|
|
 خرابة البيوت ... وصفات سحرية لنتائج عكسية !!!
|
إنسانة غير عادية تعيش بيننا, قد تكون جارة ,, صديقة ,, خالة أوعمة لكنها قررت أن تكون مستشارة قانونية , تفتح مكتب البث المباشر دون إذن من دائرة البلدية ولا غرفة التجارة والصناعة كما أنهالا تملك أي شهادات قانونية تؤهلهالأداء هذه المهمة الصعبة ومع ذلك تقدم النصح والإرشاد لمن تطلبه ومن لا تطلبه وهي كما قال الدكتور منصور خالد في كتابه عن المشير جعفر نميري ( النفق المظلم) كان لا يحب أن يرى الكأس فارغا أو ممتلئا كما كان يحب أن يحيط نفسه بمن لهم هموم دنيوية,, كان لا يحب القراءة ولا الكتابة ومع ذلك صار كاتبا في آخر أيامه ., خرابة البيوت أيضا تحب أن تحيط نفسها بمن يعشن في خلافات زوجية فتقدم لهن استشارات مجانية رقم أنها في الغالب تكون إنسانة غير مطلعة لا على الدراسات الاجتماعية ولا النفسية ولا الأسرية لذا تقدم نصائحا غالبا ما تسير في الإتجاه المعاكس علما أن الدكتور فيصل القاسمي لو كان يعرف عنوانها لاستضافها في كل حلقاته لكي تزيد النيران شعللة والطين بلة.
خرابة البيوت قد تكون متعلمة أو نصف متعلمة أو جاهلة في أحسن الفروض ولكنها في الوقت نفسه تكون مقنعة , لديها أدوات كثيرة تعرف كيف توظفها لتجعل من الجميل قبيحا والعكس الصحيح , تعرف كيف تصطاد في الماء العكر مثلما تعرف نقاط ضعف فريستها,, مع العلم أن خراب البيت قد يبدأ من يوم الزفاف حيث تبدأ خرابة البيوت بتوصية العروس مثلما حدث معي يوم زفافي ( أسمعي هنا يا بتي أوعك تسرقك السكينة إنت عارفة الرجال زي الموية في الغربال , أوعك تغمضي عيونك وتنومي قفا وتقولي بحبني وم ممكن يعمل فيني كذا وكذا مافيش في الزمن دة حاجة اسمها حب خليكي واعية ومفتحة أول حاجة تعمليها تكتفيه يا هبلة بالعيال عشان تقشطي جيوبو, يعني أنا لو صدقت كلام خالتي نفيسة كان يكون عندي 15 عيل وبدل ما أسكن في شقة أشوف لي فيلا وحوش كبير وأجيب مدرس في البيت بدل ما أدفع 225 ألف درهم رسوم دراسةو50 الف درهم مواد غذائية و25 الف درهم ملابس سنوية و45 الف درهم تذاكر سفر سنوية طبعا أنا عارفة في ناس حيقولو الحالة ما صدقت خالتها نفيسة ! يعني لو صدقتها كان حيكونو كم ؟ (خمسة وخميسة عين الحسود فيها عود ) المهم نرجع لموضوع خرابة البيوت من ضمن الوصايا السمعتها بت خالتي قالت لي هوي يا عواطف أسمعي كلامي كويس الرجال ديل ... ونحن ما بنقدر نمشي حفايا طبعا ما عارفة المثل دة جابوه من ياتو اسكافي ؟ حكاية عجيبة ! وما سمعتو إلا عندنا يبدو أن ثقافتنا أصبحت جزمية ودة مؤشر خطير لإنحدار مستوى الثقافة . واحدة من المعارف تخصصت في تخريب البيوت بشتى أنواع المعاول تبدأ يومها بالإتصال بجميع صديقاتها اللي عندهن مشاكل مع أزواجهن أو أهل أزواجهن لكي تطمئن على الموقف وتتأكد أن نصائحها تطبق حرفيا والله سمعتها بأضاني دي بتقول لي واحدة أسنعي أوعك تعودي الراجل على الإعتذار حتى لو كنت غلطانة , خليه هو يعتذر , ما تكسري ليه نفسك ولا تهيني كرامتك ,, وكان ما اعتذر أفتحي ليه يوم يومين بجيك جاري زي الكلب ولا مؤاخذة ومع الإعتذار ليكم يا رجالة بعدما خلصت من تقديم العديد من النصائح المدمرة لصديقتها المتعلمة لكنها بدون خبرة في الحياة اتصلت بأخرى تعاني من مشاكل عويصة مع أهل زوجها لتقول لهاأسمعي إنتي ما تسيبي العوارة حقتك دي وتديهم العين الحمرا انت عارفة هبالتك دي خلتهم يحقرو بيك ما تخلي راجلك يرسل ليهم ولا مليلم كفاية الرسلو ليهم من عشرين سنة , ديل يا اختي لا بشبعو لا بقنعو وانتو بقيتو محمولين وعندكم أولاد وامو العاملة فيها صعبة دي قصقصي ليها رويشاتها ما تخليها تشوفو ابدا ولو ضربت تلفون قولي ليها نايم ولا مافيش اصلو أمهات الأولاد ديل معروفات بغيرن من نسوان أولادهن( سجمي الكلام دة كلو حيتطبق علي وا رمادي يا يمة التعبت وربيت وقريت ) . عندي صديقة اتعرفت عليها من خلال سودنيز أون لاين عايشة في أمريكا كل ما أكتب حاجة تتصل وتقول لي الليلة مت من الضحك أها المرة الجاية عندك شنو؟ قمت أمبارح قلت ليها مفكرة في موضوع خرابة البيوت قالت والله موضوع جميل تصدقي أنا اتعرضت لموقف مماثل ! سألتها لزوم الشمشرة أها الحصل شنو يا بت أمي ؟ قالت في واحدة حاجة كبيرة تعيش معها في نفس الولاية ومعتبراها زي أمها ولمن حصل خلاف بسيط بينها وبين زوجها قامت مشت كلمتها طوالي الحاجة نطت وقالت ليها فكيه عكس الهوا تمشي باتة وتجي أديدس وبعدين طوالي هجي شوفي ليك أي ولاية تانية وعيشي حياتك يا بتي هو العمر دة قدر شنو عشان تبعزقيه ؟ والله الراجل السجمان دة ما يستاهل ضفرك ,, طبعا صاحبتنا بت الناس وبت القبايل اندهشت جدا وبدت تعود بذاكرتها للوراء عندما كانت الحاجة تشكر في نفس الراجل وتحاول بقدر الأمكان تتيح ليه فرص ليلتقي ببنتها العانس فعرفت السبب ليبطل العجب .. يا أخوانا في ناس كتير بتلوم الزوجة التي تلجأ إلى الشكوى إلى هذا النوع من النسوان خصوصا عندما تأتي النتائج العكسية فمثلا التي تحاول أن تكبل زوجها بالعيال تجده قد طفش من البيت ليبحث عن الهدوء والراحة في مكان آخر بالحلال أو غيره وفي أحسن الفروض يذهب للسهر مع أصدقائه حتى مطلع الفجر أما التي ترفض أن تعتذر لزوجها وتفضل أن تفتح ليه طوال السنة ستفتح له مخارج لم يكن يفكر فيها ومن تعادي أهل زوجها تكون كالتي نقضت غزلها وكشفت دفاعاتها وخسرت معركتها لأن الرجل مهما كان ضعيف الشخصية لابد أن ينصف أهله في يوم ما فتعود العرجة لمراحها ولكن قد تكون الزوجة حائرة ولا تعرف كيف تتصرف لذا تلجأإلى الشخص الغلط فلهذا السبب يفترض أن لا تخرج أي مشكلة عن غرفة النوم ويفترض محاربة كل من تسول لها نفسها بتخريب بيوت الناس بمواجهتها يعني إذا عرف الزوج أن فلانة تلعب دورا خبيثا في حياته الزوجية عليه أن يواجهها بذلك دون حياء أو خجل وأنا أعرف حالات من هذا النوع حيث قام الزوج بمنع زوجته من الاتصال بشخصية معينة كما منع تلك الشخصية من التدخل في حياة زوجته أو إقامة أي علاقة معها وكفى المؤمنين القتال ولا شنو رايكم . وفتكم بعافية .
|
|
 
|
|
|
|
|
|
|
 Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
صباح الخير استاذة عواطف وجمعة مباركة عليكم وعلينا
انا بجد خرابة البيوت دى ولا حاجة مع خرابة الاوطان
هنالك من يخرب وطن بحالو وعندك مثلا عجوبة الخربت سوبا
لا ادرى كل خراب بتجد اصلو خرابة وليس خراب مثل حرب البسوس
تلك الحرب التى دامت عشرات السنين والتى كانت التسببه فيها امراة
وحواء التى خربت على ادم ووو الامثلة كثيرة هو انتم كده ليه؟؟؟؟؟
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
| Quote: والله سمعتها بأضاني دي بتقول لي واحدة أسنعي أوعك تعودي الراجل على الإعتذار حتى لو كنت غلطانة , خليه هو يعتذر , ما تكسري ليه نفسك ولا تهيني كرامتك ,, وكان ما اعتذر أفتحي ليه يوم يومين بجيك جاري |
عواطف ازيييك
تفتح ليهو يوم يومين ده ما الهجر ظااااتو
الاية اتغيرت وللا شنو ؟!!
اتوقع اغنية بنات جديدة لتعليم العروس :
يا جوهر هجر المضاجع
روحي معاهو وافتحيلا
منعم
منعم
| |
|
|
|
|
|
|
|
|
 Re: خرابة البيوت ... وصفات سحرية لنتائج عكسية !!! (Re: bayan)
|
د.بيان !!!
معزتي ياغالية ,,,
شكرا على دخولك الظريف والله كل ما قلتيه مرينا بيه ولا البتقولي ليها ما بقدر أطلع وأبو فلان معاه ضيوف طوالي تنط وتقول ليك عشان كدة طالع ليك فوق راسك ولا التقولي ليها عايزة أشتري هدايا لأهله قبل أهلي تقوم تقول ليك وهو لمن يسافر قاعد يعمل كدة ولا بتذكر أهلك غايتو جنس تحشر بين البصلة وقشرتها واحدة صاحبتي عرست ود خالتها أخت أمها وتصدقي أمها لحقتها في المطار عشان تقول ليها ما تقولي ود خالتي الراجل زي السكينة المتلبباها فوق صدرك لو إنقلبت شمال تجرحك ولو إنقلبت يمين تجرحك عشان كدة أعملي حسابك صاحبتي ملعونة قالت لي أنا كنت مستعجلة عايزة أركب الطيارة بقيت أسمع بي هنا وأفضي بي هنا عشان تعبت من الوصايا خالاتي ما قصرن وعماتي ما قصرن كمان جات أمي في الاخر عشان تكمل الناقصة ,, شكرا بيان على إطرائك على البوستات دة من ذوقك يا جميل ,,
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
الأخت الحبيبة
عواطف
اوائل عهدى بالزواج, اوصتنى صديقة لأمى
ساخرة لطيفة.. و قالت تنصحنى
"بس اوعك من الغسيل و المكوة, اوعا تعوديهو"
و واصلت قصتها قائلة,
"بس يومو اليقول ليك اكوى, شوفى اسمح قميص عندو
و احرقى ليهو.. و بعدين رمى الدميعات"
و واصلت
"انا حسة على (زوجها) بيكوى براهة"
و صمتت قليلا, ثم قالت
"و الله لحدى تيابى بيكويهم"
موضوع جميل
كل المحية
غادة
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
Dear Awatif
Do you know who is the real relationships destroyers in USA ?the are the lawyers , you see all these ads on TV and the walls of streets for very cheap prices for Divorce e.g
Divorce today on sale for only 200 $ ,so whoever is thinking about divorce will do it when it is on sale !
| |
|
|
|
|
|
|
|
|
 Re: خرابة البيوت ... وصفات سحرية لنتائج عكسية !!! (Re: Sosan Abdullah)
|
سوزان الجميلة !!!
نورت البوست ,,,
لكن ما ضحتكيني يا بت أمي عاد رخصة السواد والرماد طبعا كنت عايزة أرد عليك بالإنجليزي لكن بس
قولي لي السواد والرماد ديل أقولن ليك كيفن ,, والله الحمد لله الحكاية دي ما بقت عندنا كان تلقي
الشقق فاضية هنا عاد كان شفتي العايزة الطلاق يعذبوها عذاب الله أكبر عشرة سنين في المحاكم لامن
تغير رايها ولا عزاء للسيدات . شكرا على مرورك .
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
عواطف ...
كالعادة مواضيعك وايد وايد واقعية .. شفتي كيف...
خرابة البيوت المحلية ربما مقدور عليها لدرجة ما اما الذي اشارت اليه بيان فامر شاق ولي علم بتجربة عايشتها لظرف ما فعرفت تفاصيلها .. فلقد ساهم "جهل" في الزوجة التي توجهت من السنة النهائية في الثانوي الي زوجها في عمق ولاية امريكية في انفصال بعد عقود جاوزت الثلاث واولاد كبار.. الزوج جاد ومثابر ومتميز في علمه وحياته ومحبوب اجتماعيا ومهتم بها وايجاد ما يمفيهم من مال ياخذ كل يومه ورغم ذلك يجاهد لايفاء احتياجاتها .. والخالة هنا بعض من اهلها وطلبات لا تنته واسوء من ذلك وصايا زي بتاعة الخالة فوق في سرد عواطف الشيق ...ثم اتو هؤلاء بتاعين بيان .. فوفق معاييرهم فهي حتي ولو كانت "مستتة" في بيتها لا يجب ان تؤدي اي من الاعمال الشاقة حتي ولو " شوية غسيل ومكوة " وان نصف دخله هو من حقها وانها هي التي اتت اليه بالشهادات من ماستر وديكتورا حيث انها زوجته التي ترعاه ...صارت الحكاية تعشعش في دماغها وصاحبنا قلبو رهيف علي الاولاد وهات يا صبر ويا صرف وكمان كل حساباتو في البنوك مشتركة والكرديت كاردز مشتركة وهي التي تسحب لخالاتها فلقد كثرت الخالات وبنات الاخوات وووووووو.. وهات ياتعبئة ادمغة الاولاد بان مرتب الوالد هو بتاعهم وليس له حق التصرف فيه وصاحبنا يعك .. والبيت المرهون هناك في امريكا برضو هو يدفع وهي شريكة نص بالنص وخالات وبنات اخوات يسكنن فيهو ...وقام صاحبنا بعلاقاتو وجد ليها وظيفة محترمة في اخر العمر في منظمة عالمية زيها زيو ولكن فلوسها ما نص بالنص حقتو بس النص ...والجنيات يجرو بكرديت كاردز المدام وسيارات شكل وووو هو يعك ...ثم وصل الامر الي انها بحكم وظيفتها التي اوجدها لها وجماعات الفيمنست خلقت ليهو ارهاب شديد فقام خلي البلد الهي فيه وتنازل عن وظيفتو ومشي بلدا غير ووظيفة اقل ولكن برضو هناك .. وقرر الطلاق ... ورفضت الورقة لانها من البلد وهي ولا منظماتها تعترف بيهاوالمنظمات وراهو والمحاميين وووو واهو صاحبنا ما زال في كبد ...ودة كلو من خالات محليات وخالات افرنجيات .... والله يعينو .....
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: abubakr)
|
أستاذة / عواطف .. جمعة وكل جمعة ، تأتينا بقضية أو مشكلة إجتماعية
وما أكثر مشاكلنا الإجتماعية ، بس نقول يا لطيف !!
.. عواطف لحدى الآن إنتى فى السليم .. وكل جمعة نقول أستر يارب من قضايانا
( المتلتلة ) .. تناول واقعنا يحتاج الى جرأة لأن هناك الكثير المسكوت
عنه أو الذى نتحاشى إثارته لسبب أو لآخر .. .. تماما نحن فى حاجة لإثارة
كل ما هو معيب ومشين خاصة ما يحدث فى بلاد الغربة من سلوكيات تحسب علينا
فى كل يوم ... شكرا .. شكرا ... عواطف .... وتحيتى
محمد مختار جعفر
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
عواطف...
سلامات
اكيد ...غربتنا بالتحديد مليئة بخرابات البيوت
المشكلة ...الزنزنة ...والدندنة لايمكن محاصرتها..لو الزوجة
فاتحة اضنيها...
في نوعيات كده اجارَك الله....ولاية ..ولايتبن..مافي فائدة ..الا ترحل
اتمني ان تمري علي البوست ده
نحب نعشق وتبقي الصداقة فرابة ونكسب الودين ثُم
وتسلمي
معتصم العربي
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: Habib_bldo)
|
أخي حبيب !!!
كيفك يا الحبيب ,,,
أولا شكرا هلى مرورك الرائع ,, ثانيا شكرا على هذه الإضافة الجميلة وأنا بصراحة أعتبر منطقتكم دايما
سابقة لعصرها وهذا شيء جميل ولكن أن تظل هذه المسرحية طيلة هذه السنوات فهذا يدل على قيمتها
الإحتماعية ومستوى الوعي في هذه المنطقة التي تحرص على اجتثاث كل الآفات الإجتماعية ,,
مرة أخرى لك الشكر الجزيل .
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
اهايا عواطف .. "رقم" وتقولي البربري قال ؟؟ دي فاتتني كيف .؟. اها كالعادة شيال الاسية "النظر" مع اني بلبس نطارات من عمري 5 سنوات وشفت حاجات كتار بس "رقم" دي فاتتني كيف ؟ شكرا يامحمود ( الصورة ) ما خساني لو هي ما صورتك وانت مستلفة منو وغاشيهو بحتة شكولاتة ( ما افتكر دة الاكلة المفضلة بتاعتو "لحم راس " )
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
عطوفة..
التحية ليك و لكل زوار البوست اللذيذ و العامر بكل ماهو واقعي و مُعاش كالعادة.
عجبني كلامك و عجبني كلام بيان..و عجبتني النصيحة الأدوها ل غادة أريتني لو لميت فيها من زمان..ما كنت فضٌلت للممكون جلابية و لا قميص ما تركت فيهو آثاري!!!
و بالمناسبة دي أهديكم نصيحة غالية سمعتها من حبوبتي الله يرحمها و يُحسن إليها لمن حكو ليها عن واحدة بتمشي للفقرا و الدجالين عشان يعملوا ليها عرق المحبة ل راجلها..
قالت لينا : يا بناتي...فكيٌ كل واحدة في راسها...
و الريد الدايم..ما بيجيبنٌو العزايم*!
-----------------
* عزايم...يعني محايات و كتابات و كواديك!!
| |
|
|
|
|
|
|
|
|
 Re: خرابة البيوت ... وصفات سحرية لنتائج عكسية !!! (Re: نهال الطيب)
|
د. نهال !!!
ياوش السعد ,, يا راحة البال ,,,
مودتي ,,,
عارفة المنبر دة مدرسة ونتمنى أن تجدن فيه ما يفيدكن في حياتكن القادمة ,,, شكرا على العبور .
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: خالدة البدوي)
|
د. خالدة !!!
لك من الحب أصدقه ,,, ومن الشوق أعظمه ,,,
بتصدقي يا خالدة ما زالت هناك فئة من الناس تعشق تدمير الآخرين بصورة أو بأخرى ولا أدري ما هو الهدف
من ذلك ,,, وزي ما قلت يا في الحبس مظاليم ,, شكرا خلودة ..
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: هاشم أحمد خلف الله)
|
هشومي !!!
مودتي ,,,
وينك تئبر ألبي ! والله أن كنت عايزة أتصل فيك وأقول ليك فاقدنك لكن المؤتمرات الكتيرة ومسيخة دي
نعمل ليها شنو؟ بكرة عندي ليكم جنس شمار جايباه من مؤتمر حرية الإعلام في الأمارات غايتو جهزو حالكم
واستعدو للشمار .
هشا شكرا لكلماتك الرقيقة رقة مشاعرك تحياتي لك وللست الجميلة صاحبة المملكة والحاكمة بأمرها
وللأولاد . قول للبنات ما يكسرن العدة .
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
صدقتها ومستودع سرها
كانت دائما ما تنصحها ان لا تهاون بل بالهاون ( ايد الفندك)
وصرة الوش
والصرامة عشان الرجال ديل ص ..... ما معروف جابو التعريف ده من ياتو اسكافي
ساءت العلاقة بينها وبين زوجها لح كبير
فجاة اختفت صديقتها وانقطعت اتصالاتها
وجاها الخبر شايلوا النسيم
ان زوجها تزوج
صديقتها
نجرتها هسة يا عواطف بس ممكن تحصل
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: د.محمد حسن)
|
من واقع تجربتي الشخصية وتجارب الأصدقاء
يا أستاذة عواطف : ما بخرب البيت إلا صاحبته!!
والغيرة المرضية التي تصل درجة الاصرار على مباراتك
حتى لو ماشي لعقد ... أو مفاجأتك تاني يوم أو في نفس الطيارة
وأنت ماشي في مهمة رسمية للخارج ... !!!
أصلو ده عرس ولا موت !!!!!!!!!!
| |
|
|
|
|
|
|
|
|
 Re: خرابة البيوت ... وصفات سحرية لنتائج عكسية !!! (Re: فاروق حامد محمد)
|
روءة !!!
ليك وحشة ,,,
وينك يا ريال ؟؟ طبعا الغيرة الزايدة عن حدها دي بتجيب خبر الزوجة وزي ما بقولو من الحب ما قتل
بعرف واحد صاحبنا رسل مرتو السودان للولادة قامت واحدة قالت ليها سجمك خلتيه هناك براه يسرح ويمرح
قامت تالت يوم لولاتها ركبت الطيارة وجات ولمن كلمتو بالسبب رجعها نهائي أيه رأيك ؟
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
الأخت العزيزة عواطف
حسبك مني لك التحايا العطرات وبعد
بعض من اللآئي دمرن حياتهن برعونتهن إستمرأن أن يحطمن الحياة الزوجية الهانئة للأخريات المستقرات والسعيدات في حياتهن ، لا لشيء إلا لتراكمات وترسبات في أنفسهن من سوء فعل أيديهن فتولدت الرغبة في تحطيم حياة الأخريات السعيدات فمثلهن لا يقربن من هن تعيسات أو من هُدمت بيوتهن لأنهن ليس المراد أو المبتغى .. مثلهن لا يسعدن بإستمرارية حياة من هن سعيدات فيعملن بأيديهن وأرجلهن لإحالة العمار إلى خراب وهن بنسجن قصص أو بذرن الشكوك أويقمن بعمل مقارنات بين الأزواج ربما هم في سعة وذلك لزرع الحسد والغيرة المرضية والبغضاء فيتحقق لهن إحالة الدور العامرة إلى خرائب لتلحق بهن من كن السبب في هدم حياتها ولكن المؤسف أن الأخرى المستهدفة أيضاً تخطيء حينما تعير أذتها لمثل تينك الموتورات من شذاذالآفاق .. أختي دعيني أخاطبهن: لماذا أعطينا العقل ؟ أليس لأن نفكر به ؟!!
الحياة الزوجية لها أيضاً من الخصوصية ما يجب على الزوجين الواعيين أن ببعدا عنها التدخلات حتى من أقرب الأقارب كالوالدين ، لأنهما هما الأقدر على حل أي سوء فهم أو إختلاف أو حتى خلاف ، هذه مؤسسة تشارك فيها الإثنان وربما نتج عنها شركاء أخرين كالأولاد الذين يجب أن نحفظ أمنهم وأمانهم ومستقبلهم.. ويجب أن يكون القرار بيد الأثنان دون تدخل أو تأثير من جهة ثالثة.
الحب .. العشرة .. التفاهم .. سعة الصدر .. تقبل النقد الإيجابي .. توصيل كل منهما الرسالة التي يريدها للآخر وفق مهايير المودة والرحمة والإنسانية .. عندما تتحصن مؤسسة الزوجية بالحب والوئام يصعب على أي آخر، أياً كان هذا الآخر أن يخترقها أو يدمرها.
الإختلاط بين النساء والذي يتعدى الحدود المعقولة ويصل إلى أدق دقائق الحياة الزوجية إلى حد ما يتم في غرفة النوم، سمعت عن قصص وعبارات يستحي الرجال من سماعها، إنه ربما جهل بحدود الصداقات وما يجب أن تكون عليه وهكذا تلغي حدود الإحترام المتبادل ويتم كسر الحواجز أيضاً وهذه بعض من المسببات.
أستغرب أيضاً أن تكون الزوجة متعلمة ومثقفة وتنقاد إلى من هي دونها بالتفكير والثقافة والعلم وكأنها مسلوبة الإرادة ليس هذا فحسب فلربما أيضاً قادتها إلى الدجالين والمشعوذين الذين يدعون علم الغيب .. نسمع عن قصص تحط من كرامة وإنسانية المرأة ، المسألة تحتاج إلى توعية المرأة من أختها التي تعمل في المجال الخيري والإرشادي والإعلامي ها أنت تفعلين الآن بطرح الموضوع وهذا جيد بحد ذاته وليته يتطور لمؤسسة من مؤسسات العمل المدني الطوعي لبحث وتسوية المشكلات الزوجية.
وأورد لك حديث إعرابية لعلنا نتعلم منها عبرة: كان لعمران بن حّطان زوج جميلة ، وكان هو قصيراً دميماً ، فقالت له ذات يوم: أعلم أنيّ وأياك في الجنة . قال ، كيف ؟ قالت لأنك أُعطيت مثلي فشكرت ، وأنا بُليت بمثلك فصبرتُ ، والصابر والشاكر في الجنة.
هذه الإعرابية لم تسمح لأخرى أن تهدم حياتها بأن تعيب لها زوجها الدميم ، فإن كانت قد سمعت فيه من أخرى وقبلت منها لأنهدّ بيتها حينها ولم تعد قصتها أثراً من سلف أو تصبح قدوة يتناول للخلف.
موضوع هام يا عواطف .. ليتنا نتعلم كيف نصون قدسية وخصوصية الحياة الزوجية .. أحسنت
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: ابوبكر يوسف إبراهيم)
|
أخي العزيز أبو بكر !!!
أدام الله فضلك ,,,
لقد تفضلت علينا بالمفيد والموضوعي في هذا الموضوع الشائع الذي راح ضحيته أناس كثيرون نتيجة
لسماعهم لنصائح مدمرة فكل ما ذكرته صحيحا مليون في المية ونأمل أن تتعظ الأخريات فخراب البيوت
هواية تمارسها بعض النساء متعلمات وجاهلات نسأل الله السلامة ,,, شكرا د. يوسف لك منا ألف تحية .
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
عطوف حبيبى كيف انتى
بتصدقى انا على الاطلاق مابحمل صاحبه الوصفه السحرية دى اى مسؤليه عن خراب اى بيت المسؤله الاولى والاخيرة عن الخراب ده
هى صاحبه البيت العقلها خفيف والبتسمح للاخرين انهم يتدخلو فى امورا الخاصه لو لنتى دلوقتى عملتى احصائيه للبيوت التخربت
هتلقى انها اساسا ماكانت قايمه على اسس صحيحه ومنطقيه والاساس البيحكما ماكان موجود بمعنى انو الزواج عندو اشياء كتيره يجب انو يرتكز عليها وانا فى نظرى شايفه انهااشياء اساسيه ومهمة شديد ومن اهمها الصدق مع النفس لانو هو البيخليك تكون صادق مع الاخرين والجواك مايكون على الاطلاق بيختلف عن الظاهر بتاعك والاختيار برضو بجانب القلب لازم يتاسس على اوسس عقلانيه ومن اول يوم لازم يكون الوضوح حتى فى اصغر الاشياء فى الحاله دى لو الدنيا دى كلها جات نقت ليكى فى راسك اى كان الزول النقناق ده مابشتغلى بيهم لانو الامور كلها انتى فى الصوره فيها من البدايه والعلاقه بينك وبين الطرف التانى بتكون من المتانه البتديها القوة وبتحميها من اى وصفات سحرية.
لكن للاسف الشديد كتير من الناس اختيارتم مابتكون مبين على الاساس الصحيح علشان كده بتلقى انهم عرضه للسقوط فى اول اختيار يمر بيهم ويكون مرتع خصب للوصفات السحريه وبعد ماالفاس تقع فى الراس الحاجه الغربيه انها هى ذاتا بتبقى خرابه بيوت
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
وين يا عواطف مشتاقييييييييييييييييين
| Quote: تعرف كيف تصطاد في الماء العكر |
دي في نسوان مليون في المية وبابصم بالعشرة لاقوني ذيهم.....والله يا عطوفة بأعاين ليهم عشرة
عشرة...ولو عليّ ذي ديل يتمسحوا من الخريطة لكن نعمل شنو...أدي الله وأدي حكمته.....واسمهم
جزء من المجتمع....نمشي منهم وين.... بس نتحاشاهم بقدر الامكان
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: salma subhi)
|
سلوم !!!
أنا أيضا مشتاقة وبي لوعة ولكن مثلي لا يذاع له سر ,,, كنت مسافرة يا سلمى ,, تسلمي ,,,
بتصدقي يا سلمى بعرف واحدة عاملة مستشارة قانونية للنسوان القاعدات في البيوت ومن الصباح تقوم
تبراهم ليك الراجل كيت وكيت وأهله كيت وكيت يعني نصايح بالجملة وكلها ماشة في الآتجاه المعاكس
يعني خراب بيوت عديل كدة وهن المسكينات يصدقن عشان قاعدات في البيت بفتكرن الست اللي بتشتغل
بتكون فاهمة أكثر منهن وما عارفات الفهم قسم غايتو من زي ديلة وا أسفاي ,,, شكرا يا بعد عمري
على طلتك البهية .
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
صباح الخيرات يا عطوفى يا الأحلى من "التوفى"
معليش أنا يا دوووووووووبى قريت الموضوع دة ،، و لأنو من عنوانو ذكرنى حاجات و تجارب مرت بى مع نوعيات من البشر عجييييبة و غريبة،، ما بيتعبهم شى و لا يكرهم أكتر من شوفة مرة و راجلها بيحبوا بعض و متفاهمين،،،طوالى يعملوا ليكى فيها قارشين الملحة و مقددينها و إنتى غبيانة و مسلمة رقبتك لى واحد ساكت "كان لقة فرصة" بيخون و يعمل و يسوى !!!
يعنى فى واحدة و بناتها قدرى و أكبر منى و بعرفهم بالسنين الطويلة ،، ديل بس كل وصاياهم : دسى قروش من راجلك ،، أفتحى حساب فى البنك براكي من وراهو،،، ما تخليهو يحول قروش لى أهلو ،،،، خليهو يبنى بيت لى أهلك ،،، ما "تنهرشى" ليهو!!
و هن بعيد عنك مشاكلن مع رجالن مالية الحلة،، و لمن يشوفن راجلى هاك يا "الكبكبة و الهزار و الضحك ،، التكنو صاحبن و "ود خالن" !!
لكن قالو "ما توصى حريص" ، موش كدة؟؟؟
المهم النسوان يكونن مفتحات لهذه النوعيات "الحيزبونية" و ما يدوهن أضان و يعملن "أضان جلد" زى ما بيقولو ...
لكى التوفيق و يخلي ليكم عيالكم
| |
|
|
|
|
|
|
|
|
 Re: خرابة البيوت ... وصفات سحرية لنتائج عكسية !!! (Re: نوسة)
|
نوسة !!!
معزتي يا حبيبة ,,,
والله صدقتي في كل ما قلت وفي الحقيقة النوعية دي لمن يخربن البيت يقيفن بعيد يتفرجن وكأنهن ما عملن
حاجة شفتي اللعب كيف الله يكفي الناس شرهن ,,,, وزي ما قلتي الواعي مابوصو وإنت إنسانة واعية بدون
شك ,, تحياتي .
| |
|
|
|
|
|
|
|
|
|
Re: خرابة البيوت ... وصفات سحرية لنتائج عكسية !!! (Re: عواطف ادريس اسماعيل)
|
أخت عواطف لك التحيه والتقدير
الموضوع كالعاده جميل وومتع ومفيد جداً
المره الواعيه والفالحه مابتحكي مشاكلها الزوجيه ولاحتى لي أقرب الأقربين لأن المشاكل الزوجيه مكانها الأمثل هو غرفة النوم المغلقه حتى الأبناء لايجب أن يشعروا أوحتى يحسوا أنه توجد مشاكل بين والديهم ...
هناك الكثير من النساء تعشق خريب البيوت فقط لتظل هي الأفضل والأحسن والجميع حياتهم فاشله وممزقه والله يكفي الجميع شر خرابات البيوت ..
ولك من الود مؤونة عشرة أعوام
| |
|
|
|
|
|
|
| |
عواطف ادريس اسماعيل
waleed500
عبد المنعم سليمان
عفاف أبو حريرة
bayan
غادة عبدالعزيز خالد
abubakr
محمد مختار جعفر
معتصم عبدالرحيم
Mahmoud Mustafa Mahmoud
Habib_bldo
فدوى الشريف
-1.jpg)
معاوية الطيب
mamkouna
نهال الطيب
خالدة البدوي
هاشم أحمد خلف الله
د.محمد حسن
فاروق حامد محمد
ismeil abbas
ماجدة عوض خوجلى
salma subhi
نوسة
محمد فرح
حبيب نورة
فيس بوك
تويتر
انستقرام
يوتيوب
بنتيريست