|
|
 راس القايدة الما منّو فايدة !!!
|
العمدة لما كان في عز ّ جبروته ظلم ( مَسَاعَد ) ، أدخله السجن دون تقديمه لمحاكمة ... ولأنّ المسألة كانت كلها جودية في جودية ، فقد أُطلق سراح ( مَسَاعَد ) دون انقضاء مدة طويلة على سجنه ... والسجن ذاتو ما كان سجناً بلحيل ، لأن الحراسة عندنا هناك لها باب من السيخ مثلها مثل أي سجن ، لكن بابها مطل على الشارع ، فأنت بداخلها تشوف الغاشي والماشي ... وبعدين ناس كتار ممكن يزوروك كل يوم ، والأكل يجيك من البيت ، أو ممكن تاكل مع البواليص ذات نفسهم ،،، أو ممكن زي يوم السوق كده تاكل من صينية العمدة ...
مساعد طلع من السجن ، والناس اتحمدلت ليهو السلامة ... بس مشكلتو مافي زول ضبح ليهو خروف ، ولا في زول جاب ليهو علبة حلاوة ،،، كلها ملوة تمر من دكان حاجة خادم الله ، شتتوها لوليدات الحلة ، وانتهى الموضوع ، وتاني يوم مساعد كان في حواشتو ....
بعد كم سنة كده جا راس القايدة الكبير خالص ألغى الإدارة الأهلية ، والعمدة بقى ما بيمشي المحكمة ، ولا بيقدر يدخّل زول في السجن ... بس البواليص بقوا هم الطالعين فوق الكفر .. الشاويش يوسف هو أهمّ زول في البلد ، يسوي على كيفو ، يطلع ، ينزل ، يركب اللاندروفر ، يشق السوق ، يجيب لحمو وخدارو مجّان ،،، والناس مطولا بالا شديد ... كل زول عقلو في راسو يعرف خلاصو ...
العمدة ما عاجبو الحال ، والناس بقت تتطاول عليهو ، والامور في البلد ما ماشّة تمام ... العمدة مرض ، جاهو ضغط ، وسكّري ، وبعد فترة أنشلّ ،،،، يازول جابو الفقرا قروا فوقو ، وودوهوا المستشفى ، ورقد زمن طويل ، بعدين حالتو اتحسنت ... ورجّعوه البيت ... بس حركتو بقت محدودة ... والعمدة بقى لناس البلد مستودع ذكريات ، يطلعوهو العصرية ، يقعد فوق كرسي كبير ، ويجوا شوية ناس يتونسوا معاه ويشربوا شاي باللبن ، ويقعدوا لما يسمعوا نشرة تمانية ويترحموا على الميتين ، ويصلوا العشاء فوق سباتة العمدة ، وبعد داك كل قرد يطلع جبلو ،،، وطبعا في ناس ما عندهم جبل يطلعوه ....
مساعد متذكر حكاية السجنة ديك ، ما نساها ، وغايظاهو غيظة شديدة ... وما غيّر حاله أبدا ،،، يرجع من حواشتو ، ياكل ليهو لقمة وينبطح شوية ، ويقوم يمشي الإنداية ،،، يتملي مريسة للحلقوم ، وياكل ليهو معاها شوية لحيمات ، ويرجع بيتو ، وبرضو يطلع جبلو ... وبقى صاحب الشاويش يوسف ، وصاحب البواليص كلهم .. وبقى ما خايف من زول ... قام يوم مرّ ببيت العمدة ، وطبعا هو قاصد ، أصلو مافي سبباً يجيبو بي هناك ... لقى ليك العمدة قاعد فوق كرسيهو ، والناس الباقين قاعدين قدامو فوق السباتة ، والناس ما شغّالة بي شي ، بس قاعدة تتونس ... سلّم عليهم ، وسلّم على العمدة ،،، وقال ليهو :
هي آآآ العمدة ، هي آآآ راس القايدة الما منّو فايدة ، بقيت متل التلفزيون ، يمرقوك للناس تعاين ليك ، ولمّن تقطع يرجّعوك لي محلك ؟؟؟
|
|
 
|
|
|
|
|
|
|
|
Re: راس القايدة الما منّو فايدة !!! (Re: ودقاسم)
|
إنت يا ود قاسم؟
هسي أنا من شفت (التلفزيون دا المرة الأولى)
بفتش لي راس القايدة الما منو فايدة دا منو!
وكل ما أقلب لي راس قايدة .. ألقى القصّة واقعة عليهو.
دجين يا اخواننا ما بتلقو لينا راس قايدة فيهو فايدة؟
البيلقاهو ليهو البشارة.
| |
|
|
|
|
|
|
|
|
|
Re: راس القايدة الما منّو فايدة !!! (Re: Abdulla Ageed)
|
ود عقيد
قلت لي ما عرفت راس القايدة الما منّو فائدة ؟؟
طيب المريسة عرفتها ؟ كان عرفتها قول لي عوووووك ، خليني النملأ راسي منّها عشان أعرف أقول للزول ده الداير أقولو ...
وللا أقول ليك ، خليهم براهم بيعرفوا ، والكلام فايت إضنينهم ...
| |
|
|
|
|
|
|
|
|
 Re: راس القايدة الما منّو فايدة !!! (Re: ودقاسم)
|
لا عرفت راس القايدة ولا عرفت المريسة.
لأنو رؤوس القايدة كلهم هبشتهم لقيت ما فيهم فايدة.
أما المريسة.. ف .. في .. حاجة محيراني.. يا دوقاسم.
طيب الواحد لو ملا راسو مريسة.
يمشي يكوس لي راس القايدة.. ولّا يمشي يطلع جبلو!!؟
دي يحلوها كيف دي؟
| |
|
|
|
|
|
|
|
|
|
Re: راس القايدة الما منّو فايدة !!! (Re: Abdulla Ageed)
|
عبد الله عقيد
أهم شئ في الموضوع ترتيب الأشياء حسب أهميتها دون إسقاط أي منها ،،،
تملأ راسك مريسة ، وتمشي عديل على راس القايدة ( ده طبعا لو ما منّو فائدة ) ، وتقول ليهو كلامك ، وتسمع نشرة تمانية ،،، وتترحم على الميتين ،،، وبعد كده كل قرد يطلع جبلو ..
الترتيب مهم جدا ...
| |
|
|
|
|
|
|
|
|
|
Re: راس القايدة الما منّو فايدة !!! (Re: ودقاسم)
|
| Quote: لعمدة ما عاجبو الحال ، والناس بقت تتطاول عليهو ، والامور في البلد ما ماشّة تمام ... العمدة مرض ، جاهو ضغط ، وسكّري ، وبعد فترة أنشلّ ، |
العم ودقاسم عمدتكم ده شكلو قلبو حار خلاص .... والناس القلبهم على بلدم ما برضو ليها الخراب وسوء الحال ... بس الزول البمشي يسطل ويشرب مريسة ده كان شاربا غذاء ما فيها شي لكن كان شاربا سطل وتصليح مزاج ده زول متعوس وشخصيتو ضعيفة وما عندو سالفة اخير الرماهو العمدة في السجن عشان كده العمدة ده شكلو زولا ضكران بالحيل وراس قايدة ومليان فايدة بس الكلام خراب الافنديةالكبار الخربو البلد وجابو الضغط والسكري للعمدة
| |
|
|
|
|
|
|
|
|
|
Re: راس القايدة الما منّو فايدة !!! (Re: محمد حسن العمدة)
|
الأستاذ محمد حسن العمدة
ربما أن جيلك لا يعرف شيئا عن الإنداية ، فهي ليست مريسة فقط ، هي منتدى عام ومجالس أنس ، وغناء ، وشعر ، ومجادعات ،،، وهي بهذا تشد الذين اعتادوا عليها ،،، وكثير من شاربي المريسة لا يسكرون ، حتى وهم يشربونهابكميات كبيرة ،،، وهم أيضا لا يشربونها للغذاء بصورة مطلقة لكنها خليط بين هذا وذاك ،،،
والظلم ظلم وبوجه واحد ، لا يكون الظلم مرة ظلما ، ومرة عدلا ، لكن ما هي محركات المظلومين ، ما الذي يدفعهم للاحتجاج والتمرد، وإعلان ثورتهم ،،،
وأيضا أنا لا أقول أن المريسة أو غيرها من بنات جنسها هي محرك تحريضي على الثورة على الظلم ،،، لكن هناك رمزية ينبغي أن يتحسسها قارئ النص ...
لك الشكر على المداخلة التي فتحت نافذة للحوار ..
| |
|
|
|
|
|
|
|
|
|
Re: راس القايدة الما منّو فايدة !!! (Re: ودقاسم)
|
الحبيب
العمدة ودقاسم
سعدت أيما سعادة بلقياك.
| Quote: أهم شئ في الموضوع ترتيب الأشياء |
أما عن الترتيب.. فنحن عموم قبيلة أهل العوض لا نهتم بالترتيب كثيرا.
وهذا طبعنا.
وأتوقع أنك سمعت من (حبوباتنا) قولهن:
" العربي ما بيبقا ظريف
والفتريتة ما بتبقا رغيف"
| |
|
|
|
|
|
|
|
|
|
Re: راس القايدة الما منّو فايدة !!! (Re: ودقاسم)
|
إلى الأعلى
حتى نستطيع الحصول على المريسة ليبوح لنا صاحب البوست
باسم هذا الرأس.
وإن كانت الرؤوس في بلادنا(اتلاحقت)
في (عدم الفائدة)
ولنبحث عن رأس جديد للقايدة
من يا ترى يصلح لها؟
وبأي مواصفات سنختاره؟
فقد اختلط البقر علينا
| |
|
|
|
|
|
|
|
|
|
Re: راس القايدة الما منّو فايدة !!! (Re: ودقاسم)
|
ســــمِح
وربما يحتاج الأمر إلى لافتات..
فالرؤوس عندنا.. لكين ما نفعت في القايدة
والحكايةيمكن تحتاج إلى استدعاء خبير (قايدة) أجنبي
إن شا الله من سيريلانكا..
وبمناسبة سيريلانكا دي.. ليه ما نبحث عن (راسة) قايدة
يعني راس قايدة (مؤنث).. تراها نفعت هِناك.. ولّا ما نفعت يا يربي..؟؟!!
كِدا خليني أكتح لي عبّأر واجيك صاد
| |
|
|
|
|
|
|
| |
ودقاسم
تولوس
Abdulla Ageed
فيس بوك
تويتر
انستقرام
يوتيوب
بنتيريست