دعواتكم لزميلنا المفكر د.الباقر العفيف بالشفاء العاجل
|
|
 جهاز المغتربين وما أدراكما جهاز المغتربين
|
08:00 AM Nov, 01 2015
سودانيز اون لاين
عواطف ادريس اسماعيل-ابوظبي
مكتبتى فى سودانيزاونلاين
السلام عليكم يا أمة الأمجاد والماضي العريق جدا
يا أيها الناس ... يا معشر القوم ....
من أراد أن تثكله أمه ويترحم عليه أبوه فليتبعني إلى جهاز المغتربين ... ومن طلب الشعور بالضياع .. وذهاب المال والمتاع فليقصد جهاز المغتربين
ومن أراد الإفلاس الما منه خلاص فعليه بجهاز المغتربين .. أما من أراد الإستماع إلي جميع اللهجات ، والتماهي مع الآهات والأنات فليس له سوى
جهاز المغتربين ، ومن كان يبحث عن رفيق ضاع منه في الطريق ، سيجده بدون نشاف ريق في جهاز المغتربين .. ومن دارت به الدوائر
وما عنده تيلة فأراد أن يعمل من الحد حيلة فلييمم وجه شطر جهاز المغتربين .. ومن أراد الطواف بدون حج ، والاستشهاد بدون تدافع بين عرفات ومني
لن يجد ذلك إلا في جهاز المغتربين .. ومن طلب مشهدا دراماتيكيا حيث يجد خيمة كبيييييرة للعزاء بدون ضلع وكفت ومحاشي أو حتي ميت
يترحم عليه فليس أمامه شيء سوى خيمة المغتربين حيث يجلس الناس وكأن على رؤؤسهم الطير .. حزانى وما هم بحزاني ، سكارى
وما هم بسكارى (ما بسكر من الخمر ولا من صوتك القمري) .. ومن أراد أن يتذوق مرارة الشعور بالضياع ، والإبحار بلا شراع فليقف
في صفوف جهاز المغتربين ...
هذا الجهاز الذي لا يشبه شيء سوى أجهزة أمن الدولة في الدول العميقة مثل ما يقولون من برة هلا هلا ومن جوة يعلم الله
يبهرك من الخارج ويؤذي مشاعرك وجيبك وأحاسيسك لو ظلت لديك أحاسيس قبل أن تدخل في دهاليزه ، وتتوه في ممراته
التي تشبه شبكة العنكبوت حتي تصل إلى شبابيكه التي لا تشيه سوى شابيك سجن جوانتانامو المشؤوم .. أين تذهب فلوس
هذا الجهاز الذي لا يحتاج إلى ترميم من الداخل بل إلى إعادة صياغة كاملة بما فيه ، ومن فيه ...
أخيرا وبعد ساعة من اللف والدوران ، والسؤال ، وكشف الحال (لا تجد أي إجابة من أي حد حتى موظفي الجهاز)
أخيرا وصلت الصف الطويل الذي لا يشبه سوى صف رغيف في بلد يعاني سكانها من مجاعة أزلية ..
خلال وجودي في هذا الصف الطويل سمعت حكايات ، وروايات ، ورأيت مشاهد لم تخطر علي قلب بشر .. إقترب دوري ...
كانت تقف أمامي إبنة زميلنا الصحفي المخضرم يسري عبداللطيف حيث دار بينها وبين موظفة الجهاز الحوار التالي
شغالة ليك كم سنة ؟
تمانية شهور ...
من شهر كم يعني ؟
شهر واحد ...
قبل كدة إقامتك كانت علي منو ؟ (طبعا تمانية شهور دي ما عجبتها)
كانت علي بابا .. نظرت إليها باستغراب وإلى رفيقاتها القابعات خلف أجهزة الكمبيوتر (كلمة بابا برضه ما عجبتها)
طيب إنتي جبتي لشنو ؟
جيت أحضر خطوبتي ...
بالله ألف مبروك !!
إنتو عبداللاب ؟
أسقط في يد الصبية المسكينة التي لم تعرف معنى عبداللاب لأنها عاشت كجالية سودانية نجحت في طمس معالم الجهوية والقبلية ..
طيب بابا دة وينو ؟
قاعد هناك ...
خليه يجي عليك الله شوية ... (يمكن عايزة تفرتق الخطوبة)
أخيرا جاء دوري .. يالفرح .. يا للشباب والدعاء المستجاب
أها شغالة ليك كم سنة ؟
قبل أن أقولها ربع قرن يا ست الحبايب فاجأتني بالسؤال التاني
راتب كم ؟ وأخر ضريبة إلزامية دفعتيها متين ؟
راتبي ؟؟ ضريبة ؟؟؟ كله موجود عندك في الجهاز إنتو المعلومات دي ما بتحفظوها ليه
نظرت إلي شذرا مذرا ثم أعادت الجواز وهي ترمقني بنظرة ذات مغزى ثم قالت خلاص أمشي الدور الأول
تلقي واحدة هناك تقدر ليك الضريبة ، والخدمات .. والزكاة .. وضياع زمنا اللي ضيعتيه لينا
يا قطيمة ، يا لئيمة .. أطعت الأوامر لأول مرة في حياتي .. صعدت بخطي متثاقلة إلى الدور
الأول حيث توجد موظفتان تم اختيارهما بعناية لإنجاز هذه المهم الصعبة ..
أخذت الموظفة القاعدة في أول ترابيزة الجواز .. جمعت وطرحت ... ثم جمعت وطرحت
وما أدراكما كيف جمعت وطرحت بدون آلة حاسبة طبعا وقالت لي أنت عليك كذا ..
ولكن ممكن تدفعي لغاية كذا .. قلت لها بغباء ليس له مثيل .. جدا ... جدا ...
خرجت من الجهاز لا ألوي على شيء كالخارج من المولد بدون حمص وأنا
أردد يا ريت لو سمعت كلامك يا نادرة .. على فكرة نادرة دي صحبتي قالت لي
في واحد تديه مبلغ كذا بيجيب ليك الجواز مؤشر ، وتديه كذا تاني بوم بجيب ليك
الجواز الإلكتروني ، وتديه كذا قلت ليها ضاحكة حيختني في كرسي الرئاسة مش ؟
عموما أعتذر للإطالة وأتمنى السماح لو تأخرت في الرد (مشغولة بقضايا مصيرية)
اتمنى لكم إجازة سعيدة وفتكم بعافية ...
|
|
 
|
|
|
|
|
|
|
 Re: جهاز المغتربين وما أدراكما جهاز المغتربي� (Re: الفاتح شلبي)
|
الاستاذه عواطف والمتداخلون سلام عليكم
شكراً لكي وصفك البليغ لهذا الجهاز المخيف الذي انهك كاهلنا مادياً ومعنوياً وجسدياً
قمة الفوضة والإذلال للمواطن السوداني في هذا الجهاز الذي يشبه بيوت الاشباح ذات مره سمعت احدى الموظفات بالجهاز تقول لزميلتها المغتربون ديل اتعبونا خالص متى نرتاح منهم !!
تخيلوا تقولهذا الكلام وهى تعلم ان راتبها يدفعه لها المغتربون ولو لا المغتربون لما وجدت هذه الوظيفة
متى يأتي الوقت الذي نسافر فيه من المطار مباشرة دون الرجوع الى جهاز المغتربون مثل كل دول العالم
| |
|
|
|
|
|
|
|
|
 Re: جهاز المغتربين وما أدراكما جهاز المغتربي� (Re: جمال الدين عبيد)
|
أخي العزيز جمال
كل الود
وأزيدك من الشعر بيت مرة من المرات في موظفة جايبة معاها أولادها الصغار يلعبوا في الكمبيوتر
علي أساس أن اليوم سيت فلما طال وقوفنا قلت لها ليس من المعقول أن نقف كل هذا الزمن عشان
خاطر أولادك يلعبوا قالت لو ما عجبكم أمشوا بكفي إني بداوم عشانكم في يوم الإجازة !!!
قلت ليها بتاخدي غيره ما عجبها الكلام ولكنها لاذت بالصمت ...
شكرا على الطلة
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: الفاتح شلبي)
|
استاذة عواطف
الف حمد على السلامة والمخارجة
تجربتى مع هذا الجهاز ذات شجون..
من تلاتة سنة تقريبا وللعلم انا بسافر مرات فى السنة مرتين.. المهم من تلاتة سنة اشار لى صديق (زى نادرة ) كدة
وقال لي مااالك ومال الازعاج الوكلات البرة البره الصغار صغار ديلك لو شفتيهم
شغالات فيهم البنات العندهم ينوفورم وحايامات جوه المغتربين اكتر من المغتربيين
شوف اى واحدة واديها جوازك وتعال ليها بعد ساعتين استلم الجواز مؤشر
ومن ديك انا شغال كدة
جوه ذاااااتو ما بدخل لا اشوفهم ولا يشوفوني
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: عواطف ادريس اسماعيل)
|
الاستاذه عواطف والمتداخلون سلام عليكم جميعا
انت يا طوفي ليك 25 سنة اغتراب - يعني لحدى هسه ما نقشتي فنون مراجعة هذا الجهاز؟
اخوك لما يمشي بتلهم ليك رواكيب الجكس اللابس الازياء الخاصة جوار مبنى الجهاز ديل هم طبعا Licensees بلغة القانونيين .
بقوم اول حاجة بعمل scanning سريع لكل الرواكيب لحدى عيني تقع ليك في اكثرهن حسنا و بهاءا و ألقا ، و طوالي بسلمها ليك الجواز بدون الاتفاق معاها على مبلغ الاتعاب و بشيل منها رقم موبايلها . ديل اصلا ارقام موبايلاتن مفروشة في الصقيعة لخدمة العملاء .
اها بعد داك بتلهم ليك الكافتيريا فطور ثم حاجة باردة ثم وتسبة وفسبسة لحدي تجيني الامورة وهي قد انجزت المهمة بنجاح .
قالت شبابيك قالت .
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: الطيب شيقوق)
|
الأستاذة عواطف
بعيد عن بهدلة جهاز المغتربين و حركات شيقوق الجنية دي اقول ليك حمدا لله على السلامة و الله استمتعت بسردك الساخر الجميل المعبّر.ما كنت مخلي بالي من كتاباتك قبل كده يا خسارة، ما عندي حظ.
أما بخصوص نصائح ود شيقوق (الجنيّة) دي ياها id البتمرقنا تاني من ناس الجهاز ده و زبانيته و قطامة موظفاته و لآمتن( من دُقنه و فتّلّه) و نحن نستعيذ منهم: اللهم نجعلك في نحورهم و نعوذ بك من شرورهم.
و التحية للجميع
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: الطيب عباس)
|
محمد عبد الله ود الحسين
| Quote: أما بخصوص نصائح ود شيقوق (الجنيّة) دي ياها id البتمرقنا تاني من ناس الجهاز ده و زبانيته و قطامة موظفاته |
يا ود الحسين - المغتربون ديل فيهم عيب كبير خلاص - الواحد لما يمشي الجهاز فاكر الحاجات ساهلة زي بلدان الخليج حيث الشفافية راقدة حتى التاكسي من لحظة اندرعت فيهو يبدأ فيك تنقط بالعداد مش كوار ساي .
بعدين المغتربون ذاتم نقناقين خلاص الواحد مما يجي دورو في الشباك اكان البنية المسكينة بتتجغم ليها في ساندوش ساي ما بخلوها تكملو .
ود عباس قال الموبايل ضاع منو - اها خم و صر
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: عواطف ادريس اسماعيل)
|
أستاذة عواطف
أول مرة الواحد يقرأ في مأساة وهو مبسوط
غايتو أنا كان من ناس الحكومة ديل أدفع ليك قروش عشان تكتبي عن مشاكل الناس
لأنو بالطريقة دي زول حيزعل من الحكومة مافي
الواحد بقى يرسل أم العيال والعيال بس يمشوا السودان
ويدخلوا ويطلعوا من جهاز المغتربين بدون أي مصروفات زائدة
وبعد كم سنة الواحد ينزل ويتلهم (كما يقول ود شيقوق) لابسات اليونيفورم
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: جعفر محي الدين)
|
** أُستاذه عواطف..
** سلام ومساءك خير..
**ماهو مُقابل مايدفعه المُغترب ؟؟؟
ألا يكفى أن المعترب وفر مكاناً لكى يتعين فيه غيره... وفر بنزيناً ومواد تموينيه لشخص آخر ... وفر مكاناً ليتعالج غيره .. يُعيل أكثر من اُسره بالداخل ...
يتحمل مساهمات أُخرى إجتماعيه فى مكان غُربته ...عليه إلتزامات فى غربته تتعلق بمعيشته .... للأسف افقر دوله فى آسيا (بنغالديش) جواز رعاياها لمدة 10 سنوات ولاتوجد تأشيرة (خروج ) من بلدهم يسافرون الخميس ويعودون مساء السبت ... السودان هو لدوله الوحيده فى العالم التى تفرض على رعاياها :- تأشيرة خروج من بلدهم !!!!! وعـــــجـــبــــى !!!!
| |
|
|
|
|
|
|
|
|
 Re: جهاز المغتربين وما أدراكما جهاز المغتربي� (Re: جعفر محي الدين)
|
ود محي الدين ... ياخي سلامات والله منور البوست ..
عارف الناس ديل دواهم بس ترسلوا الحريم والعيال وتقعدوا تتفرجو عليهم وهم بيموتوا بغيظهم
إنت ممكن تدفع لي عشان أكتب لكن هم حيشيلوا مني عشان ما أكتب يعني كتبت شايلين ما كتبت شايلين
عشان كدة يا أخوي شاورت عقلي وقلت لنفسي إذا لم يكن من الموت بد فمن العجز أن تموت جبانا
غايتو المرة الجاية جوازي حيدخل وما حيخرخ عليكم الله كلم ناس الشغل يرسلو لي شغلي بالفاكس
عشان الإنترنت ما بكون موجود الكهربا حتكون قاطعة
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: عواطف ادريس اسماعيل)
|
آخر مرة دخلت الجهاز قبل شهرين ..
باصرت للدخول لمسئول أشرح له مشكلتي ،
نبهني السكرتير أن المسئول خارج المكتب وعلي بالحضور غد ..
قبل أن ابرح مكاني خرج من مكتبه زميل سابق ..
هممت بتجاوزه خلسة لما أعلمه عنه من انتهازية ووضاعة كانت محصلتها أنه فارقنا مفصولا بسبب حالة اخلاقية
اندهشت عندما تقدم الي ومد يده الي سائلا . هل من خدمة نقدمه الك ..
سألته بنفس الدهشة -وأنا أعلم نه لا يحمل غير شهادة سودانية- : هل تعمل في هذا المكتب ..
أجاب : لا ، بل في مكتب الشيخ .. ويقصد (الحاج).
فعلمت أنها بايظة من كبارها..
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: عمر التاج)
|
سلام وتحية استاذة عواطف ..
يجب على القائمين على امر الجهاز البحث بجدية عن مخرج لا يربط السفر بوجوب الدفع
هذا اسعباد واستغلال بشع ..
ياخي انا يمكن عايز اسافر السودان الخميس وارجع الجمعة .. من حقي ياخ
من المطار للبيت للمطار
يحلوها كيف دي ؟؟؟
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: Dr. Ahmed Amin)
|
مساء الخير
جهاز المغتربين لن يكون لخدمة المغتريبن مالم يكون على رئاسته مغترب سابق ومجلس ادارته مغتربين سابقين
ويكون شرط من شروط تقلد هذه المناصب ان يكون شاغره مغترب سوداني سابق لا تقل فترة اغترابه عن عشر سنوات
وما اكثر الكفاءات التي تتمتع بهذه الشروط
ودا حق طبيعي للمغتربين ان يقوم بامرهم مغتربين مثلهم يعلمون كل كبيرة وصغيرة عن الاغتراب
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: Dr. Ahmed Amin)
|
التحيه استاذه / عواطف
جهاز المغتربين ومكاتب السفارات السودانيه هذه المكاتب تم عملها لخدمة المغتربين ولكن تغير الهدف الرئيسي لهدف اخر وهي تحصيل الضرايب والرسوم
سفارتنا بالرياض من اضعف السفارات ولا تحل اي مشكله لاي مغترب وقد شاهدت بنفسي احد المغتربين جا مظلوم للسفارة فقال له الموظف هذه مشكله خاصه مع كفيلك ارجو حلها بعيد عن السفارة
| |
|
|
|
|
|
|
|
|
 Re: جهاز المغتربين وما أدراكما جهاز المغتربي� (Re: عمر التاج)
|
مساء الخير أخي عمر
عارف الجهاز دة بالنسبة لبعض المسؤولين البيضة التي تبيض ذهبا
لذلك يعين فيه أبناء البطة البيضا وامغتربون هم البقرة الحلوب
أنصح أي شخص لو وجد فرصة يبتعد من هذا الجهاز فليفعل
هذا الجهاز فريد من نوعه لا أدري من هو مكتشفه ؟؟؟
| |
|
|
|
|
|
|
|
|
|
Re: جهاز المغتربين وما أدراكما جهاز المغتربي� (Re: عواطف ادريس اسماعيل)
|
التحيه استاذه / عواطف
جهاز المغتربين ومكاتب السفارات السودانيه هذه المكاتب تم عملها لخدمة المغتربين ولكن تغير الهدف الرئيسي لهدف اخر وهي تحصيل الضرايب والرسوم
سفارتنا بالرياض من اضعف السفارات ولا تحل اي مشكله لاي مغترب وقد شاهدت بنفسي احد المغتربين جا مظلوم للسفارة فقال له الموظف هذه مشكله خاصه مع كفيلك ارجو حلها بعيد عن السفارة
| |
|
|
|
|
|
|
| |
عواطف ادريس اسماعيل
ياسر منصور عثمان
محمد الأمين موسى
ابو جهينة
الفاتح شلبي
جمال الدين عبيد
هاشم عبدالله بشير
الطيب شيقوق
محمد عبد الله الحسين
الطيب عباس
جعفر محي الدين
عبدالكريم أحمد الامين
عمر التاج
Hatim Alhwary
Suhail Nasser
فيس بوك
تويتر
انستقرام
يوتيوب
بنتيريست