|
|
 خليل الله يرضى عليك سيب الهلال في حالو ..رجاء طلب جادي جداً
|
قبل فترة سألتني يا خليل وقلت لي يا عمر مالك معاي ؟
كنت ما عايز أرد عشان فعلا ما حا تصدق حكاية مالي معاك دي وما اظن في واحد اصلا ممكن يصدقها ..
الموضوع وبكل بساطة يا خليل متعلق بي نادي الهلال السوداني ..
شوف يا خليل بالرغم من اني زول بحاول اقنع نفسي اني على درجة مش بطالة من العلم ورغماً عن ذلك اجدني مع مقولة " القلم ما بيزيل بلم" وتكاد تكون اتقالت فيني انا زااااتي ..
السبب الرئيسي في خروج الهلال السنة الفاتت من كل البطولات كان خليل وبطاقة ART حقتي الاشتركت فيها في الفترة ما قبل دوري المجموعات العام الفائت ..
في سبيل الهلال مستعد اخسر اي زول واي شي عارفو تعصب بس ده طبعي ..وقد كان وكسرت بطاقة الART وهي الان في كوم الزبالة مع انو لسة الاشتراك كان باقي فيهو شهر !!!!
اعرف إنو التطاير حرام والتفاؤل والتشاؤم ما صاح الواحد يعتمد عليهم بس في موضوع الهلال ده انا لسة من زمن الجاهلية وعندي حاجات كده لو لقيتا بعرف انو الهلال مغلوب ..
اولها كانت بوستاتك يا خليل وبصرااااحة كده دمها كان تقيل وبي سببها بقيت ما بدخل سودانيز يوم مباريات الهلال كما عادتي في عدم قرياة الجرايد في اليوم داك وعدم الاستحمام مع لبسي لي بنطلون وقميص معييين قاعدين في الدولاب للغرض ده ..
قديتنا بي الانطون وبي الالوسي والعروسي والفلوسي ووالله انا الموضوع ده مزههههههههجني للحد البعيد ومطمم بطني لي درجة ما حا تتخيلها ..
عارفك ما عندك شريعة معاي ومن حقك تعمل البتعملو والمنتدى حر وما حق زول بس هو طلب سيب الهلال فيحالو لمن يكون عندو كورة مهمة ..
ما تكتب اييييييييي شي عنو اكتب عن فلسطين عن طهور النسوان والمادة 37 اكتب عن سليمة بائعة اللبن واثرها في تطور الاقتصاد اكتب عن البلهارسيا وكيف ان الترعة تزيد من الاصابة بها شوف موضوع الاسهالات واثره في صحة الطفل اي شي اي شي يا خليل ياخ بس عليييك الله الهلال لا ..
بس كدي جرب الموسم ده اقيف وليك علي لو الحال في حالو فانت برئ وانا مطالب بي إعتذار اما الجميع وليك مني هدية كتاب رياض الصالحين و دورة مجانية في النترودكشن والاوبريشن مع 40 ساعة انترنت مقدمة من معهد ظل الفيحاء بالسوق العربي..
خليل والله انا جاااادي جدا ياخ بالجد الموضوع ده عامل لي ارق غريييب خلاص واسة شايفك فاتح بوستين بخصوص مباراة الهلال والمريخ وانا احاول جاااهداً إبطال مفعولها بي كمية حركات بعملا لمن اخش الموقع فتارة افتح الموقع وانا مكرفس عيوني عشان ما اقرا العنوان وتارة افتح الموقع واسحب الماوس بي سرعة 7 ريختار في الساعة ومرة اتف في الشاشة 12 تفة حتى بعد داك افتح الموقع ..
والله ما عايزك ترد علي يا خليل ولا تبرر لي وعارفك ممكن تكون بتحب الهلال (ما اكتر مني لكن بتحبو شديييد) بس فكر في الموضوع ده جادي وجربو ..
مباراة المريخ دي تراها خلاص البقت بقت واتمنى انو تغيري للكرت يكون السبب الاقوى على انت تكون انت السبب التاني ..
بالمناسبة الشمال العطبراوي بيلعب كورة جميلة كدي جرب شجعو الموسم ده هو وفريق السهم القضارف ..
تخريمة :
لي كم يوم بشيل محمد ولدي العمرو 4 شهور وبسألو جااادي محمد الكورة حا تنتهي كم ؟؟ وبنتظر حركة اصابعينو ..لو حرك لي اصابع اليد اليمين فالهلال غالب ولو حرك لي اصابع اليد الشمال فالمريخ غالب ولو لبد سااااي فاكورة تعادل ..
صراحة الود لحددددددددي اسة مجهجهني شديييييييد ..
اللهم اجعله من اصحاب اليمين ..
|
|
 
|
|
|
|
|
|
|
|
Re: خليل الله يرضى عليك سيب الهلال في حالو ..رجاء طلب جادي جداً (Re: عمر الفاروق)
|
الاخ
عمر الفاروق
سلام..
Quote: لي كم يوم بشيل محمد ولدي العمرو 4 شهور وبسألو جااادي محمد الكورة حا تنتهي كم ؟؟ وبنتظر حركة اصابعينو ..لو حرك لي اصابع اليد اليمين فالهلال غالب ولو حرك لي اصابع اليد الشمال فالمريخ غالب ولو لبد سااااي فاكورة تعادل ..
صراحة الود لحددددددددي اسة مجهجهني شديييييييد ..
اللهم اجعله من اصحاب اليمين .. |
اللهم أجعلنا من أصحاب اليمين
ياخ محمد ولدك دا نحن زاتنا جهجهنا .... حرك ليهو اصبعو اليمين ياخ
| |
|
|
|
|
|
|
|
|
 Re: خليل الله يرضى عليك سيب الهلال في حالو ..رجاء طلب جادي جداً (Re: معاذ حسن)
|
والله يا عمر أمس بعد ما طلعت طوالي الريال إتسيك ..
أنا زاتو القون حرقني ..
محمد دا غايتو الليلة لاعبو كويس وأمسك ليهو يدو اليمين ..
وكان لقيت ليك طريقة يده الشمال دي أصلو ما يحركه أغمته ليهو بي أي حاجة ..
ربنا يحفظو ياخ شكله جايي هلالابي أكتر من أبوه ..
يا خلي والله النجيهة دي بتجينا من بني صهيون ديل ..
هسي قول لي وليد الشفت صاحبك دا عليك الله خلي الهلال في حاله 
| |
|
|
|
|
|
|
|
|
|
Re: خليل الله يرضى عليك سيب الهلال في حالو ..رجاء طلب جادي جداً (Re: على محمد على بشير)
|
Quote: السبب الرئيسي في خروج الهلال السنة الفاتت من كل البطولات كان خليل وبطاقة ART حقتي الاشتركت فيها في الفترة ما قبل دوري المجموعات العام الفائت ..
في سبيل الهلال مستعد اخسر اي زول واي شي عارفو تعصب بس ده طبعي ..وقد كان وكسرت بطاقة الART وهي الان في كوم الزبالة مع انو لسة الاشتراك كان باقي فيهو شهر !!!! |
هو كوم الزبالة ده من سنة الفين وتمانية لى هسع ما شالوه ?
| |
|
|
|
|
|
|
|
|
|
Re: RE : خليل و التلفزيون (Re: فيصل نوبي)
|
اححححححسنت يا نوبي !!!!!
اها ده الكلام القاصدو لي خليل ..ما قاصد ليهو توقعاتو صحيحة ولا ما صحيحة بس يلببببببد والامور بتمشي..
ياخ خليل من شدة ما بيبالغ يشبكك مباراة صعبة للمريخ والمريخ يلعب اسهل من الساهل زاتو من التيحة الفسيخة ..
الذ حاجة خليل بيديك كلللل الاحتمالات في البوست وبعد داك البتلفق بيجي يشيلا في كوووت ويقول ليك اها مااا قلت ليكم :D
يعني في مداخلة يكتب ليك الهلال في مهم ساهلة ..
في البعدها يقول ليك ولكن يجب ان لا نستهتر بي الفريق الخصم ..
في البعدها يقول ليك الهلال سيحقق الفوز..
وفي البعدها يقول ليك ولكن هذا لا يمنع ان الفريق الاخر ربما يهام بضراوة ويسجل ..
خلييل يا خلييل يا حرف الN
ارخي الهلال بسييييييييييييييييتة كمان ..
تحياتي يا خليل..
| |
|
|
|
|
|
|
| |
عمر الفاروق
khaleel
فيصل نوبي
عبود عبد الرحيم
ismeil abbas
وليد محمد المبارك
عز الدين بيلو
haroon diyab
محمد حيدر
Rawia
معاذ حسن
معتصم دفع الله
على محمد على بشير
عبدالعزيز الفاضلابى
فيس بوك
تويتر
انستقرام
يوتيوب
بنتيريست