|
|
 عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة
|
Quote: خصوصا (أبو ساندرا)
|
شفت عشان { خصوصآ } دي يا موص
وعشان الجلسة اللطيفة عند { ديك العدة } أو { عدة الديك }
وناقل الكفر ليس بكافر
اليوم نتشرف بدعوة الكافة لعشاء إستقبال
وإستماع
عندنا
في دارنا الكائنة بجوار مركز إصدقاء البيئة
شفتو غباي ؟ فقد قنطرت نفسي لفرقة الإعدام
ودليتهم على المكان
إتفضلوا يا جماعة
علمآبإنو معانا
الإستاذة المبدعة البلبلة المغردة هادية طلسم
و الإستاذ المبدع صنو زيدان ، عمر الشاعر
والولد الغناي يسري صلاح
والكلمة النادرة من صلاح عبدالله
وقراءات شعرية وحكايات من عماد عبدالله
و مؤامرات من ديك العدة وشربات
ولطائف ودرر يتحفنا بها عمر بوب
ودالعباسية والكاميرا الذكية
ومفاجآت لن تكن في حسبانكم
|
|
 
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
Quote: الإستاذة المبدعة البلبلة المغردة هادية طلسم
و الإستاذ المبدع صنو زيدان ، عمر الشاعر
والولد الغناي يسري صلاح
والكلمة النادرة من صلاح عبدالله
وقراءات شعرية وحكايات من عماد عبدالله
و مؤامرات من ديك العدة وشربات
ولطائف ودرر يتحفنا بها عمر بوب
ودالعباسية والكاميرا الذكية
|
طيب فضلتو شنو عليك الله يا ابو ساندرا
كنت داير أدعى عليكم
لكين معليش
بس من الغبينة والله
فنحن نشكو من قلة، مش الفيران بس، الكدايس والباعوض كمان، فى بيتنا
المهم يا زول أنا حاسد حاسد، ولا بغران ولا شى
إن شاء الله يا ابو ساندرا إنت والباقة المعطرة من الناس النادرين فعلا ديل
إن شاء الله ايامكم كلها سعادة ومحنة وعافية وطيبة ولمة حبان وطيب زمان
قول آمين
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
بخٍ .. بخ ..
زهوة الليلة .. و باهي الحضور .
و سنجلبغ , ما شاء لنا .
وسندلل ليلتنا ..
حسنا و .. ربما بعض صبابة .
و تستطيع الدوحة أن تزهو ..
و تخرج من بيت حبسها .. و تغنج طويلا
و .. يا صاحب الدعوة
أدعو إلى الرجز ..
الأراجيز الليلة طوبى لها ..
و طوبة للأراجوزات ..
يا صاحب الدعوة ..
و كيتاً فيك ..
سأنادم أورورا في زاهي الحضور ..
سألقاها في نغم الموصلي
و ترانيم الشاعر
و تفاريح صلاح عبدالله
و نمنمات الصوت الطلسمي
وجلكساتك ..
و ..
الرهيف قلبو بيعيش في شكو أكتر من يقينو
و ..
لا عزاء لأصحاب ( العدة ) ..
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
معتز القريش
أيجتمع الفنان
والظلامي
في قلب واحد
لا أظن
غايتو واحدة فيهن غلط فيك
شوف
الموصلي
و
عمر الشاعر
ديل مضامين
أما هادية طلسم فالتكليف عند عمر بوب ولم يفيدنا بالوضع
ولكن أظنها مضمونة برضو
لو مالقيت يسري أترك له رسالة
والأكورديون
والعود الموزون
صلاح عبدالله حا نحاصرو انا وعماد
ديك العدة اشر على الشربات
شدو متخصصة في البيض الدنماركي
ممبي زغني
ماهي سلطات
إنو تحليات
وقد نستعين بقوى خارجية
راندوك
ودكتورة منال
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
يا بركوتة كيتا
عليك عشان ركزت على بمبي ولا بنفسج بتاعتك دي وما ذكرتنا
أنا وسندو وماهي وصارا (سارا) وراندوك وخالتو ناهد
حندهش حنانك ذاتو بالكبيبة الشامي
والبيض الأسكتلندي
والترايفا الهندي
وحاجة كدة مخصوص عشان نسمم عماد عبدالله
ونخليهو ما يعرف شكو من يقينو
يعدين يا بورداب الما بيجيب عايلتو
حنديهو من طبق عماد عبدالله
الخايف يجيب حماية
ولا عذر لمن أنذر
لكن بيني وبينكم الما بيضوك جلكساتي في المطبخ كل عمرو ضايع
عشان دي مهارة فلتة بس لزوم الجندر أنا ما قاشرة بيها
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: شادية عبد المنعم)
|
شدو ..
زمااااان , جعفر نميري فرط في قائمة الطعام في القصر الجمهوري ..
وواحد مرمطون ريبنا في القصر قدر يهربها ..
لقيت مكتوب فيها ( ضمن أطباق العشا ) :
| Quote: بيض الأوز في أحشاء الكراكي |
أي و الله .
و كنت أعرف من الطير : أم قيردون و الحدية و أم رخم الله و الجداد و السواسيو ( باعتبارها ليست جداداً ) و أب صنيفة و الغرنوق و مالك الحزين وود أبرق و السقد و الصقر و البعام و النعام و القمرية و شيطان الكوشة و الليلبو و أب ضريرة و شاحد الله و الحنكولة و قدوم أحمر و .. و ..
ما كان فيهم ( أوز ولا كراكي ) ..
ولا ديك العدة !!!!
دحين .. | Quote: البيض الأسكتلندي والترايفا الهندي |
ديل شنو يا جعفر ؟؟؟
و حتى نكون في السليم يا بنية .. فأنا جايب ( أم فت فتي ) معاي ..
( الدنيا ما معروفة ) ..
و الله يكضب الشينة .
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: شادية عبد المنعم)
|
شدو يا حبيبة...
ما تخسري الرجال ديل التعب فيهم ما جايب هموا!!! 
بعدين ما يعملوا ليك فيها "فنانين" و بتاعين "أورورات" و "براغات" وحاجات...
هم في النهاية ما فارزين ليك السلطة من التحلية!!!
بيلهطوا بدون فرز!!!
أما البنات فأرحميهم لأنه على وصية حبوبتي المستنيرة جداً "ما تخدمي في بيت ابوك...الخدمة راجياك في بيت راجلك"!!
أما بركات فأقطعوا قلبه بالخدمة والمراسيل لمن يبان ليهو صاحب...
باقي الوصايا برسلا ليك في المسنجر
محبتي
لك.. وللمعازيم!!
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
الآن وفي هذه اللحظة .( كنا عنوان للشبابا ) والفنان الشاب يسري صلاح ..
أمامه ويغنون معه ( الموصلي - عمر الشاعر - عماد عبدالله - أبوساندرا - ود العباسية - ضحية وإبنه -عمران بابكر - بدرالدين الأمير ) وتركتهم أنا لأكتب ما أكتب فكومبيوتر أبو ساندرا (قاعد يسمع في غنانا السمح ده ) ..
ليلة من ليالي الف ليلة وليلة ...
أما الحسان فقد أضئن الساحة بطلعاتهن البهية ..
سماع وونسة ونقة دقاقة ، وعشاء من أفخر مطاعم الدوحة ، الى جانب اللمسات ألفنية الراقية لشادية والبنيات على العشاء ..
بجيكم راجع ..
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: حسام يوسف)
|
ليله ولا كل الليالى .. لا بتتحكى لا بتتوصف..
دى غايتو إلا شوف العين .. والما شافا تانى إلا لى قدام..
أبو ساندرا العجيب .. لك كل التحيه وأنت تجمع هذا اللفيف
الراقى المدهش .. هذا تمثيل ضوئى مشع ومُضىء.. من كل أنحاء
ذلك الوطن الغالى .. يوسف الموصلى .. عمر الشاعر .. معتصم
الطاهر .. بدرالين الأمير .. عماد عبدالله .. عمر بوب .. ضحيه
عبدالغنى كرم الله .. ودالعباسيه وكل المدهشين الآخرين ..
تحياتى ... وسأواصل .... مامون
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: ودالعباسية)
|
وانا كنت وين من النت الله يقطع كأس العالم ونطحيه...يبدو لي ما كان في اسعد منكم في هذا
الكون يا ابو ساندرا وفرسان الدوحة وكريماتها...ادونا منكم نفحة بس....
يا موصلي تحياتي ...هسي لو ركبت ليك اب رفاس ما كان وصلتنا...كيف احوالك وايامك واهلك
لم اسمع بهذه الجولة الخليجية ولم اقرأ عنها الا ان وجدتك تبشر مع الاخيار في الدوحة وتكتب رسالتك الطويلة ابداعا وادب ...
صلاح عبد الله ياخي ما ترجع تغني ليهم يا امير الحسن لو تسمح ظروفك....
وكمان معاكم هادية طلسم...هسي تاني الفاضل ليكم شنو من الجنة؟
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
سلامات
وعوافي
قطاري الذي فارق البهجة والحلوين ..
وزرعت انا في فضاء الامسية (شتلة) عزلتي .. ارتل في سري لحن اشواقي ..
هي كذا وكذا .. الا انها اكثر من كذا وكذا ..
مساءا تغرد فيه الحوريات السُمر هو بلا شك (سيد) المساءات جميعا ..
وهن براقات الملامح يسرن في الارض والارض تحتفي بطيبتهن .. يرمقن بهاء الروح بنظراتهن العالية ويخاطبن المزاج بلطف انيق ان كن هادئا ورزينا.. ويشدون بحنجرة الكناري العذبة الرطبة .. (يوزعن) عن النفس شقاءها ويبلسمن جروح الايام الحزينة .. بالتاكيد ساندي وماهي وسارة كن ضياء الامسية .. لسحرهن البريء ولنقاء وسمو ارواحهن الطيبة .. هن فتيات عجيبات بلا شك .. وهن شقيقاتي اللاتي احبهن بلا شك .. واعلم ان في داخلهن كل بهاء الكون وكل سماحة الدنيا ... انهن نخلات بركات السامقات .. طيب الله عمرهن ..
وبلا شك كانت الملائكة حاضرة تنشر في الامسية عبير الجمال ورحيق الحنين .. وهل عبدالغني كرم الله كائنا من الكائنات التي تشبهنا .. قط هذا الكلام موصحيح .. انه من ملائكة السماء .. ضلً طريق عودته بعد جولة في السماوات ليتنزل علينا فيفرهد عالمنا بوجوده .. هذا الولد النبي ..
ومامون .. وزهراته الجميلات .. واحدة منهن قالت في ليلة محسن خالدعن الابداع والاخلاق.. قالت الاتي :- ياجماعة بي بساطة حقو نعتبر انو (شر) محسن هو (خير) لنا .. بالله شوفوا حكمة البنية السغيرونة دي ...
ومامون الرجل اللطيف الجميل .. قالوا تغني بغنية عركي (بخاف) ويالوجعي من (بخاف) والخوف سيد الملاذات الامنة خاصة في الحالات التي يعتريها (الحب) ..
وانا وحدي في قطار الامسية اجلس قرب النافذة المطلة علي فراغ عريض بحجم فراغ المساحة بين حمرة الشيخ وليبيا حسب وصف عوض مختار .. فراغ مليان بالنفايات الليبية واكياس النايلون وبقايا شوالات سكر كنانة ..
والاخوان (عبدالله) اقصد عماد وصلاح كانوا بهار الامسية موش .. اعرفهم فلهم في كل ليلة حزمة ضياء تبهر الحضور وتخلع الظلام .. ينشرون في المكان سحر الطبيعة ..
وهذا الذي ادخلنا اليه بالشباك بعد ان ضاقت بنا المداخل وما اتسعت .. معتصم الطاهر .. ونبيته الطيبة وزهراته اليانعات .. معتصم صاحبي شديد خلاص ومتلوم فيه لوم العدو ياخي احبك سمح ..
بكة يا ودالعمدة انت غايتو انا مشتاق ليك ومشتاق لي حلة مشتركة بينك وبين لقمان وبعض السحرة البهاليل .. انشاء الله ماتنفعك الحفلة دي .. سمح ..
العراب كان انيقا موش ولابس فل سووت ويحمل معه براءة الكون و(خبثه) فاتح لي ليهو كم شهر كدا لزوم الفرق بين الادارة وغمار الناس امثالنا لكن مافي مشكلة البركة الحضر الحفلة السمحة دي ...
شادية عبدالمنعم .. اظنها زهرة الفل الاولي في الامسية باريحيتها وجمال روحها.. انها صديقتي التي احبها لامن تأمن زاتو .. انعن زيتك ياشدو ..
وعمر بوب (والله الزول دا ) اخخخخخخخ منو .. اظنه زغني الحفلة .. والدنقلاوي الشديد من عندينا لكن نحن والشاهد الله دنافلة (نص مكنة) يابوب ونشتاق (للمكنة الكاملة) تأثرني عفويته ونبله وطيبته ..
اهاااااا نجي لي الزول السليط ونبيه (طه) ود الزين .. الزول دا قدر ما اقرا ليهو هنا في المنبر دا بتكيف منو .. ياخي شايل عودو ولافي في الزحمة البدقس بياخد ليهو(سفروق) في نص راسو ..
ياود الزين ماعافي ليك الحفلة ولا عافي ليك (هزيلتك بي) في حفلة فضيلي يوم ان قدمتك لي الرائع محمد الربيع ولم ادر انكم في الاساس اصدقاء .. ولن انسي اشارتك في بوست فضيلي لمقال الربيع في جريدة الوطن ومن يوما انا كنت عاوز الم فيك عشان اقول ليك انالما نزلتا الوصلة بتاعت جريدة الشرق الله شاهد وعالم جريدة الوطن مانزلت المقال بتاع الربيع فاتصلت في الصباح الباكر بعبد الكريم الامين انو ينزل مقال الربيع لانو انا مالقيتو وللاسف كان كيكي في مهمة عمل ميداني ولايستطيع الدخول علي النت .. وحينها اقسم بالله عرفتا انك انت الح تنزل الرابط . .. فياصديقي محمد الربيع هو صديقي الذي احبه وهو الذي اشرئب لصحبته في اي وقت . محمد الربيع زول جميل و
يتمشي بيننا كما تتمشي ملائكة الرحمة في الجنان العلية .. ياطه ليك كثير المحبة والمعزة .. ماتزعل مني سمح اخووك دايش رقم واحد وشايت الدنيا دي سااااااكت ومابيقصد اي شي من اي تصرف يحسوهو الناس انو ما صاح .. واختصارا كدا ماتنفعك الحفلة ..
ودالعباسية .. ياااااااه منو الزول السمح بالحيل ...شايل كمرتو ولافي .. انت كويس ياود العباسية ...
ابراهيم علي ياخي كلنا في الهم سوا تتخيل طارت لي الحفلة من (راصي) كنت متعشم فيها الا باقيلك القمسة مي لايسة ..
والريس ضحية .. ياريس المركب خلي الشباب يركب ...عدي بينا عدي بييينا ياريس .. بالله لو عندك مركوب قديم اديني ليهو النلبسوا في وشي السمح دا عشان اتلومتا فيك وبدون قصد والله كل يوم اقول اضرب ليك تجي الاقدار تمد ايدا بالله سلم لي علي صالح صاحبي سمح .. وسلم علي محمد ولدك دا شديد وعلي البنية الامورة وحرمك المصون .. واملنا فيك انك اكبر من تزعل مننا .. واهديك الحفلة دي عربون محبة شفتا كيف ...
اما جمال الحفلة الغايب فهو بلا شك (مايا) و(الانصاري)و(كيكي) كانوا اضفوا علي الحفلة بعدا اضافيا ... وطبعا الرونق الاكبر الغايب عن الحفلة كان (شخسناالضعيف)هاهاهاهاهاهاهااها بجيكم صادي بكرة اكان مافشيت غبينتا ماني طالع من البوست دا ...
ولكم غزير المحبة ..
وللاساتذة :-
الموصلي - الشاعر - يسري - مامون (بخاف) وسيم المحبة
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
ابو البلابل (طبعا ده اسمك الجديد) .. انا عايزه انزل اقتراحى ده فى بوستك كمان وان شاء الله تكون من الموافقين عليهو ...
رايكم شنو لو نعمل لينا رحله سنويه او نصف سنوية تجمع كل بورداب الدوحة واسرهم ونحدد ليها موعد ما يكون اجازة عشان نضمن انو الكل موجود ... وميزانيه محددة نجمعها فى وقت الرحله يعنى قبلها بى اسبوعين او شهر ونختار منطقه مفتوحه وجميله زى السيلين مثلا وباب الاقتراح مفتوح لاى مناطق اخرى اجمل ... وطبعا تكون شيه فى الهواء الطلق وح تكون مسؤوليتكم انتو معشر الرجال لانو اتخيل لى فى رحلات زى دى انتو بتستمتعو بعمل الشيه ونتكفل نحن معشر النساء بالباقى (سلطات .. حلل اخرى .. شاى بى نعناع ... وما الى ذلك) ويكون يوم مفتوح من الصباح.
ياريت لو تفكرو فى الاقتراح ده لانو بالجد فى لحظات زى الكانت فى بيت ابو ساندرا اتلاشت الغربه تماما ... وانتقل السودان بالمليون ميل مربع وبقى معانا ....
تحياتى ...
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
قال لى بدر الأمير
دعونا نتوقف قليلا ..يقصد "بورداب الدوحة"
فلا يمكن أن نقدم كل هذه النجاحات دون أن يصادفنا إخفاق
فأعلنت في صمت أن نكون صامتين كجماعة..
ولكن أبو ساندرا أراد أن يكون هو تلك الهنّة
وكانت الدعوة ..
فجئته
أحمل شماتة ..
ليس كل الشماتة..
نصفها أو انقص منها قليلاً ..
وقبل أن أحكى
فقد خذلنى ..
كل ما حدث أنني .. فى نهاية الإحتفال
حملت شماتتي وعدت بها متلفحا بالليل و الفرح ..
لست من يحب الحضور متأخرا
ولكني أترك ( التبدير) لحبيبي عبد الغني ..
ودخلت ..
كانت رائحة الجمال تفوح حتى آخر الشارع
والنور عمّ ..
والبدر ظهر
والنجوم بعثرت الضوء ..
ومعتز يعبق بالكاشف
ومحمد يصوغنا دوزنة و يفردنا نغماً و شجواً ..
والسُفرة أعدت بأيدي سفرة ..
كريمات بررة ..
أعلاها مليء بالحلال الطيّب ..
من أطايب شرقية وغربية
و سودانية وهبشية
من زغنى الهبشك ماضرّاك ..
وجوفها محتفٍ
بالمشّاى الكان نفضك ضرّاك ..
فانقلبنا إليها فكهين ..
وفى ذلك تنافس المتنافسون..
واكتمل العقد ..
فاذا بنا
على أرائك جالسون
وليس على تفاصيل ..
فقد أغناني عبد الغنى عن ذلك
لكن لمن يرجع النجاح ؟
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
يا سلمى كلامك صاح لكن بعض الرجال الزي مثل صلاح عبد الله
يا وهم عليك أمان الله ما في حاجة من الفنادق غير الكفتة
الباقي كلو صنع راندوك وماهي وشخصي الماهر
غايتو عشان خاطر وجدان الحنين ما بدعي عليك وأن شاء الله ينفعك
لكن ثانمي كان الله مد في العمر
بعزمك كسرة وكمونية من حمدة جارتنا في الخرتوم
كان اجيبو بالتيارة
ود رملية
يا ضوع البنفسج في المساءات الحزينة
حتوحشني من أمس
ينعل زيتك
امشي اسلف ليك ثلاثة ألف ريال واتكلمهم معاي في الخرتوم
يا خ ده شنو الزول يخلي نص هنا ونص هناك
ليه كلو ما يبقى هنا ولا هناك؟؟
يا معتصم
خصمتك بالنبي خوض في تفاصيل التفاصيل
صدقني وحشونا كل الناس الما جونا تلك الأمسية
عبد الغني كرم الله
سؤال برئ
يا جماعة الزول ده زول ولا ملاك متخفي؟؟
يا زول انت حزمة ضوء وتكون من نور ذاتو
ياخي ربنا يعافيك ويرضيك محل ما تقبل
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
نرحب من علي البعد بالاستاذ الصديق الموصلي ,والبلبة (فنانتي المفضله )الاستاذة هادية طلسم , وابن حلتنا الاستاذ عمر الشاعر , وبنات رشيدة بلابل الدوحه العزيزات ساندرا وماهي وسارة , وكذلك بنتنا الغالية شادية .
كل هذا الجمال كان ينقصه الترتيب ولولا عظمه الضيوف , لما كانت هنالك ليلة ليلاء ,العجوز ابوساندرا فشل كعادته في الترتيب لهذا اللقاء الكبير بضيوفه , فقد علمنا بهذا اليوم الخاص جدا بالصدفه , اي بعد سفرنا , ولو علمنا قبل ساعات لما سافرنا, ايضا هنالك غياب لبعض اعمدة المجموعه .
علي العموم يابوساندرا انشاءالله ماتنفعك , اما البقية والله فرحنا لفرحكم .
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: محمد ابراهيم قرض)
|
صديقنا ودرمليه
افتقدناك يومذاك وافتقدك ذلك الجمع وانت واسطة عقد التجمعات وفاكهتها
وأؤكد لك ان ذلك الحفل قد نفعنا ، غسل عنا هموم الغربه وضغوط العمل ، وانت تعرف ايها العزيز ان الانسان بطبعه يحب الالفه والتآلف الا من ابى .
كان النغم جميل والحضور جميل ، عزف الوتر وصدحت الحناجر ، ضحك الحضور كثيرا وتبادلوا القفشات والاخوانيات والمناكفات الحميمه المحببه
جاء فى الاثر عن الشيخ الغزالى : -
من لم يحركه العود واوتاره
ولا الربيع وازهاره
فاسد المزاج صعب العلاج
رقص معتز كل انواع الرقص ، رقصت الحسان ، رقص كل الحضور ، شاركوا بالغناء ، لمعت الاعين طربا ، صفقت الايادى ، تحركت الارجل حتى الشتر مثلى رقصوا , واخيرا تفرقوا جذلين على أمل فى لقاء آخر
من المؤكد سوف يعوضك الجميع ما فاتك ، عندما يعتدل الجو ويرجع الجميع بعد الصيف سوف نتبنى اقتراح الاخت رندا
لك الود والتحايا وأهنأ بالا واتمنى لك الاستمتاع اينما كنت
enjoy your time
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
ابو ساندرا ، تنفعكم انشا الله ، وشوق شديد لتلك الايام التي ما تزال ذكراها عالقة في القلب وفي البال دائما ، كنت امس فى التلفون فكلمت الشاعر ، وبدر الدين الامير الذى ابدى (زعله منى ) قل له زعلك ما بندورو ، لانه من الذين مدوا لى يد العون والمساعدة وذلك جميل لن انساه له ابدا ، وانت لم تالو حهدا للتسرية عني يوم ان حلبت لى صوت العميرى في ذلك الكاسيت ويوم ان قراناما كتبته عن زهاء والعميرى ، لكم الحب لما قدمتموه لى فى تلك السانحة جميعكم ، ولكم احزنني اذ تمنيت ( لو كنت معاكم )تحياتي لمحمد ابو عاقلةعلي نحو خاص ، واولاد عم عبد الله الحميلين حد الجمال ما يقيف
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: ابوبكر الامين يوسف)
|
ليلة ويا لها من ليلة ..
تمنيت أن يكون كل من يقرأ هذا البوست معنا ..
لم تكن ليلة عادية ..
ما هذا الجمال .. ما هذا البهاء .. للحظة تخيلت أنني في ( نص الديم ) ..
تأكدت تماماً أن يوسف الموصلي لديه ( خُدّام ) فما يفعله لا يخرج من شخص طبيعي !!
هذه الألحان ، هذه ( المَلَكَة ) العالية ، والغناء الذي نهلناه من هذا المعين الذي يخبئ الكثير من الدرر الغوالي..
في لحظات استطاع الموصلي أن يوجه اصوات بنيات ابوساندرا ، واستطاع أن يخلق منهن كوارال ( مبالغة ) والبنيات أصواتهن جميلة وما خذلنّنا ..
غني الموصلي فحلّق بنا في فضاءاته اللانهائية ، فسبحنا ، ورقصنا وثملنا من نشوة الطرب الأصيل ..
حينما تتكامل الموهبة مع العلم ، تصنع شخصاً مثل الموصلي ، يدهشك في كل شئ ، في فنه ، في ثقافته العالية ووعيه ، في تواضعه الجم ، في ظرفه وخفة دمه ، في أدبه الشديد ، وبديهته الحاضرة ، ..
مثل هذا الهرم ، تتقاصر قاماتنا أمامه حتى تكاد لا تُرى ..
وغنى عمر الشاعر ، ففعل فينا ما فعل ، وتيقننا أن السودان ما زال بخير ..
كما غنى المطرب الشاب يسرى صلاح ، والذي وجد فرصة لا تعوّض في الغناء أمام هؤلاء العمالقة ، يريهم أمكاناته الصوتية ،، ويسمع منهم ..
شخصياً ولمعرفتي بيسرى ، ولتسجيلنا له شريطاً في السابق ، أرى أن المستقبل ينتظره ، فصوته يعتبر إضافة حقيقية.
ولا يشبه غيره من الأصوات ،، وكل أمنياتي له بالتوفيق ، وأن ياخذ بيده أحد هذين العملاقين ، أو كلاهما ..
وكالعادة مارس ابوساندرا مؤامراته ، وعاونه في ذلك عماد ، وطلبوا مني الغناء !!! من يغني في حضرة الموصلي ؟؟؟ أنهم ( لا شك ) واهمون ..
فمثل الموصلي لا تستطيع ( تأدباً ) أن لا تصطنت اليه حينما يغني ، ناهيك عن الغناء أمامه ..
وبعدين غناء الونسات غير يا شباب ..فغنانا ( الونساتي ) لا يتجاوز حدود الغرفة التي ( نتونس ) داخلها ..
بدرالدين الأمير ترصدني وقصد ( إشانة سمعتي ) فصبراً يا بدر ، والأيام بيننا ، والجايات أكثر من الرايحات ..
وأذكرك أن هذه الحفلة تمخض عنها قرارات هامة ، وهي أن يكون هذا الفرح مستمراً ، شهرياً ، فجهز حالك ( إذا بتريد ) يا ظريف ..( لكن ما تقولي لي رقاص رقيص .. مبالغة .. الرقبة )..ههههههههههاي .. وأنا برضو الشربت البيبسي؟؟
مكنتك خفّت يا خال .. محتاج ليك ( عَمرة ) واسبيراتك ، معدومة ..
سرقنا لحظات بعيداً عن الحضور ، أنا وعماد وعبدالغني ومأمون ، فعزفت ( الفرح المهاجر ) وشدا بها عماد بصوته الجميل .. فكان مسك ختانا أنا ومن ذكرتهم ..
فذهبنا ( ناسين ) قلوبنا هناك حيث ( فرح الموصلي المقيم )..
سيغادرنا الموصلي متوجهاً الى مقر عمله ، كل الأمنيات له بالتوفيق ..
ما يصبرنا ويزيدنا فرحاً ، أننا قد انتزعنا منه وعداً بالحضور ( مخصوص ) الى الدوحة وقضاء بعض الوقت معنا .. وفي انتظار ذلك اليوم ..
ساحاول العودة مرة أخرى مع بقية الحضور لنتناول بعضاً من ذكريات ذلك اليوم البهيج ..
ويا زمان هل من عودة هل ؟؟؟
صلاح عبدالله
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: Salah Abdulla)
|
لا يا صلاح عبدالله الخطير ..
فلا تبخس نفسك أشياءها .. والغُنا الونساتى ده ذاتو قمة القمم
وبعدين الونسه مالها .. إنت قايل الحياه دى شنو... الحياه
ما ونسه .. وأروع حاجاتنا فى ونسه شفيفه كده وراقيه ومدهشه..
عشان كده سأفرد فى هذه المساحه .. حكاوى عن المشاهد الخلفيه ..
فى تلك الليله الملائكيه .. على شرف الأمانى السندسيه..
خلف الكواليس ! كان المكان ممر ضيق ( بجانب المطبخ )
خلف صالون أبوساندرا .... ولكنه كان رحب وفسيح وأكثر
إتساعاً ورحابة ووسعاً من الساحه الخضراء وميدان الربيع
حالياً ! .. وكان خلف الصالون ( غُنا دكاكينى ) من الأخوين
عبدالله .. وعزف تاريخى وغناء على العود من صلاح العجيب ومن
عماد عبدالله الصداح .... وكنت أنا وصاحبى عبدالغنى كرم الله
مشدوهين أمام عملاقين يغنيان الفرح والجمال .. وأيما غناء!
حينئذٍ صدقت تلك المقوله .. بأن تحت السواهى دواهى وإبداع
غير متناهى ... فإذا بنا ننغمس بى غُنا الحيارى فى بحر من
الحيره ! فيا لنا من سُكارى ! آمنت بالذى شرح الغُنا وبالذى
نشر السنا.. وبالذى جعل الروائع ممكنه !!
قلت لى عبدالغنى .. يا زول ديل ما فنانين حيره ! لكنهم
فنانين ( حِيره ) البخلو العالم يحار .. ويحير الناس حيره!
( ياخى دى ناس شنو الكلو ما تهبش حاجه تلقاهم ماشين قدامك )
ديل أولاد العجب العجاب ! القرارم ما بتجاب ! فهيهات.. هيهات
لا جنٌ ولا سحره بقادرين على أن يلحقوا أثره !
وحينما عزف صلاح عبدالله وشدا عماد أدركت يا رندا بأن القمه
قد تكون مُختبئه خلف تلك العمه !. وأنو القمه برضها بتكمن فى
تلك المقاعد الخلفيه .. وأنو ذلك الشكل الهرمى ما عندو قاعده
لأنو أسفل ذلك الهرم شكل هرمى تانى ... وقمم أخرى تغوص فى لُجه
من الضياء الرهيب الخفى الما عندو حد ولا عد .. وصدق ذلك الذى
قال ( يجوكم أولاد الزرقا يحيروكم ) ..
مشهد آخر : يا ود العباسيه يا صاحب الكاميرا الذكيه.. لو
بس مره تدخل لينا الأماكن الخلفيه دى .... وبعدين وين صور ناس
العباسيه! .. وبنات العباسيه !!
مامون
| |
|
|
|
|
|
|
|
|
|
Re: عندنا : الموصلي ، هادية طلسم ، عمر الشاعر ، يسري صلاح وفول وكوارع والدعوة عامة (Re: أبو ساندرا)
|
Quote: أقول أن سبب نجاح تلك الأمسية (الى جانب كثير من الأسباب / العوامل) هو أبوساندرا !!
فلولا أريحية ، وبساطة ، وجمال ، وكرم هذا الرجل الجميل لما نجحت تلك الليلة ..
وهو صديق للجميع ، وله مع كل واحد ، حكايات ، ذكريات ، علاقات .. فكان هو مركز الإرتكاز |
ومن الحب ما قتل يا صلاح عبدالله
وعين الرضا كليلة ياصديقي
تطوقني - دائمآ- بما أنا دونه وبمراحل
تراني بعيون المحب
وذكريات نضال مشترك
بوجودك وأخوك هنا ، تكون الغربة محتملة وغياب الأصدقاء
وترافقني الطمأنينة الشاملة
| |
|
|
|
|
|
|
| |
أبو ساندرا
عبدالغني كرم الله بشير
خضر حسين خليل
ابوبكر الامين يوسف
Elmosley
أبوذر بابكر
معتز القريش
Emad Abdulla
بدر الدين الأمير
ahmed haneen
Kostawi
ضحيه ابراهيم
حسام يوسف
ودالعباسية
Saifeldin Gibreel
Omar Bob
ebrahim_ali
معتصم الطاهر
nazar hussien
يوسف سعد
ودرملية
بهاء بكري
wadalzain
سلمى الشيخ سلامة
Muna Khugali
عبد المنعم سيد احمد
فيس بوك
تويتر
انستقرام
يوتيوب
بنتيريست