|
|
 الحفلة مدورة للصباح والعريس ما جا رايك شنو يا بكري ؟؟؟
|
يفترض أن يكون الزواج مصدر فرح وسعادة كان لأهل العريس ولا العروس لأنه عمل خير ويوفق راسين في الحلال
طبعا الكلام دة بنطبق على كل أمة محمد ما عدا نحنا السودانيين أول ما ولدنا يفتح خشمه ويقول عايز
فلانة.. ينعقد مؤتمر وطني في البيت والكل يدلي بدلوه مثلا أخته العانس تنط ليه أول واحدة وتقول ليه
إنت عملت شنو لناس البيت عشان تعرس من هسة ياخي بطل الأنانية وحب النفس وأبني بيتكم المكسر دة وما
كلنا قاعدين في زول فكر في العرس ؟ ( طبعا هي ما قاعدة بمزاجها القطر فاتها وعايزاه يفوته هو كمان
تقوم أمه علي حيلها بت فلانة لا لا لا دي أمها يوم بكا ناس فلان قالت فيني كلام ما يعلم بيه إلا الله والله
لو تموت ما بتعرس بتها وقبل أن يشيل العريس نفس تقوم أخته الصغيرة المفعوصة تقول ليه والله هي ذاتها
لا سمحة لا حاجة ... قصيرة ومكعبرة ومذدرية على الفاضي ... خالتو اللي صمتت دهرا ونطقت كفرا قالت
ليه العروس دي أبوها جعلي لكن حبوبتها ما بت بلد ( ما عارفين دي بلد منو؟ ملعون أبوكي بلد) ضربات
قلب العريس بدأت تسرع وقبل أن ياخد نفس نط أخوه العاطل عن العمل ياخي سهام منو البتعرسها دي أخوها
فاتح ليه أربعة مغالق خلال سنة واحدة ماعارفين القروش جابها من وين وكمان أنزيدك من الشعر بيت
أختها الوسطانية الشلق ديك قالو قبضوها في كشة ... حفلة رابة فيها كل الممنوعات بس هجمو عليهم
ناس بسط الأمن الشامل والأمر بالمعروف بالكوامر وبيتهم في الحراسة ( حرام عليكم ما تسيبو الخلق
لخالقهاوناس الأمر بالمعروف ديل خليهم يطبقوا الكلام دة على روحوهم ) بعد كل هذا الجدل البيزنطي
صرخ العريس بأعلى صوته ما العرس دة ذاتي خليتو شوفو ليكم موضع تاني .
عندي صديقة عزيزة أحبت شاب مهذبا وخلوقا زميلها في العمل وأنا كنت في ذلك الوقت في سنة ثانية
جامعة .. المهم أم العريس حلفت ستين يمين يا ولدها يعرس بت أختها يا تقطع .... عشان كدا أنا
بنصح المواليد الجدد عليكم بالبزازات عشان ما تقعوا في المأزق العجيب الذي لا تعرفه أي أمة سوى
أمة الأمجاد . صاحبنا الرقيق والجميل حاول مع أمه بكل السبل فتظاهرت بالإقتناع فهرول العريس المنتظر
إلى صديقتي ليقول لها حنجيكم يوم الخميس خلاص الحاجة وافقت ... صاحبتي ما صدقت جاتني طيران في
داخلية الجامعة .... أسمعي يا عواطف الأسبوع دة ما تمشي بيتكم تجينا من يوم الأربع يعني معليش
دكي يوم الخميس ما إنت أصلك في كلية الآداب لو غبت السنة كلها ما حيجرى حاجة قلت ليها أحسن حاجة
أصلو بكرة عندي محاضرة واحدة مع دكتور الواثق ( شاعر أمدرمان تحتضر) وأنا من يوم ما كتب القصيدة
دي أعلنت عليه الحرب ... المهم مشيت لصاحبتي من يوم الأربعاء وهاك يا تجهيز ... عصاير .. تورتات
شكولاتات أشكال وأنواع ... البيت لمعناهو خليناهو زي البيت الأبيض ... مشينا الكوفير .. قومنا
الدنيا وما خليناها تقعد وأهل العريس أدونا ذمبة كبيرة وما جوا وبعد الساعة إتناشر اتصل العريس
بصوت مبحوح معتذرا عشان والدته الحبيبة رفضت الحضور رفض بات وقصدت بهذا الفصل البايخ أن تذل أهل
العروس .
وأنا لسة في الجامعة في السنة الأخيرة ( غايتو حضرت ليكم جنس أحداث الله لا يوريكم ) عزمتني صديقة
طفولتي وزميلة دراستي قمر الطيب ربنا يديها الصحة زواج صديقة أختها وزميلتها في العمل ( واحدة
فاتها القطر وعايزة تحصلو بالقوة) مشينا الحفلة وكانت قاجة والفنانين أشكال وألوان الأكل حدث
ولا حرج يعني عرس ذي ما بقولو اللبنانيين متعوب عليه وأتاري كله كان من جيب العروسة .. معليش
استحملوني أطلت عليكم( طبعا الناس البحبو الشمارات حيقولو لي لا أطلتي ولا حاجة واصلي ) المهم
ياجماعة الخير الساعة 12 العروس جات براها من الكوفير بدون عريس وشها يلعن قفاها وقعدت المسكينة
سرحانة طول الوقت والماناقشين يرقصوا عربي وأفرنجي بعد شوية طلع أخوها وقال يا جماعة مازال الليل
طفل يحبو ( دي ما سمعت بيها الا عند أمة الأمجاد مليون سنة والليل طفل يحبو) والحفل مستمر .. بعد
شوية قال يا جماعة نأسف لعدم حضور العريس لتعرض موكبه لحادث حركة ( دة عريس ولا وزير ؟ ) المهم
يا أخوانا قعدنا في الحفلة لمن ا صبحت وجابو لينا شاي بليقمات والعريس ما جا .. قلت لقمر
صاحبتي يا أختي هوي الحكاية دي فيها إن قومي يلاكي ناخد لينا نومة وبعد داك أنا بمشي الداخلية
وفعلا مشينا ونمنا وقعدنا منتظرين نعرف الحصل شنو لغاية يوم السبت أختها مشت الشغل لقت العريس
قاعد في مكتبه قالت ليه كدا يا علي تعمل فينا مقلب قدر دة قال ليها والله مرتي كانت متابعة الموضوع
من أولو ولما شافتني لبست البدلة والكرفتة وعايز أطلع قفلت باب الغرفة بالمفتاح ومشت أهلها و
ماجات إلا الصباح وبعد كدة ما عندي وش أمشي ليهم خفت أخوانا يضربوني بالعكاكيز .. أخي في البورد
ماذا كنت ستفعل لو كنت العريس ؟؟أختي في البورد بعد الشر عليك ماذا ستفعلين لو كنت العروس ؟
إجابة صريحة وخليتكم بعافية !!!!.
|
|
 
|
|
|
|
|
|
|
 Re: الحفلة مدورة للصباح والعريس ما جا رايك شنو يا بكري ؟؟؟ (Re: بكرى ابوبكر)
|
أخي الحبيب والغالي جدا بكري
مرورك وثناؤك على البوستات أسعداني كثيرا وفي الحقيقة الشكر مش لينا إحنا بل لك عاطر الثناء لأنك
أنشأت واحة جميلة يلتقي فيها الأحباب على أختلاف مشاربهم تحت مظلتك ورعايتك الكريمة ... بصراحة
يا بكري نحن سعداء وفخورين جدا بشخصك وبنتمنى ليك كل خير ... بمناسبة لو كنت العريس بقول ليك
تبرى يا ودامي من ناس الأمن ديل أخير منهم عكاكيز أخوان العروس ... دقة وتفوت ولا حد يموت ... شكرا
سيد الحوش الكبير ... مودتي .
| |
|
|
|
|
|
|
|
|
 الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
الأخت / عواطف
سلام واحترام ،،،
لقيتك شمارك عجيب منتظره في الحفلة للصباح وبتشربي كمان في الشاي بالقيمات
انتو منتظرين العريس ولا منتظرين القطر
وبعدين صاحبتك دي عاوزه شنو براجل المرا ما تشوف ليها واحد تاني ما متزوج
ولا هي سمعت مقدماً باغنية راجل المرا حلو حلا
اقول راي اخونا بكري شنو سوف يجمد عضوية العريس والعروس والمعازيم كمان اعملي
حسابك واهربي وخلي شراب الشاي بالقيمات .
تقبلي تحياتي ،،،
أبو كريم
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
يا عواطق اهو بكري جاب الحل !! لحين النظر في امر الشعوب السودانية كخلق الله الاخريين .. يعني لحد الزمن البتختفي قيه من السودان اجهزة حماية السلطان وبيوت اشباح ؟؟ ولخد ذاك الوقت تبقي توصي صاحباتك وصحبات صحباتك انو هن يعملن بيوت اشباح خاصة لمثل هؤلاء حتي ميعاد العرس من بيوت الاشباح الي الكوشة واحسن علي طول الي الاوتيل او القطر او الطيارة او اللوري او اي حاجة يطفشو بيها ويقدرن علي الجنس الملاوع دة ...
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: رأفت ميلاد)
|
الأخت عواطف
تحياتي
والله انا زعلان منك , عارفة ليه كل مواضيعك بندخل فيها ونشارك لكن انتي الظاهر عليك بخيلة
بخيلة وكمان شمشارة والشممشرة من شيمة النساء لكن بيني وبينك كده مرات مرات بتكون لذيذة
والدليل علي كده , عندي الوالدة الله يطول في عمرها ويديها الصحة والعافية علاقتها مع زوجتي
قوية جدا ( ما بت اختها ) يوم اتصل عليها واسلم عليها واخد رضاها , تقول لي مرتك وينا
اقول ليها والله يمة انا في الشغل , يعني انا بتكلم معاك تقولي لي وينا مرتك ؟؟
تقول لي انت ما عندك شمارات دايرا بيك شنو ؟؟0
وانا لو كنت في مكان العريس كنت عملت السبعة وذمتها عشان اهرب من البيت هذا اذا كنت فعلا
مقتنع بالعروسة موش لو القطار فاتها انشاءالله لو الطيارة ذاتها فاتتها 0
وبرضو زعلان 0
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
الاستاذه عواطف
قبل ما أرد على سؤالك عاوز أؤؤكد على كلامك
| Quote: لكن في ناس بتكتب في السياسة وأنا بكره السياسة |
وانا من النوعية دى وفى ناس لجهالة ما فى عقولها بيعتبروا انو الواحد لازم يكتب فى السياسية وماشابه ذلك لكى يكون مفيدا فى البورد.
اما عن العريس فده لو انا واصلا كنت متزوج تانى يوم الصباح ح ابوس ايد زوجتى لانهاانقذتنى من دمار شامل ...
وليك التحية ،،،
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: celecon)
|
العزيز سيلكون
مودتي
والله بشكرك على الشعور المشترك وهو كراهية السياسة أي فن الكذب والنفاق والدمار والخراب والضحك
على الدقون ... أما إذا كنت العريس دي تخليني طوالي أقول ليك تبرى وتستبرا عارف ليه لأنه ماعنده
شخصية وكان طمعان في فلوسها ليس إلا ... يعني بصراحة هو عايزة واحدة تدلعو وتصرف عليه وعلى أولاده
وزوجته لو عرفت حكاية الصرف دي ما كان قفلته بالمفتاح .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
إخوتي إخواتي
صبحكم الله بالخير
إتصلت بي إحدى الأخوات هاتفيا لتطمئنني أن مسلسل زوغان العرسان مازال مستمرا وقد تم كتب كتابها
على مغترب إسمه محمد علي عبدالله إدعى أنه يعمل بدولة الإمارات في إحدى الشركات بمدينة العين
فبل أكثر من عامين ولم يعد لأكمال مراسم الزواج وقد انقطعت أخباره كما انقطع الخط من هاتفه الجوال
علما ان مثل هذه السلوكيات أصبحت عادية فقد تم كتب كتاب إبنة جيراننا من شخص يقيم في السعودية
ثم اختفى بعد ذلك وتركها لتعاني الأمرين حالة نفسية حادة و تساؤلات الناس التي لم تنقطع عن سبب
هروب العريس .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: محمد أبوالعزائم أبوالريش)
|
الهدوء والكبرياء الصامت الفاضلة أختنا عواطف،،
كان من الممكن أقول ليك رأي اذا لم ينتهي موقف العريس بهذه الصورة،
لكنه أستسلم أو خلق حجة واهية تبرر هروبه من هذه المسكينة،،، وتؤكد عدم رغبته بها..
وبفرضية لو كنت العريس عند اطلاق صراحي بديها يسن ومعاها جكة لعند العروس - ساعتها حيكون الفرح أكبر والوفاء أعمق ،، وكمان معاها كف كفين من أخوان العروس - حتخليهم أوفياء معك أبد الدهر خاصة حين ادراك سوء الفهم،،
لكن عريسكم ده خيبان،، لا يسن ولا جكة
بالمناسبة بالأمس حضرت برنامج على أم بي سي 2 - برايد زيلا - المهم العروس في آخر لحظة توترت وغيرت الوصيفة وطردتها - ثم في آخر لحظة قررت عدم الذهاب للكنيسة والناس منتظرة ونفس الشئ منظمة الحفل دعت الحضور بالصبر والابتسام وأخذ نفس طويل وأنه سيكون عرس مميز وهكذا، أخيراً قررت العروس عدم الرغبة في العريس وانها لا تحبه،،،، يشهد الله تعاطفت معه وكرهت النساء .... "من شاكلتها بالطبع" ...... والراجل والمرأة من البلاك أمريكان - المهم صاحبنا جعر جعيرة تور - وبكا بكاءً مراً - لولا تدارك -أخته - التي جعلتني أحب النساء "من شاكلة أخته" وعادت المياه لمجاريها،،، وأستنتجنا نحن معشر الرجال شيئ واحد - أن لا ننيأس ونكثر من البكاء فهو الكفيل بعودة المياه لمجاريها - ضحكت بشدة ،،،،، لا أدري فنحن معشر رجال بني سودان تربينا على الجسارة وأتمحطنا من أول أبتدائي ويا ويلك لو بكيت - ضحكت كيف يبكي هذا البلاك أمريكان،،،،
- يا أخوانا ---- د.فيل وأوبرا وغيرهم الناس البيجيبوهم ديل ممثلين ولا أصحاب القضايا نفسها وكيف بصورو الحاجات دي هل بيعودوا عملها من جديد بواسطة نفس الأفراد،،،،،،
- بالمناسبة - دور القانون في مثل هذاالنوع من الاغتيال ، عريس طفش أو عروس غيرت رأيها في آخر لحظة شنو - الا يستاهل الاعدام اذا كان دون مبررات،،،،
أذكر حادثة حصلت في السودان لجيران لنا غير العريس رأيه يوم العقد ولم يحضر انتهت بفقدان أعظم قيمة للانسان وهي العقل حتى لحظتها من قبل العروس،،،
لو كنت محل العروس اش بدك تعملي؟
-
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: الطيب شيقوق)
|
أخوي الحبيب الطيب
تحياتي لك وللسمحة أم ولدك
والله سمعت إنك جيت أبوظبي وانفرد بيك فاروق حامد ما عارفين القصة شنو ؟ ما سمعت بمن الحب ما قتل
تصدق أنا من شدة إدماني جاية من سفرة مدتها تلاتة ساعات وقاعدة أرد عليكم ياأخوانا دي مصيبة شنو
زي ما قال أخونا أبوبكر في حب يا أخوانا أكتر من كدا .. معزتي .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: othman mohmmadien)
|
اخي العزيز عثمان
مودتي
شكري بلا حدود على عبورك الرزين و تحليلك المتأني ... فعلا العريس خيبان وحالته حالة والعروس لقت
راجل الحيرة وقالت خلاص البورة اتفكت لكن المفروض تحمد الله ربنا إنه ما عرسها لأنه كان حيسيبها في
أقرب منعطف أما حكاية لو كنت إنت العريس فأنا متأكدة إنه الزيك مافي واحدة تقدر تعمل فيه موقف
زي دة يعني أمها لسة ما ولدتها ليسا خوفا أو رعبا بل إحتراما وتقديرا .. أما صاحبنا الجعر والله
معاه حق أصلهن النسوان مرات عندهن حركات لا يعلم به إلا الله ( كيدهن عظيم ) هي عارفاه بحبها وعايزة
تأكد الكلام دا للناس ...
أما لو كنت أنا العروس فبخلي العريس يبيت عندناقبل العرس بيومين شو رأيك تئبر ألبي ؟
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
استاذه عواطف
سلام
فى الحقيقه مواضيعك هادفه وموضوعيه وسردك جميل وشيق
انا من المتابعين لكتاباتك لكن غالبا لا يسعفنى الوقت للتداخل وابداء الراى . . .
بالنسبه للعريس الهرب فالعروس مفروض تحمد ربها وتفكر كويس قبل الارتباط مرة تانيه. لكن السؤال كيف واحده تقبل تتزوج شخص ما بتعرفه معرفه وثيقه زى مافى الامثله السقتيها عن عريس السعوديه العقد وهرب وغيره كتير من الامثله الحاصله فى الواقع . . عشان كده مفروض الواحده تعرف زوج المستقبل فالزواج حياه طويله ما مجامله.
ودمتى
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: مروة احمد مكى)
|
| Quote: والله سمعت إنك جيت أبوظبي وانفرد بيك فاروق حامد ما عارفين القصة شنو ؟ |
اختي عواطف والله العظيم والله العظيم تصدقي او لا تصدقي انا مشيت الاجازة مع اولادي وحاسي باني غريب رغم حبي لهم اللامحدود ولكني احس بان هنالك مساحة يلزم ان اكون فيها على الدوام .
صحيح اقتضى مسار الرحلة ان ابيت في ابو ظبي مثلما هو عند المغادرة للسودان . في الاولى كان الفاروق في استقبالي وهنا الكثير يقال عنه ولكنى احجم عن الافصاح عن ذلك تقديرا لمشاعره وفي الثانية كان ايضا الفاروق عند استقبالي في المطار ولحين المغادرة لمسقط مع العلم انني لم اره من قبل فقط علاقة إسفيرية عبر هذا المنبر فطوبى لك يا عزيزتي لما تفضلتي به من حديث عن الاخ الباشمهندس بكري ابو بكر .
والجايات اكتر من الرايحات يا عزيزتي
لك معزتي
شيقوق
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
عواطف .. انا مستعد انو ابشتف اي واحد مغترب زاغ بعد كتب الكتاب باني اخت صورتو في جرايد التابلويد (بالعربي والانجليزي )الكترت هنا مع سطريين تلات عن "سئ اعمالو" وكمان في المنابر الاليكترونية وممكن موقع اليكتروني عام ....
يالعرريب الحلبي ودشيقوق.. ياخي الفاروق ما كان كدة ؟ المرة الاولي لما قابلك وانت ماشي الخرتوم وقضيتو يومكم صرمحة بعد داك ما جاب لينا خبر ولا سال عنا وقلنا معليش وبعدين لما ات راجع وكمان قضيتوها ديسكوهات وقهاوي امهريات اتصلت بيه تاني يوم لقيتو قاعد وخاتي رجلينو في موية دافية بملح وقال الحوامة معاك امس هي السبب ومنها عيييييك لليوم قاطع اخبارو ؟؟؟؟ والغريبة ات البتسالنا عن اخبارو ...؟؟
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: abubakr)
|
| Quote: يالعرريب الحلبي ودشيقوق.. ياخي الفاروق ما كان كدة ؟ المرة الاولي لما قابلك وانت ماشي الخرتوم وقضيتو يومكم صرمحة بعد داك ما جاب لينا خبر ولا سال عنا وقلنا معليش وبعدين لما ات راجع وكمان قضيتوها ديسكوهات وقهاوي امهريات اتصلت بيه تاني يوم لقيتو قاعد وخاتي رجلينو في موية دافية بملح وقال الحوامة معاك امس هي السبب ومنها عيييييك لليوم قاطع اخبارو ؟؟؟؟ والغريبة ات البتسالنا عن اخبارو ...؟؟ |
يا ابا بكر مالك كاشف حالنا مع الاستاذة نحن نتمسح وانتو تخربشو والله تعملوا كده انا والفاروق نديكم عرض اكتافنا عدييييييييل كده . وووووووووووووووب منك فكيت الحت والقروانة والنهر الجاف وجيت متلح الامهريات لكن والله بالجد الامهرية بتاعتكم دى فعلا هجين عديل الاب من قلب اثينا والام سلالة امهرا والتقينا وكانت قمم يا مرحى .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: abubakr)
|
( أخي في البورد
ماذا كنت ستفعل لو كنت العريس ؟؟أختي في البورد بعد الشر عليك ماذا ستفعلين لو كنت العروس ؟
إجابة صريحة وخليتكم بعافية !!!!.)
ابو بكر خلى السمحة ام ولدى مع ضيوفها ما تشغلها بالامهريات هى عارفة ابا عبد الله كويس جبلا ما بتهزه امهرية .
الاستاذة طارحة ليك سؤال واضح فووووق اجب عليه بكل شفافية .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: abubakr)
|
هي ما طرحت علي اي سؤال ...عموما انا امر العلاقات الزوجية محسوم عندي قبل وبعد الزواج ... علاقة يجب ان تكون شفافة فلذا التزمت بالشفافية ..امر سهل ...
لانك طيب ودربك عديييييييييييييل ولكن تفتقر لدبلوماسية .............؟؟؟ ( راجع الفاروق ود حامد لاكمال نواقص الكلمات)
البوست ده نحن ضيوفه ستو استاذة صحفية اكان علقت ليها في طريف كليمة بتكشف حالنا عدييييييييييل
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
الأخت العزيزة...
عواطف
من المتابعينك باستمرار...
لما تنقلينه من مشاهدات .. وما تطرحيه من مواضيع اجتماعية خطيرة..
ولطالما أيقنت
ان مجتمعنا لن يتغير للأحسن ما لم ترقى العلاقة بين المرأة والرجل...
وبين مختلف الشرائح وان اختلفت ممارسة الرقي ...
....
..
قرار الزواج ..أولا وأخيرا قرار شخصي ..
يصدر عن قناعات الشخص وتجاربه ومتطلبات روحه وعقله..
المصيبة
كما ذكرت
تلك الهيمنة الاجتماعية اللتي تؤثر على القرار نفسه بل تغيره تماما
وتضع
الكثيرات والكثيرين المغلوب على امرهم أو امرهن...
في مالا يتوقع .....
..
..
اجابة عن سؤالك...
وبعد الشر عليا يارب
بحرد العرس عديييييل
وأتنقب..
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: REEL)
|
الحبيبة ريل
مودتي
اشكرك على مرورك الجميل وعلى متابعتك التي تؤكد إهتمامك بالِشأن الإجتماعي ولم تقولي سوى الحق
بالفعل قرار الزواج يفترض أن يكون قرارا شخصيا ولكن تدخل الإهل والأطراف الأخرى المعنية وغير
المعنية يؤدي إلى فشله وبعدين حكاية لو كنت العروس حتحردي العرس عديل كدا أقول ليك ألف بعد الشر
عليك إنشاء الله عدوينك .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: REEL)
|
والله إنت حالك مستور وما عاش من يكشف حالك لكن نحنا بنكشف حال مكشوفين الحال فقط وهم عارفين روحهم.
الاخت عواطف
تعودنا التداخل في البوستات بنوع من الدعابة والمرح ونخشى الا يكون هذا خصما من موضوعية الحوار النقاش .
اتحملينا نحن ناس حارة ساى لو تداخل واحدا مشاتر بنقعدو وبنونسو ليك لحدى يدي بوستك عرض اكتافو بطيب خاطر عدييييييييييييل كده .
ابو بكر يا اخوى
الفاروق ود حامد
هيا على الجد في طرح الاستاذة عواطف وتاني نرجع للحت .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
والله يا عواطف عرفتي تردي علي , واهنئك علي مستوي الذكاء العالي
الذي وهبه لك الله , وييارك ليك في زوجك وعيالك 0
انتي عارفة دمعتي نزلت وانا راجل , لكن والله محبة فيك وفي مواضيعك
الساحرة .
ولعلمك نحن رابطة أبناء مدينة الصحافة بالرياض , وانا احد أعضاء
اللجنة الثقافية , وقد إقمنا عدد كبير من المنتديات الأدبية بدار
الرابطة وإنشاء الله المرات القادمة نسمعك بعض منها , لكن إذا
شاهدت برامج العيد وحفل تكريم الفنان عثمان حسين يمكن تقتنعي بعملنا
والحمد لله ان مكني من عمل التاشيرات بحكم عملي في وزارة الخارجية
السعودية , ( ودي ما فشخره ) 0
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: الطيب شيقوق)
|
اولا نحييك على اسلوبك السردى الرائع
ودوما متابعين لحروفك
ذكرتنى قصة واقعية
واحد صديق بالسودان ونحن موظفين حكومة وقمة الفلس والملطشة ,واخينا زول طموحاته عالية عاوز وعاوز وعاوز يعرس ,وقافلة ماديا معاة للاخر . وعمرة هبش الثلاثينات وهو بين الفول وفته الفول والغداء باص . كل مايملكة جزمة عبدالواحد زارت النقلتية عدة مرات, اثنين بنطلون وكم قميص احسن واحد فيهم لايصلح لان يتحاوم بيه فى الحلة ناهيك عن الشغل . المهم الظروف رمت فى طريقة واحدة عاوزه تعرس وخلاص ماعاوز اطول فى الحته فقط مواصفاتها فوق الاربعين حجمها خمسة فى اربعة (قاقول) اجمل منها بمراحل, اهلها يملكون المال , المهم خلال ونسة عامة شعرت بطموحاته ومشكلته المادية.
قدمت له عرض انها يمكنها مساعدته فى السفر(لندن) ليحضر دراسته التى يرغب فيها فقط علية باحضار الجواز وماعليه تانى . بداء الاجراءات. و شرطها السرية . والتزم بذلك حتى نحن القريبين لم نشعر بذلك كم مرة نصادفها معه بالمكتب لم نهتم فى البداية الا ان احد اصدقائنا لاحظ ان هناك جاتوهات وكيك وتوابعها تحضر يوميا منتصف النهار للمكتب صرنا نذهب فى هذه الاوقات ونلنا نصيبنا من الجاتوهات والبارد
وبرز سوال الزوله دى عاوزة شنو ؟؟ سالناه تنكر انت لازم .... نكر بشدة وقل حضوره لنا وطلوعة فى مشاويرنا
(اسف للاطالة)
قالت له انها مسافرة بعد اسبوعين لندن تحب نسافر مع بعض؟؟
ولية لا
طيب اهلى يقولى الزول دا منو اقول ليهم شنو ؟؟
...
...
..
قالت (طيب مانعقد ونسافر سواء وانا خدامتك طوال فترة دراستك )
قال لها ( موافق اولا ورينى الجوازيين عليهم التاشيرة والتذاكر )
جيب اهلك مرحلة اولى يقابلوا اهلى انا لدى فقط شقيقة واحدة وزوجها هنا
وهنا يبداء فلم محاورة اخر
قال(انا زول مقطوع من شجرة ممكن اجيب اى ناس من الشارع اقول ليك دا ابوى وداعمى )
لكن لازم تجيب اهلك شان اهلى
اذا كان المشكلة اهلك عشان ما اكون كذبت حا اجيب ناس
انا عاوزة خلفية كاملة عنك عشان افتح الموضوع مع اختى وزوجها
بسيطة بكرة حا اجيب سيرة ذاتية مكتوبة
وقد كانت فى ثلاث صفحات فلسكاب ذكر قصة حياة انسان من الالف للياء نسبها لنفسة(انا قراتها ودون ان اشعر ادخلت يدى فى جيبى ابحث عن شى لاعطية له وبيدى الاخرى اجفف دموعى )
تدخلنا هنا انا وبعض الاخوة وقلنا له (كن صادقا مع نفسك وابتعد) ولكنه اصر قررنا مواجهتا بالموضوع لاول مرة نتكلم معها فى هذا الامر . ولكنا فوجئنا وهو معنا بانها تعرف الكثير عنه من مصادر اخرى وهو يختلف عن ماقدمه لها مكتوب
وبكل اسف كانت متمسكة برايها( احضر اهلك ومافيش مشكلة ساقوم بكل ماتفقنا علية عندما تحدد تعال للموقع الفلانى قابل شخص اسمة كذا
واختفت ..
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
Quote: اها انت قالو ليك انا حتات واللا بتصرمح في مقاهي الامهريات .. اسال عني ست البوست ست عواطف ...
انا اي واحد يفكر سااي يزوغ بعلقو من نخرتو ...رجال مسخرة واخر زمن .. كان ما قدر العرس شن لزوم الفشخرة ... المجتمع الذكوري الاونطجي بتاعكم دة لازم يتكسر حتة حتة .. |
الفاروق بتصرمح يعني شنو؟ شوفها لينا لو ممكن تأهل لاقامة دعوى اشانة سمعة ضد الرطاني ده .
We have to substantiate our suit upon reasonable grounds
اذا اكان مافي قراوندس فلله العفو عما سلف .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
سنة 96 مشينا انا من الرياض وحيدر ود عمي من ابوظبي
مشينا الخرطوم .. انا في اول اجازة لي .. وحيدر في
اجازتو الكمين كده .. المهم يا عواطف .. قلنا احسن
نفتش لينا حريم نتلمّ عليهن .. وبدينا رحلة البحث..
وحيدر طبعا بحكم انو خبير اجازات وبحث ما كان مستعجل
وكان شغال ينقّي ويحصحص ويمحص .. انا كنت لـسة برلوم
تفتيش لكن ما برلوم جكّيس .. المهم اتعرفت سريع على واحدة
وقلت يا ود اعمل خطوة جادّة وطوالي قلت اسوق منى اختي الأصغر
مني (طريدتي) ومعاي مجدي اخوي الأكبر مني ومعانا حيدر رفيق
الدرب (الأخضر) ويا زولة مشينا .. وطبعاً الجماعة استقبلونا
استقبال جميل جداً واكرمونا بالحاجة البااااااردة واخدنا ونستنا
والبت كانت طويلة وصفرااااء وصغيرة وسمحة يعني زي ما بقولوا اهلنا
(مكمّلة) وما ادت اختي اي ثغرة للتعليق .. المهم يا زولة اخدنا قعدتنا
ومرقنا وقعدتنا في العربية .. طوالي زولتك انت يا امير مالم (نسابتك) ديل
ما بدونا شاي بالبسكويت !!!! طبعاً قالت الجملة دي واخدت ليها ضحكة يعني دي
تلكيكة ساكت المهم .. طالما نعتيهم بانهم (نسابتي) دي براها خطوة كويسة ..
امي تقول والله حيدر وامير ديل حريمم لا اسي اماتن ما ولدوهن .. اختي الصغيرة الجاية في
اجازة من ابو ظبي برضو تقول ليها اجي يا امي كيفن ما ولدوهن .. والله انتي امير وحيدر العاجبنك سيقانم الطوال ديل الا تبوريهم واسي الزمن يمشي وشعرم يتمعط والله (فلانة) ديك ما ترضى بيهم وفلانة دي واحدة من القطار فاتم وفات وبتنوهو يتكسر حتة حتة ..
عليك الله يا حاجة خلي الاولاد يشوفوا ليهم حريم يتلموا عليهن .. وبي قدوم ممدود (بلا امير
وحيدر حريمم ما ولدوهن) وتاني تكرر اجي ..
طبعاً يا عواطف كل زول بشوف زولو ده مافي زيو .. عشان كده الأمهات والأخوات بشوفن ولدم ده سلطان
زمانو واي واحدة بشوفوها ما بتستاهلو لكن في النهاية وفي الغالب برضخوا لي رغبتو .. وبرضو البنات
امهاتن ووأخواتن بشوفوا الراجل ما بستاهل بتهم وده شيء طبيعي .. لكن مش ملاحظة انو الاعتراضات والتقييمات كلها من الحريم (امهات ، اخوات ، خالات ، عمات) وحتى بنات الجيران البكونن (حاريات) لو الوضع عريس و(حاسدات) كان الوضع عروس ..
Quote: قال ليها والله مرتي كانت متابعة الموضوع
من أولو ولما شافتني لبست البدلة والكرفتة وعايز أطلع قفلت باب الغرفة بالمفتاح ومشت أهلها و
ماجات إلا الصباح وبعد كدة ما عندي وش أمشي ليهم خفت أخوانا يضربوني بالعكاكيز .. أخي في البورد
ماذا كنت ستفعل لو كنت العريس |
الشغلانية دي يا عواطف دايرة تجربة كدي خلينا نبقى في الوضع ده بالجد ونشوف حا نعمل شنو .. عشان الفي بر عوّااااام .. لكن الزول ده كان شاورني كنت بقول ليهو من الصباح خت البدلة عند العروس قول ليها بجي البس في الكوفير معاك واطلع العصر عادي وامشي الدافوري كمان واجي راجع ليها بعد اسبوع
بي ضرّة .
فتك بعافية وراجع ليك والله عندي ليك كترت قصص من النوع ده ..
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: امير عوض الجمري)
|
أخي الحبيب أمير
مودتي
بتصدق مداخلاتك بالنسبة لي زي البندول بجي من برة ( شغل وحوامة وتحقيقات وصداع) ألقى مداخلة منك
أقعد أضحك براي لمن ناس المكتب بقولو دي مالها جنت في آخر عمرها ولا شنو؟؟؟ أنا طبعا ما بهمني كلامن
بسوي في البسوي في عموما أنا يا وأدمي الشمار كاتلني عرستو من ناس الشاي بدون بسكويت ولا لا ؟ وليه؟
وعليك الله يا الجمري ما تقطع الجوابات .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: عواطف ادريس اسماعيل)
|
Quote: بتصدق مداخلاتك بالنسبة لي زي البندول بجي من برة ( شغل وحوامة وتحقيقات وصداع) ألقى مداخلة منك
أقعد أضحك براي لمن ناس المكتب بقولو دي مالها جنت في آخر عمرها ولا شنو؟؟؟ |
الحبوبة اخيتي عواطف
سلام يا الرائعة .. هو عليك الله ناس مكتبكم ديل انتي لمن تكوني مافيشة
ما قاعدين يكونوا خليج ساكت من غير زهرة .. وما ببقوا زهرة الخليج الا
وانتي في ..
وما تخافي يا ام المجاهد اجزخانتي مفتوحة 24 ساعة وكمان (شعبية) ورخيصة
وانشاء الله ما تحتاجي منها لغير البندول .. لكن اتخيل لي بتكوني دايرة ليك
حبوب مرارة (عارفم فقاعينة كتااار) ..
| Quote: عرستو من ناس الشاي بدون بسكويت ولا لا ؟ |
لا وحاتك يا عواطف عرسنا ناس الكوكاكولا بس .. والسبب طوييييل وبجيك ليهو
عشان الاجزخانة تكون شغالة وما تقفل .. والبندول نديك ليهو حبة حبة ...
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: امير عوض الجمري)
|
أخي العزيز أمير
سلام ... سلام الشجعان للجدعان يا جدع الحمدلله إنك عرست من نا الكوكاكولا عشان أنا ما بحب البيبسي
وطبعا دي عرسة موفقة بإذن الله أما بقية الشمارات فقاعدة منتظراها إنت عارف أكل عيشنا من الشمار
تانيا المكتب كله زهور كانت شفت إشي سوري وإشي لبناني وإشي مصري وإشي فلسطيني حديقة غناء والله
يديم المحبة أمبارح زرنا زميلتنا إماراتية خلفت بنت بع ولدين قعدنا نضحك ونتونس من الساعة 7
للساعة عشرة زي المجانين أيه رايك ؟؟ ما تقفل الصيدلية في ناس تانين كمان عايزين حبوب مرارة
قالو من البقروه في المنبر من شتايم ومهاترات كان الله في العون .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: الطيب شيقوق)
|
ابن شيقوق العزيز
مودتي
والله فعلا شكله مرهف وحساس لكن عليك أمان الله أنا الليلة من الصباح في معرض الدفاع الدولي كان شفت
جنس أسلحة متطورة والبنات السمحات بعد ما كانن عارضات أزياء بقن عارضات أسلحة بستغلن جمالهن
وذكائن للبيع أنا طبعا الشمشرة ما بتخليني مشيت عملت معاهن لقاءات عشان أعرف البخليهن يعرضن
الأسلحة شنو طالما الدموع هي سلاح المرأة الفتاك ؟؟ شكرا يا الحبيب سلام خاص للسمحة أم ولدك .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: Nader Abu Kadouk)
|
العزيز ناادر
مودتي
لكن ما تقول لي ما عندك عم ! تصدق مرة عربيتي اتعطلت في الإشارة وفجأة ألقى ليك واحد سوداني نزل
من عربيته وطلع لي عربيتي من الإشارة ( دفر ولز) لغاية ما وصلها الباركنج وكنت جديدة في
السواقةوقام فتحها لقاها عدمانة الموية وبتطلع دخان وقربت تحرق لكن الحمد لله مشى السوبرماركت وجاب
موية وشغل العربية ومن اليوم داك قبل 10 سنة وماقادرة أنسى الموقف دة وبعد كدة أنا وفوزية زوجته
بقينا أصحاب وانضمت لينا د. فتحية وكمان د. عبدالمنعم بلة وقبل أسبوع كنا في مهرجان دبي للتسوق
مع بعض ونعم العم وهذا الشبل من ذاك الأسد .
| |
|
|
|
|
|
|
|
|
 Re: الحفلة مدورة للصباح والعريس ما جا رايك شنو يا بكري ؟؟؟ (Re: abubakr)
|
الأخت العزيزة عواطف
تحية ود خالص
أحكي ليك حكاية
أنا في يوم من الأيام نقلت إلى زالنجي حاضرة غرب دارفور وكانت هناك سيدة تدعي ( أم جمعة دقو رجال) وقد كان لي شرف التعرف بها ففي أول يوم لي بزالنجي إلتقيتها في مكتب صديق هو مامور السجن أحمد على الفكي وهي في زيارة له لأنها تعتبر نفسها شخصية عامة وثم قامت عرفتني بنفسها دون أن أبدي أي رغبة في ذلك مع ملاحظتي لما يعلو شفاه الأخ أحمد علي من إبتسامة لا تخلو من خبث ومكر ويا غافل ليك الله ثم بدأت على النحو التالي:
أنا الست أم جمعه
عضو اللجنة النسائية بالحزب الوطني الإتحادي
عضو فرقة فنون دارفور
ممرضة بالسلاح الطبي سابقاً
ثم أردفت ونطقت كفراً:
ودقيت حوالي (7) عرسان شردوا مني يوم العقد وتاني يوم مشيت ليهم في الشغل لككتهم( دلك تلكيكاً يعني دقتوا عدمتوا العافية).. أنا بقلبي قلت : إياك أعني فاسمعي يا جارة أو اللبيب بالإشارة يفهم.
طبعاً الولية عملاقة وضخمة .. بيني وبينك قلت أعمل حركة إستباقية وقائية فقمت قلت ليها : والله يا خالة أحسن حاجة عملتيها عشان إتأدبوا وما يلعبوا ببنات الناس!!.. فهمت مصطلح ( دُقّوا رجال) بعد ما أنا أصبحت من ضحاياها ولكن سوء عاقبتي كان بسبب عدم تغخيري الألفاظ المناسبة في مخاطبة السيدات .
والله يا عواطف أنا وهي وصديقنا مامور السجن في المكتب .. ما عارف الحصل شنو والأسباب شنو المهم ما شعرت وما حسيت إلا بنفسي مكوم في المستشفى من أثر بوكس ونوك آوت وبعد أن تماثلت للشفاء علمت من الأخ أحمد علي الفكي أسباب الإعتداء الآثم وملازمتي المستشفى حيث قال بأنني استفزيتها وقلت ليها: يا (خالة).. هي أصغر مني فكيف أقوليها خالة، وعشان كده ضربتتي بوكس وأعقبته بشلوت!! .. ويا ريت الموضوع إنتهى على كده مشت كمان جابت لي طلب من محكمة ( الديمنقاوي) وده هناك وفي الوقت داك أظرط من الحاكم بأمر الله أو قراقوش !!.. وتحاشياً لتطور الأمر إلى ما لايحمد عقباه دخلوا الجماعة جودية واضطريت دفعت ليها خمسة جنيه سنة1970 عارفه طبعاً ده مبلغ كان كبير في الوقت داك وذلك نظير سحب القضية وحتى تتنازل من شكواها لما لحق بها من أهانة بالغة وحالة ( نفساوية) كما قالت..!!
طيب قولي لي بالله عليكي ما ليهم حق العرسان يشردوامنها .. منو الممكن يتزوج أندريه العملاق؟!!
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: abubakr)
|
| Quote: الإتنين بحبوك عشان إنت شبه البترادو حتى أسال السمحة أم ولدك حتأكد ليك الكلام دة ! |
عواطف انت صحفية واكيد درستي مع الاعلام الاتي :
علوم سياسية : لي انا لاعاملك بالمثل حسب مقتضى قواعد الشفافية والافصاح
انثربولجي - للنوبيين وعرب البطانة
سايكولوجي - تعرفي بيها سايكلوجية نادر البجدّع من بعيد و ما عارف انتي عالمة بما فيه ينضح
بواصل جوني ضيوف عزاااااااااز
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: Nader Abu Kadouk)
|
| Quote: اثرت عدم الرد لكي لا افسدالبوست الرايع ده |
نادر اخوي عليك الله ما تزعل اخوك بحب الضحك والاخت عواطف اخت حبوبة والله انت مش ملاحظها تتفرج وتتضحك كيف ولا خايف تصنفك وزن الريشة كلنا صنفتنا لكن صابرين وبطولة النفس تقدر نوريها اننا اخوان فاطنة وجمال شيل ونحضر بلاها ما نحضر عشاها.
لك عميق حبي يا نادر ( شايف كيف انا حريص انت بس امشى في دريب اخوك ده)
يعني (لك عميق حبي) الفوق دى لو تركتها دون الحاق عبارة (يا نادر ) ياكا المصنف عديييييييل على وزن الريشة
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: abubakr)
|
| Quote: ومتناسبيين (وينك يا ود عمي ابوجهينة) وهمباتة ( انا باخد من المابعرفو همبتة وبدي للبعرفوها ؟) |
اختنا عواطف عندها بوست بهنااااااااااك انا وقعت فيهو صدفه كنت بجي ماري فيهو سااااى لكن اوصيك ارح ليهو نخربو ونصرف الناس منو كشف حال عدييييييل . ولو قريت البوست داك حتعرف انو الهمبته ذاتها خشم بيوووووووت .
| |
|
|
|
|
|
|
|
|
|
Re: الحفلة مدورة للصباح والعريس ما جا رايك شنو يا بكري ؟؟؟ (Re: elameen)
|
أخي أمين
مودتي
القصيدة تحت عنوان نساء أمدرمان وهي من ضمن مجموعة الديوان الذي أسماه أمدرمان تحتضر الذي صدر
من بيروت عام 1967 ويشتمل الديوان على عدة قصائد عن مدينة أم درمان وكان أبشعها قصيدة نساء
أمدرمان ولأن القصيدة طويلة سوف أرسل ما تيسر علما أن د. الواثق صدر له ديوان الفارس العزل أيضا.
نساء أمدرمان :
إن زانها أدب
أو لونها ذهب
ما نفع مظهرها
لو جسمها خشب ؟
قل للألي ضاجعوا أمدرمانواغتربوا **** كيف المضاجع بعد اللهو تنقلب ؟
كيف العقارب في لبات غانية *** *** تخفي مساربها أثوابها القشب؟
أبدت مفاتنها هونا تراودهم ***** حتى استكانوأ وزالت دونها الحجب
لانت عريكتها حتى أريكتها *** ******** نامت عليها رجال بعضهم جنب
الليل ما بذلوت مهر البغي له ******* والكأس طاف في حافاتها الحبب
وغار كوكبهم ما أنفض سامرهم ******** الخمر تسلب وأمدرمان تستلب
حتى إذا انتبهت خرقاء من سنة ******** وقد تحجر في أجفانها التعب
تلمست جزعا أطمار عفتها ********** كان الذي افتقدت بعض ما نهبوا
ثم استشاطت وقامت كي تناجزهم ****** وصرح الشر في عينيها والغضب
لكنهم هربوا ..
حتى إذا همدت غلواء حدتها ******* عادت لسيرتها إذا شاقها الطرب
يا شيخة طرقت من قبل ما يفعت ****** مشت بسيرتها الركبان والحقب
يا أمنا من أبونا؟ وما حملت بنا **** إلا سفاحا فكيف اليم ننتسب ؟
هذي نساؤك يا أمدرمان قد رضعت ***** من عار ثديك لم يحفل بهن أب
بهرجة حريم بعضها نبهت ************ لكنها كرهت ما قالت الكتب
من كل ناعسة غيداء آنسة ************* أصباغها مسحة فالخد يلتهب
وصدرها هودج حينا ترجرجه ********* وردفها ما تباكت حوله العرب
والعرض يا سلعة أسواقها نفقت ***** ما كان يبتاعها إلا الألي ذهبوا
هذي رجالك يا أمدرمان تضطرب
بين المواخير ما عادت لهم همم ***** قد شلها القصف والإدمان والصخب
خرص العيون سمادير محنطة ******** لن يتركوا الكأس حتى ينضب العنب
ماذا فعلت بهم يا سوء من أنحدروا**** قد تردوا وقد هانوا وقد نكبوا
يا ليت شعري إيمحي ذنب غانية ****** وتغسل العر من ساحاتهل السحب
فقد لمحت نقاء في سيريرتها********** إن ذكر الطهر فأمدرمان تنتحب
تبكي لها حرق
صلاته... نسق
حديثه .. لبق
تبدو براءته
لكنه .. شبق
قل للألي ضاجعوا أمدرمان هل أرقوا *** بعد الحرام وهل في صمتهم غرقوا؟
أخي العزيز أمين القصيدة طويلة ومليئة بالإبداع ولكن أتوقف هنا و أتمنى أن أرسلها لك مع بقية
القصائد الأخرى وهي تحت عنوان : لا حبذا أنت يا أمدرمان من بلد ... ثعابين أمدرمان ... لكنما أنت يا
أمدرمان .... عصا التسيار ... نساء أمدرمان ....
ولد الدكتور محمد مصطفى الواثق عام 1936 بقرية ( النية ) محافظة الخرطوم ودرس بمدرسة وادي سيدنا
الثانوية ثم كلية الآداب جامعة الخرطوم حصل على شهادة الدكتوراة من جامعة كمبردج .
| |
|
|
|
|
|
|
| |
عواطف ادريس اسماعيل
بكرى ابوبكر
الفاتح خليل الفكي
abubakr
abas
د.محمد حسن
رأفت ميلاد
هاشم أحمد خلف الله
صلاح الدين عبدالله محمد
محمد أبوالعزائم أبوالريش
othman mohmmadien
الطيب شيقوق
امير عوض الجمري
Nader Abu Kadouk
فيس بوك
تويتر
انستقرام
يوتيوب
بنتيريست