|
|
 بحري طراوة... ويا ناس بحري .. قالوا بتحبوا يلا حبونا..
|
ياناس الشعبية والأميرية وبحري الثانوية...أنتو بتحبوا بحري شديد.. وحبكم ظاهر في كل المتنفسات التي أقمتموها على سنام هذا البورد بس حبكم ماخد من ألوان الطيف ولافي لفة طويلة ومغلف بمدارة المحب العاشق الولهان..وبإخفاء المحبوبة وموغل في الرمزية...ودي ثقافة متأصلة في المجتمع السوداني اللذي يرى في الحب ضعفا.. وإستكانة.. وعيب...
بس صدقوني بحري تستأهل كل الحب.. وعشان كده دي دعوة على إستحياء للتوثيق لهذه المدينة الجميلة الوادعة.. وإستكتاب لكل أبناء وبنات بحري من أقصاها لأقصاها لرفد هذا البوست بكل معلومة عن الشخوص والأمكنة والأحداث في مدينتنا الجميلة..
بحري قريبة والمسافة سنة!!!
|
|
 
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: إبراهيم قناوي..
لك التحية.. القناوية من أسر بحري العريقة..
ولو ما خانتني الذاكرة كان معانا في بحري الحكومية
شخص بإسم محمد عبد المجيد قناوي ربما يمت لكم بصلة..
له ولك تحية بحراوية أصلية وفي إنتظار حكاويك عن بحري... |
أستاذ كمال
لك التحايا العطرة
ولجميع الإخوة المتداخلين
وتحية خاصة لشيخنا وأستاذنا
شيخ السجادة البحراوية
صلاح شكوكو
وبالمناسبة
محمد هو أخي الأكبر
وموجود حاليا بالسعودية
والتحية للجميع
ودمتم سالمين
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ابراهيم قناوي)
|
Quote: Quote: إبراهيم قناوي..
لك التحية.. القناوية من أسر بحري العريقة..
ولو ما خانتني الذاكرة كان معانا في بحري الحكومية
شخص بإسم محمد عبد المجيد قناوي ربما يمت لكم بصلة..
له ولك تحية بحراوية أصلية وفي إنتظار حكاويك عن بحري...
|
ابراهيم اخوى سلامات
انت عاطف عبد المجيد قناوى ...المحسى ...ساكن الديوم بيتهم يفتح غلى المزاد اخوكم برضو ...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
كمال كرار :-
| Quote: بس صدقوني بحري تستأهل كل الحب.. وعشان كده دي دعوة على إستحياء للتوثيق لهذه المدينة الجميلة الوادعة.. وإستكتاب لكل أبناء وبنات بحري من أقصاها لأقصاها لرفد هذا البوست بكل معلومة عن الشخوص والأمكنة والأحداث في مدينتنا الجميلة.. |
لك التحية أيها الحبيب (( كمال ))
ولعلك بشخصيتك المتمددة في الوجدان .. فأينما تكون وكيفما تكون فإننا سنكون
لأننا ندرك أنك لا تتوقف إلا حيثما تتوقف الروعة وأطر الجمال ,, وهكذا أخي كمال
توسع ما كان ضيقا .. وتزيد دائرة التلاقي الجميل .. وتفتح كوة جديدة يتسرب منها الهواء النقي
لك التحية والود
وتقديري الشخصي لك ، كشخص عامر بالمودة
...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخ / كمال كرار
في البدء تحياتي لك أخي كمال ولكافة الأخوان المتداخلين ، ويسرني أن أسجل حضور في إستهلالية هذا المنتدي الغالي الذي طال إنتظاره ، مع تمنياتي بمنتدى حافل بكل ما هو جميل ورائع يوثق لهذه المدينة العريقة من كافة النواحي التاريخية ، السياسية ،الفنية والرياضية ، توثيق يعبر عن مكانتها في نفوس كافة أبنائها ويؤكد أهميتها بالنسبة للسودان .
كما آمل يثري هذا المنتدى بقية المنتديات التي ترتبط مباشرة ببحري المدينة وذلك بتوطيد أواصر التعارف والتواصل بين أبناء مدينة بحري فهي بالنسبة للجميع الأم الحنون والحضن الدافيء .
وبالتوفيق إن شاء الله ؛؛
| |
|
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: عبد الرازق سعيد)
|
الاعزاء اولاد بحرى
معاكم والله ...
مولود فى الشعبية ...
سكنا من قبل فى الاحياء التالية :
الوابورات
ديم سلك ...ده حى ما بعرفو الا زول فوق السبعين خريف .
ديوم بحرى ...
الشعبية جنوب...
الجريف شرق ...
حلفاية الملوك ...
شمبات الحلة ...
شمبات الاراضى مربع 17
كســـــــــرة :
برضو مرتب لاولادى السكن مستقبلا فى بحــــــــــــرى
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ياسلااااااااااام .. غايتو وتر ودق في القلب ... أها نحنا ناس الحرية والأهلية وبحري الحكومية ..
بحري الشباب الحلوين ...
بحري الجمال ...
بحري الأصالة ...
بحري الذوق والفهم ...
بحري الهواء العليل ( زي ماقالت عيدابي هواء بحري بحري )..
بحري السُكْنى الجميلة ...
بحري الطرب ... أم درمان تألف وبحري تغني ...
عاوز تشرب عرديب يحميك من الملاريا مية سنة .. أمشي لعلي إبراهيم في المحطة الوسطى ...
ياناس بحري ... وأنت جاي من الخرطوم او أم درمان قاطع الكوبري .. الهواء بيفرق معاك ( ده عن نفسي ) ..
الكورة في أم درمان ... وكباتنه حالياً من بحري ...
وبرضو بنقول :: كل مناطق السودان طراوة ...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Haitham Labib)
|
الأخ/ هيثم لبيب
يا أخي وتر بحري رنان.. وبيضرب في النافوخ..
العرديب..ذكرني "ليمون" "الرشيد" هافانا... يا سلام..
وموقع "هافانا" ذكرني "أبوالشيخ" العجلاتي.. وده برضو معلم من معالم بحري..
ومن عجلاتية بحري المشهورين العم "أبنعوف" رحمه الله وهو والد الأخوان " صلاح، وحسن، وفيصل.. وهم من سكان حلة الدناقلة شمال بالقرب من بيت ناس الباشا الجزار والد فيصل الباشا.. وجد مرتضى محجوب الباشا وأخوه متوكل.. أحدهما كان شيوعي ناشط والآخر كان ضابط شرطة.. وياهو ده السودان..
---------------
ما قلت ليكم بحري طراوة..
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
اخي العزيز كمال اهنئك علي هذا البوست وان شاء الله نكون من رواده . وقديما قيل الكوره والفن امدرمان والشغل الخرطوم .... والسكن بحري لكن اخي العزيز نحن بنختلف لانه حتي المويه نحن بنشرب من النيل الازرق والخرطوم وامدرمان من النيل الابيض ..... والطراوه القلتها هي بحق وحقيقه ..ثم ثانيا الطبقة الاجتماعية التي تكون اهل بحري هي طبقة عمال وصغار الموظفين لذا كان ومازال التكافل جلي في تربيتنا وتعاملنامع الغير ثالثا معظم سكان بحري الاصيلين جذورهم من المديريات الشماليه واقدم الاحياء كالاملاك والدناقله وحلة حمد( الشلاليه) وخوجلي و... تلك المناطق مناطق حضرية تعلم ابناءها من ضو كالحلفاويين والدناقله والشوايقه والجعليين .... الطريف زمان في الابتدائيه كان اخي كمال يزوغ من دنقلاويته ويرتمي في احضان الجعليين اهل امه... لماذا ؟؟؟؟لا ادري
الكلام كثير وكثير يشمل احياء وناس وظرفاء المدينة والنساء المسترجلات وحتي بصات ترحيل النساء من والي السوق وانتظارهم كعمنا نصر رحمة الله عليه .
كمال فتح باب الله اعلم ينسد ....وانتظرونا
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
كمال كرار بوست متوقع منك 
ياخ انا من مرقت سكنى من بحرى لليله روحى مارقه...صدق يا كمال يا اخوى
انا ساكنه الخرطوم جنب السوق المركزى لكن ما بشترى خضارى الا من سوق بحرى
و ما بتكيف الا فى سعد قشره
و راسى ما بظبط الا اجر البنبر و اتحكر فى حوش ابوى فى المزاد
و يجيك ضهب الحله
شى شاى شى قهوه
غايتو الجمعه فى بحرى و الا بلاش
ياخ ديل ناس حلوه بشكل...
خير الامور الوسط و بحرى وسط
عشان كده موزونه فى كل حاجه
يا كمال ياخ اقول ليك حاجة بجيك راجعة
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Hussein Mallasi)
|
اخي كمال ود السر
نبدأ معكم بأسماء أحياء بحري ولو فاتني اسم تمه.
حلة حمد
حلة خوجلي
حلة الدناقلة
حلة الديوم
حلة الأملاك
حلة الوابورات
حلة الختمية
حلة كرش الفيل
حلة الصبابي
كوبر
ثم
الصافية
الشعبية
المزاد
الميرغنية
شمبات الأراضي
الاحياء الطرفية
شمبات
الحلفاية
الكدرو
الخوجلاب
ابو حليمة
والي الجيلي
حلة كوكو
الجريف شرق
الحاج يوسف
والي ام دوم
ولو في خطأ صحح يا كمال وممكن تستعين بصديق ..... طارق
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Siham Elmugammar)
|
أختي سهام المجمر...
تحية بحراوية
غايتو شارع عبيد ختم قرّب ليك المسافة من المركزي لبحري... وضهب الحلة سلامتهم.. وأكيد بجيكم شوية قرقوش من المنفلوطية.. ناس محمد المنفلوطي جيرانكم من الناحية الشمالية.. اصلو كانوا جيرانا في حلة الدناقلة.. وكان عندهم فرن بلدي في البيت والحاجة والدتهم كانت بتخبز فيه الخبز والكعك..
صحيح بحري وسط.. لكن ما وسط طراوة...
حاولي ترجعي بحري.. حتى لو في أم ضريوة.. خرتوم ده مازي بحري
مش بحري طراوة
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
طارق أخوي..
أنا بقول إنو السكن والفن والشغل في بحري (ناس أمدرمان ما يزعلوا بنحبهم شديد).. أها أعدد ليك فنانين من مواطني بحري:
1- عبد العزيز داؤود (رحمه الله)
2- خضر بشير (رحمه الله)
3- عبد الكريم الكابلي
4- أولاد شمبات
5- محمد ميرغني
6- صلاح إبن البادية
7- أيوب فارس (رحمه الله)
8- عبد العظيم حركة (رحمه الله)
9- ثنائي العاصمة
10- أماني مراد
11- محمود عبدالعزيز
ده باستثناء عمر زعموط وحسن التوم وسعدية الكو وآخرين
أما الشغل بحري.. لأنو أكبر مصلحتين في العاصمة هما:
مصلحة النقل الميكانيكي
والمخازن والمهمات..
يا طارق الدناقلة شمال مسقط الرأس.. ولدت في منزل يقع في مثلت أحد اركانه بيت لاعب الإتحاد الدولي "دولي" إبن الحاجة عزيزة مركب.. والركن الثاني ... منزل الفنان أيوب فارس.. والركن الثالث بيت ناس الزين قديم.. حارس مرمى الإتحاد الشهير... معليش المثلت منفرج الزاوية.. الله يفرجها علينا
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
من الشمال: الفكي هاشم والكباشي وود رملي ثم نختم بي واوسي
ومن قبل الكدرو الازيرقاب، ام القري، السلمه ثم الدروشاب
ومن الشرق المايقوما والعزبه وكافوري ، مع ملاحظة لم نتطرق الي شرق النيل الذي يشمل مناطق كثيره من الحاج يوسف شرقا مثل: سوبا شرق ومدينة الفاتح والجريف شرق والعيلفون والباقير شرق ثم العسيلات وام ضوا بان وحتي كترانج.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
بحري عشت فيها أحلي سنين حياتي ، في الديوم دقوني لمن قربت اقول الروب وما فكاني من الجلدة ديك إلا أحد زملاء الدراسة من أبناء ديوم بحري الشهيرة بكمبوديا وكان لاعباً مميزاً في فريق الجوهرة والذي تصادف مروره بموقع المعركة ولو لا لطف الله ومحاسن الصدف لكنت إلى الآن أتلقي اللكمات الخطافيه وتحت الحزام ، وفي الشعبية جكست في شارع المدارس وكملت المبارا وقعاد الضلله زي ما قال الزول السمين جمال حسن صليع – سعيد – أبو صلعه وفي الدناقلة شمال لعبت أحسن مباراة في كرة القدم وفي الختمية أكلت أحلي بوش وفي المزاد جنوب لعبت أطول مباراة في الكونكان والضمنه وبرضو الشطرنج ، وفي كوبر حضرت أحلي بارتي في حياتي كانت حفلة دكاكينية وكانت حافلة بكل ما هو جميل ، وفي الصافية حاولت وبعض الأصدقاء أن نحضر حفل على طريقة يا عم قدام يعني نحل ولكن للأسف إنكشف أمرنا وبقينا زي ركشات متككله جمب مارسيدسات ، وفي إشلاق السوق سكاني كلب لغاية الآن نفسي قايم وإتلفت من الخلعه بعد أن جعلني ألف ميدان عقرب بسرعة الصوت ويا ريت لو كانت في الأولمبياد كنت على الأقل حطمت رقم قياسي وجبت للسودان ميدالية ذهبية. وفي الحلفايا عرفت أعز وأصدق الأصدقاء وفي الصبابي والدناقلة جنوب وحلة حمد وحلة خوجلي والأملاك والميرغنية والسكة حديد وكرش الفيل وعييييك ذكريات وذكريات لا تنمحي من الذاكرة ، بحري جميلة بترابط وطيبة أهلها بحري جميلة بطبيعتها وأشجارها الوارفة الظلال ، بحري نفر
وكان لابد أن أن نهاجر من بحري إلى البقعة و قد كان لكن بين الحين والحين أزور بحري وأعيد الكان حليل الكان
بحري تمددت وإستطالت وتمططت فالحاجيوسفات والدروشابات وصلن إلى أقصي أقصي الشمال والشرق وربما تفوقت في تمددها على الثورات
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
تسجيل حضور ...ولادة وطفولة وشقاوة ابتدائى وثانوى فى بحرى .......
وجامعى واستقرار بالخرطوم ...يعنى نصنا معاكم (النص الجميل )بختكم..
بجيكم راجعه هاكم مؤسس مدينة بحرى وجيراننا ومعارفنا واصهارنا من الاسر ...
نصر الدين السيد...
اسرة رستم
ال عتيق
ال رضا محمد عثمان
ال معوض
ابراهيم نمر
ال يونس
اسرة كامل امين
اسرة المسرة
اسرة البلولة
اسرةهلال
الجبوراب
اسرة مقلد وجاد غريب
المفتى
ال ساتى
ال بيومى
اسرة رمضان على
ال خوجلى وال حمد
امير الصاوى
صلاح عتمورى
ال ابراهيم صالح
ال المرحوم الاديب بشير الطيب واخوانه
لى عودة بان الله ....
واعذرونا... فنحن على سفر
ناهد بشير الطيب
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
المنطقة الصناعية بحري
كانت اكبر منطقة صناعية علي مستوي السودان
منطقة الصناعات الخفيفة
مصانع الصابون
مصانع الزيوت
شركة باتا
مصنع كريكاب للحلويات
مصنع الكرتون
مصانع الكبريت
مصنع الروبي للبطاريات
مصانع الكحوليات
مصنع ريا للحلويات
مصانع المكرونة
ومن هذه المصانع كان يتم التصدير لمعظم بلدان افريقيا.
والله زمان يا سودان
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
خلي بالك يا ناهد اخترتي الاسر المرتاحه ونسيتي حتي في المرتاحين ناس التازي وناس ابراهيم طلب اما نحن علينا الله وعيشة السوق..
امال وين ناس كيكي الدود كيكي وووو.... وحمد الله علي السلامه؟؟؟؟؟
الاخ طارق ميرغنى .......
والله هؤلاء هم جيراننا فى نفس الحى .....
والبقية فيهم من هم اهل للوالده ....
او الوالد عليه الرحمة وبعض اصهارنا... ونسايبنا.... وحبانا .....,,,
وماقصدنا والله هذا او ذاك ...فسكان بحرى وقتها كانوا موظفين وعمال فى الدولة
سواء فى النقل النهرى والميكانيكى والمخازن والمهمات والمنطقة الصناعيه بحرى
او المجلس البلدى ...والسجون ...
ومدرسين ..وتجار ..وقتها كانت اوضاعهم ممتازة ورواتبهم بتكفيهم ....
لذا ممكن نطلق عليهم فعلا (المرتاحين)....
ولسه لى عودة كما وعدت بذكر كل الاسر الذين عرفناهم...وعاشرناهم ....
ودرسنا معهم وكنا وكانوا الى جوارنا فى كثير من المحن .....والظروف ...
حتى مغادرتنا لتلك المدينة الجميلة ....
وهاك كمان لسته تانى (صبر مافى )ياطارق ...
ال دكام
ال مرسال
ال دراج
العمدة المقبول الصديق
ال كبكبيك
ال غندور
ال صيام
ال دهب
ال بدران
ال مالك
عوض احمد(مسابقات المدارس)
ال السراج
على حسن مالك
ال النحاس
ال يسن البشير
ال سمارة
ال نديم
ال جعيص
وناس الكورة عجبنا
القرود
الضرش
بدوى ودولى...
وهم عمال فى النقل النهرى ...
ولاعبين للكرة ...(جيران لخالتى )
...
| |
|
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأحت ناهد.. سلامات..
معقولة ما مر عليك أسرة آل الخليفة كرار...
معليش.. أسرة كريمة حيث بيت الجد كرار في حلة حمد
تحياتي
اهلااااااا كمال كرار....بالله ياخى ازيك ....
...واسفة انى ماسلمت عليك ....انبهرت حقيقة ...
من البوست ....ونسيت انا وين وبعمل فى شنو ...والجاكم منى لاسماء
جات كدة (ولسه بنحت ).... بدون فحص وتمحيص وحقيقى يديك العافية...وبيكم
اكتشفت انه ذاكرتى لسه (شغاله) والحمدلله .......
رغم انه امبارح بالتحديد اتهمننى( بناتى) الله يطراهن بالخير
بانى بقيت نساية وبسألهم......
نفس السؤال كم مرة فى اليوم (غااااايتو)
.........
ال خليفة كرار هم من قدامى ناس حلة حمد..والواحد بس حب يكتب عن الناس البيعرفهم
واى واحد فينا عنده معلومة او ذكريات زى ماتفضلت انت وذكرت فى اعلى البوست حقوا يذكرها
والاخوان ماقصروا يديهم الف عافية .... واعتقد انى لم تخنى الذاكرة ان عائلة
الخليفة كرار ينتشرون من عند البلديه والى منطقة نادى الثريا غربا...وفى نفس الشارع
برضو الفيه ناس كرار فى كمان ناس عتيق ...وناس البلال ...وناس مجدى مكى ...
وناس ملا (اخو نصر الدين السيد)....
وناس مدثر حامد....وناس عادل مطى ..(نسيب جاد الله جبارة)....وفيصل عباس (البوليس)
وانور اخوه انور عباس .....ويوسف ود النفاخ ....وعلى نديم فى (البوليس)وعثمان عبدالله
فى المرور.....وعباس محمد عثمان واسس مسرح نادى العمال ...واسس نادى الصبيان
(الان مركز شباب بحرى ...)والمرحوم رضا محمد عثمان (استاذ مكتب النشر ورئيس تحرير مجلة الصبيان
وشاعر لكثير من اغانى شرحبيل وكاتب للقصة القصيرة )وهو حفيد ال عتيق ...
وقلت ليكم فوق انى جاياكم راجعه فالموضوع رجعنى وراء كتيييييييييييير ومشكور عليه ...
وبجيك ياكمال وبقية ناس بحرى الطيبين عشان نمسكهم واحد واحد ....ان مد الله فى الاجال ...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ما شاء لله على الذاكرة.. وفعلا معلوماتك كلها صحيحة.. أنا بتعليقي قصدت شحذ الذاكرة لأبعد مدى.. ووصفك لأنتشار آل كرار صحيح مائة بالمائة ونضيف ليهم وجودهم الأصيل في كل من كرش الفيل والختمية.. ويديك العافية وفعلا أثريتي البوست وهو لا زال يحبو..
الاخ كمال كرار ...
وفى الختمية ناس عبد الوهاب تنقو .وناس ابريدة فى (اشلاق كرش الفيل)
..وعائلة عاطف ابراهيم ...وناس عبد الوهاب ابراهيم تنقو(الجيش).....
(الجيش)وعم ابراهيم عمر ...وناس اللاعب هيثم مصطفى بالقرب من نادى الامير ....وناس عمر الفاروق
(البوليس) والفنان محمد ميرغنى بالقرب من الخور الكبير ....وناس عم توفيق ابو ناس كمال
فاتحين فى فسحة المولد ....والفنان محمود عبدالعزيز ....والفنانة امانى خالة العميد يوسف عبدالفتاح ...ويوسف عبد الفتاح نفسه (حلة خوجلى ) وناس عبدالرحمن عبدالرسول بتاع (عالم ا
لرياضة)....
وفى المزاد..ناس المهندس ابراهيم صالح واولاده المهندس غازى والمهندس غانم ...وابراهيم امام (الجمارك)وناس الطيب عبد المنعم وعائلة ناس ابراهيم كلم..
وناس سكوته شارع (المعونه ) وفيهم مجموعة فى الختمية .......
وناس مامون الطاهر (الكورة)المارشال ويحى الطاهر (اتحاد الكورة)....وناس شنان ....
وناس احمد شونة ...بيتهم امام بيتنا فى الصافية وناس التنى وصغيرون وامير الصاوى
ومهدى محمد احمد ورمضان على ...وناس الطيب والد هشام الطيب زميل المنبر وحارس نادى الهلال سابقا
كلهم جيران بالحيطة لينا ....ونستنى هشام يجى يكمل لينا باقى الجيران ...ويحكى ليكم ...
وفتكم بعافية ......
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
فتوات بحري.. أشهرهم الكضمي..
والغريبة صيت الكضمي أكبر من قوته كفتوة...وهو لا يقدر على تخويف نعجه إلا أن حوله من يروج له بأن له بوكس شافي.. وهو لا شافي ولا بطيخ.. وطارق يعرف تماما لو لمينا فيه أيام الشقاوة.. كان أصبح أثرا بعد عين.. بس هو بيعرف يتشيطن على مين.. المهم نوثق له كأحد فتوات بحري المزعومين...والعجيب في مصطفى وهذا أسمه الأول كان يصدر كتابا للأغاني يضمنه أغاني الحقيبة التي تزخر بالفن الراقي وأفعاله أبعد ما تكون عن الفن..
--------------------
بس رغما عن ذلك بحري طراوة
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
وكمان ياكمال من فتوات بحرى ...وبسمعه دايما عند اخوالى... لانى ماعاصرتهم
فى الفترة ديك ...لكن لو شفت لمتنا فى الحوش مع الاهل والونسة والضحك
تستعجب ...وعندنا فى العائلة المقلدين كمان .....فكل واحد فيهم مسمينوا بى اسم
من اسامى كبار سن بحرى ......
على ابوكرم ....فى حلة حمد ...وكان دايما بيجلس بالقرب من المقابر
حيث قبر والدى (رحمه الله ) هناك ....وكان يمارس سلطته على كل المارة هناك
وكمان ابو على فى الختميه بتاع اغانى ويشبه كمال ترباس
....وطبعا الان لا ادرى اين هم ...
رحمهم الله احياء او اموات ........
*****************
ومعاك بنردد بحرى ....طرااااااوة
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الأخ كمال
اولا نهنئ انفسنا بهذا البوست ويبدو انه سيفوق بوست الشعبية وما عندنا طبعا مانع لانه بحري هي الام الروؤم لكل احياء بحري
ويا خوانا ما تزعلو من الاخت الكريمة ناهد
انا شخصيا ما زعلت عندما لم تذكر آل طه
وجدي محمد طه من اوائل من سكنوا حلة الدناقلة ولكنه لم يعمل عقارات زي ناس التازي.
سالته مرة:
يا جدي ليه ما عملت بيوت زي ناس التازي هسه كنا مروقين؟
اجاب: انا عرست لابوك ولعمك عبد الحليم ولعمك عبد العزيز ولعمك اسماعيل ولعماتك كلهم
انا هسه لو ما عرست لابوك انت كنت جيت.
حكمة!!!
والعدد القادم حكايتي مع مصطفي الكضمي
دمتم
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: حسن طه محمد)
|
انا شخصيا ما زعلت عندما لم تذكر آل طه
الاخ حسن طه ....
خالص التقدير ...
عارف الذاكرة مع الغربة دى ...شىء يجى وشىء يفوت
وغايتو بالجلالة كدة اتذكرت ليكم ديل ....وكمان فيها مصاريف
لانه ضربت للاهل فى السودان لمعرفة باقى اسماء الجيران ههههههههه...
والحيزعلوا منى بالتاكيد
وبالله شدوا حيلكم ....كل زول بيعرف معلومات مفيدة للبوست وتوثيقه يكتبه
وكله من اجل بحرى ...وياحسن ناس طه ديل الجنب جامع الدناقلة؟؟؟ ..لو هم ...
ديل ناس معروفين جدا هناك... ومن بدرى.... حتى ناس طه الهناك البقصدهم انا
قريب بيوتهم لناس محمد خير.......
وناس عشرى وبناتهم معانا فى المدارس...وناس بعشر ديل غرب الجامع...
يعنى جنب ناس جدك ...و بنات ناس دكتور حنفى...وناس حمد الجلود(تجار جلود)
ملحوظه ...الناس الذكرتهم كلهم ديل ...فيهم بنات درسن معاى ...لقرب منازلهم
من شارع المدارس (الفاصل بين حى الشعبيه والمدارس )
***************
و تأكد انه ا لزعل مافى مع ناس بحرى
وبحرى طرااااااااااااوة.... ولطاااااااااااااافة
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
يا ناهد...
علي ود أب كرم على ما أعتقد هذا هو الإسم الصحيح.. كان فتوة.. بحق.. وكان يمارس نشاطه بالقرب من سينما الوطنية والحلفايا.. والمعروف عن علي ود أب كرم أنه لا يتفتون على الأولاد صغار السن..وكانت تلك صفة تقربه من صعاليك العرب أيام الجاهلية اللذين لا ينهبون الضعفاء والمساكين.. وكان حسبما نسمع أنه إذا استنصره ولد صغير.. ينصره بشهامة أو هكذا افهمونا...
المهم.. أن حياة علي ود أب كرم.. أنقلبت 180 درجة من النقيض إلى النقيض.. حيث كما علمت.. أنخرط مع جماعة التبليغ والدعوة وهي جماعة بعيدا عن فلفستها العقدية.. لا تؤمن بالعنف.. يا سبحان الله.. وقيل أن ذلك حدث بعد أن توفى أخوه المهندس في حادثة سيارة وبكاه على بكاءا مرة.. ومن يوميها أعاد تشكيل حياته..
يشهد لود أب كرم بأنه له بنية شافية بعكس الكضمي.. ربما كان من الشلالية لست متأكدا
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: وكمان ابو على فى الختميه بتاع اغانى ويشبه كمال ترباس
....وطبعا الان لا ادرى اين هم ...
|
أبو علي .. ده من الفتوات الطيبين .. وعلى طول تلقاه قاعد جنب فرن مونديل جنب كشك الجرائدفي الختمية ويدندن .. ياناس الختمية وين أراضي الزول ده ..؟؟؟
تخريمة صغيرونة للأخت ناهد بشير الطيب ...
إنت شكلك شلالية ... ماخليتي عائلة من عوائلهم مانزلتيها هنا ... وذكرتيني شارع الشلالية .. بمناسبة الشلالية .. أكبر معارضين في أي حاجة... حتى في صلاة العيد عندهم خيمة براهم ومابيصلوا في جامع السيد / علي الميرغني برغم أنو الفارق تلاتة شوارع ما أكتر .. وأسعفني حظي أني صليت معاهم أخر عيدين وبالغصب من أبني عمي عزو لبيب عتيق أو معاوية لبيب عتيق ... وبصراحة الشلالية وعوالم الشلالية عاوزة ليها بوست براهو ..
شايف الشغلة وسعت شديد ودخلت في القبائل ..
وبرضو على قولة أخونا كمال كرار بحري طراوة وبزيده أنا بحري طراوة ونداوة ... ونسيتو من الفنانين أبو الأمين أستقر به الحال في بحري
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Haitham Labib)
|
تخريمة صغيرونة للأخت ناهد بشير الطيب ...
إنت شكلك شلالية ... ماخليتي عائلة من عوائلهم مانزلتيها هنا
الاخ هيثم خالص الود
ابدا والله ... ماشلالية ...لكن كما ذكرت قبل ذلك لكم ان فيهم من صاهرناهم
وناسبناهم ومن جاورناهم...ومن درسنا معهم ....وفيهم الجيرة القوية المتينة
المازلنا بنعتز بيها الى الان .....ورغم غربتنا ...عن السودان وايضا
مغادرتنا للسكن فى الخرطوم الا ان الذكريات التى احملها ذكريات جميلة جدا
فنحن مجتمعات تحن الى الطفولة ليس فى احد دوافعه الا حنينا الى حيرة( لذيذة)
افتقدناها حيال الاشياء حين صرنا كبارا مطمورين بالمشاكل والظروف الهشه والثقيلة
نحن الان ..اخى ...صرنا نغدو مجرد انزلاق بطىء صوب زوال الذكريات منا وهذا مايرعبنا..
كونوا بخير ...
واكتبوا عن بحرى ...
دمتم
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
يا جماعة ما لاحظتوا إنو الأخت/ ناهد بحراوية أصيلة...
وهسع أنا إبتديت أتذكر يافطة بيتهم ومكتوب فيها منزل/ بشير الطيب.. لكن ما قادر أحدد الموقع.. إلا أستعين بـ Google Earth
ناس صالح والد المهندس/ إبراهيم صالح أتخطفوا زي ما بيقول أهلنا ولم يبق ربما من الأولاد إسماعيل اللذي كان ضابطا في المظلات وقد جاورونا في المزاد.. وكان جارهم من الناحية الشرقية الفنان شرحبيل أحمد.. وعودة لعائلة إبراهيم صالح فهم يمتون بصلة القرابة لناس طه ود الضابط..اللذين سكنوا الشعبية.. وكانت بنات المهندس/ إبراهيم صالح رحمه الله وأذكر منهن الكبيرة وأظن أسمها مي يقدن السيارات وليس في ذلك غرابة إنما الغريب أنهن كن يقدن الهايلوكس.. وهي سيارات غير مريحة حتى للرجال.. وكانت والدتهن وأعتقد أسمها رجاء.. إمرأة ربما ذات جذور مصرية.. أيضا تقود السيارة... مات جل أخوان أبراهيم صالح، السر، أزرق، محمد، الرشيد ولا أدري إن كان فاروق حيا رحم الله المتوفين والأحياء..
أخت ناهد طلعت موسوعة في حفظ شخوص بحري..
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: ناس صالح والد المهندس/ إبراهيم صالح أتخطفوا زي ما بيقول أهلنا ولم يبق ربما من الأولاد إسماعيل اللذي كان ضابطا في المظلات وقد جاورونا في المزاد.. وكان جارهم من الناحية الشرقية الفنان شرحبيل أحمد.. وعودة لعائلة إبراهيم صالح فهم يمتون بصلة القرابة لناس طه ود الضابط..اللذين سكنوا الشعبية.. وكانت بنات المهندس/ إبراهيم صالح رحمه الله وأذكر منهن الكبيرة وأظن أسمها مي يقدن السيارات وليس في ذلك غرابة إنما الغريب أنهن كن يقدن الهايلوكس.. وهي سيارات غير مريحة حتى للرجال.. وكانت والدتهن وأعتقد أسمها رجاء.. إمرأة ربما ذات جذور مصرية.. أيضا تقود السيارة... مات جل أخوان أبراهيم صالح، السر، أزرق، محمد، الرشيد ولا أدري إن كان فاروق حيا رحم الله المتوفين والأحياء..
|
كمال العزيز
نعم المعلومات صحيحة مائة بالمائة وهم الان نسابتى وانا متزوجة من ابن اخت رجاء
وهو يعرفك تمام المعرفة وبيسلم عليك وبيسلم كمان على طارق ميرغنى ....
وقال ليكم مااتذكرتوه؟
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
أبو حديد.. فتوة آخر سمعت به..لم أره قط.. سمعت عن أفعاله حيث كان يتنمر على صغار السن والبسطاء.. إلا أن جاء يوما وهو بمعية الكضمي أن تنمروا على أحد الكمسارة اليافعين في موقف بصات شمبات بالقرب من المستشفى .. فما كان من كافة السائقين والكمسارة إلا أن أوسعوهم ضربا حتى أن أبو حديد صار قاب قوسين أو أدنى من الهلاك.. أنتهت بعدها أسطورته إلى الأبد
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
البحراوي الأصيل جدا كمال كرار
سعيد جدا بأن الكوة قد وسعت و بدلا أن نتحدث عن الشعبية (الطحنية) زي ما بيقول المرحوم عبد العظيم حركة سوف نتحدث عن بحري (الطراوة)..يحري ظرافة..بحري لطافة..بحري راقية..بحري رايقة..كان كيف يكون الحال لو ما كنت من بحري و أهل الظرافة ما جيراني..
عندما يكتب ابن بحري شكوكو فانني أقرأ و بمزاج فهو يعرف كيف يطوع الحرف و لا يستعصي عليه ..شوف كتب كلام كنت عاوز أقولو لكن لقيت انو شكوكو قالو بكل الجمال:
Quote: وهكذا أخي كمال
توسع ما كان ضيقا .. وتزيد دائرة التلاقي الجميل .. وتفتح كوة جديدة يتسرب منها الهواء النقي
|
ظريف بحري و الشعبية حيدر الجقدلي:
و دي ذكرتني ظريف بحري و الشعبية حيدر الجقدلي فمرة جات سيرة التعبير قال في ناس تعبيرهم بيكون دقيق جدا لكن ربنا لم يوهبهم موهبة شعر ليترجموا ذلك لشعر فمثلا ادريس جماع قال : ان حظي كدقيق فوق شوك نثروه..الى الآخر لكن نحن عندنا عامل في المخازن و المهمات لعن حظه و قال : و الله أنا لو وقعت أجلي من الواطة..
لك الكثير من الود و بالتأكيد لي عودة و عودة..
كسرة:
سألت الباشمهندس أمجد عبدون وين كمال ما ظاهر؟ قال لي الاولاد سافروا بعد دا بظهر ، فكان هذا الظهور بهذا الجمال...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
مدينة بحري النشأة والتطور والرقى :
بقلم عبد الله حميدة :
نشأت هذه المدينة في أعقاب حملة استرداد السودان في مستهل القرن الماضي (1900م) ، ولم يكن لها خبر أو ذكر طوال فترة الحكم التركي والمهدية ، إذ أن كل ما كان يعرف من أوطان في هذه الناحية من الضفة الشرقية للنيل الأزرق - المواجهة لمدينة الخرطوم عاصمة الترك - قريتان هما الصبابي وشمبات إضافة الي بيوت متناثرة قليلة حول قبتي الشيخين حمد ود أم مريوم وخوجلي عبد الرحمن الشهير بابي الجاز . والذي يلفت النظر في اسم هذه المدينة انه لم يجر علي منوال ما تعارف عليه السودانيون من إطلاق أسماء الجهات علي المدن والقرى عندما تكون لها امتدادات علي شواطئ الأنهار فيستخدمون عبارتي (شرق) و (غرب) للتفريق بين المدن والقرى التي تنشأ متقابلة علي أي من تلك الشواطئ واظهر ما يكون ذلك علي امتداد النيل الازرق فيقولون (الجريف شرق) و (الجريف غرب) و (سوبا شرق) و (سوبا غرب) و (الباقير شرق) و (الباقير غرب) وهلم جرا .. غير أنهم خالفوا هذا النسق عندما قامت المدينة التي نؤرخ لها هنا فقالوا : (الخرطوم بحري) لا (الخرطوم شرق) وتفسيري لهذه المخالفة إنهاء جاءت من مصدر غير سوداني فالسودانيون لا يستخدمون - فيما اعرف - كلمة (بحري) وإنما يقولون بدلا عنها (سافل) أي الجهة التي ينحدر إليها النهر وعندما أطلق الانجليز علي هذه المدينة اسم (Khartoum North) أي الخرطوم شمال لأنها تقع إلي الشمال من المدينة الأصل : (الخرطوم) ، لم يجد السودانيون فرصة ليطلقوا عليها الاسم الذي يتبادر تلقائيا إلي أذهانهم أي (الخرطوم شرق) . إذن من الذي أطلق هذا الاسم علي هذه المدينة ؟ الراجح أن هذا الاسم : (بحري) جاء به المصريون لان المصريين يطلقون عبارة (بحري) علي أي موقع في اتجاه البحر فيقولون (الوجه البحري) أي ذلك الذي يقع في اتجاه البحر الأبيض المتوسط ، ويطلقون عبارة (قبلي) علي كل موقع في اتجاه القبلة (وهي بالنسبة لهم جنوب) وليس (مشرق الشمس) . لكن ما هي علاقة المصريين بهذا الموضوع أصلاً جاء المصريون متضامنين مع الانجليز لفتح السودان في بداية القرن الماضي وأقاموا ما يعرف بالحكم الثنائي وفق اتفاقية شهيرة تم التوقيع عليها خلال العام 1898م ، وبموجب هذه الاتفاقية أقام جزء من الجيش المصري في الضفة المواجهة للخرطوم وبما أن اليد الطولي للحكم كانت في أيدي الانجليز الذين لا يعرفون لا (السافل) ولا (الصعيد) ولا (قبلي) ولا (بحري) فقد استخدموا عبارة (North) أي شمال ولكن المصريين من واقع ثقافتهم ومن واقع أنهم لم يجدوا سابق تسمية لهذا الجزء الذي أقاموا فيه معسكرهم - أطلقوا عي هذه الناحية (الخرطوم بحري) بل كانوا أحيانا يقولون (الخرطوم البحرية) وهذا ثابت في كثير من وثائق تلك الفترة والذي يضيف ترجيحا إلي ما ذهبنا إليه في شأن اسم هذه المدينة - هو أن عبارات واصطلاحات مصرية أخرى قد واكبت ظهور هذا الاسم تضيف تفسيرا إلى هذا الأثر المصري . ففي بواكير القرن الماضي ، منح الانجليز امتيازات زراعية علي شاطئ النيل الأزرق قبالة الخرطوم لبعض المستثمرين غير السودانيين من الشوام علي وجه التحديد ولما كان هذا النمط الزراعي جديدا علي هذه البقعة من حيث نوعه وكمه وكيفه - فكان طبيعياً أن تظهر كلمات مثل (عزبة) أي (مزرعة) فيقولون (عزبة كافوري) أو (العزبة) مطلقا ومنها مدرسة العزبة التي عرفت بهذا الاسم إلي يومنا هذا واشتهرت كمدرسة متفوقة علي مستوي كل ولاية الخرطوم ، وسبب هذا الاسم أنها أنشئت بجوار (العزبة) وهي (عزبة) أخرى غير (عزبة كافوري) أو (عزبة كفوري) التي مازالت آثارها باقية حتى اليوم في (حي الواحة) بشرق المدينة . وهناك أيضا كلمة (ميري) اي (اميرى) ومعناها (حكومي) وقد أطلقت علي حي قديم حديث كان ولا يزال يسكن موظفو وعمال الحكومة خاصة أولئك الذين كانوا يعملون في مصلحة الوابورات (النقل النهر ى فيما بعد) حينما كانت للمواصلات النهرية شنة ورنة ولله الأمر من قبل ومن بعد . ولا يخفى علي فطنة القاري الجذور المصرية لهذه الكلمة التي تضاف أيضا إلي المنشآت الحكومية فيقولون : المدرسة الأميرية وهذا اصطلاح مازال متداولا في الخرطوم بحري إلي يومنا هذا . أضف إلي كل هذه التخريجات والترجيحات حقيقة أن جالية مصرية ضخمة من الأقباط علي وجه الخصوص كانت قد نزحت إلي السودان في أعقاب الفتح وسكنت هذه المدينة لتكون طبقة وسطي من الكتبة والمحاسبين والتجار والصناع واقطعنهم الحكومة حيا سكنيا من أقدم أحياء المدينة وأجملها علي الإطلاق هو حي الأملاك حيث سادت لهجة الوجه القبلي المصرية لعقود . ولولا أن المدينة قد وسعت فيما بعد وجذبت إليها أفواجا من الشايقية والمحس وقليل من الجعليين وآخرين من غير قبائل الشمال العربية لاصطبغت بصبغة مصرية لا تخطئها العين . هذه مقدمة لابد منها لكل من يريد أن يؤرخ لهذه المدينة العزيزة التي توسعت علي مدي المائة عام الماضية وسعا هائلا اخترقت به سهل البطانة وتجاوزت به كل الفضاءات التي كانت تفصلها عن (حلفاية الملوك) حيث انتهي أولاً خط السكة حديد القادم من أقاصي الشمال من قبل أن يمتد إلي هاهنا الخرطوم بحري ، في حقبة بناء قنطرة النيل الأزرق أوائل القرن العشرين .
نشأة المدينة ونموها منذ بداية القرن الماضي (1900) إلي نهاية الربع الأول من ذلك القرن (1925) ، نمهد لهذه الحقبة برجعة زمنية قصيرة إلي خواتيم دولة المهدية . ففي هذه الفترة لم يكن يعرف من العمران في المكان الذي تمددت عليه المدينة - لاحقا W- الا بيوتات قامت حول قبة الشيخ خوجلي (1653-1743) وأخري حول قبة الشيخ حمد (1646 - 1704) تطورت تدريجيا إلي ما يعرف اليوم بحلة حمد وحلة خوجلي (والحلة هي المكان الذي يحل فيه الشيخ ويقيم فيه مسيده وخلوته أولاً ثم يتقاطر عليه التلاميذ والمريدين فيصير مستوطنة بشرية . غير أن أنصار المهدي لم يكونوا ينسبون هذه النواحي إلي أي من الشيخين الجليلين انطلاقا من سياسة التعتيم علي كل ما يصرف أبصار الناس وأفئدتهم وأذهانهم عن أنوار الحضرة الأمامية .. كانوا يطلقون علي هذه النواحي الشرق... الشرق الجغرافي أو شرق بحر النيل لا فرق ، وعندما وصل خط السكة حديد إلي هذه الناحية في بداية العقد الأول من القرن الماضي ، اكتسبت أهمية ذات طبيعة ونكهة جديدة تماما ... جاءت السكة حديد بتقنية ومهارات نصارى ما وراء البحار ثم حطت هنا بعد رحلة عبر الجبال ، والوهاد عصا تسفارها الطويل .. هنا حيث يتنفس الناس زهدا ويقتاتون بما لا يكاد يقيم الأود (فيروبون الماء) ثم يطير صالحهم في الجو بلا جناح ... هنا التقت المفارقات وتوجست النفوس حذرا وفرقا من عاقبة احتكاك بين قطبين : قطب الآلة بكل سحره وجبروته وجسارته وقطب الأقطاب من أمثال سيدي خوجلي بن عبد الرحمن تلميذ الشيخ أرباب العقائد ، وأمثال سيدي حمد بن محمد علي (ود أم مريوم) . ثم لم تلبث أن أطلت المفارقات عندما أقام الغزاة أول قنطرة حديدية ثابتة في تاريخ المنطقة علي النيل الأزرق منذ عهد أبينا آدم ، فربطت بين الشاطئين ومكنت السكة حديد والناس والدواب من الوصول إلي عاصمة الترك .. كانوا يقولون أن الشيخ فلان يسير فوق الماء عابرا للضفتين مثلما حكت (طبقات ود ضيف الله) محمد نور الذي ولد وعاش في مكان غير بعيد يقال له (الحلفاية) إلي الشمال من ها هنا .. أطلت المفارقات إذن في النصف الثاني من العقد الأول من القرن العشرين . وتوالت المفارقات (كلها - ليس صدفة - تتسلل واحدة اثر أخري) علي الجانب الشرقي للناحية وبعيدا عن مركز القطب الثاني اللا آلي .
قرر الانجليز بناء أضخم سجن عرفته بلاد السودان منذ فجر التاريخ ، ثم جاءوا برجل عسكري يقال له (cooper) وجعلوه قائما علي ذلك السجن فأخذ منه اسمه وصرامته . وجئنا نحن من بعد ذلك نطلق عليه (توبر) .. نخفف الضم علي الكاف وكأننا نلتزم القاعدة الذهبية التي ورثناها من جدودنا (أعجمي فالعب به !) .. كان هذا السجن هو النواة التي نبتت عنها (حلة كوبر) فانظر إلي غرابة المفارقة : هذه (حلة) وتلك التي نسبناها إلي الشيخ خوجلي (حلة) أيضاً ولله في خلقه شؤون . في هذا السجن انعقدت محكمة أعضاء جمعية اللواء الأبيض في 29 فبراير 1925م برئاسة القاضي اوزبرن وعضوية الميجر (الرائد) برادلي والشيخ حسين الفيل ، وفيه انعقدت محكمة مثيري الشغب من طلبة المدرسة الحربية والمحكومين بجرائم سياسية والمنتظرين المحاكم بتهم جرائم سياسية وآخرين من المسجونين العاديين . وفي موقع غير بعيد من هذا السجن جهة الغرب أقام الجيش المصري (الطبجية والأرطة الثالثة) ثكناته في المكان الذي يحتله اليوم سلاح النقل والصيانة وسلاح الإشارة .
منقول من موقع محلية بحري
نواصل ...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
معليش يااخوانا بالجد عندى مشكلة فى الاقتباس من امبارح ...
لكن عجبنى اقتراح الاخ بدر الدين اسحاق ده ...حقو تحكوا لينا عن كل بند فيه
بالله ...(نعنشوا لينا الذاكرة دى ) يلا ياكمال وبدر الدين وطارق ميرغنى وشكوكو
وبقية الاخوان الكرام ....
يقول بدرالدين فى اقتراحه :
احباب بحرى
كده نقترح :
1/ظرفاء بحرى
2/ فنانين بحرى
3/ لعيبة بحرى
4/ ادارى بحرى
5/فرق بحرى
6/ اساتذة بحرى
7/الماذون فى بحرى
8/ دايات بحرى
9/ امهات بحرى
10/ سياسيئ بحرى
11/ اقباط بحرى
12/ شيوخ بحرى
13/ شفوت بحرى ( الكدمى )
14/ عمدة بحرى
15/ ................طوالى ...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
تسلمى اختنا ناهد
ونواصل :
*شعراء بحرى
*جزارين بحرى
*طهارين بحرى ((عمنا الداروتى فى الحلفايا))
*شوارع بحرى
*دكاكين بحرى
*شهداء بحرى
*......اييييييييييييييييييييييييك يا بحرى
تخريمــة سمحة:
فنانين بحرى نسيتوهم
* عادل تسعــة
* صلاح بلحاتى
* درماس
والظريف ابو اللول فى سوق بحرى والشعبية مع توئم روحه حيدر الجقدلى
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
هؤلاء صحفيون وإعلاميون من مواطني بحري الأصلاء:
1- العم الصحفي/ طه المجمر (والد أخوانا وزملائنابالمنبر هشام، سهام، عزام، وهمام)
2- العم الصحفي/ محمد خليفة طه الريفي(والد أخينا وزميلناأسعد الريفي)
3- المذيع/ محمد خوجلي صالحين - منزله في المزاد "جنوب غرب" مدرسة الحرية
4- المذيع/ محمد سليمان- سكن لفترة في المزاد المقفول غرب السوق
نترحم على المتوفين وندعو بالصحة لمن هم على قيد الحياة..
يلا أنتو أتذكروا معاي
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
الاخ العزيز كمال اعتقد ان هذا البوست سيكون من الاهميه بمكان ليوثق لمدينة بحري لذا ارجو ان يكون من الجدية بمكان وان يتم من الاخ كمال جدولة للتحدث عن احد الانشطة او المجالات التي اقترحها الاخ بدر الدين اسحق وثنته ناهد بشير وحتي حينه اقترح اضافة كل الامكنة والانشطة دون تفرقة لتشمل مثلا : العياشه،ستات الكسرة والفسيخ،الاندايات ، الاحباش والاقباط،الادباء والفنانين والصحافيين والاعلاميين واندية ولعيبة ومدربي وحكام كرة القدم والشعراء.
الاخ حاتم المالكي جميله منك الصور.
الاخ كمال السر ارجو اضافة الفنانين للقائمة : اولاد خضر بشير،طه سليمان،عماد احمد الطيب،احمد الطيب البحراوي،عبد الله الكردفاني،الفنانين من اصول شرق نيلاويه ( احمد المصطفي،سيد خليفة، خلف الله حمد واولاد الدبيبه) والفنان والمبدع المرحوم خوجلي عثمان وصديقي النور الجيلاني ومحمد الامين كل ما يغادر بحري يرجع تاني وهو متزوج طبعا اخت زميلنا ببحري الثانويه وابن شمبات ازهري مالك.
محمد الطيب حسن القيديو ظريف وكتر من البريكات دي.
اخي ابو رزقه فعلا نحن ميرغنيه لانو والدتي ربنا يعطيها الصحة والعافية واخواتها شهيرات ببنات ختمي لان والدهم رحمة الله عليه كان من كبار الختميه .
اما والدي ميرغني علي مصطفي من مواليد بري المحس ونزحوا الي بحري العام 1931 علي ما اعتقد وسكنوا الدناقله جنوب شمال السوق .
ويا ناهد علي ذكر حلة حمد لم تذكري زوج عمتي عبد المنعم احمد حسين مؤسس نادي استاك ،التحرير حاليا ووالدته الحاجه سكره (بضم السين ) كانت تعالج الاطفال وجيران ناس لبيب ونصر الدين السيد وناس عنيبه ودهب ...عرفتي .
صديقي اسعد الريفي مريض بالدسك حسب حديثه معي بالهاتف امس للتعليق علي صور فرقة بحري الثانويه.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
| Quote: وفي المتوسط من المحتمل جدا أن تكوني درست على يد الأستاذة/ زينب محجوب كرار |
نقيف هنا و نحيى تحية اجلال و حب و موده
يالله يا كمال الاستاذه و الام و المربيه زينب كرار شخصيا والله لقد انعقد لسانى و لاا جد فى نفسى الكفاءه للتحدث عنها
ياسلام و نعم القرابة يا كمال..
التحيه ليها و لاسرتها فهم اصدقائنا و صديقاتنا... امانى اللطيفه الصامده المصادمه
و محمد شريف ..مجننننننننننننننون ياخ اخونا و فردتى
ياخ ده كلام عجيب ... كمال لو عندك اتصال بيهم قول ليهم بنحبكم و مشتاقين ليكم
كمال كرار ده بوست بجنن و قد تزامن مع هجرتى الى بحرى ..الليله دى انا راحله بحرى
حيث الاستكانه و الجمال و التداعى
تلفوناتى تتطاقش لناس ابومروه عشان يجيبو صوانى الاكل و ترامس الشاى و يجوا للنفير
من الاساتذه/ات
استاذ عباس على .. مدرس اللغه الانجليزيه و هو من ابناء الشلاليه و كان شيوعى عريق..
ست علوية حمد.. مدرسة لغة انجليزيه التقيتها قبل فترة ليست بالقليله حدثتنى بمرار شديد عن تدهور التعليم
وانتقدت بحس علمى و تربوى عالى سياسات التعليم الحالية.. والله كنت استمع اليها كانى فى الفصل
ست امنه ادهم .. مدرسة لغة عربيه ..ابتدائى ... وهى اخت عمك امين ادهم الرجل الساخر ..الضاحك
ست امنه لم تستسلم لسن المعاش و لازالت تجهد نفسها فى شئون التعليم و التربيه فى رياض الاطفال.. صحى العطاء ما عنده عمر
ست نائله بدرى ..مدرسة لغة عربية ودين.. ولى معها الكثير...
عارف يا كمال نائله دى جارتنا حيطه بى حيطه.. كانت لمدة سنه كامله بتشيلنى فى كتفها و انا نايمه عشان توصلنى معاها المدرسه !!!
هسه تفتكر فى معلم ممكن يعمل كده؟؟؟!!!!
والله زمااااااااااااااان و ديل ناس بحرى
_____________________________________
بحرى نداوه
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
العزيز كمال السر.....
بوست قمة في الروعة واستقراء الذاكرة......
انها روعة بحري يا صديقي العزيز . المحبة والالفة والأخوة والجيرة والتواصل .
كان كل شي يميز هذه المدينة حتى المقاهي كانت ذات طابع خاص.
بس عاوز واحد يقول لي وين قهوة علي جدادة أو ماذا تسمى الآن؟
ويا كمال ما هي أقرب قهوة لي بيتكم في المزاد ومن هو صاحبها؟
أين بدر الدين وزينب؟
حاول تتذكر وبجيك راجع؟
أبوعبيدة
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Abuobeida Ali Abdullah)
|
أبوعبيدة سلامات يا أخي..
معليش كانت بحاول أتذكر.. وبصراحة إتصلت ببدرالدين وتذكرك بمجرد ذكر إسمك وقال ما مشتاق إلا يقابلك.. يا سلام.. يا أبو عبيدة إبن العم علي "صاحب قهوة المزاد".. أخبارك يا ملك وأخبار أهلك الطيبين.. والجيرة الزمان..
بدر الدين في الرياض وإتملى عيال
زينب في السودان وأبنتها الكبيرة تزوجت الشهر الفات..
برسل ليك تلفوني في المسينجر يا أبو عبيدة.. للتواصل إن أمكن..
تحياتي وسؤالي عن الجميع من ناحيتكم...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Abuobeida Ali Abdullah)
|
Quote: بس عاوز واحد يقول لي وين قهوة علي جدادة أو ماذا تسمى الآن؟
ويا كمال ما هي أقرب قهوة لي بيتكم في المزاد ومن هو صاحبها؟
|
الاخ ابوعبيدة
قول عايز واحدة ....
شوف فى قهوة فى اخر محطة فى المذاد بتاعة العم على عبدالله ..
.والد المهندس ابوعبيدة ودكتور بكرى والمهندس منتصر ...
وكنا بنجى من بيتنا فىالصافية كدارى لانه
بصات ابورجيلة كانت بتقيف فى المحطه دى اللى هى اخر
محطة فى المذاد وبنركب منها...
ونحن كبنات مابنقدر نخشها ...لكنها كانت معلم بارز وبيوصفوا بيه ...
اما يااخ ابوعبيدة قهوة العم على جدادة واعتقد ان له
قرابة بعم على عبدالله صاحب قهوة
المذاد ...فكانت قهوة على جدادة فى سوق العناقريب ...
والمنطقة دى كانوا بيتجمعوا فيها العمال
والصنايعيه الصباح قبل مايمشوا لى اشغالهم ..
.وكان الوالد عليه الرحمة بيسوقنا ونحن صغار معاه
بيجيب من جنب القهوة العمال والصنايعية لبناء البيت
وكان دائما مابيوقفنا برة وهو يشرب ليه كباية كبايتين من قهوتها الحلوة
...وسميت بقهوة العمال بعد ذلك...
ولا ادرى هل هى مفتوحة الان ام لا ....
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote:
الاخ ابوعبيدة
قول عايز واحدة ....
شوف فى قهوة فى اخر محطة فى المذاد بتاعة العم على عبدالله ..
.والد المهندس ابوعبيدة ودكتور بكرى والمهندس منتصر ...
وكنا بنجى من بيتنا فىالصافية كدارى لانه
بصات ابورجيلة كانت بتقيف فى المحطه دى اللى هى اخر
محطة فى المذاد وبنركب منها...
ونحن كبنات مابنقدر نخشها ...لكنها كانت معلم بارز وبيوصفوا بيه ...
|
طيب مع أبوعبيدة المخاطب بكلامك ده يا ناهد هو نفس أبوعبيدة المهندس المذكور في بطن ردك.. وكانوا جيران لنا في المزاد.. والقهوة المقصودة هي نفس قهوة المزاد وهي في سوق المزاد..
واعتقد جداده ده لقب للعم علي عبدالله
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ارجو اخي كمال كي لا تضيع المعلومات ان يكون هنالك عنوان واحد عريض يكتب تحته كل الناس عن كل شئ في المجال ، لا اقصد ان لا يكتب اي حد عن اي شيئ آخر بل ان يقوم كمال باقتراح مثلا باب الشعراء فعندما اكتب انا مثلا اذكر اسم المجال او النشاط واكتب تحته ما اريد.
هذا اقتراح بقصد التوثيق فقط واحقو الاعلاميين من امثال ناهد بشير الطيب ان يوجهوا هذه الدفه.
الشعراء
من اهم شعراء بحري والذي كما قيل اثري الحقيبة باجمل اغانيها الشاعر الراحل صالح عبد السيد ابو صلاح ،مصطفي بطران،محمد عبد الله الامي، ود الرضي، ادريس جماع، محمد محمد علي ، السر كنه ( يا نديمي دعك من عثرات قولي واترع الكأس وناجي الكون مثلي)، صديقي المرحوم ابو آمنه حامد، مبارك بشير وسوركتي.
الاعلاميين:
صديقي المرحوم علي الحسن مالك، محمد خوجلي صالحين، محمد سليمان ، علي الريح، عبد الرحمن عبد الرسولوالدكتور عبد المطلب الفحل
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
حبيناك من قلوبنا وأخترناك يا حلو
أخ كمال حبيناك عشان بحري وحب بحري يجري في دمائنا
التحية لكل المارين في هذا البوست الرائع
طالما الحديث عن بحري أولا نترحم على نادي العمال والبوسطة
وأسال هنا عن نادي العمال وما مصيره؟؟؟
كنت ناوي أفتح بوست خاص بنادي العمال ولكن طالما وجدت في بوستك منتدى مفتوح لعشاق بحري أرجو أن يفيدنا من له علم بمصير نادي العمال بعد أن اصبح أرض للباعة المتجولين ومكانا للقاذورات والقمامة.
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: طارق ميرغني)
|
Quote: واحقو الاعلاميين من امثال ناهد بشير الطيب ان يوجهوا هذه الدفه.
|
الاخ طارق ميرغنى ...
حقيقى كلنا حنكون مع بعض ...واهو برضو جبنا معانا الوالدة للبوست ده
الاستاذة فوزية قاسم مقلد....جامعة الخر(.........)م 40 سنة رحلة عمل ....ومن مواليد
بحرى الصبابى .......
واهى ذاكرتها معانا كويسة كل مااقول ليها ياحاجة انتى الجمبنا ديلاك
ناس فلان الكانو فى الحتة الفلانية العندهم شنو مابعرفوا داك ...
طوالى تدينى الاسم كاملا ...(ماشاءالله عليها)وربنا يحفظها امين يااااارب
ملحوظة...(لو فى اى معلومة ناقصة او محتاجة لتصحيح ليتكم تعدلوها)
اخونا كمال
عمدة بحرى
مقبول الصديق
شيوخ بحرى
حمد
وخوجلى
والسيد على الميرغنى
والسيد المحجوب
وحاج سعد(جامع حاج سعد)
اقباط بحرى
ست ليلى
ست مريم
ست انا
(من مدارس الانجيلية)
عفيفة
ال رمسيس
ال جرجس
ال شوقى (بتاعين تياب الفراد)
ال دانيال (بتهم اول مضيفة )
اساتذة بحرى
علوية عتيق (بحرى الثانوية)
على الريح (مدارس صالحين)
السراج (مدارس الشعب)
العقيد (الجغرافية)
مبارك (الوابورات بنات)
محجوب عتيق وخالد عتيق ..ووالدهم عتيق نفسه
الربعه(مدارس الربعة)
سياسى بحرى
احمد السيد حمد
احمد الميرغنى
احمدزين العابدين
محمد عبد الجواد
نصر الدين السيد
الرئيس ابراهيم عبود
ادارى بحرى
نصر الدين السيد
محمد احمد عبدالرحيم
محمد معوض اول باشكاتب فى النقل النهرى
صحافى بحرى
كما تفضلت وذكرت انت اخ طارق
ايضا
الوالد رحمه الله بشير الطيب (صاحب مجلة الزمان ومجلة الوجود
ورئيس تحرير جريدة الصحافة .)...
بشير محمد سعيد (جريدة الايام)
ابراهيم عبدالقيوم (جريدة الايام)
بجيكم راجعه ....بس النشوف وين الكابتن
هشام الطيب حارس مرمى الهلال ... ود جيرانا الحيطة بالحيطه
وعارف الكتير عن ناس الكورة واللعيبة ...
| |
|
|
|
|
|
|
|
|
|
باب (ظرفاء بحري) (Re: Kamal Karrar)
|
يا طارق ويا حسن.. تأيدا لكلامكم .. أبدأ
هذا الباب يا أخوانا باب ظرفاء بحري.. أرجو من طارق إفتتاح هذا الباب أولا بمحاولة استذكار أسماء ومواقع كل ظرفاء بحري ومن ثم ذكر نوادرهم.. أو كما ترون..على كل من يريد المساهمة فيه أن يضيف إلى الباب مباشرة يعني يضغط على إضافة في نفس الباب وليس جسم البوست. وشكرا
| |
|
|
|
|
|
|
|
|
 Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
جدودي من بحري...
حبوباتي من بحري..
أبوي لاقى أمي..في بحري..
إتولدت و إتربيت في بحري...
قريت الإبتدائي في بحري..
الثانوي العام في بحري..
الثانوي العالي في بحري..
مرقت من بحري...عشرات السنين..
ماإرتحت إلا لمن رجعتَ تااااااااني ل بحري.
الوصية بالمَهلَة يا جماعة....
لمن أموت...أدفنوني - جنب أمي - في بحري!
--
دا شنو البوست الحنين دا ؟؟!!!
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
والله يا جماعة الأستاذة ناهد بشير الطيب
حيرتني عدييييييييييييييييييل
ده زخم بتاع معلومات
يحتاج لكتاب لتوثيقها
وكذلك بقية المتداخلين
وأنا على قلة معلوماتي عن بحري
أحاول أن أضيف
بعض المعلومات
بالنسبة للفتوات
كنت على معرفة شخصية
بالشيخ علي أبو كرم (الفتوة سابقا)
وهو بالمناسبة إنضم لجماعة أنصار السنة المحمدية
وليس للتبليغ
وكان يحكي لنا عن صراعاته مع الفتوات
وذكر مثل ما تفضل الأخ كمال
أن الكضمي لم يكن بالقوة التي يزعم
ولكن كانت حوله هالة إعلامية
عن أن له ضربة قاضية
يعني كان أداك بنية
العاقل يقول دقشك قطر
ولكن الغريبة
إنو ذكر أن أخطر شخص
على الفتوات في بحري
كان المرحوم محمد عبده عثمان
وهو لم يكن فتوة
ولكن كان يهوى ألعاب القوة
وكان نصيرا للضعفاء وضحايا الفتوات
وهو شقيق الأستاذ سيف الدين عبده
كان في سودانير
وهم بالمناسبة أقرباءنا
وقد توفي محمد عبده فجأة
وهو على الطائرة القادمة من الأمارات
وكذلك كانت وفاة أخيه الأصغر حسن عبده
فجأة
رحم الله الجميع
ولنا عودة لصراع الفتوات
في بحري
ولظرفاء بحري
ودمتم سالمين
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ابراهيم قناوي)
|
Quote: والله يا جماعة الأستاذة ناهد بشير الطيب
حيرتني عدييييييييييييييييييل
ده زخم بتاع معلومات
يحتاج لكتاب لتوثيقها
|
الاخ ابراهيم اولا ياخى ازيك انت قريبى عدييييييييييل كدة
ال قناوى مشهورين فى بحرى ....وعندكم من القناوية راجل
نقابى كبير منو كدة قناوى ...وقرابتنا بيكم بى سوسو قناوى
فى عطبرة ووداد خطاب من ال خطاب (عطبرة)
وسوسو قناوى.. وفوزيه قاسم (والدتى)... ووداد خطاب
واطاطا (فاطمة)....وبثينةمحسب....
كانن اول بنات يشتغلوا بعد السودنة فى مدينة عطبرة ...
اثناء اقامة امى هناك مع جدتها لتتعلم فى الارساليه عطبرة
ولهم صورة عندى لهم مع الخواجات (لكن مابعرف انزل ولاحاجة)
...وانتو اصلا من قنا..(فى مصر) وقرايب للوالدة
من ال مقلد وجاد غريب ....فاهلا بيك وسهلا ...قريب
ورفيق لدرب بحرى مع اخواننا فى البوست ...
تخريمة.....
بمناسبة ناهد توثق دى حقوا تستفيدوا منى بسرعة
لانى ماشة(باذن الله) السودان بالناقل الوطنى وكدة ...
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
من كباتن الطيران أيضاً
صديق عبد الجبار
زميلنا في هذا البورد، نتوقع منه المشاركة وإثراء البوست بمداخلاته المتميزة
حسن ناصر
بعض أبناء بحري في من النشطاء في هذا البورد مسجلين غياب تام حتى هذه اللحظة عن هذا البوست على سبيل المثال لا الحصر الأخ هشام المجمر ، محمد شمس الدين ، الهميم فهل منتظرين يركبوا القطار من محطة الجيلي وإلا أيه السبب
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ناهد بشير الطيب)
|
Quote: الاخ ابراهيم اولا ياخى ازيك انت قريبى عدييييييييييل كدة
ال قناوى مشهورين فى بحرى ....وعندكم من القناوية راجل
نقابى كبير منو كدة قناوى ...وقرابتنا بيكم بى سوسو قناوى
فى عطبرة ووداد خطاب من ال خطاب (عطبرة)
وسوسو قناوى.. وفوزيه قاسم (والدتى)... ووداد خطاب
واطاطا (فاطمة)....وبثينةمحسب.... |
أها دي ما الحيرة الجننت عبد القادر
والله لو ما عملت كتاب توثيقي عن بحري
تبقي لا بتحبي بحري ولا حاجة
والنقابي ده خالي عبد الله نصر قناوي
رئيس اتحاد نقابات عمال السودان
وقد توفى رحمه الله في الحج سنة 1999
Quote: ...وانتو اصلا من قنا..(فى مصر) وقرايب للوالدة
من ال مقلد وجاد غريب ....فاهلا بيك وسهلا ...قريب
ورفيق لدرب بحرى مع اخواننا فى البوست ... |
من قنا ولا من كاب الجداد المهم أكون قريبك وخلاس
Quote: تخريمة.....
بمناسبة ناهد توثق دى حقوا تستفيدوا منى بسرعة
لانى ماشة(باذن الله) السودان بالناقل الوطنى وكدة ... |
تمشي وتجي بالسلامة
وتحياتنا لي بحري
كلها
ودمتم سالمين
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: ابراهيم قناوي)
|
من قنا ولا من كاب الجداد المهم أكون قريبك وخلاس
الاخ ابراهيم قناوى....
انت عارف الناس الفى البوست ديل كلهم قرايب
وكان ماقرايب جيران وان لا كمان معارف ولا اصهار ونسايب...
وكمان فى زول قريبك اسمه الاستاذ المحامى حسن دراوى من (دراو)(مصر)
وهو ابن خال الوالدة ...شفاه الله من الوعكة التى المت به
...ويسكن الان الحلفايا....
تخريمة
كان كدة تانى مابتجينى عوجة وراى رجالة ....
يديكم كلكم العافية شقيش ماتقبلوا
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
Quote: وأسال هنا عن نادي العمال وما مصيره؟؟؟
|
حسب ماعرفت قبلاً أنو نادي العمال تم بيعه من ضمن ماقد بيع إلى السعودي جمعة الجمعة مع قصر الصداقة والبوستة القديمة المقابلة سينما وطنية ... بعد أن تم نقل البوستة منذ زمن بعيد إلى مقابل مطعم الخيام ( والما أكل فيه زمان ما أكل ) ... وتم هدم نادي العمال وهو الآن قطعة فااااضية حتى بداية هذه السنة .. ( أخر إجازة لي )
| |
|
|
|
|
|
|
|
|
|
Re: بحري طراوة... ويا ناس بحري .. قالوا بتحبوا يلا حبونا.. (Re: Kamal Karrar)
|
ما شاء الله اخت ناهد...... الاستاذ بشير الطيب رحمة الله عليه... علم في رأسه نار "هذا الشبل من ذاك الاسد"ونسيتي ابن حلتنا محجوب محمد صالح ,, وحاحاصرك من جهتين .دراستك في الاميريه بنات اكيد حتكون درستك احدي اخواتي ساميه او هدي ميرغني ، ومن عطبره التي قضت والدتك فيها زمن... فوالد زوجتي النقابي القديم بالسكة الحديد وسكرتيرها لزمن هاشم السعيد.
ظرفاء بحري:
عز الدين شلنكح
عمر الحلبي
ود اب كالوك
ابو الهول.
وبرضو ابو آمنه حامد
ولكل حكايات ارجو من ديناصورات المدينه البدء.
المرحوم علي الحسن مالك كان صديق شلنكح واعطاه المعلوم من بدري لتجهيز العشاء بمنزلهم بالدناقله لان مساء نفس اليوم هلال مريخ .
بدأ شلنكح بتجهيز الميدان ورش الحوش والراديو بجانبه وصوت مالك يصيح قووووون واااااوت.......... والآن اترك المايكروفون لزميلي الرشيد بدوي عبيد وفجأة دق الباب. هرع شلنكح وفتح الباب ليجده علي مالك فصاح: انت جيت راكب الموجه ولا شنو؟؟؟
| |
|
|
|
|
|
|
| |
Kamal Karrar
حسن طه محمد
doma
لؤى
ارصد محمد جلال
بدر الدين اسحاق احمد
ابراهيم قناوي
صلاح شكوكو
سامى عتبانى
المكاشفي خضر بشير
Siham Elmugammar
Hussein Mallasi
Hatim Elmaki
ناهد بشير الطيب
الحاج حمد الحاج
محمد الطيب حسن
Abuobeida Ali Abdullah
Habib_bldo
mamkouna
فيس بوك
تويتر
انستقرام
يوتيوب
بنتيريست