..
أو حينما يأخذونها إلى مكان ما ..
وعلى العكس تماما تفتخر الأم عندما يأخذها ولدها إلى السوق أو إلى بيت أحد الأقارب !
فعلا ما أروع الأمهات وما أقسى الأبناء .
قبل أن تزوج ابنتك لأحد الشباب المتقدمين لطلب يدها ..
لا تسأل عن أخلاقه وأصله وماله ووظيفته فقط ..!
لا تنسى سؤالا مهما هو ..
كيف يعامل الولد أمه وأبوه ؟ !
العديد منا يفكر في إرسال هدية لزوجته أو لصديق عزيز ..
ولكن هل يفكر أحدنا بمفاجأة أمه بهدية ؟!
ربما لا تعرف حجم الحب الذي يكنه قلب أمك لك ..
ولكن عندما تتزوج وتنجب الأبناء ..
ستعرف مقدار الحب الذي يكنه الآباء لأبنائهم !
وإذا لم تحس بعد ذلك بمقدار الحب الذي أحدثك عنه الآن ..
فتأكد يا عزيزي بأن قلبك هو مجرد صخرة صماء !!
كل شيء يعوض في هذه الدنيا إلا أمك !
هي الشيء الوحيد الذي إذا ذهب لا يعود أبدا !
بعض الأبناء يعتقدون أن الأم مجرد خادمة تطبخ وتنظف وتوقظ في الصباح ..
ولكن الفرق الوحيد بينها وبين الخادمة هوأن الخادمة تأخذ راتبا ..
والأم تعمل ليلا ونهاراً وبدون مقابل ببــــلاش !!
بعض الأبناء لم يعرفوا قيمة أمهاتهم بعد ..
كما أنهم لن يعرفوا إلا عندما تأتي زوجة الأب ..
أو تنتقل روح أمهم إلى عنان السماء !!
كم واحد منا يقبل يد أمه ؟
وكم واحد منا يقبل رأسها ؟
وكم واحد منا يكلمها باحترام وأدب !
لو نظر كل واحد منا إلى أسلوب تعامله مع أمه لوجد نفسه عاقا وجاحداً ومجرما ..
كم هو حقير هذا الإنسان !
يشهد التاريخ أن كل من عق أمه لم يرَ الخير والسعادة في حياته ..
كما يشهد التاريخ أن كل من أساء إلى أمه أساء إليه أبناؤه !
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: بدرالدين يعقوب)
|
بيبي !!!
والله فعلا كلامك صاح قلبي على جناي وقلب جناي على حجر الليلة غايتو ذكرتني عيد الأم وفعلا دة بوست
ممتاز جدا حقوا تفتحوا لينا في مكان تاني ولا شنو رأيك ,, ربنا يسعدك ويخليك لأمك ,,
نسيت أقول ليك الليلة فعلا إنت جادي جدا ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
رجبيه يا اولاد ماما
سلام عطوفه
الليله الخواجه لابس طربوش عديييييييل
انا مع راي الاستاذ جهينه
Quote:
يؤرقني سؤال في هذه المسألة
فمن المعروف أن الظار إفراز نفسي و إنعكاس لكبت معين و لأسباب قد تكون قهرية
و الظار أيضاً تنفيس عن مكنونات لأشخاص في معظمهم لم يكن قادراً في فترة حرجة أن يبوح بما يضمر أو ينال ما يطلب
هذا هو التفسير النفسي للظار
فلماذا بالتحديد أغلب الظار ينتمي لهذه ( اللولي الحبشية ؟؟؟؟ ) ...
في مصر الظار مستوطن بطريقة مصرية
و كذا في المغرب
و في دول أخرى .. مستوطنة ( بهوية أهل البلد )
فلماذا تتقمص الحبشية هوية شخصيات الظار عندنا؟
|
ممكن تكون الاجابه
الحبشي شخصيه تتملك الظار لارتباط التاريخي و مملكه كوش و السلم الموسيقه الخماسي
و مع الاستاذه سلمي
و احب اضيف
الزار موجود في برازيل و بعض دول جنوب امريكا
و العديد من البحوث اجريت عن الظار و هو مرتبط بالحاله النفسيه و السياج الاجتماعي
حضرت العديد من المحاضرات عن الظار في السودان قدمها باحثوون من اليونان و امريكا
و اهدتني بروفسيره امريكيه كتاب عن الظار في سنار (اذا حبيتي قراته سوف ارسل لك نسخه)
و الظار لنساء و الرجال معا
و بالمناسبه اندهاشا في هذه الظاهره حضرت العديد من جلسات الظار, و كنت افكر في اعداد بحث
و الحاله النفسيه التي تعتري المتلبش و الشخصيه التي تتلبس المتلبش
و اللغه التي يتحدث بها حبشي, خواجه, سوداني, و العديد من اللغات
من الغرائب ان اغاني الظار تحكي عن حقب تاريخيه مهمه لم تدون من قبل
مثل الباشا و الخواجي اشاره لاستعمار التركي و الانجليزي
و بعض تفاصيل تشير لفتره تجاره العبيد في السودان و الظلم الذي مؤرس ضد السودانيين
و حقب تاريخيه قد لا نعرفها
موجوده داخل الاغاني, قد يكون تاريخ لفظي يحتاج لتدوين
و حقيقه الظار كظاهره تحتاج لدراسه عميقه
في احد المرات كنت اذهب متلصصه لحضور و مشاهده هذه الظاهره و معي احد صديقاتي
و كانت هذه الصديقه من اشد الشخصيات كرها و تهميشا لظار
المهم اقنعتها لذهاب لفتره قصيره لمشاهده فقط
اذا به بعد خمسه دقائق اجد صديقتي ترقص و ترجف بدون و عي
الخوف تملكني, لان لم يحدث لي شي شخصيا مثل هذا
المهم بعد انتهاء الفاصل , صديقتي رجعت لحالتها الطبيعيه,
و بسرعه قلت ليها يلا نمشي
وخرجنا و في الشارع سالتها ماذا حدث لك؟
اجابت: ما في حاجه حصلت لي و عليك الله ما تعمل لي تمثليه
اليوم صديقتي صارت طبيبه و
الي الان لم تصدق انها كانت متلبشه يوما ما مثل ناس الظار
و لدي احساس ان الظار و دق النحاس و رقص الدرويش و رقص مع الموسيقي الخ
ما هو الا تعبير لحاله نفسيه
و الجسد و الاعصاب تستجيب لايقاعات الموسيقيه بصوره عنيفه
قد يكون علاج و متنفس لبعض الحالات
و فتك بعافيه
و طلباتك يا البشير
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: bent-elassied)
|
مي يا سمحة الزي !!!
التحايا والأشواق ,,,
كلامك سمح بلحيل وعجبني شديد عشان كدة بدون تعليق لا يغتى ومالك في المدينة ,,
هسة يا بت أمي أنا ظاري نازل في طربوشك الابساه دة رسليه لي مع الكتاب عندي رجبية يوم الخميس
الجاي وطلبات البشير ما بتقدري عليها شي تقيل ياالعظمة ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
الأخت العزيزة عواطف
كان عاوزة تضحكي كمان أتم ليك الناقصة بي حفلة ظار حضرتها في الأبيض .. كان فيها واحد (طاعم ) يعني بالعربي الفصيح أبان جلاليب مفتوحة من الجنب وكان معروف إنو ما بقلع طاقيتو أبداً عشان ( الصلعة ) ولأنو كان كبير في السن يعني العقد السادس وإنتي طالعة .. وكان معاهو واحد زميلو في المهنة ولما الظار دوّر وقع صاحبنا (الما بقلع طاقيتو أبداً) وأصابو شلل نصفي وطبعاً الظار ما نفعو وجروا بيهو المستشفى وكان لي صديق قام قال لي تعال نمشي المستشفى نتفرج ولما مشينا المستشفى لقينا (قبيلة الجماعة مجتمعة حول السرير - إناث وذكور - هناك) وكان صديق ودفعة المصاب واقف جنبو بعدد في مناقب المصاب
وقال هي " يابنات أمي" ، ده سوا شنو في حياتو بطال؟ والله ده لا طار واللآ فقّع!!).. مع ملاحظة إنو كان بيخاطب الجماعة المن جنسو!!
بقلبي قلت ليهو: صحي ما عمل أي حاجة في دنيتو!! .. و حكاية لا طار ولا فقّع دي كبيرة شوية لأنو المصاب فوق الستين!!
النكتة ( الكوديا - شيخة الظار) كانت موجودة في المستشفى وسجارتا مولعة نار قريص وقالت : والله دي عين صابت "الحاج" - حلوة الحاج دي - .. " عين ما ساهلة.. شديدة وكبيرة .. سحرتو الما قالت الصلا على النبي .. لآزم ندق ليهو ظار عشان يطيب ده عاوز ليهو كم جلسة !!) !!
والله ليهم نوادر تشرط من الضحك.!!
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: ابوبكر يوسف إبراهيم)
|
أخي العزيز د. أبوبكر !!!
تحية ,,,
والله فطست من الضحك بقدر ما كتاباتك جادة بقدر ما تملك روح النكتة اللطيفة التي تضحك من الأعماق
فشكرا لكل ملكاتك الإبداعية بس ما تقول لي الظار الحضرتو كان ظار عينة والحدلله إنها وقفت لغاية
هنا وإنشاء الله صاحبنا يكون الحين طار وفقع ,,, شكرا يالحبيب أبق دوما معنا لرأيك نكهة خاصة ,,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
الأستاذة عواطف
متعك الله بالصحة والعافية ومتع الله قلمك الحلو بكل ما جميل ومفيد
أنا زاتي زمان شفت الظار وأنا صغير جداً لكن بتذكروا لي هسي عند حبوبتي الله يرحمها
لكن أحلى ما الأمر إنو كلامك حلو وسردك لذيذ خصوصاً من تدخلي اسم بكري ابوبكر في الموضوع
من هنا أو هناك.
الله يدمر الظار ويهدي ناس الظار إلى طريق الحق والنور المبين
أبوفتحية
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
اولا اهنئك بكثرة المدسترين
المتسيسين والمستترين والمستترينات
ولعناية الاخ ابو جهينة
بما انو الظار انعكاس نفسي للفي نفسي
وبما انو عكسنا شرقا الهضاب الاثيوبية
ونعلم مدى ولعهم بالفنان وردي
ومدى ولعنا بلولياتهم
فقد استوطن هذا الخيط في العقلين الباطني والواعي
لدى ولياتنا
فنزلن فيه
انعكاسا لما في نفوسهن
ارجو ان اكون قد اوضحت
وابنت
ومشتاق ليك ياعواطف
( طبعا تك اكتشاف خيت جديد سموه العطف الادريسي)
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: د.محمد حسن)
|
حمادة !!!
الليلة ظارك ظار السرور,, في الحقيقة أنا لما أقرا الشعر بتاعك دايما بقول الزول دة ما براه أكيد
معاهو أولاد ماما عشان كدة اتاكدت الليلة إنو الظار انعكاس نفسي للفي نفسي ياود ما تتلاعب بالألفاظ
أيه البلاغة دي !! والله فعلا يا دكتور أوضحت وأبنت ربنا يحفظ ويغتيك إنت وأخونا أبو جهينة ,, الخيت
الجديد دة طالباتو رجبية في جدة ولا الرياض ودستوركم يا اسيادي !!!
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: الفاتح يوسف جبرا)
|
د. محمد حسن
| Quote: ومدى ولعنا بلولياتهم |
اللوليات مفردها ( لول )
و العروس غنوا لها ( اللول لولك يا العروس )
فهل هناك فرق بين اللولين ؟
أظن اللول هو من ضمن ال DNA الذي يعشعش في غدد الطرب بسلالمه الخماسية و السباعية و كل أنواع الإيقاع .. مردومه و تُمْتُمه و دليبه أو ذاك الذي يغازل الشَّتَم ..
فالمظيورة ( يعني ال عندها ظار ) .. تتصرف أثناء الإنصهار في الرقص بشكل عفوي و تترك لجسدها العنان ( قالت العرب إياك و المظيورة و المطيورة .. و سنأتي ذات بوست عليهما ) ..
و عند الإفاقة من سكرة اللحظة لا تعرف ماذا فعلت و كيف تصرفتْ ..
هذا كان من أمر لوليات الظار ..
أم لوليات العروس فهو أقرب للوليات الظار .. لأن العروس أيام رقصة العروس و التمايل و التثني بالرحط يكون عقلها الظاهر و الباطن في خدر ما سيكون .. و الخطوة التي تأتي بعد قطع الرحط و تسجيل الأقوان على العريس و التخفي بين طيات القرمصيس .. إذن هي حالة أيضا يغيب فيها العقل في خدر محبب..
إذن النتيجة أن اللوليات إما محلية ( كالتي عند العروس )
أو حبشية يستدعيها العقل الباطن لأن معظمنا ( حبوباتهم ) من بقايا أكسوم التي تلاقحت مع جيوش عبدالله بن أبي السرح .. أو لأننا عقلنا الظاهر يقْنع عويناتنا الطايرة بمحاسن و مفاتن تفرضها نفوسنا الأمارة باللغوسة ..
و بما أنك الآن أبعد من زحل من أيام لوليات العروس .. أقول لك يا دكتور محمد حسن .. أبعد الله عنك لوليات الحبش ما ظهر منها و ما بطن ..
تخريمة لولية شديد : هناك لوليات مستنسخة تطفو على مسرح الحياة في السودان ... إسمها لوليات القبعات الزرق ...
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: ابو جهينة)
|
في الثمانينات دعاني صديقي للقيام بالترجمة لأستاذ فرنسي دعته إحدى طالباته لحضور حفل "زار"، وكان الأستاذ متلهفاً لمشاهدة مثل هذا الحفل الذي لم يسبق له حضور حفل مثله .كانت الاسرة منظمة الحفل ثرية جداً، ولا أكذب عليكم إن قلت لكم إن جميع تجهيزات هذا الحفل تم جلبها رأساً من باريس ، كما أن جميع المدعوات لهذا الحفل لم يكن بينهن نساء كبار بل كن شابات تبدو عليهن آثار النعمة والثراء. أماالرقص فكان على أنغام عزف ""حي" على أحدث الآلات الموسيقية، والملابس كانت آخر صيحات بيوت الموضة العالمية .
قضى الأستاذ أمسية سعيدة بينما كنت أتساءل وصديقي "هل نحن في حلم؟" وطافت بخاطري "حاجة الرحمة " شيخة الزار في قريتي الوادعة" وقارنت بين الحركات الهستيرية التي كانت تقوم بها "الفنجرية " أشهر راقصات الزار في القرية والتي كانت تتزيا دائما في زي ضابط وكانت تقوم بأداء المارشات العسكرية كأنها كانت بالفعل ضابطاً في الجيش، وقارنت بين طعم "الجاتوهات" المجلوبة من باريس خصيصاً لهذه المناسبة وبين طعم "بليلة الزار" التي كنا نتخاطفها ونتلذذ بطعمها عندما كنا صغاراً وبين الطست "الطش" الكبير الذي كانت شيخة الزار تتخذه أداة إيقاع وبين العزف على أحدث الآلات الموسيقية. والزار خشم بيوت يا اختي عواطف
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: إسحاق بله الأمين)
|
أخونا الحبيب ود بلة !!!
شكرا عشان أديت البوست طلة ,, مرورك أسعدني , والله حسدتك عديل كدا على الظار الهاي فاي غايتو
أريتو ظار السرور يعني إنت بقيت بين ظارين بدل نارين وأعتقد إنك ما مشيت لظار الحاجة رحمة حق
البليلةبعد ظار التورتة والآلات الموسيقية الحديثة ,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: إسحاق بله الأمين)
|
أخونا الحبيب ود بلة !!!
شكرا عشان أديت البوست طلة ,, مرورك أسعدني , والله حسدتك عديل كدا على الظار الهاي فاي غايتو
أريتو ظار السرور يعني إنت بقيت بين ظارين بدل نارين وأعتقد إنك ما مشيت لظار الحاجة رحمة حق
البليلةبعد ظار التورتة والآلات الموسيقية الحديثة ,,
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: ابو جهينة)
|
ذكر ابو جهينة
في كتابه
( الاغاني الحبشية في رقصة الشيخة لولية) ما يلي :
أظن اللول هو من ضمن ال DNA الذي يعشعش في غدد الطرب بسلالمه الخماسية و السباعية و كل أنواع الإيقاع .. مردومه و تُمْتُمه و دليبه أو ذاك الذي يغازل الشَّتَم ..
فالمظيورة ( يعني ال عندها ظار ) .. تتصرف أثناء الإنصهار في الرقص بشكل عفوي و تترك لجسدها العنان ( قالت العرب إياك و المظيورة و المطيورة .. و سنأتي ذات بوست عليهما ) ..
))
وقد اضاف محمد ود حسن في كتابه طبقات ود امهر في طب الحبش بالمزهر:
(( اللول يتالف حروفه من حروف الولوله وهي تعني درجة من درجات الوله المستترة خوفا اما من عين الحسود التي فيها عود او عين المدام والتي تكون دوما ما تمام، لذلك تظهر في ولولات تتحدد درجات ترددها وفقا للحالة ، وهذا في حالة دساتير الرجال المحبوشين)
اما النساء الائي يعانين من حبشة رجالهم
فانهن يولولن ويطلبن السماح من اللولية وان يتشبهن بها ))
انتهى كلام محمد ودحسن ولكن سمعنا ( تحت تحت ) انه بعد ان شاهد شريط فيديو للفنان حنان بلوبلو عكف في تاليف مخطوط جديد يشرح في العلاقة
بين الخرمة للبيرة الباردة ودق الظار للمرة الشاردة
تخريمة
والله يا عواطف الماشاف ظار حنان ماشاف
| |
|
|
|
|
|
|
|
|
|
Re: دقولك يا البشير شن قولك يالبشير ؟؟؟ (Re: عواطف ادريس اسماعيل)
|
عطوفه الحبيبه الولوفه
شوقنا كميات ودبربكات مطننه
موضوع الظار دا والله من زمان شمارو كاتلني لكن ماحصل سمعت ولاشف فيهو شي
لكن ماقصرتي صورتي المشهد وانا اتخيل روعة المنظر هنا
تكاد تكون اختفت من مجتمعنا السوداني
بس زمان عندنا جارتنا اول ماتقوم تتشاكل مع جاراتا يقولها عندها شريط احمر ولا خيت احمر ماعارفه
بالله صححي لي المعلومه دي
دا علاقتو شنو بالظار ؟؟
حبي لكي يارائعه
| |
|
|
|
|
|
|
| |
عواطف ادريس اسماعيل
هاشم أحمد خلف الله
محمد مختار جعفر
بشير حسـن بشـير
فاروق حامد محمد
ibrahim fadlalla
doma
saif massad ali
نهال الطيب
خالد العبيد
welyab
د.محمد حسن
محمد المختار الزيادى
عبد الدائم سيد أحمد
عصام دهب
ابو جهينة
سلمى الشيخ سلامة
مريم بنت الحسين
abubakr
Muna Khugali
رأفت ميلاد
طلال عفيفي
othman mohmmadien
مجدي عبدالرحيم فضل
الطيب شيقوق
bent-elassied
الفاتح يوسف جبرا
بدرالدين يعقوب
Mustafa Mahmoud
الصادق صديق سلمان
إسحاق بله الأمين
فدوى الشريف
فيس بوك
تويتر
انستقرام
يوتيوب
بنتيريست