دعواتكم لزميلنا المفكر د.الباقر العفيف بالشفاء العاجل
|
|
 هواية جمع البرطمانيات ..
|
الليلة صحيت من الصباح وأنا ناوية نية سودا على دولاب البهارات (أقصد العطارة) في المطبخ
من يوم ما سافرت أمي وأنا بعاين ليهو من بعيد وخايفة أفتحو ولا حتى أقرب منو لمعرفتي المسبقة بالوضع المهدد للحياة
رغم تنويهي المتواصل حتى آخر لحظة إنو ما تخلي وراها أيييي حاجة بس تخلي حق الإستعمال اليومي
أمي الله يمسيها بالخير ويديها ألف عافية من هواة جمع البرطمانيات
أو بمعنى أدق:
من هواة إعادة التدوير والحفاظ على البيئة مثلها مثل ملايين السودانيات اللي بينهم وبين الزبالة (الله يعزكم) ود مفقود
فيعدن إستعمال الباغات والقزايز الفاضية والكراتين وحتى أكياس النايلون
أخوي الصغير زول كارثة ..
قال أمنا دي لو عجبا شكل برطمانية غض النظر عن الجواها ممكن عادي تشتريها تدفق الجواها عشان تغسلها وتستعملا بعد داك 
شلت ورقة وقلم لحصر الغنائم وإتحزمت ويا القزاز جاك زول
افتح واشم وأكتب
أو بالأصح
افتح واشم وأعطس وأكتب
شي عطرون
وشي جردقة
وميرمية
بخور تيمان
وحلبة حصا
كزبرة حب
لالوب ناشف
وحاجات كدا ما عرفتها زاتو لدرجة وأنا بفتح في العلب خفت يجيني طالع جني ولا مارد ويقول لي شبيك لبيك
حتى اكتمل العدد لـ 56 برطمانية بمختلف الأطوال والأحجام والألوان والأشكال
تم العد وحصر الحاجات العايزاها والحاجات الممكن أستغنى عنها
إتصلت عليها وأنا ميتة من الضحك:
يا أمي مش إتفقنا تشيلي دكان العطارين معاك
قالت لي حالتي ما خليت ليك غير الحاتحتاجي ليهم بس!
ــــــــــــ
بهذا أعلن تأسيس رابطة صديقات البيئة فرعية جمع البرطمانيات
وصلح سراير عناقريب بوابير الجااااااز
|
|
 
|
|
|
|
|
|
|
|
Re: هواية جمع البرطمانيات .. (Re: عبدالله احيمر)
|
ضحكتيني يا تيسير
أضحك الله سنك!
ويبدو أن معظم الأمهات يشتركن في هذه الهواية .
الوالدة الله يطول عمرها أحضرتها للرياض في زيارة ، وقد لاحظت أن بدأت تجمع في الولاعات الفارغة في قريتنا بحلفا الجديدة ،
قلت لها : دا شنو ياأمي
قالت : لمن أرجع للسودان بمشي لخالد جنجينة وهو بيعيد تعبئة الولاعات الفارغة .
قلت : لها يا أمي أنا بشترى دستة جديدة من الولاعات الجديدة وقت السفر .
أخذت منها الولاعات وهي تقول يا خسارة .
وحينما لاحظت أننا نرمى برطمانيات المربى والصلصل تقول يا خسارة .
وكان تزعل أكثر حينما نرمى جركانات زيت الطعام الفارغة وتقول لينا والله أنتو عايشين في دلع .
ربنا يحفظ أمهاتنا جميعاً وهن جيل عرفن كيف يقدن دفة الحياة في الزمن الصعب .
| |
|
|
|
|
|
|
|
|
|
Re: هواية جمع البرطمانيات .. (Re: ولياب)
|
إن شاء الله دايماً ضاحك يا ولياب
نفس الحكاية دي حصلت برضو مع أم واحدة صاحبتنا في باغات الآيسكريم
أصرت شالتهم وقالت بينفعوها في حفظ بواقي الأكل في التلاجة
بيني وبينك في حاجات كدا الزول يستخسر يرميها ..
| |
|
|
|
|
|
|
|
|
|
Re: هواية جمع البرطمانيات .. (Re: عبدالله احيمر)
|
سلام يا تيسير
والله يدي امك وكل الامهات العافية وطول العمر
عارفه يا تيسير انا امي بتلم اي حاجة
يعني لو دخلتي اودتها بتقومي جارية
والله التوليت بتاعا كلو قزايز ريحه فاضية وكريمات واما البرطمانيات دي خلايها علي جنب براها
كل الاشكال والانواع من الزمن البعيد دااااك تلقيها عندها
حتي المجلات القديمة محتفطة بيها مجلات حواء وروز اليوسف وصباح الخير ومجله الاذاعة والتلفزيون
لما الورق بتاعا بقي اصفر ومهتري .
يااخي دي السني آمن بيها لما مشينا الاجازه في عطبرة ادتو كتاب مسرحية خطوية سهير .
السني قال ليها والله حمدنالله عبدالقارد ( مؤلف المسرحية ) ما حيكون عندو الكتاب ده هسة
وانا واخواتي بنقول ليها
هوايتك ايه يا بت عابدين .... لم الكراكيب
| |
|
|
|
|
|
|
|
|
 Re: هواية جمع البرطمانيات .. (Re: الخير محمد عوض)
|
| Quote: لمليم البرطمانيات ساهل يا تايسا انا عندي حكومة بي جاي بتلملم الهدوم والجزم هههههههههه |
لو كان عندكم بتاعين عدة ما كانت خلت ليها دلقان حايم إلا وبدلت بيهو العدة
حكومة رشيدة يجب تأييدا ..
| |
|
|
|
|
|
|
|
|
|
Re: هواية جمع البرطمانيات .. (Re: محمد عبد الماجد الصايم)
|
النقوليك يابتي لا يوجد افضل واحسن من البرطومانيات في حفظ القائمة حقتك دي ما تقولي لي علب بهارات الزمن دا اشاعة ساي
البهار يفقد نكهته ويقطن احيانا
تعرفي زمان في الداخلية اربعة سنة بنشرب بالبرطومانيات لما بقيت ما بتكيف من الشاي الا فيهم الفة شديدة قاليك
طيلة وجودي في امريكا بشرب الشاي فيهن قاومت الاستلاب حق المق شديد
غياتو يالله بجيك وتسألني مابحب حاجة قدر البرطمانيات والباقات وفتايل الريحة الفاضية وعلب الكريمات وصناديق الهدايا
حاسبي يا تيسير الحاجات دي اعز ما نملك نحنا الامهات اوعي تجدعي حاجة وتزعلى امك..
| |
|
|
|
|
|
|
|
|
|
Re: هواية جمع البرطمانيات .. (Re: د.نجاة محمود)
|
[I
يا تيسير عوووضة لو بقيتي شنو وشنو داك مشكلتك ما حتكون اكبر من مشكلة الزول ده ...
البرطمانيات زاتها ما بتحيرني قدر ما بحيرني اسمها ...انا في اسماء كده ما موافقة عليها بتاتا ...يعني زمان لما الواحدة تكون صغيرة وقاعدة جنب الناس الكبار وتجي كلمات زي دى
مش براك كده بتكوني ما موافقة عليها (على الاقل انا كنت كده بصراحة يعني)
...ياهو ناس برطمانية ودرابزين وبردلوبة وبلاعة ...ياخى انا عنقريب دي ما كنت متفقة معاهم عليها ...تقول لى برطمانية ...بالله عليك الله خلينا كده
(دي زهجة كده في آخر المأتم...فما تزهجي معاي فيها)
مشتاقين يا تيسير...موضوع ظريف.
| |
|
|
|
|
|
|
|
|
 Re: هواية جمع البرطمانيات .. (Re: فيصل محمد خليل)
|
ما شايف اي تدوير هنا
هي الدائرة دي غيروها!؟
دا تعطيل للدورة الاقتصادية .. وهدر للموارد النادرة
قيقا راوي
اديب ناشئ .. راوي بارتايمر
-----
انا ذاتي من هواة جمع الحاجات .. أي حاجة
والله صحي
| |
|
|
|
|
|
|
|
|
 Re: هواية جمع البرطمانيات .. (Re: Tumadir)
|
طماطم ست الناس
لو عارفين البرطمانيات بتجيبك كنا فرشنا السكة شمار :)
تتذكري برطمانية الشمار بتاعتك الشهيرة ؟
إنتي في البرطمانية ولا الجركانة
والعجب الشرغرغ
اسمو ساكت يعمل عشراقة
ياخ المطبخ السوداني دا فيهو مفردات وأسامي حاولنا نحصرها مرة في بوست الكمونية
ـــــــ
ليك ألف وحشة وخمسمية شوق
وربنا يجبر كسر آل شيخ الدين في فقد المرحومة ..
| |
|
|
|
|
|
|
|
|
|
Re: هواية جمع البرطمانيات .. (Re: د.نجاة محمود)
|
يا بيان متفقة معاك طبعاً
البرطمانيات مافي زيها في الحفاظ على نكهة البهار الكلام دا بيعرفوهو الناس العاشوا في بلدان رطوبتها عالية
لكن شكلها ما عاطفي كلو كلو وغالباً كل فردة من بلد
كلامك ذكرني أيام الجامعة برضو
شراب في البرطمانيات
وأكل البوش في الصينية
والموية بي كوز الصلصة
لكن يا دكتورة الجديع سنة الحياة
وقانون الإزاحة بقول كدا :)
| |
|
|
|
|
|
|
|
|
|
Re: هواية جمع البرطمانيات .. (Re: احلام وهبي)
|
يا أم السهروردي ..
تسلمي وتسلم بت عابدين
أمي لغاية هذه اللحظة محتفظة بي فساتين عرسها أيام الفستان ما تامي ربع متر
دا غير إني لغاية هسي عيني ما وقعت فيها وهي بترمي علبة كريم وحكمة ربنا بتلقى حاجة تختها في كل علبة تحتفظ بيها!
| |
|
|
|
|
|
|
|
|
|
Re: هواية جمع البرطمانيات .. (Re: رشا سالم)
|
رشا الحبيبة ..
مرحب بيك في نادي الهواة
خلي بالك يا دكتورة
الحقن الفاضية وفتايل القطرة الفاضية السودانيات نجحوا بإمتياز في إعادة إستعمالها في الحنة وحفظ المحلبية
| |
|
|
|
|
|
|
|
|
|
Re: هواية جمع البرطمانيات .. (Re: تيسير عووضة)
|
Quote: خلي بالك يا دكتورة
الحقن الفاضية وفتايل القطرة الفاضية
السودانيات نجحوا بإمتياز في إعادة
إستعمالها في الحنة وحفظ المحلبية |
لوووووب . يا تايسا وناس د. رشا يقولوا ليك
ديسبزبل !!
لكن ياتايسا الحقيقة كدا كل الروبابيكيا دى
بتتوظف كويس ومافى احسن من المثال الضربتى
فى الكوت دا ..
تعالى شوفى البتفاصحو ديل بلمو شنو ؟
عندهم غراااام مع المواسير واى حاجة بفكها السباك
او الكهربجى واى حديد متعلق بالعربات ..
بحتفظوا بيها لما صليبها يسيح .. ياخ انا جدى رغم انو كان
موظف كبير وساكن فى حى راقى جنو الفى راسو السلك الرقيق
بتاع الحديد داك .. بحبو حب .. جامع منو كمية ممكن تفتح
مصنع .. ولما اولادو جابو الابواب الصينية دى اكتر زول كان
مدبرس ومغيووظ ,,
لانو ما قادر يركب ليها سلك .. ومواسير من 1بوصة
لى عشرة بوصة وبدسهم فى راس البيت اووول ما اجيهم بطلعنى
راس البيت نعيد عدهم ونرصهم من جديد كل شىء براهو ..
ياخ انا لى قرييييب دا بطلع راس البيت !
لووووووووووب .
وكل القصة (محض كرور) ..
لكن الامهات مبدعات ياخ ..
ـــــــــــــ
اظرف حاجة انو لو حصل وانو البرطمان اتكسسر
بلمو الحاجة الفيهو بى القزاز والرايش بتاعو
لو كانت ويكة ، شطة، دهن ، سمن ، مافى شى بيدفق
ف شنو .. اعملوا حسابكم .. ناس ود الصايم ديل اوريدى
بطنهم كلها قزاز ورايش فات فيهم الفوات ..
| |
|
|
|
|
|
|
|
|
|
Re: هواية جمع البرطمانيات .. (Re: دينا خالد)
|
تيسير تحياتي
ياخ والله زكرتيني تكل امي
ياخ بت الناظر الله يديها العافية
ما خلت برطمانية لافة في البلد
والله لامة جنس قزاز
اتذكر يوم كسرت برطمانية ملح
اخدت لي كمية مفاريك في ضهري
والله الا سبقت برجلي
------
يا لووووووب
| Quote: بطنهم كلها قزاز ورايش فات فيهم الفوات .. |
بالغتي عدييييييييييييييل كدا
بشر ولا جداد؟
| |
|
|
|
|
|
|
|
|
|
Re: هواية جمع البرطمانيات .. (Re: محمد عبد الماجد الصايم)
|
Quote: ياخ انا جدى رغم انو كان
موظف كبير وساكن فى حى راقى جنو الفى راسو السلك الرقيق
بتاع الحديد داك .. بحبو حب .. جامع منو كمية ممكن تفتح
مصنع .. ولما اولادو جابو الابواب الصينية دى اكتر زول كان
مدبرس ومغيووظ ,,
لانو ما قادر يركب ليها سلك .. ومواسير من 1بوصة
لى عشرة بوصة وبدسهم فى راس البيت اووول ما اجيهم بطلعنى
راس البيت نعيد عدهم ونرصهم من جديد كل شىء براهو ..
ياخ انا لى قرييييب دا بطلع راس البيت !
لووووووووووب . |
أول حاجة يا دينا خالد أعملي حسابك جنس معلوماتك دي بتكشف معلومات دقيقة تقود الباحثين للوصول إلى الهدف
سلام يا تيسير
إنتي قلتي أمك أنا زوجتي الصغيرونة دي بتحب القزاز الفاضي دا وفي محلات هنا ببيعوا فيها القوارير الفاضية المحلاة بالفضيات والمذهبات
فلدينا كميات أحيانا بحجة أن نفرغ فيهم كميات كبيرة من العطور
وأحياناً بحجة الديكور
وأهو مليانين وأنا قدر ما اقدر بكسر لي واحدة نظام ما شايف ويدي ضربتها بالصدفة\
لكن من يوم إكتشفت إنو البتتكسر بيجيبوا غيرها أنا ذاتي بقيت ما أقرب منهم
غايتو لو إنعدم القزاز ولحق سعر الدهب ..........
__________________________
وأنا أتاري قريت زمان بوست لود الصايم بيقول فيهو بلاش كلاكلة بلاش قزاز فاضي هو يعني قاصد نفس الهرجة
| |
|
|
|
|
|
|
|
|
|
Re: هواية جمع البرطمانيات .. (Re: Asim Fageary)
|
Quote: ياخ انا جدى رغم انو كان
موظف كبير وساكن فى حى راقى جنو الفى راسو السلك الرقيق
بتاع الحديد داك .. بحبو حب .. جامع منو كمية ممكن تفتح
مصنع .. ولما اولادو جابو الابواب الصينية دى اكتر زول كان
مدبرس ومغيووظ ,, |
لووووووووووول
اما والدنا رحمة الله عليه كان بحب الراديوهات وحجار البطارية وله تجارب لسنين طويلة وحتى مماته
في محاولة قلب البطارية العادية الى بطارية يمكن اعادة شحنها.. ومن غرفته دائما تخرج اصوات سييييييك دووووووووووووو
مما جعل اصحابنايطلقون عليه عبقرينو ( بتاع ميكي). بعدالمعاش يخرج للتمشي ساعة بالصباح وساعة بعد العصر ويعود محملا بحجارالبطارية
وممكن يكون عنده ذي دشليون حجر بطارية اذا يوم شلتي واحد البيت يقيف على فد رجل ولازم يعرف الحجر دا مشى وين.
والى الان كلما اشوف حجر بطارية واقع يطفر الدمع من عيوني واتذكر ابوي الله يرحمه. واسع انا بكتب دموعي سالت.
مع المودة
| |
|
|
|
|
|
|
|
|
|
Re: هواية جمع البرطمانيات .. (Re: د.نجاة محمود)
|
تيسير ازيك
تعرفى فى امريكا الناس "بتغنى" من البرطمانيات والقزاز الفاضى وعلب البيبسى
وقزاز البيبسى
وشوف عينى العميان شايل المكسر يلمو فى القزاز مبارين الكوش
كل واحد فى عربيتو فى شوالات من اكياس النايلون مليانة قزاز فاضى
فى هيوستن تكساس كان ساكن قصادنا فيتنامى
ما بنوم زاتو
بمرق من بيتو بعد "الليل ما جن "
يلملم فى العلب الفاضية بتاعة الكولا
ما يهم ياتو نوع
ويجى يقيف عليها يهرسا ويهرس الليل كلو
لمن تصبح يشيل مقتنياتو ويوديها لمصنع
انقرى الزول دا لمن سالت منه لقيتو مشترى بيت ولا اجمل وعربية مافى زول غيره راكب زيها
وكلو من العلب الفاضية
وللقزاز فائدة
مرة كنت مع واحدة زميلتى فى الشغل
قومى يال العربية اقطعى بنزين
الساعة كانت واحدة صباحا والاتنين ما معانا "فكة "
قالت لى "ندفر العربية لمحل الطرمبة
ولمن وقفنا قدام البياع ما كضبت مرقت ليهو كيس "ماكن "
بتمن الفى الكيس ملينا البنزين ويا دار ما دخلك شر
طبعا فى البقالات فى مفارم للقزاز
واحدة للقزاز براها وواحدة للبلاستيك وواحدة للعلب الحديد
تشيلى علبك الفاضية وتدخلى الاوضة الكبيرة وتهرسى
تدخل علبة تخرج سنتات
مافى علب بتروح ساكت غايتو امك دى لو جات هنا بتبقى مليونيرة فى وكت وجيز
ادينى ليها "سلفة " ونتقاسم الارباح
تحياتى ليها وليك
| |
|
|
|
|
|
|
|
|
|
Re: هواية جمع البرطمانيات .. (Re: سلمى الشيخ سلامة)
|
يا سلام عليك يا تيتي وانتي تعيدي البرطمانية لاضواء
البرطمانية تعاني من ظلم بني القربي
زول ساكت كتب فيها قصيدة مافي
لا ناس الحقيبة لا ناس الحديث لا شعراء العرب
الكلام كلو والشكر كلو للقزاز
الرقيبة قزازة عصير
العيون شبه الفناجين
رق الزجاج ورقت الخمر فتخالطا وتشابه الامر
فكانما خمر بلا قدح وكانما قدح بلا خمر
احد مشاكل البرطمانية انها لا يحمل بها عصير ولا خمور
وحتي اغنيات البنات زاغت من البرطمانية
مثلا حلاوة المربة توضع داخل برطمانية لكن البنات بقدرة قادر قالو
يا علب المربة يا الحمرا ومعبا
انصفو البرطمانية ينوبكم ثواب
| |
|
|
|
|
|
|
|
|
|
Re: هواية جمع البرطمانيات .. (Re: khaleel)
|
تيسير ...
| Quote: أمنا دي لو عجبا شكل برطمانية غض النظر عن الجواها ممكن عادي تشتريها تدفق الجواها عشان تغسلها وتستعملا بعد داك |
كلهن تلك المرأة
ياخ ديل نسوان صديقات للبيئة.
| |
|
|
|
|
|
|
| |
تيسير عووضة
رشا سالم
Rawia
عمار عبدالله عبدالرحمن
ولياب
omer osman
احلام وهبي
نادر النور آدم
محمد عبد الماجد الصايم
الخير محمد عوض
Tumadir
فيصل محمد خليل
قيقراوي
دينا خالد
حافظ انقابو
Asim Fageary
سلمى الشيخ سلامة
khaleel
محمد أبوالعزائم أبوالريش
فيس بوك
تويتر
انستقرام
يوتيوب
بنتيريست