دعواتكم لزميلنا المفكر د.الباقر العفيف بالشفاء العاجل
|
|
 التسوق من اجل حلاوة مارس قبل ناس المريـخ مايجوا
|
اول الحكي
يفرق كتير كل يوم يمر
يفرق كتير طعم الحلو
لو يبقى مر
وتمر بي من غير سلام
ولا حتى نظرة ولاكلام
كلمني حاول حس بي
كلمني وارمي اللوم علي
كلمني والكائن يكون
كلمني ياحلو العيون
الغناء لمحمد ميــرغني
مواجهة وشيكة بين الارض والمريخ وانا مشغولة بالاسنكرز
لانني احب الاسنكرز ولا اطيق المارس ، كان لابد لي من شوية تدابير وقائية ساعة ان سمعت باضاني هاتين ، ان كوب المريخ سوف يمر قريبا من الارض .. فانا لا اعرف شيئا عن سكان الكواكب الاخرى . ولا اعرف شيئا عن تصرفات مخلوقاتها حينما تهاجم ، وكيف تفعل بالذين يكرهونهم .هذا من جهة
والشيء التاني انا اصلا ماناقصه مشاكل تدشدش راسي ، او تعكنن لي حياتي ، فربما هذه الايام لي اهتمامات اخرى . ساحاول ان ابدو كتومه على غير ما تعودتم مني ، فربما للشمارات التي اتنبأ بحدوثها ، وقع اخر .. هذا ما افترضه وانا الطم في خدي ، الليلة والليلة باصات ابو رجيله ، مع انني شخصيا لا اعرف المعني وراء هذه الولولة . غير انني اعترف اني سمعتها هكذا ..
كان لابد ان اخترس او ادفن وجهي او روحي تحت سرير او في دولاب او اعمل تنكرا في خلقتي انشاء بتاعة شاورما ولا نني كما قلت لا اعرف كثير معرفة عن هذا المريخ ، سوي انه لونه احمر صارخ ، وانه الاغريق اتخذونه قديما رمزا للدمار والحروب . بالاضافة الى انني اكره اللون الاحمر الصارخ ، فهذا ايضا داعي اكبر لتعرف بالاشتمام ان بيتا في الكرة الارضيه يبادلهم العداء .
وان المريخ كان لو ما كنت غبيانه قد لعب قبل اسبوع مع الهلال وتلقى هزيمة نكرا منه ، وتبعا لذلك قام لاعبهم الشكال فاروق جبره بضرب الحكم .
ياويلي اين كانت غائبة عني هذه الحكاية .. ماذا ستقعل بي الكائنات المريخيه ..
كان لابد ان اغير في تكنيكي الحياتي ، وهو ان احب حلاوة او ايسكريم المارس . وتسلحت بشوية مسكنة حتى اقنع اخي ان يصطحبني معه الى اسوبر ماركت العزيزية بنده ، لاشتري بعض الاغراض وبما ان الوقت بين العشاء والمغرب ، كان لابد ان استعجل في شراء اغراضي ثم انسحب قبل ان يقفولنا في السوبر ماركت لدواعي الصلاة .
ولان جنوني ليس له مثيل ، كان لابد ان اركز شوية حتى اخلص من هذه الشغلانه التي جاءتني من حيث ادري ولا ادري ..
وسالت نفسي هل انا مرعوبة من المريخ الذي بدأ العد التنازلي لاقترابه من ارضنا . وفجأة وجدتني دون سابق تدبير مني وجها لوجه امام واجهة الكريمات وهي واجهة لو تعلمون كم مغرية وتدخلك في عالم الغوايات الكبري .
وعندما اذن الاذان وجاوا يخرجوننا بالقوة ، نسيت الخضره التي ارسلوني اليها ، ونسيت الماجي ، ونسيت معظم الاغراض التي ارسلوني اليها ، حتى المارس التي من اجلها افتعلت هذه المشاوير نسيتها يا ويلي ياويلي .
طالما ان الناس متشاكلة بسبب
الباندوث فاني
لن اهترش
الا في الحدود
لكن برضو جايه راجعة
|
|
 
|
|
|
|
|
|
|
|
Re: التسوق من اجل حلاوة مارس قبل ناس المريـخ مايجوا (Re: shiry)
|
كيف تفقع مرارة عمال السوبر ماركت
ورغم ذلك لم انسي البصل . اتخيلوا ؟ . وكان لابد ان اتحايل واتداغل على العمال ، وجاءني الهندي ، ومن وراءه الفلبيني ومن وراءهم بنغالي ومن وراء وراءهم بتاع الحراسات الامنيه ، ياجماعة ،الله يخليكم ماممكن تاني اجي راجعة ، والولد الشكال دا الواقف معاي وبتشوفوا فيهو دا ، لو السماء دي قريبة ، هو ح يجيبيني راجعة تانية ،
قال ايه في كورة هلال وما عارفه لاعب مع مين مين اتخيل لي ريال مدريد ، مع انني قلت في نفسي ، مساكين اصحاب المحلات صدقوني ان الهلال سوف يلعب في مدريد مع رياله .
او انهم اعتقدوني محنتره وحاولوا باي صورة التخلص مني . ومع ذلك استطعت على عجل ان اضمن اغراض امي ، والا انها سوف ستمسح بي الارض حتى نصير انا وهي في لون واحد . وتضيع فائدة الكريمات التي حملتها معي .
تخيلوا اي جنتره تلك ان تبقى ملتصقة الى حائط من الكريمات لا يتعدي طوله العشرة امتار وارتفاعه لمترين اكثر من ساعتين بالتمام والكمال ولا تعودي منه الا بعشرة انواع فقط من الكريمات . .يا لهوي .. وياخرابي .. ايه الفلكبة دي ؟
وكلما ماهرولت بالعربانه هرول معي الجميع ، الهنود ، والفلبين والبنغالا ، وحراس الامن الذين ازداد عددهم . ومن وراءهم اخي يلعنني لعنا شديدا ، وانا لحظة احمر ليهو ولحظة اخرى ابتسم في وجهه وفي كل هذه اللحظات استعين بيدي في تصليح نظارتي .. تقريبا تقريبا بدأ يخفت ضوء كل الاقسام . وتقريبا تقريبا خلت كل الاقسام من الناس الا من العبيطين امثالي . ووجدت في ذلك متعة .. متعة ان تكون مراقبا من كل الناس وكلهم يريدونك ان تخرج ، وحمدت الله انني كنت بنتا الا لكانوا اخرجوني بالرجالة واسمع
الكلمات تاتيني .. خلاص انت في امشي ويجي . هذا اذان هذا مطوع خربان كتير .. انا في جنجال كتير مرة ..
هذا في اذان انت مافي يسمع ؟
وانا مطنشه عن قصد ومن غير قصد . الاحق الزمن وكل ماتذكرت ان رجال المريخ اقترب ميعاد جيتهم ، وكلما انقبض قلبي ..
حزمت الباميه مع الخوخ ، والفاصوليا الخضراء مع الجزر ، والجرجير بدل من حزمة واحدة حشرتهم اكثر من خمسة حزمات . يا لهوي ، عشقي الازلي بالكاد تذكرته ، حينما رأيته امامي ، وحتى اسامح نفسي ، ردمت العربانه به حتى اصبحت العربانه كانها شحنة جزر . كم احب هذا الجزر .. اين عشقي الاخر ..
اين الخص ..
هذا مافي ؟؟ خلاص يجي انت بعد عشا ...
ومن وراءهم جاءني صوت اخي ، ربما يعرف انني اذا لم اخذ الخص ، لن ارحل من هنا ، وستفوته مباراة بري وبرشلونه ولا مباراة ايه وايه . ؟ وانا كان مالي
والذين يزورون باستمرار محلات العزيزيه بنده ، يعرفون جيدا حجم الثقالة وعيارها من اناس على شاكلتي ..
وبما النظر ياحسرة على قدري ، كان لابد ان استعين مع هذه الثقالة بالاسئلة . هذا ايش بطاطس ؟؟
كيف هذا بطاطس ، ؟ هذا باميه !!
هذا توم ؟ كيف هذا توم ؟ هذا طماطم
هذا خضراء ، ؟؟ كيف هذا خضراء ؟ انت مافي شوف ؟ هذا رجول .
وهكذا جهجت كل عمال السوبر ماركت وفقعت مرارة حراس الامن ..
وعندما انتهيت وانا ادفع بالعربانه الى اخي لانها صارت اتقل مني ، وجدنا المحاسبين قد ولوا .. وكان لابد لي من ممارسة ثقالتي وسماجتي عليهم ، حتى رضى اخيرا واحدا منهم ان يفتح ماكينته ويحاسبني .. ولانه قطع نفسي ونشف ريقي وانا احنس فيهو ليرضي ان يحاسبني كان لابد ان اريه فنون فقع المرارة التي لا يعرف عنها شيئا .
مسكت الشريط الطويل الذي اخرجته ماكينة المحاسبة وبدأت اراجع فيها واحدة واحدة ، وهم يستعجلوني ، وانا اقول لهم .. صبر صديق ، بعدين في حساب غلط مين مسئول .
هذا مافي غلط . ؟؟؟
في غلط ، كيف مافي غلط .. هذا مافي نور ، انت ليه طفي ؟
انا في غلطان ، كان اول قفل كل دينا وبعدين انت يجي بعد عشاء ؟
شكرا صديق ..
اكثر من ربع ساعة وانا اصبر فيهم من جهة وانا اخي ملكا الثقالة والسماجة نريهم مالم يروه طوال عمرهم . وحينما تاكدنا من ذلك دفعنا له الحساب ، تتبعنا الف لعنة ولعنة .
دقيقة بس هسع بجي
للهترشه بقيـه
| |
|
|
|
|
|
|
|
|
|
Re: التسوق من اجل حلاوة مارس قبل ناس المريـخ مايجوا (Re: shiry)
|
مشروع الركشات وامجاد
من اجل اعانة اهالي المريخ
وانا ادلف الى البيت بعد ان شيلت نفسي شوية ، كان لابد ان انصاع الى نقة امي ، فافرغت كل الاكياس ، وحينها تاكد لي ايضا ان حلاوة المارس نسيتها ..
بـس ، مافي غيرها . هي سيرلانكيتنا اكيد تعرف اكثر من سكان كوكب المريخ . .
وحينما سألتها وانا جادة في ذلك .. تكلمت معي بلهجة شديده ، ثم لهجة اكثر شدة ، ثم لهجة من شكلها فهمت انها نوع اخر من النقة الغاضبة ، ثم شوية شوية زادت وتيرتها لاعرف بعدها ومن احساسي انها غاضبة جدا ربما لانني لا اعرف شيئا عن اللغة السيرلانكية ولا هي تعرف شيئا عن عربيتي التي اتلكم بها معها .. وحينما رفضت نهائيا ان تجلس في غرفتي او حتى تسوي لي شاي .. ان الفتاة مستاءة جدا مني ,وتركتها في حالها .
وكان لابد ان افعل شيئا ، يا حليلك يا ام مازن اين انتي ايتها القيردونه .. ؟؟
وكانما الحظ اسعفني بشوية كده منه .. اذ وجدت امامي كرت اتصال . وكان لابد ان اتصل با ام مازن . واجابتني بت الكومبيوتر ان رصيد الكرت اثنين وثلاثون ريالا لا غير..
الو اما مازن .. ؟ شيري . حبيبة البي ، ازيك يا عسوله .. وينك انت
اسمعيني يا امراة بكل الفصول . اسمعي انت موش خطيبي الزفت داك ، كان بقول ليك كده ؟
فرضنا يعني كان بقول لي كده . هسع جنترتك هي القالت ليك تجيبي سيرة الزفت داك ؟
عايني بتعرفي حاجة عن المارس اقصد عن المريخ ؟
ليه شايفاني محمد ولد ؟؟ لا مريخ ولا موردة ..؟ انا بحب عرض الازياء وبرنامج نحن وانتو .
لا بتكلم جدا . قالوا ناس المريخ ديل جايين علينا اليوم ، وانتي عارفاني حلاوة مارس اصلو ماردتها ، وتاني شي ، عاملين لونهم البرتقالي البيجيب الاخلاق لي هنا دا ؟
عليك الله كيف عايزننا نريدهم ..
عندك فكرة انو الناس ديل مامرتاحين في بلدهم ولا عندهم مشاكل زينا كده ولا كهربتهم بتقطع ولا ناس ديمه مشتاكلين
يعني شمارات ، قصدي شمارات ، ماحصل وانت جنك تلفزيون ،وانت ماسكه الرموت كنترول لقطتي ليك قناة ببتث من المريخ ، ولا شفتي التوب تن بتاع اغانيهم لشهر يونيو ؟
ولا عرض ازياؤهم في قناة بي بي سي مارس ، اكيد طبعا عندهم قناة بالاسم دا ... ولا الجزيرة مارس ..
يعني معقولة ماجاك شمارهم ، انو الناس ديل جاييننا غايرين ولا زعلانين ..
لانو انا عندي مشروع عظيم فشلت اسويهم في الارض ، عشان كده اتبرعت بيهو لناس المريخ ، حتى يعفوا عني .. بش المشكلة لونهم الاحمر دا ، وقشرتهم البرتقاليه .
حد يمشي ليهو على ارض برتقاليه .. ايه الفلكبة دي ؟؟
قال ليك ديل حتى مويتهم لونها برتقاليه .. انت ماسمعت الاشعة فوق البرتقاليه ؟ دي ماجايه من عندهم ، لانو كتيرة عندهم قاموا صدروها لينا ..
المهم ياستي .ايه رأيك في مشروع ركشات في المريخ .. اصلو امجاد قالوا الايام دي زهجانه من الدفارات لانو ما ادتهم طريقة في الشغل .
عشان كده وانت الخبيرة بالمواصلات نقوم نحن نشتري الركشات لانها بقت رخص التراب ، ونصدرها كمشروع استثماري نساعد به سكان المريخ
اهي كلها يومين ونصل هناك .. ومنها نرتاح نحن من محادثات السلام الابت تنتهي دي .
وسمعتها تكورك لامها .
يا امي يا امي ، ياخي ماتجي تشوفي الزفت شيري دي ، عايزه تجنني معاها ..
وكل زيارة للمريخ وانتم بالف خير
الكلام الماخمج
قد نتخاصم وقد نلعننا
في غيرما ذنب
لكن حتما سنعود
اكثر محبة اذ كنا نملك
قلوبا من ماس وذهب
شيري بعد ان افرحها
تصالح اساسي ويا هشام
| |
|
|
|
|
|
|
|
|
 Re: التسوق من اجل حلاوة مارس قبل ناس المريـخ مايجوا (Re: shiry)
|
shiry
يا ذات القلب الذي يفيض بكل ما هو جميل
حينما أجلس للكتابة تزدحم الشمس على بابي...
أحسُّني الآن مليئا بالشمس، مليئا بالفرح، فشكرا لأنّك منحتني لذّة أن أكتب لك ..ألف شكر للمنحة الغالية.
من حقّ الطّفل الطيّب، صاحب القلب المزهر، والرّوح الشّفيفة، أن يشعر أن السّماء راضية عنه تماما...
من حق الطّفل ابن الثلاثين عاما، أن يشكر السّماء، فهو يعرف أن لقاءه بتلك الكوكبة المتفردة لم يكن بمحض الصّدفة... واثقٌ هو أنّ ذلك اللّقاء تمّ بتدبير من السّماء، وله الآن أن يعلن أن السّماء تحبّه اذ منحته من يقاسمهم افراحه واتراحه ,وجنونه.وتمرده واحيانا كثيرة طفولته..وتمرده
التوقيع
اساسى بعد ان تصالح مع نفسه والاخرين
ملحوظة: انا مريخابي واعشق اللون الاحمر ولو وجدت فرصة لكنت من سكان المريخ لنغذوكم في الارض
بتوقيع اساسي وهو يحلم بشكلة كونية
| |
|
|
|
|
|
|
|
|
|
Re: التسوق من اجل حلاوة مارس قبل ناس المريـخ مايجوا (Re: اساسي)
|
ٍسلام مربع
اساسي : جميل البورد
عارف يا اساسي ، بالنسبة لي انا ماعارفه للناس التانيين كيف ؟ ربما يختلفون معي ، لكن
عارف انا عمري ما قريت لي شاعر من زمان لي هسع ، اطربني شعره وتعاطفت معه ، ويمكنك ان تقول انني ما تركت واردة ولا شاردة من حياته ماقريتها .
مثل المتنبئ ، هذا الشاعر الجميل الذي شعل الناس والدنيا واقامها ما اقعدها لحدي هسع ..كل ما اقرأ له احس انه شاعر مفتري عليه دونا عن العالمين ..
والبيت الذي ذكرته بالذات ، يطربني ويشجيني فيه قوة معاني راقيه ومشاعر صاخبه ، مستعره ، قلما من يملك هذه اللغة التي يستعين بها على فوضوية احاسيسه وتصادميتها .
ليتك تحلو والحياة مريرة وليتك ترضي والانام غضاب
ليت الذي بيني وبينك عامرا وبيني وبين العالمين خراب ا
اذا نلت منك الود فا المال هين وكل الذي فوق تراب تراب
وما كنت لو لا انت الا مهاجرا له كل يوم بلدة وصحاب
فهذا الشاعر الثائر الذي سافر عبر الزمن وقرأ الاحداث متفوقا على اقرانه جميعهم بقرون ، كان يملك مقدرة عجيبة على توليد المعاني مستعينا على ذلك بنضرة احاسيسه وصفاء ذهنه وتوقدها . بالله عليك اسمع هذا الابيات
فلما انخنا ، ركزنا الرماح بين مكارمنا والعلي
وبتنا نقبل اسيافنا ونمسحها من دماء العدي
لتعلم مصر ، ومن بالعراق ومن بالعواصم اني الفتي
واني وفيت واني ابيت واني عتوت علي من عتا
وما كل من قال قولا وفي ولاكل من سيم خسفا
ضع نفسك في مكانه ، رجلا لا يملك من الدنيا غير خياله وجراب معجمه ملئ بكل زخائر اللغة ومعانيها ، يحارب من الشعراء ويدس له كثير السم في الدسم ، ويطعن في نسبه ، ماذا تريدون منه سوي ان يقول مدافعا عن انفه وعزته وكبرياءه
اذا شد زندي حُسن رأيك فيه ضربت بسيف يقطع الهمام مُغمدا
وما أنا الا سمهري حملته ، فزيّن معروضا ، وراع مُسددا
وما الدهر الا من رواة قصائدي اذا قلت شعر اصبح الدهر منشدا
فسار به من لا يسير مشمراً وغني به من لا يغني مُغردا
اجزني اذا انشدت شعرا ، فانما بشعري اتاك المادحون مرددا
ودع كل صوت غير صوتي ، فانني انا الطائر المحكي ، والآخر الصدى
قيل انه لما دعاه ابن العميد اليه ، انشده قائلا
باد هواك صبرت ام لم تصبرا ، وبكاك ان لم يجر دمعك او جرى
كم غر صبرك وابتسامك صاحبا ، لما راك وفي الحشا ما لايري
قيل انه يعني خولة اخت سيف الدولة ، لذلك حينما سمع ابن العميد ذلك تفاجأ من هذا القول لانه في الاصل لم يكن يملك خلفيه من امر هذه المعزه ، لذلك استغرب جدا ، فجاء حديثه اليه اي ابن العميد :
يا ابا الطيب اتقول باد هواك ثم تقول بعده ، كم غر صبك . ما اسرع ما نقضت ما ابتدات به . فساعتها اجابه المتنبي
تلك حال وهذه حال ،
اي انه يعني بباد هواك ، ان يخبر خولة انها مهما اخفت من امر حبها له ، فانه ظاهر ومكشوف ،
اما كم غر صبرك ، فيعني حاله هو معي خوله .
سلمت يا اساسي كونك جعلتني اتذكر اياما جميلة قضيتها في رحاب هذا الشاعر العظيم .
وسلمت اكثر لهذه الاحاسيس النابضة التي تشبه قدرك العالي فينا .
| |
|
|
|
|
|
|
|
|
 Re: التسوق من اجل حلاوة مارس قبل ناس المريـخ مايجوا (Re: hala guta)
|
شيري يا رحيبه المساحات
سلام كبير
يازوله بالجد كدا
انتي رائعه
قريت كلامك دا تلاته مرات
كل مره .. اطلع بشئ
في النهاية جمعت كل الشئ الطلعت بيهو في كلمه واحده
وداير اقوله ليك
يا(مدهشه)ه
يديك الف عافيه
علي انسانيتك
بالرغم من فقعك لمراره الرفيق
بس اكيد بيستاهل فقع المراره
لانو اتجهل يخت ليك في الرف الفوقاني دهن الكركار واللخوخه والودك
وصعب عليك الاختيار بين الكريمات
تحياتي لشقيقك الصبور
الذي اثر دخول الجنه من بابك لصبره
ودي
| |
|
|
|
|
|
|
|
|
|
Re: التسوق من اجل حلاوة مارس قبل ناس المريـخ مايجوا (Re: HOPELESS)
|
سلام مربع
سيدي وتاج راسي
حمزه سليمان
سلمت يا فنان ، وربنا يخليك يازوق
وتجدني ممتنة لك على جمايلك التي
على الدوام تحيطني بها
مهندستنا الجميله هالة قوته
والله جد جد اساسي دا حيرنا ، كمل شكلات الكرة الارضيه ، عايز يفتش لي شكلات سكان الكواكب الاخرى
خليهو يرجى الراجيهو ، الناس ديلك جاييين
سلمت ياغاليه للطله التي تطربني ، وربنا يعلي مراتبك
هوبليـس
عارف يا هوبليس انا اقتنعت جد جد ، ان فقع المرارة دا (قسم) وخشم بيوت كمان ،
عشان كده امنت ليك ماية في المية انو الهنود بالذات ، شعب يمكنه ان يفقع مرارتك في كل لحظة يتعامل فيها معاك
ولا يمكنك ابدا ان تفقع مرارته بسهولة الا بعد ان تكون انت مرارتك قد اتفقعت .
بالله شوف افلامهم ، عليك الله ما بتفقع المرارة .
بطل بي سبب ومن غير سبب يضرب الهند كلها ، ما عدا انديرا غاندي ، عارف ليه ، بس لانها ماتت
لكن لو كانت حية المخرج كان جابها وضربوها ليهو .
| |
|
|
|
|
|
|
|
|
 Re: التسوق من اجل حلاوة مارس قبل ناس المريـخ مايجوا (Re: shiry)
|
شيرى حد { عين الحسود بالعود وفيها كمنجة } تسلمى
قالوا الاشعة البرتقالية فوق البنفسجية
لكن اقول ليك حاجة ... قالوا التسوى الركشة
فى التاكسى ... لقتوا فى امجاد
وتانى برضو ...
اللون الاحمر دة بطشش بالزول
وتقولى لى ناس المريخ شنو ؟
وحات الطاحونة بس خليهم يعتبوا ساكت
فى الواطة دى .... ح نهزمهم 13 عشان
جايين مطششين ... وشفتى براكى
زولهم المطشش فاروق جبرة
لك نكهة الياسمين
| |
|
|
|
|
|
|
|
|
|
Re: التسوق من اجل حلاوة مارس قبل ناس المريـخ مايجوا (Re: alfatih)
|
سلام مربع
الزول الرائع نزار حسين
ههاههههاه ،
وحات الله عرفتها ،
لكن برضو ح اخزلك واقول ليك
صحتين على البك يا طيـب
اسامه الخاتم
يازول ولا يمكنك ابدا ان تصل الى نهاية هذا الامر ، بصراحة بصراحة ، لو كنت رجلا لمنعت كل النسوان من دخول المجمعات التجارية المرأة مخربة عظيمه للاقتصاديات الرجل
اديك وقت كويس تتسوق فيهو ، الساعة اثنين صباحا .. فاضي ، ومافيهو معاكسات ، ويمكنك ان تقرأ كل التحذيرات المكتوبه على المعلبات .
لكن بيني وبينك تكون انت مخصوص بتمشي في الوقت بتاع الصلاة عشان ماتشتري لامورتنا العسوله رؤي السقيد
هاههاهاهه ، امازحك ياشفيف وسلمت ياسيدي انت ورؤي وربنا يخليكما لبعض
ابو جهينه
عارف يا بو جهينه الانسكرز ، دي براهو حكاية عايز ليهو هترشه طويلة ، لكن ماتخاف يا طيب انا ح اقوم اشتري ليها كرتون كاملة الفيها اربعة وعشرين حبة ، لكن على شرط تكون بااااااااردة ..
جربت المارس المثلجة المحشوة بالكراميل ، ياااااااالله ، ديني انا من حلاوتها ..
سلمت ام عطيه ، بمنطيتها وسلمت اكثر ، لكونك منحتني فرصة اهدي فيها ام عطيه حلاوة اسنكرز
الفاتح
يا الفاتح يا ود امي ، الناس ديلك ، مالك عايز تهيج همهم اكتر ما هو دمهم عكران ، الناس ديلك يلاقوها من الحكام ولا من الموردة ولا من الهلال .
كدي النسألك ، انت المريخ دا ، صحي ح ينزلوه بره الدرجة الممتاز ، يعني ح يشردوا به ؟
سمعت ، سمع والله اعلم ، انو بورتسودان غلبتو ، وكسلا كمان غلبتو
فضل ليهو ناس القضارف بس ، عشان يكون الشرق كله ، عافص للمريخ
هاهاههااه ،
انت فتان ياخي ، عايز تفتني مع ناس المريخ ديل مالك ؟
| |
|
|
|
|
|
|
| |
shiry
اساسي
HAMZA SULIMAN
اسامة الخاتم
ابو جهينة
alfatih
فيس بوك
تويتر
انستقرام
يوتيوب
بنتيريست