|
|
 تانى يا خدر وتماضر الخنساء :رد الجميل وفكرة التغيير المبدع
|
شاعر أثرى وجدان الشعب بأجمل الكلام ، كلام يتسامى بشعب ويضع بدائلا للواقع القبيح فمكان الطلقة عصفورة ومكان السجن مستشفى، شاعر السلام والقيم الرفيعة محجوب شريف، طلب من أصدقائه الحادبين على التغيير المبدع، أن يروجوا لفكرة رد الجميل .
والفكرة بسيطة جاهزة للتنفيذ، عالية القيمة ومتغلغلة فى فلسفة التكافل الاجتماعى الذى ينادى به العرف والدين والوجدان الانسانى الخير.
بدأ الشاعر بعد رحلة علاجه الموفقة واسترداد العافية التى تمناها له محبيه على طول وعرض البلاد، بدأ يفكر فى هذا المد الوفير من العطاء والذى لا تحركه ظنون ولا تشوبه شائبة، كيف يعطى الانسان السودانى بهذا الوفاء وينام جائعا ومظلوما ودمعه حار على وسادة الأمل.
قال الشاعر تعالوا نصنع الأمل ولا ننتظره
بدأ بامرأة جارة، اسمها حاجة سعدية، حاجة سعدية هذه كانت تمد كورة الملاح وصحن الكسرة من فوق الحائط لمريم ومى عندما كان ابوها وأمها خارج البلاد ينشدان العافية لمحجوب شريف، هذ العطاء الخجول الذى لم ترتقب منه حاجة سعدية جزاءا ولا شكورا ، هو الذى فجر الفكرة، وعندما عاد محجوب شريف الى البلد النبيل ذاك، انشأ لها دكان لم يزد كلمة أخرى عندما طلب من أصدقائه التبرع للدكان بالبضائع قال لهم: "من ليمونة لى شوال سكر"
فامتلأت الارفف وتدفق العطاء، انتقلت الفكرة الى أسرة أخرى حالت ظروف أفرادها من مواجهة ضغوط الحياة ، وفتح دكان "تانى" فى الكلاكلة ، امتلأت الارفف وانتعشت هذا الاسرة الثانية وصار دكان حاجة سعدية يمد الدكان الثانى بالبضائع والمحبة ، وافتتح متجر آخر فى حى آخر لظرف آخر ، وتدفق العطاء.
محجوب شريف شاعر العطاء والسلام أراد من اصدقائه ان يروجوا للفكرة وأن تفتح متاحر أخرى لأسر أخرى وما أكثر هذه الاسر.
قال أنه لا يتحرك الا من وازع الانسانية ، فالفكرة لا تحتوى على مضمون سياسى ، ولا أقتصادى يعود له هو أو حزبه، انه الانسان الذى يستحق الاكرام مهما كانت مشاربه.
محجوب شريف يطمع فى أن يكون العطاء الذى منح له ، بحر لا ساحل له، فهناك أطفال وعجزة ونساء وأسر بلا عائل وظروف طبية واجتماعية تمنع كثير من ابناء الوطن عن العيش الكريم ..
ويهيب بكل من يمنح أن يمنح فى اتجاه التكافل هذا وأن يمنح بروح "رد الجميل" والجميل هنا هو القيم التى أنتجت وعاء لغوى فيه "كيف اصبحتو"؟ و"أريت حالكم زين" و""تسلمو" وتصبحو على خير؟" انها قيم الخير والجمال نرده لبعضنا البعض من أجل أنسان حر وعيش كريم.
فهلا رددتم الجميل وهلا أكثرتم من العطاء لمسكين يطلب الستر والكرامة؟
اللهم هل بلغت ...اللهم فاشهد!!!
|
|
 
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: Tumadir)
|
أنا عارفة يا ناس البورد البعيد من العين بعيد من القلب ...
يلحق لامن البوست ده يغتس وتحاسبونى بفترة الغياب الطال ...الا يكون فى كلام تانى
عموما لكم أشواقى الوافرة ومحبتى المترعة وأسفى العميق على عدم المتابعة والانشغال عنكم
وأكتوبر واحد وعشرين يعود علينا وعليكم بالخير والوفاء
أمبارح استكتعنا بأناشيد أكتوبر مع الفنان عبد الهادى فى ألبنى نيويورك
حيث أقيم حفل جميل لجمع التبرعات من أجل ضحايا التعذيب بقيادة زين العابدين وكرن الامريكية وقد قدم الدكتور محمد القاضى ورقة دسمة عن التعذيب تاريخه وحاضره فى العالم ..حتى أن أستاذه بجامعه هناك طلبت منه الورقة ليدرسها طلبتها فى الجامعة ..وانا أحرض الدكتور على نشر الورقة بهذا الموقع
وأن يقوم بترجمتها للعربية "والا انا سأقوم بدلو" ...ورقة جميلة وضافية ومليئة بالمعلومات المفيدة ..فشكرا يا دكتور...
قلت ليكم بنات المنطقة الشابات هناك اتعلموا رقص فرقة عرائس النيل وقدموا عرض جميل؟؟ سميناهم
brides of the nile 2
كنتو رائعات يا نبات يا مبدعات ..
برضو قدمت فرقة "نادوس" شابات جميلات غنوا طورال مع الفنان عبد الهادى زكانت فقرة ممتعة بقيادة معتصم من أريزونا...معليش يا معتصم ما بعرف اسمك بالكامل لكن عمل جميل وجدير بالاحترام والتقدير...
وشكرا لمجتمع المنطقة اسكنكتدى وكل النساء المحترمات الذى طبخوا أجمل "الطعام" برضو دايرة أشيد بالمجهود المقدر للفنان التشكيلى عبد الوهاب بابكر والذى علق معرض من لوحاته ومن لوحات اولادنا وبناتنا الفنانين الضغار ..وزوجنه الكريمة عالية النقر التى قامت بضناعة شنط جميلة طبعت عليهاتعبير save darfur
الخواجات اشتروها فى دقيقتين بعشرين دولار للواحدة ...أما أختها محاسن النقر فقد وقفت وقفة "رجل واحد" فى المطبخ وساعدت المئات من الحضور على تناول وجبة سودانية جميلة وشهية مع المشروبات والقهوة ...ووشها ما صرتو ...
كما قدم طفل يافع اسمه عمرو مقطوعة موسيقية بآلة الكمان ...
كانت ليلة عامرة احتفلت بها كل المدينة سودانيين على خواجات ..والعطاء لم يتوقف الا بعد الساعة الثانية صباحا ...
يا لجمال العطاء وما أجمل الجميل و"رد الجميل" ....
| |
|
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: Tumadir)
|
Quote: لكن انا بدخل واقول ليك :ليتنا نملك قلوبا
مثل قلبه ووفاء كوفائه,ليتنى املك حسك يا
اميرة ياست الكل
عيدك مبارك! |
شكرا يا سمندلاوى يا سباق الى الخير ..وترويج الخير..كل عام وانت بخير ..واولادك مبدعين كما عهدناهم وحياتك الراقية تبث علينا الخير فى كل المنافذ
اما بخصوص التعبير "النسا الجميلا الذى طبخت الطعام" فهذا مردود مردود ...نقول بدله "اللواتى طبخن الطعام" وهاهاها
| |
|
|
|
|
|
|
|
|
 Re: تانى يا خدر وتماضر الخنساء :رد الجميل وفكرة التغيير المبدع (Re: Tumadir)
|
بالرغم من انك ما ناغمتينا يا تماضر لكن برضو بنجيك
بنحبك نسوى شنو وكل سنة وانت طيبة
اولا وين الغيبة الطويلة دى ومنو القال ليك بعيدة انت من القلوب
اها
كل الكلام القلتيهو فوق تمام ونحن اتفقنا انو انظلاقة رد الجميل
وعاصمته ستكون من هولندا ( دا ما كلامنا .. دا كلام استاذ محجوب)
وفكرنا نعمل منظمة بنفس الاسم (رد الجميل )وبى كدا نضمن استمرارية
المشروع وبعده عن الموسمية . (اها شن رايك؟)
اما تماضر وخدر ديل الراجيهم كتير وان شاء الله ما حيقصروا
ولا ما كدا يا تماضر وطارق
هوى ما بتكلموا معاكم انتو سارحين وين؟
يا بكرى ازيك وكل سنة وانت والاسرة بخير
كيف النرويج على حسك
ضياء ميرغنى
| |
|
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: Tumadir)
|
الحبيبة تماضر
وماشفتى الهكر والباص حق المكتبة ؟
وماشفتى يوم محجوب تم تكريمه ؟ شمال وجنوب غنوا
جميع ورقصوا جميع على فال الشفا المتسارع
يحل على الولد المرصع بنياشين البلد ضمة
يا له من انسان
ولمن مجدى النور عمل الفيلم بتاع محجوب ود مريم محمود
قريت فى الفيلم انه فى زول بالنبل دا
عليك الله ما بستاهل جائزة نوبل للسلام ؟
محجوب ود مريم محمود
علمنا المعنى الانسانى وغذى فكرة الجماعة من تانى
تشوفيهو مع العيال الصغار تحلفى تقولى ما اكبر منهم
مع سيد اللبن لبانى ومع سيد الجرايد زول تانى
ومحل ما يحل ريحة الامل بتبق
سعدية
خالتى سعدية يا قول مريم ومى
مشيت البيت
ومحجوب واميرة فى السفر للعلاج
جات سعدية نص الليل تتفقد البنيات
ومن الصباح جابت الشاى باللقيمات
والنفاج مفتوح يرد الروح
بنات الحلة يجن كايسات السلام ويدن السلام يهدن البيت السلام
متل ما ناس البيت قاعدين
حسيت بامان يا تماضر
حسيت انه الدنيا بخير ومحجوب ما زولا هين دلق البيوت على بعض
فى حين انه كل النفاجات التانية بقت الناس تسدها
عظيم وجليل يا محجوب
وليك تعظيم يا ود مريم محمود تعيش وتصون ما انهد وترفع بيتا بات محزون
كريم ونبيل وطبع اصيل
وليك سلام بعد ما يكون
عدد ما مسحت من دمعات
وعدد ما رجعت من بسمات
وعدد ما بعدت من اهات
ليك سلام بقدر الكون
لو يوفيك
لو يمسح عن كل مريض سعيت لشفاؤه ما ونيت
اطفال مرضى الكلى ما خليت
والهامين والنايمين على كف الجوع كم اهديت لقيمة حب تكفى الدنيا بى حالا
واحبك حب واحبك تانى يا انسان
يا زارع الامل فى الروح محل ماتروح سلام يغشاك سلام يبراك
سلام وامان سلام وامان سلام وامان يا انسان
يا انبل بشر موجود
| |
|
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: Tumadir)
|
Quote: قال أنه لا يتحرك الا من وازع الانسانية ، فالفكرة لا تحتوى على مضمون سياسى ، ولا أقتصادى يعود له هو أو حزبه، انه الانسان الذى يستحق الاكرام مهما كانت مشاربه.
محجوب شريف يطمع فى أن يكون العطاء الذى منح له ، بحر لا ساحل له، فهناك أطفال وعجزة ونساء وأسر بلا عائل وظروف طبية واجتماعية تمنع كثير من ابناء الوطن عن العيش الكريم .. |
قال أنه لا يتحرك الا من وازع الانسانية ، فالفكرة لا تحتوى على مضمون سياسى ، ولا أقتصادى يعود له هو أو حزبه، انه الانسان الذى يستحق الاكرام مهما كانت مشاربه.
| |
|
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: Tumadir)
|
تماضر مساء الورد
وكل سنة وانتي اجمل
وكل حبايبك بخير
محجوب انسان..وقلبو مساكن شعبية
ياسلام ياتماضر وكت تلقيهو واقف مع الاطفال يسالهم كده بي اهتمام
ويستمع ليهم بي اهتمام اكبر
والبساطة
وكت مشى لبس البدلة الجاتو هدية وعرضها في الحفل في مزاد
والناس تزايد
وهو مبسوط
الحفل كان ناجح الحمدلله بفضل مجهودات احمد المصباح وضياء وامنة وخالد وخدر والموسيقيين وكل الناس الشاركت
زيادة على الحضور الكبير
تماضر سعيدة انو رد الجميل خلانا نقرا حروفك
عاملة اسمك السمح ده
محبتي
| |
|
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: Tumadir)
|
سلمى الشيخ سلامة
وعادل عثمان
ومحمدين محمد أسحق
وتراجى مصطفى
وكمان تماضر الخنساء؟؟
طيب الفضل منو؟؟
الدار عمرت ..والفكرة كبرت ...
شكرا يا جميلين على زيارتكم المتعددة الجوانب المترفة بالانسانية ...شكرا يا سلمى على كتابتك الراقية عن الانسان عالى الانسانية المرهف أخونا
واخو كل كل زول محجوب شريف
شكرا ياعادل على وجودك هنا
شكرا يا تراجى على تحياتك وزيارتك للبوست ...واتمنى انك انتى وأولادك بخير وعافية وطيبين ومرتاحين ...
شكرا محمدين على الوقفة الصادقة وكل وقفاتك النبيلة هنا وهناك
وشكرا يا تماضر على البديتوه وناوين نتمو معاكم ..شفتك فى الفيديو واتفاءلت بيك بت شديدة وفالحة وما بتخاف ومبدعة وبتحرك فى السواكن ...زى المهيرات وملكات النيل من حلفا لى نمولى ...
"ما أسمح من أسمك يختى ..." هههههه مش قت ليك البسموها تماضر دى ما خلو ليها شى ؟؟؟ هههههههه تحياتى ليكم كلكم
ويللا كلموا اصحابكم يزوروا البوست ...ويردوا الجميل....
| |
|
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: Tumadir)
|
الصنه مع الشعر
اها .. ده الشعر شخصياَ
والضحكـ و القرقراب
و عشة كلمينا ميري زكرينا
وشاعر الشعب يغازل النساء الجميلات
الفنان محجوب يا تمادر مزعج جدا .. رد الجميل يبدو انها فكرة مسيطرة عليهو تماما
كنت ينتهز الفرص عشان اراقبو و انا اصلا عندي قلق انت عارفاهو و صحة محجوب ما عادت تحتمل كل
ذلكـ الارهاق .. ازكر انو إبان احتفالات القرن بمحمد وردي و انا اتابع في الحفل من علي البعد
ضايقني جدا انو وردي ما قام من كرسيهو و طلع المسرح غني مع من شاركوه و اكتفي بجلوسه و مشاركته
من هناكـ و وجدت له عذر المرض .. هنا و نحن نحتفل بمحجوب كنت منزعج جدا من حركة محجوب الشديده
وانكباب الناس عليه و جلده و ثباته في رد النكته بالنكتة و العِرفه بالمعرفة و المطايبه
عقدت مقارنه سريعه في حفل رد الجميل و طلعت لصالح شاعر الشعب ضد فنان الشعب لكن النتيجة ما
ارضتني و تمنيت انو استاذ محجوب ما يرد الجميل .. حياة شاعر يا تمادر اهم من رد الجميل
اريتو يردو لينا شعرا و نثرا و موسيقا نحن كفانا ولا شنو ؟
محجوب عمل جرد حساب لكل مواقفو منذ بدايات تكوين وعيو الاولي تحدث عن اغنيه (ياحارسنا و فارسنا)
و اعترف بجسارة يحسد عليها انو وقتها كان معلم ريفي صغير قادم الي المدينه ولا يحمل اي انتماء
سياسي .. قال ان حارسنا و فارسنا كانت انفعال مواطن عادي و موقفو ساعتها .. شفتي كشف الحساب
ده كان عميق لي ياتو درجة و اتخيلتي المشهد اظنكـ اسه
محجوب لم يزكر احدا بسؤ علي المسرح او في ونسات جانبيه رغم محاولة الكثيرين لجرجرته لمقعد
النميمه بحجة تبدل مواقف الاخرين .. اكتفي فقط بالشعر و الموسيقي و الونسه مع الجمهور
احتمال ارجع تاني لو الانفلونزا دي خفت شوية
___________
كاميرا منعمشوف
| |
|
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: Tumadir)
|
انت فى كاميرا منعمشوف الما شفناها سوت شنو دى ولا فى كاميرة وصفك الباهية ...
ما بتقصر يا خدورى وما بتبخل بالتعاطف وشوف الحاجات الجوانية المهمة وتعكسها للناس بقلمك المتمر ومقمر ...من كل غرض الا الكشف عن الحقيقة ...
يللا كلم لى أصحابك وأولادك العيانين وانت سلامتكم من الانفلونزا ...وحقو تحققو فى موضوع انه اسمهان ما مرضت معاكم ليه؟؟ الحكاية دى فيها "انة"
ههههه
| |
|
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: خدر)
|
محجوب شريف
سلام جميعا
يزداد فخرنا كل يوما يلي الاخر بهذه الهامه العاليه الفريده
والتي حباها الله بهذه النفس الابيه
الانسان محجوب شريف
والذي تقف معه مفرداتي عاجزة في ان توفيه حقه من الثناء وتعدد ماثره
فحقيقة اننا فخورون بهذه الشخصيه الفريدة ذات السمعه الطيبه
هذا الرجل الذائع الصيت في كل المحافل
والذي لم اري مثيلا له مطلقا
اتواري حياءا من تواضع عباراتي , في وصف ما يتمتع به محجوب شريف من جماليات , تزين جيده
خاصة و انسان السودان عامة , لما بشعر به محجوب شريف من احساس بالمسئوليه تجاه بنو وطنه
ووطنه, بتجرد جم , وتقديم يد العون للاخر دون منا ولا ازي ,( هذه اليد التي لم تمتد الا لفعل
الخير للغير) منطلق من توادد وتكافل فطري جعله منهجا له
فهلا استقينا منه و جعلناه منهجا لنا وللاجيال القادمه ؟
لله دره ,,,, لله دره
احمد عبدالوهاب
| |
|
|
|
|
|
|
|
|
|
Re: تانى يا خدر وتماضر الخنساء :رد الجميل وفكرة التغيير المبدع (Re: خدر)
|
سلامات يا تماضر ..
طال غيابك والله ..
ما تقومون به ، ويقوم به أستاذنا الجليل وأبانا المحبوب محجوب ،
شيء عزيز يرفع من وتيرة الأمل في هذا الظرف القاسي الشين ..
تحياتي للأخ محمد القاضي ، الأب العالي الجميل ، والناشط الحقوقي
الذي ساهم من زمن ، ولا يزال ، في إعلاء صوت ضحايا التعذيب بجهد
وإنسانية وإحتراف ..
يافطة دكان رد الجميل بأمدرمان الثورة .
السيدة سعدية ..
___________________
طلب :
هل بإمكانك إرسال ورقة أستاذ محمد
على عنواني ؟
| |
|
|
|
|
|
|
| |
Tumadir
سمندلاوى
altahir_2
bushra suleiman
سلمى الشيخ سلامة
Adil Osman
Tragie Mustafa
محمدين محمد اسحق
خدر
يازولyazoalيازول
طلال عفيفي
Adil Isaac
فيس بوك
تويتر
انستقرام
يوتيوب
بنتيريست