|
دعواتكم لزميلنا المفكر د.الباقر العفيف بالشفاء العاجل
|
|
 Re: احسن الكمونيه ولا البتزا؟ (Re: theNile)
|
والله كنت عايز اعلق عليها
طبعا الكمونيه احسن ولكن الناس ديل يمكن كان عندهم سبب او حتمال المويه كانت قاطعه عشان كده جابو بيزا لانو البيزا مامحتاجه غسيل يد بعد الاكل بس تقش يدك في منديل او في الفوطه
| |
 
|
|
|
|
|
|
|
|
Re: احسن الكمونيه ولا البتزا؟ (Re: theNile)
|
ودى دايرة كلام
الكمونية طبعا (مع اني ماباكلها)
لكن فيها حلاة تسبيكها
وبعدين ياتماضر بورداب الخرطوم بقولو ليك البيتزا لزوم الكاميرا وكدا
وانت قايلة الصحون الكتيرة دى لشنو ؟
| |
|
|
|
|
|
|
|
|
|
Re: احسن الكمونيه ولا البتزا؟ (Re: theNile)
|
ودى دايرة كلام
الكمونية طبعا (مع اني ماباكلها)
لكن فيها حلاة تسبيكها
وبعدين ياتماضر بورداب الخرطوم بقولو ليك البيتزا لزوم الكاميرا وكدا
وانت قايلة الصحون الكتيرة دى لشنو ؟ 
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
سلام للجميع
والله لاخير في هذا ولاذاك لكن برضو أحسن البيتزا .
وحقو نترك الحكم لبورداب الخرطوم لأنه نحن بحكم بعادنا عن السودان نحن لأي شئ حتى الماكنا بنأكله هناك ، عشان كده شهادتنا مجروحة
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
بالجد يا جماعة ، والله جد جد
أنا الليلة اتغديت بعصيدة بملاح تقلية ، وجمبها كوكتيل محشي ( كوسة + فلفل = صماهم + باذنجان ) وده ما كان ليهو أي لزوم لولا أن فوزية أرادت أن يكون على المائدة طبقين ، حتى ولو كانا متنافرين ،
تعرفو أنا أصريت أنو العصيدة لازم يقعدوا ليها فيها الواطة ، قعدنا وضربنا صرب مش ممكن تتخيلوه ، طبعا جو الرياض الليلة غيوم ومطر وبرد ، والله العصيدة دي مع شوية المحشي وهو حار ، كانت حكاية ما تخلص ، وتبقى منها شيء ، سألتني فوزية ألم ملاح التقلية وباقي المحشي ده ؟ قلت ليها يا أخي انت مجنونة ، أنا أتعشى بي شنو ، يعني ناوي ... ناوي ،
أنا بجيب بيتزا من المحلات لأولادي ، ومرات فوزية بتعملها في البيت ، وهم لسة بيتغالطوا ، أحسن بيتزة المحلات وللا بيتزة ماما ، وما وصلوا لنتيجة ، بس أنا ما دخلت معاهم ، لأني مكجنها ،، أنا بحب الأطل الطري ، وبفضل الطبيخ على النواشف والبلاوي طوالي بتوجع بطني أو تعمل لي إمساك ..
الكمونية حلوة شديد ، أنا مرات بمشي أشتريها من السوق ، ويو أكون ناوي ليها أصحى بدري وأمشي الجزارة وما بشاور زول ، وأشتري معاها كبدة ، أقطع الكبدة وأجهزها ولما تقرب تجهز أصحي العيال عشان يجهزوا ويأكلوا ، وطبعا غالبا يوم الجمعة ، ومرات بجيب أم فتفت ، وطبعا لما أصحي فوزية وتشم ريحة الكبدة على طول تقول لي : أوعى تكون جبت كمونية ، أقول ليها : جبتها ، تقول لي : والله ما أسويها ليك ، أقول ما مشكلة أنا بجيب المرة اللي بتسويها ، والساعة حداشر أشوف ليك الحنينة قامت تغسل وتقطع وتجهز الكمونية ، بس مشكلتها بتغسلها كثير جدا ،
وعندي ود عمي جانا يوم متأخر قريب المغرب ، يعني ما حضر الغداء ، ونحن عارفنو بيحب الأكل وهو عزابي ، فوزية قالت ليهم أديك غدا ، قال ليها اتغديت ، قالت ليهو : عندنا كمونية ، قال والله الكمونية ما باباها ، سخنت الكمونية وختت ليهو الصينية ، ضرب ، ولما شبع ، ضحك ، وقال : فوزية والله كمونيتك تقول مغسلاها بالصابون ، ما خليتي فيها ريحة بعرة واحدة ، ونحن بناكلها عشان ريحة البعر ،،
تماضر أنا كنت عايز أعمل بوست عن غدا العصيدة بالتقلية ، لقيت موضوعك دا وكبيت فيهو العلم كلو ،، بس ما خسارة في بت الخالة .
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
اتفق مع outcast , Deng
و بما اني قاعد في السودان مؤكد البيتزا هي الالذ
( بالمناسبة زوجتي كل ما تصرف الماهية تغشي pizzahot )
المسالة زي واحد ساكن في بيت فخم جدا
ينظر الي بيت فيه شجرة نيم كبيرة
تحتها عنقريب هبابي كانه الجنة اما الراقد علي عنقريب هبابي
اكيد بيحلم بي مكيف فريون و سيراميك و .......
| |
|
|
|
|
|
|
|
|
 Re: احسن الكمونيه ولا البتزا؟ (Re: Tumadir)
|
العزيزة تماضر لك الود
الفرق بين الكمونية والبيتزا فرق بين ثقافتين
الكمونية لذذذذذذذذذيذة لانها بتاعة المجتمعات ذات الايقاع
البطيء 00 اي المرتاح والبيتزا كما تعلمين 000 سرعة 00سرعة
والبون شاسع
ويعطيك العافية
| |
|
|
|
|
|
|
|
|
|
Re: احسن الكمونيه ولا البتزا؟ (Re: Abd-Elrhman sorkati)
|
عصام وداعه
وسوركتى
نحن لما نعمل الطعميه وسلطة الاسود واللحمه المحمره..على الطريقه السودانيه..والفول وسلطة الروب..وطبيخ الملوخيه..معناها معانا ضيفان ولا صارفين ولا مزاجنا رايق.
وفى السودان لما مشيت..بدوا يجرجرونى على حتات البيتزا دى..والبيبسى..والحاجات الما عندها طعم دى..ابيت ليهم كلو كلو..واكلتهم سخينه تلاته مرات فى رمضان مرورا بكل المفروكات..لكن ما ضقت الكمونيه.
| |
|
|
|
|
|
|
|
|
|
Re: احسن الكمونيه ولا البتزا؟ (Re: ABUHUSSEIN)
|
الكمـونيــة..
ولمـاذا؟
عشــان أحبهـا من زمن التعـريفـة المقـدودة والفرينـى! (طلايع مايـو طبعـا ما حيفهمـوا حاجــة)
بالمناسبـة يا خالد أبا، فى واحـد قال لى طلايع مايو يعنى شنـو يا عمـو؟!!!
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
نقطة نظام..
أنا إفتكر الناس تحصر نفسا في سؤال الأستاذة تماضر......
شايف جابت ليها جقاجق..وآبري ابيض.. وعصيدة بي ملاح تقلية.. وكوارع..وملاح كوال..وأم دقوقة.. وقراصة بالجبنة...
................
والله ما شاء الله...طلعتو قصص من إجتماع بورداب العاصمة.هم يا جماعة يا حليلهم هم فرحانيين كدة وعايزين يقدموا ليكم حاجة كويسة.. وعايزين يظهروا بالمظهر الحسن..موضوعهم دا ذكرني قصة..
واحد بلدياتنا زمان.عرس..ومفروض كان يعطي الشاعر حقو.. بس العريس زاغ من الشاعر..فقام الشاعر بعد يوم السبوع حضر قصيدة هجاء عويصة.. وجاء للعريس..وزير العريس جري جاء كلم العريس.قاليهو قبل القصيدة تسير بيها الركبان..امسك الشاعر دا بي حاجة.. ووزير العريس زاغ عشان ما يهجوه الشاعر ويلحقوا شواميط مع العريس..العريس أول ما سمع صوت الشاعر..جري سلم عليهو. وقاليهو اتفضل اتفضل.جاييك هسه..العريس قال انا أعمل حاجة للشاعر دا مخالفة للعادة عشان يشكرني ويعرف انو انا عملتا ليهو الما عملوهو ليهو الناس...المطبخ..كان من القش كلو..من جريد النخيل..قام العريس بنفسو.قال راح اعمل للشاعر دا شاي من السمن..السمن البلدي بتاع الغنم..أخليهو يغلي واخت عليهو حب الشاي..يعني الحكاية دي ممكن تنفعني وخاصة عندما يشوفني الشاعر بنفسي انفخ في النار.. فلما حمي الوطيس واشتدت حرارة السمن.. وبلغت الحمية الزبي.. وتوهجت الكفتيرة..وضع عليها العريس حب الشاي الفلت..فاشتعل المطبخ بكامله في لمح البصر.. وجاء الشاعر يجري شنو مالك؟ فحكي له العريس القصة..فعمل الشاعر قصيدتين هجاء وسارت بشاي السمن الركبان الي يومنا هذا..نحنا...............
دحين الجماعة عايزين يا استاذة تماضر يظهروا ليكم بالمظهر الحسن...إنتو مالكم كدة؟
......................
بعدين سؤال الأستاذة تماضر نفسو..
أحسن البيتزا والله الكمونية...يعني زي الزول البي يقول ليك...أطول النيل والله اجري الحصان....
...................
أنا أتفق مع الأستاذة الجندرية في إجابتها ( كل واحدة بي حلاوتها...يعني إذا كان في بيت عرس احلي الكمونية.. وبالليل وفي حدائق القصر أحلي البيتزا)..لكن انا افضل الفول المصلح بالليل..
| |
|
|
|
|
|
|
|
|
|
Re: احسن الكمونيه ولا البتزا؟ (Re: HOPEFUL)
|
تماضر الأولي
لك تحياتي
لو صارت من مكونات البيتزا ( المصارين و الكرشة و ما جاورها ) فعندئذ أحب البيتزا.
و لو صارت الكمونية نطلبها فتأتينا بسرعة وصول قطعة بيتزا من ( بيتزا هت ) ، فإن الكمونية هي الأحسن.
تسلمي
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
من يوم الخميس انا غاطس في أم فتفت مدنكلة ، بالأتي (دي بكتبوها كيف ، قبل ما ود قاسم يسميها عديل ، ويقول البول ) والدكوة والشطة والليمون وتوم شويه ، مليت الحلة الهانقدر و الوجبات الثلاث وما بينهم من مزز وداخل هبرة وطالع هبرة ، والصلوات كلها في البيت عشان الريحة ولصلاة الجمعة مضغت الشاي والتسالي وصباع معجون كامل وبرضو لم يخلو الأمر من لكن وحتى ، وأم فت فت بت عم الكمونية وهي من المحبوبات لكن بشرط معمولة في البيت وبمراقبة حاجة أسماء وإشرافها ، وبجيبوها نضيفة لكن بشترط عليهم بعض الرائحة لزوم النكهة ، زي ما قال ود عم ود عمي ود قاسم ، ويا جماعة الخير ودقاسم ده ياهو انا ، يا أنا هو ، أو في إستنساخ تم في وقت ما ، وكمان زي ماقال المنصوري ، سعال تماضر ده زي سعال أسرع السيارة ولا أطول الزرافة
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
لا سلام علي طعام !!
اها طبعا كل زول براهو,,,
والمساله مرتبطه جدليا بالزمان والمكان وبعداك يعني
ناس الخرطوم ديل لو اكلو كمونيه الساع 6مساء كانو شرطو
عينا وحلقهم بالعطش ,, ومافي مويه وصابون طبعا ,,
اما مسأله البيزا دي فاصلا مساله سريع سريع بتاعه الامريكان دي
والكمونيه دي جقجقه ونار وسهر ,,, والضحيه علي الاسواق
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
تماضر
دي والله الا تبقى بتزونية ( خليط كمونية مع بيتزا)
غايتو رغم اني ما اكلت الكمونية في حياتي
لكن من حزب الذين يجيدون تنضيف الكمونية بكل توابعها بجدارة عشان كده بقول ليك بتزونية
وطلعي لي البيتزا خارج القوس واضربي الباقي في المعدة
| |
|
|
|
|
|
|
|
|
|
Re: احسن الكمونيه ولا البتزا؟ (Re: maia)
|
الاستاذة جدا تماضر
..بالنسبة للسؤال انا بفضل البيتزا اولا باعتباري عزابي في امريكا وثانيا لاني ما بحب الكمونية اطلاقا..
بعدين طبعا الاكلتين موضوع السؤال غير سودانيات .قلتي لي كيف ? انا اقول ليك انو اغلب الملحات ذات الصلصة ودا طبعا ممكن يكون تعريف جديد لهذه الملحات.. المهم انها جاتنا من الاتراك و انتشرت كثقافة غذائية في العالم العربي و شمال افريقيا و شرق اوربا ابان فترات الدولة العثمانية هذه الملحات ذات الصلصة تشمل كل انواع الدمعة ابتداء بالكباب مرورا بملاح البطاطس الفي الدمعة غاطس وانتهاء بالرشوشة الخام والاخيرة تعود فيها الصلصة الي اصلها كعصير طماطم ..الملوخية المطبوخة تعود الى الاخوة المصريين و قد برعوا فيها بالارانب والفراخ مع وجود الارز كمساعد ياي..
اما بالنسبة لملحات السودانية الاصيلة فهي متنوعة بتنوع هذا الوطن القارة و ربما تتداخل مع بعض دول الجوار..عندك مثلا التركين سوداني وله نسخ مصرية كالفسيخ و الملوحة..العصائد بانواعها نشترك فيها مع اغلب شعوب اقليم السودان في افريقيا واعني المنطقةمن السودان شرقا و حتي مالي و موريتانيا غربا و الاحظ هنا تزاوجا فريدا بين العصيدة و الثوب السوداني في هذه المناطق..في السودان الاوسط والنيلي تنتشر الكسرة ونجد نسختها الاثىوبية ممثلة في الانجيرا..غير اني لا اجد شبيها للملحات المفروكة المصاحبة عادة للكسرة او العصيدة او القراصة واخص هنا النعيمية و الروب و السبروق و ام دقوقة..مما قد يشير الي ان المفروك فقط هو الملاح السوداني الخالص.. في الجنوب نجد انواع كثيرة من السمك مجففا و مخمرا ودا طبعا ناتج من طبيعة المنطقة كما ان قبائلنا الجنوبية و خصوصا بعض الاستوائيين يطبخون بعض الفواكه الشئ الذي يمكن ربطه بثقافات قبائل الزولو و التوتسي في وسط افريقيا..
اما بالنسبة لشواء اللحم فيبدو كقاسم مشترك بين كل الشعوب و ربما عاد اصله الي عصر اكتشاف النار..و يبدو ان الاختلاف في نوع الشية يكمن فقط في اختلاف خلطات البهارات بين الشعوب لكن اظن في النهاية انو الفكرة واحدة .
عودا على بدء انا غايتو مستغرب من نفسي لانو انا باكره الكمونية لكن باموت في ام فتفت و المرارة النية موش غريبة
ارجو ان اشير الي ان ما ورد اعلاه مستقى فقط من ملاحظات شخصية وعلاقات خاصة مع بعض الجنسيات الاخري وحبة حوامة في السودان بحكم المهنة..
لك كل الود من زمان
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
الأخت تماضر وبقية المتداخلين
بالطبع تصعب الاجابة على هذا السؤال لكن الأمر يعتمد على مجموعة أشياء منها الحالة الصحية للفرد ودسامة كل منهما كما أن الحالة النفسية تلعب دور مهما في تحديد الأحسن.
بفطرتي السودانية أبصم بالعشرة على الكمونية وانى أحبها لدرجة لا يمكن تصورها ولكن كما قيل من الحب ما قتل فهي تهيج المصران وبحاجة الى مقبلات أيضا تهيج المصران والأحسن من الاثنين البامية المفروكة بالشبت على شرط أن تكون الكسرة فطيرة فهي سودانية أيضا ولا تسبب مشاكل .
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
لكم التحايا
طبعا انا كنت مفتكر انو للسؤال ابعاد اخرى
ومعاني ودلالات اعمق بس لقيت الناس جاده وبترد
والمشكله انو صاحبة الموضوع بتعلق والشغله ماشه
حقيقي انا محتار هل ده عدم موضوع
هل الناس زهجانه
هل تماضر عاوزه تغطي اخر موضوع كتبته لانها
قوبلت بى هجوم من الجميع
؟؟؟؟؟؟؟؟؟؟؟؟ وكمية من الاسئله
اتمنى الرد سريع عشان انا عندي استفسار لا في السماء لا في الواطه
احسن الورل ولا البلبوط؟؟؟
......ــــــ......ــــــ.......
اجيك من وين وانا اللا حاسي لا شايف
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
لالالالا هنا يا تماضر صراحة انا ما معاكم
اكيد احسن البيتزا
بعدين دي بكون شوق ساكت منك لاكل السودان بس كنتي تقولي ملاح ام نعيمية معليش لكن كمونية؟؟؟؟ بالغتي عديل بس كدي اسالي روحك هي اصلها شنو ؟ ياتو جزي من جسم الخروف داخل في مكوناتها بااااااالغتي
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
والله أفتكر نيفا 0( بدون ال شاالبقت علينا لا إيدنا لا كراعنا)
وكان بقت معاها كوارع بالجزر و الطماطم المفجخه و الشطه الخضرا المشبعه بأتّى كارب.
أصحاب القاوت يمتنعون!
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
Muhib
خلي القيامه تقوم كان قامت لانو كلامك صح ميه في الميه الموضوع ده جد فيهو اهدار للباندوث ليس الا
سؤال غريب وردود اغرب ولسه الشغله ماشه لي متين الله ربي اعلم
الله يهدي
نوف
| |
|
|
|
|
|
|
|
|
|
Re: احسن الكمونيه ولا البتزا؟ (Re: WaD OmI)
|
لمن لا يعرف تماضر، اقول...
حاذقة فى الأكلات السودانية...
لن أنس ما أنسى وليمة أولمتها لنا الفنانة القديرة ذات ليلة بواشنطون، واكلنا صوابعنا العشرة وراءها....
الكسرة،الطعمية،ام شويفع والتى نسميها فى المحس بام شيفة..
لذلك كان من البديهى ان تثور تماضر على من يتجاهلون اكلة الكمونية، فى بلاد الكمونية.... ويستعيضون بالبيتزا التى أفر منها عند كل لقاء....
لقد تنازلت يا تماضر عن احلامي الكبيرة...
وصار حلم حياتي..
ان اشبع احلامي بجرجير سودانى مخلوط برائحة التراب...
انها والله لاجسام البغال..
وأحلام العصافير..
طابت اوقاتك بكل خير
| |
|
|
|
|
|
|
|
|
|
Re: احسن الكمونيه ولا البتزا؟ (Re: WaD OmI)
|
الأخت العزيزة تماضر ..
لك الود العميق..
والله احسن في رأئي الأكل علي اصوله ..أي يطبخ كما هو لا دق ولا كسير ولا تشكيل ولا لخبطة وما احلي الكمونية بس ..من " يد معروفة" وحاذقة ..
| |
|
|
|
|
|
|
|
|
|
Re: احسن الكمونيه ولا البتزا؟ (Re: Abureesh)
|
عادل فقاد
ود امى
محب
بالله الموضوع كان ماشى كويييييس ..جيتو عقدتو المصارين..
السؤال فعلا فلسفى عميق..
لانو ...فى حاجه اسمها ادب الفكاهه.. سمعتو بيها؟؟؟
راجعوا معظم المداخلات الفوق دى..ماحسيتو بى ادب ..وادب راقى للضحك..
ولا الضحك حرام
؟؟
..
وبالمناسبه انتو الاهدرتو باندوثى..لكن عفيت ليكم..
وياعادل..عشان نتفق على حاجات مبدئيه: الموضوع الاثرته ما قوبل بالهجوم من الجميع انا بفتكر انه اسىء فهمه..من البعض.. فلجاوا للتجريح بدلا من رحابة الصدر..اللازمه للتحاور.
وستبدى لك الايام ما كنت جاهلا...وده طبعا صدر بيت شعر وهو هنا..مقتبس. (الواحد لازم يكون واضح)
وللمفاجاه..البوست ده كان قبل داك يا عادل..
محب.ولا فى دنيا بتقوم ولا فى دنيا بتقعد...ياهو ده كلامك قلتو..واهو ده انا رديت عليك..بكل اريحيه.
واوع الثوره القايمه بره دى مقصود بيها بوست كمونيتى دى؟؟
لا ياخ؟؟
دى كمونيه بريئه..يا بيه!!!
بررررراحه كده وبكل لطف وادب..انصحكم :تانى لو ما عجبكم بوست..طنشوهو
بس..عشان تنومو مطمئنين.. على امن البورد.
واخيرا اطرح عليكم هذا السؤال الفلسفى العميق: احسن الكمونيه ولا البتزا..لكن على شرط لما تجاوبواالاجابه تكون طريفه .. ومفيده زى ما عملوا المساهمين الاعزاء القبلكم
..يعنى اجابه تعمل تغيير واثر..طريف على قارئها..
.وباندوثكم على..طيب؟؟
دة الهومويرك..ولو ما ضحكتونا..حنعرف سبب الزعل..
وانتم فى امان..فى النقد..دايما انتقدوا بدون ما تخافوا...بس النقد ما يكون فيه تجريح او شتيمه او تغول على حق انسان تانى..عشان كده بتقوم الدنيا وما بتقعد..لانو مافى زول "سيد" زول.
سلموا الهومويرك وحكمنا القارىء الكريم..رايكم شنو.؟؟
وطبعا عندكم حرية عدم الاستجابة..
لكم ودى واحترامى وشرفتو بوست الكمونيه والبتزا...
الى بقية المساهمين..اللذاذ
قطعتو مصاريننا بالضحك.
.لكم الحب..والعافيه واللقمه الدافيه...
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
تماضــر،
تقـولى ما بنعـرف أدب الفكاهـة، دى حكوهـا لينـا زماااااان.
نحن ناس مصـقفين ماتشــوفينا كدأ..
زمان فى واحـد عامل فيهـا الود خلاص..
سـأل قال لى بتعـرف بتهــوفن؟
قت ليـه الماخـدا منـو؟
أبى يجــاوب... سكت مرة واحـدة..
ومن اليـوم داك ما سـأل من أى حاجـة، وبقى يضحـك كل ما يلاقينى..
| |
|
|
|
|
|
|
|
|
 Re: احسن الكمونيه ولا البتزا؟ (Re: Tumadir)
|
هو فى الحقيقة السؤال كان يكون
ياخوانا الذ الكمونية ولا البيتزا
وانا طبعا وممالاشك فيه الكمونية الذ واطعم وافيد
العجب كمان المصارين دى كانت اتعملت ملاح ورق
يعنى ورق بى مصارين وتقومى كدا تضوقيها لى ناس
ايطاليا رومانتيكا عشان ياامنو , اها شنو ليك
وعليك امان الله هسى يوم العيد ضابحين فى نرويجنا دا
وانا ح اكون الطباخ المتخصص فى عمل الاكلة الشهية دى
بس انتى رسلى لينا الشطة الخدرا عشان ح اظبطها بالدكوة
ولو فى طريقة ناس البورد ديل كلهم معزومييييييييين شنو؟
ملاح ورق بى مصاريييييين
والماعاجو ياكل بيتزا مسيييييييخة
| |
|
|
|
|
|
|
|
|
|
Re: احسن الكمونيه ولا البتزا؟ (Re: humida)
|
تماضر
الشحتفه شنو؟
خروف اليمن ( المقوِتْ ) دا كبدته نيه مابتتاكل!
+++
إبراهيم حمودة : إنت جادي بس؟؟ كما لو أن الكمونية قدامي !!!!
+++
أنا راجع البيت لي صحن رِجلَه؟؟
فال بيتزا قال!!
| |
|
|
|
|
|
|
|
|
|
Re: احسن الكمونيه ولا البتزا؟ (Re: جورج بنيوتي)
|
نقابى ما عجوز
محمد الشيخ
حميده
جورج بنيوتى
يا شعب الكمونيه البطل..
انى ارى رؤوسا اينعت..وحان قطافها..
رؤوس نيفة نجيضة..مبهره وشديدة..بل ولضيضه..
فلا تتركوا الفرصة لاعدائنا..حملة البتزا على العربات الاجنبية..
والمحلات الاميريكية..
الامبريالية..
وانه لمن الواجب..علينا نحن ابناااااااء الوطن الواحد..ان نمجد كل "ادوات الكمونية" التى تشبع ليس من جوع.فقط بل ومن ...وسعار
تبا للعولمه..وتبا للشيوعيه..وللامبرياليه
و..لا للفجيتيريان ..ولا لعدو الشعب الاكبر: البيتزا
تسقط البيتزا....
وهاهاهاها
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
العزيزة تماضر كل الود
عشان انا عارفك انك حنكوشة ساكت عشان كدا ح اقول ليكي احسن *ابون غازي*وخاصة لو عملو واحد متخصيص وبعد داك تاتي الكمونية بل ان الكمونية تزداد توهجا وحلا بخلطها مع ابون غازي اما البيتزا فتمنع من الحضور انا اول مرة اشوفه كان عام 92 حينما شاهدت مسلسل فتاة من الغد والظريف انو بعد مدة في الافطار الجماعي لي كلية العلوم جابوا لينا بيتزا لكن لم استطيب طعمها ودا قد يكون بسبيب تعودي علي الكمونية وام تكشو وابو غازي وام جنقر والعصايد بكل انواعا والمرس والكجيك والفسيخ ولله في خلق شئون لكن بيني وبينك اكتشفت حديشا انو البيتزا الايرانية جيدة جدا لكن ايضا لا تضاهي الكمونية او الجيفة او الكوارع وخاصة لو كانت كوارع ضان
| |
|
|
|
|
|
|
|
|
|
Re: احسن الكمونيه ولا البتزا؟ (Re: Tumadir)
|
الأستاذة تماضر
بالرغم من تميز الكمونية على البيتزا لأن كل لقمة كمونية فيها لحمة
الا ان بيني وبين الكمونية ود مفقود ولا أستطعمها لانها تصنع من أكثر أجزاء الخروف عرضة للأمراض واذا لا سمح الله مرضت فسوف تموت قبل أن تجد دكتور بشري حاوي ليفوم بتحويلك للطبيب البيطري ذو الآختصاص
جني
| |
|
|
|
|
|
|
| |
Tumadir
theNile
Shinteer
abuguta
ملكة سبأ
الجندرية
WADKASSALA
7abib_alkul
ودقاسم
الفاتح يسن
بلدى يا حبوب
Outcast
Deng
Isam Widaa
Abd-Elrhman sorkati
ABUHUSSEIN
Abureesh
منصوري
HOPEFUL
ابو جهينة
tmbis
أبو ساندرا
Ibrahim Algrefwi
haneena
انور الطيب
Ehab Eltayeb
نصار
إيمان أحمد
WaD OmI
Muhib
أم سهى
mustadam
NGABY AJOOZ
سمندلاوى
mohamed elshiekh
humida
jini
فرح
فيس بوك
تويتر
انستقرام
يوتيوب
بنتيريست