|
|
 شامي كابور في أستاد الخرطوم......توطئة للخوض مع الخائضين في المنبر...
|
في اتبرا كنت مغرم جدا بحضور مباريات كرة القدم في دار الرياضة..
الكورة كانت حلوة وجميلة في ذلك الزمان .والأجمل من ذلك وأحلي مجتمع
عطـبرة الحبيبـة...
عندما إنتقلت للخرطوم أصبحت مشجع من منازلهم, وإنقطعت علاقتي
بدور الرياضة والأستادات...
في مكان عملي بمصلحة المخازن والمهمات كان إتنين من أصحابي
مرضانين كورة. بعد ساعات العمل عندما تكون هناك مباراة, أفارقهم
في موقف المواصلآت, ياخذون طريقهم للأستاد, وأنا آخد بعضي وأمشي
البيت... في مرة من المرآت أصروا إصرار شديد جدا لازم أمشي معاهم لحضور
مباراة في أستاد الخرطـوم.. وافقت .. ذهبنا وكانت المباراة بين
فريقي المـريخ والزهـرة .(كنا ثلاثتنا هلآلآب) ...
أخذنا مقاعدنا في الأستاد .وقبل بدآية المباراة, وقف أحد المشجعين
وكان قاعد جنبنا وقال بصوت عال بحيث يسمع جميع من حولنا, خآصة
المريخاب : أسمعوا ياجماعة .أنا هلآلآبي وبصرآحة ما بقدر علي خشمي
ومابقدر علي المشـآكل, وحأشجع الزهـرة, أي زول عايز يقول أي كلام
يقولوا .بس بالله ختونا الضرب, أنا لازول مشاكل لابقدر أضآرب, وحآشجع
الزهـرة يعني حآشجع الزهـرة...
بدأت المباراة, وبدأ أخونا يشجع في الزهرة .وأهل عشيرة أخونا
هآرون دياب يشيلوا ويحمروا للراجل .وكلما تحصل هجمة للزهرة تصدر
منه صيحة تشجيع, وعيون الجماعة الحمراء وشرآرة تقوم بالرصد
والمرآقبة الصيقة .وكلهم تحفز للهجوم .لكن أخونا محذرهم طبعا ونحن
شآهـدين...
وفي هجمة عنيفة, حصل إحتكاك شديد جدا بين لآعب الزهرة توفيق
ولآعب المريخ إبراهيم عطا. ويبدو أنو توفيق عصر إبراهيم عطـا
عصرة شديدة, مما جعل أحد المريخاب يهب واقفا ويصيح بصوت عال
لايخلو من الإنفعآل والغيظ الشديدين :يآخي حـرآم عليك يآخ ده
ود العـطـا!!!!
فما كان من صاحبنا إلا أن رد عليهو :ود العطا يعني شامـي كابـور!!!
وبغيظ شديد جدا المريخآبي بيدو مسح وشي أخونا من أعلي الجبهة حتـي
صدره وقال له :يا بآيخ يا قديم, إنت من زمن شآمي كآبور...
أخونا الهلآلآبي طـوآلي قال ليهو :آهآآآآآآآ مآقلنا ضرب مآفينا...
يا جمآعة المنـبر .أنا بس زي الزول الحكيت قصتو ده...
مـجــرد توطــئة ...
ود المـدير...
|
|
 
|
|
|
|
معاوية المدير
محمد عبد الماجد الصايم
willeim andrea
فيس بوك
تويتر
انستقرام
يوتيوب
بنتيريست