أستعير من أمي ( حفظها الله) مقولتها الحنينة ( الله يريحك دنيا وآخرة يا ولدي زي ما ريحتني ) .. وأقول لك ( الله يريّحك دنيا وآخرة يا موصلي زي ما ريحتني ) قبل قليل كنت أتابع برنامج في تلفزيون السودان .. وغنت فنانة اسمها ايمان توفيق أغنية الفرح المهاجر .. لن أتحدث عن الفنانة هنا ، بل الأغنية .. حينما نزل شريط يحمل نفس اسم الأغنية الأسواق ، وغنت فيه الفنان ( حقاً ) حنان النيل هذه الأغنية ، أسرعت لمعرفة ملحنها .. لم أتفاجأ عندماعرفت أنه يوسف الموصلي .. فمثل هذه الدرر لا تأتي إلا من أهل الفن (الأصليين) .. والله يا موصلي الغنية دي مريحاني راحة (السنين) لكن قرّبت تكتلني .. الكلمات للشاعر الرقيق مختار دفع الله .. وأظن مختار دفع الله لمن كتب القصيدة دي ، لم يكن معه شيطان الشعر ، بل كان معه ( أبوهم الذي علمهم الشعر زاتو ) فكان شعراً ، سحراً .. ونوع الشعر ده ياهو البيخليك (معسّم) ومشلول الحركة الى أن تنتهي الأغنية أو الإلقاء .. الموصلي وحنان النيل ، لا إله إلا الله .. حنان النيل ، صوت حينما تستمع اليه لا تدري من أي مكان يأتيك هذا الصوت والى أين سيقودك . فهو يتخللك بهدوء (وعنف) وقوة (ونعومة) وفرح (وألم) وتفاؤل (وحنين) .. ( الله يريّحك دنيا وآخرة يا موصلي زي ما ريحتني ) وكنت قد فقدت الأمل تماماً فيما يقدم هذه الأيام ويطلق عليه (مجازاً) غناء .. الى أن سمعت هذه الأغنية التي أعادت الي كثيراً من الأمل في أننا (لسه) ممكن نكون (ناس مبدعين وكويسين) .. الأغنية لمن تعجبني بسجلها في شريط على الجهتين و أشغلو ، ويقلب براهو .. الشريط ده كنت برسلوا ( ليها ) شهرياً ، نسختين تلاتة ، ولمد أربعة شهور. في بوست سابق للأخ عماد عبدالله وكان عن أغنيات أكتوبر ، أجريت فيه مقارنة بين أغنيات الأمس واليوم ، وأورد لك هنا جزء منها :
Quote: العزف ، ركّز على الآلات (كل آلة على حدة) وعلى العازفين وح تلقى أنه كل ( فردة من بلد ) وكل واحد شغال بالطريقة الهو شايفها ، وكل واحد عايز يظهر امكانياتو ، ويعمل فنيات من عندو ، وهي في الآخر تؤثر على جودة العمل وشكلو العام .. وتلقاهم كتير بيعاينو للفنان بي عيون زايغة كده زي الخايفين منو كده وكأنهم منتظرين منه حركة عشان يستمروا في العزف ، أو يسألوه ( كده كيف ؟؟) يعني ما واثقين من شغلهم ، في حين أنه مفروض أنه الاغنية عملوا ليها بروفات ووقعوها ، وحفظوها ، وبعد كده عليهم التنفيذ ..
هذا هو حال أغنيات اليوم ، وكذب من قال غير ذلك (إلا قليلاً) وقليلاً دي ياها زاتها نوع الفرح المهاجر دي ( الله يريّحك دنيا وآخرة يا موصلي زي ما ريحتني ) ..
هنا الأوركسترا مية المية ، وناس محمدية و د.عبدالله شمو ( دلّعوا ) الآلات دلع الدلع .. وطلع الشغل يريّح جوه القلب . يعني القصة (ما هردبيسة) يا جماعة القصة محتاجة ليها لي زول (فنان) بالجد ، زول موهوب ، ومبدع دارس وعارف هو بيعمل في شنو ، وبيمتلك أدواتو كاملة ، وبيعرف يتعامل مع شغلتو باحترافية عالية ، ويكون معاهو ناس يختوا قدامهم النوتة الموسيقية زي ما كانوا خاتينها ناس محمدية في تنفيذ الأغنية دي ، وبعد داك شوفو الغنا البيطلع ح يكون شكلو كيف .. يا جماعة ( العلم سمح ) كدى شوفوا جماعة أنس العاقب ديل ( ليل الشجن وعمر الهنا ويابلدينا واسالمك في عيون الناس ) . هسى ده غنا ( نُصاح ) ده نوع الغنا اللي لو ما عملت حسابك وما كنت فاطر كويس ، بيوديك ( بعشر ) .. كم نحن بحاجة الى موصلي وأخوته الأكارم من ( أهل المغنى ) الحقيقيين ليعيدوا لنا بعضاً من ( سمعنا النضيف ) الذي لعبت به أصوات ( ونهيق ) مدعّي الفن ، الذين أمتلأ بهم السودان ، كل واحد شايل ليهو عود أو واقف قدام أورغن ، اعتبر نفسو ( فنان وكبير كمان ) وهم ( معظمهم ) لا يرقون الى مستوى ( منادي في موقف حافلات الصحافة زلط ) ..
وآخر قولي أن ( الله يريّحك دنيا وآخرة يا موصلي زي ما ريحتني ) ..
صلاح عبدالله
06-29-2006, 05:59 AM
Emad Abdulla Emad Abdulla
تاريخ التسجيل: 09-18-2005
مجموع المشاركات: 6751
Quote: بسجلها في شريط على الجهتين و أشغلو ، ويقلب براهو
و ده الحصل .. حدث ذلك في العام 1995 .. كانت الطفلتان تنامان و تلعبان طوال الطريق في مقعد السيارة الخلفي .. من الرياض و حتى الخرطوم .. و ( الفرح المهاجر) تنام فينا .. خارجة من جوف الكاسيت .. و الدنيا خريف .. و حنان النيل تمد مدها فينا .. و الثعبان الأسفلت يتثنى طرِبا .. الله الله .. سكر يا صلاح عبدالله .. سكر حد الطنبجة .
بعد أحد عشر عاما .. مازالت آلاء ترفض سماع الأغنية . لأنها - ببساطة - : بتبكيني يا بابا , أغنية حنينة شديد و بتذكرني السودان .
و يا موصلي , صلاح عبد الله صدق : ( الله يريّحك دنيا وآخرة يا موصلي زي ما ريحتني )
يديك العافية يا ود عبدالله و يسلم أستاذنا الموصلي .. و العظيمة حنان النيل
06-29-2006, 07:19 AM
Mutwali Malik Mutwali Malik
تاريخ التسجيل: 12-08-2005
مجموع المشاركات: 2720
ولدنا صلاح عبدالله ولانك انت برضو فنان الله يريحكم دنيا واخرة ودي شاملة حنان النيل الموصلي ومختار دفع الله فعلا الواحد ابتداء يحس انو العلم والدراسة اصبحت لها القدح المعلي في تشنيف اذان المستمع بالجميل والجيد من الغناء وريحونا عشان انحنا نريحكم بالسمع وانتقاء الجميل
06-30-2006, 05:56 PM
Elmosley Elmosley
تاريخ التسجيل: 03-14-2002
مجموع المشاركات: 34683
تعرف يامتوكل توم من (أكعب) ماحدث في العقدين السابقين هو خروج اكبر الكفاءات الموسيقية من البلاد (نادمين) على فراق ذلك الجمهور الكبير العظيم غاضبين على الفجوة التي ظهرت بين الاجيال فحدث ماحد\ث من أجترار في عالم الابداع الفني ادى الى سبات عميق في عملية الخلق والتجديد دعواتك معنا أن تعود كل الطيور المهاجرة الى الوطن
ومحبتي لك
06-30-2006, 05:50 PM
Elmosley Elmosley
تاريخ التسجيل: 03-14-2002
مجموع المشاركات: 34683
الحبيب عماد قول لالاء عمك الموصلي ذاتو لما يسمع الفرح المهاجر فانه يبكي لانه كان يتمني أن تكون تلك مجرد نقطة البداية للفنانة صاحبة الصوت العميق الدافئ حنان النيل ولكن ترى اين هي الان وماذا تفعل
تحياتي يا آلاء بالمناسبه عندنا عرسان كتيرين محمود وملهم وشوبان تسلمي
06-29-2006, 09:32 AM
Mutwakil Mahmoud Mutwakil Mahmoud
تاريخ التسجيل: 04-13-2002
مجموع المشاركات: 470
دعوة صادقه...من قلوب صادقه... عامرة بالمحبه...والتقدير العالي السامي...لموسيقي سامي...وفي حق مبدع وفنان صادق...دعواتكم هذه سوف تنزل علي أبو هديل بردا وسلاما...لأني أعرف سوف يتقبلها ذلك العبقري حينما تأتي ممن يستمعون لأعماله الموسيقيه ليطلقون بعدها إشارات الرضي أنا أعلم عنه جيدادعواتكم هذه هي الآن عنده أعلي مقاما من تلك الدرجة العلميه والتي في سبيلها ضحي بالغالي والنفيس ليبني لنفسه وموسيقاه ولنا ووطنه مجدا فوق مجد...أو ليس أكثر إسعادا للمبدع الموسيقي أن يسهر الليالي ليسكب عصارة فنه وأحساسه ليصوغها لحنا لينتظر في الصباح رأي محبيه ومستمعيه? ريحتموه الله يريحكم دنيا وآخره أبوهديل لعمري أحسبها قلادة أخري من أعظم ما تقلدت ومن أجمل ما سمعت صديقي نم قرير العين هانيها
إنه الفرح الجميل.... ياأيها الفرح المهاجر مازلنا في بداية الطريق وعهدي لك سوف نواصل ومن غيرك ليقدر أن يكون حاديا لهذا الكرنفال الموسيقي أشواقي حين تسعي إليك تشتاق أبوهديل
أخوكم دمتوكل
06-30-2006, 06:05 PM
Elmosley Elmosley
تاريخ التسجيل: 03-14-2002
مجموع المشاركات: 34683
الحبيب دكتور متوكل أخي العزيز الحبوب إنني دوما أنتهز الفرصة لأوكد شهادتي الكاملة بانك من أعظم الذين وهبوا للفن السوداني في نكران ذات أقول لك بان ماقدمته للموسيقى السودانية في سيديهات الاستاذ وردي والتي كتب لها أن تكون موؤدة في القرن الواحد والعشرين لهو عمل يشهد لك به اكثر من اثنان وعشرون موسيقيا سودانيا واثنا عشر موسيقييا أمريكيا وعدة مهندسين ومديرة انتاج فني أجرت لهم الفنادق للسكن ووفرت لهم طيب المأكل وكل وسائل الراحة بما فيها العلاج نحفظ لك هذا الجميل ونسجله الان في مدوناتنا التي ستظهر في كتاب ليشهد لك ولامثالك (صلاح محمد ابراهيم) \ولبروفيسور معز عمر بخيت الذي أنا بدعوة منه الان موجود بالامارات العربية أشرف علي البصمات الاخيرة للسي دي الخاص بالفنانة الصاعدة شروق ابو الناس
إن التردي المريع الذي تشهده الساحة الفنية (الغنائية) في السودان تجعلك تكفر بكل ما ينتمي لذلك الضرب من الفنون في البلد .. مع هذا (الكم) الهائل من (المؤدين) وقصدت هنا استعمال (كم) بدلاً من (عدد) وهي التي تستعمل للـ(Uncountable) زي الدقيق والتراب والسجم والرماد ، لأنه المغنيين في السودان بقو أكتر من تراب الارض وما بيتعدوا , وأقول مع كمهم هذا فان انتاجهم مقارنة مع هذا الكم يساوي ( صفـــــر كبير ) لأنهم ببساطة شديدة ليس لديهم شئ !! فاضيين ... فمعظمهم يردد أغنيات الأجيال السابقة ، أغنيات العصر الذهبي ، وحتى إنتاجهم الخاص ، أخير منو (تنوم بايت القوى) غنا مسيخ وموسيقى بايخة ، وحاجة محزنة .. ووسط حالة الاحباط و (القرف) هذه يأتيك إنتاج مثل الفرح المهاجر ، فيعيد اليك بعضاً من ثقتك التي اضاعوها مدعّي الفن .. والملاحظ أن مثل هذه (الإشراقات) غالباً ما تصدر من الموسيقيين الدارسين ، المتعلمين ، الموهوبين .. وهذا بالتأكيد لا يعني عدم وجود انتاج من غير خريجي المعهد ، فهناك ملحنين ، مطربين ، مبدعين ، أمتعونا بانتاجهم الراقي وأصواتهم الجميلة ، وعلى سبيل المثال ، الهادي حامد ، الخالدي ، عامر الجوهري ، وغيرهم .. ولكن يظل انتاج الموصلي وصحبه (متميزاً) .. ما رأيكم في توزيع شريط الحزن النبيل للراحل مصطفى سيدأحمد ؟ وهل هناك ابداع أكثر من ذلك ؟ حتى الدارسين يعجبهم انتاج أستاذنا الكبير الموصلي ، وهذا عبده الصغير يستعير مقدمة أغنية الأماني السندسية ، لإغنيته يا زاتي من عبر القرون جيتك أنا ، كما أنني قد سبق وأوردت رأي الأستاذ عثمان النو في الاستاذ يوسف الموصلي في بوست سابق لا أتذكره الآن .. هل تبينتم حجم خسارة أن يكون مثل الموصلي خارج السودان ؟؟ العزاء أن العالم أصبح بلا حدود فاصلة ، ويمكن أن نتلقى بعضاً من رحيق علم وموهبة وفن أستاذنا الموصلي .. عفواً استاذي لما أوردته أعلاه في حقك ، فقديماً قال أهلنا ( الشكرو قدامو نبذوه ) وتفصلني منك مسافة آلاف الكليومترات ، ولكن تنعدم هذه المسافة بينك وبين قلوب جميع السودانيين ..
ويبدو أنني أبحث عن سبب ( لأشّكر ) به أستاذنا الموصلي .. ووجدت ضالتي في أغنية الفرح المهاجر ، التي كنت أعتقد أنها له لسنوات طوييييييلة جداً .. ويبدو أن صديقي الذي (يورّد) لي الشرايط والذي أثق جداً في حبه (للغنا) وغزارة معلوماته قد ( دقس ) أيضاً لسنوات طويلة .. فالأغنية يا سادتي ليست للأستاذ الموصلي !!!! فهي للأستاذ / الأمين عبدالغفار ، نعم هي له .. ولم أكن لأعلم ذلك لولا ماسينجر ( تحت تحت كده ) من أخونا (الكبير) عيسى ، الذي زودني بمعلومات كاملة عن تلك الأغنية التي نسبتها (دون قصد مني) للأستاذ الموصلي .. وقد أستنتجت سبب (دقستي) ودقسة وصديقي الذي زودني بالشرايط والمعلومات عنها من رسالة عيسى .. وهي أنو ناس السمندل الناس الفهمانين (ظبطوها) ،، يعني ريحة ( العلم ) والموسيقى (الفاهمة) فيها .. وأعتقد أنني قد حققت ما كنت أرغب به ، وهو أن أسلط الأضواء على أستاذنا الموصلي ، وآخذه كرمز للموسيقيين ( المتعلمين ) وبصماتهم الواضحة في الارتقاء بالموسيقى والفن في بلادي .. والأمثلة التي سقتها لانتاج الموصلي ولاسهاماته ، تكفيني عن أغنية الفرح المهاجر التي أختها دليلاً لأتحدث عن أستاذنا الموصلي . المتابع قد يلاحظ أنني نتحدثت عن الأغنية ولم أركز على الأغنية كثيراً ، فقد أخذتها مثالاً للموضوع الأساسي .. استاذتنا الموصلي ، مهذب وفنان حتى في عدم دخوله لهذا البوست وتصحيحي ، خوفاً من أن يتسبب لي في حرج !! بالله شوفو الناس لمن يكونو فنانين بيتصرفوا كيف ؟؟ يا موصلي ، أظهر وبان عليك الأمان ، دي دقسة صغيرة ، وبصراحة لم تهمني الأغنية بقدر اهتمامي بتسليط الضوء على انتاجكم أنتم يا أهل المغني .. وأخوك ما عندو قشة مرة ،، ديامي ( صاقعة نجم ) والقصة عادية يا راجل يا فنان .. تعال كلمنا عن تجاربك ، رؤيتك للحاصل وح حصل في السودان في مجالكم ، مشروعاتك ، أمنياتك لأهل المغني الفي الداخل . . ولولا ماسينجر Isa عيس لظلت الفرح المهاجر (ملكاً خالصاً) لأستاذي الموصلي ، وهو يستحقها ..
منتظرينك يا أستاذ .. اذا وجدت متسعاً من الوقت ... وبرضو(الله يريحك يا موصلي دنيا وآخرة زي ما ريحتني)
دقة سريعة : Isa عيسى والله أنت راجل (فنان بالجد) قلت ترسل لي ماسينجر (تحت تحت) أخير من ما (تفكها) في البوست ، والله حيرتوني بأدبكم ورقتكم ، والموضوع يا عيسى بسيط ، والبوست ده أنا ناوي أمشيه وأشفي غليلي ،وأسبع من ناس الغنا الأصليين ، خاصة وأنه البوستات الايام دي غبارها في السماء.
06-30-2006, 05:37 PM
Elmosley Elmosley
تاريخ التسجيل: 03-14-2002
مجموع المشاركات: 34683
صلاح الجميل صدقني كلامك الصادر من القلب ده في غالب الاحيان سوف ينتج اغنيه تدي ليك الفرح المهاجر ذاتها كتافي كبير هذا شعور وأحساس عميق منك دخل الي جذر أعماقي ومده سيكون عملا جديدا نحن أهل الموسيقى في السودان لم نجد منها مالا يجعلنا نفهم المعنى الاصيل الحقيقي للاحتراف الا أنه وهبنا أمثالكم ممن يستطيعون أن يشعلوا ثورات من هوج الرياح الفنية فتدفعنا الى ساحل محيط التجديد دون خوف من غرق.
أستعير من أمي ( حفظها الله) مقولتها الحنينة ( الله يريحك دنيا وآخرة يا ولدي زي ما ريحتني ) .. وأقول لك ( الله يريّحك دنيا وآخرة يا موصلي زي ما ريحتني ) قبل قليل كنت أتابع برنامج في تلفزيون السودان .. وغنت فنانة اسمها ايمان توفيق أغنية الفرح المهاجر .. لن أتحدث عن الفنانة هنا ، بل الأغنية .. حينما نزل شريط يحمل نفس اسم الأغنية الأسواق ، وغنت فيه الفنان ( حقاً ) حنان النيل هذه الأغنية ، أسرعت لمعرفة ملحنها .. لم أتفاجأ عندماعرفت أنه يوسف الموصلي .. فمثل هذه الدرر لا تأتي إلا من أهل الفن (الأصليين) .. والله يا موصلي الغنية دي مريحاني راحة (السنين) لكن قرّبت تكتلني .. الكلمات للشاعر الرقيق مختار دفع الله .. وأظن مختار دفع الله لمن كتب القصيدة دي ، لم يكن معه شيطان الشعر ، بل كان معه ( أبوهم الذي علمهم الشعر زاتو ) فكان شعراً ، سحراً .. ونوع الشعر ده ياهو البيخليك (معسّم) ومشلول الحركة الى أن تنتهي الأغنية أو الإلقاء .. الموصلي وحنان النيل ، لا إله إلا الله .. حنان النيل ، صوت حينما تستمع اليه لا تدري من أي مكان يأتيك هذا الصوت والى أين سيقودك . فهو يتخللك بهدوء (وعنف) وقوة (ونعومة) وفرح (وألم) وتفاؤل (وحنين) .. ( الله يريّحك دنيا وآخرة يا موصلي زي ما ريحتني ) وكنت قد فقدت الأمل تماماً فيما يقدم هذه الأيام ويطلق عليه (مجازاً) غناء .. الى أن سمعت هذه الأغنية التي أعادت الي كثيراً من الأمل في أننا (لسه) ممكن نكون (ناس مبدعين وكويسين) .. الأغنية لمن تعجبني بسجلها في شريط على الجهتين و أشغلو ، ويقلب براهو .. الشريط ده كنت برسلوا ( ليها ) شهرياً ، نسختين تلاتة ، ولمد أربعة شهور. في بوست سابق للأخ عماد عبدالله وكان عن أغنيات أكتوبر ، أجريت فيه مقارنة بين أغنيات الأمس واليوم ، وأورد لك هنا جزء منها :
Quote: العزف ، ركّز على الآلات (كل آلة على حدة) وعلى العازفين وح تلقى أنه كل ( فردة من بلد ) وكل واحد شغال بالطريقة الهو شايفها ، وكل واحد عايز يظهر امكانياتو ، ويعمل فنيات من عندو ، وهي في الآخر تؤثر على جودة العمل وشكلو العام .. وتلقاهم كتير بيعاينو للفنان بي عيون زايغة كده زي الخايفين منو كده وكأنهم منتظرين منه حركة عشان يستمروا في العزف ، أو يسألوه ( كده كيف ؟؟) يعني ما واثقين من شغلهم ، في حين أنه مفروض أنه الاغنية عملوا ليها بروفات ووقعوها ، وحفظوها ، وبعد كده عليهم التنفيذ ..
هذا هو حال أغنيات اليوم ، وكذب من قال غير ذلك (إلا قليلاً) وقليلاً دي ياها زاتها نوع الفرح المهاجر دي ( الله يريّحك دنيا وآخرة يا موصلي زي ما ريحتني ) ..
صلاح .. أنت ذاتك الله يريحك دنيا وآخره يا خوي زي ما ريحتني .. على قول والدتكم الحبيبه .. وكما هاك دي من والدتي المحسيه بشلوخها .. "نورن إلا باركا أنجه تو .." ولمن لا يجيدو النوبيه .. بارك الله فيك يا إبني ...
وبعدين تعال .. الموصلي دي متين ما كان مريح .. فقط عندما يبعد .. عمرك سمعت ليك صوت كنار ولا بلبل غريد وما أطربك .. الموصلي أعتبره هو نفسه الفرح المهاجر ...
من أهم الفوائد لسودانيز أون لاين وغيرها من المواقع ، أنها تفتح لك قنوات للتواصل مع غيرك.. وهي كذلك توفر لك كماً من المعلومات لم تكن لتجدها إلا عن طريقه .. وها أنا الآن أحمل مشاعر بلد كاملة نحو أستاذنا يوسف وأوصلها له دون جهد يذكر .. رغما أنني من النوع الممكن تسألني عن أغنية وأنا نايم أقول ليك سيدها منو ، إلا أنني ، حريص جداً على أن تكون معلوماتي صحيحة مية في المية .. ما دفعني لقول أنني ( دقست ) في مداخلتي أعلاه ، هو خوفي من أن أكون قد أوردت معلومة خطأ ، وتلقاها غيري،رغم تأكدي من أنها للموصلي ، وحضرت الحلقة مرتين ، وذكرتها المغنية مرتين .. والآن يؤكد لنا أستاذنا يوسف أنه صاحب الأغنية ، فتأكدت أنا بأن معلوماتي صحيحة، وتأكد اخي العزيز عيسى Isa من أن الأغنية أيضاً للموصلي .. أو أليست هذه فائدة عظيمة ؟؟ شهيتي مفتوحة تماماً الآن للكثير من الأسئلة لأستاذنا يوسف ، عن الفن في السودان ، وأهل الفن واحد واحد.. أصوات قمة في الروعة في نظري لم تجد حظها من الشهرة . واصوات أخرى (مؤذية) تفتح لها أبواب أجهزة الاعلام دون تعب !! وحتى يكون الكلام ( طاعم ) فأرجو من الأخ العزيز عيسى Isa أن ينزل لينا أغنية الفرح المهاجر هنا ( بشرط أن تكون بصوت حنان النيل ) ..
أخـي العـزيز صلاح،، وأخـونا الكـبير وأستاذنا الكبير موصلي..والجمـيع..تحياتي الصادقات.. بعـدين يا صـلاح أنا رسـلت ليك الكـلام دا في المسـنجر.. يعنـي كان ممكن تكتب هنا: عـلمت من مصادري الخاصة!.. أو جاءنا من مصدر مطلع غير موثوق! الخ..I am just kidding!.. طبعا بالتأكيد ما عـندي أدنى شـك في كـلامك أو معلوماتك عن الأغنية، وبطبيعة الحال في ما ذكـره الأخ أسـتاذ موصلي، وأذكـر زمان قرأت موضوع عن الموسيقى والغنا في مجلة الثقافة السودانية التي كانت تصدر عن دار النشـر، وذكـرت فيه أسماء بعـض من أسهموا في تطوير الموسيقى السـودانية.. يعني فلان وفلان.. فكتبت أمامها بالقلم: والموصلي.. مـرة أخـرى لو تذكـر يا صلاح أنا كتبت ليك: لو كانت أغنية الفـرح المهاجر المقصودة هي نفس أغنية يا رزينة.. أما لو كنت تقصد أغنية أخرى ربما لا أكـون أنا قد سمعتها؛؛ فيبقى كـلامنا كلو: تحصيل حاصل، لأنو بنكون بنتكلم عن أغنيتين مختلفتين.. أما لو كان هي نفسها، فأرجـو أن يفيدنا الأخ موصلي عن: هل يعني هـذا أن الأغنية قد تم تلحينها مـرتين: منه ومن الأمين، ولماذا؟.. هل يعني ذلك أن الشاعر قد أعطاها له وللأمين أيضا.. وهل حصل أن سمعتها أستاذ موصلي من الأمين بهذا اللحن.. وهـلات كتيرة أخرى..وطبعا زي ما ذكـرت أن اللحن الذي تغنيه حـنان النيل يختلف عن ستايل الأمين عبد الغفار.. وعـذرا يا صـلاح.. فرغم إنك (تشـّرطت) أن تكـون الأغنية بصوت حـنان، ولكن ونسبة للمآرب الأخـرى أعـلاه.. أرجـو أن تسمعوها أولا بصـوت الأمـين.. وليك على وبعد ساعات ربما بعد أن أفتـش (أكياسي) القديمة أن آتيك بها بصوت حنان النيل.. ولكم جميع أكيد مودتي..
أولاً ، شكراً على الأغنية ( وهذا شكر مؤقت الى أن تاتيني بها بصوت حنان النيل ) وأنا متأكد أكياسك ما بتخلى منها .. حينما ذكرت أنك أنت من صوبّني ، واضاف لي هذه المعلومة التي لم أشك لحظة واحدة في صحتها ، اعتبرت أن عدم دخولك للبوست وذكر تلك المعلومة فيه ، هو فقط لتجنيبي أي حرج ( وهذا غاية الذوق ) وذكرت ذلك ، كما أنني لم أتوانى لحظة واحدة في ذكر المعلومة (لأهميتها) وما تزعل يا زعيم ، وحقك علي ( I'm also kidding).. وبعدين يا عيسى ما دام انت عندك معلومة زي دي (لابد بيها الوكت ده كلو ليه؟).. أنا فعلاً ما سمعت الأغنية دي قبل كده بصوت الأمين عبدالغفار .. وأظن أن أغنية الفرح المهاجر هي نفسها يا رزينة .. لأنه بدايتها: يا زرينة .. وصّي عينيك الحنية ترسم الفرح المهاجر في عيون كل المدينة .. ومتظرين أستاذنا الموصلي عشان يتكلم لينا عن الأغنية دي ، ويرد لينا على ( الهلات ) الكتار بتاعاتك ديل .. رغم أنه الأيام دي الراجل مشغول بي شريط جديد .. وزي ما قلت يا عيسى يمكن الشاعر أداها للموصلي والأمين ، أو يمكن شالها من الامين وأداها للموصلي.. أنا غايتو بعرف حاجة واحدة بس أنه الأغنية دي يوم ح توديني في ستين داهية ... و ربك يستر بس ... بالله يا عيسى ما تزعل ياخ ، ورغم أنك قلت بتهظر ساي ، لكن برضو ما تزعل .. وأنا بكرر اعتذاري مرات ومرات .
07-02-2006, 03:27 PM
Elmosley Elmosley
تاريخ التسجيل: 03-14-2002
مجموع المشاركات: 34683
أنا من النوع الذي (يتكلّب) شعر جلدو لمن يسمع له حاجة ( قاتلة ) والفرح المهاجر ( قتلتني !! وما زالت ) .. مع أكيد إحترامي للأمين عبدالغفار ، فصوته من النوع الذي لا يستهويني ، ولم يحدث أن استمعت لأغنية كاملة له . وهذا ليس انتقاصاً من شأنه- حاشا لله - فللرجل معجبين كُثر ، ولا شك ، ولكنني لست أحدهم. ولو أنه غني الفرح المهاجر ، لما أثارت الكلمات انتباهي ، فاللحن له دور كبير في ابراز جمال الكلمات ( رأي شخصي ). ولكن أن يلحنها الموصلي ، وتغنيها حنان النيل ، فهذا هو (الجنون ) بعينه . والله أنني أرثى لحال من لا يستطيع تذوق الغناء الحقيقي ، ولا يستطيع التمييز بين الغث والسمين الذي ملأ البلد . حينما تساءلنا عن الشاعر ، لم يكن ذلك شك في تلحين أستاذنا الموصلي لهذه الأغنية ، أو الحصول على الكلمات ، بل لتبيان أن الأغنية فعلاً للموصلي وليست للأمين عبدالغفار . وليس هناك من آخر سبب خلاف ما ذكر . فاستاذنا الموصلي ليس بحاجة للحديث نيابة عنه كما أنه كإسم ليس بحاجة لأن يسعى للشعراء .( وهذا رأيي) .
نخش في موضوع تاني ..
أسرار بابكر ، صوت يبعث الأمل ، خامة رهيبة ، إمكانيات مدهشة ، تطريب عالي ، إحساس متدفق .. من أجمل الأصوات النسائية الآن . الله سبحانه وتعالي ما بينسانا ، أختفت حنان النيل ، وعوضنا الله عنها باسرار . مع احترامي للاصوات النسائة الموجودة حالياً ( قدر الفي ) فاصواتهن تقليدية ، ليس فيها ما يحرك فيك شئ .. تابعت نجوم الغد على النيل الازرق ن فتيقنت أن الغد سيكون حالك السواد ( غائبة نجومه ) . وكان راجين السمعتهم وشفتهم ديل ( واطاطكم اصبحت ) .. للأسف لم تجد من ( يمسّكها الدرب ) فهي بحاجة شخص دارس ، فاهم ، واعي ، موهوب ، متمكن من عمله ، يستطيع أن يقيّم صوتها ، يعرف إمكانياتها ، يساعدها على التعامل مع هذا الصوت ، فللأصوات علم يدرّس ، ولا يجيد التعامل مع الأصوات إلا من درس موسيقى أو (إلا من رحم ربي) . بدأ معها الأستاذ مجاهد في أغنية الراحل صالح الضي ، يا طير يا ماشي لي أهلنا. غنت ، فامتعت ، وغني فأبدع ، مجاهد رجل دارس ، وعارف هو بيعمل في شنو ، عرف امكانيات أسرار ، وبدأ معها , ولكنه توقف .. سمعت لها بعد ذلك أعمال مسموعة وكانت ( عادية ) وأعمال خاصة ، فكانت أيضاً ( عادية ). إذا كان هناك من أمنية لي ، فهي أن أسمع اسرارا بابكر في واحدة من الحان أستاذنا الموصلي ، واليوم داك الناس القلبهم رهيف ما يجونا ، القصة ح يكون فيها موت . لأن نوعية صوت اسرار تحتاج الى فنان مثل الموصلي ليسبر أغوار ذلك الصوت العميق ، ويخرج لنا اللآلي المخبوءة .. هي مجرد أمنية ، فقط امنية ، ليتها تتحقق..
العزيز حيدر : شكراً على كلامك الحلو يا حلو ، وأستاذنا الموصلي ، عايزين ننكُت (أي نستخرج) منو جزء من مخزونو الفني ، كان قدرنا.. ويدك معانا بالله يا حيدر .
هي لك ، كلمات الأغنية ، ولي ولك وللجميع كلمات والدتكم حفظها الله :
Quote: "نورن إلا باركا أنجه تو .."
ونسأل الله أن يحفظ الجميع .. استمتع يا ابن عمي برائعة الموصلي وحنان النيل ، ومختار دفع الله .. والموصلي هو كما قلت يا ادريس ( الفرح المهاجر ) والذي نأمل أوبته الى أرض الفرح .. قريباً ..
يا رزينة ..
وصي عينيك الحنينة .. ترسم الفرح المهاجر في عيون كل المدينة .. سيبي احزانك تعالي نحضن القمر البيلالي فوق نجيمات الليالي نحكي للاطفال حكاوي نهدي للناس الغناوي في الصباحات والاصايل للرياحين والخمايل
يا زينة
للرياح الهابة نحكي.. للنجيمة.. للغيوم نهدي التحابا.. غيمة .. غيمة .. ولي قمر طل في جبينك وللنجيمة.. العيون كيف انها خلي بالك منها الحزن فارقنا أمسو والنسيم يطربنا همسو والصباح الطل جانا.. فوق جيبنك شارق شممسو ..
يا زينية.. وصي عينيك الحنينية ترسم الفرح المهاجر في عيون كل المدينة
يا عيسى : أنا أشكرك حتى ترتوي ، على وفاءك بوعدك ، وريحتني والله بالأغنية .. الله يريحك أنت برضو. هذه أغنية لا تمل .. ولا أدري من أين اتى الموصلي بهذا اللحن .. ياخ ده يريحك جوه الجوه .. وأستاذنا طبعاً معذور الأيام دي ، مشغول بالشريط .. لكن كلامي الفوق عن أسرار بابكر ده ما بخليهو ..
ولحدي ما يرجع الموصلي أقول ( سيظل هذا البوست عالياً خفاقاً على مر الدهور والأجيال ) ..
وبرجع ..
07-06-2006, 05:55 PM
elsawi elsawi
تاريخ التسجيل: 06-13-2003
مجموع المشاركات: 4340
للرياح الهابة نحكي للنجيمة للغيوم نهدي التحايا غيمة .. غيمة ولي قمر طل في جبينك وللنجيمة العيون كيفنها خلي بالك منها الحزن فارقنا أمسو والنسيم يطربنا همسو والصباح الطل جانا فوق جيبنك شارق شمسو
الله يريحك انت كمان يا صلاح .. فعلاً اغنية دافئة ترد الروح و تداعب مكامن الإحساس في كل القلوب .. لا نملك سوى الوقوف في محراب هذا الدفق و الجمال .. لك يا أستاذ الموصلي ارفع قبعتي و للأستاذه حنان النيل رد الله غربتها فنحن لم ترتوي من صوتها العذب بعد و للأستاذ المرهف مختار دفع الله صانع الدرر.
الصاوي
خارج الموضوع: يا صلاح شايفك قاشر بالصورة لكن ما قلت لي رأيك فيها شنو؟
يا سلام عليك يا صاوي يا راقي .. الزول الفنان بيكون في كل أحوالو ( فنان ). رأيك في الأغنية دي ريحني ، وأكد لي أنو سمعي ( ما كعب ) . بالله شوف ( كم ) التفاؤل الفهيا ده قدر شنو ؟ وده واحد من الأسباب البتخليك ( لاصق ) فيها ، خاصة في زمن الاحباطات ده .. عشان كده دايماً بنقول ، خلو الخبز لخبازو .. كُرهتي في الدنيا ( المقلداتية ) البيصرو يكون مقلداتية الى ما لا نهاية . وأصواتهم ( إن أنكر ...) والمشكلة والمصيبة إدعائهم بأنهم فنانين . وإصرار أجهزة الاعلام على معاملتهم( بغباء ) على هذا الأساس ، والأساس ( خربان ) لان فاقد الشئ ( مسئولي الاعلام ) لا يعطيه . تصدق يا صاوي أي واحد فينا يقدر يغني أحسن منهم في ونسة مسائية مع اصحابو. نحن مقتنعين بي كده ، لكن منو البيقنع ( الديك ) ده ؟؟؟؟ دقة سريعة : طبعاً رأيي رسلتو ليك في رسالة ( بالايميل ) الظاهر انها ما وصلت ، بس خلاصتها إنك زول ( ختري ) وفنان .. اسمع عندي واحدة تانية بالله أول ما تشوفها ( دلعها لي ) ..
أهـلا الأخ أستاذ موصلي، وأرجـو لك إجازة سعـيدة...بعـدين قبضـتني متلبساً.. وطبعا أنا قصدت بس (أخـتصر) أخـونا صـلاح دا شـوية.. (ما تزعـل يا صـلاح).. ولو خـليتـني كنت ح أكـون دقـّستو (مـن جُـحرٍ)..مـرتين على التـوالى!!، طبعا الأولـى ما كانت مقصـودة، ولا بسـابقية الإضمار التي يـُعـاقَب عليها...وهاهـي يا رزيـنة مـرة تانية، كامـلةً غـير منقوصـة...أي تعـليمات أخـرى؟؟..لكم جميعا التحـايا، وأرجـو إنو الإجـازة الجـاية تكـون معانا.. أما ولو جـاسفـت لينا برضـو يومين تلاتة من (شـطّبنا) دي.. ومعاك (نسـخة إكـرامية!) من سي دي الفنانة شـروق..فسـتكون سعادتنا مؤكدة..
طبعاً الأيام دي الموصلي معانا ، ومستمتعين جداً ( الحُسّاد يمتنعون ) .. ويا فردة في الأغنية دي بالذات ما في طريقة أني ( أتدقّس ) لأني حافظها ( صم ) وحاشاك إنت من الدقيس فالاغنية التي أنزلتها كانت فعلاً نفس الكلمات ، يعني يا حبة أنت ما دقستك ، وما دقّست غيرك .. وقع ليك ؟ . والظاهر أنو ( جهازك ) دقّسك ونزلها ليك ناقصة ، لكن مشيناها ليك ، وقدّرنا مجهوداتك . أها وكمان عرفت قصة الفرح المهاجر كلها ( من سيدها ) وما ح أوريك ليها إلا ( تدفع ) يعني انتظر (ما يطلبه المستمعون) بتاعتي .
سأوافيك بتفاصيل الفرح .
08-01-2006, 05:04 AM
Elmosley Elmosley
تاريخ التسجيل: 03-14-2002
مجموع المشاركات: 34683
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Emad Abdulla
Mutwali Malik
Elmosley
Mutwakil Mahmoud
Alsa7afa_30
إدريس محمد إبراهيم
حيدر حسن ميرغني
elsawi
ناذر محمد الخليفة
فيس بوك
تويتر
انستقرام
يوتيوب
بنتيريست