ما تجوا نهدر دمهم اول

أفو أفو آ ود الشريف .. كيفن كلامك ده؟ يازول العنف ده جاء من مكان تانية .. ولو ما اخاف الكضب أقول جاء مع المدارس .. أهي برضو مدارس. لكن الناس الأشتهروا بذبح الأنعام في المنازل هم من تبقى لنا لاجترار الافتخار بخصالهم ونفائلهم. العنف وهدر دماء البشر ده يازول شغل افندية بس .. وكمان أنا مقتنع بأن اي زول كريم من الناس البينحروا في المنازل لإكرام ضيف .. ما ممكن يكون عنيف إطلاقاً. العنف والشح والبخل بنات أعم. براك لاحظ للناس العنيفين .. وعلاقتهم بالجود .. المرتبط عندنا بالنحر
خلينا في البداية مع حقوق الانسان القلبوه حيوان ده .. تتوفر ليه حقوقه أولاً حتى بعد داك نفكر في ترف حقوق الحيوان الحقيقي

أنا من قبيل بعاين في البوست ده .. وكنت عايز أقول لتماضر اقلبيهم لي غنم وبقر وإبل .. واسعليني بعد داك من الضبح. يا تماضر أنا ما فنان ولا حاجة .. يعني ما زي ابو غيداء. أنا همباتي يا بنيتي، يعني بعرف أضبح

فعلاً يا تماضر بتذكر الزول الكتب عن العنف اللفظي .. وهو الاستاذ الرحمابي .. نقلاً عن قريبه الدكتور الأديب (نسيت اسمو والله) الحلاوي

الحمد لله القلتي انو الضبايح والحنان يلتقيان .. أها كلامي صاح تب وبعد ده النمشي انوم .. الليل أمسى

الأخ ياسر .. أول مرة أسمع بوجود سودانيين (قربت أقول مثقفاتية) يعرفون هذا الفرع المدعو بالشناتير!!! حيرتني مرة واحدة

علاقتي بالأستاذ محمود أعرفها أنا ولا رابط بينها وبين ما يسمى بتنظيم الجمهوريين (مع الاعتذار) .. أحترم هذا الرجل لبداوة وتصوف في ّوفيه هو أيضاً .. هذا هو الجامع بيني وبينه. صفة البداوة هذه قابلة للتأويل السلبي عند البعض .. وهنا اختلافي مع هذا البعض. فالبداوة التي اعرفها هي هذا النقاء والجود بالنفس فداءً للمبدأ (يعني عوارة في نظر البهلوانيين الهاربين) .. في زمن أصبحت فيه الفهلوة والحربائية وتحميل الغير مسئولية الاخفاق الشخصي سمة لكل مثقفياتنا. ولا داعي لذكر أسماء هنا
أها .. محمود هو الفحل .. ومن يشيدون بفحولة الفكر الجمهوري هم أبعد عن الفحولة .. وكان عليهم على الأقل أن يتشبهوا بمحمود في موقفه. أليس التشبه بالكرام فلاح؟
فتشبّهوا إن لم تكونوا مثلهم ..... إن التشبه بالكرام فلاح
لا .. سوف لن يتشبه مثل هؤلاء بالكرام من أمثال محمود .. سوف يقتاتون على دم محمود

ياخي أنا انفعلت. في النهاية .. محمود محمد طه ما مفروض أي زول يتبعه .. لانو ما في زول بيقدر على الزلق الكان بيمشي فيه. والله الكلام البلدي ده بيعجبني بالحيل. محمود دربو زلق .. والباقيين ديل البيحاولوا يذكروه ببعض حروف قول ليهم انقرعوا .. وخليكم في طينكم البتخمجوا فيه ده

أنا صاحي يا ياسر .. بكرة بطالة (أها زي ما كانت حبوبتي بتقولها) .. والليلة لحد الصباح بصحى .. لو قدرت .. لكن الكبر دخل .. شنتير أصبح من أرباب المعاشات
يا سيدي ياسر .. رأيي في محمود ثابت فهو إنسان سوداني فارس لم يتزحزح ولم يهرب مثل الذين نعوه وذرفوا عليه دموع التماسيح .. ولا أود قراءة المزيد . فصفحة الفكرة عندي وتصفحتها من أولها الى آخرها .. ولم أخلص الى شيء غير الذي سبق تشكّله في ذهني: محمود الفارس الرجل المتفرد في حياته ومماته .. وأنا أكتفي بذلك لأني لا أميل الى القراءات الدينية الفلسفية كثيراً (في الإسلام فقط) .. تكفيني المواقف .. رغم كلفي بقراءة الأديان المقارنة. ولا أظن أن أصبح جمهورياً يوماً ما .. لا علاقة لي بذلك

تقوم تكتّر معاي كلامك أنا بقول أسماء الذين ذرفوا دموع التماسيح بعد ده. أها لو ما كتّرت كلامك معناها أنا هرشتك .. بلغة العصر

هنا يا بيان جيتي في اللحم الحي .. عشان كده أنا قلت لصديقي ياسر الشريف ان الذين ذرفوا دموع التماسيح على محمود لا يساوون قلامة ظفر منه .. وهم هاربون ويتوسلون بالأجنبي لإنقاذهم من الشر الذي مهدوا هم له بأيديهم

روضة دي والله انا نفسي كشت منها .. مع اني بقرا كتاباتها .. وحسيت بان أسلوبها بقي مختلف .. لكن طريقة دخولها الأولى تركت في نفسي غصة لم أستطع التغلب عليها بعد

روضة .. انتي ليه دخلتي بالطريقة الغريبة ديك؟ مع انك قادرة تكتبي بطريقة عادية وأخوية كفيلة باقناع الكثيرين .. ومحفزة للأخذ والرد معك؟

التسامح صفة انسانية نبيلة .. ويجب حصرها في دائرة العلاقات الشخصية والاجتماعية فقط .. أما في مسائل الادارة العامة والحكم والسياسة فالتسامح لا يجلب غير اللامبالاة والاستهتار بالمواطن وحقوقه .. والدمار والكوارث .. .....الخ