مـــن أقـــوال الســـيد سجــيمــان

رغم كرهي الشديد للنقل والقص واللصق، إلا أنني مضطر إليه اليوم، للإعتراف لأحد المبدعين في هذا البورد بفضله وجهده


الحل في الضرس

زمان لما تتكسر مننا.... سن... نشيلها ونمشي برا.. ونقابيل عين الشمش.... ونجدعها... فوق ونحن نقول ....يا عين الشمش.... اديتك سن الحمار واديني سن الغزال....و كنت زعلان جدا عين الشمش.. دايما تشيل سن الحمار وتديني لها راجعة....ولما كبرت شوية.... عرفت انو كل الشعب السوداني. عين الشمش..تشيل سنون الحمار من الشعوب التانية..... وتلصقن فينا....وفي ناس كمان عين الشمش ادتهم اضنين الحمار فوق البيعة.....وكمان طبايع الحمار برضو من صبر على المكاره وجلد وتحمل للمشاق.......ودي خالقها علاقة ودية نفسية بيننا وبين الحمير.... يعني انا بذكر لما كنت طالب.... لما المدرس يقول لي يا حمار... كان تقع علي بردا وسلاما....لكن لما يقول لي يا كلب.. كنت ازعل جدا... ومن البكاء اجيب شئ.......
المهم .... واحد من احدى الجاليات الاسوية... عمل مشكلة مع سوداني... السوداني اداهو بنية وكسر ليهو ضرس... تدخلت الاجاويد.. لحل المشكلة....ووصلو لانو السوداني يدفع خمسة الف ريال قيمة الضرس الاتكسر ....ويا دار ما دخلك شر.....انا وبيحكو لي في القصة..... لساني جو خشمي يقعد يلمس في ضروسي واحد واحد....وندمت اشد الندم انو... عندي ضرسين... راحن اوانطة ساكت...لا قرش لا تعريفه......وفيهم واحد دفعت من جيبي.. عشان اقلعو....لكن انفرجت اساريري.... لما اكتشفت واحد.... السوسة لم تترك منه غير شرام...وقاعد يتلخلخ.... وانا حالف ما اخليهو يروح بدون فايدة يلحق اخوانا...... بقيت اتشربك في أي زول بدون سبب....اجي ماشي الاقي أي زول .... يا زول بتصر لي مالك؟....واجي اقيف جمبو...وانا مادي حنكي...دايرو بس يهبشو هبشة.. واقول كدي اطير الشريمة حقت الضرس هناك...وشايل قطنتي في جيبي عشان المها فيها.....لكن الغريبة لحسي كل زول الاقيهو واحاول اشبك فيهو يطلع ودحلال.....لكن الايام دي في واحد مدرس ساكن في العمارة الجنبنا.... صارف بدل سكن عشرة الف ريال.... انا غايتو منشن علي نصهن...وهو سوداني.... وعارفو زول كعب.... يلاقط طولو....انا دا ضامنو بونيتو في السهلة
غايتو بقيت الصّق عربتي في عربيتو.... واقوم الصباح متاخر..ويا الله ادور العربية....وبقيت ما بسلم عليهو...واصر ليهو طوالي شايفو بدا.. يضايق...... بالله دعواتكم معانا يديني بونية...ويطير الضريس..... وانا اطلع حق تجديد الجواز والضرائب للسفارة..





الختمية سفينة نوح

ججاءت ... ستي.... راكبة لوري..... نزلت في ديوان العمدة......نحيفة تمشي... قوام... قوام... ومشية ما موزونة......قابلوها الناس ... بالأناشيد.. الختمية.....يا مسكين اوعى تروح والختمية سفينة نوح.....نسوان تزغرد البلد اتلمت من أولها لأخرها..كبير وصغير.....و شئ لله يا غنية ومريم الميرغنية.... ضبحوا الضبايح..... وشدو البليلة بليلة عيش كمان.... نزلت ستي ودخلت بيت العمده استحمت وغيرت وقعدت بعد الغداء في عنقريب كبير في نص الحوش.....والناس يدخلو عليها... مجموعات... الفاتحة يا ستنا....وستنا تشيل وتكشح في الفاتحة...وطشت مختوت في نص الحوش بعيد من ستنا شوية... ا وتجي الناس وترمي القروش فيهو قرش وقرشين وتعريفة و شلن....والله يسألني ستنا تشيل في الفاتحة وعيونها.... مسمرات علي الطشت والقروش....وأنا باقي لي ما كانت بتقراء الفاتحة..... ولا اظنها حافظاها... كانت بتعد في القروش..... الناس انتهوا كلهم دخلو ودفعو الفيهو النصيب.....
فجأة ستنا تقوم..... وتوبها نص لابسوهو ونص في الواطة كاري بوراها..... وتشوت الطشت شلوت...والقريشات يشتتن.... والنوبة تقيف ...والناس صنننننننننننننننن..... ما في زول قحا قحة ساكت..... ويلا ونزلت فيهم شتائم وسب ولعن....انتو رجال..امشو شوفو اللوري دا مليان شنو.....جايبي لي قريشات قدر ديل... وانا من قبيل اشيل وادي فيكم في الفاتحة....وانبري لها احد الخلفاء ....والراجل مسكين ....ما قالها يا......... الا وتشخر فيه اسكت يا دلدول....تقول في الكلام دا وماشة علي السهلة ومن السهلة علي اللوري....كوركت للسواق... جاء جاري جري....دور خلنا نطير من الناس المافيهم فايدة ديل....اللوري حلف بدينو وايمانو ما يدور.... وستنا تجنن زيادة وتنزل في السويويق مسكين.... شتائم وسب دين... أي والله سب دين...وشتائم مفرداتها اول مرة نسمعها في البلد...... ظانيتها كانت شتائم بندر...يالله و يا امبن... اللوري دور وستنا.. ركبت وقبلت.........
الحقيقة انا اندهشت جدا....والله الي الان مندهش ...المرا دي منو؟ ومالها متجننا فوق الناس كدي....وانا واقف جنب راجل كبير وسعلتو........انت يا جدي فلان المرا دي مالها؟ قال لي... غرقانة.... غرقانة ... يا ولدي...برضو انا ما فهمت حاجة......بعدين حتين عرفت انو غرقانة.... دي معناها عندهم يعني غرقانة في العلم... العلم بالله...
ستنا دي غرقانة... طيب لو كانت ما عارفه أي حاجة كان سوت شنو يا ربي؟
رجعت البيت.... لقيت امي شايله ليها بروة حقت صابونة...ودايره تحممنا... وقالت دا باقي الصابونة الاستحمت بها ستنا... نحممكم بها عشان البركة.....ستنا تسب الدين.... ونحن عاوزين البركة من صابونتها ......



السودان يملك أسلحة دمار شامل

الملا ريا.... التايفويد....الحمى المالطية....السرطان بكل أنواعه.....دي كلها أسلحة بايولوجية.... نادر تلاقي زيها في العالم....لكن نحن لأننا شعب مسالم ما حاولنا تطويرها واستعمالها في الدفاع عن أنفسنا.... وناخد موقع مرموق بين الدول .... ذات الشنة والرنة...... وعشان كدا أنا فكرت جاد.. في عقد مؤتمر...لتطوير هذه الأسلحة...وبما أنني من زبائن الملا ريا المعتبرين... وأصحاب الرصيد المرتفع.. فيها....فكرت انو نحن ما بنحتاج لمعامل ولا أي حاجة ..وانو توصلنا إلي نوع فتاك من طفيل الملا ريا.... الذي أصبح طفلا وطفلا ماكن.... بفضل وزارة الصحة وبفضل دكاترتنا الأشاوس....قد اكتسب هذا الطفل... مناعة ما بعدها مناعة لكل أنواع الأدوية...المسجلة والغير مسجلة....وأيضا كذلك إلي ما بعد... أصبح يجيد الاختباء داخل الجسم... يجيد اختيار التوقيت المناسب للظهور... والسرح والمرح فيه.....
برضو عندنا بعوضة قلما يوجد لها نديد في العالم...الأول والتاني والتا لت, تطور هذه البعوضة فأصبحت تجيد فنون الطيران...على ارتفاع منخفض وشاهق..... وتجيد المراوغة...وطورت وسائل دفاعها عن كل أنواع المبيدات.. بل استفادت من هذه المبيدات.... كغذاء ووقود لها...لله درك من بعوضة...طلعتي ارجل من معمل إستاك....وبرضو هذه البعوضة تعرف جيدا أين تقرص.....وكيف تصل إلي المناطق المحصنة من الجسم...والتي تتميز بغزارة الدماء وهشاشة الجلد....وهي أيضا تعرف كيف تختار الملا ريا.. الجيدة من الغير جيدة... حيث انها طورت فلتر في طرف خشمها.. يسمح بمرور الطفيل القوي والمتين.. والقضاء على الضعيف الهزيل....وكذلك طورت اجهزة اليكترونية لمعرفة الشخص المصاب من الغير مصاب.... بغرض النقل من و إلي...
كل الملاحظات اعلاه.... تجعلنا نفكر في كيفية... استعمال الملا ريا وحاملة روؤس... الملا ريا البعوضة....وتطويرها ما حتتعبنا كتير في التطوير... تطوير بحيث أنها تنطلق للهجوم في الوقت المناسب...والتميز بين العدو...والصديق..وكذلك العيش في المناطق الباردة....و التوالد والتكاثر داخل المواسير....وحتى داخل جيوب الناس... وأدراج الترابيز... والأجهزة الاليكترونية المختلفة....وأيضا محاولة تقصير دورة حياة البعوضة...يعني إلي ثواني مثلا..أو اختزال المرحلة... بحيث إنها تكون بيضة.......ثم.. طوالي حشرة كاملة....
اعزائي بهذه الطريقة نكون قد أمن شر الاعداء... او.... يجونا هم في السودان ويكافحوها من حر مالهم.... ونقعد نحن نخلف كرعينا ونتفرج فيهم ..



المشاطة

تجي دايما بعد الفطور......... كلامها كتير.. تجيب اخبار الحلة والحلة الجنبها وجنب الجنبها........ الراجل الداير يعرس فوقها عارفها...والراجلها بيجي سكران كل يوم ويبيتها بعلقة عارفها.........الولدها جاء الطيش..والولدها جاء الاول..والولدها ما جاء خالص برضو عارفاهن.........يختوا لها البنبر.... في نص العنقريب.... تقعد فوقهو من فوق.......والدايرة تتمشط تقعد فوق العنقريب تحت البنبر مباشرة.... والاتنين متجهات..في نفس الاتجاه......عند كرغين الدايرة تتمشط ربطة سلة والله جورسية..وفنجان فيهو شوية زيت....وعلبة لبن النوع الصغير ....فيها دهن......فبال المشاط باسبوع... تبدا... المتمشطة.. في نقيض شعرها... وتفرتكو.. واحدة واحدة.. بمساعدة غالبا ودون مساعدة نادرا......
تفرد المشاطه الشعر الي نصفين....... وبعدين كل نص الي تلاتة اتلات.... التلت الامامي عشان المساير. ولو عاوزهو بدون مساير يكون قسمين بس.... ودي اسمها السودان قفل يعني الشعر ما مقسوم لا اتنين ولا اربعة...وكان كل منطقة عندها طريقة خاصة في المشاط..والمسايريخلوهودايما بدون مشاط....تبدا تمشط.... من نص الراس ....ومتجهة الي خارج الراس يمينا او يسارا.......غالبا عملية المشاط تاخد يومين...
تمسك المتمشطة بالسلة او الجورسية......وتبدا تسويها جدايل طرف الجديلة الواحدة يكون بين الابهام والسبابة من اصابع القدم......والطرف الاخر في يدها......وتبدا المشاطة في الشغل..... ومشاط دقاقة... كل ما كان دقاقة وجاي مظبوط وقاسم الشعر قسمة الحلال والبلال...في الراس..دي مشاطة ممتازة وتصنف على انها درجة اولى.....والونسة مع عملية المشاطة... تدي المتمشطة اخبار الناس وتاخد اخبارها عشان توزعها.....في الحلة.......
ودايما تتغدى في بيت المتمشطة لمدة يومين...... وفي مشاطات بالحجز.... يعني لازم قبل ..اسبوع تديها خبر.....
اعرف اسر كتيرة كانت تصرف عليها مشاطة .... يا اما يتامى او يكون الاب عاجز....... مافي اسعار معروفة المتمشطة وقدرتها...ونظرتها للمشاطة ... شغلها وضعها المادي عدد افراد اسرتها واحيانا علاقتها الشخصية بيها....المشاطة كان ليها وضعها الاجتماعي الخطير..... تعرف البيت الفيهو البنات البقن عرس ....والبنات السمحات...والشينات...والمادبات وقليلات الادب......ودا بالتاكيد عندو تاثيرو.......وبرضو الولاد المودبين والمتربين... والجنهم سكر والصايعين.....وكيفن بتكلمو مع اهلم...ومنو البيشتغل ومنو المتكل علي الباقين.........وغالبا ما كلنت تستشار في الزواج بطريقة مباشرة او باللفة....عشان كدا يومها التجي ... تكون في حالة طوارئ في البيت.... يدسو الدايرين يدسوهو...ويورو السمح العندهم...



حالفينكو

من جاءت......الانقاذ..... جاءت شايله معاها المصاحف.....وحالفين ناسها .. بدينهم وايمانهم الا يحلفو الشعب السوداني كلو......وتكون ثورة التحليف العالي.... نديدة لثورة التعليم العالي.....واكتر ناس ماسكين في التحليف... ناس جهاز المغتربين وبنات عمو السفارات...اسمك منو؟ سجيمان .... احلف انو دا اسمك.... ساكن وين؟ ..امبدة....احلف.انك ساكن امبدة...انا في الحقيقة فكرت اسيب شغلانتي دي...واشتغل حالف.... وشعاري يكون حالف تذكر...واقعد قدام باب الجهاز... واعرض خدماتي لكل من ارادو ان يحلفوهو..وامشي احلف بدلو....ولن احلف كاذب...بالتاكيد .. لاني اصلا انا ما صاحب الجواز....وما في زول حيكتشف اني ما صاحب الجواز... لانو ما في أي موظف بيفتح الجواز ويطابق صورتو مع الزول الشايلو.....ولحسي ما حلفو زول قالو ليهو دا انت والله ما انت....
اكتب يافطة كبيرة .......... سجيمان للحلفان....وكل حليفة بسعرها....وحسب المبلغ الممكن الزول يتخارج منو...والله احسن اضع نسبة عشرة في المائة من المبلغ اخدها انا.......وممكن اوسع خدماتي تشمل قطاعات تانية غير المغتربين... ضباط الجيش مثلا...وخاصة الناوين يسو انقلاب.... لما تجي الديمقراطية....احلف نيابة عنهم ...وهم يسو انقلابهم... بدون تأنيب ضمير...وممكن امشي الاراضي برضو....وحتى الفنانين...لو واحد عندو أي اغنية فيها حليفة.... زي غنية حمد الريح طير الرهو..... انا اقول والله..... وحمد يتم الباقي......او العطبراوي في يا وطني العزيز... انا اقول بحلف بحياتك.. وهو يتم الباقي.. ويكون ابو علي في السيف صايد.. ومحمد الامين انا اقول وحيات ابتسامتك وحيات عينيك....وابوالامين يكمل. والعندو حفلة...انا مستعد اطلع معاهو الحفلة.... واي غنية فيها حليفة.... ..... احلف انا نيابة عنو... وكلو بسعرو.... وامشي للجماعة بتاعين الونسة برضو......انا اقول علي الطلاق....وهو يتم كضبو.وياخد راحتو بالكامل مرتاح البال.....و السماسرة...والجزارين وكل قطاعات الشعب الكادحة والفالحة....
وممكن اوسع الشغلانة واعملها شركة....شركة حالفينكو....ويكون عندي كمية من الحالفين.. ولازم يكون خريج....وممكن نوظف .. تقنية الاتصالات... لخدمة الشركة... يكون عندنا رقم خاص و مسجلة فيهو حليفة جاهزة حسب الطلب.تتصل بالموبايل.او التلفون الثابت..اذا اردت ان تحلف بالله اضغط الرقم واحد..... بالرسول الرقم اتنين... تحلف طلاق الرقم تلاتة...عندك فكي ميت وعاوز تحلف بيهو الرقم اربعة...و.يكون في قسم خاص بالنساء....لو عاوزة تحلف بالله يكسرها تضغط الرقم واحد وعشرين......ولو عاوزة تحلف انها. ما تقوم من قعدتها دي تضغط الرقم واحد وتلاتين....ولو عاوزة تعدم وليداتها تضغط الرقم واحد واربعين......ولو عاوزة تعدم ابوهم بالمرة تضغط تلاتة اصفار... هكذا..ونفتح قناة فضائية.. نسميها حليفة سات....وموقع في الانترنت ويكون عنوانو.... دبليو دبليو دبليو دوط حليفة دوط كم


حمادة من أكشاك الليمون الى الكورنيش


حمادة... اكتر سوداني مشهور...على عبر السنين والقرون....من ايام لاقا حواء الطقطاقة... باللفة والالم العليها خفا....عندما كلمت اختو الشفة....ولما امو ولدت تاني وجابت غادة....لاقى حواء برضو لكن كانت ماشة العيادة...والمرة دي غلبتها الشهادة كلو كلو...مرت الأيام...وتكتشف انو حمادة جارهم بالحيطة...وبابو جنب بابهم.... وبوظ اعصابهم...وبقت تشتكي للكلب وفايت الدرب..من حمادة .......وتلم فيهو وتشوفو... حنان بلوبلو....وتجكسو..و. يجكسها..و يدي حواء شاكوش... لكن يطلع ما عندو عشرة ويزوق.. منها ويغترب.... وتقعد هي تنبح ليل نهار ... في الحفلات وفي البكاسي...وفي أكشاك الليمون... ألمني وسافر ما كلمني.....مرة تقول حمادة دا..ومرة ما تجيب اسمو.....يا امتا زعل او خوف من العين..و الحساد ..و العوازل.. وتلمح بس ...واي واي خلاني براي... المسافر جدة خلاني براي...وواي واي...والبلد كلها تسوي في الواي واي.....وراها..كبيرها وضغيرها.....واخيرا بلغ الياس من بلوبلو .... وامعانا في اغاظة حمادة....بقت توري في الشحم دا واللحم دا.....ومرة تشتمو حبيبي فانتاستك.... بيضرب بوهية بوماستك......من نهاية التمانيات انقطعت اخبار حمادة......ولكن ولله الحمد والمنة... في مسلسل العطار والسبعة بنات.... اعرف انو حمادة موجود وحي يرزق في مصر... وقابل جواهر علي الكرنيش... ونص النهار زي الشيطان كان بيعوم في البحر...واشر لها بالمنديل. .. وقال لها تعالي نتفن في واطاة الله دي....وازعلو....وا معطو....وازعطو....وهو في تفيّنتو ديك........
وحمادة متحمل وصابر على الظعيّط و المعيّط دا....لانو... قاعد في مصر و بيحاول يهاجر يا اوربا يا امريكا...وهناك تلاقيهو واحدة.... خواجية.... وتقعد تغني له....... اوه هماده.... اوه هماده... بيبي... هماده... لكن المرة دي حمادة حيتزوج الخواجية دي...وياخد القرين كارد.....او الاقامة....و. بلا ......حواء.... و....بلا...... حنان.... و....بلا.... جواهر.. و....بلا... لمة..فارغة........




خواطر قرد

بعد يوم... كلو نطيط..وجري..... طلع فوق شدرة كبيره... ورقد وخلف كراعو..ودلدل ضنبو.. وعينو فجأة... وقعت.. في حبيبتو... تقطع في ورق شدرة وتأكل....وختا ايدو اليمين تحت راسو... وقعد يغني لها ... يا مداعب الغصن الرطيب.....اتعكنن فجأة.. داير يعرسها وما عارف كيف..... وهو لحسي صغير.... وقعد يفكر... انا ادخل الكلية الحربية..واخد لي فيها اسبوعين...واسوي انقلاب... علي شيخ القرود دا ...... كرهنا عيشتنا...وانقذ الشعب القردي دا من بلاويهو ...ونضميهو الكتير البلا... فايدة دا...النهار كلو لا بياكل لا بيشرب... بس نضم..شابكنا.. ينبغي.. وينبغي... لكن افرض كشفوني...ما بيقتلوني..واهلي ما يعرفو لي درب.....لا انا.... اهاجر...والله الهجرة زاتها راحة بال.....لكن اسافر وين؟... قرود البلد دي.... ما خلو لهم بلد ما وصلوها....بلاش هجرة..... انا اصبر شوية....واخلي دقني تكبر وادخل سوق الله اكبر....حسي بخيت ود عمتي دا... راسمالو شنو؟... ما دقينة.....وحسي عندو اربعة شدر كبار....ومشغل... قريدات البلد كلها علي حسابو ومعاهو......الا انا دا ابي يشغلني معاهو....قال لي شق طريقك براك؟ بالله شيخ بخيت دا ما مستنكح؟... حسي هو شق طريقو براهو؟ ا اكان ما كان عضو في لجنة القرود المكشحة.؟....والله حسي كان ما لاقي ياكل... يا اخي انا زاتي ما ادخل اللجنة دي...!....لكن دي زاتها حسي دايره لها واسطة...والله زمان يشحدونا عليها...ونضحك فيهم ونقول لهم امشو يا قرود يا شينين ومبشتنين....والله دي انا دقست فيها......جنس دقسة .... يلا.....
يا اخي انا ما ابقى فنان... واقعد اغني... انا عارف صوتي شين.....اغني...... مالو؟.......حسي القريد ود جيرانا ابصلعة داك...حسو سمح؟ ما سمح.......... والله....ولا.. القريدة... الساكنين في الشدرة الفي الناصية ديك.... والله اختي قالت لي عندها اربعتاشر باروكة...يخربها..راسها مدقلش عدمان اسم الشعرة...وكلو يوم... تقوقي.... في حتة..و........اخ اخ اخ اخ اخ اخ اخ....القرد نام اصلها كانت قوية.........



رسالة الى ملكة بريطانيا

ظعيط اخو معيط....... وعسيل جد العسيلات اخو حليو جد الحلاوين....... وربيط جد الرباطاب اخو بريط جد البريطانين.......وبما اننا تربطنا نحن الرباطاب صلات رحم وقرابة مع البرطانين.........وهم ولاد عمنا لزم...... انا بطلب من ملكة بريطانيا......ورئيس وزراء بريطانيا.... تجييش الجيوش... ومساعدتنا في الانفصال واقامة دولتنا... ربيطانيا....علما بان ملكتنا..... عزيزة ادريس الاولى وقد اخترناها تيمننا باليزا بيس الاولى......واخترنا ناموسة رمزا للمملكة....وتم الاتفاق على الوان العلم الربيطاني.....وكذلك النشيد الوطني.....المستوحى من اغنية احمد عمر الرباطابي....من امدر من ربوع سودانا....وخلي ناس الاذاعة وناس عقد الجلاد يشوفو لهم اكل عيش تاني.....جلالة الملكة.... نحن ما اكعب من ناس الفوكلاند.....بالعكس نحن اولى بعطفكم...ونعلمكم اننا مضطهدين...من الاستعمار السوداني الجاير...مدارس ما عندنا.. مستشفيات الا نسافرلها سفر.وناسنا المرضانين يموتو.... في نص الدرب....الجامعات يوزعو فيها شمال ويمين..... ما دايرين يسو لنا ولا كلية..رطل السكر يقوم من الخرتوم بخمسمائة جنية لمن يصلنا يصلنا بخمسة الاف.... ان شعب ربيطانيا شعب مسالم... لا يجيد غير اكل القراصة....والنضمي..وقشيّر المايكة...وفتل الحبال..كما نفيدكم... بان السرطان والملاريا.. ما خلت زول حايم....وفترنا من شيل الفاتحة... في الناس البيموتو....ولما ما يموت زول عندنا... نكون زهجانين غاية الزهج......سو لنا شارع قالو من عطبرة لي ابوحمد.. وحاتك انتي فرد طرقة حقت اسفلت.. عشان نصل الشارع دا نركب حمار ومسيرة يومين.... من البحر....
اننا يا جلالة الملكة..... ما دايرين نتمرد.. لانو واطاتنا كاشفة....وما عندنا غابة ندخلها ..وقدر الوليدات العندنا نصهم عندو ملاريا والنص التاني مات في الجنوب يقاتل بجانب الاستعمار السوداني الجائر....اننا نعتبر ذلك نوع من انواع التصفية العرقية لشعب ربيطانيا.....كما ان هناك مؤامرة لاغراق ارض ربيطانيا....بالموية...وتهجير سكانها وتشتيتهم....
كما يعمد الاستعمار السوداني... على عدم مشاركتنا في أي مباحثات...من ابوجا ... لمشاكوس...
اننا يا جلالة الملكة في انتظار عطفكم وتكرمكم.............

ولاد عمك الرباطاب



طز في الشعب السودان


شعب في المزاد العلني...... يبيعو ويشتروا فيهو.... ولسانا طويل..... وكل واحد فينا يقول نحن شعب اصيل طـــــززززززززز

ود الارباب اشترى دوانا ومصانعنا وكورتنا......وطز في الشعب السوداني

الوليد سلالة الملوك اشترى غنمنا وبهمنا وقلل فهمنا ..... وطز في الشعب السوداني

صالح كامل....... اشترى رقيصنا وغنانا...وكلامنا.....وطز في الشعب السوداني

خمستاشر عسكري...... سرقوا.... حريتنا وكرامتنا وعزتنا....وبرضو لسانا طويل..وبنقول شعب اصيل......وطز ثم طز ثم طز في الشعب السوداني



طلقاني

غايتو انا........ ما مسئول.... وانت علي كيفك...رجال كتار زهجانين من نسوانهم وما عارفين يتخارجو منهن كيف.......بسيطة.... الطلاق.....طلقها واجدعها في بيت اهلها بالحيطة.....و كان عندك شفع طنش.... ما شق حنكا ضيعو

طيب كيف الطلاق يكون؟........... اول حاجة... كمرحلة اولى...... اقع في الوليدات دقديّق ونهيّر....داخل شلوت مارق كف..... عشان يكجنوك..... وبعدين يقولو دايرين نمشي مع امي.......وترتاح من الغاغة حقتهم.......
المرحلة التانية...... جيب امك تقعد معاكم في البيت.... خت ليها عنقريب في نص الصالة..... وفرشو ليها.... وخليها تصنقر فيهو...وتتقنع بي توبها...... وتمدد كرعيها... وتخت الشمال فوق اليمين...... وتقعد تهزهز فيهن...... وتعاين للمرا هي داخله وهي مارقة....وكل ما تجي ماشة بعند.. امك ...امك..تسلم علي ابليس...... وتقول جي جي جي يا يمة......ولا تقول والله غايتو جنس حالة؟ لا تسر العدو ولا الصليح..المرا هنا حتتلفت علي امك وتقولها بسم الله يا خالتي مالك؟.....خلي امك تمسك في كلمة بسم الله دي.......وتقبل علي مرتك...... وتقولها الليلة وب علي وب علي وب علي.وا سجمي وا سجمي.. دايرة تمرقيتي مجنونة يا بت امنة؟ والله يا هو الفضل؟....والله غايتو جنس محنا يا حباني.....انت في اللحظة دي تجي داخل.... وتلقى العوى واقفة....وامك من تشوفوك تقعد تبكي...الحقني يا عصام يا ولدي..... علي شوية كدي... مريتك دايرة تدقني

..... انت طوالي تتحنفش.... وتعاين للمرا بعين حارة.... وتذكر حديث قال ثم من؟ قال امك.....والبر وبالوالدين.... دا كلو عشان ما تضعف.....و تكورك لجارك البجاي وجارك بالهناك.....وتقولها يا عواطف انتي طلقانة..


عيد السجم والرماد

اغنية..... في الضرائب.... يطلبها المتغرب\حتوهو مصلوهو....ويهديها الي كل من\الزوجة العزيزة\ مادا قدوما بالسودان .... والابن\ بنطلونو مقطع...والابنة\ما بلبس فستان السنة الفاتت.... والوالدة\ماني عافية منك كان ما رسلت المصاريف.... كما يهيدها الي ابن خالته\سجمو ما عندو ابعشرين... بالدمام...وصديقه\ابو سنتين قاعد ساكت... بالخبر.......... كما يهدي اغنية الفنان\كفيل حسن ضريبة...... الي سعادة سفير السودان بالرياض\شيخ الضريبة ما جايب خبر... والي ابنائه\نونو ...بلندن ...وفو فو بباريس.... وسوسوببرلين.... كما يهديها الي حرم السفير\دهباية كرسي جابر..بمناسبة العيد السعيد...
كما يهديها الي قنصل السودان بالرياض السيد\ حسي العندك جيبو لكن المرة الجاية ما بنخليك...و حرمه واولاده مع احلى الاماني..... كما يهدي الاغنية الي قنصل السودان بجدة ..... السيد\ كان عجبك عجبك وكان ما عجبك محل ما عايز تمش ...امشي.... كما يهدبها الي مدير عكاز المغتربين بالخرطوم السيد\ يا تدفع يا تترزع هنا...وجميع اعضاء العكاز مع احلى الاماني.......
كما يهدي اغنية في الضرائب .... الي كفيلهو.... الشيخ\والله لاسفرك...والاسرة الكريمة...
الي جميع الزملاء..... بالسعودية .....والامارات...... وسلطنة عمان .....وكافة ابناء الشعب السوداني.