دعواتكم لزميلنا المفكر د.الباقر العفيف بالشفاء العاجل
|
|
 ود المرَة ..
|
يعني شنو يا ود المرة
وهل هي شتيمة
وما المقصود بـ تربية نسوان
هل هي معايرة أم إساءة هي الأخرى أم ماذا ؟
هل النسوان ما بيعرفوا يربوا
ولا تربية الأجيال أو الإنفراد بتربيتهم فيهو شي من العيب لاسمح الله
يعني أنا مثلاً لو عايزة أمدح زول أقوم أقول ليهو يا ود الراجل ؟
أعرف أمهات وحيدات أرامل أو مطلقات أو حتى من يغيب أزواجهن عنهن بالسنين
يتكبدن عناء ومشقة تربية أبنائهن وبناتهن ويبذلن كل ما بوسعهن
وما ليس بوسعهن فقط لتخرج للناس أفراداً نافعين لأنفسهم ولغيرهم
لتفاجأ بعد ذلك بمن يعايرهم بتعبها وسهرها !
وأعرف أيضاً نساءً ورجالاً تلامس جباههم سحاب السماء علماً وعملاً
وكانوا جميعهم ( تربية نسوان)
أيوة تربية نسوان ..
فيهم المات أبوه وفيهم الإنفصل عن أمو وفيهم السافر أبوهو يلقط الرزق
وفيهم البعد عن البيت وإلتزاماتو ومسؤولياتو ساي كده بس بدون سبب
وتعبت الأم الماعندها شغلة ديك
عشان يجي واحد بعد كم سنة يديها كف في وشها لما يقول لبتها ولا إبنها
يا ود المرة ..
يا ود أمو ..
يا تربية النسوان !
|
|
 
|
|
|
|
|
|
|
|
Re: ود المرَة .. (Re: تيسير عووضة)
|
أوووووو،، يسووور،،
"ود المرة ده حلو حلا.."
بركة الختمتي البيات بي مرقة زي دي،،
شفتي الصباح؟
قشة عيني كدي نجي نشوف الكلام ده كيف،،
| |
|
|
|
|
|
|
|
|
|
Re: ود المرَة .. (Re: تيسير عووضة)
|
ليس كل من (حظي) بإسهام والده في تربيته كان صالحاً
وبالمقابل ليس كل من تربوا على أيدي أمهاتهم خرجوا (ما نافعين)
وكان ذلك سبيلاً لمعايرتهم وإنتقاص كرامتهم ومن قبلها كرامة من ربّتهم ..
| |
|
|
|
|
|
|
|
|
|
Re: ود المرَة .. (Re: رأفت ميلاد)
|
يا رأفت ..
مش كان أحسن يقولوا ليهو طيش حنتوب أب راس مقلوب 
(على الأقل يحاسبوهو على إنجازو/إخفاقو كفرد)
ويخلوا (المرة) الجابتو دي بعيد ..
أشياء زي دي موجودة في موروثنا الإجتماعي كتير
وما عايزة أبالغ وأقول إنها ثقافة سائدة وراسخة عند الأغلبية
بس بصراحة في حاجات كتيرة في ثقافتنا السودانية
أنا لغاية الآن ما قدرت أبلعها ومنها قصة ود المرة دي
عشان كده بحس إنو من واجبنا تصحيح مفاهيم خاطئة كتيرة
وتخليص موروثنا دا من حمولة كتيرة غلط وعيب عديل كده ..
| |
|
|
|
|
|
|
|
|
|
Re: ود المرَة .. (Re: Adil Osman)
|
تيسير...
دايرة اقول انت حلوة.. حلوة جدا
حلوة فى كل شىء..ده اول مش كل ام/ اخت/ صاحبة/ حبوبة معجبة بى بتها صاحبتها واختها تيسير؟}
تانى: الله يفك الساجور وبجيك راجعة
----------------
رسلى لى ايميلك على: [email protected]
| |
|
|
|
|
|
|
|
|
|
Re: ود المرَة .. (Re: Ishraga Mustafa)
|
تسلمي يا شرّوق وأكيد ما أحلى منك ولا من قلبك ولا من عقلك
ومنتظراك لأنو أكيد عندك وجهة نظر في الكلام دا
وإتوقعي مني إيميل
بركة اللميت فيك زاتو 
| |
|
|
|
|
|
|
|
|
|
Re: ود المرَة .. (Re: تيسير عووضة)
|
تيسير الشكالة
ليه ما تشوفي الموضوع من زاوية تانية وأنه نحنا كسودانين عندنا نظرة مقدسة للمرأة وما بنرضى فيها مثل هذه المقولات..
بعدين حلوة حكاية ود الراجل (ده جندر عديل)
تحيات طيبات
| |
|
|
|
|
|
|
|
|
|
Re: ود المرَة .. (Re: حسين محي الدين)
|
يا حسين ..
الموضوع دا ولا من زاوية (عاشرة) ما فيهو أي نوع من التقديس للمرأة
بالعكس فيهو كتير من التغتيس ..
| Quote: بعدين حلوة حكاية ود الراجل (ده جندر عديل) |
تتخيل ما جندر !
هسي أمسك ليك أي زول يكون داير يشكّر ليهو زول
بيقول والله فلان دا راااجل ود رجال 
هذا وتحيات طيبات برضو ..
تيسير الشكالة
| |
|
|
|
|
|
|
|
|
|
Re: ود المرَة .. (Re: تيسير عووضة)
|
Quote: بس بصراحة في حاجات كتيرة في ثقافتنا السودانية
أنا لغاية الآن ما قدرت أبلعها ومنها قصة ود المرة دي
عشان كده بحس إنو من واجبنا تصحيح مفاهيم خاطئة كتيرة
وتخليص موروثنا دا من حمولة كتيرة غلط وعيب عديل كده .. |
لااااا دا كلام كبير علينا
ربنا يكمّلِك بي عقلِك ساكِت يا تيسير
بس لو سمحتي لي يعني بي عودة عشان نشوف بالضبط كِدة
الحاجات الكتيرة الما قادرة تبلعيها في ثقافتنا السودانية
دي شنو .. ومُمكِن نحِلها كيف .. عشان تعُم الفايدة وكِدة.
تقديري
| |
|
|
|
|
|
|
|
|
|
Re: ود المرَة .. (Re: wd al geran)
|
ود الجيران ..
كدي خليني أخلص من الفي يدي دي أول
وبعداك نمشي للباقي أصلو موجود إطمئن ..
أما حكاية الحل فدي مرحلة متقدمة شديد
كدي خلينا أول شي نلقى ضوء عليها ونحددها
ونعترف إنها غلط بعدين نحاول نشوف ليها حلول ..
ومرحب بيك
| |
|
|
|
|
|
|
|
|
|
Re: ود المرَة .. (Re: تيسير عووضة)
|
سمح خلاس جدينا،، جد شديد،،
ولا حتي إزيك،،
ــــــ
اها يا يسوووور،،
أولتن شي الحكاية لمن تكون ود المرة هل بتفرق من بت المرة؟
لأنو لمن يتقال لي الولد ود المرة بتتفهم لي الولد الني السجمان ال مايع الجبان،،
و لما تتقال للبت بتتفهم لي زي يا "كلبة" !!!
في الابتدائي كنت أصر علي كتابة إسمي هكذا؛
عزة سلمي الشيخ سلامة،،
يعني بت المرة..و اسع كان لقيت فرقة بواصل بي الطريقة دي،، ف بت المرة بي رضاي التام،،
و بما إني ترباية حبوبتها و حبوبتها التانية صحبة حبوبتها زي خالة امها،،
الاولي كانت وديعة و حلوة "أمي" امي سلمي دي حبوبة اكتر منها،، في الحبوبية،،
لكن فهم وقراية و قعيد فتقول لي سلمي يا بت اقعدي ساي،،
اما التانية فكانت الحبوبة عندها المحن و الكلام البتعرفو براها،، عليهن الرحمة،،
و لك ان تتخيلي اني اكون سمعت قدر شنو و سمعت شنو زاتو،،
من عينة بت ال.... و ود ال.....
ف ياختي كان البوست فيهو اي إحتمالات لي الرفد اديني خبر،،
اجيك بي باب تاني،،
| |
|
|
|
|
|
|
|
|
|
Re: ود المرَة .. (Re: أحمد الشايقي)
|
أحمد يا عزيزي ..
كلامك دا فيهو جانب كبير من الصحة
لكن أنا ما بتكلم عن ظروف التربية الطبيعية بوجود الحبوبات ودلعهم ..
أنا بتكلم هنا عن ظرف محدد:
أبناء ربتهم أم بمفردها دون وجود الأب من أساسو ..
حسب مشاهداتي وتجربتي غالباً الأم في الحالات الزي دي
بتحاول تكون صارمة جداً مع الأبناء وتسد مكانة الأب بقدر الإمكان ..
زولة أو زول من هو صغير أبوهو ما موجود ولقى روحو وسط أمو حبوباتو خالاتو
أو خلينا نقول أخواتو وربوهو وكبروهو وطلع زول زي الورد ..
قام (للتعترو) دخل في شكلة أول كلمة حا يسمعا أوعك تفتح خشمك
يا ود أمو يا ترباية الحريم !
الكلام دا أنا ما جبتو من راسي حاصل وموجود يا أحمد
وبندهش أكتر في كل مرة بسمعو أو (بقراهو) فيها ..
| |
|
|
|
|
|
|
|
|
|
Re: ود المرَة .. (Re: Soumeta)
|
سلام للجميع
تيسير قلت
Quote: يا ود المرة ..
يا ود أمو ..
يا تربية النسوان ! |
بتشكري فيني مالك اسي في زول سألك؟؟؟
| |
|
|
|
|
|
|
|
|
|
Re: ود المرَة .. (Re: Soumeta)
|
تيسير ..
شابكنك : أخونا تيسير .. الزميل تيسير ..
ياخي طلعتي زولة سمحة سماحة !!!
آمنت بالله 
ده أولاً بالتبادي ..
إتنين ..
في رجال في المقابل كانو بينتسبو لأمهاتهم ..
بمفهوم الفخر ليهم و العزة ..
و فيهم رجال دين و شيوخ .. و أبطال أسطوريين و همباتة ..
( يعني رجالة قاطعة .. مش فشنك زي بتاعتك )
يبقى كلامك ده ما بينسحب إلا على وسط ثقافي بعينو ..
لأنو لو مشيتي مجتمعات سودانية في الأطراف ح تلاقي الفهم ما كده و لا حاجة ..
ود فلانة .. أخو فلانة .. راجل فلانة .. كتيرة جدا ..
و الناس بتتعامل معاها بإيجابية حمولتها القيمية و الأخلاقية كاملة .. و بمزاج كمان .
الطالع في راسكن شنو الأيام دي إنتو ؟؟
شايف حركة ململة كده وتِحِفّز براااحه بيناتكن ..
رجاء .. إشراقة .. تماضر .. إنتي .. !!!!!؟
ده حالتو المسنجر ما شغال
و بس .
| |
|
|
|
|
|
|
|
|
|
Re: ود المرَة .. (Re: Emad Abdulla)
|
يا عمدة ..
شفتا عشان جنس دا حبينا نثبت الأيدنتتي بتاعتنا
فترنا من التصحيح قلنا يا نغير الإسم يا نغير الصورة
وبعدين يا عماد تفاخر الرجال بامهاتهم معروف زي ما قلت
وعندك فارس الهمباتة الطيب ود ضحوية وضحوية دي كانت حبوبتو عديل مش أمو
وعندك عمرو بن هند الكتلو عمرو بن كلثوم بتاع معلقة (ألا هبي) حقت الطشمة ديك ..
بس أوعى تقول لي كلثوم دي أمو
وعندك ناس أنا أبوك يا عازة و أنا أخوك يا عواطف 
دا جانب إيجابي أنا معاك
لكن المرأة البتكون سبب للتفاخر والإعتزاز دي
هي نفسها المرأة البتكون سكة للشتيمة
وأعتقد ما في شي مؤلم للراجل قدر كلمة بذيئة
قد تخرج من فم أحدهم قاصداً بها أمه أو أخته !
دا غير إنو في بعض الناس مجرد ذكر إسم أمهم قدامهم
بيدخل في خانة العيب أو العار عديل وممكن يكون سبب وجيه
إنو يضارب الزول القدامو وبالمناسبة المتنبي زاتو القالوا أشعر العرب دا
مات بسبب طولة لسانو و شتيمتو لإمرأة لما شتم أم واحد إسمو ضبة
لف الزمن ودار وجا كتلو منو كتلو خال ضبة دا ثاراً لأخته
اللي هي أم ضبة عشان كدا بيقولوا الشاعر الذي قتله شعره
قاصدين بيتو الشهير بتاع الخيل والليل والبيداء تعرفني
هو فعلاً كتلو شعرو بس ما دا شعرو بتاعِ شتيمة المرة داك ..
هسي الكلام دا كلو الجابو شنو؟
| |
|
|
|
|
|
|
|
|
|
Re: ود المرَة .. (Re: تيسير عووضة)
|
| Quote: هسي الكلام دا كلو الجابو شنو؟ |
يا قريبتي انتي المودييك عند العرريب شنو ناس ضبة وتابط شرا .. اليطيرو.. لليوم دة انا زعلان من الشهادة الثانوية في الستينات لانو اصرو انو نحفظ مشعليب امرؤ القيس.. ودة قلة الادب جنب مشعليبو اخر تمام التمام ...
| |
|
|
|
|
|
|
|
|
|
Re: ود المرَة .. (Re: abubakr)
|
| Quote: يا قريبتي انتي المودييك عند العرريب شنو ناس ضبة وتابط شرا .. اليطيرو.. |
يا أبوبكر ..
من عرف (أدب) قوم أمن مكرهم ..
وبعدين إمرؤ القيس دا بالذات عبابيرو كانت تتطاقش
أنا ما عارفة كانو بيدرسوهو للطلبة قصدهم شنو بالضبط ..
قال إيه اليوم خمر وغدٌ أمر
ما فاضى زاتو
| |
|
|
|
|
|
|
|
|
|
Re: ود المرَة .. (Re: Soumeta)
|
سوميتا يا حبيبة قساي ..
يعني هسي دا الجد بتاعك؟
ياخ أنا بضحك من أول كلمتين لغاية ما إنتهيت لكن برضو (غررت) أرفدك 
قولي لي ليه ؟
ما حقول ليك طبعاً ..
أها نجي للجد
Quote: الحكاية لمن تكون ود المرة هل بتفرق من بت المرة؟
لأنو لمن يتقال لي الولد ود المرة بتتفهم لي الولد الني السجمان ال مايع الجبان،،
و لما تتقال للبت بتتفهم لي زي يا "كلبة" !!! |
دا مربط الفرس .. إحساسنا بالكلمة نفسو .. بيكون فيها كمية من تعمد الإهانة
لما تكون موجهة للولد ومحاولة إشعاره بالحرج أو إنو فيهو شئ غير مكتمل
لكن لما تتقال للبت أحياناً بنحسها زي ما قلتي مقصود بيها يا كلبة
أو مرادفة لكلمة (بت أم زَرَدَة)
حلوة حكاية عزة سلمى الشيخ دي ذكرتيني بت د. نوال السعداوي
القالت عايزة تنسب نفسها لأمها يعني تبقى منى نوال بدل منى حلمي ..
بس تعرفي يا عزة كلنا بنحب وبنتمنى ينادونا بأسماء أمهاتنا
ويوم القيامة زاتو يوم الجد الصحي حينادونا بأمهاتنا لكن
المرفوض بالنسبة لي لما تكون المناداة في سياق بتاع إساءة أو إهانة
أو محاولة قطع لسان للزول القدامنا أو كسر عينو ..
يا زولة أقول ليك تعالي بالباب التاني 
تيسير بت سميرة
| |
|
|
|
|
|
|
|
|
|
Re: ود المرَة .. (Re: تيسير عووضة)
|
تيسـير،، سـلام عليكي؛؛
أول حاجـة كان جينا للجـد الدايراهو من سوميتة دا: هـو ال ما ود مـرا منو في الدنيا دي؟!،،وزمــااان (جـدّك)كعب بن زهـير قال:
كل ابن أنثى وإن طالت سلامته،، يوما على آلة حدباء محمول،،
ولامن (عمك) إسماعيل حسن قال:دي ترباية حبوبتا زي ما أشارت العـزيزة سوميتة،، طبعا ما قاصد (تربية نسوان ساكت!) لكن زي ما تعرفـي ترباية الحبوبات (والأمهات) كناية عن الدلع الزايد يمكن،، وأوافق أن الأمهات حتى في وجـود الأب، تجديهن هن من يقمن بأكثر أعباء التربية سواء بمعنى (الأدب) او بمعنى التغذية وفعلاً الأم أكتر من مدرسة أو معهد بي كتير ومافي (ودمرا) بقدر على جزا أمو،، لكن برضو عندنا الأمهات غالباً لامن الولد (الولد بالذات مش البت) لامن يعمل معاها غلبة تقول ليه: اسـتنى لامن بعـدين أبوك يجي عشـان يوريك! ودي أظن من أسـباب حكاية ود المـرا البنقولها ساكت دي(زي ود اللزينا)،، أها زي ما تفضلتي في آباء الواحد أصلاً بكون غايب بالسنين الطويلة في درب المعيشـة،، يبقى لازم الأولاد يكونوا أولاد المرة.. وبرضـو زي ما قال أخونا عمـاد في ناس مشهورين بمختلف حميد الخصال من شجاعة وكـرم وعقل راجح الخ،، لكنهم أيضا عرفوا بالانتساب لأمهاتهم،، ربما لأن الأم كانت هي الشخصية الطاغية في تربيته (وفي تربية أبوه زاتو!)،، أنا بالمناسبة من زمـان معجب بأسماء ناس دول المـغرب ناس بن عيشة وبن خديجة وطبعا! بن قنة! الخ.. نحنا في أهلنا عندنا برضو (ثقافة) ما عارف هي عند كل السودان ولاّ لا: لو كانت (البت) مننا وزوجها غريب أو حتى ما قريبنا شديد طوالي بنقول لأولادها أولاد فلانة..أذكـر أن بعض (أولاد) قريبتنا لامن كبروا بقوا بزعلوا من أولاد فلانة دي خاصة وهم كانوا شديدي الإعتزاز بأهل أبوهم..
لكي الشـكر والتحية،،
| |
|
|
|
|
|
|
|
|
|
Re: ود المرَة .. (Re: Isa)
|
يا عيسي ..
Quote: لكن برضو عندنا الأمهات غالباً لامن الولد (الولد بالذات مش البت)
لامن يعمل معاها غلبة تقول ليه: اسـتنى لامن بعـدين أبوك يجي عشـان يوريك!
ودي أظن من أسـباب حكاية ود المـرا البنقولها ساكت دي(زي ود اللزينا)،، |
أها لو الولد دا ما كان عندو أبو (يوريهو) وأمو إضطرت إنها تقوم بالدور دا براها
ونجحت لحد كبير نقوم نقولا ليهو في الطالعة والنازلة ؟
وبعدين ياريت ود المرة دي تكون بتتقال ساكت
بدون نبرة شماتة ولا تحقير ما كنت فتحت البوست دا ..
صدقني يا عيسى هنا في منبرنا دا قريت قبل كم يوم أحد الأعضاء
بيعاير في أحد الأعضاء برضو بيا ود أمو يا تربية الحريم !!
دون دخول في تفاصيل وسبب مشكلة ومنو غلطان ومنو ما غلطان
أنا أخدت الموقف بصورة متجردة وبقيت أتساءل معقول لسه في ناس بتتعامل كدا ؟
أما قصة نسب لأبناء لأمهم دي عادية جداً ونحن أهل أمي بينادونا بإسم بتهم لأنها الأقرب
وأهل أبوي بينادونا بإسم ولدهم لأنو الأقرب
يعني منطقياً كدا ما ممكن خالتي تكون بتتكلم عننا
تقوم تقول أولاد عثمان ونحن أولاد أختها هي
| |
|
|
|
|
|
|
|
|
|
Re: ود المرَة .. (Re: abubakr)
|
تيسير ازيك !!!!
بدون تدبيج الدفاعات والخطب !!
بدون اللجوء للمفاهيم والفلسفة وتفكيك الوهم
ـــــــــــــــــــ
كدى ال يجى اى راجل داخل هنا ويقول انو ما ود مرا ؟؟؟؟؟
بعدين بنتفاهم !!!!!!!!
دى بسموها فى العلوم الحقايق وفى الرياضيات المعطى !!
لا تقبل الجدل ولا الافتراضات
| |
|
|
|
|
|
|
|
|
|
Re: ود المرَة .. (Re: دينا خالد)
|
| Quote: بعدين بنتفاهم !!!!!!!! |
في شنو يا دينا ؟ ما انتي عارفة انو ما في راجل ولا بشر ما ود مرا ... المهم هو كيف يحترم الواد او البنت تلك الحقيقة الالهية؟؟المعايرة بفهم ان المراة دون الرجل او محاولة انتقاص من دور المراة هو نوع من مغالطة الحقيقة ؟؟ المطلوب هو العمل علي محاربة ذلك الفهم بعمل جاد من داخل كل اسرة وفي المدارس ..عمل اجتماعي كبير لا جهد فيه سوي توضيح بالمنطق والفعل ..فابني مثلا ان عرف منذ الصغر انه ود مرا كما انه بن ابيه ولا تفاضل في ذلك يعطيني موقعا متقدما علي امه فاكيد سيرسخ في ذهنه وتصرفاته ان ود مرا ليست للمعايرة وانما حقيقة الهية يجب ان يتمسك بها ويتفاخر ان دعي الامر ....التحدي هو في ان تاتي اجيال قادمة خالية من تراكمات تلك العيوب الاجتماعية التي بنيت علي مفاهيم ذكورية متعسفة وليس لديها سند .....
| |
|
|
|
|
|
|
|
|
 Re: ود المرَة .. (Re: abubakr)
|
Quote: فابني مثلا ان عرف منذ الصغر انه ود مرا كما انه بن ابيه ولا تفاضل في ذلك
يعطيني موقعا متقدما علي امه فاكيد سيرسخ في ذهنه وتصرفاته ان ود مرا ليست للمعايرة
وانما حقيقة الهية يجب ان يتمسك بها ويتفاخر ان دعي الامر .... |
| |
|
|
|
|
|
|
|
|
|
Re: ود المرَة .. (Re: دينا خالد)
|
| Quote: كدى ال يجى اى راجل داخل هنا ويقول انو ما ود مرا ؟؟؟؟؟ |
دينا ينصر دينا ..
قال ليك ما يجيبها إلا ستاتها ..
تعرفي يا دينا عندي صاحبتي بلغارية لذيذة جداً تقول لي
أنا بحس إنو أولاد أختي ديل حتة مني ما زي أولاد أخوي
قلت ليها ليه مفروض العكس أولاد أخوك شايلين نفس إسمك قالت لي لا طبعاً
أولاد أختي ديل أنا ضامنة إنهم جايين من أختي
أولاد أخوي ديل أنا ما عارفاهم جايين من وين يمكن أخوي ما أبوهم !
إتخيلي المنظر ..
| |
|
|
|
|
|
|
|
|
|
Re: ود المرَة .. (Re: تيسير عووضة)
|
| Quote: أولاد أخوي ديل أنا ما عارفاهم جايين من وين يمكن أخوي ما أبوهم ! |
شفتي برضو المرا التانية- في حالة انو ما ابوهم- برضو مفتري عليها من بنت جلدتها .. الحكاية باين غلوبال بروبلم ...اها نحولا لدينا بشان تتفاهم غلوبالي .....
| |
|
|
|
|
|
|
|
|
|
Re: ود المرَة .. (Re: abubakr)
|
أبوبكر العزيز ..
| Quote: يا تيسير اجيال لا تحصي من السودانيين هم تربية المراة وبالذات شمال السودان القصي حيث كان الرجال في ترحال وسفر بحثا عن الارزاق اما شمالا او غربا عبر البحر او جنوبا الي الداخل وبعض منهم عبر البحر الي بلاد كثيرة ...بالاضافة كما ذكرت الي ابناء المطلقات والارامل والاف ماتو في حروب لا داعي لها ...ما زال في كثير من مناطقنا المناداة باسم الام مقرونا باسمائنا هو نوع من التكريم والحميمية .... |
أحكي ليك قصة طريفة حصلت لجدي ..
برضو نفس الحكاية إضطر إنو يتغرب عشان يوفر لأبنائو وأمهم لقمة عيش شريفة
قاموا الأولاد وكبروا وهم معروفين بـ أولاد آمنة نصر (نسبة لغيابو وكدا)
والبيت بيت آمنة نصر والجناين حقت جدي زاتو لكن بيقولوا جناين آمنة نصر
أها قام جدي رجع لقى الحكاية بايظة خالص زعل وقال لي حبوبتي إيه داأي هاجة بإسمك إنتا
تيب إستنى .. قام مشى جاب ليهو جرو سغير يربيهو قال عشان أحلف أقول عندي حاجة بإسمي
إن شاء الله جريوة (شيخ أوودة) لكن لسوء حظو الناس برضو بقوا يقولوا جريوة ناس آمنة نصر
قام الجرو كبر وقام عض ليهو زول لما ودوهو المستشفى الناس بقوا يسالوا يا خوانا فلان مالو
يقولوا عضتو كلبة شيخ أوودة قال ليهم يا ولاد الكلب الزمن دا كلو شابكننا جريوة آمنة نصر
جريوة آمنة نصر لمن بقت تعضي بقت كلبة شيخ عووضة ؟ِ
| |
|
|
|
|
|
|
|
|
|
Re: ود المرَة .. (Re: تيسير عووضة)
|
| Quote: جريوة آمنة نصر لمن بقت تعضي بقت كلبة شيخ عووضة ؟ِ |
ضحكتنيني يا تيسير .. اها العرريب صحبي بتاع المؤووودة الهنااااك في بوست تاني يجي يشوف مجتمعنا بتاع ود المرااا
شفتي كيف يا قريبتي وشابكننا ود المرا شتيمة انا ود مرا ونص !!
| |
|
|
|
|
|
|
|
|
|
Re: ود المرَة .. (Re: تيسير عووضة)
|
تتوية العسل ...
ســـلامات ...
لو لاحظتي انو عقدة ( تربية النسوان ) دي عقدة شرقية صرفة ... لانو المجتمعات العربية والشرقية بصفة عامة مجتمعات ذكورية ....
برغم كل التطورات الحصلت في المجتمعات دي وانتقالها التدريجي من عصر الحرملك لعصرنا الحالي الاصبحت فيهو انجازات المراة تفوق الرجل احيانا ..
الا انو لسة في ناس بتتعامل مع المراة وكل ما يمت ليها بصلة بنظرة دونية كانها مخلوق من الدرجة التانية .. او حتى يمكن الرابعة !!! ...
يبقى شئ طبيعي انها تنظر للرجل الربتو امراة بدون وجود رجل كانو ناقص .. وتربية امه ليهو تصبح مسبة ومعايرة ..
افكار بالية وبائسة مزروعة بعمق في كتير من العقول ...
افكار جامدة اتصبت في قالب نمطي بليد .. وما عاوزة تكسرو وتتحرر منو ...
لغاية الان .. المراة بيقع على عاتقها النصيب الاكبر من التربية حتى في وجود الرجل ...
والزمن الفينا دة .. كتير من الاسر الرجل موجود فيها كصورة اجتماعية توهم الاخرين بالكمال ..وبتكون المرا هي البتذاكر للعيال .. وهي البتوديهم الدكتور لو مرضوا .. هي البتعمل السندويتشات الصباح .. هي البتقول دة صح .. ودة غلط .يعني الام هي العنصر الايجابي .. والمحرك لكل شئون الاسرة ..
مش دي هي الرباية ولا المقصود شئ تاني ؟؟!! ...
سبحان الله على اذدواج المعايير عندنا ...
البتربي امو يقولوا ليهو ود المرا !!!...
والبينجح ويبقى ذو شان .. يقولوا ليهو وراء كل عظيم امراة !!!
هسة نصدق ياتو واحدة في المقولتين ؟؟!! ...
ـــــــــــــــــــــــــــــــ
تحيات كتار للولد الشقي سعدون ..
بت سميرة ..المهرجان قرب يخلص ... وما جيتي ...
| |
|
|
|
|
|
|
|
|
|
Re: ود المرَة .. (Re: sanaa gaffer)
|
سونا ست الناس ..
دا شي طبيعي في مجتمعات بترفض كلياً فكرة
الـ Single Mother مع إنو شئنا أم أبينا يا سناء
معظم السودانيات هن عبارة عن سنقل مذر سواء كانت أرملة ودي كتيرة جداً
أو مطلقة ودي برضو كتيرة أو زوجها غايب (وعذرو معاه) ودي أكتر
الشي التاني إنو إنطبع في الأذهان ويمكن لأنو المصطلح زاتو غربي
وقد لا نجد ليهو مرادف دقيق بالعربي إنو السينقل مذر دي في الغالب
هي أم لطفل أو أطفال غير شرعيين ودا غلط طبعاً لأنو الكلمة زي ما عارفة
بتشمل أي واحدة (تنفرد) بتربية الأبناء والعبور بهم لبر آمن
بغض النظر عن الظرف الإجتماعي لتلك الواحدة ..
Quote: كتير من الاسر الرجل موجود فيها كصورة اجتماعية توهم الاخرين بالكمال ..
وبتكون المرا هي البتذاكر للعيال .. وهي البتوديهم الدكتور لو مرضوا ..
هي البتعمل السندويتشات الصباح .. هي البتقول دة صح .. ودة غلط .يعني الام
هي العنصر الايجابي .. والمحرك لكل شئون الاسرة ..
مش دي هي الرباية ولا المقصود شئ تاني ؟؟!! ... |
شفتي الوجود الصوري دا (مع كامل إحترامي للآباء) هو طوق النجاة
من مقولة يا ود المرة حتى لو الأب دا كان مابيعرف حتى ولدو في سنة كم !
Quote: البتربي امو يقولوا ليهو ود المرا !!!...
والبينجح ويبقى ذو شان .. يقولوا ليهو وراء كل عظيم امراة !!!
هسة نصدق ياتو واحدة في المقولتين ؟؟!! ... |
تصدقي الأولى طبعاً لأنو دا الحال ولأنها سودانية أكتر
وطلعت من أفواه سودانية وعكست واقع معاش
زيها وزي باقي العقد الفريد ناس المرة كان فاس
والمرة شاورها وخالفها وكدا ..
لكن التانية دي ماحقتنا حقت الخواجات
ونحن فقط قمنا بتعريبها وإستعمالها في عيد الأم وعيد المرأة !!
____________________
يا سونا أنا لي كم سنة ما جيت المهرجان بقى بايخ
أصلو العشرة سنين الأولى بس كان حلو
وسعدون بيسلم عليك وقال ليك تعالي لينا
وجيبي معاك خالتو منى الحلوة ..
| |
|
|
|
|
|
|
|
|
|
Re: ود المرَة .. (Re: تيسير عووضة)
|
يا سنوية ... انا من الاشياء البتزعجني كتير من اجناس الشرق الاوسط لما تتعرف بواحد وتقدملو كرتك او اسمك يقول "ابو .... مين " ... انا طوالي " ابو مها " .. يعاينو لي .. " ماعندك صبيان ؟ " .. "ايوه عندي صبي ؟" " اسمو مين ؟ " ضياء الدين " " اهو كدة يابو ضياء " .. وانا اكون عندها قد وصلت مرحلة من الغيظ شديدة " ياخي بقولك ابو مها " وبعدين في السودان نحن ما عندنا الحكاية بتاع ابوفلان وعلان ... وهاك يا مناقشات وفي النهاية " انت مش عايز "ابو" دي تكون اول الاسم اها انا ابو"بكر" و"بكر" لعلمك قبيلة عربية فيها صبيان وصبايا .. ما كفاك ؟؟.. بالله ناديني ابوبكر بس " .. اها دة الحال ربما احيانا يوميا ...." .. الغريبة اصحابنا الفلسطينيين ورغم جهاد المراة ونضالها عندهم هم اكثر الفئات تمسكا بها .....
مؤخرا ومن قرارتي انا ما في اي واحد يسبق اسمي باية شئ لا مستر ولا سيد ولا حضرتك .. حافي .. اورديحي زي ما سموني بيهو ...الهيلمانة لزوما شنو وكلنا هالك(هالكة بشان دينا ما تجي ناطة) وبن (وبنت بشان دينا ما تجي ناطة ) هالك (هالة وبرضو دينا ما تجي ناطة) ...انتي حكايتك شنو يا دينا يا بتي ؟؟خرعتي الرياييل ( كما تقول الاعراب ) .....شفتي كيف ياتيسير يابتي عالم ما تجي الا بالعين الحمرا ....
| |
|
|
|
|
|
|
|
|
|
Re: ود المرَة .. (Re: abubakr)
|
غايتو ..
ود الموية بس ..
يمسكوك بي جاي تزوغي بي هناك ..
ده كلام كتبتو زمااان .. في مكان ما .
يمكن بيشبه موضوعك ده ..
( ياخي جدك ده داير أصاحبو .. هتركون اللسان ده عندك وراثة !! ) .. :Quote: ربما كان ذلك ناموس الكون !! ..
يقوم الوجود في الأصل على هذه الفرضية ..
( الأم القائد ) - لاحظ كيف نذِّكّر صفة القيادة هنا - نحن الذكور المتثاقفة أعضاء المجمعات اللغوية - حكمة و الله !!!
يحضرني هنا لفظ يدغدغني كثيرا عند سماعه ( لشيء في نفس يعقوب .. أظن ) ..
ذلك لفظ ( Mother Nature ) الأفرنجي ..
الطبيعة الأم .. و يصادف ذلك في نفسي هوىً ( !!!!!!!! ) .
الطبيعة الأم .. عجيب هذا .. ومتوافق حد الجزل .
ثم .. تعال يا هشام ..
كيف نفسر سلوك الحيوان يسلم قيادة القطيع لأكبر أنثاه عمرا وحكمة ..
نعم ، حكمة اختبرها جمعُها طوال فترة حياتها ، و مخزونها التجريبي الكبير ..
يقال : أحكم من بومة .. ( لم يقولوا أحكم من بوم .. بل بومة .. أنثى ) .
و نحن نسب الشخص بالبوم الذكر فنقول : هااااا البوم إتّّ ( عجيب !! ) .
ينسحب ذلك السلوك الإجتماعي الأمومي المتقدم على : اللابنات .. و اللواحم .. و القممامات .. وذوات المنسر و المخلب .. وذوات الدماء الباردة .. و الحارة .. واللائي بين البين ..
الأنثى هي من يصطاد .. و من يطعم الصغار .. ومن يعلمهم فنون الصيد .. ومن يلعق جراح الصغار .. و من .. ومن ..
طيب ..
أين هو ( الضكر ) في هذه المعادلة ؟..
إليك هو :
كسول .. ينام تحت الشجرة أو فوقها ( سيان ) .. يختلق الحروبات الصغيرة .. و( يهرش إنتاياتو ) .. ثم يتخير أحلاهن و أصغرنهن عمرا ليعاشرها ( هلا هلا .. فحل و الله ) ..
و يكون أول من يقضم من فريسة الصيد ( مسخرة ) !!
لا يُسأل الذكر - عند الحيوان - عن مواسم الهجرات ...
ولا يُفتى في اختيار مكامن القنص الجديدة .. ولايُأبه له عند اختيار ( قائدة ) للقطيع أو المجموعة ..
هو فقط ( دَلَمه ) .. و ( طيره و مبارية السيرة ) ..
يتناسل .. يأكل .. ينام .. يُنفى عند شيخوخته أو عند هزيمة ذكورته ( الفالصو ) عند بروز أول ( فتوة ) بصوتٍ أعلى و مكياجٍ أضل ..
و تظل الأنثى هناك .. دورها لم يتغير .. حكمتها في البقاء وسط طغيان ( قانون الغاب ) ذاك تظل ميزانآً عدلآً تحفظ نسل فصيلها .. و تحافظ على توازن ( الطبيعة الأم ) ..
أما صاحبنا ( الضكر ) ..
حلوووو .. قياااااااافه .. نبّااااااااح .. و كضااااااااب .
فالثابت أن الذكر - و ما زلنا في عالم الحيوان - أجمل من الأنثى ،،، تخيل !!!؟
عُرف مهيب .. ذيل ملونٌ فخيم .. " لعلوع " أو " علعول " أحمر قاني .. صوت جاذب - زعيقاً أو غناء - ألوان لازوردية و أرجوانية لأعضاءه التناسلية .. جسد عملاق ( معضّل ) ..
و شوية شنكبات فشنك عندما ينازل ذكراً آخر .. و بس .
أقول ..
الإله الخالق العظيم اختط هكذا نهجٌ لحيوات مخلوقاته في الكويكب الأتعس هذا ..
هذا الهارموني المتسق ..
الإنسان هو ( حيوان ناطق ) .. لسؤ حظه ..
وناطقٌ هذي هي أُس البلاء ..
فهو يعقل الأشياء .. و يطوّر ملكاته القادرة .. و غيرها .
و منها ملكة التفكير .. و النطق بأفكاره - وليته لم يفعل -
الإنسان الضكر فنان ( ملحوظة : الفنان هو من يرتكب الخيال .. ويبيعك الحلم في سوق الحقيقة ) فنان كبير في تزيين و مكيجة و تلوين و نفش و تضخيم أشياؤه - طبيعتو المسكين .. يسوي شنو ؟؟ - ..
فكر .. فـ .. نطق : دُووووول كذبته الكُبرى : أنا ..
( هذه الأنا التي سحرت الأنثى ألوانها و زيف و كبر حجمها .. )
نطق بها : أناااااااااا
و نطقها إفكا ..
و ( لخبط و جاط ) معادلة الوجود الجميل ..
و بقى ( هذا المنفوش حمبوكة ) هو الآمر الناهي .. - بقدرة قادر -
و ( ذكّرنا ) ثوابت الوجود و كيمياء معادلته المنضبطة ..
( مسبة كُبرى هي أن يقال لشخص : عامل فيها ضبان ضكر ) .. تأمل !!
الله أقام ناموسه الأمومي بحكمة الخلق .. و دراية الصانع بخبايا صنعته ..
و قامت على ذلك القسط العادل كافة المجتمعات الأُوَل .. إنسانها و الحيوان ..
قامت في أصلها الخيِّر أمومية ..
( أصل الوجود هو الخير المطلق .. لأن الإله صانعه هو المطلق في صفاته ) ..
فأبدلناها نحن .. أبوية / ذكورية
( أُبوبية بالبلدي ) .. بوبية ..
و بوبي هو لفظة تدليل للكلب . |
إر أندادي قِجِر كونا .. تيزير !!؟
| |
|
|
|
|
|
|
|
|
|
Re: ود المرَة .. (Re: abubakr)
|
سلام للجميع
اول بالتبادي ياتيسير عشان دي
| Quote: ياخ إنت زول جميل فعلاً |
هاك دعاء ام لابنها كارب ومتقن وشامل ( الكمدا بالرمدا)
يتجَمّلن ايامك
تانيا ياستي الامنتي ليك
ودامو ده
ولانو الواحد بالاضافه لأنو ترباية مره فرومAتوZ هو برضو ود شوارع الحله شفتي كيف ومن الشارع بنتعلم زي ما قالوا ناس ساورا وشاعرهم ، يعني زمان نحن في الحله ونحن اولاد حله خُلص من نوبه وزنوج وبجه وحلب كنا بنعلب كوره وشدد والرمه والحراس وكديس مين نطاك ..الخ ودي لعبات جماعيه شكلا ومضمونا ، لمن تجي او يجي ام او اب (اوفر كير)تنادي ولدا من نص اللعب وده يتكرر... اها هنا اولاد الحله بطلعوا فرمان معروف انو الولد ده ود امو ساي بمعنى انو نحن لمن نتقسم لفريقين وبموازنات دقيقه -خلي بالك- مش سمبله ساي يجي الزول ده ينادوه من نص اللعبه ده ينسف استقرار اللعب وبالتالي استقرارنا من جذورو ، بعد الفرمان ده الزول ما بدقها معانا تاني يعني يجلس في بيت امه وابيه ، ثم انو ومن ناحيه اخرى-منادة الام او الاب لابنه دون سبب وجيه- ده بيرسل مسج من الاب او الام في انو نحن اولاد مطاليق ساي وما حاملين مسك وكده...، وده تجني ما بعده تجني ، حيث اننا كحال جميع اولاد الحله نقوم بواجباتنا المدرسيه، والاسريه من مراسيل(اخخخ من المرسال) وخلافو خير قيام ، اسي نحن غلطانين –وانا هنا بتكلم بضمير ود الحله- الام او الاب اسهمو في هذا التنميط الظالم لابنهم بخوفم المرضي عليهو ،
يعني نضمي ده كلو ما يستفاد منو انو طريقة التربيه عندها علاقه بتكريس هذا –التنميط بهذا المعنى-
يعني داير اقول ودامو ممكن تكون وصف لحاله أكثر من كونها للأسباب الجبتيها والتي تدور حول غياب الاب بمسبب ما .
اما فيما يخص البحث عن جذور ودامو – الشتيمه- ولماذا لم تكن ود ابو لوصف ذات الكيس الشرحتو فوق ، ده لانو المجتمع فعلا ذكوري وما ينتجه من لغة يتواصل ويتوسل بها في شرح احوالو بتعبر عن هذا المجتمع ، فما يراه لايليق اجتماعيا – وقد يكون محق- يدبجو بلغه تحط من شأنه وهل انكى – بالنسبه لهذا المجتمع الذكوري- بأن يوصف احد افراده بأنو ود امو ساي والغريب ومن نفاج تاني لشكر النساء تكون بت ابوا شفت كيف ؟؟ او بالاحرى شفنا كيف كلنا ؟؟
غايتو ياستي ده البياض بتاعي في ودع موضوعك ده ولو حمدني تاني واصلا حيحمدني بجيك
برضو احيك
حاجه اخيره
Quote: اها العرريب صحبي بتاع المؤووودة الهنااااك في بوست تاني يجي يشوف مجتمعنا بتاع ود المرااا
شفتي كيف يا قريبتي وشابكننا ود المرا شتيمة انا ود مرا ونص !!
|
سلام يا باشمهندس داير تفتح الحرب في جميع البوستات وشغال مكائد جندريه للزعيم داير تألب عليهو
الكنداكات ، ايواااا بتلعب على نقاط ضعفوا... لكن شبه لكم، نحن منفقلين عينا زي الريال هنا وهناك...
| |
|
|
|
|
|
|
|
|
|
Re: ود المرَة .. (Re: محمد أحمد محمود)
|
Quote: سلام يا باشمهندس داير تفتح الحرب في جميع البوستات وشغال مكائد جندريه للزعيم داير تألب عليهو
الكنداكات ، ايواااا بتلعب على نقاط ضعفوا... لكن شبه لكم، نحن منفقلين عينا زي الريال هنا وهناك... |
يابنات دة طابور خامس للعرريب "ناس المؤوودة "
ديرو بالكن !!!!
| |
|
|
|
|
|
|
|
|
|
Re: ود المرَة .. (Re: محمد أحمد محمود)
|
يا محمد أحمد ..
Quote: هاك دعاء ام لابنها كارب ومتقن وشامل ( الكمدا بالرمدا)
يتجَمّلن ايامك |
تسلم يا سيدي على الدعاء اللطيف دا وجمعاً قول آمين
Quote: لمن تجي او يجي ام او اب (اوفر كير)تنادي ولدا من نص اللعب وده يتكرر...
اها هنا اولاد الحله بطلعوا فرمان معروف انو الولد ده ود امو ساي
بمعنى انو نحن لمن نتقسم لفريقين وبموازنات دقيقه -خلي بالك-
مش سمبله ساي يجي الزول ده ينادوه من نص اللعبه ده ينسف استقرار اللعب
وبالتالي استقرارنا من جذورو ، بعد الفرمان ده الزول ما بدقها معانا تاني
يعني يجلس في بيت امه وابيه |
كلامك دا مهم جداً لأنو بيوضح لأي مدى مفروض ندي للطفل مساحة بتاعة حرية
تساعد في إستقلال شخصيتو, الحاجة التانية في تربية الولد بالذات
ويمكن لأنو بيكون إحتكاكو أكتر بالعالم الخارجي (الشارع وكدا زي ما قلت)
لازم على الأب والأم أو حتى الأم بس (في حال إنها كانت براها) إنهم يراعوا
لمشاعر الطفل دا قدام أصحابو ودي حتة حساسة جداً وبناء شخصيتو كرجل
بيبدا من الأشياء الزي دي ودا طبعاً ما بيعني إنو يتركوا ليهو الحبل سايب
ويخلوهو يعمل أي شي زي الأولاد التانيين بإفتراض إنو ما أي حاجة بيعملوها
أصحابو معناها صاح .. توجيه الطفل وتنبيهو أو حتى مناداتو من نص اللعب
بطريقة غير لائقة بتحرج الطفل جداً وبتحولو لزول ضعيف وأصحابو بيبتدوا
يتندروا عليهو و يعزلوهو بسبب إنو زول ما عندو إستقلالية
وما مضمون في اللعب
Quote: طريقة التربيه عندها علاقه بتكريس هذا –التنميط بهذا المعنى-
يعني داير اقول ودامو ممكن تكون وصف لحاله أكثر من كونها للأسباب الجبتيها
والتي تدور حول غياب الاب بمسبب ما . |
دي برضو واردة بكثرة لكن في الحالة دي الأهل مسؤولين
عما يمكن إنو يسئ لولدهم بسبب التربية الخطأ
أما في الحالة الأولى الأب والأم بيحاولوا إنهم
يقوموا بواجبهم على أكمل وجه وبما تتيحه الظروف
لتصبح هذه الظروف نفسها مسبّة للأبناء ..
| |
|
|
|
|
|
|
|
|
|
Re: ود المرَة .. (Re: تيسير عووضة)
|
تعرف ياعماد ..
الام عند الارضة ال Termite هي الكل في الكل وحجمها حاجة هجامة كدة مقارنة باحجام الرجال والعساكر الشغاليين ياكلوها ويولدوها طول اليوم...يعني جنس ارضة راجل ما يقدر يقول بغم ....او يقول يا ود المرا بقصد المعايرة ...
انا فجاءة لا حظت انو عندي لازمة برددها طول اليوم وفي الشغل وحتي الاجتماعات وفي اي مكان " ووووو يو " يعني زي ما عارف " يا يمة " ..اللازمة دي بتجي كدة براها وحيث ان الذين حولي دائما ما بيرنطو بيعاينو لي شذر مذر وانا برضة "ووووو يو "....
| |
|
|
|
|
|
|
|
|
|
Re: ود المرَة .. (Re: abubakr)
|
Quote: كدى ال يجى اى راجل داخل هنا ويقول انو ما ود مرا ؟؟؟؟؟
بعدين بنتفاهم !!!!!!!!
دى بسموها فى العلوم الحقايق وفى الرياضيات المعطى !!
لا تقبل الجدل ولا الافتراضات |
شغل نضــيف!
____
كيفك يا تايسا..
حلاتها تربية النسوان
خليط من الحنّية .. والعين النجيضة وحمرا..
____
التربية المعولقة لا ترتبط بنوع المرّبي..
وليس لرجل أو إمرأة عصا سحرية يهزوها (وهم مبحلقين في التلفزيون مثلا)..
فتحيل العيال لبني آدمين مسؤولين وأصحاء..
وانما hard work ..
فقط..
| |
|
|
|
|
|
|
|
|
|
Re: ود المرَة .. (Re: نجوان)
|
إزيك يا نجوان ..
Quote: حلاتها تربية النسوان
خليط من الحنّية .. والعين النجيضة وحمرا.. |
ناس كتير بيقولوا لما كنا صغار أمنا كانت (بتهرشنا) أكتر من أبونا ..
تعجبني الأم الحنونة لكن حازمة
وأغرب أم هي التي تقول: إستنى لمن أبوك يجي !!
طيب إنتي دورك شنو؟
Quote: التربية المعولقة لا ترتبط بنوع المرّبي..
وليس لرجل أو إمرأة عصا سحرية يهزوها (وهم مبحلقين في التلفزيون مثلا)..
فتحيل العيال لبني آدمين مسؤولين وأصحاء..
وانما hard work ..
فقط.. |
| |
|
|
|
|
|
|
|
|
|
Re: ود المرَة .. (Re: تيسير عووضة)
|
باختصار يا تيسير
لولا ان اولاد السودان اولاد مرة لما نجح ولا فلح احدا!
لوترك اولاد السودان آبائهم لما فلح احد!
والدتى امية وكانت تتبعنى الى المدرسة وكنت اذا اخطات تصحينى من النوم لتضربنى!
لولا حزم الامهات لضاع كل ابناء السودان
انى شديد الاعتداد بانى ود مرة وتربية مرة!
وياليت كل الامهات مثل امهات السودان!
الأم مدرسة اذا اعددتها اعددت شعبا طيب الاعراق
اغلب الذين خلت حياتهم من الام او دورها يعانونق من القلق والاكتئاب والتوتر بسبب فقد حنان الام وتطمينها وهدهدتها!
رحم الله من قال
ليست هنالك وسادة انعم من حضن الام او وردة اجمل من ثغرها!
قاعد بعد الايام امى اطال الله عمرها لزيارتى الشهر القادم وزوجتى لاتسعها الفرحة لان امها ايضا معها منذ فترة!
الجنب امو ما فى حاجة تهمو!
ترفى يا تيسير
انا زمان فى الحلة اسمى ود الشايقية لعلهم يقصدون القبيلة ولكنى كنت سعيدا لانى امى مشلخة!
احب القصائد الى نفسى هى قصيدة احن الى خبز امى لمحمود درويش
تعرف يا تيسير ود المرة دى بقولوها للولد عندما لا يكون صعلوك وبتاع مشاكل
احمدالله انى ود مرة لى هسة ما بعرف الواحد بمسك من وين عشان يشاكل!
امد الله فى ايام ابى ومتعه بالعافيةفقد اتاح لوالدتنا تربيتنا لثقته فيها ولغيابه بسبب العمل فى مناطق خلوية لا توجد بها مدارس!
تربية امة لى ساهمت كثيرا فى اختيارى لى اصدقائي ومن منا خلت حياته من تاثير والدته وما ابأسها من حياة ان خلت!!
رجل الصناعة الامريكى لى لاكوكا ذكر ان والده قال له :
My father always used to say that when you die, if you've got five real friends, you've had a great life.
بجيك راجع كان الله مد فى الايام
جنى
جنى
| |
|
|
|
|
|
|
|
|
|
Re: ود المرَة .. (Re: jini)
|
| Quote: لولا ان اولاد السودان اولاد مرة لما نجح ولا فلح احدا! |
Quote: والدتى امية وكانت تتبعنى الى المدرسة وكنت اذا اخطات
تصحينى من النوم لتضربنى! |
| Quote: لولا حزم الامهات لضاع كل ابناء السودان |
كلامك عجبني شديد يا جني
وبأمّن على أي سطر كتبتو ..
الأم السودانية واعية وصبورة جداً ..
وأعتقد الصفتين ديل هم مفاتيح التربية الصحيحة
ومن زمن حبوباتنا رغم إنهم ما إتعلموا بالشكل الكافي
أو ما إتعلموا أصلاً لكن بنجد في كمية من الوعي والصبر
تكفي لأن تجعل المرأة تدير بيتها وحياة أبنائها ووالدهم
بالشكل الصحيح وتربيهم على كتير من القيم والمبادئ
ما حا يتعلموها في أي مكان ..
كتير جداً بقعد مع حبوبتي واللي برضو كانت أمية
وتحكي لي عن رحلة حياتها مع أبنائها وتربيتهم
ومنو أكتر واحد تعبها وكيف قدرت تتعامل في كتير من الأمور بحكمة
قد لا تتوفر على ايامنا هذه حتى لمن أوتيت من العلم كثيراً !
و برضو رحم الله من قال:
تربية الطفل تبدأ قبل ولادته بعشرات السنين .. وذلك بتربية أمه !!
وجاياك تاني لدرويش ..
| |
|
|
|
|
|
|
|
|
|
Re: ود المرَة .. (Re: تيسير عووضة)
|
أحن إلى خبز أمي
وقهوة أمي ..
ولمسة أمي ..
وتكبُر فيّ الطفولة
يوماً على صدر يومِ
وأعشق عمري لأني
إذا مت ..
أخجل من دمع أمي ..
خذيني، إذا عدت يوماً
وشاحاً لهدبُك
وغطي عظامي بعشبٍ
تعمد من طهر كعبك
وشدي وثاقي .. بخصلة شعر
بخيط يلوح في ذيل ثوبك ..
عساني أصير إلهاً
إلهاً أصير ..
إذا ما لمست قرارة قلبك ..
ضعيني، إذا مارجعت
وقوداً بتنور نارك ..
وحبل غسيل على سطح دارك
لأني فقدت الوقوف
بدون صلاة نهارك
هرمت، فردي نجوم الطفولة
حتى أشارك صغار العصافير
درب الرجوع لعش إنتظارك ..
| |
|
|
|
|
|
|
|
|
|
Re: ود المرَة .. (Re: تيسير عووضة)
|
سلامات يا تيسير(أخونا الزمان بعد تحديد الهوية والنوع)
عندما ينادى أحدهم آخرا ب(يا ود المرة) ويقصد بذلك إساءته أو الحط والإنتقاص من قدره يكون قد كشف دون أن يدرى
عن نوع العقلية التى يعيش بها وهى غالبا عقلية ذكورية ناقصة تعتقد أن المرأة تكفيها مذمة إنها خلقت إمرأة!!!
وحينما تقال هذه العبارة ويقصد بها السلوك أو التصرفات التى تبدر من أحدهم أو طريقته فى التعامل فهى تكون أصلا
عبارة مغلوطة وإستعمالها هنا فى غير محله!!!
هنالك أحد المفاهيم بأن أثر غياب الرجل على تربية الأبناء الذكور تحديدا قد يترك بعض الآثار الجانبية وأحدها ان
يكون ألصبى أُنثوى السلوك والتصرفات ولكن هذا ليس بقاعدة ثابتة وإنما حالة قد تحدث أو لا تحدث ولكن إرجاعها فقط
لتربية الأم خطأ كبير لأن أسبابا أخرى كثيرة قد تتوفر دون الإنتباه إليها مما يزيد المشكلة تعقيدا!!
النظرة المنقوصة للمرأة موجودة فى كل الثقافات ودائما ما نسمع عن ثورات نسائية تطالب بحقوق ضائعة رغم تقدم العصر
ووصول النساء لكل ما يمكن أن يصل إليه الرجال على قدم المساواة ولكن لاحظت إزدياد حالة العداء للنوع الذكرى من بنى
البشر عند معظم النساء اللاتى أخذن على عاتقهن عبء الدفاع عن الحقوق المسلوبة والمناداة بمعاملة أفضل ونظرة يملؤها
الإحترام أولا وآخرا, من لم يحترم أمه أو أخته أو زوجته ونظر إليهافقط من الجانب المظلم من العقلية فهو أصلا يعانى
خللا ما ويجب مراعاة ذلك عند التعاطى معه وعدم النظر إلى الجميع نفس النظرة والإعتقاد بأنهم جميعا يعانون من العقدة
نفسها!!!
Quote: عشان يجي واحد بعد كم سنة يديها كف في وشها لما يقول لبتها ولا إبنها
يا ود المرة ..
يا ود أمو ..
يا تربية النسوان ! |
فى فهم البعض الخاطئ, وعند ذكر أى من تلك العبارات ه يكون قد توفر لها بعض الأسباب وفى النهاية هى فى الأصل مفاهيم متخلفة
وغالباما تكون نتاج النشأة فى بيئة محددة تتحكم فيها عقلية الذكور حتى وإن كانوا ينامون داخل البيوت وتخرج المرأة لتزرع
وتحصد وترعى وتسقى الجميع ويعتقد الرجل أن دوره فى الحياة قد يحين عندما يأتى الليل أو حين يهاجمهم الأعداء أما دون ذلك
فكله مربوطابتلك الأخرى التى كتب عليها أن تقوم بكل تلك المهام زيادة على مهماتها الطبيعية التى قد تكون قاتلة مثل الولادة وتبعاتها وما قبلها,,
ود المرة عبارة ترتبط فى ذهنى دائما بأنها إحدى العبارات النسائية البحتة ولم أسمع الرجال يتنادون بها وفى ألغالب
لا يكون المقصود بها أم الشخص رغم ورودها فى الصياغ وإنما سلوكه الآنى,,,,فقد سمعتها كثيرا من إحدى جداتى تناكف بها
الجميع حتى أولادها وأحفادها دون أى قصد بالإساءة فعليا!!
من لم يفخر بأمه وإنتمائه لها بغض النظر عن وجود والده أو عدمه فليفخر إذا لم يوجد ما يمنع فالأم أم.. ورباطنا بها مقدس
ومنه يجب أن تقتبس المقاييس لمعاملة الأنثى بنتا كانت أو زوجة أو زميلة أو إمرأة تسير فى حال سبيلها فى طريق ما!!
Quote: وأعرف أيضاً نساءً ورجالاً تلامس جباههم سحاب السماء علماً وعملاً
وكانوا جميعهم ( تربية نسوان) |
الطبيعى فى تكوين الأسرة أن تكون بكامل مكوناتها أب وأم وأبناء وبغياب أحد أعمدتهالأى سبب كان يصبح الأمر منقوصا فالحياة
قاسية وتزيد قساوتها أحيانا المفاهيم الغبية الخاطئة وكل المكونات عرضة للغياب أو عدم التوفر زوجةأو زوجاأوأولاد!!
بغياب أى عنصر تسير الحياة قدما للأسوأ أو الأفضل حسب ما كتب لها ولكن يكون ذاك الغياب ذو أثر قد يكون ظاهرا أم خفيا
ولكنه لابد موجود فى مكان ما داخل حلقة تلك الأسرة!!!فإذا سارت الأمور رغم غياب أحد الأعمدة يشبه ذلك إكمال مباراة بعدد
أقل من اللاعبين والفوز فيها وهو أمر وارد ولكنه يحتاج لجهد أكبر لتغطية الفراغ الذى تركه اللاعب الغائب و(الغايب عذره
معاه)
Quote: الزول ده ود رجال,,
والبت دى بت رجال,, |
وصف ليس فيه ماينقص من المرأة والأم إذا لم نتفق فيما يمكن أن يضيف إليه أو إليها ولكن قطعا يوجد أكثر من ود المرة هذا
التعبير الهش إذا وددنا إساءة أحد ودونك القواميس كلها!!!
Quote: يعني شنو يا ود المرة
وهل هي شتيمة |
شتيمة لمن أرادها شتيمة فقط!!
النفس البارد مهم فى بعض الأمور
| |
|
|
|
|
|
|
|
|
|
Re: ود المرَة .. (Re: أيمن الطيب)
|
Quote: عندما ينادى أحدهم آخرا ب(يا ود المرة) ويقصد بذلك إساءته
أو الحط والإنتقاص من قدره يكون قد كشف دون أن يدرى عن نوع العقلية
التى يعيش بها وهى غالبا عقلية ذكورية ناقصة تعتقد أن المرأة
تكفيها مذمة إنها خلقت إمرأة!!! |
دي إسمها إذا (بليتم) فاستتروا ..
يعني أنا كان الله إبتلاني بي عقلية زي دي
بسكت ساي عشان السترة و الفضيحة متباريات زي ما بيقولوا ..
بدون شك وجود الرجل مهم في حالة وجود أبناء ذكور
وأنا قصدت أكتب رجل ما أب لأنو في حالات عدم وجود الأب
فإن الخال/ العم/ الجد كلهم ممكن يعملوا balance
عشان حكاية الآثار الجانبية القلتها دي
أنثوية التصرفات أو السلوك دي شغل إنتيرنال وإكستيرنال زي ما بتعرف
وقد تشكل الظروف المحيطة عامل مساعد لكن أكيد ما عامل اساسي ..
بعدين يا أيمن ياخي المدافعة عن الحقوق القلتها دي
ما بالضرورة يصاحبها إستعداء للطرف الآخر لأنو ما كل
حقوق النساء ضيعها الرجل في حقوق ضيعتها النساء نفسهن
وأنا موضوع المساواة دا زاتو عندي فيهو راي
وراي كبير جداً (بس هسي دا ما محلو)
Quote: ود المرة عبارة ترتبط فى ذهنى دائما بأنها إحدى العبارات النسائية البحتة
ولم أسمع الرجال يتنادون بها وفى ألغالب لا يكون المقصود بها أم الشخص
رغم ورودها فى الصياغ وإنما سلوكه الآنى,,,,فقد سمعتها كثيرا
من إحدى جداتى تناكف بهاالجميع حتى أولادها وأحفادها
دون أى قصد بالإساءة فعليا!! |
طيب قد لايكون مقصود بيها أم الشخص مباشرة بل مقصود سلوكه الآني
والعبارة بكل بساطة بترجع السلوك الآني دا لأم الشخص
الغير مقصودة بالكلام دي يبقى برضو في نهاية راس السوط لحقا ولا ما غلط؟
زي ما قلت فوق أنا ما قصدت الجانب المرح من الكلمة
أنا قصدت الجانب السئ لأنها صادفتني في سياق سئ
ولو داير تسمعها إنت برضو في سياق سئ أرخي أضانك
شوية في بنبرنا دا وأدي ربك العجب ..
Quote: بغياب أى عنصر تسير الحياة قدما للأسوأ أو الأفضل حسب ما كتب لها
ولكن يكون ذاك الغياب ذو أثر قد يكون ظاهرا أم خفيا
ولكنه لابد موجود فى مكان ما داخل حلقة تلك الأسرة!!!
فإذا سارت الأمور رغم غياب أحد الأعمدة يشبه ذلك
إكمال مباراة بعدد أقل من اللاعبين والفوز فيها
وهو أمر وارد ولكنه يحتاج لجهد أكبر
لتغطية الفراغ الذى تركه اللاعب الغائب |
كلام زي الورد ودا خلاصة البوست بتاعنا دا ..
أما بالنسبة لـ
| Quote: سلامات يا تيسير(أخونا الزمان بعد تحديد الهوية والنوع) |
فإننا ندين ونعترض ونندد ونشجب
عدم مناداتكم لنا بـ (اللخو)
والنسى قديمو الترابة دي في خشمو ..
| |
|
|
|
|
|
|
|
|
 Re: ود المرَة .. (Re: تيسير عووضة)
|
تيسير عووضة (بت المرة)
من اللحظات البسيطة جدا الواحد يجي داخــل يلقى ليهو كلام في المليان وفي الصميم
للاسف الشديد ناس كتار جدا .. تقري ليهم مداخله الواحد يا الواحده يدوك احساس انهم بيعرفوا اي حاجة في الدنيا دي .. وانهم نصيرين اي حاجة ..
وفي حتات كدا تلقيهم عاملين ما شايفين .. وسادين دي بي طينة ودي بي عجينة ..
ودا الشئ المحبط دائما.. والمخجل
من يدرك قدر الأم .. ومكانته صدقيني .. لسانو بينعقد لما يفكر يطلع كلمة صغيرة في حق اي أم..
الله يخليك لي امك يا تيسير
الشجاعة دي ما الواحد يولع ليهو نار ويدخل تحته ..
وما الواحده تجي تتفاصح وتتفلسف وتقول ليها كلام خارم بارم .. الشجاعة المواقف الزي دي ..
الام والابو ديل نختهم هنااااك وبعداك نعمل فيها فلاسفة ومنظراتيه .. واصحاب مبادي .. عشان يجو المخمومين الباقيين يصفقوا لينــا ..
ملحوظة:
أول مرة اشوفك جـــاده ..
مالك ؟ إنت عيانه واللا شنـو؟
| |
|
|
|
|
|
|
|
|
|
Re: ود المرَة .. (Re: tmbis)
|
تمبس ..
في أشياء كتير الزول بيحاول يبعد
من إنو يدلو بدلوه فيها (حلوة دي مش) لسبب بسيط جداً
ودي قناعة خاصة بي أنا إنو حاجات كتيرة في الدنيا دي (نسبية)
حتى الصاح والغلط بيعتبرو شئ نسبي .. بمعنى إنو
الأنا شايفاهو صاح عند زول تاني ممكن يكون غلط
والأنا شايفة إنو غلط كبير عند زول تاني ممكن يكون عادي
لكن في حاجات بتعتبر عند الكل (ثوابت) ومحاولة النيل منها
أو المهابشة فيها بتعتبر قلة (أي شئ) ..
وتسلم يا علاء على وعيك ..
ملحوظة برضو
Quote: أول مرة اشوفك جـــاده ..
مالك ؟ إنت عيانه واللا شنـو؟ |
أيوة ..
عملت عملية (فتاق) 
| |
|
|
|
|
|
|
|
|
 Re: ود المرَة .. (Re: تيسير عووضة)
|
تيسير
كل الاحترام
هنالك الكثير من المفاهيم الخاطئة
ناتجة من تراكمات عصور من القصور
الذهنى حسب التقاليد والفهم الاجتماعى
وحتى من يدرك ويفهم ذلك يصعب علية تغيير
هذة التراكمات التى اصبحت مسيطرة على تكوين
شخصيتةوفهمة، برغم ايمانة العقلى بغير ذلك ....
كل الود
| |
|
|
|
|
|
|
|
|
|
Re: ود المرَة .. (Re: معاوية الطيب)
|
معاوية العزيز ..
مافي تغيير بيجي بالساهل
زي ما المفاهيم الخطأ إتولدت تدريجياً وتراكمت
التغيير برضو بيكون تدريجياً وفي شكل بتاع Replacement
كدا بنضمن نتايج معقولة
تغيير العقل الجماعي أمر صعب جداً
لكن الأسهل لما كل فرد يعرف ويحدد إنو في خطأ
في مكان ما ويبتدي يصحح الخطأ دا
وأهم من كدا إنو يوائم بين عقلو وتصرفاتو
ويترجم التفكير السليم لسلوك سليم
كل المودة ,,
| |
|
|
|
|
|
|
|
|
|
Re: ود المرَة .. (Re: تيسير عووضة)
|
تيسير ....
ود المرا .. ود أمو .... عجب أمو .... تربية النسوان .....
تعرفي أخوك بكل فخر (تربية مرا) .. توفي والدنا وأنا صغير لم أعرفه، تصدّت الوالدة - الله يديها العافية - للمهمة الصعبة. ومن المواقف التي أذكرها جيداً أني إذا أتيت شيئاً يستوجب التعنيف .. تنظر إلى وتقول (سمح كتّر خيرك ..... سوّي الدايرو .. حيقولوا شنو؟ حيقولوا تربية مرا) .. طبعاً كان أهون علي أن تعنّفني أو حتى تضربني من قولها هذا الذي يقصد منه أنها فشلت في التربية.
من أقوالهم:
كان بقت فاس ما بتشق الراس 
| |
|
|
|
|
|
|
|
|
|
Re: ود المرَة .. (Re: محمد أبوالعزائم أبوالريش)
|
محمد أبوالعزائم ..
Quote: تعرفي أخوك بكل فخر (تربية مرا) .. توفي والدنا وأنا صغير
لم أعرفه، تصدّت الوالدة - الله يديها العافية - للمهمة الصعبة.
ومن المواقف التي أذكرها جيداً أني إذا أتيت شيئاً يستوجب التعنيف ..
تنظر إلى وتقول (سمح كتّر خيرك ..... سوّي الدايرو .. حيقولوا شنو؟
حيقولوا تربية مرا) .. طبعاً كان أهون علي أن تعنّفني أو حتى تضربني
من قولها هذا الذي يقصد منه أنها فشلت في التربية. |
كلامك دا وضح الحاجة الأنا قاصداها بالضبط ..
بس نعمل شنو مع ناسنا المفروض زي والدتك دي تتكرّم
على العملتو (ربنا يديها الصحة) ..
مش تلقى نفسها عرضة في لحظة للحساب
بواسطة الحيقولوا ديل ..
يا عزيزي كلنا كنساء مع والدتك في مركب واحدة ..
| Quote: كان بقت فاس ما بتشق الراس |
أها شوف جنس دا
| |
|
|
|
|
|
|
|
|
|
Re: ود المرَة .. (Re: تيسير عووضة)
|
سلام تيسير
اعتز باني ود مرة وتربية أمرأة عظيمة
هي امي العزيزة نورة عبد الله ادريس المشهورة بنورة بت بعنيب ..
واحب القابي لنفسي هي عادول ود نورة ..
لك تحيتي ...
| |
|
|
|
|
|
|
|
|
|
Re: ود المرَة .. (Re: تيسير عووضة)
|
سلام تيسير
اعتز باني ود مرة وتربية أمرأة عظيمة
هي امي العزيزة نورة عبد الله ادريس المشهورة بنورة بت بعنيب ..
واحب القابي لنفسي هي عادل ود نورة ..
لك تحيتي ...
| |
|
|
|
|
|
|
|
|
|
Re: ود المرَة .. (Re: Abdel Aati)
|
عادل عبد العاطي ,,
إزيك ..
ألف رحمة ونور تنزل على الوالدة نورة بت بعنيب
ولا شئ يجبر بخاطر الأم مثل إبن يبرّها ويعتز بها ..
وزي ما بتقول إنتا زاتك:
أنا عادل ود نورة بت بعنيب وحرّم ما بسوي العيب
| |
|
|
|
|
|
|
|
|
|
Re: ود المرَة .. (Re: تيسير عووضة)
|
Quote: أيوة ..
عملت عملية (فتاق) |
والله سلامات يا اخونا الزمان,,,,أبلسانا أطول من البال
إنت فتاق وتمبس زايدة الله يعجل باشفاكم إنشاء الكريم,,
يا تمبس,,,,,,,,,,,,
ماسورة على الماشى لسعادتك,,,,,,أضحك الله سنّكم
ياخ ما تخليكم جادين شوية مرة واحدة فى حياتكم
| |
|
|
|
|
|
|
|
|
|
Re: ود المرَة .. (Re: أيمن الطيب)
|
| Quote: إنت فتاق وتمبس زايدة الله يعجل باشفاكم إنشاء الكريم,, |
أيمن دقيقة بس ..
أنا زايدة وتمبس فتاق .. فتااااق ..
حتى أسألو ..
| Quote: ياخ ما تخليكم جادين شوية مرة واحدة فى حياتكم |
أب سن
وباقي الكلام أنا بحول المكرفون لتمبس ..
| |
|
|
|
|
|
|
|
|
|
Re: ود المرَة .. (Re: تيسير عووضة)
|
سلامات يا تيسير..
كدي في الأول نصحح ليك مفهومك عن العبارة.. "ود المرة" تعني أن "أبوك مرة وليس رجل".. وذلك شيء مسيء جدا في الثقافة السودانية والعربية والأفريقية أيضا..
أما إذا كان الرجل عظيما فلا يجد السودانيون بأسا من تسميته بأمه.. فأهلي الأنصار يندهون المهدي بقولهم "يا أب زينب ويا ود زينب" وهذا تراث صوفي.. وهناك من الشيوخ الصالحين من سار عليهم إسم أمهاتهم مثل "ود أم مريوم" والشيخ العبيد ود رية الما بسوَّي النيَّة" شوفتي كيف؟؟
هذا لا ينفي أن هناك إحتقار للمرأة في الثقافات السودانية..
شكرا يا زولة..
ياسر
| |
|
|
|
|
|
|
|
|
|
Re: ود المرَة .. (Re: wd al geran)
|
ود الجيران،
| Quote: بلاي هناك إحتقار للمرأة في الثقافات السودانية؟! .. حاجة غريبة! |
ما قصدته بأن الثقافات السودانية فيها إحتقار للمرأة واضح ويختصره مثل شهير "المرة كان بقت فاس ما بتكسر الراس" وقول آخر "المرة مي جردل" [هل تعرف ماذا يعني القول بأن المرأة جردل؟].. هذا ما قصدته باحتقار المرأة.. أما التقليل من شأن المرأة في الثقافات الأفريقية أيضا ظاهر ومظهره هو حق الرجل في جمع الحريم كأن يتزوج أكثر من زوجة [العدد ربما يكون كبير جدا].. ومن صور احتقار المرأة اضطرارها إلى ما يسمى ببيت الطاعة في الفقه الإسلامي، وحق الرجل في تأديبها بالوعظ ثم الهجر في المضجع ثم الضرب [ملحوظة: تجد بعض الناس غير ملتزمين بالدين أصلا ولكنهم حينما يجيء الأمر إلى المرأة يصرون على نصوص الشريعة الإسلامية السلفية، وهي نصوص ليست من أصول الدين، برغم ملاءمتها لوقتها، وتتعارض مع الدساتير الإنسانية ومع حقوق الإنسان]..
ياسر
| |
|
|
|
|
|
|
|
|
|
Re: ود المرَة .. (Re: Yasir Elsharif)
|
تعرف يا ياسِر ..
الناس البتسرّبوا مِن مراحِل التعليم باكِراً ديل بسموهم فاقد تربوي ..
والناس البيحصل ليهم إنحراف عن المِعيار الإجتماعي السليم (إدمان .. جريمة .. تشرُّد)
ديل بسموهم فاقِد إجتماعي.
اها نِحنا السودانيين ديل كوووولنا بي سلامتنا عِبارة عن فاقد بشري.
سلام.
| |
|
|
|
|
|
|
|
|
|
Re: ود المرَة .. (Re: Yasir Elsharif)
|
شكراً د. ياسر ..
Quote: ما قصدته بأن الثقافات السودانية فيها إحتقار للمرأة واضح
ويختصره مثل شهير "المرة كان بقت فاس ما بتكسر الراس"
وقول آخر "المرة مي جردل" [هل تعرف ماذا يعني القول بأن المرأة جردل؟].. |
ودي كمان يا ود الجيران:
المرة بدقوها بأختها
المرة شاورها وخالفها
والمرة من بمبرا ولي ورا
بالإضافة للجابوهو من جهة الدين:
المرأة ناقصة عقل ودين
وخاب قوم ولّوا أمرهم إمرأة
وأكثر أهل النار من النساء
وعيييييييييك على قول بشاشا ..
Quote: ومن صور احتقار المرأة اضطرارها إلى ما يسمى ببيت الطاعة في الفقه الإسلامي،
وحق الرجل في تأديبها بالوعظ ثم الهجر في المضجع ثم الضرب
[ملحوظة: تجد بعض الناس غير ملتزمين بالدين أصلا
ولكنهم حينما يجيء الأمر إلى المرأة يصرون على نصوص الشريعة الإسلامية السلفية،
وهي نصوص ليست من أصول الدين، برغم ملاءمتها لوقتها، وتتعارض مع الدساتير
الإنسانية ومع حقوق الإنسان].. |
بكل صدق, كتير جداً بقيف في الأحكام الشرعية البتخص المرأة
وبتزيد دهشتي في كل مرة معقول الكلام دا ؟!!
أظن دا كمان داير ليهو كلام براهو ..
| |
|
|
|
|
|
|
|
|
|
Re: ود المرَة .. (Re: wd al geran)
|
ود الجيران ..
| Quote: بلاي هناك إحتقار للمرأة في الثقافات السودانية؟! .. حاجة غريبة! |
والحاجة الأغرب إنك ماشايف إنو في كلام زي دا .. مش برضو حاجة غريبة !
| |
|
|
|
|
|
|
|
|
|
Re: ود المرَة .. (Re: Yasir Elsharif)
|
د. ياسر الشريف ..
Quote: كدي في الأول نصحح ليك مفهومك عن العبارة.. "ود المرة" تعني أن "أبوك مرة وليس رجل"..
وذلك شيء مسيء جدا في الثقافة السودانية والعربية والأفريقية أيضا.. |
دي برضو واردة جداً .. معناها دي عبارة مليانة إساءة من جميع الأوجه !
أنا فسرتها بطريقة تانية فهمتها من السياق العام والعبارات المصاحبة ليها
وسواء كان المعنى الأول أو الأشرت ليهو إنت كل واحد أسوأ من التاني ..
Quote: أما إذا كان الرجل عظيما فلا يجد السودانيون بأسا من تسميته بأمه..
فأهلي الأنصار يندهون المهدي بقولهم "يا أب زينب ويا ود زينب" وهذا تراث صوفي..
وهناك من الشيوخ الصالحين من سار عليهم إسم أمهاتهم مثل "ود أم مريوم"
والشيخ العبيد ود رية الما بسوَّي النيَّة" شوفتي كيف؟؟ |
وأضف ليهم شيخ بُر أبوالبتول ..
عماد عبدالله كتب الكلام دا ..
Quote: في رجال في المقابل كانو بينتسبو لأمهاتهم ..
بمفهوم الفخر ليهم و العزة ..
و فيهم رجال دين و شيوخ .. و أبطال أسطوريين و همباتة .. |
ودا كان ردي عليهو ..
Quote: وبعدين يا عماد تفاخر الرجال بامهاتهم معروف زي ما قلت
وعندك فارس الهمباتة الطيب ود ضحوية وضحوية دي كانت حبوبتو عديل مش أمو
وعندك عمرو بن هند الكتلو عمرو بن كلثوم بتاع معلقة (ألا هبي) حقت الطشمة ديك ..
بس أوعى تقول لي كلثوم دي أمو
وعندك ناس أنا أبوك يا عازة و أنا أخوك يا عواطف
دا جانب إيجابي أنا معاك
لكن المرأة البتكون سبب للتفاخر والإعتزاز دي
هي نفسها المرأة البتكون سكة للشتيمة
وأعتقد ما في شي مؤلم للراجل قدر كلمة بذيئة
قد تخرج من فم أحدهم قاصداً بها أمه أو أخته !
دا غير إنو في بعض الناس مجرد ذكر إسم أمهم قدامهم
بيدخل في خانة العيب أو العار عديل وممكن يكون سبب وجيه
إنو يضارب الزول القدامو |
طلتك أسعدتني د. ياسر ..
| |
|
|
|
|
|
|
|
|
|
Re: ود المرَة .. (Re: Raja)
|
أهلين رجوية ..
أشكرك على اللينك ..
بوستات زي دي مهمة لأنها بتحاول تجلي النظر يا صاح
وتوضح للناس خطأ بعض العبارات التي يتم تداولها وتمريرها
بقصد أو بدون قصد بما تحويه من معاني سالبة ,,
مراحب ..
| |
|
|
|
|
|
|
|
|
|
Re: ود المرَة .. (Re: تيسير عووضة)
|
تيسير كيفنك
وحاتك ما تشوفي الشنبات الحايمي هني دي.... فسو ساكت
يمين يا بت المرة
ابوي الله يديهو طولة العمر كان داقس في المعايش ما نشوفوا من اسبوعين لي اسبوعين
وحاتك الحاجة الله يرحمها هرشتة تخليك تجوعر
يا زولة ها
خلينا ساكتين
| |
|
|
|
|
|
|
|
|
|
Re: ود المرَة .. (Re: طارق جبريل)
|
يا طارق ..
Quote: ابوي الله يديهو طولة العمر كان داقس في المعايش
ما نشوفوا من اسبوعين لي اسبوعين
وحاتك الحاجة الله يرحمها هرشتة تخليك تجوعر |
لازم تعمل كدا لأنو ما ممكن الواحد يغلط الليلة
ويقعد يستنى الهرشة لمن أبوهو يجي (هرشة بأثر رجعي) ..
مهم جداً يكون للأم شخصية قدام الأبناء على الأقل عشان يسمعوا كلاما ..
يد تضرب العيال ويد تنضف الكمونية
| |
|
|
|
|
|
|
|
|
|
Re: ود المرَة .. (Re: تيسير عووضة)
|
سلام يا تيسير
اسمحي لي بتعليق برة الموضوع
ودالجيران يا عمك| Quote: اها نِحنا السودانيين ديل كوووولنا بي سلامتنا عِبارة عن فاقد بشري |
فاقد براك ياخوي
ما تجملنا معاكم
وكدا
| |
|
|
|
|
|
|
|
|
|
Re: ود المرَة .. (Re: محمد البشرى الخضر)
|
Quote: إزيك يا ود الجيران ياعمك
شنو يعني فاتح لينا كدا
الفالانتاين الجاب الناس ما جابك لينا |
وإنتا لا سمح الله يجوك في الفالانتاين ليه!
تحياتي يا زول يا جميل
التوقيع: زول بتذوّق الشِعر
بيني بينك الزول دا عِندو اغرب اضان انا اشوفا في حياتي ..
لكين الله غالِب
| |
|
|
|
|
|
|
|
|
|
Re: ود المرَة .. (Re: تيسير عووضة)
|
تيسـير والجمـيع،،
Quote: بالإضافة للجابوهو من جهة الدين:
المرأة ناقصة عقل ودين
وخاب قوم ولّوا أمرهم إمرأة
وأكثر أهل النار من النساء
|
| Quote: هذا لا ينفي أن هناك إحتقار للمرأة في الثقافات السودانية.. |
Quote: بكل صدق, كتير جداً بقيف في الأحكام الشرعية البتخص المرأة
وبتزيد دهشتي في كل مرة معقول الكلام دا ؟!!
أظن دا كمان داير ليهو كلام براهو .. |
في نـظري أن المشكلة ليست في الثقافة السودانية،،( هو بالمناسبة في تعريف للثقافة السودانية ولاّ هناك ثقافات كتيرة جداً ومحتلفة في السودان؟)،،أعني أن العنصرية ضد المـرأة بأي صورة ليست مرتبطة فقط (بثقافة) سودانية أو ثقافة أخرى معينة... هـي تراكم لموروثات إنسانية على مـرّ العصور؛؛ وكانت تمارس لوقت قريب نسبياً حتى في المجتمعات الديمقراطية والمتحضرة الآن،، يعني أجدادنا القدماء في السودان ما حصل إجتمعوا بالليل كدة وقالوا يلاّ يا أخوانا فكـروا لينا في طريقة نعمل بيها عملة في النسوان ديل عشان تاني ما تقوم ليهن قشة لي يوم القيامة،، على العكس أفتكر إنو بعض الثقافات السودانية متفوقة على ثقافات مناطق أخرى كثيرة في العالم (العربي أو الإسلامي أو الإفريقي أو غيرهم).. مثلاً الأخ أبوبكر تكلم عن (أبو فلان) بتاعة ناس الخليج،، بينما نحنا في أغلب أو كل ثقـافاتنا ما عندنا العقدة دي، إنما يكنى الرجل فقط بإسم أكبر أبناءه سواء ولد ولاّ بت زي ما أشار دكتور ياسر لي (أبو زينب).. ولي يوم الليلة لو زرتي زول في بيتو لأي مناسبة لامن تجي ماشية بقول ليك (انشا الله قدمك لي ابوفاطنة).. أها دا الرسول الأعظم زااتو المنسوبة ليهو أغلب (الحاجات) القلتي جابوها من جهة الدين.. نفس الدين دا برضو جابو منو:
الجنة تحت أقدام الأمهات
والنساء شقائق الرجال
وقال ثم من: قال أمك الخ
والقرآن نفسو كثيرا ما ذكر: المؤمنين والمؤمنات والمسلمين والمسلمات،، و(بعضهم من بعض أو بعضهم أولياء بعض) الخ،، أها في (جندرة) أكتر من كدة... وأتفق معاك ومع الأخ دكتور ياسـر إنو النصوص دي مشكلتها كبيرة وداير بحث طويل ودا موضوع آخر.. وزي ما قبيل قلت المشكلة ليست في الثقافة السودانية وحدها،، فالمشلكة برضو ليست في (تفسير نصوص الدين الإسلامي فقط)،، ومعروف أن النصوص تقبل تفسيرات كثيرة بل ومتناقضة أحياناً،، كمثال نفس النص المسمى (آية الحجاب) إستدل به آخرون بعدم وجوب الحجاب،،.. في هولندة هنا مثلاً يوجد هناك تلاتة أحزاب مسيحية،، أحدها يملك بضع مقاعد في البرلمان،، هذا الحزب الأخير يحظر النساء من عضويته لأنهم برضو عندهم نصوص في الأناجيل مشابهة لنصوص مثل (الرجال قوامون على النساء) أو الأثر الذي ذكرتيه عن (خاب أو لم يفلح قوم ولوا أمرهم امرأة) الخ،، باختصار هم يرون أن النساء يجب ألا يتدخلن في شئون الحكم بالذات وعلى وجه التحديد دون الأنشطة الأخرى المسموح للمرأة المشاركة فيها،، لذلك يجب ألا تشارك في الاانتخابات والبرلمان والحكومة.. يعني ناس الكويت متطورين أكتر أو أسرع منهم.. تحياتي...
| |
|
|
|
|
|
|
|
|
|
Re: ود المرَة .. (Re: Isa)
|
الأخ تيسير !!
آسف .. أقصد الأخت تيسير .. من طولة غيابك نسيناك إنتى منو
بس جيت أقول سلام و أبارك النيو لووك
ود المرة
| |
|
|
|
|
|
|
|
|
|
Re: ود المرَة .. (Re: Ali Alhalawi)
|
هيااااا حلاوي ..
صاحبنا زمان والآن
| Quote: بس جيت أقول سلام و أبارك النيو لووك |
يباركو ليك الحلو ساكت
بالله كيف السالمية
وحولّي
والفحيحيل
والحتات الحلوة ديك ..
| |
|
|
|
|
|
|
|
|
|
Re: ود المرَة .. (Re: Isa)
|
Quote: في نـظري أن المشكلة ليست في الثقافة السودانية،،
( هو بالمناسبة في تعريف للثقافة السودانية ولاّ هناك ثقافات كتيرة جداً
ومحتلفة في السودان؟)،،أعني أن العنصرية ضد المـرأة بأي صورة
ليست مرتبطة فقط (بثقافة) سودانية أو ثقافة أخرى معينة...
هـي تراكم لموروثات إنسانية على مـرّ العصور؛؛ وكانت تمارس لوقت قريب نسبياً
حتى في المجتمعات الديمقراطية والمتحضرة الآن،، يعني أجدادنا القدماء
في السودان ما حصل إجتمعوا بالليل كدة وقالوا يلاّ يا أخوانا
فكـروا لينا في طريقة نعمل بيها عملة في النسوان ديل
عشان تاني ما تقوم ليهن قشة لي يوم القيامة،، على العكس أفتكر إنو
بعض الثقافات السودانية متفوقة على ثقافات مناطق أخرى كثيرة
في العالم (العربي أو الإسلامي أو الإفريقي أو غيرهم).. |
أكيد طبعاً السودان فيهو تعددية ثقافية عشان كدا بنلقى
النظرة للمرأة بتختلف من منطقة لمنطقة ومن قبيلة لأخرى
السودان عبارة عن نوبة وزنوج وعرب وبدون تحامل
أكثر القبائل البتنظر للمرأة بدونية بنلقاها القبائل الفيها
أصول عربية وإسلامية لأنو ثقافتهم كدا !
أنا معاك في إنو المجتمعات المتحضرة كانت بتمارس التمييز دا
لكن ما بالشكل الصارخ الفي المجتمعات الشرقية
وأنا هنا بقول الشرقية تحديداً لأنها المنطقة اللي كانت مهبط للديانات كلها
وفي إعتقادي في رابط قوي بين الدين (أو الأديان بصورة عامة)
وبين معاملة المرأة والنظرة ليها ..
يعني لو لفيت العالم دا كلو على مر الحضارات والعصور -زي ما قلت- أكثر
تمييز مورس ضد المرأة بنلقاهو موجود في القبائل العربية والإسلامية
تلقى الدين مخلوط بالعادات والعادات ممزوجة بالأعراف وما معروف آخرتا وين ..
ولو جيت مسكتا القبائل النوبية والزنجية بنلقى وضع المرأة الإجتماعي أفضل بكتير ..
Quote: ولي يوم الليلة لو زرتي زول في بيتو لأي مناسبة لامن تجي ماشية بقول ليك
(انشا الله قدمك لي ابوفاطنة).. |
أها حتصدقني لو قلت ليك دايماً بسمعا قدمك لأبوبراهيم ..
فاطنة دي (يطرشني) فيها حتى زمان كنتا بسأل حبوبتي
من إنو أبوبراهيم دا منو؟ ما قايلاهو النبي زاتو ..
Quote: نفس الدين دا برضو جابو منو:
الجنة تحت أقدام الأمهات
والنساء شقائق الرجال
وقال ثم من: قال أمك الخ |
Quote: وأتفق معاك ومع الأخ دكتور ياسـر إنو النصوص دي مشكلتها كبيرة
وداير بحث طويل ودا موضوع آخر.. وزي ما قبيل قلت المشكلة ليست في الثقافة
السودانية وحدها،، فالمشلكة برضو ليست في (تفسير نصوص الدين الإسلامي فقط)،،
ومعروف أن النصوص تقبل تفسيرات كثيرة بل ومتناقضة أحياناً،، |
هنا نسجل ملاحظة (وأكيد ما نحن بس) للكتير من الأحاديث البتنقض أحاديث
والآيات البتنسخ آيات .. نعمل شنو يا عيسى لو الدين حقنا (بيفلق ويداوي) !
الثقافات ممكن الواحد يغير فيها ويعدلها بمرور الزمن
لكن النصوص دي نعمل فيها شنو لازم تتاخد كلها في بقجة واحدة
ما بينفع نشيل جزء ونخلي الباقي وزي ما قال الخواجة Take it OR Leave it ..
| |
|
|
|
|
|
|
|
|
|
Re: ود المرَة .. (Re: تيسير عووضة)
|
| Quote: بس جيت أقول سلام و أبارك النيو لووك |
انا زاتي والله
يا تيسير موضوعك دا بس حاشتني منو احوال الزار
يارب تفك عارضي واجي اصب ليك زوار وزائرات بوستك المهم دا
| |
|
|
|
|
|
|
|
|
|
Re: ود المرَة .. (Re: تيسير عووضة)
|
الفضلى تيسير
الحمدلله المجتمع السودانى ماذال به بعض الخير والدليل على ذلك هنا مصطلحات والفاظ سوقيه والكلم الطيب للبيت ونحن احرص ما نكون على حجب مثل هذه الالفاظ حتى على مسامعكم الكريمه لكنها واسعة الانتشار لاغراض نفوس الكثير المريضه فموروثاتناالثقافيه تحمل الطيب وقليل من القبح
لا اطيل عليك وخذى دائما من الكلام اطيبه ودعك عن غيره
كلنا نفخر بامهاتنا اقر الله اعيننا بهن واعطانا عفوهن ورضائهن
اما ما يقال فهو من دواعى السخريه وقله الحجه
دمتى
هيثم
| |
|
|
|
|
|
|
|
|
|
Re: ود المرَة .. (Re: Haitham El Galal)
|
شوفي ياتيسير عندي قصه المهم هفت لي وقلت ادرعا ليك في رقبتك
وانت اتصرفي ....
اها بمناسبة عيد الام والكديسه سوا بعض
احدى الانجازات الكتيره للست امنا الانجاز التالي
انها وفي ذات عزومه / وليمه لامه لم جد في الحله ، كانت ماسكه الكنترول بتاع مريق الصواني وتلك مهمة تتطلب حزم وحنكه وحرفنه وخبره زي ما بتكوني عارفه ، اها في ذلك الزمان كان في زي تقليد كده واللهو انو صواني الرجال بتمرق قبل صواني النساء يعني يتكفوا الرجال في الاول وكده وبعداك النساء العاملات عليها ديل ياكلوا وكثيرا ما يتم ذلك بعد اخر رجل يحضر وتكون صواني النساء من نوع يتموها ببقايا صواني التي سفسف فيها نوع يخرتوا ليك باقي صحن سلطة الاسود(دايما سلطة الاسود) من الحواف ويعيدوا صياغتو شفتي كيف ... الخ من الطقوس الما بتغباك
نحن كنا كشغيله من الشفع بتاعين ناس غسل لمنو وجيب صابونة اللوكس في الصحن، وفي سنه كم الجلكسات
ايها البعملوها الناس الشبعانين من الكبار ونحن ياحبة عينك على لحم بطننا من الصباح ده بالاضافه لانو نحن حلقة الوصل بين المطبخ واصحاب الحظوه من الرجال وطبعا عارفه انو نحن كشفع صوانينا بتطلع برضو في النهاية مع النسوان بعد الشاي والذي منو (حاجه عجيبه مش) ، يازوله شفتي كيف ما عارف الجده شنو فجأة لقيت ليك الصواني ماشه parallel فوووووووا صينه في الديوان فوااااا صينه للنسوان في الاوضه البهناااك (ما تقولي لي بهناك وين)
قالوا بت عبدو قررت كده ويبدو انو ده كان نتيجه لاجتماع تم بين نسوان الحي في لمة القهوة في اليوم السابق
المهم من يوميها ده صار التقليد المقابل في الحله الصواني تطلع سوا بعض ..
تسأليني تقول لي انتو نابكم من هذا التغيير جانب اقول ليك ايوه بالحيل بقوا يجنبوا لينا ضلع وكباب ..الخ
لاغيت ما النسوان والرجال يتكفوا والشمس تقرب تغيب ( العزومات كلها كانت غدا) بنسفسف ونمرق نشوف
الفي الكتاب شنو ...
اها اسي ديل ما نسوان بربوا بلد خليك من ولد
والولد ولد البلد وكده
| |
|
|
|
|
|
|
|
|
|
Re: ود المرَة .. (Re: محمد أحمد محمود)
|
تيسير شكرا جميلا لفتح الموضوع المثمر
اولا:
اتذكر تمام لمن كنا صغار..
ولما كان يوم الشكله في المدرسه هو يوم الخميس بعد اليوم الدراسي (البييييوووووووت ياعبود)
( والليله الخميس والجلد رخيص)
كنالما تدوور الشكله والفليق يجي من برة ما معروف من وين؟ من الحجازين ولا من السماء المهم الشكله تدور والنبذ يقع قرش ونص ومايسكت هذه الشكله الا عندما يسمع احد الطرفين (انعل امك)؟؟؟؟؟ تعالي شوفي الرد بيكون شنو؟
(صرة وش شديده ومغبرة بالتراب) ::::كلو شي ولا امي دي.....نبذ ابوي لكن امي دي ماتجيب سيرتها علي خشمك ...
تخيلي معي قدر الاحساس بي عظمه الام ونحن صغار كانت جوانا بعمق...
ولكن:؟؟؟وبنفس المستوي شوفي نحن برضو ربونا علي:
ياولد ماتعلب مع البنات
يابت ماتلعبي مع الاولاد
ولما تبكي(ياولد البكاء حق النسوان...انت ماراجل؟؟اسكت عشان مايضحكوا فيك)
كمان في ناس بتاخدها من ناحيه تانيه
ود ست الكسرة
ود ست الطعميه او يلصق عليك الاسم (محمد طعميه)
(خامسن او تالتن) ودي تسميه البلعب مع البنات وا الاتربي في وسط البنات
يعني تقبل جاي ...ماتحلها
تقبل بي هناك ..برضو ماتحلها...
والله بقت عقدة اوديب
عليش
| |
|
|
|
|
|
|
|
|
|
Re: ود المرَة .. (Re: محسن خالد)
|
محسن ود البتولا ..
سلامات ياخي ومشتاقين ..
مامتو سميرة شديدة وبتسلم عليك
أما صاحبكم العجوز الإسمو "عصمان"
أظن لا يخفى عليك حبه وولعه بالبحر وصيد الأسماك
لغاية ما قررت أكتب عنو رواية حا أسميها (العجوز والبحر)
من تأليف (آرنست تيسيرواي)
| |
|
|
|
|
|
|
|
|
|
Re: ود المرَة .. (Re: Mohamed Ahmaed Olyesh)
|
Quote: المهم الشكله تدور والنبذ يقع قرش ونص ومايسكت هذه الشكله الا عندما يسمع
احد الطرفين (انعل امك)؟؟؟؟؟ تعالي شوفي الرد بيكون شنو؟(صرة وش شديده ومغبرة بالتراب)
::::كلو شي ولا امي دي.....نبذ ابوي لكن امي دي ماتجيب سيرتها علي خشمك ...
تخيلي معي قدر الاحساس بي عظمه الام ونحن صغار كانت جوانا بعمق... |
يا عليش حساسية الطفل أو الطفلة تجاه أهلو بتنمو معاهو مع الأيام
ومن ما هو صغير وزي ما أنا ذكرت فوق الرجال لو واحد عايز يوجع الزول
المتشاكل معاهو بس يجيب سيرة أمو سواء كانت إنعل أمك أو كانت بصورة
أكثر بذاءة الغريب النساء لو إتشاكلوا ما أعتقد في واحدة بتشاتم التانية
بأمها بالعكس بتكون معنية بيها هي يعني بدل ما تقول ليها
يا بت الكعبة (مثلاً يعني) بتقول ليها يا كعبة
إذن النسوان شكلهم (متحضر) أكتر
والحاجة التانية الناس لما يعرسوا الحساسية دي بتزيد على العليها
وبتبقى موضوع شكلة جاهز لدرجة إنو لو واحدة ماشة تزور أهلها
راجلها قال ليها سلمي لي على أهلك تقوم تقول ليهو
أووووعك تجيب سيرة أهلي على لسانك
| |
|
|
|
|
|
|
| |
تيسير عووضة
Soumeta
رأفت ميلاد
Adil Osman
Ishraga Mustafa
حسين محي الدين
wd al geran
Emad Abdulla
abubakr
دينا خالد
نجوان
jini
أيمن الطيب
tmbis
-1.jpg)
معاوية الطيب
محمد أبوالعزائم أبوالريش
Abdel Aati
Yasir Elsharif
Raja
طارق جبريل
محمد البشرى الخضر
الجندرية
Mohamed Ahmaed Olyesh
محسن خالد
فيس بوك
تويتر
انستقرام
يوتيوب
بنتيريست