دعواتكم لزميلنا المفكر د.الباقر العفيف بالشفاء العاجل
|
|
 حـنـيــن
|
بسم الله أبدأ ليك خطابـي
انتي يالبعدك عذابـي
واخبي عنك إكتئابـي
وسر شقاي أنا وانتحابـي
القرايب شافوا حالي
قالوا أصبر قلت صابر
والله يعلم ماني صابـر
إلا قدامهم بكابر
وشان بريدك
أوع يتأخـر بريـدك
طمنيني على وليدك
شوقي ليكي ولي وليدك
سلميلي على وجيهـو
قبليهو وقولي ليهو
غصب عني فراقي ليهو
كان مناي أكون صقير وأطير أجيهو
لي قليب ولهان أضمو
أطفي نارو وأشفـي همـو
قولي ليهو
مناي تكبر في بلادك
وتلقى تعليمك وزادك
وفيها تستثمر جهادك
نحن إتغربنا ياما
شن لقينا سـوى الندامة
وشن جنينا سوى الملامـة
لانا شبعنا العشامـى
ولا غنينا ولا قيامة
أعـذرينـي
ما قصدت معاي أغمـك
إلا في آخـر خطابـي
كل قصـدي أقول فراقكم سر عذابـي
|
|
 
|
|
|
|
|
|
|
|
Re: حـنـيــن (Re: singawi)
|
سنجاوى الشامخ
كلنا فى الهم حزن وحنين
أنا حالتى دى قايل رقبتى براى، وقاعد أعمل ليك فيها ولا ابزيد الهلالى
يا خوى ابزيد يطير، كدى ناولنى الدموع ديل النبكى بيهن، لكين يا سنجة كان جانى شى، الدية عليك
وهاك يا بكا، علها ما تنت
| |
|
|
|
|
|
|
|
|
|
Re: حـنـيــن (Re: singawi)
|
العزيز الشريف
حباب الدندر حبابها
صدقت .. الحنين للنيل الأزرق .. وللديار والأهل وللرفاق .. وللبرق والرعد والمطر والدعاش والطين .. للسنط والسدر والهشاب والليمون والقريب والمانجو والدليب والهجليج .. للعونكوليب وقصب السكر وأم كرم كرم والموليتا .. وللغزلان والأرانب والقماري والحبارى ..والّليل والنجوم والقمر .. واااشوقاً علي بلدي .. شوق زولاً ولوف بكاااااااي
| |
|
|
|
|
|
|
|
|
|
Re: حـنـيــن (Re: singawi)
|
المطر
أو
الطرفة البكاية
البكاء عصير المشاعر لا يجيده إلا الأنقياء أمثالك
سألتك ربـي تجمع كل حبيب بي حبيبو
وتحفظ عُشو من عين الحسود ما تصيبو
وترحـم قلبو من شوقاً يـدوي لهيبـو
وتجمـع شملي بالشايـل قليبي تجيـبو
دحين
صب الدمعة فوق الدمعتين
وأسأل ربك الرحمن وقول آمين
ونحن معاك نقول آمييييين
تحياتي
| |
|
|
|
|
|
|
|
|
|
Re: حـنـيــن (Re: singawi)
|
سنجاوى
يا رفيق الأمنيات السمحة
انت ما سمعت قريبنا امحمد زين ود عمر قال شنو وكت قلعو منه ام عيسى
اهلك ختمو ودرجو
على مسكين ما عرجو
والبكا للزول شن فرجو
الغنية طويلة، زى رويحتنا المشحتفه دى، إلا نسيتا كلها والله يا سنجاوى، دحين اخير نخلى الطابق مستور، والدميعات كان دايره تنزل، التنزل بى جوا، امكن تطفى الواقوقه والقهبونه الهابلا دى
والمعزات الوضيئة، وقبلها السلام، كلها ليك يا سنجة
| |
|
|
|
|
|
|
|
|
|
Re: حـنـيــن (Re: THE RAIN)
|
مافى زول عندو تشو
والله يا سنجة الجرسة عندك لكن
ربنا يلمكم فى ساعة خير
ويحفظكم ويرعاكم من كلو بلاء
| |
|
|
|
|
|
|
|
|
|
Re: حـنـيــن (Re: singawi)
|
العزيز سنجاوى
حنينك زكرنا طفاف النيل الازرق و امطار الخرسان والعبور من الدندر الى سنجه وحنين الاهل بجوار سوق ليبيا
ولك شكرى ومودتى
| |
|
|
|
|
|
|
|
|
|
Re: حـنـيــن (Re: singawi)
|
الحبيب المطر
قلت لي المسكين شن قال
اهلك ختمو ودرجو
على مسكين ما عرجو
والبكا للزول شن فرجو
لا حول ولا قوة إلا بالله
بتخيلو ليك يغنيها بي صوتاً حزين يقطع القلب
وأظنه ببكيها بالطريقة دي
أهلك ختمو ودرجوووو
على المسكيين ما عرجووو
وآظن في مقطع مفقود بعد عرجووو دي بعد داك بجي المقطع الرابع
والبكا للزول شن فرجووووو
وينتهي بي قنتة لاحقاها ونة يعقبها زفير
المطر
سألتك بالذي خلقك حاول اتذكر لي المقطع المفقود دا كان غلبك تتذكر كل البكيـة
| |
|
|
|
|
|
|
|
|
|
Re: حـنـيــن (Re: singawi)
|
سنجاوى العزيز
انت زول شاعر فعلا والله، تمام زى ما قلت فى بيت مفروض يكون متغز قبل البيت الأخرانى، وهسه انت بالحيل حركت فينى شهية الجرى ورا غناء ناس بطانة اب على وتهاويم شرق الله البارد بعد ما الله ريحنى ورقد رويحتى شويه
اصبر لى بس، بقلعا ليك، ولومك على اجيب ليك الغنية كلها
وعتاق التحايا ليك
| |
|
|
|
|
|
|
|
|
|
Re: حـنـيــن (Re: singawi)
|
مطر الرشاش الرش
ياها المرحية في ياقريبي
إلا عجل سرييييع قبل ما نارنا تبرد تقوم تشعللها تاني من جديد
وما دام رجعناك للبطانة تاني
أذكرك بي عشرة الخيمة .. ما بصح تنساها
والأخوان في الخيمة الأولى بيسألو منك بشدة خاصة الأخ كبوش
عشان خاطرنا ترجع
عشان خوتنا ترجع
لك الود .. كل الود
العزيزة بيان
مناديلك معطرة .. ما قصرتي
ان شاء الله ما يواجبوك في شينة
حفظك الله وأحبابك
تحياتي
| |
|
|
|
|
|
|
|
|
|
Re: حـنـيــن (Re: singawi)
|
و الحنين اليك
يمشى تائها بين الدروب فلا رنين ولا خبر
اين الخطاب
واين تاريخ
واين وجهك
لو يطل الان
انى فى خطر
تحياتى ...
| |
|
|
|
|
|
|
|
|
 Re: حـنـيــن (Re: nasiradin)
|
الكريم سنجاوي
لك التحية والاحترام
بصراحة القصيدة البكية كاربة
لكن الموضوع كبير وخطير ويحتاج للمناقشة
قصدي القضية الاجتماعية أو على الأصح القضايا الاجتماعية المطروحة في القصيدة
| |
|
|
|
|
|
|
|
|
|
Re: حـنـيــن (Re: singawi)
|
سنجاوى ابنضمن يداوى هدا ترانى ضايرت ليك مناحة امحومد زين ود عمر فوق رقبته وفوق منضرة عيونو، ام عيسى، الخرتوها منه خرتن ظاهر وبين
مى حميرا هريريجه
ومى زريقا كنيكيجه
ديفة الوقفن سيجه
وخلت عقلى دهيجه
مى حميرا ام دمن حار
ومى زريقا زويلة نار
ما بتجيب غلت الجار
وما بتقول ده شن قال
لونك دهبه وصافيى
وريقك لبن الجافيه
ما بتب متلافيه
وحسسك مرق العافية
عربك ختمو الفاو
وشيلك نيق مو حجاو
يا ام درعن راتع العلاو
طعمك قونديل مو تمير جاو
اهلك رحلو ودرجو
على مرضان ما عرجو
يا بكيرة الاندرجو
البكا للزول شن فرجو
اهلك رحلو وحاحو
وبى كتارهن راحو
وشك بى شرخو
قمرا لاقى صباحو
الليلة ام خد نزلت وين
سافل القلعة وصعيد العين
فايته الصيد بى اتنين
طول رقبة ولون ايدين
عقدو الشوره امامك
وضربو الحُق قدامك
الجدلة ام رشمه زمامك
ومتل لون عجوه كلامك
بى قريقريب ما اندرجت
وفوق توب حد ما درجت
سنك برق الهرجت
وريقك لبن الدرجت
جاهو دريباً عارق
وسحره ابجنن فارق
الفى عقاله بزارق
الليلة ان طار مو مارق
سمحورك مو نقنيق
وفى الصندل عودو شقيق
الناجر الصف ماهو نعيق
مجضم وفاك الريق
حتهو يا سنجاوى الغنا ده ما ياهو كله، ولى هسه فوقو عقاب، كان داير تسمع كلامى، اقع اخونا اهل العوض، النضم ده كله بتلقاهو حداهو
| |
|
|
|
|
|
|
|
|
|
Re: حـنـيــن (Re: singawi)
|
العزيزة رمانة
شكراً ياذوق
أما عن القضية الاجتماعية التي حومت حولها فسأنتظر وجهة نظرك
كلك كلك
كلك نظر
تحياتي
| |
|
|
|
|
|
|
|
|
|
Re: حـنـيــن (Re: singawi)
|
الموهبة الشعرية التي تكتسب أو تلهم من هموم الحياة أو الغربة ( بالذات في جدة التي غربتها غير ) لا تستحق منا دفعة ما دامت قد انطلقت من فيه لا فض البتة .. باندفاع صاروخ مدون عليه :
Made in singah
| |
|
|
|
|
|
|
|
|
|
Re: حـنـيــن (Re: singawi)
|
Dear Singawi
You remembering me Sennar, singa, alsuki, wadalabas, karkug, galaa alnakhal algadarif, aldinder, nice Sudan...etc, before 14 years I didn't think that the Journey will be long time like that but the true is it..., only it remains for us patient and patient and patient, the poetry is very great and deep, expressing the really longing and love, unfortunately I think that this is the state of most boards people, but my heart is stoning.
| |
|
|
|
|
|
|
|
|
|
Re: حـنـيــن (Re: singawi)
|
حبيبي المطر
ألف شكر على بكية محمد زين ود عمر
وزولاً بنتج جنس دا أكيد عنده المزيد
وفي النفس حاجات وفيك فطانة
وأنا ما بفسر وانت ما تقصر
لك ودي
| |
|
|
|
|
|
|
|
|
|
Re: حـنـيــن (Re: singawi)
|
حبيبنا حسام
تحية واحترام
مشكور على عسل الكلام
في انتظار جديدك المثير حتما
بيناتنا السلك عشان أجيك بالدرب
تحياتي لك وللأسرة الكريمة
| |
|
|
|
|
|
|
|
|
|
Re: حـنـيــن (Re: singawi)
|
أخي سعـد
أراك من أهل شرق سنجة .. رائحتك محببة ومألوفة
ذكرتني بتلك الديار .. واشوقاً على بلدي
رد الله غربتك وغربتنا أجمعين سالمين غانمين
مشكور على الطلة وعلى الحروف
تحياتي
| |
|
|
|
|
|
|
|
|
|
Re: حـنـيــن (Re: singawi)
|
شاعرنا الحبيب بامسيكا
شاكر حروفك
وما الحكمة في كونك بخيييل
وأهلك أرابيب الندى
أرجو امتعاعنا ببعض ماعندك من عصير المشاعر
تحياتي
| |
|
|
|
|
|
|
|
|
|
Re: حـنـيــن (Re: singawi)
|
يا سنجاوي
لك الشكر و الله زكرتنا الصعيد حيث الجمال بكل ما تحمل الكلمة من معاني عشره و طبيعه و ناس وخريف وكل شي جميل - سنار - سنجة عبد الله - السوكي سمك - المزموم عاصمة الجبال - القربين وجبالها كما حدائق بابل المعلقة عند الخريف شراب الموية من الجمام بعد اكلة (كيكو)هنية وسط الغبش و ابو حجار و الدندر و الحظيرة و كركوج الاشراف ويالها من بلد و الروصيرص لاتوصف وان ملكت نواصي كل لغات الارض الدمازين اسوء ما فيها الكاكي الكتير و تعال علي مينا و الجزائر وكمان امشي علي السوكي والسمك والمنشار و زين العابدين و الكويت و حمدناالله المحالج وجناين ابوالعلا وشاشينه و ام لبن و مسره و العركيين و ودالعباس و 44 ودتكتوك و ودوانسه كما يحلو لاهل التاريخ والاثار اودون و اونسه و ماتنسي درة المنطقه سالمه والمشتل والجمال والحب في بلادي وطال من سنجه وتقوم تصل مايرنووالامين كابو و متحفه الطبيعي الذي يحتوي علي تماسيح النيل الازرق الالهام ورمز الحياة و التاريخ والحاضر ثم سنار الربه لامسيد لاقبه السودان الالفه الطرب سماحة الاهل والعشيرة وبعدينالواحد رجع الي سنجه الجميلة درة الفونج و نادي الشبيبة وكل سنجه شبر شبر التحيه والاجلال
ما انسي ناس الصابونابي و دار عقيل و كنيزه وابونعامه وناس قنوفه والحديث يطول عن المنطقة جغرافيا و تاريخ و انسان ويالله يا زول مكوار نفر مكوار والسفر
ما الذي اخرجك من بسطام
قال طلب الحق
ولمتين الرجعة
الي صعيدنا؟؟؟
و بالمناسبه مره بحكي وسط مجموعة من الشباب والشابات في مركز السودان القومي للغات (سلتي)
في تداعي صباحي ذات خريف عن الخريف عندنا في الصعيد نطت واحده من بنات المصارين البيض علي ما اعتقد من العمارات قالت لي الصعيد في مصر وكانت الفاجعة قلت ليها لا نحن برضو في السودان عندنا صعيد و يا حليل المابان وقيسان و الكرمك وبوط وويركت وحسن نجيلة وسنج عبدالله .
| |
|
|
|
|
|
|
|
|
|
Re: حـنـيــن (Re: singawi)
|
المامون أخوي
ما شاء الله ياخي .. ملم بتفاصيل خريطة صعيدنا.. انت يا خوي كنت سايق ليك لوري ولا شنو .. عيني عليك باردة .. بطول الغربة بدت بعض التفاصيل تختبئ في أركان الذاكرة وتكاد تتبخر .. نفضت عنها الغبار بسردك لأسماء ديار حوت أحبابي وأصدقائي وزملائي
لك الود
| |
|
|
|
|
|
|
| |
elsharief
THE RAIN
bayan
nasiradin
rummana
Husam Hilali
bamseka
Shinteer
Elmamoun khider
فيس بوك
تويتر
انستقرام
يوتيوب
بنتيريست