|
|
 .. يامصطفى سيد احمد .. جيتنى فى الزمن الاليم
|
الوقوف على قمم الراحل
تلك محطة لم استطع مبارحتها رغم الكثير من المستجدات
على كافة الاصعدة
كل شىء تقريبا تغير لكن محبة مصطفى سيد احمد وصوته
الجميل لازال يسكن الدواخل ليحرك كل السكون فى لحظة
واحدة ويخلق حالة من الضجيج الملهم والمحفز
وفيما تقترب الذكرى الثانية عشرة لرحيل مصطفى سيد احمد
هى محاولة للبحث فى سيرة حياة واغنيات الراحل واسلوبه فى
انتقاء النصوص الشعرية وركوب الصعب لتطويع تلك النصوص
الجامحة بعيدا عما المالوف
وهى ليست سوى محاولة لاتزيد عن كونها جهد المقل
مبنية مدن الخوف من طينة اخر الليل
فاتح زريبة الجوف تمرق تخش الخيل
مقطع من اغنية الجالوص
كلمات عاطف خيرى
|
|
 
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
طرقت اغنيات مصطفى على مساقط الظل والاماكن الرمادية
النائية على مسامعنا وهو يصارع نصوصا عصية على التلحين
ليقدم فنا جديدا مختلفا من خلال ابتدار اساليب جديدة
فى اختيار الكلمة بل وحتى فى توصيلها للمتلقى من خلال
جلسات الاستماع حيث كانت الفكرة تقوم على توصيل الفكرة
والجمل اللحنية والاغنية الى المستمع اينما كان من خلال
الانتقال ما بين المدن والاحياء البعيدة
وهذه الفكرة التى تميز بها مصطفى كانت تسبق الزمن حتى
بمفاهيم السوق فهى مثل توصيل الطلبات الى المنازل
او الهوم ديليفرى وهذا فى حد ذاته مثل انقلابا ثوريا
على المفاهيم التقليدية بان يذهب الناس الى مبدعيهم
عبر شباك التذاكر
الان المبدعون هم اللذين يصلون الى الناس العاديين
دون وسيط لا تذاكر لا داردر لحفظ الامن فالامن محفوظ
والامور كلها فى نصابها
فقط افتح اذنيك واشرع ابواب قلبك وارخ شريانك لتيار
النغم المؤكسد واوتار العود المشدودة
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
ود الإمتداد تيتاوى
انامن الجيل الكان بطارد جلسات الإستماع،الإمتداد،أركويت،الديم وحى الزهوروغيرها.وأظن انو مصطفى من الناس الدربو جيلنا على تذوق الغناء والشعر وحوم بيهم فى عوالم ومدارس مختلفة. حأتابع بلهفة بوستك التوثيقى وفيهو نضمى عاجب الزعيم طارق جبريل.
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عز الدين عثمان)
|
تيتا
الجميل
Quote: الوقوف على قمم الراحل
تلك محطة لم استطع مبارحتها رغم الكثير من المستجدات
على كافة الاصعدة
كل شىء تقريبا تغير لكن محبة مصطفى سيد احمد وصوته
الجميل لازال يسكن الدواخل ليحرك كل السكون فى لحظة
واحدة ويخلق حالة من الضجيج الملهم والمحفز
|
آتحداك
وثق بانك ليس وحدك واقف (واقف براك)
فلنجعل مسيرة الخالد ريحاً كسح من اجل
اجيالنا جيل محمد واواب وأحمد .
واصل ياخ نحن فى قمة الاستمتاع
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: خالد سمارة)
|
العزيز عز الدين عثمان
سلامات يازول يارايع
وقد كان هذاعنوانا لمرثية
ازهرى محمد على
فى وداع الراحل مصطفى
وطبعا ياعزنا كنا مثلك
من المداومين على جلسات
الاستماع التى كانت تملا
الافاق وكانت تلك تجربة
من عوالم اخرى قريبة
من القلب لمباشرتها
وحيويتهاوجماهيريتها
لك مودتى وخليك معانا
| |
|
|
|
|
|
|
|
|
 Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
Quote: كل شىء تقريبا تغير لكن محبة مصطفى سيد احمد وصوته
الجميل لازال يسكن الدواخل |
وعارفني منك لا الزمن يقدر يحول قلبي عنك
لا المسافة ولا الخيال ..
عارفني منك ..
وكل ما تباعد بينا عوارض ل ما هواك يا طيبة مكني ...
حبوك حب قدر الحروف الحايمة في بطن الكتب ..
من بعد ما عز المزار
عينيك مدن ..
وهو مغلل في الدواخل يا تيتاوي .. ربنا يرحمه ويديه الجنة ويصبرنا على فقده
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: انعام حيمورة)
|
انعام سفيرة النوايا الحسنة
تحية وسلام واحترام
تاملت العناوين الكبيرة التى
وضعيتها ضمن مداخلتك
Quote: وعارفني منك لا الزمن يقدر يحول قلبي عنك
لا المسافة ولا الخيال ..
عارفني منك ..
وكل ما تباعد بينا عوارض ل ما هواك يا طيبة مكني ...
حبوك حب قدر الحروف الحايمة في بطن الكتب ..
من بعد ما عز المزار
عينيك مدن ..
|
امام كل عناون توقفت كثيرا
وعجزت عن اختيار اقتباس بعينه
وفى نهاية الامر حملتها جميعا
لاعيدها مرة اخرى ففى كل حديقة
من الورود الجميلة والرحيق
الذى ارتشفناه فى شكل
كبسولات غنية بكل انواع الفايتامين
المقوى والمنشط لعضلة القلب
انه مصطفى وكفى
| |
|
|
|
|
|
|
|
|
 Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
الصديق الجميل عامر تيتاوي مشتاقين شديد
اعزرني ياصديقي في البوست الذي فتحتة باسمي عن الراحل المقيم
مصطفي لم اشارك فية لانو والله العبرة خنقتني وما قدرت اكتب لاني
تزكرت حديثي معه من مسقط وهو في الدوحة قبل اتناشر ساعة من تلقي
خبر وفاة الاليم فلك العتبي يصديقي حتي ترضي.
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: NGABY AJOOZ)
|
تـــــــواريب العشــــم
للذي أعني أكتب ، وإن رحل بجسده ، فهل رحل معه ما بذرمن تواريب العشم ؟ لا ولم ولن .
.........
ووقف براك
زي الملاك
أصلب بشر
ماكان معاك ..
غير الصبر..
هينين دُعا..
تالا السما..
وبرقاً فجع زرقة سماك
طرد المطر ..
ياريح وجع كل القِبَل
قامة ثباتك يالجبل
أصلب يقين لازم تصل
ماجهجهك غدر الملوك
حُفر المقالب والشروك
ماصادتك أطول شِباك
وإنت البحر ..
رغم الحصل
كنت الأهل..
لى ناس ميتمة بالفقر
فى الهم تلوك حنضل .. حجر
لانفط فرّج كُربته.
لاصهر معدن شو هطل
كانت ملازماك بالدعا
إلا الحزن كان البطل
زي الجبل شلتَ الحمل
ميلاد ملاقاة الأمل
كنت العرِض لما الأرِض
جوفه المِرِض نكر الفرِض
تفَّ التواريب العشم
قبل المخاض جاها النفِض
وداها للحرقة المحَل
لى وين تقبِّل وجهته ؟
مالدمعة حرقت وشها
لِي غيمة تكضم رشها
لِي طيرة ترجع عشها
وإنت الوحيد الشلتها
هدهتها .. ونومتها
فوق إيدك الحضن الأليف
قبل الخريف يملاها زيف
قبل النزيف يلفى الرصيف
حجيته بى حِجر الأرِض
غتيتة بى عافية وطن
إنت الوحيد أدمنتها
لما الضياع كان الكفن
بين الضلوع سكّنتها
لابِعتها..
لا مره جُعتَ رهنتها
وسدتها جدول رؤاك
بالبشري كم حلّمتها
بي خير صباحاتك براك
أكرمتها وطمنتها
نامت تواريب العشم
باتت معاك من غير ألم
لا ليلة باتت بالقوي
لا مرة شابت للهوي
أفراح تبِّرك وتلحقك
لي كل مناداتك نعم
في حِكرك الهاني الوهيط
القدرو أكبر من محيط
آلفتها غير إرتزاق
حالفتها من غير وسيط
كانت غناك وكنتها
رجّعتها زمن الصبا
تيربتها ..
وبّوقتها
لامِن خلاص لقت الخلاص
كم راودوك ماخنتها
عيشاً صميم وإنت الأصم
فرهد قصادك وإستوي
ماهدَّ طيرن ماانهزم
لامرة لي إيدك لوّي
ما هزَّ غيرن .. مااتوهم
مااضاري منك وإنزوي
يازول ملاك ..
واقف براك
مافي المعاك
زادك صبر..
هينين دُعا تالا السما
يلقى الهنا..
وطن المني
زمناً حفر وش البلد
من غير مطر!!
ورم العيون .. رهق الجفون
من غير سهر!!
وآخر سفر قبال شهر
تالا الوجع
خيش القلوب عبَّ وصرع
خبَّ وضرع..مليون وجع
جدع الخواطر بالألم
لليلة ما اتذكر رجع
شوّه ضحك طفل البلد
توَّه شعاع قمرو السطع
ضيّع سماح أسمح ولد
ضلَّم سنا شمسو وجهر
آخ من زمن لبلاب قلد
شدر الجروف سبَّ وكفر
حِملاً تقيل زي الجبل
حاجة فوق طاقة البشر
شدَه السحاب بالريح دفر
جرح المطر بالدم دشر
صحَّر جروف كانت بحر
يبَّس حروف جوه السفر
ووقف براك زي الملاك
ماطِر سماك فوق الهلاك
وإنت الأمان
وتد الركيزة الإتزان
ضد الإرتزاق
والإنسياق
الإرتهان
زرقاء يمامتك كم وصل
نور البصيرة الألهمك
هدهد سليمانك صدق
جاب النبا
قالوك كِضِب.. مجنون سبا
شوفلك عقولاً تفهمك
أحفظ غناك .. قولك كِضِب
لملِم شليلك للعب
زرقاء يمامتك ما ضِهِب
ماهمَّ من درباً صِعِب
ماحدّ ترحالو الوحل..
ماكان خفوت
رغم الطشاش لفّ البيوت
رغم الغباش ..
رغم الخيوت العنكبوت
مازعلُن لو كان تفوت
أو تمشي بالحسرة وتموت
أو يشرِقَك نضمك كُتُر
يرميك فى جُب السكوت
أحسن تموت .. مالحالة حوت
يبلع نداك من غير يلوك
أحسن تفوت ..
من دنيا واطي غناها بوت
هدهد سليمانك صدق
جاب النبا
نور اللعب ضلّم خبا
خلي الوطن طفلاً حبا
جواد تسامحنا الهمام
قطع اللجام فى النيل كبا
صدق النبا
وخربت سبا
قشة بعيرك يامحل
كسرت ضهر بلدك عدل
ما جاك زعل
لساكَ في حلقك ندي
يمسح هجير شدراً رحل
لاتعبتَ من نوم البلد
لا غلبت
لا موتك
حصل
واقف..
برااك.
فاروق أب حُــوَّه
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: فاروق أبوحوه)
|
Quote: لما الضياع كان الكفن
بين الضلوع سكّنتها
لابِعتها..
لا مره جُعتَ رهنتها
|
مااجمل تلك المعانى يافاروق
لقد رويت الظما الى الكلام الجميل
والمضامين الرائعة
وهكذا كانت اختيارات مصطفى الذى
كان ينتخب الكلام والمعانى العميقة
لذلك كان يتحدى النص العصى ليقدمه
شلالا ينساب بالتوافق اللفظى واللحنى
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: NGABY AJOOZ)
|
نقابينا الجميل
ابو الشفيع كيفنك ومشتاقين كتير
انا عارف قدر المكانة التى تضع
فيها الراحل ورغم اننى كنت اعلم
صعوبة العودة الى تلك الذكريات
الجميلة لكننى لم اتمكن من ان
امنع نفسى منها وصدقنى ياخضر
كل ما استمع لتسجيل من تلك الجلسة
تبدو وكانك امامى الان فتلك ليلة
لا تنسى ومازال صداها يتردد فى
اذنى
رحم الله مصطفى واثابه الجنة وبارك
فى ذريته
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
صديق العمر عامر تيتاوي العنوان خطيييير يا عامر ياخ -
جيتني في الزمن الأليم قلبي مسخن بجراحات الهوى
عمري ضائع في متاهات النعيم في دروب الغربة لا تاب لا قوى
بالله يا عامر عليك الله عاين للكلام ده (في دروب الغربة لا تاب لا قوى) بالله دي ما محنة عديل كده!!!.
تعرف إضافة للكلام الجميل الإنت قلتو عن تفرد مصطفى ووضعه لأول لبنة في تاريخ ما يعرف بجلسات الاستماع - مصطفى كمان خلق حالة تفاعل بديعة بين المستمع والأغنية وخلى الناس بقت تناقش الأغنية من حيث المفردة واللغة وحتى اللحن وأذكر جيدا كيف كنا نجلس بالساعات في داخليات الجامعة ونحن نتناقش في أغنية من الأغاني ولعلك تذكر جلساتنا في المسطبة الشهيرة ونحن نحاول سبر أغوار أغاني مصطفى والدخول في عمق النص - وده ببساطة لأنو غناء مصطفى ما كان بيحكي قصة ذات نهاية سعيدة تنتهي برجوع البطل للبطلة (يوم ترجع تصافي نسامحك يا حبيبنا) أو حتى تنتهي بشاكوش يصبح مضربا للأمثال (في الليلة ديك وحان الزفاف على الرغم من روعة هذه الأمثلة وأعجابي الشديد بها وبالمغنين الذين أبدعوا فيها وفي غيرها من الأغاني)
وفي الختام أبعت لك شال الحب مرسال
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: صديق حمدتو)
|
صديقوف حبيبنا الغالى
ياصديق لمين انا اشكى
وانت عارف اصل الحكاية
طبعا قصة العنوان جيتنى
فى الزمن الاليم بقتنى
كده زى الجيتك فى قبولك
وحتيت لى الاتو يعنى سيك
سيك
لانك ياصديق اقدر الناس
فى نظرى وفى الواقع
للحديث عن كل ما يخص
الراحل
تتذكر يوم جبت لى من
الجامعة قصيدة واقف براك
بالانجليزى .. نقول قبل
كم سنة 
والله ياصديق لسه واقف براى
وما قادر اطلع من السجن
الحديقة ده
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
يا عز الدين عثمان
وينك يا صديق يا رائع !!! وسآلين عنك ويوماتي رحيل لموانئ المدن النفطية
أنا والله معترف إني أكبر منك بس إنت ألأستاذنا ياخ
أخبارك مقطوعة رسمي وشعبي وآخر عهدنا يحسب بالسنوات إن لم يكن بالعقود
كيف الحال معاك والجميع وصديقي الرائع عاصم (أهو ده الوحيد المسموح ليه يقول لي يا أستاذي)
تحياتي ومودتي وعشمي باللقاء
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: طارق جبريل)
|
يا مشرع الحلم الفسيح
أنا بيني ما بينك جزر
نتلاقى و الموج اللديح .. القدرة والذات الشحيح
كملتو ما كمل الصبر
نتلاقى فير الزمن المريح
وميعادنا في وش الفجر
يا مشرع الحلم الفسيح
يا بعض مني فيني ساكن
أنا اصلي منك ومشتهيك
وبيناتنا ليل الفرقة داكن
هبت هبوبك ... افتح شبابيك المساكن
وسع دروبك .. نور مصابيح الاماكن
يا مشرع الحلم الفسيح
يومنا النهب اسلبنا خوفنا
كبرنا قدرك مرتين طول على كتفك كتوفنا
يا رغبة الوعد البيسكن بين غناوينا وحروفنا
ضوى الدساكر والضفاف عبى الحناجر
بالهتاف سدد مسامات الرعاف
ونور مغاراتنا وكهوفنا
يا مشرع الحلم الفسيح
أنا وأنت والمطر الفصيح نأخذ بعض شكل السماء
حدثني دائماً كلما تنشف على البر الضفاضع
ويهجر الضوء المواضع .. تسقط من الكف الأصابع
حدثني دائماً كلما
حدثني لو تاهت خطانا على الدروب المبهمة
أو ربما .. تهدم الشوارع
حدثني لو صادف الكي المواجع وضلك على الساحل رمى
حدثني لو مطرك همي
علمنا دائما كلما
نبذر على أرضك شهيد
يطلع شمس ويسند بإيدنو السماء
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: ابراهيم محمد موسي)
|
عمنا الحاج ود عجبنا
فى الفريق ياهو الركيزة ..
هو البشيل حمل الرباعة
وعندو كلمة على الجماعة ..
وفى الفريق باقي لينا تاية
وكل طيب ليهو غاية
وللضعيف تلقاهو ساند
ويقهر الكعب المعاند ..
للضيوف ديوانو فاتح ..
ديل يقوموا وديل ينزلوا
يا ولد جيب الرتاين
وجيهوا الديوان فراشو
افرشوا الفرشة الكبيرة
والإباريق .. والتباريق
وأضبحوا الحمل المدوعل ..
عمنا الحاج ودعجبنا
من سنين أيام جهلتو ..
ديمة فى دعوات صلاتو
يسأل المولى السلامة ..
وسترة الحال .. والكرامة
وعمنا الحاج ود عجبنا
فى ليلة من ذات الليالى ..
فى زمن حظر التجول
جاهو ضيف فى راس حداشر ..
رحب الحاج بيهو جدا
فرشولو ..ونزلوهو ..
وكاسوا للعشاء ما أتلقالو ..
ما الرغيف ممحوق مقصر
والبلد فى حال معسر
وعمنا الحاج فى مبادئوا
وجبة الضيف زى فريضة
وهسة ضاقت بيه العريضة ..
ضيفوا كيف يترك عشاهو
من دا زايد إختشاهو ..
وجاتو فكرة يمشى للفرن المجاور ..
ولى لجان العيش يشاور
بس عشا الضيف يا جماعة ..
وضيفى نازل ليهو ساعة
شاكلوهو.. ودفروهو.. ونهروهو ..
وجاتو دورية الطوارئ
وأمسى بايت فى الحراسة ..
وناسوا جنوا
للصباح ما عرفوا حاجة ..
وين دا روح
وجاهم الخبر المؤكد ..
ود عجبنا فى الحراسة !!..
ماشى محكمة الطوارئ
ناسو أولادو وبناتو
عرفوا حالوا وبدرى فاتوا
راحوا محكمة الطوارئ ..
فيها فى نص الخلايق
شافوا حالا ماهو لايق ..
عمنا الحاج بى جلالو
فوقو حس السوط مولول ..
فوق قفاهو وفوق سنونو
فوق رجولو ومرة
فوق فججا حشايم ..
أصلو ما قايل يهونن
حتى كان نزلن هجايم ..
إلا لكن الليالى
هى البترخص كل غالى
حاكموا الولد المنصب ..
كتفو بالدبور مقصب
إنت يا حاج يا مخالف ..
زول مخرف وعقلو تالف
إنت يازول ماكا دارى ..
زلة الناس فى الطوارئ
أجلدوهو وغرموهو ..
ونفذوا الحكم البهينو
شان يفتح تانى عينو!!!
تسمع السوط ليهو خاوية ...
وفوق قفا الشيخ صيحتو داوية ..
وفجاة رفع الحاج عيونو
شاف بنات ولدو وبناتو ..
كلهن واقفات يعاينن
دمعتن فى العين ترقرق ..
وجعتن فى الجوف تحرق
والحزن ليهن يفرق ..
دى النجوم الفى سماهن
كل سوط نازل عليهو ..
من شعاع الضو عماهن
عمك الحاج دمعو سًرق ..
وسيلو فوق أشنابو زرًف
تم حكمو وراح بيوتو ..
نفسو مكسوره وذليلة
كيف ملاقات الحليلة ..
وصحوة الروح العليلة
فى البيوت الجوه غادى ..
عمك الحاج ما اعتيادى
فوقو متلمين جماعتو ..
والسكيلى ضارب حزاينى
وقالوا ناداهو المنادى ..
فارق الدنيا المهينة
يقطع الذلة وسنينا ..
فوق فراش ودعجبنا
بسمع الزول البوصى ..
أقفلوا الحوش يا جماعة
طفوا أنوار الرتاين ..
داك حرس حظر التجول
من بعيد ليكم بعاين ..
يا زمن حظر التجول
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: طارق جبريل)
|
ود جبرين سلامات ياناس نهر ابى رقراق الصافى
حاسدك عديل كده .. عشان متخوجج فى شوارع الرباط
وكازا
الله يدينا قدلة ونتخووووووجج فى الزنقة
وياود جبرين ولدنا صديق حمدتو يخليك تتخوجج بمزاج
وتقدل كمان بس يفتح الجراب ويدينا من الكشكول
ويمارس كرمو الحاتمى
التحايا عبر صديق للدكتور حاتم حمدتو
واصل الخوججة الجميلة ياريس
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
لقد ملك مصطفى ناصية الابداع فكرا وفنا ولحنا
فكان قادرا على احداث المفاجاة حتى بالنسبة
للشعراء اللذين يتعامل مع نصوصهم باساليب
متجددة تجعل من كل نص رغم ما فيه من صعوبات
وصور شعرية غير معهودة مذاقا سلسا للمستمع
وبالتالى تصنع الدهشة عند الشاعر والمتلقى
على حد سواء
والا فمن يعبر بخياله فى يوم من الايام الى
اغنية سودانية من بين كلماتها المغناة
وكتين يضيع عرق الجباه الشم شمار فى مرقة
وما كان من احد الاصدقاء عندما استمع الى
هذاالمقطع قبل اكثر من 15 سنة الا ان قال
مصطفى سيد احمد ده سكتنا ليهو كترا
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: bent awad el kareem)
|
bent awad el kareem
سلامات وشكرا كتير على اطلالة شهيق هذه القصيدة الاسطورية التى امتعنابها
عاطف خيرى كلاماوابدعها مصطفى لحنا واداء جميلا وخالدا برغم تنوعه والانتقالات
الحادة فيه فعاطف يناجى اعشاب النيل الابيض ما تتضارى ورا الدعوات
ومصطفى يناغم يوم سمايتك شكل قامتك هو البيدينا الثبات ...ووولنا عودة
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: محمد عثمان)
|
تيتاوى سلامات
افترضتك لون اساسى يمنح اللوحة بمنح اللوحة ازدواجية القراية
يفتح الضوء بين خطوط الريشة والخط الاضافى الجاى من شبكية الزول
البشاهد
اكتشفنا الرسمك انا برضو التوارد فى الخواطر نفس ارقام التذاكر
البيها سافرنا وشهدنا انفجارك فى الارض ياسمرا ياواضحة
ومواصلين معاك
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: خالد سمارة)
|
خالد سمارة
Quote: حلوة عينيك زى صحابى
|
كلامك جميل وحقيقى بشرى الفاضل
شاعر الاغنية عبر بالجمال المحسوس
الى افاق جديدة وعوالم بعيدة غير
مرئية يعنى ليست احلى العيون
مثل ما قال السياب
عيناك غابتا نخيل ساعة السحر
او شرفتان راح يناى عنهما القمر
وانما هى عيون من نحب
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
تعرف يا دكتور طارق جبريل عامر تيتاوي ده عارف كويس وين مناطق الحنين والتوق الحلال للوطن عندنا عشان كده لا ينفك يطلق سهام كنانته عليها والأعجب أنه يختار أمضاها وأسرعها في النفاذ.
هل تذكر "أنوار المساء" يا عامر؟ وهل تذكر لم فضلناهو على أسم "ضي المصابيح"؟؟ وكيف اتفقنا على شمول المعنى في الأول لعدم تحديده لمصدر النور
فهل لنا بجلسة أخرى أمام "أنوار المساء" ونحن نردد بكل فرح ويقين "ما بان عليك سفر العمر لسه الربيع يا دابو زار"
وأستحلفك "بأنوار المساء" يا عامر إنك تنزل لينا أغنية أنوار المساء
| |
|
|
|
|
|
|
|
|
 Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
الصحفى المرموق عامر تيتاوى
اشكرك على التحية وتقبل كذلك تحيتى الحارة
فى البداية هاك هذه المساهمة الصغيرة:
أنا على مشارف الأنتهاء من تلحين عمل للشاعر مدنى النخلى الذى تعرفت علية أبان زيارة للسودان العام السابق
فى خلال جلساتى مع الشاعر القامة مدنى قال لى إنه كتب قصيدة واقف براك فى شخص مصطفى سيد أحمد تحديدا هذا للتاريخ
ثانيا أنا لدى الأن عدد ثلاث دواوين شعرية كل واحد فيهم به قصيدة مكتوبة لروح مصطفى سيد أحمد فأذا كان خليل إسماعيل يلقب بفنان الفنانين فمصطفى هو فنان الشعراء وأجرو أن أقول بل ملهمهم
يأخى إن لم يكن مصطفى سيد أحمد فنان فمن بربى يكون
إبراهيم عبد الحليم
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: إبراهيم عبد الحليم)
|
الاخ ابراهيم عبد الحليم
تحياتى ولك الشكر اجزله على مساهمتك الرائعة والتى تنطوى
على كثير من الحب لمصطفى سيد احمد واتمنى ان توفق ونسعد
بدوايينك الثلاثة
| Quote: فمصطفى هو فنان الشعراء |
هذه الجملة تلخص الكثير مما اود قوله فى هذا البوست من واقع
السؤال الذى يطرق ذهنى دائما فقد لمعت فى حياة مصطفى اسماء
العديد من الشعراء المجيدين واللذين لا اقول ابتعدوا عن الساحة
بعد رحيل مصطفى لانهم قطعا لازالوا ينتجون ولكن غاب من كان قادرا
على تقديم هذا المنتوج بالصورة التى يستحق ان يقدم بها بل
من تحرك فيه كلمات هذه النصوص كل حواس الابداع ويملك ارادة
تطويع النص وتقديمه فى قالب غنائى يتناسب مع الفكرة وتلك
خاصية طالما تفرد بها مصطفى
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: إبراهيم عبد الحليم)
|
عزيزى عصام على
لايزال هناك الكثير من الاعمال التى ابدعها مصطفى سيد احمد لم تقدم الى المستمعين كافة وبقيت معظم
تلك الاعمال فى نطاق محدود وربما البعض الاخر لم يسمع بها اوعنها اصلا لذلك فالامل معقود على ان
يتم عملا جماعيا يهدف للتوثيق الحقيقى والعلمى لمسيرة الراحل واعماله التى يجب ان تقدم للجميع وهذا
يتطلب اسهاما جماعيا من كل محبى مصطفى وانت فى مقدمة هؤلاء بحكم قربك من مصطفى
ولك مودتى وفى انتظار الكثير منك ياعصام
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: أبوبكر أبوالقاسم)
|
ما طال في بحرك في مي
وتمرك مفرع بالجريد
شدرك امد حد السمى
طينك معتق بالطمي
نبيتك اكيد نبيتك هوى
نبيتك ايوة سوا ..سوا من جديد .. نبيتك جديد
ايد ابوي على ايد اخوي على ايد انا
على ايد على ايد تجدع بعيد في اللجة في من راس ميضنة
حيكومة الفقر الدمار
الكضبن والصهينة
اللي ناقص ايامنا كاس
اليالطيف سوس البحر نردم قفاهو حجر .. حجر
من ها الرصيف
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: ابراهيم محمد موسي)
|
من ها الرصيف
الما قدر قدام سريحة الموج يقيف
الما انستر الرزقية وناس وايه
نسقيها كاس اسقينا
نوريها كيف عشق الحياة
سنانا فوق حجر القصاص
سوانا ناس ضرب البحر
جوانا احد من الرصاص
يا ضو حبيبين القسا
طول ما انت غرقان في الاسى
تبت يدين ما ترمي ساس
ما تبني مجدك من جديد
تفتح شبابيك الخلاص
تدخل نسيمات النشيد
بيت القصيد يستقبله
مستقبله والحاضر الماضي التليد
يا بلدي يا فردة جناحي التاني
وكت الناس تطيرلي عالمة
وا فجعة الزول البيجيك
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: ابراهيم محمد موسي)
|
ما يلقى فيك غير الهجير ناسا تواي مسالمة
مل البشاشات القبيل تلقاها ميتة مسممة
والجاته جاتة من الارض ما جاته من السما
ما اعتى غبنك يا ولد
واعدل قضيتك واعظمة
لا ترجع السيف الجفير
والدنيا فايرة مصادمة
من غير تجيب تار البلد
ريح العوارض تهزمة
تطرد مع ابليس الاخير دعة الضلال
من جنتك ادمة
تأكل من الشجر الحلال
يغشاك نعاس في ضل رمى
تختال هضاريب الصعب
كربة ليالي المظلمة
يا نيل قبل خاطرك يطيب
ارضك تفزع باللهيب
تكشح تواريب الغضب صعب المراس
نوبة و زنوج وبجة وحلب
رطانة عربان مواشو
ومولدين تلقانا او نلقاك ضو
ظلمة لياليك العجاف
رعشة نهاراتنا النشاف
امنا بيك وموحدين
في ايدينا فاس وقلم رصاص
شتلة وكمنجة ومسطرين
وطبنجة في خط التماس
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: ابراهيم محمد موسي)
|
رثائية مصطفي سيد أحمد
مالو عجّلت الرحيل...؟
ماالمسافه بعيدة لِسّع *~* وانت في علو الصهيل
يا سلام وقتين تغني *~* وتطرب الكون بالهديل
تنشر الألق الموشّى *~* وتنثر الحزن النبيل
وتوعد الناس الغلابة *~* بالزمان المستحيل
تورق أشجار الأماني *~* وتطفو جوّانا وتميل
مالو عجّلت الرحيل...؟
ماشي في الأجيال هديلك *~* جيل بيغني ويعيد لجيل
وانت زي النيل بتمضي *~* صافي نبعك كالسبيل
يا سلام لمّن تغني *~* وينجلي الهم الطويل
وتزهر الدنيا ونحلق *~* زي عصافير الخميل
والمحبة تشوفا تدنو *~* وكل شي أصبح جميل
مالو عجّلت الرحيل..؟
بسأل الطير الكناري *~* وبسأل الدوح الظليل
وبسأل ازهار البراري *~* وبسأل ألوان الأصيل
وبسأل المطر المهاجر *~* وبسأل الزمن الجميل
ياتو زولاً جيتنا منو ؟ *~* وياتو درباً ياتو سيل ؟
مالو عجّلت الرحيل...؟
يا زمن كترت دموعنا *~* ونحن حبّان العويل
الحبايب راحو فاتو *~* وآثرو الصبر الطويل
أفردو الجنحين وطارو *~* وما فضل للروح خليل
والفرح لَمْلَمْ متاعو *~* وفرهد الهم التقيل
والمسافه بعيدة لسّع *~* وانت عجّلت الرحيل
مالو عجّلت الرحيل...؟
احنا لسه مع الطيور المابتعرف ليها
خرطه ولا استراحة ولا مقيل
نمشي في كل الدروب الشايكة فاقدين الدليل
فينا ماثل لسه طيفك *~* وعودك الفارع النحيل
وفينا لسع دندناتك *~* وفينا جددت الخليل
وفجأة خليتنا ورحلت*~* وانت في عز الصهيل
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
فى احدى جلسات الاستماع التى كانت تذخر بها ليالى نهاية الثمانينات
وجه احد الحاضرين سؤالا الى مصطفى سيد احمد حول تاريخ
بعض الاعمال التى اداها فى تلك الامسية باعتبارها جديدة فكان رد
مصطفى مدهشا للحضور بقوله ان احدث عمل من تلك الاعمال لا يقل
عمره عن خمس سنوات مشيرا الى ان معظم اعماله الكبيرة والمسموعة
على نطاق واسع انجزت فى وقت متقارب ولم تكن قد وصلت الى المتلقين
قبل ان تتهيا الظروف المناسبة لوصولها الى المستمع
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
Quote: * (أعتقد بأني لو رأيته لتفجرت في قلبي براكين من فن).
- الشاعر المصري حسن بيومي معلقاً على قصيدته «ثلاث ورقات من أشجار يحيى» والتي اجتزأ منها مصطفى مقطعاً وغناه وعرف باسم «عجاج البحر»..
* (يا له من رائع.. صوته يشبه موجة عريضة تطوف بكل حواف الكون ثم تتكسر الى ما لا نهاية).
- الموسيقار الاسترالي روس بولتر معبراً عن دهشته من صوت مصطفى حينما أسمعه صديقه الشاعر عفيف اسماعيل احدى تسجيلات مصطفى.
* (أحسست بصوته مغموساً في شجن متواصل كأن هناك حريقاً ألمّ بروحه.. انه يغني من القلب إلى القلب).
- الشاعرة وعازفة البيانو الإنجليزية شيلا.ج، وهي تصف ما اعتراها حينما استمعت الى مصطفى سيد أحمد وهو يغني «الشجن الأليم». |
مقتطفات من مقال للزميل نشات الامام فى موقع ود مدنى
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: omar arbab)
|
عمر ود الارباب
ياسلام عليك نورتنا بالفيديو الجميل
لكن شايفو قلب اذاعة يعنى صوت وبس
الحكاية شنو يمكن عندى براى لانو شايف مرة مرة برجع زى
ماكان
ياسر مكتوم فى جوف اصداف
ياخ انتا زول عزال خلاص
ابراهيم ابو خليل
تسلم ياحبيب على مساهماتك الرائعة
وفى انتظارك هنا على العنوان الدائم
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
ياسسسسسلام ياتيتاوي
وتاني يا سسسلام ياخي..
زاوية من الوفاء الفريد والحكي السهل المدهش في سماوات فناننا العظيم الراحل
ولوحة يا عامر تحاكي سيرة وفاء الوجدان للمغني
المغني الذي عكس احلامنا وغني للرواكيب والطورية والابرول
والطيور التي غادرت شواطي الوطن وليس في يدها جواز سفر
مصطفي الذي غني للواسوق
وللمدفع الذي طلع الخوازيق وخوازيق البلد الزادت..
كماقال طارق
احكو وادفقو...وكبو من المزيكة النضيفة كميات وكميات
فنحن في حضرة فريد الوجدان السوداني الراحل مصطفي سيد احمد
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
كيكى اهلا سلام
كما عودتنا دائما تنتقى الكلمات وتعبر عن قصة كاملة بجملة واحدة
Quote: لمغني الذي عكس احلامنا وغني للرواكيب والطورية والابرول
والطيور التي غادرت شواطي الوطن وليس في يدها جواز سفر
مصطفي الذي غني للواسوق
وللمدفع الذي طلع الخوازيق وخوازيق البلد الزادت..
|
وهاهنا اثبت كيكيتك العالية باركلوجيا عالية الجودة
ووفقا للمواصفات والمقاييس العالمية والفنية
يا كيكى رايك شنو فى الكلام
حكمة الجوع الشرح للارضة كيف تقرا المرق
يعنى يا عاطف خيرى ربنا يديك العافية
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عبدالكريم الامين احمد)
|
Quote: ومافي منو تانو..زول شعرو جاااي من ريحة الطين وغيم النيل
ورائحة الازوال...عشان كده كتب للجالوص...وعشان كده مصطفي كان لازم يغني ليهو
عشان ال2 بشبهو رحيق البلد الاسمو السودان ده ناسو |
بالضبط ياكيكى وعشان كده قال
المطرة زى شفع العيد تدخل غرف كل البيوت
صورة من خضم الحياة السودانية
وقال
وامرق على مهلك مروق الحنة من ضفر العروس
اشعار عاطف خيرى جديرة بالاحتفاء لانها خرجت عن المالوف
وخاطبت الوجدان الجمعى للناس فى امور يعيشونها فى الواقع
فهل من وصف للمهلة والروقة والهدوء والخروج بدون ضجيج
افضل من مروق الحنة من ضفر العروس
ومصطفى قبل تحدى عاطف خيرى وطوع النص بموهبة لحنية
فريدة
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: WadAker)
|
ود عكر رفيق الدرب فى الزمن الاجمل
ما قدمه مصطفى فى مسيرته القصيرة نسبيا عطاء جدير بالتوقف
عنده والتامل فيه بما يحمله من مكنون مميز ومتفرد
وبما شكله مشوار مصطفى من علامة فى ظنى فارقة فى مشوار
الاغنية السودانية بل والنصوص الشعرية التى يمكن ان تتحول
الى اغنية تطرق اذان المستمع وتتغلغل فى وجدانه
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
حشي المغبون
محمد الحسن سالم حميد
يا جمة حشى المغبون
في الزمن الهلاك من جاء
تكون حانت مواعيدك
يكون وقت المطر قد جاء
وشرق ضوي البلد عيدك
وطابت نسمتو العرجاء
و نمون يا طيبة تمينا
وبدين ونعنه وغنينا الغنا الراجا
وبدت كاس المودة تدور
عشق من حلفا لي راجا
حبابك ألف حبابك ألف
وياعنزنا القرجة
ويا لبانة في الزمن المراحو نشف
ويا جبانة للخوانة والعوج البدور لو ولف
دميرتنا البتروي جرف
مسيرتنا وتميراتنا الكانوا وقف
أصابعين الرجال رصاص
سعر راس البنية سقف
تكون دار بي زمن عندك
نكون لمينا في الفاتنا تكون فاتت ملامحنا وتضاريسنا
القبيل غمرت عرش بتنا وطوابيرنا
وبدت شتلات بعد غمرت
ضراعيك يا الولد كبرت
مراعيك يا البلد خدرت
خضار خدرت غزار غزرت
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: ابراهيم محمد موسي)
|
(1)
الناس قبيل السّمعّّّتك واتكيّفتّ
راجين صباح قهوة غناك
رابطه الرؤوس اتقريفت
ليه يا وتر ..........
ارض الفنون ماصيّفت
بعد الّدّرت وصعيد غنا ك
كزّت عروقه اتليّفت
دقشه اليباب....... ..
ريق القصايد فّيّفت
نزّت سراب ................
شمّت لحونه اتعيّفت
( 2)
بلبل وجيع
غرد صدح
في ليل هجيع
ورحل بعيد
خلف الضباب
شايل حزن
بلدا فجيع
الحسرة يا فصل الربيع
عمرك قصير
زي النسيم
مريت سريع
مرت معاك
كل الاماني
المستطابة وممكنة
مات في الزمن
نبض الحروف
الزاهية في صدر المني
بعدك رحل
طير البلوم
هجر الغصون
عاف الغنا
جفّ ونشف
نخل الفريق
شايل الحزن
ساقو انحني
شكرا جزيلا اخ تيتاوي علي هذا البوست
وعلي هذه الزكري الجميلةعن هذا الانسان الانسان
وعن الاتاحة لي بهذه المشاركة بهذه الابيات من الشعر
عن الفنان الراحل
عوض شيخ ادريس حسن
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: awad hassan)
|
علمى عيونى السفر الصادق الرضى
علمى عيونى السفر
ما البسافر فى عيونك
سكتو بتبقى سلامة
ينسى احزانو وبعرف
الدنيا جمبك ابتسامة
ظللى الناس بى حنانك
وابقى ليهم ضل غمامة
الشقى اللازمنى مدة
يوم يفوت والفرحة تبدأ
ما بقول فارقنى عدى
عشان بخاف ترحل عيونك
وتنهزم فينى الامانى
وبي أساه وبى شقاه تانى اتوشح زمانى
أصلو غير عينيك وحاتك
ما فى للافراح معانى
جينا ليك شوق فى عيونا
وفى عيونك شوق إناغم
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: Sara Mahgoub)
|
سارة محجوب
سلام واحترام
Quote: علمى عيونى السفر
ما البسافر فى عيونك
سكتو بتبقى سلامة |
كلام سمح شديد وما بشبهو اى كلام تانى
وهذا جزء من تفرد مصطفى وياسارة
علمى عيونى السفر من احب الاغنيات
لدى وخاصة ان مصطفى قدمها فى قالب لحنى
غير عادى وليس تقليديا
وياسارة بت الامتداد عشان خاطرك ساقوم
بانزال علمى عيونى السفر
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عامر تيتاوى)
|
وأنا لست أدري ما الذي يدفعني دفعا إليك
هل تدري يا عامر ( أكيد طبعا تدري فأنت سيد العارفين)أن هناك تحدي قد صار بين مصطفى سيد أحمد ومحمد إبر اهيم شمو على مدى مقدرة مصطفى في تلحين قصيدة مريم الأخرى !!! وما أحلاه من تحدي ففي النهاية نحن الذين فزنا به !!!
إذن:-
ما الذي يجعلني أبدو حزينا حين أرتاد التسكع في مرايا وجنتيك !!!
لا عليك ................. فلنا عودة يا عامر
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: صديق حمدتو)
|
نكر
صوتك صداك
غالطني
الزمن فيك
شهرت على الجفاف
وعدك، بطاقاتنا الخريفية
رجع فاضي الكلام مليان
معاكي اتبرجت غيمه
شهق جواى صوت جدول
مرقتَ علي المطر حفيان
لقيتك
والرزاز مدخل
وناديتك:-
اقيفى معاي
نشيل كتف الغناء الميّل
ونتخيل
حلم دونك بيتحقق!!
وقبلك خيل دماى واقفه على
شريانى تتشهق!
ما اروع مصطفى سيد احمد
مَــــــن كــــــان ..
بيسمــــــع ...
مــــصـــطـــفــــى ..
صــــــــــنّــــــه
ووهــــج صوتــــو انـــطــفــــى
ومـــــن كـــــان بــــيســــمع ..
مــــــا اصــــطفـــــى ..
حـــــــــــــيْ ..
بـــــي قضيـــــتو ..
وبـــــس ..
كفــــــــى .
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: Sara Mahgoub)
|
مرة يا تيتاوى حضرت حفل لإحياء ذكرى الراحل،قبل التأبين الأول، وحين غنى المغنى من أغانى مصطفى، عندها ادركت الأصوات التى فقدتها برحيله فكتبت " مرثية الأصوات" فإليك بعد إذنك شيئا منها.
هل نحب ا ل و ا ط ة لى هذا الجنون
لنهديها حبيبا سافرا فى الحب
وهل طار ليل أغانينا
عرج بيهو الرسول لى سدرة المعنى
يفتّش عن سما فى الجُب
وإذا قام النبى من حلمو
نقّر فى العصب أوتار
نشوف فى خيول تجر فجر انعتاق
وعلى اتجاه الروح تخب
أو كأنو النيل قنع من آخرو
باين فى الطلاق
وعناق
هدير شلال على حلق المغنى يكب
واذا رسل بريد أشواقو طابعة أصبعين فى صوت
تجى الريح دايخة
من آخر مطامير فى الخفوت
او نايحة فى سكر
يهُب
جرس البيوت
لى شفعا فى القلب
واذا ما عاكست لغتو الحبيبة
ينحنى الليل لى مواعيد الحبيب فى غنوة
تطفى العتمة فى شاشة المشاوير
حُمّى
فى راس البلد بتصب
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: صديق حمدتو)
|
صديق حمدتو
سلامات ياصديقى
| Quote: هناك تحدي قد صار بين مصطفى سيد أحمد ومحمد إبر اهيم شمو على مدى مقدرة مصطفى في تلحين قصيدة مريم الأخرى !!! وما أحلاه من تحدي ففي النهاية نحن الذين فزنا به !!! |
ما قلت الا الحق فهذه القصيدة صعبة المفردات والتلحين ولكن مصطفى طوعها تماما وقدم لنا لحنا اسطوريا لملحمة شمو وقد اطلعت على النص الكامل للقصيدة عن طريق الاخ الشاعر ابوذر الغفارى صاحب فى عيونك
ضجة الشوق والهواجس ايام كنا نعمل سويا فى الاسبوع نهاية الثمانينات وكان وقتها مشرفا على الملحق الثقافى وقد قمنا بنشر النص الكامل الذى دونته عندى ولكن ضاع فى زحمة الزمن ومرور السنوات والنص الكامل
ياصديق يكشف ذائقى مصطفى الشعرية وعبقريته اللحنية فقد اجتزأ النص وتغنى منه بالممكن فابدع
وهناك تساؤل ياصديق ربما يخدم فكرة ان الشعراء لازالوا يقدمون العطاء والجديد ولكن غياب مصطفى غيب معه العديد والكثير من النصوص الشعرية المجيدة فانتهت الدهشة من قاموس الاغنيات والا فهل ثمة شاعر
فى قامة محمد ابراهيم شمو لم ينتج سوى مريم االاخرى طبعا الاجابة ستكون لا فقط يبقى السؤال من يقبل التحدى بعد رحيل مصطفى
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: ابراهيم محمد موسي)
|
الاستاذ تيتاوي لك التحية
واللة البوست دي لماني بانسان
مرهف الحواس جمعتني بيهو اجمل الصدف
وكنت استمع الي قصائدة ويطلب مني
ان اغني واعذف بعودي وهو يسترق السمع
عوض شيخ ادريس
روعة الانامل الذهبية
الحس المرهف
الانسان
لو سمحت لي ان ادعوة و الذكريات فرادي
ان احيية و احييك علي هذة الاطلاالة
ابو خليل
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: ابراهيم محمد موسي)
|
تيتا، أيها الصديق
هو ديدني أن أتاوق مسارقةً هذاالخيط، تقريبا كل يوم.. و عندما أهم بكتابة
شيئ يغلبني الأسى على رحيله الأليم، هذا المصطفى.. لقد جاء إلينا من المستقبل
مثل أمل عسير، مثل نسمة تغافل الهجير، حاملا الألحان و الألوان و كلمات شجية
حنينة؛ دافئة ؛تقيم أبدا في قلوبنا اجمعين نحن الذين أحببناه و احبننا
روحه الشفيفة...
و إذن، يا صديق، هاهم أحبابه قد أتوا هنا يحملهم صدى صوته و رجيع موسيقاه.
حتما حملوا معهم الذكريات و قد نثروها هنا مع أغنياته و الوطن..
ما زلت آمل أن تحقق أنت و كيكي ذلك الحلم الأخضر ذات زمان أصيل، و قد تكاتبنا
بصدده قبل أن يعصف بالموقع ما عصف به.
محبتي الأكيدة
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: ابوعسل السيد احمد)
|
صديقى ابو عسل
كلماتك المؤثرة عن الراحل تؤكد مدى الحب الذى يكنه الناس الى مصطفى الذى رحل عنا الدنيا وبقى صووته
مجلجلا لقد مرت فترات اعقبت رحيل مصطفى كن صعبا مجرد الاستماع الى اغنياته التى تكشف عن عبقرية
سنظل ننتظر طويلا حتى يجود علينا الزمان بمثلها او بما يعيدها الى الاذهان والقلوب
ولكننا اليوم بمعية الاصحاب والاحباب نحاول ان ننهل من معينه الذى لا ينضب وننخب من شلال الذكريات
عبر هذا التدعى الجميل
لم انس اتفاقنا على تحقيق طلبك فقط احتاج لبعض الوقت وستكون الامانة بطرفك ولى عظيم الشرف ولك الود
والمحبة
ومازلنا نحتاج الى قلمك السيال فى الاسهام ولو بنذر يسير الى الراحل وذكراه التى ما بارحتنا يوما
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: awad hassan)
|
تيتا
كنا من المتاوقين والان سنكون من المشاركين لانو كنا من المحظوظين الذين عاشرو واستمعو واستمتعو بالراحل في اخر ايامه في الدوحة والي الان اذكر اخر يوم في حياته كنا قدالتقينا في مطعم دوسا بالقرب من سكنه وطلب ان نحضر له زبادي وملعقة وتسامرنا وتحدثنا وقال لنا انه وفي اي مكان في الدنيا تاتيه ربطتين قماش الاولي تحتوي علي تراب من ارض ودسلفاب والثانية تمباك الي الان لايدري من الذي يقوم بارسالهم له
معنا هنا من يستطيع ان يحكي الكثير عن الراحل انه رفيق دربه وصديقه في الدوحة بعد استاذنا بدرالدين الامير انه عصام علي احمد استحلفه ان يغوص معنا في سيرة ذلك الانسان الشفاف الزول الرائع ابوسيداحمد
الشكر للاخ عامر تيتاوي
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: Mutwali Malik)
|
الصديق العزيز متولى مالك
ياسامر الليل سلام ياصاحب وكيفك فى بلاد العام سام وشوقك يطال ام درمان مسافرا يوميا
بما انك احد اللذين عايشوا الفترة التى قضاها مصطفى فى الدوحة فنحن ننتظرمنك ان تحكى
لنا المزيد عن تلك الايام وقد ادهشتنى حكاية تراب ودسلفاب ولعلها تعبير عن الانتماء للارض
والارتباط بها اينما كنا
طبعا يامتولى كان مشوارى الى سكن مصطفى سيد احمد فى السلطة بالدوحة هو الاول لى فيها
فى العام 1995 وبرغم الاعياء البادى على محياه الا انه صر على ان يكرم وفادتنا باغنية
ملحمية فقد غنى لنا فى ذلك المساء شهيق .. مصطفى لم يكن عاديا حتى فى مرضه
| |
|
|
|
|
|
|
|
|
|
Re: .. يامصطفى سيد احمد .. جيتنى فى الزمن الاليم (Re: عصام علي أحمد)
|
Quote: عزيزى عصام على
لايزال هناك الكثير من الاعمال التى ابدعها مصطفى سيد احمد لم تقدم الى المستمعين كافة وبقيت معظم
تلك الاعمال فى نطاق محدود وربما البعض الاخر لم يسمع بها اوعنها اصلا لذلك فالامل معقود على ان
يتم عملا جماعيا يهدف للتوثيق الحقيقى والعلمى لمسيرة الراحل واعماله التى يجب ان تقدم للجميع وهذا
يتطلب اسهاما جماعيا من كل محبى مصطفى وانت فى مقدمة هؤلاء بحكم قربك من مصطفى
ولك مودتى وفى انتظار الكثير منك ياعصام |
تصدق ياعصام كتبت الرد اعلاه باعتباره سينزل بعد مداخلتك لقيتو ليك طار فوق
الحكاية شنو ما عارف يكون ابهكرونا ده لسه حايم فى البورد ولا شنو
عموما عايز رايك فى الكلام ده وفى انتظارك
| |
|
|
|
|
|
|
| |
عامر تيتاوى
طارق جبريل
khatab
فتحي البحيري
بابكر التوم
خالد سمارة
Alsa7afa_30
انعام حيمورة
NGABY AJOOZ
فاروق أبوحوه
صديق حمدتو
ابراهيم محمد موسي
هند محمد
bent awad el kareem
إبراهيم عبد الحليم
أبوبكر أبوالقاسم
omar arbab
معتصم عيدروس
عبدالكريم الامين احمد
awad hassan
عصام علي أحمد
ابوعسل السيد احمد
Mutwali Malik
فيس بوك
تويتر
انستقرام
يوتيوب
بنتيريست