|
|
 أبناء الشتات ,,,, وناس مرقنبو قرنبو برة !!!!
|
قبل أن أضرب في المليان أود أن أشكر أستاذنا الكاتب الكبير صاحب ( رائحة الموت ومريم عسل الجنوب)
المبدع عثمان حامد على متابعته لكل ما يكتب في البورد , ومناقشته عبر الهاتف لمعظم الموضوعات التي
يتم تناولها فله منا جميعا ألف شكر وباقة ورد .
في النصف الأول من التسعينات أنجبت إبني مازن بعد معاش إختياري إستمر لمدة ثماني سنوات حيث قلت
لنفسي أحسن ليك يا ولية بعد الاستراحة الطويلة دي تثبتي وجودك ودي طبعا نصيحة مني لكل الأخوات أن
يثبتن وجودهن كل عقد من الزمان لكي لا يعتقد الزواج أن الأوان قد فات أصلهم بتلككوا وعايزين سبب.. المهم كان وبرغم مرور أكثر من ثلاث سنوات على حرب الخليج الأولى مازالت تداعيات تلك الحرب اللعينة
تخيم على كل الجاليات التي كان لحكوماتها موقف محدد من تلك الحرب فقلت لروحي ياجماعة الأجواء كئيبة والسودانين جرى لهم ما جرى من تفنيش وووو لازم أخلق شوية جو للنسوان الحزانى ديل عشان كل حاجة بتحصل للراجل المرة هي التي تدفع التمن فقررت إقامة حفلة كبيرة جدا دعوت لها الفنانة الشاملة
التي ترقص وتغني وتمثل علوية كوبر لزوم الحت والكشف وافراغ ما في البطن من مغس ودغس وبعدين هي
كانت النجم الأوحد في ذلك الوقت ولكن إحدى الإخوات قالت لي أيضا هناك طالبة ذات صوت شجي جدا يمكن
ان تشارك في هذا الحفل فقلت ومالو؟؟ إنشاء الله ما حدش حوش !!! ومن هي تلك الفتاة ؟؟ قالت لي شروق
أبو الناس لكن لا أعرف إن كانت تقبل الغناء في مكان عام أم لا ؟؟ قلت لها دعي الأمر لي أصلي بعرفهم
من مدة طويلة وكنا جيران في يوم من الأيام وفعلا اتصلت بوالدة شروق فوافقت على الفور أصلا هي ست
فاضلة وأخت أخوات وفعلا جاءت شروق ومعها العزف زميلها الطالب الفنان المبدع ايمن ثم جاءت الفنانة
الشاملة علوية كوبر التي طلبت أن تؤدي فقرتها قبل شروق لأنها تسكن في مدينة العين وتريد العودة
قبل هبايب الصباح فكان لها ما أرادت غنت ,, رقصت ,,, ردحت ,, مثلت ,,, والنسوان يا لطيف عينك ما
تشوف إلا النور أتاريهن كان مغبونات جنس غبينة قربن يطيرن الفيلا في الهواء ,, الجيران فلطسينين
وسوريين ولبنانيين طلعوا رسينم بفوق الحيطة قالو عواطف دي جنت ولا فتحت ليها نايت كلوب ؟؟ المهم علوية كوبر كانت تشدو بأعلى صوتها وين وين تلقو زي دة ؟ مازن القمرة الفي السما!! وين وين تلقو زي دة مازن المنقة متلجة وهي ماعارفة انو مازن حيجي يطلع أيمان صليبنا, في تلك الأثناء جاء أبني الكبير مجاهد وكان يبلغ من العمر عشر سنوات وكأنه اكتشف الدنيا الجديد ليسألني بدهشة ماما,,, ماما,,, قوزيدة يعني شنو؟؟ بتقول شنو يا ولد ؟؟؟ what is the meaning of guzayda ? ياولد الكلام دة بتجيبو من وين المرة البتغني دي قالت وين تل قوزيدة !! ضحكت من أعماقي وقلت له بعدين حأفهمك أنا هسة ما فاضية ليك كدي خليني مع النسوان الماديرات يقعدن في ا ديل ,,, يقال أن إحدى بنات الشهادة العربية وهي تطلق على الطلبة القادمين من دول الخليج ولها عدة مدلولات أولها أنهم مدللون حتى النخاع ثانيا يعتقد بأنها شهادة سهلة لذلك يتم خصم 10% من درجاتهم التي تكون في أغلب الأحوال أكثر من99% والكن والحق يقال لم أشاهد أو أرى في حياتي قراية أصعب وأغني من الدراسة في دول الخليج في حاجات نحنا ما بنعرف نجاوب عليها فلماذا إذا تخصم هذه الدرجات ؟؟؟ لست أدري !!! نرجع لموضوعنا بنت الشهادة العربية تسكن في داخلية جامعة الخرطوم وجات يوم لقت سريرها ما فيش فسألت واحدة من أهل العوض معاها في نفس الغرفة عن السرير فقالت لها ( مرقنبوقرنبوبرة ) what? )( مرقنبوقرنبوبرة) ِشو؟؟؟ مرقنبوقرنبوبرة ) مازالت بنت الشهادة العربية فاغرة فاهها من الدهشة ماهذه اللغة؟ هيلوغروفية ؟؟ يهودية؟؟ أمهرية أم ماذا ؟؟ أيضا قيل أن إحدى حناكيش الشهادة العربية , كانت تسير في شارع النيل مع زميل لها شهادة سودانية فسألها (سوسو بتعرفي العتوت ؟؟ ) أجابت what ?? العتوووووووت ؟ no !!!العتوت يا سوسو!!! هو قال ليك بيعرفني ؟؟؟ هاهاها كانت تلك ضحكة مجلجلة من إبن الشهادة السودانية إيضا قيل أن أحد الأطفال شرب في بيت جدته عصير أبري أبيض وعندما عاد إلى الإمارات قال لأمه يا ماما عايز عصير تيشوز زي الشربتو عن ناس حبوبة !!!
القضية يا إخواتي وإخوتي الأعزاء ليس في عدم معرفتهم باللهجة السودانية التي تنتج عن عدم وجود وقت كاف للأبوين لتعليمهم لها بسبب ظروف عملهم ولكن المشكلة في تربيتهم وثقافتهم التي أصبحت خليط أو كوكتيل من الشارع ,, المدرسة ,,, مراكز التسوق ,,, المجتمع ,,, يا جماعة شوفو لينا حل فقد خرج
الأمر من يد كثير من الأسر التي تجد صعوبة بالغة في تربية الأبناء ,, التربية في دول المهجر والشتات
أحر من الجمر كيف يتسنى لنا أن نوفر لهم المعيشة التي بقت نار والدراسة الأحر من المعيشة ,, مصاريف
الأهل في السودان ثم نجد وقتا لنعمل delete لتلك الثقافات والتربية التي لا تشبه تربيتنا السودانية
في شيء والله نحنا في دول الخليج رغم وجود أكثر من 98 جنسية ورغم أن الأولاد ساقيننامن كيعانابشوف
نفسنا أحسن حالا وأخف وطأة بكتير من أولياء أمور أبناء المنافي في الدول الأجنبية هؤلاء كان الله
في عونهم لقد عاصرت بنفسي معاناة صديقاتي في كثير من الدول الأوربية فقلت لنفسي لما تشوف مصيبة
غيرك تهون عليك مصيبتك ,,, دحين يا جماعة الخير عايزين من المختصين في المنبر نفسانيين أو إحتماعيين أن يدلو بدلوهم و يوروناالحل وفتكم بعافية ...
|
|
 
|
|
|
|
|
|
|
 Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
الأخت القديرة عواطف ادريس...
تحياتي..
من مدة بفكر أكتب بوست عن تربية الأطفال في المهجر.. أكتب فيهو عن تجربتي كابنة تربت في الغربة, و كأم تنشيء اطفالها في غربة..
و نتبادل فيه الأفكار و الإقتراحات..و خلاصات التجارب...لكن الزمن..آاااخ الزمن..مافي!
ضحكني ولدك.. تل قوزيدة..!
هسة مجاهد ده مفروض يكون في الجامعة..أخبارو شنو؟..لأنو لو في السودان حتكون عندو (أخبار) كثيييييرة زي دي!
في سنة أولى جامعة..في الخرطوم.. استفزاني رأي أحد الزملاء في ناس الشهادة العربية.. قال لي (انتو ما عارفين أي حاجة عن السودان..)
قلت ليهو( القال ليك منو..؟!) اتغالطنا شوية و بعدين..سألني كم سؤال في التاريخ ..لقاني لسوء حظو (ناقشة)..البركة في أمي و أبوي و غناء وردي!
قال لي يمكن تكوني استثناء.. كدي أمشي أسألي صاحباتك..و شوفيهم حيعرفو حاجة!
طبعاً اتغظت..و أصريت أثبت ليهو انو على خطأ..
دخلت الأوضة في الداخلية و أنا متنحفشة..لقيت فردتي ..وش ..قلت ليها..(حنان..بتعرفي المك نمر..؟)
عاينت لي بشوية حيرة..و قالت..(معانا في الدفعة؟!)
.........
أبناء المهجر..مجني عليهم..و الجناة كثر!
| |
|
|
|
|
|
|
|
|
 Re: أبناء الشتات ,,,, وناس مرقنبو قرنبو برة !!!! (Re: Sana Khalid)
|
عواطف والله موضوعك ذو شجون والهم واحد , فعلاً اولادنا بعانوا كتر جداً ولكن الحمد لله نحنا علي قولك
في دول الخليج اخف وطاة من اهلنا في امريكا واوربا علي الأقل توجد جالية كبيرة سودانية والتاثير
لو وجد قليل إلا من اراد لنفسه التغير قصدي تغير نظام التربية .
بالنسبة للتعليم والله اكاد ان اجزم اننا بندرس مع اولادنا من جديد , يعني كمية من الحشؤ في
الدروس وكترة طلبات ما بتنتهي ابدا خاصة البنات , يعني أحمد ولدي من الإبتدائي لحدي الثانوي
وهو الأن يستعد لدخول الجامعة ما كلفني ريال زيادة مقارنة مع أخواته البنات , بس ابداً ماخائف
عليه من السودان من حيث اللهجة والكلمات السودانية الدارجة , لكن بخاف عليه من عدم الخبرة
في التعامل مع أقرانه الطلبة لانو شوية خجول.
كما انه لا يحب يلعب مع السعوديين زملاءه في الدراسة في
الشارع وسالته مرة ليه ما بتلعب مع ربعك في الحي ؟؟؟ قال لي يابابا الفاظهم قبيحة وحركاتهم
طفولية , وهنا أحب ان أهني زوجتي الحبيبة ( هويدا ) التي نجحت في التربية طبعاً بمشاركتي أنا
القليلة جداً , حيث ان الكل يعرف مشاكل الدوام .
عواطف تشتت أفكاري ويمكن إستعجلت في الكتابة دون أن احدد النقاط ولكن عشمي في من ياتي من
بعدي لكي يكمل الباقي ونشوف أهل الأختصاص .
| |
|
|
|
|
|
|
|
|
 Re: أبناء الشتات ,,,, وناس مرقنبو قرنبو برة !!!! (Re: Sana Khalid)
|
الغالية سناء !!!
معزتي ,,,
مرورك الناضج اسعدني كثيرا فعلا المسألة عايزة بحث ونقاش بصورة جادة خصوصا وأنتن أمهات صغيرات
وما زلتن في بداية المشوار تصدقي يا سنوية مجاهد بقرا في استراليا في الجامعة ومن حسن حظه
تعاقدت معه وزارة الصحة وأدته الإقامة الدائمة عشان هو فلونت إنجليزي ووبعرف عربي عايزينه يشتغل
في قطاع اللاجئين يعني بعد شوية قوزيدة دي ذاتها ينساها.. كنت مرة بتفرج في فيلم مصري قام الممثل
وقع في طشت الغسيل أثناء ما أمه بتغسل قام ولدي مهند الأصغر من مجاهد وهو برضه في استراليا قال
لي دة وقع في شنو يا ماما؟ قلت ليه في الطشت !! قال لي طشت يعني شنو ؟؟
سناء الحبيبة !!!
فعلا أبناء المهجر مجني عليهم وبشدة ونسعى لعمل شيء من أجلهم لذلك كوني معنا!!!
| |
|
|
|
|
|
|
|
|
 Re: أبناء الشتات ,,,, وناس مرقنبو قرنبو برة !!!! (Re: عبد المنعم سليمان)
|
الحبيب منعم !!!
شكرا على مرورك الكريم فعلا يولد الطفل في الغربة ويحاول أبواه بكل الطرق أن يسودناه ولكن مثلما
ذكرت يلعب الشارع ,,, المدرسة ,,, المجتمع ,,, دورا كبيرا جدا في تربيته فتأتي الرياح بما لا تشتهي السفن وبعدين حل السودان الأمثل هذا قد لا يناسب البعض لظروف خاصة وبيقول المثل ما بجبرك على المر إلا الأمر شكرا منعم ,,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
سلام ياأستاذة عواطف
بوستاتك دائما فوق منورانا..
ذكرتيني قصة واحد سوداني أخونا أتى لماليزيا بأطفاله وهم صغارا
لم يشاهدوا غير تلفزيون أمدرمان الوحيد وقتها ولا فضائيات....
الأم في المطبخ وهم بيشاهدوا التلفزيون وهاك بالرموت كنترول من قناة
إلى أخرى.. لحظات ويصيح أحدهم: يمة يمة تعالي شوفي الراجل ده, قام
عضِ المرة في خشما شديد وقعت قربت تموت........
كان الله في عون الجميع..
مع تحياتي...
عبدالعزيز
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Abdlaziz Eisa)
|
Quote:
لحظات ويصيح أحدهم: يمة يمة تعالي شوفي الراجل ده, قام
عضِ المرة في خشما شديد وقعت قربت تموت........
==============================
واللـه يــا عــبد العـــزيــز قطــعـت مصــاريــنا من الضــحــك
أهــا نـبقـى فـي متــل دا وصحـيح شــر البليـة مـا يضــحــك .
تحيــاتي
صــلاح واســبه
| |
|
|
|
|
|
|
|
|
 Re: أبناء الشتات ,,,, وناس مرقنبو قرنبو برة !!!! (Re: Abdlaziz Eisa)
|
أخي الحبيب عزو !!!
شوق مطر ,,,
تصور ياعبدالعزيز الحكاية أصبحت أشبه بالمأساة فلا الأهل قادرين على العودة للظروف السائدة
ولا قادرين يتحملو ضياع ابنائهم في زحمة الثقافات والديانات المختلفة ,,, شكرا على مرورك
وربنا يسعدك في غربتك ,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عبد المنعم سليمان)
|
عواطف
الموضوع من وجهة نظري يحتاج لبعض الدكتاتوريه تجاه الأطفال من يوم الولادة (و قبل ذلك)
حتى يحصل التحصين و يتناولون الثقافات الأخرى مجرد العلم بها (كما نحن و الحمد لله)
و قد كانت لي نظره بأن الغناء السوداني القديم (يبث) الروح السودانيه لكل من سمعه
و كذلك أغاني الجاز و البلوز فهي أغاني تجعلك تعيش معها كأنك داخلها
أنشأت فيهم أن الغناء العربي الآخر هو (غناء مخنث كما كان حسن عازف الباص يقول عنه) دما يجونا يا حليمه يقولوا لينا (بننتهك حقوق مجموعه من الأشياء)
نمت فيهم فكرة أنهم يتفوقون على الخوجات بأنهم يعرفون التحدث بالعربيه و الإنقليزيه
و عندما يسألهم شخص (إنتو شنو)
يقولوا ليهو (سودانيين)
أعلق في جدران البيت شتى صور الأهل و نتحدث معهم على الأقل مرتين في الإسبوع و يتحدثون معهم
الجائزه المغريه لهم هي (البيخلص ال home work) ح يسافر معاي للسودان
نحن لا نستسيغ كثير من المظاهر التي نمر عليها
و لكي يسمعوا رأينا فيه نقوله بصوت عالي و نشركهم في النقاش
ما أحمل له هما هو
كيف سيتناولون موضوع التعامل العنصري إذا مروا به
و لكن الفكره هي في ال measurables التي أسقيها لهم لكي يشعروا بالفخر و يدعون الآخرين للتعرف على ثقافتنا السودانيه
و ليس الإنهزام و الشعور بالدونيه أمام الثقافات
و الإثنيات الأخرى
و شكرا على فتح هذا الموضوع الهام
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: malik_aljack)
|
أخي الحبيب مالك !!!
مودتي ,,,
أولا أشكرك على مداخلتك القيمة التي تسهم في حل المشكلة إلى حد ما باتباع ما تنتهجه من أسلوب
مميز ولكن يا مالك قد ينفع هذا النوع من الأسلوب في مرحلة محددة من العمر ولكن عندما يكبر الأطفال
ويصلو سن المراهقة سيكون هذا الأسلوب very funny كما يقولون وقد يقول أحدهم إذهب لوحدك للسودان
فلا أود الذهاب لذلك أرجو تطوير الأساليب حسب المرحلة العمرية شكرا أخي العزيز وربنا يسعدك بأولادك
الحلوين .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عبد المنعم سليمان)
|
| Quote: what is the meaning of guzayda |
هلا هلا يا العواطف بالحيل ربيتي
انا يا عواطف بشاغل الناس طوالى مرات بحركات ومرات بالنظرات
كنت في الدكان السوداني في مسقط وعادة بعد صلاة الجمعة السودانيون بيتجمعوا في الدكان لزوم شراء الكسرة والعرديب و ال ........... ببيعوهو باكيلو
اها في ولد جاى من الصلاة مع ابيه والولد ده كبير وعنقرتوا السيف ما يدليها . ابوه اشتري الكسرة ودنقر على الشوال تحت عشان يوزن ليهو كيلوين بتاعات ال ............ الولد نط لابيه في حلقوا قال ليهو بابا انت ده بتشتريهو ليش ؟ ابوه اتحرج شديييييييد الا انا قاطعت الولد ومسكتو من يده قلت ليهو امشى جيب لعمو حاجة باردة _ في اللحظة دى عمنا سرييييييييع طبق حاجاتو ورماها في ضهرية العربية ودور واختطف الولد وكسح بيهو .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: الطيب شيقوق)
|
أخي العزيز الطيب !!!
مودتي ,,
شكرا على المرور الجميل ,, بتصدق يا لطيب في أول مرة يروح فيها مجاهد السودان شاف جده أبو أبوه
كان عمره 105 سنة وأول مرة في حياته يشوف زول عجوز ,, قدري ما حاولنا نخليه يسلم عليه رفض كان خايق ومرعوب منه جدا لدرجة أحرجتنا كثيرا ,,, تسلم يالحبيب .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
Quote: قد كانت لي نظره بأن الغناء السوداني القديم (يبث) الروح السودانيه لكل من سمعه
و كذلك أغاني الجاز و البلوز فهي أغاني تجعلك تعيش معها كأنك داخلها
أنشأت فيهم أن الغناء العربي الآخر هو (غناء مخنث كما كان حسن عازف الباص يقول عنه) دما يجونا يا حليمه يقولوا لينا (بننتهك حقوق مجموعه من الأشياء)
نمت فيهم فكرة أنهم يتفوقون على الخوجات بأنهم يعرفون التحدث بالعربيه و الإنقليزيه
و عندما يسألهم شخص (إنتو شنو)
يقولوا ليهو (سودانيين)
أعلق في جدران البيت شتى صور الأهل و نتحدث معهم على الأقل مرتين في الإسبوع و يتحدثون معهم
الجائزه المغريه لهم هي (البيخلص ال home work) ح يسافر معاي للسودان |
لا فض فوووووووووك يا مالك
منعم
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عبد المنعم سليمان)
|
إييييه..
ده مشوار 14 سنة.. لا فيه جيران..ولا حوامه في بيت ناس سكينه..
لا أوقات دائمة سـودانيه..لا باعة سـودانيين متجولين ينادوا بأسماء غريبه علي بضاعتهم نظام التسويق..
ولا ناس في الشارع تتكلم عربي..ولا أكل بالإيدين ولا حتي في صينية واحده..بس صحني وصحنك..
لا زيارة بدون مواعيد.. ولا ونسة قهوة في الحوش في المغربية ..
والأصعب من ده كله مافي وقت لده كله!
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
الرائـعـــة عـواطـف التحيــة لك وليــراعك الســاحر
أثرت موضــوع في غاية الأهميــة ونحن و ومن ذكــرت يعانون من هذه الناحية وقد نجـح
البعض ممن هم في الشــتات البعيييد أن يتغلبوا عليها وقـد ركــزوا على مسالة تعليم
أبناءهم اللغة العربيــة ومتابــعة بعض محاضــرات ودروس تعاليــم الدين الآسلامي .
من النوادر التي حدثت وتحدث كل اليوم من أبنــاءنا كانت دنيـا ابنتي ذات يوم مريضة
وصاحب تلك الوعكـــة اســتفراغ شــديد فكان لزاما علينا متابعتها بدقة حســب تعليمات
الطبيب وطبعا تضايــقت وكرهت نفســها وقالت أتحــايل وأحــاول أقنعهم انـي بقيت كويسة
وكان أن حضــرت على طريقة اتمســكن لما اتمكن وقالت :
you know baba iam not طــرش any more وطبعا قاصدة أنا ما طرشت تاني وطبعا لمن
البيت اضحك عليهم القيامة تقوم كيف وكيف تضحكوا وكذلك تجي البت الكبيرة وهي محتارة
وماقادره تقرأ ليها حاجة بالعربي في شريط ولا دي في دي وتقول ليك دي شنو يابابا؟
يعني والله يا عواطف في النهاية يمكنك أن تسميها مأسآة ونذكــر دائمــا بـــأن :
التعــليم فـي الصــغر كــالنقـش في الحجـــر والتعلـيم في الكـبر كالنقـش في البحـر
التحــية لك ورد الله غربة الجميع
صــلاح واســبه
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: abubakr)
|
الغالية و الحبيبة عواطف
سلام و تحية و شكرا لهذ البوست اتمنى ان يشارك به كل من له خبرة او دراسة بمشاكل و تربية اطفال الشتات و شكلى حا اتحكر فى البوست ده لانو موضوع وجودنا خارج السودان اصبح مرتبط بوضوع تربية اطفال و سودنتهم ....
و طبعا انت يا استاذة افتكر اوضاعكم فى الخليج احسن حالا منا فى الغرب .....فنحن نعيش فى واقع كل شيئا حولنا غريب شكلا و لغتا ...فانتم تعيشون فى واقع غريب ايضا لكن كل شى حوله قريب من لغتنا و اشكالنا ...فمثلا يا ستى انا واسرنتى نعيش فى حى نحن الوحيدين الاضانهم زرقاء ....يعنى لو سالتى عنى فى حلتنا ما بتروحى ....و من الظرائف انو اولادى اصبحوا دائما محل اهتمام الصحافة لاسماهم و لونهم و تميزهم.....هاك شوفى الخبر ده نزل قبل كم يوم فى الجرائد
لاخطى مديرة المدرسة مصورة مع بنتى منار ابوبكر .......منار الطفلة الوحيدة ذا الملامح الافريقية بالمدرسة....
اذن ما هو الحل "السودان هو الحل" هل هو الحل كما قال عبد المنعم ......
بجى راجع ....بعد افضى....
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: بكرى ابوبكر)
|
Quote: واللـه يــا عــبد العـــزيــز قطــعـت مصــاريــنا من الضــحــك
أهــا نـبقـى فـي متــل دا وصحـيح شــر البليـة مـا يضــحــك . |
سلام عزيزي صلاح واسبه
طرف ونوادر أبناء الغربة كثيرة ومضحكة جدا.. الواحد لا يمكنه حصرها
أو سردها...
تتواصل الحكاوي إن شاء الله..
مع تحياتي..
عبدالعزيز
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: بكرى ابوبكر)
|
أخي الحبيب بكري !!!
مرورك يمنح البوست قيمة معنوية وأدبية فلك منا ألف شكر يا صاحب القلب الكبير ,, والله بكري كان الله في عونكم أنا في بريطانيا وفرنسا شفت إخوان وأخوات ما قادرين يأدبوا أولادهم لأنه هناك من يتربص بهم لمصادرة حقهم في الأبوة بأخذ أولادهم منهم ومنعهم من رؤيتهم لأنهم تعاملوا معهم بوحشية وقد حدثت مع سودانيين كثيرين مما أدخل الرعب في نفوس الآخرين أما نحن في مجتمع الخليج فالطفل الذي يرتكب أي جنحة يتم تسفيره بعد سجنه عدة شهور مهما كان عمره وقد أصبح السودانيون من الجنسيات التي يتم تسفير أبنائها بعد أن كانوا قمة في الأدب والأخلاق والعيب ليس في الأهل الذين يلاحقون الأبناء في كل مكان ولكن في الطفرة الحضارية والعولمة وغيرها من أشياء يصعب السيطرة عليها عموما التسفير لازال بنسب ضئلة مقارنة بالجنسيات الأخرى رغم أنه ظاهرة خطيرة ,,, شكرا بكري على طلتك الأنيقة ,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: abubakr)
|
عزيزي أبو بكر
سلام وشوق
ما كنت ادري أن اللغة العربية دي صعبة كدا رغم أن كثير من
أجدادي الذين عاصرتهم لا يتحدثها بطلاقة.. لكن في ابناء المهجر
الأمر أصعب بكثير..
كنت كثيرا في السابق إضطر في حديثي مع ضياء إلى تغيير بعض المفردات السودانية
إلى الإنجليزية عندما أحس أنه لا يفهمني..
مها أبوبكر التي إنطلق لسانها في العربية حديثا حتى أدهشت أمها.. كنت قد كلفتها
بالتحدث في حفل سوداني من قبل..فقالت ممكن .. لكن بشرط إتكلم ياللغة الإنجليزية!!
أبناء السودانيين هنا لغة المخاطبة عندهم الإنجليزية وكثير منهم الملاوية.. أما العربية
خليها لي الله.. ناهيك عن اللغة السودانية
البيئة هي المحك..
مع تحياتي
اخوك/عبدالعزيز
| |
|
|
|
|
|
|
|
|
 Re: أبناء الشتات ,,,, وناس مرقنبو قرنبو برة !!!! (Re: abubakr)
|
أخي الحبيب أبوبكر !!!
معزتي ,,,
أنت تعرف أن مرورك الجميل يسعد الكل وربنا يحفظك لأولادك وبناتك بعد كدة فات الأوان أن تعيد صياغتهم
وتطلع منهم نسخة سودانية مية في المية ,, مافي مشكلة طالما هن بنات شاطرات ومؤدبات ,,, شكرا
أبوبكر ..
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
| Quote: عضِ المرة في خشما شديد وقعت قربت تموت........ |
عزيز سلامات .. ارجو ان تكون الاحوال في هدوء وامان
دة كان زمان ؟؟
المسئولية الان ليس في تعريفهم ماهي العضة ولكن في انو تخليهم ما يعضو تشبها بالفي التلفزيون وغير التلفزيون .. هسع بقينا نحضر اجتماعات مع استشاري/ واستشاريات الاجتماع في المدارس وحلقات نقاش ومفاكرة وصارت واجباتنا المدرسية اكتر من واجبات اولادنا ..مش كدة يا عواطف ؟؟؟
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
عواطف والله انا ما شايف حل غير نتهكم بيهم ونضحك ،الحكومة تقصقص
فى نمرهم،الاساتذه بضحكو على ناس شهادة عربية ،كمان بقى اى زول
فى السودان مابعرف حاجة او زى ما بقولو هم داقس يقولو ليه انت
اصلو شهادة عربية.
وهاك دى...بنت اخوى قبلوها فى الجامعة مشت السودان على بال الجامعة
ما تفتح قالت تدخل معهد تدرس كمبيوتر..المعهد فى امدرمان البوستة هم
ساكنين العودة امها ودتها اسبوعين ،بعد داك قالت ليها تركبى بص
الفتيحاب شقلة عشان بجى مارى جنب البيت لان بص الفتيحاب الثانى
بجى بالقرب من النيل..زولتك مشت الموقف وشابكهام بص الشقيلاب فتحة
وين زول فاهم حاجة مافى قعدت تبكى فى الموقف لما لقت ليها مرة كبيرة
قالت ليها مالك يا بتى ،قالت ليها:عايزة امشى البيت وسالت من بص
الشقيلاب فتحة مافى زول عرفو..المرة قالت ليها انت ساكنة وين قالت
ليها العودة او المهندسين ،المرة قالت ليها اركبى معاى لكن يا بتى
اسمه بص الفتيحاب شقلة...وهسع البنية بقى اسمها الشقيلاب واندثر اسم
(اجلال)...وناس البيت والجيران واهلنا بقوا يناديها شقيلاب..
عواطف لاحل غير شد الرحال الى البلد..ولى عودة باذن الله فالموضوع
كلنا يارقنا طويلا..سلمتى،،،
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: صديق الموج)
|
أخي العزيز صديق !!!
معزتي ,,,
والله إنه أمر محزن أن نرى أبناءنا ينسلخون من جلدهم كما يفعل الثعبان وأن تتكالب عليهم عدة منغصات عندمايعودون للدراسة في السودان ابتداء من تقييم شهاداتهم بصورة متعسفة ,, رسوم بالدولار ثم تهكم من الزملاء والأساتذة تصور أغلب الطلاب الذين يذهبون للدراسة في السودان يعودون مرة أخرى لشعورهم أنهم غرباء في بلدهم ومع ذلك :
بلادي وإن جارت علي عزيزة وأهلي وإن ضنوا علي كرام.
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: صديق الموج)
|
الاخت عواطف انا طبعا لا استغرب من اولادى فى اسئله كثيره
وكمان انا قاعد اسالن من حاجات كتيره والله مابعرفه0
وبينى وبينك نحن الكبار من شدة ماطولنا فى الغربه قربنا
نبقى شهاده عربيه 0عندما اتحدث مع اصحابى واكون فى السياره
راجعين من المدرسه فى الموبايل 0بس اخلص المكالمه 0بلقى كم
سوال من كلمات انا قلتهاعاوزين يعرفو المعنى 0 وهاك ياشرح
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
العزيزة عواطف
تحياتي
موضوع سمين جدير بالنقاش من كافة جوانبه
لي ولدين هنا في استراليا
وارف 9 سنوات مسح الكتابة بالعربي نهائي
والقراءه طشاش طشاش
الكلام حتى الآن مش بطال !!
لاننا نحرص على التحدث بالعربي في البيت
المشكلة حين ينفرد مع شقيقه الاكبر اياس يتحدث الانجليزية فقط
اما اياس 11 فمشكلته اقل نسبيا
لكن بمرور الوقت اظنه سيلحق وارف
حرصت في زيارتي الاخيرة للسودان
ان استصحب معي منهج تدريس اللغة العربية لمرحلة الاساس
لاقوم بفتح فصل لتدريس اللغة العربية
وجرعات من الثقافة السودانية وتاريخ السودان
وتقدمت للجهات المسؤولة بهذا المشروع ووجدت موافقة وحماس جيد
وفي انتظار الfund لنبدأ هذا البرنامج
لست منزعجا ان يفقد ابنائي اللغة العربية
ولكن الافضل لهم ان يحافظوا عليها ليتفوقوا على الاسترال بلغة اخرى
لان استراليا بلد التعدد الثقافي بمعنى الكلمة
وفي المستقبل ستكون لهم الافضلية في العمل في كثير من المجالات
اذا كانوا يتقنون اكثر من لغة
لك ودي
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: خالد العبيد)
|
أخي الحبيب خالد !!!
التحية لك ولوارف واياس مع أطيب المنى لكم بغربة سعيدة خالية من المشاكل ,, محاولتك فتح فصل لدراسة اللغة العربية جديرة بالإحترام وتدل على شعورك بمسئولية كبيرة ليس تجاه أولاد فحسب ولكن
كل أبناء الجاليات العربية في المهجر ,, شكرا خالد ابقى معنا .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
عواطف سلام
شوفى اللغة دى
أنا ضربتنى
أنا غسلتنى الإيدين
النطق سليم والمخارج 100% بس الترجمة حرفية
يوم قلت لولدى الصغير فى التلفون
أدينى الوالدة
قال لى الوالدة دى شنو كمان
قلت ليه أمك
قال لى عيب يا بابا ما تقول كده
وبعدين أسلوب المخاطبة مأخوذ من الكبار
فيمكن يخاطبك مثل ما يخاطب الكبار الأطفال
أو بطريقة نابية .
يعنى تغلطى فى حاجة يجيك طفل يحاول يساعدك يبدأ كلامو (ما تبقى عويرة ما بعملوها كده)
ودى اللغة البلقطوها من حولهم .
لكن أنا عندى واحدة رسلت بنتها السودان ثلاثة أشهر رجعت بت بلد عديل
المصيبة عندنا الذين يستمرأون سهولة التعامل مع الأطفال باللغة المحلية فيفقدوا اللغة الأم تمامآ
نبهتنا لذلك مدرسة اللغة الآلمانية لتقوية الأطفال الأجانب . وجدت أطفالى فى الترام يتحدثون بالألمانية . إتصلت بى وقالت لى لا تضيعوا لغة مقابل لغة . نحن بندفع فلوس عشان نتعلم عربى
تحياتى
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: رأفت ميلاد)
|
الحبيب رأفت !!!
معزتي ,,,
شر البلية ما يضحك ,,, واحدة ودت بتها السودان لمدة ستة أشهر بعد إمتحان الشهادة البريطانية البت
اتولدت وعاشت طول عمرها في برمنجهام وأبوها عضو في البورد وناشط سياسي كبير مشيت زرتهم بعدما جابوها من السودان قلت ليها وين أمك قالت مشت بيت بكا تقول ليهم مبروك ,, يعني تبارك ليهم البكا يا خالتو ؟؟؟ ها ها ها ٌقلت ليها البركة في وجودك يابتي ماقصرتي ,,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
عواطف
ازيك .. واحشاني مواضيعك اللذيذة دي
عواطف صراحة اولادنا في المهجر بيعانو معاناة شديدة جداً
اول حاجة يا عواطف في المدرسة بكونو معاهم تقرباً كل الجنسيات العربية
وفي ملاحظة ان كل الجنسيات بتتكلم لهجتها الا نحن بنضطر نتكلم مع كل جنسية بلهجتهم
يعني الولد تلقيهم يتكلم خليجي مع الخليجيين ومصري مع المصريين وعلى الشاكلة مع اللبنانيين
والسوريين والمغاربة والفلسطينيين .. ويطلع من المدرسة يلقى الهنود والبنغالة والباكستانيين وبرضو يتكلم معاهم بعربيهم المكسّر على الطريقة الخليجية .. (وتقولي لي دايراهم يعرفو العتود) عتود شنو يا عواطف .. وطبعاً كمية المقررات والمواد الدراسية البتثقل كاهلم تماماً وما بكون عندهم اي وقت لأي حاجة تانية لا هم ولا اهلهم السنة كلها قراية واختبارات ونهّير وشتم وسب .. وقفيل في الشقق والواحد لو مشى البقالة تلقي الأب والأم واقفين بالشباك والوراء يسأل في القدام جاء وللا لسة ومالو اتأخر كده .. كدي امشي شوفو ..لمّن دخلنا عقدة في نفوسم .. بالجد تعبانين تعبانين ومعناة ما بعدها معاناة .. وبعد ده كلو بجنهدو ويحرزوا درجات عالية جداً ويمشوا السودان يقصّوا منهم 10% .. ويبشتنوهن بشتنة جد .. وبعد كده تبدأ فيهم النكات وهم بقوا مادة دسمة للمنكتين والمتهكمين ..
صدقيني يا عواطف الموضوع كبير وشائك واولادنا وبناتنا بدفعوا في اتمان غالية جداً من اعمارهم الضائعة سداً وهباءاً ولا بد من البحث عن حلول جذرية لتلك المشكلات .. واعتقد من المهم جداً تكوين فعاليات وكيانات تربوية لتقوم بتعليم الأبناء كل عاداتنا وتقاليدنا ونحاول بقدر المستطاع حبس الثقافات المكتسبة لديهم من احتكاكتهم الاجبارية دي داخل نطاقها فقط وان كانت هي برضو زيادة ضغوط عليهم .. الا انه لا مفر من ذلك .. عشان لمّا يرجعوا للبلد يكونوا قريبين من الحاصل وما يتعبوا .
سلمتي يا عواطف ومزيداً من حلقات التواصل والنقاش المفيد
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: امير عوض الجمري)
|
ود الجمري!!!
كيفك يا بعد عمري ,,,
لم تقل سوى الحق وهذه المعاناة ستكون قطرة في بحر عندما يكبرون قليلا ويخرجون مع أصدقائهم من جنسيات مختلفة وحضارات متنوعة تصدق مرة حضرة حلقة نقاش مفتوحة أو لقاء ساخن بين المراهقين وذويهم
الذين غلبتهم الحيلة والوسيلة لقد كان يوما شكوى الأهل من إنفلات الأبناء أمر يصعب تصديقه بينما
واجه المراهقون والمراهقات ذويهم مواجهة ساخنة مؤكدين أنهم يسلبونهم حريتهم ولا يمنحنونهم الوقت
والأذن الصاغية للتعبير عن أنفسهم فيضطروا إلى الإستعانة بأصدقائهم إذا واجهتهم مشكلة لعدم وجود لغة مشتركة بينهم وبين الأهل كما طالبو بالمزيد من الحرية في مسألة الخروج والعودة من البيت مع منحهم الثقة الكاملة ومن ثم الحكم عليهم ,,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
السيدة عواطف
المشكلة متجزرة بقوة في المجتمع السوداني (المغترب) بكل أطيافه في الغرب كان أم الشرق الأوسط, وأولادنا أمانة في اعناقنا ويجب ألا نرمي لوم عدم تعلمهم لهجتنا وعاداتنا على الظروف والعولمة بل يجب أن يحاول كل منا بجدية تعليم أبنائه كل العادات السودانية الأصيلة واللهجة.
قام الدكتور عمر حسن إيمان المقيم بالمملكة العربية السعودية بعمل الدكتوراه وكان موضوع بحثه هو نفس الأمر الذي تطرقتي له حضرتك هو الأطفال السودانيون المولودون في الخليج وعرج في بحثه على الأطفال في السودانيين في الغرب ايضاً.
أتمنى أن يجد الدكتور عمر الوقت و(الباسوورد من الاستاذ بكري) ليثري الحوار في اهذا الأمر.
أبوفتحية
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: الصادق صديق سلمان)
|
أبو فتحية !!!
مرورك يسعد القراء فلا تبخل علينا بطلتك البهية ,, في الحقيقة اللوم ليس على الأبناء لأنهم يأتون
في شكل عجينة يسهل تشكيلها ولكن مثلما ذكرت كلما غرس الأهل زرعا خرجوا إلى الشارع العام فوجدوا
شيئا مختلفا تماما علما بأن الوقت الذي يقضونه مع أقرانهم في المدرسة أو الملعب أو النادي أكثر
من الوقت الذي يقضونه مع الأهل فيحصل الإلتباس والتشويش أنت تزرع وغيرك يقلع ما غرسته يعني القصة
تبقى زي ساقية حجا ,,, تسلم يالحبيب ,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
عطوفة..
مشتاقين يازولة زي حديقة.
حسي يا توفي...الرجال ديل كللللللهم مشغولين بأولادهم و تربيتهم في (( الشتات و الغربة الما بتنفات))..تجي تقولي ليهم مثنى و ثلاث و رباع ؟؟؟!!!
خليهم عليك الله في العليهم دا...ربنا يكون في عونهم.
-----------------------
يا ستي مشكلة (( العتود )) و (( مرقنبو..إتفرجخنبو )) و غيرها بنشتكي منها نحن زاتنا في سوداننا دا و في بطن بيوتنا دي ..
زمان لمن كنا في المدرسة (( في العصر الكربوني )) كنا بنعرف إيليا أبو ماضي وميخائيل نعيمة و فدوى طوقان...بالإضافة لإدريس جماع و الهادي آدم و التجاني يوسف بشير..إلخ
حسي مقرر الوزارة كلو أناشيد فارغة المحتوى...خاوية المعاني...و المواد المقررة هزيلة و كل المعلومات العاوزها الطفل بيستقيها من (( سبيس توون )) و (( mbc 3 ))! عليك الله في شتات أكتر من كدا؟؟!!
نرجع و نقول...المجهود الأكبر يقع على عاتق الأم و الأب...المطلوب بذل مجهود أكبر عشان نزرع جواهم القيم السودانية الجميلة و نخليهم يفتخروا بتراثهم و إرثهم الحضاري...سواء كنا داخل السودان..أو خارجه.
وزي ما قالت واحدة صاحبتي..
من يوم ما قلبوا لينا (( أ..أسد ))..
إلى (( أ...أرنب )) و الوليدات ديل ما نفعوا!!!
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: mamkouna)
|
ممكونة الحنونة !!!
مشتاقين إنت متين تجينا ,,, سهرانين الليل طال علينا !!! دي دعوة مفتوحة للإمارات ومش دعوة مراكبية
والله يا ست الحبايب الأهل بيعملوا بيدينم ورجلينم لكن الحكاية أصعب مما تتصوروا يعني أنا بعرف ناس قمة في الأخلاق والأدب والتعليم الأب طبيب والأم جامعية وبعد دة كله ولدهم الأوحد عمل جنحة كبيرة واتسفر
خلاهم زي المجانين يمشوا ويكلموا نفسهم ؟؟؟ أيه رايك ؟؟
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عبود احمد النصيح)
|
أخي الحبيب عبود !!!
مودة ,,,
صدقت فيما ذهبت إليه وهذا الموضوع سيتم طرحه قريبا إنشاء الله وسنتناول بإذن الله العديد من الموضوعات
المتعلقة بهذا الجانب ,,, شكرا على مرورك الزاهي ...
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
أختي الرائعة عواطف..
كعادتك طرقت موضوعا من بيت الكلاوي.. والواحد يحتار يتناوله من أني محور
لكن الليلة المزاج VERY LOW أحسن أبدأ ليك بنكتة محنكشة من حنكشيات إبني محمد
وهو حاليا طالب جامعي.. وترتيبه الثاني بين أبنائي..
وأحب أطمئنك إنو رأي أهلنا في الداخل عن إبنائنا فشنك في كل النواحي..
ولا أدل على ذلك.. أن افتي القائم على معسكر التدريب لأبناء الشهادة العربية سنة أن دخله إبني محمد
أن قال: ما معناه ما كنت قايل أولادكم قويين بالشكل ده.. وبيني وبينكم كنت فعلا مفتكرهم حناكيش زي
ما بيقولوا عنهم .. لكن ما شفت في سنهم أصلبا عودا.. " عين القائد فيها حدائد" والمعسكر ده (يقصد
ذلك المعسكر).. فيه أولاد أنا شاكي في إنهم كانوا عايشين تحت المكيفات.. وقال بالحرف الواحد ..
إنهم والحمد لله يدعكوا الطابور والبيادات العسكرية من الدقيش.. لغاية وقت صلاة الظهر ما في واحد
فيهم قال آخ.. والراجل ليس من معارفنا ولا في أي حاجة تخليهو يجامل أهالي الحناكيش.. لكن الله أجرى
حقيقة من الحقائق على لسانه...
معليش النكتة إنو محمد عايز يمشي لواحد صاحبه ساكن "سم وير" في أم درمان وكان معه الليلة التي قبلها
وحدث أن خرج بمعية خاله في سيارته على أن يوصف ليهو البيت..ينزله وهو في طريقه.. ولمن قطعوا كبري
شمبات .. الخال قال ليهو وين الحي الساكن فيهو صاحبك.. ورد محمد بدون تردد.. حي (ملاريا 111 )
يا ود ملاريا 111 دي شنو.. معليش يا خال هو ما حي لكن محطة أو يمكن compound أسمو ملاريا 111 وبعد
تفكير وتوهيكة من الخال الذي هو أيضا حنكوش إرتكاسي.. إذ أنه يعمل في الخليج.. عرف أنو هذه
العبارة كتبت أثناء حملة مكافحة الملاريا على بعد النقاط المركزية لأطراف الأحياء لتسهيل المهمة
الإدارية المتعلقة بالحملة... المهم... محمد طلع ود ناصح وما حنكوش في الوصف.. وقدر يصل.. والخال
ماسكهاليهو لغاية هسع.
أهلنا في الداخل ماخدين زمبة كبيرة وبعتقدوا إنو أولادنا في الداخل أذكى وأشطر وأشطن.. لكن صدقيني
هذا المثلث أولادنا الحناكيش مجضمنو.. تجضيم..
أما بنتي يسرا عفيت منها... كانت هنا في الغربة TOP اوف كلاس حال كل بنات المغتربين.. وبالمناسبة
أهلنا في الداخل ما عارفين أنو الفصل فيهو خليجيين وشوام.. ومصريين .. وحتى كمان هنود.. ولا ما
عارفين في سقوط بالمزيكة هنا.... لكن الحمد لله أولادنا وبناتنا الحناكيش ديل .. بيطلعوا بريمو..
نرجع ليسرا لأنو شافت الزيانة في أخويها الأكبر منها حلفت برأس أبوها ما تقرأ الثانوي في الغربة
وقالت تمشي السودان تقعد مع حبوبتها وجدها (الله يرحمه) عشان تمتحن من هناك.. والسبب إنو قالت
ما عايزة يشيلو منها درجات.. ولمن مشت من هنا.. كانت طبعا 99% وبوينت حاجة.. وبرضو قبلوها بعد
تقييم الوزارة للشهادة في مدرسة ثانوية حكومية قبول خاص (عشان ندفع المليون) ... وبرضو بحمد الله
احرزت 90 رغم كل الظروف المحيطة بها وقاعدة مع جدها وجدتها لا أم ولا أب.. والآن تدرس في كلية
الهندسة الكهربائية.. والشيء المؤسف .. إنو برضو دفعونا فلوس أكثر من زملائها أبناء الداخل
الحائزين على نسبة أقل منها.. ليه؟ لأنو أبوها مغترب وحنكوش... تقولي شنو وتقولي منو؟
وحديث الحناكيش ذو جنون..
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Kamal Karrar)
|
أخي الحنكوش كيمو !!!
معزتي ,,,
في الحقيقة حديث الحناكيش ذو شجون خصوصا في مسألة الدراسة مظلومين ظلم الحسن والحسين يعني ما عارفة سر التمييز الطبقي دة لزومو شنو قطيع درجات ,, دفع بالعملة الصعبة ,, معاملة سيئة وسخرية من قبل المعلمين والزملاء يعني قدر ما تزرع ليهم حب السودان في نفوسهم يطيروه منهم من أول سنة
بكلمة شهادة عربية أو أجنبية ,, ربنا يخلي ليك أولادك الحلوين وشاطرين ...
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
أختي أم الحناكيش "عواطف"
الله يخلي ليك أولادك كمان.. ويزينهم بالنجاح والفلاح دائما يا رب..
لو ما أخاف فتنة طائفية أقول والله الظلم الواقع على اولادنا.. الحسن والحسين ذاتو ما شافو زيو
بس نقول لمين؟!!!
المشكلة يطلعوا ليك بروفسورات ودكاترة في التلفزيون ويقولوا ليك كلام.. لو كتبوه في أطروحاتهم
العلمية لسقطوا أو أسقطوا سقوطا شنيعا...
الناس ديل قايلنا نحن وراوير..
يا ست عواطف.. التعليم والصحة مرافق خدمية تحتاج لأنفاق كبير.. وضخم.. وده متوفر لدول الخليج
والمهنج يتم تغييره كل ثلاث أو خمس سنوات على أكثر تقدير... كيف يكون طالب الداخل أحسن من طالب
دول الخليج والتي أنفاقها بالهبل وما ليهو حدود.. والمسألة مش كوار ومكابرة..
لسع في ناس بيعتقدوا إنو الجامعات السودانية أحسن من غيرها.. نحن طبعا نتمنى ذلك ولكن لا نجزم به
أما السخرية التي يسخر بها المعلمون من أبناء المغتربين.. فلعل أحسن توصيف لها بأنها إسقاط..
والكلمة تدل على الكثير...
عموما يا عواطف.. أعتقد أنو الموضوع له أكثر من وجه.. وربنا يقدرنا على أن نتداخل بمداخلات تثري
الهدف من طرحك إياه..
والله من وراء القصد
ودمت وأسرتك في حفظ الله وصونه
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Kamal Karrar)
|
استاذنا عواطف
بكل المقاييس احسن الخليج لابنائنا من السودان علي الاقل لا توجد ملاريا هنا
ولا حقارات الطلاب السودانيين وثقافة قلع الساندوتش واشياء اخري هذا اذا كان ابنك به قدر من
الجمال ففي السودان هناك التحرش الجنسي وبتاع الفرن والعجلاتي ( اقول ليك ود الخليج الملظظ دها
والثقافة السودانية ملحوقة .
وحتي في الغرب الابناء يتربون جيدا ويتكلمون الانجليزية بطلاقة وفي السودان الان خريجين الجامعات
عبارة عن كوفتجية
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Mustafa Mahmoud)
|
dear awatif
and dear guest
the above song has got a lot of justified questions
about our identity about our national dress about our treatment if we are ill about our foot ball
about the digital technology
is is it us
it them who is
wrong??
i do believe only time will tell
my deep love and deep respect to you and to your family
dr mustafa
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Mustafa Mahmoud)
|
د. مصطفى !!!
تقديري واحترامي ,,,
مرورك الجميل يمنح البوست نكهة مخنلفة ,, أنت دائما تتحفنا وتسعدنا ...اسعد الله مساك بكل خير ايها
الإنسان الجميل ,,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: khaleel)
|
العزيز خليل !!!
صباحك ورد والله كلامك صاح 100% عشان كدة أولادنا لما يمشوا هناك ويكونو فرحانين بوجودهم وسط أهلهم
بلقوا من هو متربص بهم ليخلق لهم العديد من المشاكل ويسمعوا كلمة مدلعين ومرطبين وغيرها في الدقيقة مليون مرة شكرا على عبورك الزاهي .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Kamal Karrar)
|
أخي العزيز كيمو
صباحك فل ,,,
قلت فأصبت كبد الحقيقة وكان الله في عوننا وعون أبنائنا أنا بصراحة أولادي فضلوا الدراسة برة بعدما
شافوا تجربة زملائهم اللي مشو السودان ,, شكرا على مرورك الجميل ,, ماشة مؤتمر الإدمان الولي وراجعة ليكم إنشاء الله .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
العزيزة عواطف..
سلام وتحية ليك ولموضوعك المهم..
في رأيي إن الأطفال في إستيعابهم لأي معلومة بيكونوا زي "الأسفنج" يعني بسهولة.. وعشان كده دور الأم والأب هنا هو المهم. الأطفال بيختطلوا بثقافة ولغة واصحاب جديدين عليهم.. وعشان ما يكونوا مختلفين بيندمجوا في المجتمع ده وما من الحكمة إننا نقول ليهم إنه ده غلط.. بالعكس.. عشان على الأقل الطفل يكون عنده أرضية ثابتة تحت رجليه.. ولما نجي نعلمهم ثقافتنا (السودانية) ما يكون بالتضاد مع الثقافة البيعيشها.. ولا نقلل من واحدة على حساب التانية عشان ما يحصلل ليه "تشتيت".. لو إتعود الآباء على قص "حجوة" كل يوم بالمسا للطفل ده، وممكن يدخل فيها الكلمات السودانية (القح). الطفل حيسأل عن المعنى وعقله حيستعد لتقبل كلمات ومعلومات في دائرة معرفته الحالية غير متواجدة..
بالمناسبة أنا ما متزوجة ولا عندي عيًل.. فصاحتي الفوق دي جات من معايشتي لأطفال سودانيين وغير سودانيين حارج بلدهم..
تعرفي يا عواطف جيل مازن أنا بعتبره محظوظ برضو.. لأنهم لسة ممكن يتعلموا شئ.. جيلي العاش معظم حياته خارج السودان، بيلقى مشقة في التجاوب مع المصطلحات والرتم الجديد في اللغة بتاعت الناس (ومافي براد بيت هناك).. وحتى السنة الفاتت حتين عرفتا معنى "ضهب" شنو بالمناسبة.. عشان كده جيت "أضهب" في بوستك الظريف ده..
ودي الوافر
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Raja)
|
الحبيبة رجاء العباسي !!!
معزتي مع جزيل شكري وتقديري على مرورك الجميل وكلامك السمح بلحيل و رغم إنك ما متزوجة وما عندك أولاد لكن خبرتك أفضل بكثير من ناس متزوجين وعندهم أولاد عموما نتمنى أن تتزوجي وأن يكون عندك دستة أولاد فمن تحمل عقلا وفكرا مثلك جديرة بالأمومة و كلمة الضهب دي على فكرة يا رجوية قطرة في بحر المصطلحات اللي ما حتخطر على بالك ,,, مودتي ..
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
العزيزة " اللذيذة " عواطف :
موضوعك الجميل ده , أنا داخلة أتناقش فيهو على طريقة العزيزة " سناء خالد " , يعني باعتباري واحدة من أجيال الغربة والشتات , طرحك اللذيذ - برغم ظرافته و لطافته التي هى سمة جميع بوستاتك - قلَّب علينا المواجع , و ذكرني بسنة " فوضى الحواس" , سنة " البرليم " في الجامعة !!
سنة كانت زاخرة بلحظات من العذاب المقيم قضيتها في جامعة الخرطوم منهمكة بتعاسة منقطعة النظير في مقاومة ما كنت أسميته بـ " الإزدراء و التهكم الجمعي " من قبل زملاء و زميلات أرجو من الله أن يسامحهم على مواقف لا زالت تترك أثرها في نفسي و تصيبني ذكراها بالحزن !
لكن شايفه مداخلاتكم " حُبلى " بالنكت و النوادر , عشان كده خليني احذو حذوكم في البداية , من باب مجاراة روح الطرافة التي تسود البوست , بعدين نخش على النقاشات العميقة التي أعتقد أنها ستطول في بوستك العامر هذا - إذا سمحتِ لنا بالطبع - .
" هذه مواقف شخصية كنت أيام الجامعة أخجل منها , كأنها جريمة , لكن علمتني الحياة فيما بعد أن أكف عن ذلك , و أن أحب و أقدر ذاتي كما هى , كما تقول أوبرا وينفري "
(1)
في بداية النصف التاني من تسعينيات القرن الماضي , رجعت لأهلي بعد غياب ثلاثة أشهر في السودان , في أول عطلة جامعية , كنا فاتحين التلفزيون على قناة السودان التي كانت تبث وقتها برنامج من برامج الأطفال , التي يكون أبطالها ممثلين يرتدون زى حيوانات , من ضمن هؤلاء كان في " كديسة " و حيوان تاني كده مامتذكراه , فقال ذلك الحيوان الـ مامتذكراه مخاطباً الكديسة :
تعرفي يا بـُرَّه ..... كذا و كذا و كذا .....
إنتي يا بـُرَّه .... بلا .. بلا .. بلا ..
" كان يكرر كلمة بـُرَّه كثيرا "
عندها التفت الى أمي و أبي و قلت بدهشة :
" كديسة ناس نفسية عمتي برضو اسمها بـُرَّه " !!
بعد نوبة ضحك عارمة اعترتهما , أخبراني و هما يغالبان الضحك
أنو أى كديسة في السودان بنادوها يا بـُرَّه !!
(2)
قال الأستاذ الذي يدرس لنا مادة القانون الجنائي بكلية القانون و هو يناقش معنا " قضية حكومة السودان ضد زهرة آدم عمر و آخرين " :
آآ ... طبعا يا جماعة زهرة دي كانت زولة يعنييي ...يعني آآآ ... زولة معروفة ... , و كدة !
ما متذكرة كيف تطور الموضوع , لحد ما وصل لإنو يسالني : هل أنا فاهمة هو قاصد شنو ؟ , طبعاً توقعت إني فاهمة كلامه , و قلت له :
ممم ... معروفة يعني " سيدة مجتمع " !!
عندها قاطعتني ضحكات خافتة عن يميني و شمالي , و بعدها عانيت لفترة طويلة من تهكم زملائي و ضحكهم على سذاجة الشهادة العربية !!
(3)
أول ما مشيت السودان , في الأيام الأولى , كنت قاعدة مع ناس من أقربائي , و ود الأمين بغني : " تبكيك الجوامع الـ اتبنت ضانقيل " , فقلت في تظارف ندمت عليه فيما بعد :
لاحولاااا , السودانيين ديل حكايتهم شنو مع الطوابق دي , الواحد يقول ليك فلان بيتو طابقين , فلان بيتو تلاتة طوابق , مع إنو ده العادي و المفروض في أى مكان في الدنيا , حتى في الغنا كمان , يفخرو بالجوامع الـ إتبنت طابقين ؟!
كمية الضحك الذي بلغ حد الشرقة و سيلان الدموع خلاني أبلع باقي كلامي و أنكمش في خجل شديد !! .
في رأيي الشخصي الموضوع ما غريب عشان الناس تندهش من مواقف زى دي , دي مواقف عادية و منطقية , لكن طبعاً ما في مانع تضحك عليها , بس المانع إنو يتحول الأمر إلى تهكم و استخفاف و احتقار لا مبرر له , كما كان يفعل الأشرار من زملاءنا في الجامعة وقتها !! .
يعني في المواقف الـ حكيتها دي , الناس كانت بتضحك , أوكى , يضحكوا مافي مشكلة , لكن ما المفروض يكون ده شئ مدهش , لأنو عادى و منطقي جداً جداً إنو زول متربي في الخارج جا السودان تلاتة مرات خلال ضعة عشر عاماً ما يعرف إنو الكدايس في السودان بقولوا ليهم
" طؤ طؤ طؤ ... يا ... بـُرَّ ة " !! , عادي بحكم التربية و المكان ,
و عادي أكثر إنو ما يعرف " معروفة " دي المقصود بيها سيدة سيئة السمعة , برضو بحكم اختلاف ظروف البيئة و التربية ,
أما الأكثر عادية فإنو ما يكون سمع كلمة " ضانقيل " دي في حياتو , و لا يكون عارف إنو معناها نوع من أنواع الطوب الذي يستخدم في البناء , أيضاً بحكم مناخ التربية و جغرافية الإحتكاك !!
و راجعة يا عواطف - لو عشنا - عشان أشاركك في الموضوع من زاوية أخرى , زاوية المعاناة النفسية لناس مرقنو قرنبو تحديداً .
مودتي
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: منى أحمد)
|
سلام استاذة عواطف وضيوفها الكرام
طبعا انا في تعليمي اماليا بتي الثقافة السودانية؛ لجأت الى القصص والاحاجي؛ بكل ما فيها من زخم ومن كلام دارجي ومن تهاويل وعقلية سودانية.. وطبعا مرات في حاجات انا زاتي ما بكون فاهما كويس او ما فهمتها لمن كنت طفل .. بحكيها ليها .. الغريبة بتفهما ..
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: منى أحمد)
|
الحبيبة منى !!!
حبي بلا حدود ,,, في الحقيقة أنا سعيدة جدا أن يضم المنبر بنات واعيات وفاهمات مثلك ومثل سناء
لأننا نحتاج إلى أراء وأعمار مختلفة تثري المنبر وتجعله متعدد النكهات ,, والمذاق لذلك أقول لك من كل قلبي شكرا ...
فيما يتعلق بما حدث لك أثناء فوضى الحواس فهو شيء طبيعي جدا ولكن قد لا يصدق البعض أنك لا تعرفين أن الكديسة إسمها برة أو بنت الغنماية إسمها سخلة مثلما لم تعرف سوسو العتود ولا العتوت مش عارفة
عموما نحن في انتظار عبورك الجميل وتجاربك الثرة عن ناس مرقنبوقرنبو برة وحتى ذلك الحين لك مودتي .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
القصة التانية : لاحد زملائي الحناااااكيش في كلية الاداب.. ونفسي اقول اسمه، ووالله العظيم واقف هنا في حلقي ... بس ما بقدر اقولو.. عشان هو شغال منصب كبير في بنك التنمية الاسلامي بجدة وعندو كمان دكتوراة في الترجمة.. خلينا في القصة..
العزيزة حليمة
يا اختي قولي الاسم ساي الناس عرفتو تب
ويا عواطف يعني التويمات ديل ارجعهن السودان في نظرك
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: abas)
|
عباس !!!
يالفي الحنكشة ماخد الكاس ,, عاد معقول توائم حناكيش كدي توديهم السودان ؟؟؟ ديل لو شافو ناس مرقنبو قرنبو برة حيقومو صوف عندي صاحبتي من حلفا ودت ولده السودان بعدين وصلو حلفا بالليل
ولمن صبحت الدنيا عاين لخالاته وعماته وقال ليهن مالكن كدة شنسنين وسودين ووسخين (كان في كتاحة)
قالت قعدت تقول ليه يا رامي أسكت ديل عماتك وخالاتك قال ليها EVEN SO!!!
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
عواطف الحبيبه
لك كل الاشواق ..
وفي كل مره تفاجيئننا بطعم من الجمال
لك كل الود ياغاليه ..
نحن المهاجرين بندفع في ضرائب كثيرة
وكبيرة والله المستعان ...
اديك واحدة من الاتجاه المضاد
بنتي وجد وخطيبة مجاهد طبعاً
تتكلم مع اخوانها في البيت
وفجاه قالت لهم ( بدي ميحرمه )
اخوانه من الدهشة ما فهموها الا متأخر
وتعالي شوفي الضحك ...
دمتي ياحبيبه ...
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: خالدة البدوي)
|
حبيبة القسا ونسيبة المستقبل د. خالدة!!!
مشكورة يا ست الكل على إطلالتك الرائعة والظريفة وزي ما قلت كان الله في العون والأولاد قصصهم ما بتنتهي يعني لو حاولت تتذكري حتألفي كتاب كامل ,, الله يخليهم وينجحهم .مودتي ,,,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
الاخت عواطف سلامات الموضوع يستحق النقاش لكن اخوك مزنوق امتحانات
واحد اصطحب ابناءه الي السودان مرورا عبر السعوديه.
لاداء فريضة العمرة .
المهم بعد عودتهم سالناهم كيف السعودية
قالوا جميلة ورحنا جدة ومكة والمدينة وزرنا كذا وكذا وكان الراوي الاب.
فجاءة قال الابن ( بابا ورحنا شفنا ال black box
طبعا قاصد الكعبة تخيلي بس.ززززززززززززز
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: بدرالدين كاجوري)
|
بدرالدين الحنين !!!
مودتي ,,,
ربنا ينجحك في الإمتحانات ونسمع عنك كله خير ,, بتصدق بت خالتي جات مع أولادها من لندن ويوم من الأيام قالت ليهم تعالو نمشي لي كوستي عشان يسلمو على حبوبتهم وهناك لأول مرة يشوفو الكارو وبعدما رجعوا أمدرمان في يوم من الأيام شافو نفس الكارو قالو لأمهم ماما ,, ماما شوفي كوستي !!! ها هاها.
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
.
مرحبتين بالصحفية عواطف ادريس اسماعيل
مستمتع كتير بالكلم الجميل دة
و عندي ملام للوالدين قبل الشفع
أنا جيت أمريكا قبل تسعة سنة بالتحديد
لقيت أولاد أخواتي بتكلموا انجليزي في البيت!!
و طبعآ كتير من أولاد السودانيين لكن بديت ليك بي حقي
و تبرير الناس كان متباين
بين قائل عاوزين نتعلم منهم
و العربي ما بروح
و في رواية العربي في السما
المهم أنني لم أقتنع و بعد ولادة ابني بشير اجتهدنا أنا و أمه في تعليمه الدارج السوداني الحبيب
النتيجة.. كان بيلقي شعر عربي/سوداني و عمرو سنتين و نص
و كان بيترجم لي أمي و أبوي ونسة أولاد عماتو العمرهم عشرة سنة
بقي أن أقول ان شريط نكات محمد موسى أسهم معنا اسهام هائل في سودنة بشير
و الله لمن كان يحكي النكتة بي لهجة الفلاتة أو أهل العوض تلقى الناس تضحك بهستيرية
لا أظنني قصدت تلميع بشير و والديه
لكن تنبيه قاس لآباء المهجر الغربي خاصة
لازم تجتهدوا زيادة
شكرآ ليك أستاذة عواطف
.
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: الطيب بشير)
|
الاستاذة الكبيرة عواطف
وجميع المتداخلين الرائعين
إستمتعت جدا بقراءة هذا البوست حرف حرف
وإستمتعت وضحكت كثيرا علي التجارب والنكات الحلوة الموجودة في البوست والتي تعتبر مشروع توثيق للموثرات التي تواجهنا جميعا في الغربة.
كما سبقني المتداخلون التاثير يطالنا نحن في الأول ومن باب اولى يطغى علي ابناءنا لان المعادلة فعلا صعبة فهم يتكلمون في المدرسة والحي ومع اصدقاءهم بلهجة ويطالبون بان يتكلموا ويتصرفوا بلهجة اخرى تماما.
اتذكر في زواجي حضر اولاد اختي وهم صغار ولاول مرة مراسم الزواج وطبعا كان برنامج اهم من برنامج العرس نفسه وذلك لاستغرابهم الشديد للحنة والزغاريد والحفلة وكلام الناس والاكل.
واذكر ايضا واحد من اولاد اهلنا المغتربين رفض ان ياكل في بيت ناس عمه لانه بيتهم فيهو كديسة وبتدخل المطبخ.
ماذكرته الاخت منى عن تجربتها في الجامعة والاثر النفسي للتهكم الجارح من (الاشرار) اثرى النقاش تماما ويمكن ان يحوله لمحور جديد مهم
احتفظ بالصدفة لمقال قراته منذ فترة طويلة عن المغتربين واولاد المغتربين اتمنى ان لايكون بعيدا عن الموضوع واسمحي لي بايراده هنا مع خالص تحياتي ولي عودة حتما
أولاد المغتربين
نسوان المغتربين عينة... وخاصة لو كانت الولدة الاولي...الواحدة تقول دايرة دوم....والله قنقليس...والله حمبق....واكان جاملة راجلها تقول دايرة بطيخ في عز الشتاء....وطول النهار راقدة ...والراجل يشيل ويجيب في الاكل من المطعم...وشوفتها لراجلها جاء داخل....... عوع وجري علي الحمام عشان تطرش........ومسيكين هو يسوي الاكل الجابو في صينية ويجيبو يختو ليها قدامها...ويا سوس ما توقمي تاكلي...لا ما دايرة ما عندي نفس... لكن يا سوسو كدا حتموتي....تغتى بتوبها وتقولو كان جعت باكل بعدين..تنضم من تحت التوب....تمر فترة الوحم بملاوة...وقرف شديد....والجنى يكبر.... والمغتربين ..... الغريبة نصهم عبطاء... الواحد يخت اضانو في بطن المرا ويقعد يسمع........ والله يا سوسو قاعد يفرفر...والله يا سوسو بيلعب دافوري....والله يا سوسو قلب الهوبا........قاعد يغني...وسوسو ..متكيفة ومبسوطة لفرفرة الجنى وعوارة الابو....سوسو تلد وربنا يحلها بالسلامة.... ويجو البيت .ولد سموهو محمد... أي مغترب في السعودية بالمناسبة عندو ولد والله اتنين اسمهم محمد....ويدلعوهو بحمادة.....والله تلوشة ...والله ... عسول... والله أي حاجة تدل على الدلع المابيشبة دلع الناس التانين.....تبقى ما عندهم شغلة غير حمادة...الحليب ستة وعشرين.. البزز اربعة... اللعب قبال ما عيونو يشوفن كويس.... البامبرز الحفاضات ...ودي موال تاني...ولازم يكون اغلى نوع... ويطلع في الدعايات بتاعة التلفزيون...والسرير لحمادة...والبطانية لحمادة ..حمادة بال...حمادة ضحك..حمادة قال ويييق حمادة قال مييييييغ....حمادة اتقلب.... اللهاية لحمادة.. طول اليوم محشورة في خشمو... ولو بنشرت يجيبو احدة تانية...والوليد حمادة مسيكين كل ساعة امو تقلبو علي بطنو... وتجدع حفاض وتكرب التاني...وهاك يا النضمي المع حمادة...طول اليوم...انتي زعلتي.... انتي بكيتي.... مالك يا عسل مالك...وبري بري برية...ويكبر يسوي لو عربية.... وطق طق طقطق..طقطقطقطق...ويستحيل تشوف لك وليد والله بنية ... ما محزمنو بحفاض..الشافع يجيك ماشي من بعيد بحفاضو زي البطة...وجاري علي امو ويصرخ واععععععععععع..واععععععععععع.... الكريعات متنيات.... من عدم الشمس... وقعاد الشقق..القدوم.... يكبر من اللهاية الديمة قافلنها بيهو زي غتاية الزير...مشتح من الحفاضات الما تختا صلبو....الغريب بعض المغتربين من عباطتهم يشيلو معاهم البامبرز السودان.... وتلقاهم هناك ساكنين في بيت زبالة...فلهمة وقرضمة.......يكبر الولد...والبزة في خشمو...و البامبرز في صلبو مكروب.. ولو دخلت علي أي واحدة في المطبخ تلقى الشافع .. تحت كرعيها...واقف...وماسكة البزة في خشمو بايد .... واليد التانية يصوط في صرتو...والله يدعك في عيونو........
لو اتلمو المغتربين بشفعهم في شقة زول واحد...... اول حاجة صريخ الشفع يجيب الضهبان.....وكل مرة اتنين والله تلاتة كابسين باب الشقة دايرين يمرقو...والله تلاقى اتنين يتلاو ويجابدو في لعبة والله ملعقة والله نعلات واحدة من اماتهم....والله تلاتة طالعين في سرير وينططو ويصرخو باعلى صوت عندهم.. وتلاقي واحد دخل الحمام... وقدر مافي ماسورة تحت ايدو فتحها... وفي عينة هوايتها اكل الصابون ومعجون الاسنان....والله واحد جرى علي محل الرجال وكايس لابوهو... بابا وععععععععععع بابا وععععععععععع....ويتحكر فوق ابوهو.. وابوهو مستلم الناس نضمي....والولد يقيف علي حيلو ويقعد يصوط ويخمش في نخرين ابوهو......والله يمسك النضارات...والله العمه.....والابو يزحزح في ايدين الولد وبرضو مستمر ينضم.......ويحكي..... البشير قال والبشير فعل....
واي شافع عندو سنون ... تلقاهن مسوسات..من البزة واكل الحلاوة...وشراب العصاير.. والحشي البلا جيهة و صوب
اليكبر منهم وهو في الغربة تلقاهو بومة.. دلاهة...حمادة ازيك... يرد عليك ويقولك حمادة ازيك برضو....انت ود منو؟ انا ود سعاد....وختت صينة العشاء تلاقي كل واحد من الرجال زح لشافعو وقعدو جنبو....والشفع يصوطو في الاكل ...ولو في ضيف عندو دم ياخد لقمتين ويقوم ...ويتم عشاهو ساندوتشات...
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: الطاهر عثمان)
|
أخي العزيز الطاهر !!!
خالص حبي وتقديري على مداخلتك الرائعة التي أعطت البوست بعدا جديدا في الحقيقة ليس لدي أي تعليق
سوى الله يسعدك ,,, كفيت ووفيت ,, كنا معنا ,,, وجودك مهم جدا ... معزتي .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: الطيب بشير)
|
أخي الحبيب الطيب !!!
مرورك الجميل يشرح القلب ,, وتجربتك الرائعة مع سمي جدو جديرة بالإحترام لك ولأمه كل الحب والتقدير
ونرجم منك أن تبقى معنا على الدوام ,, رأيك يهمنا ,,, شكرا .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
الأستاذة الصحفية عواطف
تحية متابع لكل كتاباتك من قبل أن نلج هذا الجمال
الموضوع جدير بالدراسه والدراس تأتي أولا من جهة الأختصاص
ونحن كشريحه مهمه للدوله من الناحية المادية وندخ لها ما تريد
من عمله صعبه يجب أن توفر لنا مقابل هذا أساسيات الحياة بدأ بالتعليم
والصحه وحق المعايشة الأجتماعية كمواطنين.
ثانيأ:
هذا لايعفي الوالدين من المتابعه اللصيقه بالأبناء في كل شي وأن نأخذ
من الوقت مايكفي لتلبية حاجياتهم في كل المناحي وأن التربية هي التربية
سوي في السودان أم خارج السودان ولكل مساوية ومحاسنه ومعالجة المساوي لاتتأتي
بالتمني بل من مجمل التجارب التي نمر بها ونقراء عنهاوأن وأن الكثيرين ممن تابعوا
أبنائهم الآن يجنون ثمار تفوقهم الدراسي بعد مرحلة الثانوية وهم الآن بالسودان
في تخصصات مختلف وجيدة وما لنا الا أن نتابع أبناؤنا وهم الثروة الحقيقية لنا ولانملك
أغلي منهم ولا نتعزر بعدم الوقت بين الدوام ومتابعتهم حتي لو نأخذ لهم أجازة من العمل
والتفرغ لهم وهم في مراحل مهمه.
ثالثأ:
السودان هذة الأيام يمر بظروف معقده ومتداخله وغير واضحة المعالم وفي التعليم هناك
هنات لاتغتفر والأمثل كثيرة ومنها موضوع المعادلة في الشهادات القادمه من دول المهجر
كلها والتعليم الخاص وووو! .
وأخيرا نرجو من المختصين أن يدلوا بما ينفع وأيضا يجب أن يكون للجاليات في المهجر
أسهاماتهم في مثل هكذا قضايا تهم ثرواتهم الحقيقية وهم الأبناء وينصرفوا عن الأمور
الأنصرافية التي تشغل بالهم وهم في غفل عن أشياء مهمه كهذا الأمر الهام تسلمي يامن
لمستي جرح متغيح وكثيرين يكتون بناره
أخوكي
أبوقصي عضو جديد لنج
أمتدادي المنبع
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Nader Abu Kadouk)
|
الاخت عواطف والإخوة المتداخلون
الموضوع مؤثر حقيقة والأمر الذي آل إليه أبناء الشتات ، ناتج عن احتقانات الأوضاع المأساوية التي أصابت بنية الأسرة السودانية بسبب سياسة الإقصاء والفقر المدقع والتشريد للأكفاء من أبناء السودان ، ليحل محلهم في الوظائف من الرجرجة والدهماء عسس الليل ، فقد هاجر أكثر من اثنين مليون سوداني جامعي إلى أوروبا وأميركا واستراليا والخليج بحثاً عن الاستقرار المعيشي وتحسين مستوى الدخل ومساعدة من تبقى بالداخل ، وقد تكاثر السودانيون في هذه الحقبة التي امتدت لسبع عشرة سنة وبعض منهم خرج وأولاده معه ، فكان من الطبيعي أن يحدث اختلاط وتمازج ثقافي واصطدام في بعض المفاهيم والقيم ، حتى بالنسبة للآباء ، فقد تغيروا حسب بلد المهجر فمنهم من يلبس الغترة والعقال ومنهم من يلبس الباكستاني ، ومنهم يرتدي على طريقة الكاوبوي ، وكذا النمط الغذائي ، والعادات اليومية ،والتطلعات ، وهذا في اعتقادي سلوك طبيعي لفرد حوله حزمة من المؤثرات ، وكذلك الأبناء وجدوا أنفسهم في محيط اجتماعي لا يشبه البيئة الاجتماعية في السودان ، من أسرة ممتدة وعلاقات مفتوحة وتواصل اجتماعي قائم على افتراض حسن النية إلخ .. ولا شك أن الأسرة تسعى جاهدة للمحافظة على القيم السودانية للأبناء ولكن هيهات ! في اعتقادي التلقين والسرد والجلوس مع الأبناء وتفهم القضايا التي تواجههم ومعالجتها وفق المعطيات الجديدة أهون من التمترس خلف قيم نفسها قد تآكلت في السودان وأصبحت حديث الأمس .. ربوا الأبناء كي يواجهوا مستقبلهم الذي لا يشبه ماضينا ، علموهم من المهارات ماتعينهم على تخطي المواقف المختلفة ، دونوا ملاحظاتكم عن البيئة والمحيطة وأشركوا أبناءكم في النقاش وإبداء الرأي وكونوا مستمعين جيدين لآرائهم وما يعتقدونه صحيحاً ، تجنبوا النقد الآني والتعنيف المستمر ، اعطوهم مساحة للتحرك بحرية في الحياة حتى يكسبوا قوة ويمتصوا ضربات الزمن ، ثقفوهم جنسياً ، حتى لا يحصلوا على هذه الثقافة من الغير وبطريقة خاطئة ، أشركوهم في هموم الأسرة ومتطلبات البيت اليومية والميزانية الشهرية ، واكشفوا لهم عن خططكم المستقبلية ، وما ذكرته في هذا السياق على سبيل المثال لا الحصر ...
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عبدالرحمن الحلاوي)
|
الأخت الأستاذة عواطف
لك رقيق التحايا وأجزلها
حزني عليهم لأنهم الضريبة التي دفعناها دون أن نحس .. إن كان هناك إنسان تتمنى أن يكون أحسن منك فحتماً هو بنتك أو إبنتك .. تتمنى لو تستطيع أن تفتح رأسه وتصب كل عصارة تجاربك إلى عقله ليتعلم من الإجابي منها ويلفظ ما دون ذلك .. ولكن للأسف نحن مثل الفار الصغير الذي وجد يقطينة ( قرعة) فثقبها ودخل فيها فوجد وبدأ يتغذى على لبها فكبر وتضخم وعندما حاول الخروج لم يستطع وهذا حال المغتربون في بلاد المهجر خاصة دول الخليج .. فقد إنتزعنا فلذاتنا من بيئتهم وهم صغار غير مدركين وحين تفتحت عيونهم كانوا محاطين بجيش من اللآءآت والممنوعات والإحترازات وكلنا يعلمها .. بل أصبحت هذه الفلذات مثاراً للسخرية عند عودتهم للوطن سواء للإجازة أو كعودة طوعية أو قسرية .. عاشوا بين مطرقة الإنسلاخ من البيئة وسندان سخرية رصفائهم من أبناء وطنهم.. تصوري الأردن واجه هذه المشكلة فأقام برنامج لأبناء مواطنيه المغتربون إسمه ( إعادة التأهيل والإدماج)!!.. هذه الضريبة الباهظة دفع ثمنها هؤلاء الأولاد الذين أصبحوا مهزوزين ويواجهون مشكلة الإعتداد بالنفس والثقة .. بل بعضهم أصبح خيال إنسان أو مسخ وبدلاً من أن يلحق الوالدين فلذاتهم ويغادروا منهم من يصر البقاء حتى أخر نقطة نفط .. قابلت أمهات حينما تذكر لهن العودة النهائية للوطن فكأنما ستقاد إلى المقصلة ..!!
كنت يوماً ما مع رجل أعمال خليجي في بيروت وكان يتفاوض مع مهندس معماري شاب ولكنه فلتة وعرض عليه راتب (15) ألف دولار وفيلا وسيارة وسائق ألخ من المغريات وكان صاحبنا يصر على الرفض .. وهنا تدخلت لأفهم أسباب رفضه فقال( من شان مصاري بترك بلدي ، بترك ها الجمال والطبيعة وبروح على صحري وبحبس مرتي وبنتي وبيتغطوا متل شوال الفحم .. مش هيك وبس كل شيء بتطلبوا بأولولك مممنوع لآزم الكفيل .. ما بقدر أبيع حياة إبني ومرتي وحريتن بمصاري .. المصاري على صرمايتي!!)
تصوري قبل العمل بنصف الراتب على أن يؤدي الأعمال المنوطة إليه من بيروت عبر البريد الإلكتروني من أجل أن تعيش زوجته وإبنه حياة إنسانية لآئقة !!
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: ابوبكر يوسف إبراهيم)
|
أخي الحبيب أبوبكر !!!
معزتي ,,
أصبت كبد الحقيقة فما زلنا نقتات من نفس اليقطينة نكبر بداخلها بينما تصغر أحلامنا وطموحاتنا
يعاني ابناؤنا من إفرازات المهجر بثقافاته المتعددة وحينما تنهى خدمة الأب تفضل الأم الطلاق على
العودة وكأن السودان بعبع مخيف أما بعض الرجال فمن يتم تفنيشه فيدخل الغابة وهي إمارة عجمان أطلق عليها هذا اللقب من قبل السودانيين لأن من يدخل هناك لن تلاحقه الشرطة بحجة الإقامة غير القانونية
فتكون الغابة مثواه الأخير ,,, شكري الجزيل لمرورك الذي يسعدني ..
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Nader Abu Kadouk)
|
ندوري !!!
سلام ,,,
والله وحشتوني جدا 72 ساعة ماشفت سودانيز أون لاين لمن جاتني حالة ,,, فعلا نحن في الخليج أفضل كثيرا من دول المهجر ومع ذلك نعاني من الكثير من سلبيات الغربة الكتيرة ومسيخة ,, عموما أشكرك على المداخلة الحلوة ,,, ابقى معنا ربنا يخليك .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: مجدي عبدالرحيم فضل)
|
أخي العضو الجديد لنج أبو قصي !!!
مرحبتين حبابك واليوم السعيد الليلة جابك ,,,
والله صح لسانك ولم تقل سوى الحق لك مني كل تقدير واحترام وأسفة لتأخير الرد كنت في مهمة صحفية إجتماع لجنة المرأة لدول غربي آسيا حول العنف ضد المرأة في مناطق الخلافات والنزاعات المسلحة
شكرا أخي الحبيب كن معنا دائما وجودك يسعدنا ,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
Quote: مجاهد بقرا في استراليا في الجامعة ومن حسن حظه
تعاقدت معه وزارة الصحة وأدته الإقامة الدائمة عشان هو فلونت إنجليزي ووبعرف عربي عايزينه يشتغل
في قطاع اللاجئين |
معليش يا عواطف يا حبيبة..طولت ما رجعت..
أول حاجة أنا فخورة بولدك زي ما انت فخورة بيهو..و الحمدلله هو كده ممكن ينفع بلدو أكثر من كثير اتوفرت ليهم كل عوامل الإنتماء للسودان..و بعد ده..ضررهم ليهو كان أكتر من نفعهم!
كلام العزيزة منى أحمد لفت نظري و قلب علي المواجع....
و قدرت أحس كمية الألم الجواها و الما خففو جو الطرافة العام في البوست..
عايزة أعترف اعتراف قبل ما أواصل..
انو انا ما Pure شهادة عربية..
يعني طفولتي لحد عمر ست سنوات كانت في السودان..و في قرى الجزيرة الحلوة..تنقلاً..بين العزازة و فداسي و المسلمية..
بعدين فترات الغربة كانت سنوات متقطعة بين السودان و الخليج..و أولى ثانوي درستها في السودان..و سكنت داخلية في رفاعة..!
يعني ثقافة هجين..!
و بالرغم من كده..
فقد عايشت معاناة طلاب الشهادة العربية في وطنهم.. و إن كان بقدر من الصدمات أقل!
أكاد أجزم أن أبناء المغتربين عندما يعودون إلى وطنهم..
لا ينظر الناس إليهم إلا بمنظار المادة..
و أتخيل أن الغالبية تراهم مثل أفلام الكرتون..(كيس يمشي عليه علامة$)
و هذه الغالبية..تتعامل معك بناء على هذه الصورة..
منهم من يطمع فيك..و منهم من يزدريك..
منهم من يراك هدفاً سهلاً ..أقل حاجة (للقشرة) و (النكت مع الأصحاب)
و منهم من يعتقد أنك أكثر سطحية..و تفاهة من أن يضيع وقته في الحديث أو التعرف عليك!
حتى الدولة...
لا ترى فيك سوى هذا الكيس..!
و تبذل ما بوسعها (للخمش منه)!
أقلية هم من يحاولون البحث في عمقك الإنساني..
و التعامل مع عقلك و روحك ..
و حتى هؤلاء..
لا يخفون دهشتهم حين يكتشفون لك عمقاً آخر..
و يقولون لك ..(و الله ما كنا قايلنك كده!)
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: Sana Khalid)
|
الحبيبة سناء !!!
يكملك بعقلك أيتها الرزينة لقد أسهبت فأصبت الحقيقة في مقتل ,,, عشت مع أبناء الشهادة العربية
كل تفاصيل حياتهم فسبرتي أغوار مشكلتهم ,, لم تتركي جانبا إلا واشبعته بحثا وتحليلا فلله درك
يا حبيبتي و فعلا زي ما قلت أنا برضه مبسوطة لمجاهد وحزينة لأنه ما حيرجع السودان بهذه الطريقة
لكن نعمل أيه دي ضريبة الغربة مع شكري الجزيل لثنائك على مجاهد واعتبريه أخ ليك لأنه فعلا أخو أخوات و حمال أسية ,,, كوني معنا يا سناء ,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
الاستاذة / عواطف
شكرا" للبوست الجميل ده واتمنى فتح فرصة العضوية لابناء الشتات بشكل اكبر
حتى يستطيعوا ان يعبروا عن ارائهم بشكل افضل
وعندى ابن اختى عمرة 3 سنوات لاول مرة يزور السودان وباين عليه عتر ليهو حجر
فوقع واتظلط فى رجلو ولما رجع السعودية وقابل ابوه اول حاجة عملها راح رافع
رجلو لابوه وقال ليهو ببراءة شوف السودان جرحــنى .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عبد الدائم سيد أحمد)
|
أخي العزيز عبدالدايم ,,,
معزتي ,,,
عبورك الأنيق يسعدني كثيرا أما قصة إبن أختك فهناك ألالاف القصص المضحكة فمثلا إبني الكبير لأول مرة يمشي السودان وكان في أزمة خبز والموجود زي الزفت فقمت قطعت الخبزة ودخلتها ليه في خشمو قام طلعها
وقال لي عضم ياماما قلت ليه دي خبزة قال لي لا لا والله عضم ياماما ضحك الكل منه واستغربو لأن بقية
الأطفال العايشين في السودان كانو يأكلون في أمن وأمان إلا ود الخليج كما يطلقون عليه .
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
الاستادة عواطف لك التحية والتقدير
ما تناولتيه في شأن ابناء المغتربين الي جانب المهاجرين اللذين اختاروا بلد اخر
يمكن تناوله من زاويه اخري ، في تقديري ان المواطن السوداني اصبح مغتربا داخل وطنه
ويمكن ان نورد العديد من مظاهر الغربة الداخلية ، الامر الثاني السودانيون يعتقدون -- وهذا اتضح
من المتداخلين -- ان السودان هو الخرطوم فقط ، واصبحت قضية الثقافة والتمسك بالعادات هي نلك
المرتبطة بالمركز دون النظر الي ان السودان متعدد الثقافات والتقاليد والعادات ، وما تعتقده ثقافة
او مجموعة اثنية ما في اقليم ما تعتقده اخري انها لا تمت الي الثقافة او العادة السودانية وهذا تعسف
واضرار بالتعدد ، كما ان السودانيون لم يتعرفوا علي ثقافات خارج اقليمهم او محيطهم ، لاننا ولفترة قريبة
كنا نعرف فقط الثقافة المصرية التي من خلال سفر اهلنا وما يبثه الاعلام من سينما وتلفاز قيم وتقاليد
المصريين واصبحت بالتالي قيم السودانيين ، ولك ان تشاهدي الان اعلانات تلفزيون السودان ، مصرية بحتة
من السيناريو الي مؤدي الاعلان الي اللغة ، ويمكن بعد الهجرة الكثيفة التي حدثت للسودانيين في اواخر القرن الماضي
بدات الصدمة في التعامل مع قيم وحضارات اخري تتعامل مع انسانية الانسان وتنتقل به الي مدارج الحضارة ،
لكن ليس كل ما في الغرب هو جميل وهم انفسهم ينتقدون ، وضعي خطين تحت تنقدون ، ما تعتور ثقافتهم وقيم من
تداخلات اخري ويمكن ان ننظر الي المناقشات المطولة في هذه الدول الغربية ، القصة يا استاذة تتعلق في وهم هوية مفترضة
نحن ختي الان لم نتفق علي هوية ، وكذلك ترتبط بمسالة هامة للغاية وهي اننا كنا شعب منغلق وليست له علاقة بالعالم ، الي جانب
زيف وادعاء اننا افضل بشر ، نعم نمتلك حضارة تعود الي مئات الالاف قبل الميلاد ، لكن تمت السطوة عليها بليل واصبحنا عربا
قسرا ، والان نبحث ثقافة تحمي ابناءنا من ثقافة اخري ، سنظل هكذا اذا لم نعترف بالتعدد وان نفتح علي الاخر
ولك الشكر
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
الأستاذة عواطف
حمدا لله علي سلامة العوده
ومن عدة مداخلات أستوقفني مداخلة استاذنا مصطفي سري
وما رمي الية من الغربه الداخلية وهي أقسي من الغربه الجغرافية
بعيدة الأهداف وفي غالبها غربه قصرية تعرضنا لها جماعات وأفراد
ومن ثقافاتنا المحلية وهي عديده نحن أنفسنا لانفهم كثير منها وناهيك
عن طفل ولد خارج الخارطه الجغرافية ووجد كل التساهيل والرعاية الجيده
أولآ من الوالدين وهذا واجب فطري وأيضا وجد في الدوله الذي نشأ فيها
أيضا رعاية لم يجدها حين يزور الوطن الأم بالتأكيد ووو وهنا نعرج الي
اللغه المحلية وأقصد بها لغة الشماسه وأيضأ هذة معضله تواجه أبناؤنا
وهم لم يتعودوا عليها ومعظم الأباء أيضا وعلي كل متابعة الأبناء وفلسفة
كل منا في رؤيته التربوية أكيد مافي أحسن منها وأن أستدعي الأمر الي أن
نبعد الأبناء عن تلك التي يقولون عنها (تفتحه ورندوك وما الي ذلك)من سخافات
ليس الا ولو كانت هذة ثقافة الجيل الحالي ونظرته الي أبناء المغتربين فاليهنأء
أبناء المغتربين بأغترابهم وتربيتهم الأبناء بثقافات نأخذ منها الجيد ونصحح لهم
المفهوم الخاطي لتلك ثقافات منقوله ونعود الي غربة الداخل والتهميش الذي يصيب
كثير من بنو وطني والسياسات والسياسة التي أصبحت شبح آخر يستدعي الهروب من الوطن
ونسمع عن العنف الطلابي وأسلحة كلاشنكوف ومسدسات هل هذا هي البيئه السليمه التي يؤدون
أن يترعرع فيها أبناؤنا؟ لا والف لا أسلم لنا ولأبناؤنا أن نبتعثهم الي دول المهجر وبكل
ما فيها من مصاعب أهون من أن يفاجي بهكذا سلوك من شريحه من المفروض أنها شريحة طلاب
يمثلوا الشريحه المستنيره في البلاد وهذة هي أفرازات الساسه في بلادي خلقوا من الطلاب
شريحه للأقتتال وتصفية خصوم سياسية لا ناقه لهم فيها ولا جمل وما أحداث جامعة النيلين
ببعيده عن الآباء وحريأ بنا أن نعيش ونربي أبناؤنا بعيدين من جو كهذا وا، كان في الوطن
ولنا عوده .
أبوقصي
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: مجدي عبدالرحيم فضل)
|
أخي العزيز أبو قصي !!!
مودتي ,,
مع شكري الجزيل لهذا المرور الجميل وفعلا زي ما قلت أبنا الشتات في داخل الوطن هم اسوأ حالا من
شتات المهجر ,, لا أختلف معك في أي كلمة وردت في مداخلتك ,, ربنا يحفظك لأولادك ولأعضاء المنبر
شكرا مجدي أبقى معنا ,,
| |
|
|
|
|
|
|
|
|
|
Re: أبناء الشتات ,,,, وناس مرقنبو قرنبو برة !!!! (Re: عواطف ادريس اسماعيل)
|
______________________
الأستاذة : عواطف إدريس
في البدء .. شكراً على هذا الموضوع وكان لا بد لي التداخل فيه منذ فترة ولكن حال بيني وبين أن أفعل بعض المشغوليات وكثير من الكسل الذي أشتهر به. فلكِ من كل الاعتذار.
موضوع "أبناء الشتات" موضوع لا يقل حيوية عن أي موضوع يمس المشهد السياسي أو الاقتصادي السوداني، إذ أنهما معاً كانا بطريقة مباشرة أو غير مباشرة السبب في هذا "الشتات".
هذا من حيث المبدأ..
أبناء الشتات " وأنا واحد منهم " يعتمدون فيما يتعلق بمعرفتهم الوطنية أو ما يمكن أن نسميه اعتباطاً بالتربية الوطنية ، مما يتلقونه مباشرة من الوالدين. ومن خلال ربطهم عاطفياً بالوطن عن طريق وسائل إعلامية مصغّرة أو مبسطة وهذا ما ينوء به عاتق الوالدين. ولكن تظل مسألة الانتمائية مسألة شديدة الخصوصية. فالانتمائية لا يتم تلقينها للأجيال بأي وسيلة من تلك الوسائل.
الوطن بالمفهوم العاطفي هو في الحقيقي "الوطن الجغرافي" ولكن الوطن بالمفهوم الثقافي أو الحضاري هو المكان الذي تشعر نفسك منتمٍ إليه إما بعلاقات إنسانية أو بنا اقتصادية أو غيره. وهذا ما لا يتوفر عند أغلب أبناء الشتات.
ويأتي الأمر الأكثر أهمية على الإطلاق، وهو مرحلة الانتمائية في طورها الشرنقي ومحاولات اغتيال هذه العاطفة في طورها هذا وذلك من قبل أبناء "مرقنبو قرنبو" مما يصدر من سلوكيات لا تنم عن تفهم كامل لهذه الفجوة الزمنية والثقافية بينهم وبين أبناء الشتات. وما يترتب عليه من سلوكيات تنفرهم وتجعل مسألة الانتمائية شبه معدومة. فالمسألة ببساطة هي حسابات ربح وخسارة بالنسبة للآخرين فترجح كفة المهجر على كفة الوطن، حيث لا اختلافات ألسنة ولا مفاهيم ولا ثقافة ولا إيقاع حياتي ولا سخرية متوفرة.
وما نسمعه من نكات وسخريات تطلق على سبيل الترفيه ، هي واحدة من الأسباب الأساسية التي تؤدي إلى استحالة نشوء عاطفة الانتمائية في ظل ظرف اقتصادي يجعل الوطن الجغرافي منطقة طرد سكاني حتى لأبناء "مرقنبو قرنبو"
نحتاج إلى مزيد من الشفافية والتفهم لاحتواء هذا العضو الأصيل في محاولة إعادة تأهيله ودمجه في الجسد دون أدنى مخاوف من عدم قبول الجسد لهذا العضو الدخيل، لأنه ببساطة لن يكون دخيلاً أو هو ليس كذلك في الواقع.
أشكرك على طرق الموضوع ولك التحية مجدداً
| |
|
|
|
|
|
|
| |
عواطف ادريس اسماعيل
حليمة محمد عبد الرحمن
هاشم أحمد خلف الله
عبد المنعم سليمان
Abdlaziz Eisa
Salah Waspa
malik_aljack
الطيب شيقوق
Muna Khugali
abubakr
بكرى ابوبكر
صديق الموج
خالد المحرب
خالد العبيد
رأفت ميلاد
امير عوض الجمري
الصادق صديق سلمان
mamkouna
Kamal Karrar
khaleel
Mustafa Mahmoud
Raja
Abdel Aati
abas
خالدة البدوي
بدرالدين كاجوري
الطيب بشير
الطاهر عثمان
مجدي عبدالرحيم فضل
Nader Abu Kadouk
عبدالرحمن الحلاوي
ماجدة عوض خوجلى
عبد الدائم سيد أحمد
مصطفي سري
حبيب نورة
هشام آدم
نهال الطيب
فيس بوك
تويتر
انستقرام
يوتيوب
بنتيريست