الشعب السوداني شعب يموت في التقليد يحب المحاكاة زي عيونو.. أصلو مابيبذل مجهود في إنو يصنع حاجاتو حقتو براهو يا كافي البلا حبة creativity مافي ..
في البيوت من ما الناس عرفت إنو في شي إسمو بناء أي زول عامل أوضتين وبرندتين "خلف خلاف" وقاعد مافي أي طريقة الخرطة تتغير شوية أبداً ..
تطلع سراير موضة مافي ست بيت بيهدا ليها بال كان ما جابت نفسهم نفسهم! عليكم الله في زول فيكم بيتهم ما فيهو الكبابي بتاعت( أهلاً وسهلاً) نحن غايتو عندنا ..
في الغنا مافي فنانين في العالم بيحبو التقليد زي فنانين السودان مبالغة لا وكلو كوم ومقلدي المقلدين ديل كوم براهم فرفور مثلاً من ما طلع بيغني أغاني الفنانين التانيين بيقلد يعني يقوم يطلع واحد تاني زي مسعود تقول ياخوانا دا منو؟ يقولوا ليك دا "بيقلد" فرفور
في البزنس واحد يفكر يعمل مشروع صغير يسترزق منو لو نجح الله قال بي قولو السودان كلو حا يقلدو في الفكرة ويبقى الشارع كلو إتصالات وتركيب عطور!
12-17-2008, 07:34 PM
حمور زيادة حمور زيادة
تاريخ التسجيل: 03-28-2007
مجموع المشاركات: 12116
تيسير .. قريتو فعلا ممكن يكون الفعل الخلّاق قليل في السودان و التقليد منتشر لكن ده ممكن يرجع لظروف طبيعية و نمط الحياة فما بيكون عيب في حد ذاتو لانو شكل حياة الناس كان متماشي مع نمط التقليد و احتياجاتم متلبية بغياب الانشاء و الابداع السؤال هو هل المعطيات الحياتية الكان متوافقة مع النمط ده اتغيرت وله لسه ؟
ــــــــــــ كبابي اهلا وس هلا ما عندنا للضمان كده
12-17-2008, 08:24 PM
emad altaib emad altaib
تاريخ التسجيل: 12-27-2007
مجموع المشاركات: 5300
الفعل الخلاق قليل ما عشان نحن ما موهوبين لكن عشان نحن بنحب الجاهز ما بنحب نتعب نفسنا كتير بنتذوق الجمال لكن بنكسل من صنعو بالإضافة لي شي تاني مهم .. إنو ما بنحبذ المغامرة طالما حاجة مجربة قبل كده وثبت نجاحها ليه ما أعملها انا زاتي
المعطيات الحياتية اتغيرت كتير جداً عن أول وحصل إنفتاح أكتر على العالم الخارجي لكن لسه الحال في حالو ..
الإبتكار "كمفردة عكس التقليد" واحدة من أسباب وجودو وتشجيعو الحالة الإقتصادية مثلاً لكنها ما كل شئ ممكن تدخل بيت إمرأة بسيطة للحد البعيد لكن بتحس إنها مختلفة وما ميالة لتقليد الأخريات لا لضيق ذات اليد" " بقدر ما ليها علاقة أكتر بكونها زولة متفردة وعايزة تكون نفسها ..
12-17-2008, 08:49 PM
حمور زيادة حمور زيادة
تاريخ التسجيل: 03-28-2007
مجموع المشاركات: 12116
انايا تيسير ما قلت نحن ما موهوبين انا قلت نمط حياتنا ما كان محتاج ابداع و ابتكار ممكن اتكلم ليك خصوصا عن المجتمع الزراعي بحكم اهلنا في الشمال عملية الزراعة عملية متوارثة لا تعرف المغامرة البيزرعوهو في هاتور لازم يتزرع فيهاتور و الموية المفروض ياخدا الزرع في امشير ما ممكن نخاطر بتغيريا فالتقليد في عملية الانتاج مأمون و مافي شي يخليك تحاول تبدع الهمبول( خيال المآتة ) مجرب و ناجح .. ليه اعرض المريق للخطر باني اجرب غيرو ؟ البيوت ما بتتبني فاتحه جهة الشمال عشان البرد ده حكم عام .. حكم طبيعة في مجتمع زي ده كيف يكون الابتكار ن المتطلبات الحياتية ؟ ده نمط حياة بيطالبك بالتقليد لا اكثر عشان كده قلت ليك السؤال هو هل نمط الحياة امشجع على التقليد اتغير ؟
12-18-2008, 08:00 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: عملية الزراعة عملية متوارثة لا تعرف المغامرة البيزرعوهو في هاتور لازم يتزرع فيهاتور و الموية المفروض ياخدا الزرع في امشير ما ممكن نخاطر بتغيريا فالتقليد في عملية الانتاج مأمون و مافي شي يخليك تحاول تبدع الهمبول( خيال المآتة ) مجرب و ناجح .. ليه اعرض المريق للخطر باني اجرب غيرو ؟
يا حمور .. الزراعة والصناعة وما إلى ذلك حاجات ما بينفع إنو كل زول يعمل كلام راسو بالعكس لازم تستفيد من خبرات وأخطاء الناس القبلك وفي محددات كتيرة بتحكم الموضوع ودا ما التقليد الأنا قصدتو وإن كانت الزراعة زاتا ما مارقة من الموضوع بدليل إنو بيستعملو فيها تولز عمرها 7 آلاف سنة معقول ما لقو زول يطورها شوية !
نمط الحياة أكيد ما بشمل عوامل المناخ والطبيعة لأنو برضو مافيهو تقليد يعني هسي يقوم مزارع يقول عايز يزرع محصول في غير موسمو وهو عارفو حيخسر بس عشان يتفادى التقليد ويقولو عليهو يا سلام ياخي زول ما حاكاي !
أو ناس ساكنين في مناطق زلازل يقومو يعملو ناطحات سحاب ونجي نقول والله المهندسين بتاعينهم ضد التقليد
12-17-2008, 08:44 PM
osman righeem osman righeem
تاريخ التسجيل: 06-21-2007
مجموع المشاركات: 10872
Quote: عشان كده قلت ليك السؤال هو هل نمط الحياة امشجع على التقليد اتغير ؟
أظن ضرورات الحياة تتطلب التغيير
اجراءات أداء الاعمال لا تتغير طال ما السلسه هي مدخلات و مخرجات تيراب زراعة حصاد ولكن ما يدفع للتغير و نقص الموارد عن تلبية الاحتياجات كانت الساقيه والاولاد عمال بدون اجر و بدرسون غي الخلوه وجاء البابور وقلة الحوجه الي الايدي العاملة وكانت المدرسه وطلت الرقعه المزروعه ثابته وكثرت الافواه وتم السعي الي موارد اخري بالهجرة و العمل عند الاخرين وجربت موارد جديده كانت خصما من الارث السابق وجاء التقليد في البحث عن الموارد الجديده وقل الابتكار و سار الجميع في الطريق المشقوق وسط الغابة ولم يغامر احد الابتكار و المبادره تحدي لا يتقنه صاحب عقيدة ثوابت السلسه تيرب اسقي احصد
12-17-2008, 09:24 PM
emad altaib emad altaib
تاريخ التسجيل: 12-27-2007
مجموع المشاركات: 5300
Quote: أول خطوات الحل إنو نقنع نفسنا إنو في حل قبل ما نبتدي نقلد
يا تيسير في حشاء نفسي مقتنع إنو في حل لكن الحل زااتو ناسنا ديل بيقلدوه ده كان قصد مداخلتي الاولي ..
ـــ لكن عليك الله البيقنع رجال ونساء بلدنا دي في فكرة "مقادمة الضيوف" يعني الموادعة فوق البوابة بتاعة الحوش تستغرق زمن أكثر من الزمن القعدوه جوه في بطن البيت المُقلّد ولسّع الونسه فوقها باقيّ.
وناوي الزواج علي وزن علي بالطلاق ثلاث أرباع الشعب السوداني الظاهرة دي بيسويها وبدات بالتقليد وبقت عادة .
12-18-2008, 05:55 PM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: لكن عليك الله البيقنع رجال ونساء بلدنا دي في فكرة "مقادمة الضيوف" يعني الموادعة فوق البوابة بتاعة الحوش تستغرق زمن أكثر من الزمن القعدوه جوه في بطن البيت المُقلّد ولسّع الونسه فوقها باقيّ.
عماد ..
دي كمان حقو ندرجا ضمن العادات الضارة
حالتو بيقولوا المقدم ما موصل ..
12-17-2008, 10:00 PM
طارق جبريل طارق جبريل
تاريخ التسجيل: 10-11-2005
مجموع المشاركات: 22555
طبعا مرفوض نهجا وسلوكا عند الكثير من أهل العقول الجامدة النقتيف الكربون لماذا ؟
ممكن الكربون يقول :- ( ياعمك نخلى الجماعة يجربو كم شهر وكدة لو فكرتو صابت؛ يافردة طولى تلقانى فى رفارفو أعمل الفكرة لكن لو خسرت وما جابت شرتيت ، نتفكفك منو ياحبة مابتحتمل أى مجازفات )0
ده ممكن يكون كلام فئة كبيرة من ما يسرقون أفكار الكثير من العقول النيرة00
ونحن فى نصهم مثلا معشر الفنانين :- ( والله يامان سمعت أمس فلان غنا كذا والتاس عملت فيها عمايل نكتا من وين ما عارف تانى يوم أمشى يغنيها ويعمل سيدا
والامثلة كثيرة فكيف نصلح نمطنا الغريب لكى نخرج من عباءة الالبغبغاء؟؟ منو البقنع القرد ما يحب الموز؟؟
لك التحيةتيسير عووضة وورونا الحل
12-19-2008, 10:52 PM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: ممكن الكربون يقول :- ( ياعمك نخلى الجماعة يجربو كم شهر وكدة لو فكرتو صابت؛ يافردة طولى تلقانى فى رفارفو أعمل الفكرة لكن لو خسرت وما جابت شرتيت ، نتفكفك منو ياحبة مابتحتمل أى مجازفات )0
ده ممكن يكون كلام فئة كبيرة من ما يسرقون أفكار الكثير من العقول النيرة00
الله ينور عليك دا بالضبط القاعد يحصل تنجح الناس كلها وراك تفشل تاكل نارك براك
عشان كده بيقولوا للفشل أب واحد وللنجاح ألف أب
Quote: ونحن فى نصهم مثلا معشر الفنانين :- ( والله يامان سمعت أمس فلان غنا كذا والتاس عملت فيها عمايل نكتا من وين ما عارف تانى يوم أمشى يغنيها ويعمل سيدا
والامثلة كثيرة فكيف نصلح نمطنا الغريب لكى نخرج من عباءة الالبغبغاء؟؟
مسألة إنو الفنان يغني غنا زول غيرو ممكن تكون إيجابية من نواحي كتيرة من ضمنها إنو بيكون في تعريف للأجيال الجديدة بي الغنا الجميل الما حضرو زمنو وخصوصاً الأغاني المالقت حظها من الإنتشار .. بالإضافة لي حاجة تانية مهمة إنو لما فنان يغني غنا فنان تاني الغنا زاتو بياخد طابع إحتفائي والكسبان هو الجمهور في النهاية وكلنا إستمتعنا بي حسن عطية بيغني لي سيد خليفة والكابلي لحسن عطية وود الأمين لي وردي وأبوداؤود لأحمد المصطفى والأمثلة لاتنتهي
لكن من ناحية تانية حكاية إنو فنان ما يكون عندو أعمالو الخاصة ويعتمد كلياً على أغاني غيرو فدي عايزة وقفة تأمل .. كل الفنانين في الدنيا بيبتدوا بي غنا غيرهم لحد ما يقيفوا على رجلينهم بعديها بيبدوا يعملوا إنتاجهم الخاص إلى جانب غنائهم لأغاني الفنانين الآخرين ..
خليهم يجربوا/ يغامروا وأنا متأكدة إنهم ما حيندموا إذا كان أغاني زي (راجل المرة) و(قنبلة) بتنجح المابيخلي أغاني -بالتأكيد أحسن منها - تنجح شنو؟
تيسـير إزيك،، وكل سنة وإنتي بخير بمناسبة العيد الفات والأعياد الجاية من كريسماس وإستقلال وسنة جديدة الخ،، مع إحترامي لما طرحه البعض هنا مثل الأخ حمور،، لكن، أهلنا ناس دارفـور عندهم مثل بقول: الله دا ولااا بنغش! ياخي نحنا والله لا مبدعين ولا حاجتين، كشعب،، بل و(متهومين) بالحق والباطل بأننا شعب كسول، والكسل يشمل حتى الكسل الفكري والقدرة على الإبداع والإبتكار والتجديد في كل مناحي الحياة،، في نفس الوقت مصابين بكثير من الأوهام مثل أننا شعب متفرد في الكثير من الأشياء، وكثيرا ما نسمع عبارات مثل إننا أول من عمل شنو كدة ما عارف في أفريقيا والشرق الأوسط (هو بالله نحنا في الشرق الأوسط صحي!).. النساء والبنات مثلا أي وحدة عايزة توبها وكل أدوات السماح بتاعتها في الحفلة وفي البلد كلها تكون فريدة ومافي زيها إتنين، وربما يصدقن توهما ما يقوله لهن التجار إنو التوب دا مافي زيو في السودان وذلك بإستغلال نقطة ضعف أوهام التميز،، بينما تكون الواحدة تقريبا تعرف إنها ما دفعت ليها كم مية ألف دولار لي إيف سان لوران الله يرحمه عشان يعمل ليها تصميم خاص ليها هي بس، وبالتأكيد التوب الإشترتو دا صنع منو عشرات لو ما مئات الآلاف.. على أي حال قد يكون دا كلام خارج شوية عن ما طرحتيه.. لكن الفنان ياسر تمتام عبر عن كثير ما أود قوله،، وما قاله عن الغناء ينطبق أيضا على التجارة والسياسة والمقتنيات الأخرى من بيوت وعربات الخ،،، يحضرني في الغناء مثلا أن إبراهيم عوض غنا (لو داير تسيبنا) قبل سنوات طويلة جدا،، في السودان فوجئت في الحفلات والشرايط والتلفزيونات إنو إي أزرق راس فتحة خشمو يقول: لو داير تسيبنا! بس لأنو في فنان شاب غناها والشباب الما سمعوا بيها قبل كدة ويمكن ما سمعوا بإبراهيم عوض عجبتهم لأنها فعلا أغنية جميلة،، وفي حفلة ولامن (الفنان) بدا بيها قلت للزول الجنبي كلام قريب من كدة قام قال لي: (آي دا ما الغنا الجديد بتاع صلاح إدريس!) تصوري،، يا للحسرة.. غنا ود الحاوي وإبراهيم عوض ينسب لأمثال صلاح إدريس،، بس لأنو الشباب ما سمعوهو إلا من الناس البغنوا ألحان فلان دا! ولأن المثال الذي ذكره الأخ حمور عن الزراعة يهمني، لأنها أيضا مهنة آباي وأجدادي،، لكن برضو أفتكر إنو حتى الزراعة تتطلب الإبداع والإبتكار والتجريب لتتطور وتتحسن،، ودا تقريبا يحصل عند المزارعين في البلاد الأخرى،، لا أقصد التطور التكنولوجي بإدخال آلات جديدة،، يعني المشكلة برضو في النهاية فينا نحنا مش لأن الظروف فرضت علينا الإستمرار بنفس نسق أجدادنا القدماء هنا،، لماذا لا نفكر في (إبتكار) محاصيل أخرى أجدى إقتصاديا بدل ما كل الناس زارعين بصل وطماطم..لماذا لا نفكر في وسائل بسيطة أخرى لتزيد في الإنتاج وجودته،، إنه التقليد الذي حذرتي منه يا تيسير،، وقبلك (حذروكن) ناس حنة التاج الممتازة منه!.. تحياتي..
12-20-2008, 08:52 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: أهلنا ناس دارفـور عندهم مثل بقول: الله دا ولااا بنغش! ياخي نحنا والله لا مبدعين ولا حاجتين، كشعب،، بل و(متهومين) بالحق والباطل بأننا شعب كسول، والكسل يشمل حتى الكسل الفكري والقدرة على الإبداع والإبتكار والتجديد في كل مناحي الحياة،، في نفس الوقت مصابين بكثير من الأوهام مثل أننا شعب متفرد في الكثير من الأشياء
شفت الكسل الفكري دا ياهو قصدي زاتو .. يعني ناس عندهم مخ وممكن يعملوا حاجات كويسة لكن مريحين أمخاخهم على الآخر ومقتصرين وظيفتها على ناكل شنو ونشرب شنو وماعدا ذلك بعتبر "رفاهية فكرية" مجرد إنك في السودان تمشي أمسية شعرية ولا قاليري بتاع فنون دا بيعتبر تصرف غريب منك وممكن عادي تلقى من يصنفك بي: ياخ دا زول وهم ساكت متابعة الإبداع محل ما يكون هي البتنشط عقولنا إنها تكون مبدعة - بدون تقليد- وبالتالي متفردة ..
Quote: النساء والبنات مثلا أي وحدة عايزة توبها وكل أدوات السماح بتاعتها في الحفلة وفي البلد كلها تكون فريدة ومافي زيها إتنين، وربما يصدقن توهما ما يقوله لهن التجار إنو التوب دا مافي زيو في السودان وذلك بإستغلال نقطة ضعف أوهام التميز
التميز ما بيشتروهو بالقروش لمسات بسيطة الواحدة إذا أضافتها ممن تخليك تحس إنها مختلفة هسي لو أخدت ليك جولة في أي جامعة من جامعات السودان بتلقى كل البنات شكلهم واحد لبسهم واحد وحتى لون "وشوشهم" بقى واحد ليه؟ لأنهم معتمدين على (الصين) أكبر مُصدّر للتقليد في الكرة الأرضية ..
Quote: يحضرني في الغناء مثلا أن إبراهيم عوض غنا (لو داير تسيبنا) قبل سنوات طويلة جدا،، في السودان فوجئت في الحفلات والشرايط والتلفزيونات إنو إي أزرق راس فتحة خشمو يقول: لو داير تسيبنا! بس لأنو في فنان شاب غناها والشباب الما سمعوا بيها قبل كدة ويمكن ما سمعوا بإبراهيم عوض عجبتهم لأنها فعلا أغنية جميلة،، وفي حفلة ولامن (الفنان) بدا بيها قلت للزول الجنبي كلام قريب من كدة قام قال لي: (آي دا ما الغنا الجديد بتاع صلاح إدريس!) تصوري،، يا للحسرة.. غنا ود الحاوي وإبراهيم عوض ينسب لأمثال صلاح إدريس،، بس لأنو الشباب ما سمعوهو إلا من الناس البغنوا ألحان فلان دا!
الكلام دا بيذكرني أكتر أغنيتين حصل معهم التغول دا وهم "كيف يجهلوك" و"الأهيف" الغنيتين ديل إتغنو لمن قالوا الرووووب خلاص أعتقونا وأنا متأكدة إنو كتير من الشباب متخيلين إنو الأغاني دي حقت محمود عبدالعزيز
12-18-2008, 09:10 AM
رانيا قاسم رانيا قاسم
تاريخ التسجيل: 07-03-2008
مجموع المشاركات: 517
التقليـد ماركة مسجلة عنـدنا سـواء كان في الافكـار او التصرفـات . المسـألة قد تعود احد اسبـابها الى طريقة التعليـم المدرسـي منذ البـداية (تلقيـن وحفظ) حيث فرص الابتكـار والتشجيع عليه تكـاد تكون معدومة .
وفي علاقاتنـا مع بعض كتيـر ما بنحكـم على شخص من خلال فكرة او رأي شخص آخر عنه , من غير ما نعطى نفسنا الفرصة عشان نعرفه , كفاية انو فلان او فلانه يقول الزول دا سخيف او الزولة دي رقيقـة تلقى البقيـة يعاملوه على هذا الاسـاس .
مثال للتقليـد زي الحاصل في المنبر ما صدقوا واحد كتب (يوجد صور) وجابت دخل , بعدها اي واحد لازم يعلن وجود صور عشان يزيد من عدد الزوار والمتداخليـن .
12-18-2008, 06:09 PM
حمور زيادة حمور زيادة
تاريخ التسجيل: 03-28-2007
مجموع المشاركات: 12116
تيسير ازيك .. رايك شنو انقلك لقدام بنظرية اغرب عن التقليد .. اعتقد - و الله اعلم - انو المجتمع ذاتو ما بيقبل منك التفرد يعني لو فتحت محل اتصالات في حته ما فيها غيرك مافي زول بيجيك و الناس كلهم يعاينو ليك انو ده شنو المجنون ده ؟ لكن خلي محلين تلاته يفتحو جمبك تلقي الناس كلها فجأه اتذكرت انها محتاجه تعمل مكالمات و يمرقوا من بيوتم جماعات و يترصوا ليك قدام المحل شوفي محل الاكل في شارع براو بيكون ميت كيف لكن انتظري يفتحو جمبو كم واحد فجأه الشارع كلو يحوم شايل ساندوتشاتو
12-20-2008, 09:35 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: المسـألة قد تعود احد اسبـابها الى طريقة التعليـم المدرسـي منذ البـداية (تلقيـن وحفظ) حيث فرص الابتكـار والتشجيع عليه تكـاد تكون معدومة .
الكلام دا صاح شديد التعليم ما قراية وكتابة وتحفيظ بس الرياضة/الموسيقى/الرسم دي جوانب أصيلة في التعليم المدرسي وهي البتنمي الحس الإبداعي عند الطلاب ماعارفة المدارس السودانية ما ماخداها جد ليه؟
Quote: مثال للتقليـد زي الحاصل في المنبر ما صدقوا واحد كتب (يوجد صور) وجابت دخل , بعدها اي واحد لازم يعلن وجود صور عشان يزيد من عدد الزوار والمتداخليـن
الجمهور بيعشق الصور .. عندنا يا رانيا قريبتنا كانت بتجي من البلد أول ماتدخل البيت تقول ليك: ما عندكن "ألبون" لاحظي إنها في الغالب بتكون ما بتعرف الناس الفي الألبوم ديل بس اللّهم صور وخلاص
ودا الحاصل هنا
12-18-2008, 06:15 PM
osman righeem osman righeem
تاريخ التسجيل: 06-21-2007
مجموع المشاركات: 10872
تا يسا يا مجنونة! واللهى ما تعملى حاجة زاتا يقلدوكى وما يعملوها! انتى الله ما ليكى! كدى البسى ليك كورية فى راسك وشوفى كان ما بقت موضة والبلد بقت كله كوارى! جنى
12-19-2008, 04:21 PM
حامد محمد حامد حامد محمد حامد
تاريخ التسجيل: 11-19-2008
مجموع المشاركات: 3085
Quote: انا فى رائى التغيير شى والابتكار شى اخر التغيير ان تعمل نفس الشى بطريقة مختلفة ودى موجودة الى حد ما فى السودان
التغيير بيحصل في حالة واحدة بس لما الحاجة تكون موضتها إنتهت والناس تنصرف عنها عشان تبتدي دورة حياة تقليد حاجة تانية ..
Quote: الابتكار يؤثر فيه البيئة المحيطة وثقافة الافراد وقد يكون ثقافة المجتمع كله فاذا سلمنا جدلا ان هناك ابتكار فى منشاة ما او صناعة او فى شركة ليس معناه ان المجتمع كله يبتكر الابتكار ايضا يؤثر فيه الجانب الاقتصادى والتشجيعى لانه يحتاج لبعض المخاطر
المشكلة حتى الشركات والمصانع ما عندها روح الإبتكار وممكن أعد ليك كمية مصانع "البسكويت" القامت في السودان شي يدعو للدهشة !! كأنو أمة كاملة ما بتنتج ولا بتاكل ولا بتستعمل غير البسكويت والكلام دا إنعكس على التلفزيون الإعلاناتو كلها بقت بسكويت فقط لا غير !!
Quote: التقليد موجود فى كل الدنيا وفى كل الشرايح الفقيرة منها والغنية وده مش عيب اذا بيحقق نجاحات واعنى هنا فى مجال السوق التسويق ودراسة السوق وخلافه بمهنية ما متوفرة فى بلد زى السودان لعدة اسباب اخرى لا مجال هنا لذكرها
التقليد لو بقى بالصورة الحاصلة في السودان دي بيحقق نجاحات أيوة لكن على الـ short run بينما بيكون قاتل للسوق على الـ long run
12-20-2008, 09:52 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: هسي لو أخدت ليك جولة في أي جامعة من جامعات السودان بتلقى كل البنات شكلهم واحد لبسهم واحد وحتى لون "وشوشهم" بقى واحد ليه؟ لأنهم معتمدين على (الصين) أكبر مُصدّر للتقليد في الكرة الأرضية ..
يا مختلفة انتي يا مختلفة
أحمد الشايقي
12-21-2008, 10:30 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: الشعب السوداني شعب يموت في التقليد يحب المحاكاة زي عيونو.. أصلو مابيبذل مجهود في إنو يصنع حاجاتو حقتو براهو
الغريبة يا تيسير مافى زول قال ليك انو الحديث عن الشعوب باطلاق هو حديث مضر لايقدم عليه..الاانتى واصحابك.. عندك انا مثلا لا أحب التقليد.. ولا أحب المحاكاة زى عيونى!! ودائما ما ابذل مجهودا فى صنع حاجاتى براى..! انتبهى انتى وضيوفك وقت استلاف اسمنا.. شكرا
12-21-2008, 12:36 PM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
يا تيسـير،، ولأني واحد من (ضيوفك) المعنيين (والقحّاحين كمان*) لأني برضو قلت نحنا السودانيين (كشعب) فعايز أرد على السيد علي،، أولاً كدة عاين شوف في كم زول فوق من تيسير لي أصحابها متفقين،، يعني أكتر من عشرة مقابل واحد! ودا في لغة الديمقراطية إسمو الغالبية العظمى، وأكتر بكتير كمان بما أنها أكتر من التلتين!.. والليلة لو جات جهة متخصصة برضو وعملت إستطلاع علمي وسط السودانيين، طلع فيهو كم وخمسين في المية متفقين على أننا (شعب) يحب التقليد،، يبقى ممكن الجرايد تكتب بالبنط العريض: السودانيين شعب يحب التقليد... حاجة أخيرة،، السودان فيهو حوالي أربعين مليون نسمة،، تعـرف واحد من الأربعين مليون ديل بعادل كم: 0.0000025%! ودي برضو في لغة الحساب إسمها: يمكن أن يؤول إلى الصفر،، يعني بعد ما نطلعك إنت ونطلّع معاك تاني مية ألف ولاّ مليون زااتو ممكن نقـول بكل قوة عين: السودانيين شعب يمووووت في التقليد زييي عيونو...
ــــــــــــــ * قالوا يا تيسير في ضيف لسوء حظو نزل ليهو عند ناس ما بحبوا الضيوف،، وهو قاعد مستني العشا ناس البيت دخلوا وناموا وخلوهو في الصقيعة،، أها بعد شوية بقى يتنحنح ويتقحقح عشان يشعرهم بوجوده: قام سيد البيت طلع وبزهج شديد قال ليهو: إنت ضيف وكمان قحّاح!
12-21-2008, 07:22 PM
بدر الدين الأمير بدر الدين الأمير
تاريخ التسجيل: 09-28-2005
مجموع المشاركات: 22958
Quote: أولاً كدة عاين شوف في كم زول فوق من تيسير لي أصحابها متفقين،، يعني أكتر من عشرة مقابل واحد! ودا في لغة الديمقراطية إسمو الغالبية العظمى، وأكتر بكتير كمان بما أنها أكتر من التلتين!.. والليلة لو جات جهة متخصصة برضو وعملت إستطلاع علمي وسط السودانيين، طلع فيهو كم وخمسين في المية متفقين على أننا (شعب) يحب التقليد،، يبقى ممكن الجرايد تكتب بالبنط العريض: السودانيين شعب يحب التقليد... حاجة أخيرة،، السودان فيهو حوالي أربعين مليون نسمة،، تعـرف واحد من الأربعين مليون ديل بعادل كم: 0.0000025%! ودي برضو في لغة الحساب إسمها: يمكن أن يؤول إلى الصفر،، يعني بعد ما نطلعك إنت ونطلّع معاك تاني مية ألف ولاّ مليون زااتو ممكن نقـول بكل قوة عين: السودانيين شعب يمووووت في التقليد زييي عيونو..
شكراً ليك لأنو عفيتني من قول الكتير .. مرة قريت في حتة إنو أحد الأساتذة الجامعيين كان بيحاضر في الطلبة ومن ضمن كلامو إنو قال: يا جماعة تجنبوا التعميم قدر الإمكان لأن التعميم دايماً مُخل ثم أردف: وكلامي دا زاتو بيعتبر تعميم مُخل
12-23-2008, 09:12 PM
محمد البشرى الخضر محمد البشرى الخضر
تاريخ التسجيل: 11-14-2006
مجموع المشاركات: 28869
دا ما تحليل .. دا في علم الإحصاء إسمو observation مبني على الملاحظات والإنطباعات الفردية والآراء الشخصية وما بتحكمو أي أسس علمية من أسس البحوث والتحاليل المتعارف عليها يعني شغل جربندية ساي ..
الكلام الكبار بتاع إنو دا تعميم وإستندتي في رايك دا على ياتو عينة ولا شريحة دا ما بينفع هنا هسي لو أي زول جا قال الكورة السودانية تعبانة دا ما بيمنع إنو يكون فيها ناس فعلاً موهوبين لكن دا ما بيلغي حقيقة إنها كورة تعبانة
أها أقول ليك كلام: أنا عندي إعتقاد وبرضو مبني على ملاحظاتي الشخصية إنو التشكيليين السودانيين من "أفضل" التشكيليين في العالم هل دا معناهو إنو كلهم دون إستثناء شغلهم بيرفكت وما فيهو كلام؟ أبداً ولكن الأغلبية شغلهم ممتاز ..
12-24-2008, 09:49 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
وجه بدافع الغيرة فقط وجه آخر بدافع الإقتداء بنجاح أو بأي شكل من أشكال الجمال
هنا في السعودية التقليد ( أعمى ) لدرجة بعيدة .. بحيث إنو ممكن تلقي صف واحد من أول الشارع لنهايتو محلات ( كوفي نت ) .. أو ( محلات تركيب أطباق ) , إلخ .. و أكتر تقليد هنا للمطاعم ...
و موجة التقليد ياداب حتبدا في السودان و بشكل كبير ...
دمت
12-24-2008, 11:39 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
وجه بدافع الغيرة فقط وجه آخر بدافع الإقتداء بنجاح أو بأي شكل من أشكال الجمال
التقليد بدافع الغيرة دا ياهو التقليد الأعمى الإنت ذكرتو زاتو بدون ما الزول يعرف نفع الحاجة من ضررها يقوم يعملها من باب الناس عملوا أنا أعمل أو من باب تمسّخ الحاجة لي سيدا .. أما الآخر الذي بدافع الإقتداء فهو إيجابي ولكن ليس بالضرورة أن يكون true copy من الأصل ..
ولا شنو
Quote: و موجة التقليد ياداب حتبدا في السودان و بشكل كبير ...
أكتر من كده؟
12-24-2008, 11:06 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: هل للشعوب المستهلكة المتقوقعة اكثر من التقليد؟
كلامك دا مهم جداً وبيفتح باب حول مدى تأثير الحالة النفسية والمزاجية على تنشيط الإبتكار شعب محبط من المنطقي إنو ما يجدد لكن هل ممكن نحول الإحباط العام دا لي طاقة إيجابية؟
12-24-2008, 11:50 AM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: وهذه الكبابي لمن لا يعرفها هي كبابي سعودية المنشأ بها شعار المملكة نخلتين وسيف ولا سيفين ونخلة ما عارفة ومكتوب عليها بالخط الكوفي "أهلاً وسهلاً"
طيب ياخي ما تقولي كدا من الصباح أها مااااااااا عندنا ح تدينا خيارات ولّـ يفتح الله
قُح قٌح قٌح
12-24-2008, 09:51 PM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: وحات اسم الله فى واحدين كان عرفوا بعد سبعة سنوات يتسدوها بى أثر رجعى ما يخلوا حقهم!
جني .. إنتا ما سمعت قصة الإتنين كل واحد معرس أخت التاني الأول إختلف مع مرتو وطلقها التاني قال ليهو طالما طلقت أختي, أختك من الليلة ما تقعد معاي سوقا معاك !!
تقول لي شنو ..
12-24-2008, 04:51 PM
محمد عبد الماجد الصايم محمد عبد الماجد الصايم
تاريخ التسجيل: 10-16-2005
مجموع المشاركات: 35312
Quote: التقليد بدافع الغيرة دا ياهو التقليد الأعمى الإنت ذكرتو زاتو بدون ما الزول يعرف نفع الحاجة من ضررها يقوم يعملها من باب الناس عملوا أنا أعمل أو من باب تمسّخ الحاجة لي سيدا .. أما الآخر الذي بدافع الإقتداء فهو إيجابي ولكن ليس بالضرورة أن يكون true copy من الأصل ..
تايسا وفى تقليد اتنين فى واحد هنا فى ام طرقا عراض تقومى تفصلى فستان كوبى من بتاع المستهدفة وتعملى ليهو بيست فى الشغالة وتسوقيها حفل تكون المستهدفة لابسة فستانها وجاية تقشر بيهو! وهاك يا انهيار عصبى! جنى
12-27-2008, 04:01 PM
تيسير عووضة تيسير عووضة
تاريخ التسجيل: 12-20-2005
مجموع المشاركات: 7136
Quote: وفى تقليد اتنين فى واحد هنا فى ام طرقا عراض تقومى تفصلى فستان كوبى من بتاع المستهدفة وتعملى ليهو بيست فى الشغالة وتسوقيها حفل تكون المستهدفة لابسة فستانها وجاية تقشر بيهو! وهاك يا انهيار عصبى!
كيدهن عظيم ..
12-24-2008, 09:47 PM
عاطف عمر عاطف عمر
تاريخ التسجيل: 11-26-2004
مجموع المشاركات: 11152
دي ( قولة خير ) لحدي ما نجهز ( الشيلة ) مشاركة سابقة
Quote: إلا أنني أنظر للموضوع - إضافة لطرحك الوافي - من زاوية أخرى وهي زاوية ضمور الخيال في حياتنا بمختلف نواحيها السياسية والفنية والإقتصادية . لا أحد يملك الخيال لإستنباط الجديد ، الكل ينتظر آخراً ليجرب شيئاً ليقلده وبعد هنيهة تمتلئ الساحة بذاك الجديد -بنى أحدهم منزلاً غرفتين معكوسات الإتجاه بفراندات -- أصبحت هذه موضة لجميع المساكن غض النظر عن متطلبات صاحب المسكن وهل يلائمه هذا الوضع أم لا . - أحضر أحد المغتربين عربة كورونا موديل 1983 في أحد إجازاته للسودان وقضى بها إجازته وعندما أراد العودة باعها فكان الثمن ثلاثة أضعاف رأس مالها . لذلك نشطت هذه التجارة وامتلأت بها موانئ التصدير في دول الخليج وميناء بورتسودان وكرين بحري . - في بداية ثورة الإتصالات إفتتح أحدهم دكاناً للإتصالات - عندما انتبه الناس كانت كل المساكن بها دكاكين للإتصالات . - ارتفع سعر الأراضي بالخرطوم بصورة غير مفهومة وغير مبررة - فكر أحدهم بشراء قطعة أرض وبدلاً عن الشروع في بنيانها اشترى قطعة أرض ثانية وبعد ثلاثة سنوات باع قطعة الأرض الثانية ليجد أن ربحه فيها كان كافياً لبناء قطعته الأولى . صارت هذه هي الموضة هرع الكل لشراء قطعة الأرض ( الثانية ) لضمان بناء الأولى . - ظهرت فرقة لمدح الحبيب المصطفى عليه أفضل الصلوات وأتم التسليم ، بمدائح الشيخ عبدالرحيم البرعي ( رحمه الله )، فجأة امتلأت الساحة الفنية بعشرات الفرق بنفس المدائح لنفس الشيخ وبذات الهيئة والملبس بل وبذات الحركات التي ظهرت بها الفرقة الأولى . - - - -
12-24-2008, 10:12 PM
jini jini
تاريخ التسجيل: 02-05-2002
مجموع المشاركات: 30716
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
تيسير عووضة
حمور زيادة
emad altaib
omar arbab
osman righeem
طارق جبريل
yasir tamtam
رانيا قاسم
خدر
jini
حامد محمد حامد
على عمر على
خضر حسين خليل
بدر الدين الأمير
محمد البشرى الخضر
salee
abas
ابو جهينة
محمد عبد الماجد الصايم
عماد الشبلي
عاطف عمر
Adil Osman
فيس بوك
تويتر
انستقرام
يوتيوب
بنتيريست