|
يا ناس---- شوفوا لي حلل
|
سلام يا الحلوين الحديثين منكم و المخضرمين
عايزة حلل--بفتح الحاء- مش بالكسرة
يحلنا الحل بلة
أنا من عرقت دربكم دة--خلاص خليت كل شي
صاقرت المصيبة الإ سمها الإنترنت والمنبر دة
الشغل بمشيهو بدون نفس
في البيت--لاصقة في الكرسي مقابلة الشاشة دي -أكل أشرب أتكلم في
التليفون -أشاكل -برضوه ملصوقةهنا
حانطرد من الشغل والبيت يعني حأشحت وما ألقي لي سقف يقيني الحر و البرد---أعمل شنو؟ وروني إنتو بتوفقوا كيف عايزة أتعلم من تجاربكم ---ينولكم ثواب
المفصولة و المطرودة قريبآ- لو ما لحقتوني
حنينه
|
|
|
|
|
|
|
|
Re: يا ناس---- شوفوا لي حلل (Re: Mayada)
|
سلام يا ميادة يعني الحال من بعضو
طيب برضو لازم نشوف حل
نعمل جمعية ونسميها---
المطرودين و المطرودات من أعمالهم ومن خشوم البيوتات
وطبعآ نعملها جمعية خيرية--ونلم ليك تبرعات تمام
موش برضو فكرة؟
| |
|
|
|
|
|
|
Re: يا ناس---- شوفوا لي حلل (Re: haneena)
|
يا رايعه في اربعه خطط الاولي ...إنك ما تكتبي بوست جديد كل يوم التانيه...حاولي شاهدي اخبار في التلفزيون....او فيلم او اي حاجه تلفزيونيه تشغلك عن الكمبيوتر التالته...اعملي زيارات لاصحابك وانشغلي معاهم شويه الرابعه...حاولي اكتبي خارج الجهاز....مذكرات او شعر او قصص او إذا عندك جكس بكون خفف عليك زحمه الكمبيوتر شويه
ونحنا بنكون عليكي حنينيين اكتر منك يا حنينه وده الحلانا من كل شئ اما إذا ما إتوفقت يحلك الحله بله تاني
| |
|
|
|
|
|
|
Re: يا ناس---- شوفوا لي حلل (Re: alfatih)
|
سلام يا الفاتح
الخطة الاولي-انا ما بكتب بوست كل يوم-4 بوستات من يوم جيتي وواحد فيهم لبكري و دق مني طناش لكن بدور كلامكم وباقراهو
الخطة التانية-تلفزيون واخبار؟إنت دايرني أموت بالذبحة؟
الخطة التالتة--أصحابي أكعب مني-وحسح أهن ديلاك مدلدلين الرجلين ومستنيين الحل
الرابعة-فشلت
اما الجكس- فطار من الشباك عندما دخل الكمبيوتر من الباب
| |
|
|
|
|
|
|
Re: يا ناس---- شوفوا لي حلل (Re: Tumadir)
|
تماضر
سلام يا حبيبة
قريت - تراها المشكلة مزمنة
أها لكن إ نت حسع لقيتي حل؟و اللا مصاقرة الشي ده لسة؟
أنا غايتو بقول التانية-موش؟
أها أنا غايتو جمعيتنا دي--خلاص ماشة أسجلها
تجي معاي؟
| |
|
|
|
|
|
|
Re: يا ناس---- شوفوا لي حلل (Re: بدرالدين شنا)
|
بدر الدين شنا
مرحب للزيارة
عليك الله شوفت الحر واللهلبة الكانت هنا قبال إسبوعين في المنبر؟
في حر يا أخوانا أكتر من كدة
دي قصة حب ما عارف إيه ارددها-المرحوم أبو داؤود-
أسامة الخاتم
يعني ح تنضم للجمعية المذكورة أعلاه- يا حليلك
| |
|
|
|
|
|
|
Re: يا ناس---- شوفوا لي حلل (Re: haneena)
|
الأخت حنينة : تحياتي
عاوزة حل نهائي بدون خيارات أو إتصال بصديق أو حذف بوستات ؟
إليك الحل :
هاتي دفتر محاضرات من أبو مية ورقة و أكتبي عليه من برة ( بوستاتي المقترحة )
ثم أكتبي في هذا الدفتر ما يحلو لك ، و خاصة تلك التي تريدين أن تعمليه كبوست. و خلي هذا الدفتر معاك الحجل بالرجل ، يكون معاك أينما ذهبت و أينما حللت. و عند ذهابك فقط للكمبيوتر ، أفتحي الدفتر و أنقلي منه الموضوع المراد طرحه. تاني يوم ما تجيبي معاك الدفتر ، بس راجعي البوست ، لو في مشاركات ، ردي على المشاركات بما يتناسب ، و لو مافي ، تاني يوم جيبي الدفتر ، و هكذا دواليك.
لو الخطة دي ما نجحت ، برجع ليك حق الإستشارة التي لم تدفعيها أصلا ، و لو نفعت ، أرسليه لي بعنوان قرجة أبو عكاز.
شكرا أختي الكريمة و تسلمي.
| |
|
|
|
|
|
|
Re: يا ناس---- شوفوا لي حلل (Re: ابو جهينة)
|
أخي أبو جهينة
كلامك معقول
لكن---
أنا ما بخطط للبوستات--مرات حاجة تكون وجعتك ولازم تكتب وإلا
يعني بوستي دة مثلآ
جيت راجعة من الشغل ومساهرة الليل كلو
بدل ما أنوم قلت كدي أشوف إيميلي-أصلي كنت مستنية رد من ناس عزاز
طنشوني أمبارح
من الايميل لسودانيز اونلاين--و الله العظيم بدقس و نعسانة ما شايفة القدامي وما قادرة أقاوم قلت لااااااا لازم الناس ديل يشوفو لي حلل
ومن هنا جات فكرة البوست و النعسة الله يرحمها ويغفر ليها --
| |
|
|
|
|
|
|
Re: يا ناس---- شوفوا لي حلل (Re: haneena)
|
الأخت حنينة
الله يرجعك ليك النومة و تنامي نوما قريرة العين و و هادئة البال. قولي آمين.
البوست الطاريء لا قاعدة ثابتة له. أما فكرتي فتنطبق على الأفكار التي ستطرح على التوالي ( مش التوالي حقة صاحبنا ).
أنا مثلك ، البوستات لا أخطط لها ، بل تأتيني أحيانا من بوست أقرؤه فأتذكر شيئا ، و يا كي بورد جاك بلا.
المهم ما تهضمي حقوقي الإستشارية
و دمت
| |
|
|
|
|
|
|
Re: يا ناس---- شوفوا لي حلل (Re: ابو جهينة)
|
الحالة واحدة
الحل انك تقطعي خدمة النت من بيتكم
و كان دايرة تجيكي ايميلك امشي نت كافيه
انا مرة او مرات النت قطعت عندنا في البيت طبعا ما كان عندي حل
خليت البورد و بقيت بمشي النت كافيه مرات
و بالتالي ممكن تحافظي على و ظيفتك..و تنضفي البيت..و تسوي الاكل..و تذاكري و تعمل اي عمل مؤجل عندك
كيف معاك الكلام دا و دا حل مجرب يعني مضمون
| |
|
|
|
|
|
|
Re: يا ناس---- شوفوا لي حلل (Re: ensana)
|
حاولي ابعدي عن الاتنين البيت والمكتب
كيف الحل دا معاك
حل مخستك مووش يا ستي يحلك الحله بله البورد دا زي الهيرووين و دخول البورد ما زي خروجو
خلاص لقد دقستي
| |
|
|
|
|
|
|
Re: يا ناس---- شوفوا لي حلل (Re: ensana)
|
سلام إنسانة
حبابك عشرة
النت في بلدنا دي ما بقطع نهائي
بعدين بنستعين بيه في أي شئ-من مواعيد القطارات-أقرب المطاعم
نحجز بيه تزاكر وحتي شراء لوازم البيت عند المشغولية
وشغل البحوث---الخ الخ--والقائمة لا تنتهي
غير التواصل مع الأهل و الأحباب اللي بقوا منتشرين في أصقاع الأرض
غايتوأجرب فكرتك دي وأشوف بصبر قدر كيف تحياتي
| |
|
|
|
|
|
|
Re: يا ناس---- شوفوا لي حلل (Re: haneena)
|
الحنينة بس لو خليتي عملك وطردوك كدا حتكوني خسرت علينا البورد وبدل يساهم في تنمية المجتمع يكون بخرب في بيوت الناس البورد والله ما بتخلا .. غايتو أنا من أجي م العمل أول الحاجة قبل ما أتغدى أفتح البورد اشوف فيه شنو حتى بعد ذلك أمشي اتغدى وأنوم وبعدين أذهب في الخارج واعود كمان اشوف البورد فيه شنو .. وأنا مما دخلت البورد بس قاعد أشارك في البوستات ما عملتي سوى بوست واحد .. وطبعاً البورد أخذ الوقت المخصص لمشاهدة التلفزيون .. وبعدين كمان المدام بقت الأيام دي شوية نقة من القعاد الكثير في البورد وقلتليها خلاص إت شارك في البورد عشان أشغلها شويه ودي مقدمات ليك يا ود البكري بكرة تلقاها رسلت ليك إيميل بطلب المشاركة
| |
|
|
|
|
|
|
Re: يا ناس---- شوفوا لي حلل (Re: فيصل النعيمه)
|
الأخ فيصل
سلام
طيب و الحل شنو؟أنا حاسة بيها مشكلة حقيقية-وحتأثر علي عملي و حياتي
يا ربي
دة واحد من تمن الغربة ال بندفع فيهو
في غياب الأهل و الخلان
وهل بورداب السودان مدمنين زينا كدة؟
مجرد سؤال
| |
|
|
|
|
|
|
Re: يا ناس---- شوفوا لي حلل (Re: Hozy)
|
هوزي الرقيقة سلام
لكن أخلي المشكلة كدة؟ بدون حل؟
أنا عملي داير تركيز شديد
والبيت داير إهتمام-ولكن؟
أها إنتي ما تجي تشجعيني نسجل الجمعية دي
رأيك شنو؟
حنينة
| |
|
|
|
|
|
|
Re: يا ناس---- شوفوا لي حلل (Re: SAdo7)
|
SAdo7
سلام ليك
أنا لو إترفدت يا كم اللاحقون
بما فيكم بكري-- عشان ح أطالبوا بتعويض مادي ومعنوي
الا يبيع البورد دة عشان يسددو
وبكدة--تكون المشكلة حلت نفسها
يا سلام-- أنا ما فكرت في دي ليه من قبيل؟
| |
|
|
|
|
|
|
Re: يا ناس---- شوفوا لي حلل (Re: haneena)
|
ههههه حنينه يابتاعت المصالح عايزه تبيعى البورد مره واحده انا بقيف معاك لكن نصيبى فى البيعه لازم اكون محفوظ لانى حااجيب ليك الزول المشترى وهو جاهز لانو اشترى قبل كم يوم ساعة بج بونج من سجيمان بس شوفى محل الاستلام حتكون وين
| |
|
|
|
|
|
|
Re: يا ناس---- شوفوا لي حلل (Re: SAdo7)
|
الحنينة الحلل لا بد من موازة ما ين العمل والبيت والبورد دا أحسن حلل لأنه لو فقدتي العمل حتفقدي البيت وبالتالي حتفقدي البورد واحسن مما تفقديهم كلهم توازني بينهم .. مداخلة .. تماضر جيداً شفناك مع الحلل(بكسرة الجيم) حلل أهلاً ونزلت سهلاً وخبرينا عن الإجازة كيف نحن قادمين عليها
| |
|
|
|
|
|
|
Re: يا ناس---- شوفوا لي حلل (Re: ABUHUSSEIN)
|
يا أبو حسين
ما دايرة بكري يعييني و لا حاجة
يعني هو أحسن مننا في حكاية ادمان البورد دي؟
ماأظن قاعد يتفرج علينا اليوم كلو
بعدين حكاية بيع البورد دي خلاص دخلت راسي
ح أمشي أشاور المحامي بتاعي وأجيكم
| |
|
|
|
|
|
|
Re: يا ناس---- شوفوا لي حلل (Re: haneena)
|
حنـيــــنة
أنتى فى الخرتوم؟ طيب
تجى نعمل جمعية وتاخدى الاولى؟
وبعدين تشترى ركشة ...وتشتغلى نقل موظفين...لما توصلى آخر زول وانتى راجعة تشترى بتيخة تقيلة...طبعا حتكون حارة...والكهرباء قاطعة..حتمشى تفتشى تلج..وحتكوسى البلد كلها...حتاكليها حاره؟ طبعا لا وابدا لا ...كسناهو ...كسناهو...حتجى راجعة تلعنى سنسفيل أبو التلج ...والمزاج كرت أحمر جاهز ...تشوتى الجهاز ...تقعدنى فى الحوش والكتمة...وعلى حظك الكهرباء تجى مع نشرة الاخبار يقدمها لكم عمر الهزلى ... آسف عمر الجزلى...بدرية سليمان تحضر توقيع سد مروى ..دا حينقد ما يتسد...تشوتى التلفزيو ...(بالفرنساوى)دمك يفور تنعسى تتخمدى تنومى
أها رأيك شنو؟؟ ...
| |
|
|
|
|
|
|
Re: يا ناس---- شوفوا لي حلل (Re: bushramk)
|
أرتيقا سلام
خلاص حنحجز ليك معانا في البص الماشي للمحامي الحيرفع القضية
عشان أثبت إنك من المتضررين
موش قالوا--علي المتضرر أن يلجأ إلي القضاء؟
اها يا بكري --شيل شيلتك
بصنا ركابه كترو
حنينة
| |
|
|
|
|
|
|
Re: يا ناس---- شوفوا لي حلل (Re: haneena)
|
سلام bushramk
ما عرفت اكتبها بالعربي
إنت قريب بسمارك؟
شفت سودانا كيف ؟
الحلول ناجعة--ودائمآ تنتهي ب الخمدة بالرمدة
لكن--يا حليلي
أنا في بلدآ طيرها عجمي
لكن--بجيكم قريب
حنينة
| |
|
|
|
|
|
|
Re: يا ناس---- شوفوا لي حلل (Re: haneena)
|
حنينة انت عارفة انا لاحظت للحكاية جي من اول ايامك في يوم كدة كنت مساهر في البورد لحدي قريب الصباح وقدر ما اتاوق في الناس القاعدين اون لاين القاك قاعدة لكن قلت الزولة دي جديدة والجديد شديد اتريه الحكاية ادمان عديل كدي بالمناسبة البورد دة مفروض يسجلوهو في قائمة العقاقير المخدرة والقابلة للادمان والمفروض تعاطيعهو يكون بحرص شديد وتحت اشراف الطبيب لانو لو فكو الشغلانية ساي كدة المدمنين حيكتروا
غايتو الله يكون في عوننا وعونك
| |
|
|
|
|
|
|
Re: يا ناس---- شوفوا لي حلل (Re: جدو)
|
جدو
مراحب
تأكيدآ لإقتراحك ولمنع الإدمان
أطالب بتحديد ساعات الإرسال البوردية
زي تلفزيون السودان
و ما يخلوها فاكة كدة زي القنوات الفضائية الشغالة 24 ساعة
حنينة
| |
|
|
|
|
|
|
Re: يا ناس---- شوفوا لي حلل (Re: haneena)
|
يحددوا مواعيد الارسال البورديه..؟
واللهيا حنينا بعض احيان لو علق الجهاز بنتوتر انو فصلنا عن البورد
يا اختي العزيزه همك نص همي والله
انا مدمن علي البورد لدرجه جنونيه والله قد يصادف اكون مساهر يومين علي التوالي مع البورد تصدقي الشئ دا
لو لقيتي حل ورينا ليهو
بس انا شخصيا مبسوط كدا يعني ما داير اتحله خااالص
| |
|
|
|
|
|
|
Re: يا ناس---- شوفوا لي حلل (Re: haneena)
|
سلام مربع
حنينه
غايتو اجمل من الحل بتاع بشرى ماشايفه بس المشكلة ما بخلونا نشتغل في الركشااااات
انا غايتو ..كل اللي حصل معاي غصبا عني زادت اشغالي يعني بالاضافة الى اشغالي القديمه زاد عبء البورد وكنت بتمني لو انو اخلي الشغلات القديمه واصاقر البورد بس لكن للاسف بقن علي كلهن
يحلنا الحلا بله وماعارفين يا اهل العوض بله دا اتحلا كيف
| |
|
|
|
|
|
|
Re: يا ناس---- شوفوا لي حلل (Re: shiry)
|
الأخت حنينة
صباح الخير
( بوست طاريء ) يعني بعد ما تسيبي حكاية ( إدمان النت ) و يكون إستعمالك خفيف ، لو جاتك فكرة و إنت بعيدة عن الكمبيوتر ، يعني حاجة ملحة شديد و ما تقدري تنتظري لتاني يوم أو حتى أكثر من الوقت البتصلي فيه الكمبيوتر ، بمعنى آخر لا بد من كتابة الفكرة التي في رأسك دون تأخير ، فتقومي تسيبي الدفتر و جري على النت.
أرجو أن أكون قد وضحت نقطتي.
تسلمي
| |
|
|
|
|
|
|
Re: يا ناس---- شوفوا لي حلل (Re: elsharief)
|
شيري--وعين الله ترعاك
قلت لي ممنوع نسوق ركشاااات؟
قادر الله
وليه يخلونا نسوق عربات و ممنوع الركشااات
إنفصام شخصية غايتو
لكن أنا لو منك-- أخلي كل البتسوي فيهو دة
وأمشي لأصحابك بتاعين سوق الحرامية
ناس الكاسوري---متذكراهم؟
أكيد ح يلقوا ليك ولينا حل
وبعدين--لينا الحلاوة
إتفقنا؟
حنينة
| |
|
|
|
|
|
|
Re: يا ناس---- شوفوا لي حلل (Re: haneena)
|
الأخت حنينـة انت بالمناسـبة مصابة بداء اسـمه داء الكنكشـة والداء دة منتشـر اوسـاط السـودانيين وخاصـة الوزراء والمسـئولين والذين سـلطهم الله سـبحانه وتعالـى على عباده من افراد الشعب السـودانى. يعنى تلقى الوزارة او المؤسسـة التى على رأسها امثال هؤلاء المكنكشين قمة فى الفشـل وسـوء الأدارة لكن الواحد فيهم يكون مكنكش فى الوظيفةمتمتعا بأمتيازاتها حتى النخاع ولايسـال نفسـه حتى مجرد سـؤآل عن سبب خراب تلك الوزارة او تلك المؤسسـة ولا يفكر مجرد تفكير فى تقديم استقالته كما يفعل باقى المسـئولين المحترمين فى باقى انحاء الدنيا. وبما ان الناس على دين ملوكهم فأراكى لم تشذى عن القاعدة وكان الله فى عوننا.
| |
|
|
|
|
|
|
Re: يا ناس---- شوفوا لى حل وليس حلل (Re: haneena)
|
الأخت حنينة
لقد صحح دكتور عبد الله الطيب كلمتك : ياناس شوفو لى حلل بقوله يا ناس شوفو لى حل لأن الحلل هو فى اللغة ..........لا أستطيع البوح به هنا على كل إبحثى عن قول الدكتور وسوف تجدين الإجابة والسلام
| |
|
|
|
|
|
|
Re: يا ناس---- شوفوا لي حلل (Re: haneena)
|
الغاليه حنينه سلام خاص جدا طبعا انا طولت ما خشيت البورد وفي ناس كدا وصلو لي الشمار قالو لي اجري شوفي في زول اسمو قريب من اسمك على كل حال طلعت ازكى مني لانو من زمان الشباب ديل قايلني تبعهم لحدي ما قررت الصق تاء مربوطه في اسمي لكن بعد دا حالجا للحل التالي وامشط النمله بتاعتي انا ستى كنت زيك كدا بما انو كلنا الحنيه كاتلانا لكن امي داعت لصقتي قدام المصيبه دا لحدي ما الكمبيوتر جاتو نفسيات ولحدي حسه ليه اكتر من شهر راقد وماعارفه اخبارو شنو وبعد دا قوم يا خط تلفونا اقطع وبقينا سك في ناس سوداتل وما ادراكم ما سك ناس سواتل وتعالي يا الكهربا وتعالى...... غايتو شغالانه مخستكه كدا لحي ما حردتني اها ايه رايه في دا مش اكتر وسيله فعاله
| |
|
|
|
|
|
|
Re: يا ناس---- شوفوا لي حلل (Re: حنين)
|
EXORCIST7
لك تحياتي
أ نا بتكلم سوداني
و حلل في لهجتنا السودانية معناها معروف وما فيه أي تورية
أما مسألة عبد اللة الطيب دي إنشاء الله نمشي نشوف المعجم
منكم نستفيد
حنينة
| |
|
|
|
|
|
|
Re: يا ناس---- شوفوا لي حلل (Re: haneena)
|
سلام قلقو
شكرآ للزيارة التانية
عارف يا قلقو- كنكشتي في الكيبوردزي كنكشة التعلب حقك دة في جدادتو دي
ملحوظة
تأخر الرد لأني مشيت مصحة العلاج من إدمان البورد
ما أستحملت وياها دي الشردة
وحأواصل
يا الحلوين
حنينة
| |
|
|
|
|
|
|
|