|
دعواتكم لزميلنا المفكر د.الباقر العفيف بالشفاء العاجل
|
|
 Re: بالله يا جماعه لو كلامى ده غلط ...كلمونى (Re: تاج السر حسن)
|
خلاص من الليله ..انا حاصنفكم حسب قربكم او بعدكم من ام كلثوم
البريدو ام كلثوم يقيفوا بى جاى...وتانى لا بيناتنا ..تهانى لا عزاء لا "رائع" لا "مبدع" لا " الف شكر على طلتك"
هاهاهاهااها
والما بريدوها يقيفوا بى هناك..ومن حسه " بوست جميل" " وروعه" "ودا الكلام" و"تسلم" "وكل عام وانتم بخير" " والف مبروك"
وبالله تفرقوا لينا ما بين الشعر الغنتو ...وبين ...الغنا زاتو
ويا بدر الدين شناه..ما تخاف...فى الموضوع ده بالذات ..مايكون ليك شاغل
| |
 
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
من حقك يا بت الشيخ ودة مسألة عادية جدا
وخاضعة للتذوق الشخصي فقط00000
لكنها كانت تعيد الأغنية بصورة متواصله ، فرجع (ليهو جنو القديم) ، قام وقف على طولو وقال ليها
أنعل .... هو نحنا ردناك با لساهل ؟؟
العزيز تاج السر
داك طبعا كان زمن الطرب والتطريب0000 وكان أيقاع الحياة بطيئا
يسمح بذلك0000 وهو ما لايمكن ان يحدث الان مع هذا الايقاع
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
كلامك صاح ميه الميه
انا شخصيا بكره الاغانى العربيه عديل كده
و الشى البجننى و بعمل لى نفسيات لمن امشى عرس سودانى و القاهم مشغلين الزفه المصريه بدل اغانى السيره بيتاعتنا
احييييييييييييييييييييييييييييييييييييييييييييييييييييا
بتمغص مغصه و مرات بحرد العشاء بتاعهم
النصرى
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: alfatih)
|
ياجماعه بتصدقوا انو فى ناس اصدقاء عزيزين جدا على عبروا لى عن انهم .. زعلوا منى جد جد ...؟؟؟؟ والله انا دى برمى روحى فى جنس محن!!!
معليش والله ما بستحمل غناها ...لكن برضو ما بستحمل زعلكم ...وبعد الشفتو ده ...حابدا من يوم الليله اكضب عليكم ...فيما يخص رايى بالست:
هاكم الاغنية دى ...اعتذارا عن ما لحق بكم من ضرر...
وهى من غناء حمزه سليمان ...وانا من تراب وماء....لا حيلة لى فيما احب ...ولا احب ههههههه
السابلة لحمزة سليمان اهداء الى عاطف خيري
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
أنا يا تماضر ما بسمع الا غنى سوداني
ما بطيق غنا بتاع خواجات و لا أفارقه و لا عرب و لا آسيويين
أداني طبلتها مصفحة و مقفولة على الغنى السوداني
و مش كده و بس أقول ليكي مأساة أكبر ما بحب الشعر و ما بطيق أقرأ قصيدة لنهايتها
بس عليكم الله ما تشنوا علي حرب يا ناس
حاولت أحب الشعر ...و ما قدرت...
أم كلثوم بحب ليها غنيتين بس "أنت عمري" و "الأطلال" لابراهيم ناجي
أنت عمري رومانسية شديدة
و بتقول فيها
أنت عمري اللي ابتدى بنورك صباحه
و اللي شوفتو قبل ما تشوفك عينيا
عمر ضايع يحسبوه ازاي عليا
يا راوية أكيد حتكون عندك و بقيتي اكسبيرت في هندسة تنزيل الأغاني نزليها لينا لو ممكن
| |
|
|
|
|
|
|
|
|
 Re: بالله يا جماعه لو كلامى ده غلط ...كلمونى (Re: Nada Amin)
|
الأخت ندى تحياتى
ذكرتينى بصديق مثلك لا يستمع الا لغناء سودانى ، وكنت ومعى صديق آخر نقيم فى مكان واحد بالسعوديه ، نستمع الى الكثير من المطربين من أماكن مختلفه ، طبعا الغنا السودانى ، أم كلثوم من مصر ، فيروز ، الدوكالى من الغرب ، محمد عبده ، عبدالكريم عبدالقادر الكويت، سعدون جابر من العراق وقبل (كاظم الساهر)، وعديد من الأشرطه الأثيوبيه.
فصاحبنا داك كان يتغاظ ومسمينا(السدنه) ههههههه.
صدقينى الفن لا وطن له.
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
أستاذة / تماضر لو الحيت عليك ح تحبيها صدقينى.
فى مرة حكوا ان الأمير / عبدالله الفيصل ، وكانت بينهما مودة شديده ،دخل الى مكان فيه أم كلثوم تغنى لوحدها، ولم تشعر بدخوله ، فى صالة فندق مغلقه، وكانت أم كلثوم تغنى لنفسها وتنزل منها دموعا غزيره ، وعندما انتهت من اداء الأغنية وفؤجئت بوجوده ، مسحت دموعها وبعد ان سلمت عليه ، قالت له :- (يا بختك اليوم سمعت ام كلثوم بتغنى) !!! يعنى كل ما سمعناه من ابداع منها لم يكن غنى.
كذلك عندما جاءت وغنت فى المسرح القومى السودانى ، ولبست الثوب السودانى ، كان وزير الأعلام / وقتها عبدالماجد ابوحسبو ، ومن حضور الحفل الرئيس الراحل أسماعيل الأزهرى ، وشيخ/ على عبدالرحمن ، وهو قاضى شرعى !! كان رجلا غريبا.
لاحظت ام كلثوم أن الحضور السودانى ، لا يفعل مثل المصريين ويقاطعونها بالتصفيق اثناء ما تغنى فتجد نفسها مضطرة لأيقاف الموسيقى، أستعجبت لذلك وسالت ، وعندما اجابوها بأن الشعب السودانى شعب ذواق ، يترك الفنان يغنى وبعد ان يخلص من ألأغنية
يصفق طويلا، فأحترمت تلك المساله وقدرتها.
توعدنى اسنين وأيام وتجينى بحجج وكلام ، ده كلام ؟؟؟
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
نسينا النوم وأحلامه
مع ام كلثوم نتسامى مع الفرح يطل من النغم القيثارة
مع اللحن والأداء
منذ خمسة وثلاثن سنة
ومازلت تعجبني ام كلثوم
كنت اتابع حفلات الخميس بالراديو
وكنت يومياً اتنقل من محطة لأخرى
ويستحيل ألا تجد اغنية لأم كلثوم في اي وقت في اي من المحطات العربية على الراديو
في اف ام ابوظبي بالنهار بعد الرجوع من الدوام نرتاح مع لحن لأم كلثوم
لقد تابعنا مسلسل حياتها بأداء صابرين واعادته في محطات التلفزة العربية
نتمنى ان يبلغ معظم الفنانون العرب ما بلغته من مكانة مرموقة وأداء متقن
لقد اذاع التلفزيون السوداني في برنامج من الأمس بعض اللقطات التي تصور زيارة أم كلثوم للسودان والتي قوبلت فيها لأول مرة في دولة عربية مقابلة رؤساء الدول واستقبلتها الجماهير وحفت بها في الشوارع بصورة لم تتصورها ولم تنساها
ليس في هذا البوست مما يقلل من شعور الأخت تماضر التي هي ممن يملكون حساً مرهفاً وتقييم صحيح للفن والمبدعين والمرموقين
كذلك لا يعني الإقلال من قيمة الفن السوداني الرفيع
والعطاء الليبي في أداء الموسيقار عريبي
والفن التونسي الراقي الشعبي والحديث
والأداء الجزائري الذي دخل مجال العالمية
والفن المغربي مثال جيل جيلانة
والموريتاني في أداء عائشة
الأفريقي في أداء مريم
وهلم جرا
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
حاشاك انتي من الغلط
تصدقي انازيك يا تماضر قدر ما حاولت قلت كدي أحاول اسمع غنا الفنانه البحبوها الناس كلهم
دي لكن ما قدرت لقيت نفسي من اول كلمتين بسرح وبنسي انه في زول بغني او تلقائيا بقوم اقفل
الراديو وبالمناسبه انا عشت في القاهره فترات طويله لكن برضو ما حبيت ام كلثوم... وأعتقد ادا
كان في كوكب شرق فعلا... فاللقب تستحقه فيروز اكثر من ام كلثوم
ولك مودتي
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
شنتير
انا بحب الموسيقى العربيه
كتير من الفنانين الكويتيين والخليجيين وطبعا ناس مرسيل خليفه ديل وجوليا وعبدالله مين كده ...وطبعا فيروووووز
وهاجات بى شكلى ده
لكن الست؟ غلبتنى غلبتنى عديييييل كده ..مع احترامى الشديد لعشاقها ... بس بعد ما الغنية بتاعتها تخلص ... لو بتخلص
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
يا بت الشيخ ود جبرين .. الكويتيين والخليجيين ديل ايقاعهم مليان هندي لحد الحلقوم .. وكتيرين منهم بستمع ليهم وما بكون عارف نفسي بستمع لموسيقى عربية وللا دلوكة سودانية. اي والله ايقاع الدلوكة (بس شوية مشاتر، مش مشنتر) زااااااااتو عند الخليجيين .. أها دي مزيكة عربية؟ دي مزازيك هندية أو شبه هندية.
والله مارسيل خليفة ده أنا ما معاك فيه .. لله في الله كدي .. مع انو عمل لي مشكلة مع عروسة المستقبل!!! مستقبل مين يا "قدع". البنت بتحبو .. وأنا بقول ليها شغلي لي أبو داؤود .. تقوم تقول لا لا خلي مرسيل ود الخليفة. يا بت يخلفوا ليه الكيْ في شِدقو .. أديني عبد العزيز ود داؤود. أها مكانك سر .. مع ابو داؤود وبادي ود أمحمد ود الطيب .. والعشرة الكرام .. وهلمّ جرجرة.
أنا بحب شعبان عبد الرحيم .. والنبي بحبو. بس أبعديني من البلاوي دي. يا ربي يكون مارسيل ود خليفة ده زي سيد خليفة؟ والله لو زيو أنا معاك .. لكن مو أياهو .. دحين أبعديني منّو تب. بيني وبينو العود اليابس
يا زول أنا غير المزازيق السودانية (القديمة) شي بوّظ على أضاني دي مافي. لكن رضيان بيها. الذوق ده ما فيه مجاملة.
وتسملي ..
يا ناس الموصلي .. ما تفتونا يا اخواننا. الايقاع الخليجي ده مش هندي أو جايي من البطانة بتاعة بادية السماوة؟
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
ينصر دينك يا استاذ خليفه ,,,,,,اقصد شنتير
يا تماضر
ما يهرشوك,,,,,,,,ام كلثوم دى غناها مسيخ و لايوك
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Elnasri Amin)
|
مسيخ ساي؟؟؟؟؟ ياخي ده يعمل ورم في الفشفاش والإمعاء الغليظة .. وأم التلافيف. أمانة الليلة يا ام كلتوم ما وقعتي وقة ما سميتي فيها.
راوية .. اتفاق الصباح داخلة فيه أم كلتوم دي؟ أكان داخلة فيه .. أها هدا طرفي منّو.
يا ليييييييل يا لييييييييل يا عين
النصري .. إنت زول كويس. أها ان شاء الله تكون بتحب محمد الأمين بتاع السودان؟ دي زيادة كلامي ساي .. ما تجاوب عليها إلا بتحت تحت.
أم كلتوم؟ .. على بال .....، الليمون بت حمودة أخير منها ألف مرة .. وإن كان سمعتوا العازّة بت قِلْبوس .. يركبكم جن راسو عديييييييييل. وبت الزبيدي ديك ما تجيبوا لي سيرتها. ها ناس والله إتوا ما سمعتوا المغاني ساي. أم كلتوم؟ الخسم الـ باللهي (دي حليفة بتول بت التاي الله يطراها بالخير) الخسم الـ بالله ما اصّنّط ليها أن بقيتن ختولي المكسيم في راسي.
أها النصري .. آخوي .. إت زول متخلف. حبابك عشرة
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
عاد يا تماضر
الله يطرح فيك بركتن
النعمنو انا الكلام دا مقطعنو لي في حشاي
ناس بيتنا نصهم قروا في مصر
وناس تراث ديل العينة البروكو في الواضة عشان يسمعوا الست
في الاول شكيت في روحي وزوقي وقلت بس معقول انا المشاترة ؟؟
وقدر ما قلت يا بت تعالي على روحك وجاملي الناس
القى الحكاية دي ماأأأأأ ياها
تاني قلت ياخي كل زول بمزاجو
غايتو الزولة دي ما بتحرك فيني شعرة ولا بقدر اصبر ليها تقول وتعيد تقول وتعيد
شفتي كيفك كلامك بتاع امس عن الطينة كل يوم بتصدق
اها تعالي لينا في بوست السقيد ( السلام يا روح البدن )
والله جنس طرب
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
العزيزة تماضر
تحياتى
أكيد طبعا ما غلطانه أبدا يا تماضر
لأنه الحقيقة الأكيدة جدا، هى إنه تذوق أى شئ، حاجة شخصية أو فردية، بداية بالأكل واللبس والشراب ونوع العطر والسجائر وإنتهاءا بالموسيقى والفنون عامة، وما بالضرورة أبدا، الحاجة البتعجب زيد تعجب عمر، واظن انه ده من البديهيات وشئ معروف طبعا ومثبت ومتفق عليه، خاصة فى الأشياء الوجدانية والشعورية، ولا يمكن فى شيئ يكون "استاندرد" عشان الناس كلهم يجمعو عليهو، وحتى لو اتفقوا عليهو بكون بشكل نسبى
والسؤال الأول، إشمعنى أم كلثوم تحديدا يعنى من دون المغنيين/ت التانين؟
لو عايز استعجل أنا الإجابة قبل ما تقوليها إنتى، ممكن أقول عشان يمكن لأنه أم كلثوم بقت رمز أو شيئ مميز إتفقو عليهو الناس لأسباب كتيرة، ودى حنجيها لاحقا
والسؤال التانى، ليه ربطتى بين تذوق، أو حتى الإستماع لأم كلثوم وبين الناس العاشو فى مصر، ما أعتقد إنه فى أى ضرورة منطقية ممكن تخلق الرابط ده، وإنتى ست العارفين طبعا، إنه فى الأمور الوجدانية أو الروحية أو التذوقية الزى دى، يا إما أصلا تكون موجودة داخل الإنسان أو ما تكون فى من أصله، صحيح أنا ممكن ألقى موسيقار أو فنان تشكيلى أو حتى لاعب كرة ما سمعته أو شاهدت أعماله أو شفت طريقة لعبة قبل كده، وأحبه جدا، وهنا ما بكون حصل إستقطاب جديد أو "غسيل وجدان" إذا جاز التعبير، لكن السبب بكون وبكل بساطة، إنه الأرضية المستقبلة داخل الوجدان، كانت أصلا موجودة بالشكل البخليها تستقبل المُدخل الجديد ده وتتذوقه وتحبه، بعد ما لقته أو لمت فيهو، بمعنى انه ما اعتقد فى شيئ يربط بين المكان كعامل مؤثر فى التذوق وبين الشيئ المتذوق نفسه
مثلا أنا بحب ماجدة الرومى لدرجة الجنون وبحب اسمع مارسيل خليفة، وعمرى ما شفت لبنان، ويمكن كمان ما بحب لبنان البلد ولا اللبنانيين كبشر، مش فى تناقض هنا، وبحب موسيقى موزارت جدا والنمسا دى ما شفتها إلا مرة واحدة وأنا عابر جوه حافلة، يعنى فيينا دى عينى ما وقعت فيها تب، وإيطاليا ما شفتها الا فى الأفلام بس، لكن بحب موسيقى بوليرو وفيفالدى، وأنا قاعد فى السودان حقنا ده، وفى نفس الوقت فى فنانين لما اشوفهم أو أسمعهم، بخلى ليهم المكان الأنا قاعد فيهو طوالى، ومش كده وبس ، ساعات كده بحس إنى بقيت عيان، من شدة ما بتضايق منهم، أها رايك شنو
نرجع لأم كلثوم والأسباب الكتيرة الخلت الناس يكونو فى شبه إجماع عليها، أو ليه بقت مقياس للذوق زى ما إنتى هسه عملتى، الست أم كلثوم يا ست تماضر، أول حاجة التكنيك الأدائى حقها متفرد جدا ولا كان قبل كده فى زيه ولا جا بعده كمان، واخونا الموصلى أكيد حيفيدنا جدا فى الحتة دى ويورينا ليها "سينتيفيكلى" وتانى حاجة الألحان الغنت بيها أم كلثوم، كانت ولا تزال أكتر ألحان متكاملة من ناحية البنية اللحنية والتطريب والجمال، وعلى يد لأميز الناس اللحنو الأغانى العربية وصاغو القوالب اللحنية على مر العصور، بدءا بأبو العلا محمد واحمد النجريدى وزكريا احمد، ثم القصبجى ومحمود الشريف والسنباطى وسيد مكاوى ومحمد عبد الوهاب، وانتهاءا بالموجى وبليغ حمدى، والأهم من ده كله نوعية الكلام الإتغنت بيهو، أو الضلع التالت فى الشغل الفنى، يعنة زولة بتغنى لعمر الخيام وأبوفراس الحمدانى وشوقى ورامى وجورج جرداق والهادى آدم وابراهيم ناجى وحافظ ابراهيم، ديل بالفصحى، وتغنى بالعامية لرامى برضه واحمد شفيق كامل والشناوى وبيرم التونسى، كلام يطرب ليهو الحجر
لأنه ام كلثوم جمعت الحاجات دى كلها، ولأنه الحاجات دى مجتمعة كدى ما اتوفرت لأى فنانه أو فنان، لحدى اليوم، ام كلثوم بقت حاجة متفردة
الحاجة الأغرب من كده، إنه فى ناس يقولو ليك لا، نحن بنحب نسمع أغانى الفنان الفلانى لمن يغنيها الفنان العلانى، أنا عايز افهم دى كيف بس، يكون نفس اللحن، ونفس الكلمات والإختلاف يكون فى الشخص المؤدى، يعنى طريقة الأداء والصوت، دى برضه داخل فيها التذوق الشخصى طبعا، بس المره دى التذوق بكون مبتور طبعا، وما دام بقى مبتور، معناه مشوه ومختل، لأنه مافى حاجة بتكون مبتورة بدون ما تكون مشوه، ولا شنو
اها نسيت لى حاجة مهمة جدا، فى جهاز بقيس الصوت وطبقات الصوت، ومعمول طبعا على اساس انه يقيس الصوت البشرى بكل اشكاله وطبقاته، لمن جو عشان يقيسو صوت ام كلثوم، لقو انه فى طبقة زيادة عندها، والطبقة دى ما معروفة اصلا ولا داخله فى الحساب
كدى بالله يا تماضر اسمعى الأغنيات دى، ولما تسمعيها ختى القناعة بتاعة انك ما بتحبى تسمعيها، على جنب، يعنى اعتبرى نفسك بتسمعيها لأول مرة، وبعد داك نشوف البحصل شنو، يمكن تنضمى لعشاق الست
- سلو قلبى غداة سلا وتابا
- جددت حبك ليه
- بعيد عنك حياتى عذاب
- الحب كله
- هذه ليلتى
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
تماضر
كلامك نص غلط ونص صاح ،
أم كلثوم جديرة بالاستماع ، غنتا غناء حلوا ورائعا في وقت لم تكن امكانياته الفنية تقارن بإمكانيات اليوم ،، ثم أنها غنت العربية الفصحي وجعلت العامة يطربون لها ويحفظون كلماتها ،، وغنت للوطن العربي وللثورة وغنت للجنود في الجبهة وغنت لنا في السودان ،، وغنت قصيدة أغدا ألقاك لأستاذنا الهادي آدم ،، أسمعها ويتناقص استماعي لها بمرور الأيام ولا أعلم لماذا واستمع لعبد الحليم أيضا ولا يعجبني فريد الأطرش ..
لكني أفضل كل ما هو سوداني على كل ما هو عربي ، تفضيلا نسبيا ،، وأفضل السوداني على الغربي أيضا ،، كانت لي صديقة قبطية تعيش في استراليا منذ بدايات الإنقاذ ، حدثتني مرة في الماسينجر أنها سهرت في حفلة سودانية وظلت ترقص حتى الصباح ، فاستغربت ذلك وقلت لها من المؤكد أن الرقص والغناء في أستراليا متوفر وموجود في كل زاوية ،، قالت نعم ، لكن الغناء السوداني له نكهة لا تقاوم ..
بعدين ما تنسي مطلقا أنك فنانة ، وهذا الكلام يمكن أن ينتقل إلى الصحف والمجلات ويقولوا في عناوين بارزة ،، فنانة سودانية تصرح بعدم حبها لأم كلثوم .. لا تستعجلي التصريح ، قطّعيه في مصارينك زي أختك الجندرية ..
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: ودقاسم)
|
الزميل ود قاسم .. زمن وزمن
أنا حأقوم أعمل بوست منفصل بعنوان: ود قاسم يسقط سقوطاً مدوياً أو أي حاجة زي دي. يازول إت مورود؟ أم كلتوم شنو؟
تماضر ما تسمعي كلام ابو ذر ده .. ده زول زي إبن عربي .. قوالبو جاهزة لكل طيّاني .. يعني بحرو وااااااااسع (وقرنو لولب ما بحرّكو(ه)). لكن انتي برضو فنانة. يا زول هيييييي بلا فن بلا كلتوم .. ام كلتوم دي ما بتدخل علا في راس زول مِوَدّر.
الودرة أخدتنا آآ ود قاسم
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
بت الشيخ
بمناسبة كوكب الشرق ام كلثوم اتذكرت اغنية شاعرنا الفحل الهادى ادم وقصيدته التى تغنيها (اغد القاك يا خوفى فؤادى من غد)
ذكرت ام كلثوم فى ذكرياتها عن قصة هذه القصيدة الموسيقار محمد عبدالوهاب اتصل بها تلفونيا وقال لها اغدا القاك يا خوفى فؤادى من غد اه كم اخشى غد هذا واقتراب الموعد.........
ووافقت على القصيدة وكانت اول تعامل لها مع الهادى ادم .
والقصيدة جميلة ومن بينها هذا الابيات
هذه الدنيا كتاب انت فيه الفكر
هذه الدنيا سماء انته فيه القمر
هذه الدنيا حياة انته فيها العمر
ولك تحياتى
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
كلام الاخ المطر مقنع جدا و اشبه بمرافعه بقضيه قانونيه
لكنه نسى ان الاعلام المصرى الجارف طيلة القرن الماضى اثر كثيرا فى ثقافة و مزاج السودانيين سكان المدن.
انا لم اسمع يوما ان واحدا من اهلنا فى الريف السودانى(البطانه مثلا) فتح الراديو ليستمع لام كلثوم .
و يعدين يا تماضر ما كان تكوركى لشنتير اصلو هو سالى لسانو اكتر منى
انا خايف تبقى على قصة بدرالدين شنا لمن قال
| Quote: تماضر أنا خائف اتفق معاك بعدين تزوغي مني زي اليوم داك لقيتك كاردة ليك طيش سكيتو معاااااااااااك وجريتي خليتني براي |
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
يا تماضر معليش على الخفة و الثقالة، هو انتي كاتبه البوست عن عدم حبك لأغاني الست و أنا أقول لراويه نزلي لينا أغنيه ليها
طبعا راويه نبهتني بالماسينجر للحته دي و قالت لي دي حتبقى ثقاله لو نزلنا الأغنية في البوست ده
و ما قصرت رسلتها لي بصوت جورج وسوف
شكرا يا راويه تسلمي و نسمعها ان شاء الله كده في الأفراح
يا تاج السر أنا عارفه الفن ماعنده وطن
و ممكن أتذوق كل أنواع الفنون التانية من كتابه و سينما و مسرح
بس حتة الغنا دي غلبتني و بتمنى يكون عندي more universal music sense
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Nada Amin)
|
تماضر
ذكرتيني خالي
لما تجي ام كلثوم في الاذاعة طوالي بغير المحطة
اما انا - فكما عهدتني دا مقطع من واحدة من اغاني صلاح بن البادية- فكنت في فترة من فترات حياتي بشغل شريط الاطلال شهر كامل
وشريط اغدا القاك شهر
وما بمل الاستماع للأغنتين ديل
اضافة لأغنية زي الهوا لعبدالحليم حافظ
وهناك فنان خليجي اسمه عوض الدوخي كان بغني اغاني ام كلثوم وقيل ان ام كلثوم قالت انو دا افضل من يغني اغانيها
المهم ادعوك لسماع مقاطع من الاطلال وغدا القاك
لكن بيني بينك كدا بالجد ما بتحبي غناها ؟
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Nada Amin)
|
ياخواننا علي عثمان ده قاصدني عديييييييييل كده بحكاية محمود عبد العزيز دي. آمنا بالله. أها بقى يا علي يا ابن عثمان أنا محمود عبد العزيز ده لو عندي أي سلطة .. إن شاء مسئول حرس الصيد .. إلا اغتس محمود عبد العزيز ده في سابع الأراضي. مغص .. يلولو في رقبتو كدي زي الديك الخانقاه بنبونة (بنبونة دي يفسروها كيف زاتو؟). ده مضر ومؤذ .. لانو في شباب قعدوا يقلدوه ويتعولقوا ويمدوا في رقابهم (زي الديوك الخانقها بنبون).
أها يا علي عثمان .. ارتحت؟ز بس اديني فرصة املا ايدي في زولك ده .. بطيّر ليك زراق عينيه.
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
حاشاك الغلط.. لكن موش مجامله.. انا الزوله دي من الله خلقني ما حبيتها..
غنت للهادي آدم.. الكان في رفاعة مدير مدرسة رفاعة العليا بنين.. ودرس عدد من أولادنا (قصدي أباءنا)... لكن ده شرف ليها هي.. (شفتو حماقة زي دي).. لكن ياخ والله ما بطيييييقها.. موش شخصها.. لكن يعني.. زوله متعبه خلاص.. ياخ ما ممكن الأغنية الواحده تكون سهرة في الفضائية المصرية.. ياخ حرام عليها... مده الأغنية.. مدة الفلم الأجنبي البيجيبوهو في قناة البحرين.. مع موسيقى النهاية.. ولما البطل يقتل الكل.. أو يتزوج البطله.. أو يموتوا لو الفلم منيل بستين نيله.. الست بتكون انحنت للجمهور الهائج المائج... لكن يا جماعة .. البحبوها، ديل حقهم الديموقراطي، بس خايفة على صحتهم..
في رأيكم، هل ده بأثر على وضعي الانتخابي؟
بنت الحسين
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
اولا بالتبادى ست البوست
الحبيبة الغالية زعلتى اختك لنا مهدى يا تماضر جنس زعل
انا من عشاق ام كلثوم برغم تعليقات اخوتى الصغار عن [البتنيص بالساعات ]قصدهم الست اتخيلى
اما الرئيسة مريم بت الحسين فبعد ما طبعتا البرنامج الانتخابى حقها و خلاص جهزنا ليها الدعاية
طبلتهم فى الدرج الطيش من مكتبى
وخوة فرتق
مريم كلمينى منافسك منو ؟؟؟
احب ام كلثوم لكن هى اذواق
محبتى للغاليتين تماضر و مريم
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: lana mahdi)
|
لنا بت مهديّّّ!!!!!!! إنتي بتاعة أم كلتوم؟
أها من يوم الليلة ده لوميني أكان أدي صوتي لحزب الأمة القومي .. ولا لحزب الله زاتو. الناس دي مجنونة؟ وللا يا ربي يبقى أنا المجنون؟
لقد تلخبط كياني الصهيوني .. يعني كيف واحد يستمتع لأم كلتوم .. حتى لو كان مصري .. ناهيك عن انو سوداني؟
آ آنا سودااااني أنا أنا .. أأنا سودااني أنووووو
النصري ما تزوغ
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: ali othman)
|
الهادي الجبل؟ هو الجبل عندو هادي؟ والله زولك الجبتو ده أنا مابعرفو ولا سمعت صوتو .. لكن لو بقى محمود عبد العزيز بيقلده .. أنا أخير أخنق بتاع الجبل ده أول حاجة قبل محمود لانه سنّ سنة سيئة خالس خالس .. وخلى الشفع يتعولقوا ويمطوا في رقابهم (زي الديوك الخانقها بنبون . .ههههههه).
ود الجبل؟ الجبل الـ يقع فوق صنقورو لو بيغني زي (الديك الخانقاه بنبونة .. تاني هههههههها)
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Kostawi)
|
أخواننا المصريين عندهم مثل بالقلبه بقول( التكرار بعلم الشطار)
عشان كده ياأخوانا أم كلثوم بتكرر ، عشان هم اتعلمو ونحنا معاهم
وصاحب العقل أميز!!
وبعدين (ثومه) دى لدرجة ما انها فنانه عندها مجموعة بحبوها ذى (رامى) ، يعنى (ذواقه) ذى البختبرو السجائر والأكل الطاعم، فى حفلاتها بكونوا قاعدين فى محل معين ومنهم بتعرف نجاح اغنيتها من فشلها.
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
خناس الحلوة بت الناس
هو قطعآ غلط مافي
لكن أنا بحب الست مووووووووت
و الحكاية بدت بي طرفة
و أنا في تانية متوسطة بفتش لي شريط فاضي أسجل فيهو فنان محلي صاحبي, لقيت شريط {الأطلال} و كان عندنا مسجل جديد و فيهو أزرار بالأحمر أها شغلت فيهو الشريط و قامت {تتعاور} و بس مسحتها ليك بي مبارك الشريف على طول....جا أخونا الأكبر دكتور نصر الدين يشغل شريطو طلع ليهو صوت مبارك الما بيغيباهو قام ناداني قال لي:
ليه سجلت في الشريط دة؟
-قلت ليو ياخ دة عربي ...و..
قاطعني بغيظ: عربي إنت دة و الله
أجلسني لجواره و كتب لي قصيدة الأطلال و شرحها لي واحدة واحدة و كان يعمل بالخرطوم فقال لي الأسبوع الجايي بجي أسمعها ليك و بجيب ليك شريط الأطلال تاني...أها شبكت معاي جدآ
عيلا لوم مافي
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: الطيب بشير)
|
تماضر ذكرتيني حالي مرة كنت شغالة في شركة تامينات وكان المدير مصري ،ومرات بقدم لينا دراسات عن التامين وكيف نخدع الزبون ، ونجر رجلو لحدي الشركة واثناء الدرس يوم جات سيرة الست وطبعا انا بحيها موت زي طريقتك دي كدا وللاسف صرحت بهذا الحب وكان نصيبي التهميش ثم الطرد والاتهم بالاذن الحمارية .. لكن قدر ما حنسة عليها روحي غلبتني ، لكن اتخيل لي الحكاية دي جاية من الشكل فلو حاولنا نسمعها من غير ما نبص ليها بكون اخير ليهاالله يرحمها ويبشبش الطوبة الفوق دماغها مع الاعتزار من احبابها وناس راوية ، . لكن تعرفي حتى الشباب الجديد في مصر بدا يتزمر من حكاية الحب الموروث والمفروض دي !!اها وتاني
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: عشة بت فاطنة)
|
الأخت الكريمة تماضر
كثيرون لا يعجبهم غناء أم كلثوم، وكنت منهم، وأذكر طرفة حدثت في سهرة تلفزيونية، فقد سأل المذيع ضيف البرنامج (وكان لاعبا بالمريخ) عن رأيه في أم كلثوم فأجاب (ما بطّالة !!)، وضحكنا (أنا وناس بيتنا) لمحاولة اللاعب الفاشلة للرد بدبلوماسية،
أمّ كلثوم (من بعيد لي بعيد) قد لا تعجب، لكن (من قريب لي قريب) وبتمعّـن في كلمات أغانيها المنتقاة بعناية يجد الواحد نفسه أمام تجربة غنائية لا أجزم باستحالة تكرارها لكنّي أؤكد صعوبة ذلك! ولكي أقرّب لك الصورة أكثر أسمعي (أغدا ألقاك) برواقة كده وحتسمعي (العجب العجاب!)، وبالمناسبة ، والشيء بالشيء يذكر: أنا ما بحب أسمع وردي ومحمد الأمين!
أحمد الريّـح
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: الطيب بشير)
|
الأستاذة / تماضر
دعينى الخص لك الأمر ، بوضوح شديد (كلامك غلط) فأنت فنانه وأدرى بمشاعر وأحاسيس الفنان الذى يبكى ويمرض ويتعذب ليوصل للأخرين، ما يطربهم ويفرحهم، والكثيرين يجاملونك لأنك تماضر الأنسانه الفنانه الرقيقة ، التى تنثر الدرر، لكن خذيها منى انت غلطانه دوغرى.
فلو ولدت لحظة حب بين اثنين خلال سماعهما لأحدى روائع أم كلثوم، وما أكثرهما حديثك سوف يسبب لهما تعاسة وأحباط دون ان تعنى ذلك، فالفن لا وطن له، والفن هو قيمة أنسانية تسمو بنا فوق جراحات الحياة اليوميه ومعاناتها.
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
تعيش تماضر (قبل المطر ما يجهجها)
يعيش النصري
يعيش العظيم الثابت على المبادئ شنتير
تعيش الجندريه
عاش حزب عدم محتملى هذه المغنيه الجليطه المميته اللايوقه المطاطه اللباطه
انا اخش لى جوه برميل فاضي و يجيبوا مية نفر يدقوا فيهو بالحديد اكون طربان اكتر مما اسمع الزوله دى، اضنينى و انا حر فيهم....بسمع كل الغنا السودانى (باستثناء اسماعيل حسب الدائم) وغنا الدنيا ده كلو (عدا التكنو والهوس والهيفي ميتال) عجم وعرب وهنود و لاتينو و خواجات وافارقه كله فيهو السمح والكعب... الا الزوله دى قلبى اباها كلو كلو ....
هوى يا المطر حركاتكم دى بنعرفا ما تلغوس علينا الناس و تاكل راسم...
الجندريه زمان انا كنت بخاف اقول رايى ده... لكن هسه بى عين قويه خاصه لو فى مصري وبره مصر وتقرب تقطع ليهو معاها كف...
تسقط راويه واحمد الريح ومن باراهما
الله يحفظ لى اضنينى ديل
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: مراويد)
|
والله فعل يا ود البدري الاكل والثقافة و(والاكلات الشعبية بالذات) دي مسألة نفسية وليس للفلهمة والقرضمة اي شأن بهما ، واتكلم عن تجربة بخصوص الاكلات الشعبية لاني حاولت ان ابني علاقة باكل الوجبات الشعبية بالنسبة للخليجيين لكن والحمد لله انتهت بي جسارتي دائما الى حوض الحمام لاخراج الاكل (العرسية) خاصة هذه الاكلة العجيبة التى يعتقد العمانين انها من اجمل الاكلات حتى انها لا تقدم الا في المناسبات وهي عبارة عن بليلة قمح ولحم مهروس وسمن والغريبة مرة اديت جارتي ملاح بامية مفروكة وفي ظني انها حتما ستفرغه في الزبالة كما نفعل باكلهم وحتى اطمئن سالتها عن مصير البامية والكسرة فاذا بها تصر على ان اعلمها هذه الطريقة الجميلة لاخراج البامية المفروكة فسالتها هل اكلتها مع الكسرة فقالت : لا . العيال اكلو الخبز وهي وابو العيال شربو السوب (شوربة) وان زوجها خبأ الباقي وشربو الساعة تلاتة صباحا فقلت يا سبحان الله انا كان ربطوني ما اشرب لايوق البامية !!
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
أنا برضه ما بحب أم كلثوم إبراهيم السيد البلتاجى
ولو كان لاقتنى فى الشارع، سلام الله ده ما بديها ليهو
لكن ممكن أكون قاعد وجنبى فنجان قهوة، وحقتى مليانة تمباك، وأسمع كوكب الشرق بتغنى
وما نيل المطالب بالتمنى، ولكن تؤخذ الدنيا غلابا
وأنطرب جدا وأستمتع
والفرق واضح طبعا، بالنسبة لى أنا كمتلقى، بين السيدة ام كلثوم إبراهيم، وكوكب الشرق
مرة عندى زميلى هندى، والغريبة كنت بعتبره زول فاهم، بالمعنى السودانى للكلمة، وكان ماشى إجازة، قلت ليهو بالله لمن تجى راجع جيب لى معاك ألبومات موسيقية لأعظم موسيقار هندى، إسمه رافى شنكر، وبرضه أعمال أجمل صوت بغنى وسط المليار زول فى شبه القارة الهندية، إسمه محمد رفيع
الهندى العوقه إتفاجأ جدا وقال لى، عايز الحاجات دى ليه، إنت قبل كده عشت فى الهند؟
طوالى خليته ومن اليوم داك شطبته من قائمة الناس الفاهمين
ريتشارد فيلهلم واغنر، أو فاغنر زى ما بنطقوها الألمان، واحد من أعظم الموسيقيين فى العالم، مات سنة 1883، ومن أشهر أعماله "الدانوب الأزرق" أها عمنا فاغنر ده يعتبر هو المبشر الرئيسى للنازية أو الإشتراكية القومية الألمانية الجا هتلر بعد داك عايز ينهى بيها الدنيا كلها، يعنى الدانوب الأزرق دى أنا قاعد يجينى جذب، شيطانىأو ملائكى، لسه ما عرفت، ولازم كل اسبوع على الأقل الزول يكبها جواهو زى الموية لمن تكون عطشان، أها عمنا الحاج فاغنر ده، هسه الليلة دى كان لاقيته فى فرقه بلحسه المرقه، يعنى لو شاءت الظروف وكان اتلاقينا، بكل بساطة كان ممكن أغتاله واشرب من دمه، وبعد ما اقتله امشى اسمع الشغل العجيب بتاعه ده
سيد خليفة، عليه رحمة الله، الناس بعتبروه الناطق الغنائى بإسم مايو وناس جعفر النميرى، وأنا مافى زول فى الدنيا دى كلها جاب لى وجع الروح المزمن غير الزول الإسمه النميرى ده، لكين برضه ما ممكن اقدر ما اسمع
أى سرب يتهادى
أو
ولى المساء
أو
أعلى الجمال تغار منا
أو
فى ربيع الحب
وأحرد وأخلى الغنا والطرب الحقيقى ده للمشير الإمام
نهايته، الإبداع لغة كونية، لا حدود عرقية أو سياسية أو إجتماعية الخ قائمة ال "إيا إيا" دى، ممكن توقف دخوله لمسام الوجدان البشرى
ممكن أكون ما بحترم ولا بقدر فلان أو فلانه، الشخص، لإنتماءه السياسى أو الفكرى أو طبقته الإجتماعية، لكن بى تحت تحت أكون بستمتع بالفعل الإبداعى البسوى فيهو
يعنى الهسه قاعدين نسمع فيهو ده، صوت ونغم حق ام كلثوم، ومافى شى بربط ام كلثوم ك "زول" بينا ولا بتؤثر على أى مجرى من مجارى الحياة التانية، غير الحس الوجدانى الشعورى، ولو كان فى تأثير فعلى مباشر أو غير مباشر، كنا طوالى قلنا ليها، والله يا ست ام كلثوم، نحن ما بنحترم موقفك من كده وكده وكده، وإنتى والله غلطانه ثم غلطانه فى كده وكده كده، والكلام ده عيب عليك، لكين والله النصيحة الصوت والغناء عندك
والزول "يغمت" نصيبه منه ويتخارج، ويا دار ما دخلك شر، ويا روح دخلك طرب
وأنا زى صاحبى مراويد ده، مافى شى سمح فى الدنيا دى ما بنستمتع بيهو، وكل شى بى دربه، يمكن الإستثناء الوحيد فى حكايات الموسيقى والغنا دى، هو الزول المعولق الإسمه "مايكل جاكسون" ده، مما كان مع اخوانه المحترمين ال "جاكسون فايف" ولحدى ما فرز عيشته براهو وقعد ينطط زى الماشى ليهو فى قزاز مكسر، ومما كان وشه حلو زى خليط الكاكاو والحليب، ولحدى ما وشه بقى زى رسم أولاد سنة أولى
أصلى ما ردته، ومكجنه، مكجنه دى كدى صاح، كجنه لا يعلم بيها إلا الله
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: THE RAIN)
|
بت الشبخ تيف حالت؟؟واقصد كيف حالك؟؟مع انو مقاطع البورد عاطفيا؟
لكن اجبرنى بوستك ما اطل واقطعوا فى حشاى؟
عمتى رقيه عندها راديو ناشيونال ما بتديه لى زوول اصلو؟
واذا خلاص وافقت تقول ليك اها اشترى حجارك؟؟ وتعنى البطاربه الجافه؟
اذكر فى احدى السنين رشحت اغنية الاستاذ محمد الامين بتتعلم من الايام
وولدها الكبير معجب جدا بمحمد الامين وجاها وقال ليها يا امى اها دى حجارى وبرنامج الحان بعد شويه والدنيا كانت ظهر خميس؟
فما كان منها الا وان اعطته الراديو؟؟ وبعد 10 دقائق جات لقت نفس الاغنيه ؟؟ فلم يعجبها صوت الاستاذ محمد الامين وقالت يا ولدى ده محاق حجار ساى؟؟؟
والله اجازى محنك؟؟ الناس الفوق ديل نكتو حاجات عجيبه
وليك الود
انور ود يتول
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: DR.NET)
|
عارفة
الذ حاجة في الموضوع ده الناس البقولوا ليك والله لو سمعتي غنية شنو وغنية شنو ...
ياخي نحنا كان قدرنا نسمع غنية شنو ما كان حبيناها ليكم زماااااان ..
لكن ده كلو كوم وقصة ندي أمين المصفحة ضد الغناء والشعر بكل انواعه الا السوداني دي كوم تاني ...
كدي جربي اسمعي ... ولا اقول ليك ... ما بنفع خليك كدة احسن
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Tumadir)
|
Quote:
حاشاك الغلط.. لكن موش مجامله.. انا الزوله دي من الله خلقني ما حبيتها..
غنت للهادي آدم.. الكان في رفاعة مدير مدرسة رفاعة العليا بنين.. ودرس عدد من أولادنا (قصدي أباءنا)... لكن ده شرف ليها هي.. (شفتو حماقة زي دي).. لكن ياخ والله ما بطيييييقها.. موش شخصها.. لكن يعني.. زوله متعبه خلاص.. ياخ ما ممكن الأغنية الواحده تكون سهرة في الفضائية المصرية.. ياخ حرام عليها... مده الأغنية.. مدة الفلم الأجنبي البيجيبوهو في قناة البحرين.. مع موسيقى النهاية.. ولما البطل يقتل الكل.. أو يتزوج البطله.. أو يموتوا لو الفلم منيل بستين نيله.. الست بتكون انحنت للجمهور الهائج المائج... لكن يا جماعة .. البحبوها، ديل حقهم الديموقراطي، بس خايفة على صحتهم..
في رأيكم، هل ده بأثر على وضعي الانتخابي؟
بنت الحسين
|
ركزى يا بت الحسين فى البعد الداخلي زى قضايا العزاب والبطالة والعرس فريند والحاجات دى احسن ليكى...
عشان ما تجى بعد اكتر من 30 سنة سياسة تكتبى لينا عن اللام الملك
AnwarKing
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: AnwarKing)
|
| Quote: صوت الاستاذ محمد الامين وقالت يا ولدى ده محاق حجار ساى؟؟؟ |
لوووووووووووووووووووووووووووووووووووووووووووووووووووووووووووووول
يا انور ابواللمين اصلو صوتو بمحق الحجار...غايتو دي ضحكت فيها لامن بكيت...
اها يا تماضر...ناس ام كلثوم وعبدالوهاب وفريد الاطرش بسمع بيهم من ناس علي شمو...وبرامج من الامس...لاهسي دي ما سمعت غنية كاملة لاي منهم والسبب قناعة شخصية...زي لو جابو لي عقرب البحر...والحاجات الفي محار ديك... في اكل ما جربتها.ولا بكضب....مع انو بيقولو غالية ولذيذه جدا لكن القالها نفس وين تجربها واتفق تماما مع شوقي...مافي زمن للجريب...من ما قمنا لقينا ام در يا ربوع سوداننا نحييك وانت كل امالنا في الليل وبعدها كوت كوت كوت كوت ومرات اثناءها ............. هنا ام درمان وننوم...لامن كبرنا شوية كنكشنا في عركي...وعثمان حسين...ولامن كبرنا خالص...رجعنا الحقيبة
ولامن نعجز بنكنكش في نانسي عجرم وروبي...ام كلثوم دي ما عندها طريقة كلو كلو...ولاك غلطانه ولا شتين...هي الحكاية مزاج والله ثقافة...بلا طرحة بلا منديل...مش علي كيفي...ونسيت الدوبيت داك كان في الابتدائي...بس طوالي في...
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: nazar hussien)
|
ياجماعه فوووووووق لغاية ما افضى...
اما مداخلة شوقى بدرى فشدة ما ..اديبه و شامله لغاية ما فتح بيها بوست براها... انا حامشى هناك واكالب بحقوق "الانسان" اللى هو انا ...
مشاركاتكم ...
ملهمه ...وبتخلى الزول يكون داير يحش فى مواضيع جانبية ....لكن جانى تحذير رسمى...
ماااااااااااااااااااااا منعونا ي
هاهاهاهاهاهاهاهاهاههاهاها
ا
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: عشة بت فاطنة)
|
والله يا عمنا شوقي بدري بالرغم من إعجابي والتقائي معك في الأسلوب "الدُراش" في التعبير عن قناعاتك .. لكن هنا بس بختلف معاك في حكاية انو الزول ما بيستمع لموسيقى الإنسان البيعتقد انو أدني منه مكانة. ولا أريد أن أطيل حتى أصبح أكثر "دراشة" في التعليق .. مع إني Long-winded .. أقول ليك: أنا ما شفت زول في الدنيا دي اضطهد الحبش زي السودانيين .. وما لا قاني سوداني واحد يقدر يلتزم الوقار أمام المزازيك الحبشية. وتاني برضو .. كل سوداني عامل فيها انو الهنود ديل أقل درجة .. وفي نفس الوقت .. كل سوداني حيتهوزز زي عنقريب القصب لمن يسمع ليه موسيقى هندية. الأمثلة كتيرة. عشان كده بقول ليك انو الأذواق المزيكاتية دي ما أظن ليها علاقة بمن هو الأرفع قدراً ومن هو الأهون منزلة .. وإلا فلن نسمع بنجوم غنائية من الأمريكيين السود. أها داير تقول الخواجات بيشوفوهم في نفس مستواهم أو أرفع منهم؟
أرجع تاني لأم كلتوم .. وداير واحد سوداني بس يوريني يعني كيف دخلت في مزاجو؟ بـ وين يعني؟ وكل الباقيين برضو من عب وهاب لنانسي عجرم. على بالدين إلا الواحد يعاين في الجتة بس (ده للمغنيات فقط).. لكن ما في شيء بيدخل الراس ده خالص.
الموسيقى السودانية دي بالمناسبة أنا مقتنع بيها مية المية .. وشايف انها ليها نقاط التقاء مع الأذواق حول العالم أكتر مما للموسيقى المصرية أو العربية مجملاً أو التركية (الموسيقى المصرية دي تركية تماماً) .. بس نحن كاتلنا الخجل وضعف الشجاعة الادبية.
قلت لي يا ابو ذر كوكب الشرق؟ أها شفت اللعب على المساكين: كوكب الشرق .. أمير الشعراء .. عميد الأدب العربي .. وحش الشاشة العربية .. فحل بصل وطعمية.
ياخي والله أنا غايتو الهلاتيت دي ما بتركب لي في راسي ده نهائياً .. وما عندي أي سبب خارجي يخليني لا أهضم المزازيك المصرية. شنو السبب البيخليني أمتلك أشرطة لموسيقى تايلاندية ومنغولية وحبشية وامركيانية ولاتينية ويابانية قديمة .. ولا أمتلك اي شريط لفنان مصري أو عربي ولا لمحمد الأمين (يا ود بتول)؟ لأنو محمد الامين برضو داخل في المجموعة دي.
الله يثقفنا زيادة
| |
|
|
|
|
|
|
|
|
|
Re: بالله يا جماعه لو كلامى ده غلط ...كلمونى (Re: Shinteer)
|
يا تماضر
انت نسيتي ...........ام كلثوم براها والعجب فريد الاطرش....والله تقول بضري ليه العيش في القضارف...
الناس البريدو ام كلثوم في بوستك دا كلو من غير ناس مصر راوية ورجاء...هوالطيب بشير...لكن شفتي ريدتو لي ام كلثوم كيف...بدت بي نهير...زي تشجيعي للهلال...داك بدأ بي دقة عديل كده...اوعك تاني اسمعك جبت سيرة المريخ دا...والفنيله الحمراء دي ان لقيتك لابسها تاني...عارف البيحصل شنو....هاك امشي اشتري ليك فنيله بيضاء او ظهرية...ما كان في اسم زرقاء زمان...وساقوني تمارين الهلال مرة مرتين...واشترو لي باسطة من سلا...وبس ...لا هسي هلالابي...لكن النوع الما عليك بيه داك...فحب الطيب لام كلثوم دا ما عليك بيه...
يا جماعه عليكم الله ...الموضوع دا عااااادي حكاية زول ما يحب يسمع لي ام كلثوم...او فريد الاطرش...او عبدالوهاب.....هسي انتو كلكم بتسمعو ود النزيهة؟؟؟ اتلقي ما سمعتوبو السمع والناس بي هناك راكزين فيه جبك جبك جبك لا الصباح وينقطع الصوت يبدلوه...
| |
|
|
|
|
|
|
|
|
|
بالله يا جماعة (Re: Tumadir)
|
تماضر اول ما نركب البيجو من القاهرة الى الاسكندرية السواق بيشعغل قران 5 دقائق بعدين ساعتين لحد اسكندرية اغانى ام كلثوم
فى اماسى منعشة كدة تدخل القهوة فى الحسين او الجيزة وتلقاها مرشوشة بالنجارة بعد الغسيل وتطلب ليك شاى كشرى فى اللحظة ديك تكونى مش فى وادى عبقر تكونى بين طيات السحاب
كسرة
كنا فى رومانيا مجموعة من السودانين ونسة ونسمع غنا ونقاش فى السياسة ومعانا عراقيين وفلسطنين قام واحد عرافى قال ياجماعة العرب اختلفوا فى كل شى واتفقوا على ام كلثوم وانا اقترح نسمع شريط ليها انقورى السودانين خلوا يكمل كلامو
| |
|
|
|
|
|
|
| |
Tumadir
سجيمان
Rawia
hammama
بلدى يا حبوب
بدرالدين شنا
AnwarKing
Abd-Elrhman sorkati
دورنقاس
معتز تروتسكى
almohndis
alfatih
عبير خيرى
Raja
المسافر
Abureesh
Shinteer
هاشم نوريت
شمهروش
الجندرية
THE RAIN
ودقاسم
مريم بنت الحسين
lana mahdi
Kostawi
الطيب بشير
عشة بت فاطنة
shawgi badri
Abo Amna
nazar hussien
mohmmed said ahmed
Abu Mariam
ملكة سبأ
فيس بوك
تويتر
انستقرام
يوتيوب
بنتيريست