|
عم قسم السيد فى شالا !!!
|
صبرك يا وطنى نزيفك حار
والجرح الغائر فوق وشك
زى سد كجبار ********
مرة نطنطن
ومرات نقبل بالترحيل
لما نشوف الكلب بيعوى
نقول حاضر ماشيين
ولما نباحو يقل نتمحرك
و نطنطن تانى *******
وفيك يا مروى
حياة وأذية
وفيك المنجل كب اتغذا
بين عينين الناس
القالت لا للظابطية *******
عم قسم السيد
قال ماب انزعزع
من انقايتى ومن لقدابتى
وتمرى الواقف داك قدامكم
أقلعوه كلو وسووا سواتكم
عيلى يمين ان جات التمنة
والآ الشيخ ود الحيران
حلف بسيدى الحسن الأكبر
لانى مزفت ولانى مرحل ********
عيلى كمان مابتمشوا يمين
قومى خجيجى على الدونكا
سويى الكسرى وجيبى الشاى
الجنيات ضيفان فى دارنا
ماب نتلوم فى الضيفان *******
أكلوا وشربوا وتنوا الشاى
ووقف العوقا الراسو مدوقس
وقام يتلولو وقال:
يا حاج أدينى ايديك
أمر القبض دا جاييك
أنت معارض للتعمير
مسيرة الثورة ماب تتعرقل
وانت دحين رافض تترحل ********
انتوا بتزرعوا , ما اتغالطنا
بس الأرض التزرعوا فيها
دى واطات دولة
وبى تحديد الناس التزرع هى الأولى
تقولك أزرع لازم تزرع
تقولك أرحل حتما ترحل *******
وكل البرفض امر الحاكم
نقيملوا الدعوى
وامر القبض عليكم يسرى -******
كان فى مروى
أكان فى دنقلا
أمرى وعبرى
قطعا يسرى ******
والدايرنو نحنا البحصل
وكل حديسنا حيبقى اوامر *******
تفتح خشمك كف ينسد
ترفع راسك كان بى منجل
أو ساسوييى كب ينجزا
تشهر قلمك تبقى نهايتك
تمسك خشمك وتقعد ساكت
ماب نحتار
ننجرلك تهمة
******
نحنا الضيق ونحنا الشر
ونحنا سجوننا الملت البر
والبابانا نوريه المر *******
كان صاح كان غلط
الكل يهتفلنا
ينجارولنا بلا نعلين
يهلجوا لينا ******
هاك يا حاجة الكبايات
والصينية !
قوم يا حاج خلينا النمشى
يلا انسجم فى شالا . ******
ست البنات .
|
|
|
|
|
|
|
|
Re: عم قسم السيد فى شالا !!! (Re: ست البنات)
|
ست البنات كلهم بنت عمى
مليون ســـــــلام
أيشرك كنت وزوجتى فى إجازة قصيرة بالسودان
وكان أن زرنا كســــلا وقابلنا سيد أحمد كمبال والأهل ..
عم قســـم السبد صدقينى أرحم ليه شـــالا ,,
من السجن الكبير الفيه نحنا..
{ ودانا لشـــالا ..
عزتنا ما شـــالا .. نحن البلد خيرها ومستقبل أجيالا }
لهم الجحيم ,, ولنا العزة والنصــــر القريب
| |
|
|
|
|
|
|
Re: عم قسم السيد فى شالا !!! (Re: طه كروم)
|
العزيز أخى طه كروم ,
تحية , وحمدلله على سلامة العودة من الوطن , ويا بختك شفت الأهل , وعساهم بخير وسعادة ,
ووا حلالك الشفت كسلا وناسها !
طمنك الله بالخير ,
والناس ديل رب العالمين يقلعهم من وشينا !
وتحياتى لأخوانى المعاك . ويا ريت ترسل لى ايميلك , وشيل الأيميل حقى من جدو , ضرورى .
وشكرا ليك كتير .
ست البنات .
| |
|
|
|
|
|
|
|