|
|
 رســـــمة حنّتك
|
رسمة حنتك لوحة وطن
نيلينو منسابين حرير
مغزول بنول عز الزمن
والخضرة بقّت واحتوت
ضجّة تسابيح الشّجن
جات البسيمة مرفرفة
وضّاحة زي صفحة لبن
ممزوجة بي عطر الربيع
معسولة زي عنب اليمن
ورسمة حنتك خارطة قلب
دفّاق يكابد في الوجيف
ينزف وريدو جمال وحب
والريشة تخطف كل لون
حاكت رميلات الدّرب
دسّت أناملك في حشاي
فاضت عيوني بلا سبب
ضوّت بسيمتك في الفريق
بان الطريق ، بطل العجب
ورسمة حنتك لوعة عذاب
ترميني بي سهمًا عنيد
تهزم وعود كلّ السراب
تحبسني في حضن الأسى
تحجر علي لقيا الصحاب
تلسعني لوعات الهجير
تهجم علي من كل باب
تسقيني كاسات الهموم
يومًا أسى ويومًا يباب
الرياض ، 13 أغسطس 2002
|
|
 
|
|
|
|
|
|
|
|
Re: رســـــمة حنّتك (Re: ودقاسم)
|
ود قاسم
البسمة دايما بتذكرني ريحة الحنة في الإيد و تكون معطونة صندلية ..
ما بتجنني إلا البسمة .. تذبح من الوريد إلى الوريد .. تطفي نار الوجد .. تهدهد الروح .. تربت على زعل النفوس .. تواسي .. تونس .. و العجب لو جاتك في المنام .. تخلي نومتك زى نومة الطفل الغرير .. ..
Quote: جات البسيمة مرفرفة
وضّاحة زي صفحة لبن
ممزوجة بي عطر الربيع
معسولة زي عنب اليمن |
حاجة ما تنتهي ( لبن و عطر و عسل ) شن خليت يا العركي ؟
| |
|
|
|
|
|
|
|
|
|
Re: رســـــمة حنّتك (Re: ابو جهينة)
|
Quote: البسمة دايما بتذكرني ريحة الحنة في الإيد و تكون معطونة صندلية ..
ما بتجنني إلا البسمة .. تذبح من الوريد إلى الوريد .. تطفي نار الوجد .. تهدهد الروح .. تربت على زعل النفوس .. تواسي .. تونس .. و العجب لو جاتك في المنام .. تخلي نومتك زى نومة الطفل الغرير .. |
أبوجهينة
لك التحية وأنت ترسم لنا لوحة موازية للوحة الحنة التي انتزعت لبّنا ،،،
| |
|
|
|
|
|
|
|
|
|
Re: رســـــمة حنّتك (Re: عبد المنعم سيد احمد)
|
الغالى ود قاسم
| Quote: الرياض ، 13 أغسطس 2002 |
خسارة دى مارسمة حنتى كان كده لانى تحننت يوم 14 اغسطس
هههههههههههههههه
تسلم ود قاسمنا الزول المقاسمنا الفرح والهم وليك مليون تحية
ولمن نقشت حنائها فوق جبين وجدك وولهك وعظيم عشقك الف تحية !
| |
|
|
|
|
|
|
|
|
|
Re: رســـــمة حنّتك (Re: نادية عثمان)
|
| Quote: خسارة دى مارسمة حنتى كان كده لانى تحننت يوم 14 اغسطس |
نادية عثمان
ردّي البصر كرّتين ، وأعيدي حسابات التاريخ ، ربما وجدنا نقطة التقاء ،،،
تعرفي يا نادية لو أنا كتبت بعد 14 أغسطس كنت كتبت دواوين شعر ، عشان الدوافع بتكون أجمل وأبهى ،،،
تحياتي لك وللحنانة ،،،
| |
|
|
|
|
|
|
|
|
 Re: رســـــمة حنّتك (Re: ودقاسم)
|
| Quote: الرياض ، 13 أغسطس 2002 |
يا خال دا كلو كان مستخبي وين ؟
شكلنا موعودون بحاجات حلوة كتييييييييييرة ..
يديك ألف عافية ..
| |
|
|
|
|
|
|
|
|
|
Re: رســـــمة حنّتك (Re: معتصم دفع الله)
|
الغالي معتصم
وحياة غلاوتك عندي ، خالك استفتى قلبه ، وأشهد قلبه ،، واستسلم لأمره الواقع ،،، فرسمة الحنة قطّعت نياط قلبي ، وهزتني وهزمتني ،،،
شوف ليك زول يعمل رقيا على خالك ...
| |
|
|
|
|
|
|
|
|
|
Re: رســـــمة حنّتك (Re: ودقاسم)
|
..
.
سلام يا خالهم ..
ولجميع الخيلان والاخوان ..
يا خال اقعد اقراء لى ناس معتصم ديل فى رسمة الحنه
وتنداح امام استراحة النخيل وما تعرف تتحل منهم كيف
النس ديل قاعدين على الهبشة ..
ووين محمد الشيخ ووشتات .. قصة والله
لكم الاشواق المترعات ..
واحدمن زماااان ..
| |
|
|
|
|
|
|
|
|
|
Re: رســـــمة حنّتك (Re: Tabaldina)
|
يا ودقاسم انا احتفي معك بهذا الكلام الرائع ولكن
قررررربت انادي العوض ...يطلع ليك القصيدة دي مكتوبة
في حنة نادية السمحة....عيبها لي انت مالك ومال التاريخ
مش يمكن حنتها معطونة من الزمن داك
| |
|
|
|
|
|
|
|
|
|
Re: رســـــمة حنّتك (Re: nazar hussien)
|
ود قاسم الغالى
اعدت الكرة ثلاثة مرات !!
فتأمل!!
نزار حسين بطل حركات حاتجيب للراجل شبك مالك يازول ؟!!
تعال بوست الدوبيت بى هناك وقول لينا واحد فى الحنة زى ده كده مثلا :
حنتى المعطونة صندل من جمال بلدى الحنينة
الوطن البّق نورو زى ملامح زول رتينة
حنة من حنية دافقة ومن طمأنينة وسكينة
ختى يمة الحنة ليا وكترى الريد فى العجينة !!
| |
|
|
|
|
|
|
|
|
|
Re: رســـــمة حنّتك (Re: نادية عثمان)
|
| Quote: نزار حسين بطل حركات حاتجيب للراجل شبك مالك يازول ؟!! |
من تالا الشبك أنا ماني متلقيها
بس كلمة حبيب بالريد دوام راجيها
في آخر الهجيع نسماتو هبت بيها
جابت لي صباحاً نورو ضاوي الجيهة
يا غيمة من ضل الوطن جات العصر تتأنى
فرشولا السباتة ونقشوا ليها الحنة
عزفولك سلام جات الخلوق تتنى
شايفنك بشر بس إنتي حور الجنة
| |
|
|
|
|
|
|
|
|
|
Re: رســـــمة حنّتك (Re: nazar hussien)
|
العزيز نزار حسين
مني ليك سلام
تعرف يا نزار أنا مرات كتيرة بتخيل حاجات كده ، وبعد شوية تبقى الحاجات دي حقيقة قداّم عيوني ،،، ويبدو أن هذه واحدة من هذه الحالات ،،،
التحية للملهمة ولكل الذين يحتفون بجماليات المرأة السودانية ،،، والتحية للجمال المنساب بيننا في هذا المنبر بفضل أريحية الزميلات العزيزات ..
| |
|
|
|
|
|
|
|
|
|
Re: رســـــمة حنّتك (Re: Tabaldina)
|
يااااااااااااااااه الزول الجميل تبلدينا هنا ..
شفت يا خال حنتك جابت منو ..
أوعك تكون عملتها من ورانا يا تبلدي ..
دا كلو هين الضريرة تختها وين ؟ ..
كم نفتقدك يا صاحبي ..
ليالي الرياض من بعدك أصبحت حالكة السواد إلا من بعض النور الذي يشع من من تركتهم وراك بورداب الرياض الحلوين ..
لك كل جميل يا صاحبي ..
| |
|
|
|
|
|
|
|
|
|
Re: رســـــمة حنّتك (Re: معتصم دفع الله)
|
الاهداء الى كل من ينتظرون يوم حنتهم وعرسهم وفألهم الحلو اهدى هذا الدوبيت :
بحلف ليك قسم بى حبى ليك والخوّة
عرسك يالأمير فى يوم أكيد بتسوّى
تفرح بالجديد وعدوك الم يتلوّى
تحبك وتشتهيك فى الدنيا أجمل حوّة ..!!
| |
|
|
|
|
|
|
|
|
|
Re: رســـــمة حنّتك (Re: Tabaldina)
|
الغالي تبلدينا
ليك تحية وشوق
لا ينقطع لا يروق
بفتش ليك غروب وشروق
مناي ألقاك وأبل الشوق
يا أخي وينك ، وين الشعر ، وين الظلامية ، وين الحكي عن حنين الوالدة ،، عليك الله سلم لي عليها ، وعلي ناس هناك كلهم ،،، وقول ليهم ودقاسم مشتاق يدّردق في رمالكم ..
بكلمك بالتلفون الليلة إن شاء الله ،،،
| |
|
|
|
|
|
|
|
|
|
Re: رســـــمة حنّتك (Re: ابو جهينة)
|
حبيبنا ود قاسم...الرجل صاحب البصيرة المجلوة بي طيبة لك مني كمان الفين
سلام...
صديقي ابو جهينة....قلت لي نبيذ.....دي حنة جاك دانيال عدييييييل
وبمناسبة الجاك دانيال...
قالو زمن كشات السكر في عنف....وان الشريعة...قبضو ليك مجموعة
وبسألو فيهم...اسمك...ملوال دينق...مسيهي...الضابط يقول ليهم فكوه
جون مسيهي...فكوه...محمد علي ...اجلدوه...وكان بين المقبوضين
ادروب...اها يا ادروب اسمك.... قال ليهم ادروب نتنياهو كفار ادييييييل
| |
|
|
|
|
|
|
|
|
|
Re: رســـــمة حنّتك (Re: nazar hussien)
|
العزيز ود قاسم
Quote: من تالا الشبك أنا ماني متلقيها
بس كلمة حبيب بالريد دوام راجيها
في آخر الهجيع نسماتو هبت بيها
جابت لي صباحاً نورو ضاوي الجيهة |
يالعاشق الجمال يكفيك وهج عينيها
رايداك فى الحلال بت سمحة كاملة جيهة
البراق شلع شال من حريق خديها
ود قاسم اريتك تبقى عشرة عليها ..!!
Quote: يا غيمة من ضل الوطن جات العصر تتأنى
فرشولا السباتة ونقشوا ليها الحنة
عزفولك سلام جات الخلوق تتنى
شايفنك بشر بس إنتي حور الجنة |
من جناتها جات البت شبيهة الحور
محفوظة الاله ماحرقوا ليها بخور
قلبها بالجمال منحوتة فيهو سطور
لا بى حلاتها فرحت لا غشاها غرور !!
| |
|
|
|
|
|
|
|
|
|
Re: رســـــمة حنّتك (Re: نادية عثمان)
|
Quote: يالعاشق الجمال يكفيك وهج عينيها
رايداك فى الحلال بت سمحة كاملة جيهة
البراق شلع شال من حريق خديها
ود قاسم اريتك تبقى عشرة عليها ..!! |
نادية الوريفة الجات تجر النم
وفي الريد الحلال جادت علينا حكم
البت القبيل شالت معاي الهم
بتسكن في القلب زينة وفاي حرّم
Quote: من جناتها جات البت شبيهة الحور
محفوظة الاله ماحرقوا ليها بخور
قلبها بالجمال منحوتة فيهو سطور
لا بى حلاتها فرحت لا غشاها غرور !! |
الكركون وقف أدّى السلام طابور
جابولا المسك غنّالها الطمبور
نفرح بيها نحن ونرش عليها عطور
تستاهل غنانا البت سبيهة الحور
| |
|
|
|
|
|
|
|
|
|
Re: رســـــمة حنّتك (Re: ودقاسم)
|
قاسمنا العزيز
صباحاتك بيضاء زى لون لبن شاى الصباح باللقيمات الطاااعمة والمسكرة بالبودرة الناعمة !!
عليك الله الدوبيت البتكتبو هنا تشيلو بى كوبى وبيست وتنقلو لى بوست ركن الدوبيت عشان نحافظ عليهو فى مكان واحد ولانى بعد لكتاب مكتمل اسمو دوبيت بلدنا او رباعيات ..المهم ساعدنى بس بانو البتكتبو هنا تنقلو هناك لو دوبيت
سمح
| |
|
|
|
|
|
|
|
|
|
Re: رســـــمة حنّتك (Re: ودقاسم)
|
ود قاسم
{ جات البسيمة مرفرفة
وضاحة زي صفحة لبن }
أما البسيمة الشالعة فقد كانت بعد ظهيرة يوم 13/أغسطس ببرآتها ونصاعة { صفحة } اللبن فيها ، إنكسر نحس ال13 وإنفتحت كوة أمل
ويا ودقاسم من حالتك الفوقك الله يتوبك
نادية عثمان:
أفادت مصادر لصيقة وعارفة بحالة الذهان لدى ودقاسم إنه كتبها يوم 14 وكان القمر محاق ،،
نتمنى ان تعود له عافيته ويسترد ذاكرته المنبهلة في الجمال وعيونه المبحلقة في
الآفاق ،،
| |
|
|
|
|
|
|
|
|
|
Re: رســـــمة حنّتك (Re: أبو ساندرا)
|
ابو ساندرا الاكرم
Quote: نادية عثمان:
أفادت مصادر لصيقة وعارفة بحالة الذهان لدى ودقاسم إنه كتبها يوم 14 وكان القمر محاق ،،
نتمنى ان تعود له عافيته ويسترد ذاكرته المنبهلة في الجمال وعيونه المبحلقة في
الآفاق |
،،
انا اقايتو بعرف الزهايمر ..ولا اياهو كلو واحد؟
بس عشان نحدد حالة ود قاسم تماما وماتقلق ياود قاسمنا لو كلام ابو ساندرا ده صاح بنلقى ليك حل
ياولدى الجن بتداوى ..كعبة الاندراوة !!
هى الاندراوة زاااتها يعنى شنو؟؟
| |
|
|
|
|
|
|
|
|
|
Re: رســـــمة حنّتك (Re: نادية عثمان)
|
| Quote: ياولدى الجن بتداوى ..كعبة الاندراوة !! |
زمان الوالدة الله يطراها بالخير كثيراً ما كانت تقول لي هذه الكلمة ..
غايتو الله يكفينا شر الإندراوة ..
| |
|
|
|
|
|
|
|
|
|
Re: رســـــمة حنّتك (Re: أبو ساندرا)
|
أبوساندرا
هي البسيمة أصلا خلتنا فينا ذاكرة ؟
انها ثورة خريف العمر يا صديقي ، تتعامل مع الروزنامة على أنها العدو الأول ، فكل ما انقطعت منها ورقة كلما اقتربنا نحو النهاية ،،، ومثل هذه البسيمات تمنحنا زمنا إضافيا هو تعويض عن الزمن الفاقد ،،،
أربعاتشر ، أربعتاشر ،، خلاص نسوي شنو ؟ عدلوا التاريخ كما يحلو لكم ،،
| |
|
|
|
|
|
|
|
|
|
Re: رســـــمة حنّتك (Re: ودقاسم)
|
ود قاسم العزيز
Quote: أربعاتشر ، أربعتاشر ،، خلاص نسوي شنو ؟ عدلوا التاريخ كما يحلو لكم
،، |
لااااااااااااا انا مابرضى انت تسوى قصيدة تانية عدييييييييل وبى سمايتها وضبيحتها فى هذا اليوم الاربعاتشر !!
| |
|
|
|
|
|
|
| |
ودقاسم
ابو جهينة
عبد المنعم سيد احمد
معتصم دفع الله
nazar hussien
أبو ساندرا
فيس بوك
تويتر
انستقرام
يوتيوب
بنتيريست