من المسؤول عن هذه الفضيحه وكيف يا قاطني امريكا ترضون بذلك

I will do it bit by bit in Arabic; on-screen typing.o

تماضر بنت شيخ الدين بن جبريل .. ربنا يديك العافية. الشغل الشفتو أنا في التلفزيون بتاع البورد ده تبعك انتي؟ أنا لو عارف كده أكان نبّذتو!!!. علي الطلاق علقت عليه، إعجاباً، وما عارف العملو منو زاتو. لو عملتيه انتي .. يبقى انتي بالحيل فنانة ومشنترة كمان. أنا شاهدتو كلو في الفيلم الاتكرم أخونا أبو فاطنة (فاطمة؟) بإبلاغنا عنه .. واتكيفت من البنيات البيرقصت أربعة وعشرين قيراط. ونظرتي ليه كانت مختلفة تماماًَ عن نظرة أبو فاطنة .. وأنا بعذرو في نظرتو دي لحدٍ ما. نظرتي كانت فنية (وهمباتية برضو) خالصة .. لكن يبدو ان الأخ أبو فاطنة نظر للموضوع من زاوية مختلفة أنا لا أدري عنها إلا بعض شيء. وعشان كده داير أطمّنو شوية وأقول ليه: والله يا شيخنا الرقيص والردحي الشفتو أنا في الفيلم ده اياه زاتو شغلنا .. وكنا بنسويه في صقيعة الله الواحدة دي عليك أمان الله. والشيء الأهم: يا زول ما في زول ماشي يتغزل في بناتنا ديل خارج حدود الغزل الإعجابي المباح .. وربما يكون كل الأمر عند الآخرين إما إشادة بالعرض أو استياء من العرض. وأنا أتمنى أن يكون الحاضرين من الخواويج شافوا البدع دي واتكيفوا .. زي ما أنا أتكيفت. ولعلمك يا اخونا ابو فاطنة، والله الفاصل بتاع أدروب والبنيات البيرقصن مع غناه أعدتو (يعني كررتو) تلاتة مرات .. وقربت أقوم على حيلي من الكرسي واصقع صنقور الطربيزة بـ رتبة تقلع آخر مسمار في مركوبي.

العمل جميل .. ومحترم .. حقيقة .. وأنا شخصياً ما شايف فيه اي هيافة .. لأنو لو فيه اي هيافة .. علي بالدين وكتاب الدين ما أجامل فيه لا تماضر ولا يوسف الموصلي .. رغم احترامي غير المحدود ليوسف الموصلي .. واحترامي المحدود لتماضر بت عمنا شيخ الدين ود الرتينة أم الشباك بت عجبنا.

أسمعوا .. ليه ما شفت لي سوط عنج وبُطان في الدكنابة دي؟ أفو أفو!!!! شغل زي ده لازم يكون فيه جَلِد .. وعنجاوي وروار يجر بالواطاة .. والماسكو خالف كراعو فوق ضهر عنافي.

الهترشة سمحة .. لكن داير أمش أسلم على ناس الفريق الـ بيهناك .. الـ من تالى الصعيد .. باقي عندهُن بواقي عرس كدي.

أها .. أبقوا عافية