|
|
 زكـــــريات فـــي فتاشــــة .. فتاشــــة الـــرجال
|
العام1996
المكان رئاسة الخدمة الوطنية شارع المك نمر
الظهر اللوري أمام البوابه الرئيسيه
العسكري: أنتو السبعه القالو يلحقوكم المعسكر
*ايوه
العسكري:طيب شيلو شنطكم دي وارفعوها في اللوري عشان نتحرك بعد شويه
تحركنا نحن السبعه
بكل حماس نحو اللوري الواقف نتساعد في رفع شنط ملابسنا المحملة بما لز وطاب تحسباً لاي طارئ من الناحيه الغذائيه
تعاونا وكأننا نعرف بعضنا من سنين وما جمعتنا غير سويعات أمام مكتب الخدمة .. كل واحد مننا متلهف لمعرفه الآخر لعله يجد من يخاويه في رحلة المجهول ... تالفنا بسرعه كحال جميع السودانيين كسرنا الحواجز وتقاسمنا السندوتشات الأخيره التى اشتريناها من الكافتريا القريبه من رئاسة الخدمه حتى نصل ونحن ممتلئ البطون
نتبادل النكات علي ظهر اللوري المحمل بأشياء اخري كثيره وجميعنا لا يعلم عن المسافه التى تفصلنا عن المعسر الأسطوره
بدأت معالم المعسكر تظهر بعد مسافه استهلكت قرابة الساعه سيراً غرب ام درمان
صمتنا جميعاً كل واحد فينا يرسم صوره سريعه لما سوف يحدث وما يكون عليه الحال داخل المعسكر
لم أتخيل المعسكر بهذه الطريقه
دخل اللوري الي داخل المعسكر ليتوقف أمام مجموعه من البشر اسطفوا بطريقه عسكريه يقف امامهم رقيب بشنبات يقيف عليها الصغر اتضح فيما بعد بأنه المسئول الميداني
نزلنا ونحن في دهشه
المعسكر عباره عن قرية مترامية الاطراف
مباني هنا وهناك وخيام مقسمة بطريقه المجموعات متباعده عن بعضها علي امتداد البصر
انزلنا شنطنا ووقفنا ننظر في دهشه لا تخلو من خوف من المجهول وخصوصا اننا نحمل في اذهاننا الكثير عن المعسكرات والطرق العسكريه القاسيه
*الرقيب ابوشنب: اهلاً بالناس الجدد
كلنا وبنفس واحد علييييكم السلام
*الرقيب: خلاص ختو الشنط واقيفو صف وكلو واحد يفتح شنطتو قدامو
دا شنو يا زول قالو ليك هنا في مجاعه طلع الطحنيه والمربى دي
دا شنو يا زول في عسكري بيتريح جيب قزازه الريحه دي هنا
دا شنو يا زول جيب صابون الحمام دا ارميهو هنا بعدين بنوريك تستحمه بشنو --لليوم دا ما عرفته والله--
دا شنو دا بشكييييير
ههههههههههه
كل الحضور
والله انتو عجيبين لكن
شايفين الصهريج دااااااااك
*ايوه
تصلوا جرى وكل واحد يجيب من تحتو طينه لينه
ونركد مسرعين ناحية الصهريج
ولغبائنا مفتكرين البوصل أول بيدوهو جائزه ولا يميزوهو في شئ
نجري بكل ما عندنا من قوه ونرجع
كويس البشرب سجائر منو
سكوت
يعني مافي زول بسجر
طيب البسف صعوط منو
سكوت
خلاص اقيفو هناك لغاية ما نصرف لكل زول نمرتو ويعرف مكانو
والنمره معناها فرشه وبطانيه يعني سريرك الأرضي والبطانيه الما خمج
--
يتقدم ناحيتنا عسكري بدون شرائط يعني جندي
وهو يبتسم ابتسامه خبث غريبه
انتو الجابوكم لينا متأخرين .. يعني دايرن شغل تقيل عشان تحصلو الجماعه... اهم حاجه عندنا هنا طاعه الأوامر .. لازم تشيلوا الملكيه دي من راسكم .. يعني تنسوا حياتكم الفاتت ديك كلها وتبدوا من جديد
اي واحد ينسي أنو معاهو شهاده ولا متعلم
انتو هنا جهله يا دوووب ليكم اول يوم في التعليم
انتو شنو؟؟؟؟
*نحن جهله ودا اول يوم لينا في التعليم
ايوه .. ويعدين زي ما شايفين لازم من الانضباط وما ترد علي الكلام الا اذا قال ليك التعلمجي او الزول المسئول منك تتكلم
وأهم شئ تنفذ الأوار من غير ما تسأل ولا تناقش
والعسكريه ما فيها احتجاج
متظلم تمد يدك زي كد
ويشير لنا بحركه يده الي الامام وهو منتصب بوقفه عسكريه
وبعد ما المسئول عنك يقول ليك اتفضل تقول تظلمك
امشي شيلو الامواس وكل واحد يحلق للتاني صلعه جنب الحوض داك
اي زول شال موسو ومشينا علي الحوض
وهناك لقينا كم واحد من الشباب بيحلقوا صلع واغلبهم كانوا بيحلقوا صلع من جديد كنوع من العقوبه
جيب ليك عود ودخل فيهو الموس واحلق صلعه
اعمل حسابك ما تعوقنا يا اخي
طيب اعمل شنو الموس بتفك من العود
يا اخي براحه خليت دمنا صابي
معليش يا اخي اول مره احلق لي لزول
وهكذا انتهت عمليه الحلاقه لبعضنا بخيرها وشرها
العسكري*
انتو هنا في الكتيبه خمسه
وحنوزعكم في السريه اربعه
ويشير بيده نحو احد العنابر المبنيه فحمدنا الله علي أن تم توزيعنا داخل عنبر بدلاً عن خيمه
العنبر طويل جداً ومكتظ بالمجندين
السلام عليكم
علييييييكم السلام اهلا اتفضلوا يا شباب
تعالوا بيجاي
شكر يا ابو الشباب
فرشوا نمركم هنا احسن ليكم
تسلم يا حبوب
من وين الاخوان
كل واحد عرف منطقته داخل العاصمه
واسمو ومكان تخرجو
بكره بيصرفوا ليكم وزن عشره
ووزن عشره دا شنو كمان
دا اللبس الاحنا لابسنو دا
وهو عباره عن قميص وسروال طويل من الدموريه
اسمعوا اخدوا ليكم رقده عشان جاي طابور تسعه
اها وطابور تسعه دا شنو كمان
طابور تسعه... بعدين بتعرفوا كدي ارقدوا
جلسنا نتهامس نحن السبعه الجدد
*محمد ملاحظ حاجه
-شنو يا جمال
* الناس ديل كلامون بقه كلام شماسه عديييل
-والله دا الشئ المخوفني اتخرج من هنا ويبقي كلامي كدي واطلع محامي فاشل .. يعني ادخل للقاضي اقول ليهو حضرات الفرد المعلم دا ما ناقش حاجه عشان كدا دقس في الشغلانه دي وما كان قصدو
بعده القاضي يعدموا ويعدمنى معاهو
هههههههههه
نضحك بصوت خافض
وماهي الا دقائق حتى استسلمنا للنوم استعداداً لطابور تسعه
|
|
 
|
|
|
|
|
|
|
|
Re: زكـــــريات فـــي فتاشــــة .. فتاشــــة الـــرجال (Re: HOPELESS)
|
صفاره مزعجه يقف بها احدهم عند مدخل العنبر
ينتصب الجميع في عجاله وكل واحد يطوي نمرته أو الفرشه التي يرقد عليها ويهرول الجميع للخراج لا نفهم حقيقة ما يدور ولكن تيقنا انها دعوة لطابور تسعه الذي سمعنا عن مواعيده دون معرفة ما يحدث فيه
خرجنا لنجد امامنا كميه بشر لم أرى تجمع مثله في هذا الكم وكل مجموعه كانت تعرف مكان تجمعها تماماً
وقفنا مع من كانوا معنا بالعنبر
نحن الوحيدين ما زلنا بملابسنا غير العسكريه
يقف احد المجندين امامنا ويأمرنا بأن نقف خلف السريه
ويذهب مرة اخري امام السريه
ويصدر تعليمات للبقيه كصفا انتباه
ورأيت السائد هو أن يتولي التجهيز الأولي للطوابير أحد المجندين القدامى
وعرفت فيما بعد أن الذي كان معنا ومسئول عننا اسمه عاصم نصرالدين شقيق لاعب الهلال فايز نصرالدين والمعلم بإحدي ثانويات البنات
كان انسان خلوق تبدو عليه الطيبه والسماحه
بعد أن قام بما عليه من مهمات عسكريه تجاه سريته أتي الدور لتسليمها لأحد الجنود وقد تسلمها ايضاً بطريقه عسكريه تسمي رفع التمام =والله لو شفتو عظمة الجندي في الحته دي = حاجه عجيبه
يتسلم العسكري من كل المجندين في باقي السريات
يبدأ في الكلام
وهنا عرفت المثل البقول كلام الطير في الباقير
كلام في الشرق وكلام في الغرب
حاولته افهم شئ
بس الظاهر اللغه كانت طلاسم
وبعد حوالي الساعه ونص
يبدأ التسليم لوكيل عريف
شوفو عظمة ابو شريط وااااااحد
اها الزول يستلمنا ليك نقه زي حقت الفات وممكن نفس الكلام وطبعاً اكترو نبز
يا عساكر يا رباط البوت
يا ارانب
يا يا يا
المهم ما خلص الا لما حنكو وجعو من الكلام
وما اظن كان اقل من ساعه
اها وجاء دور ابو شريطين
والله لا يوريكم
تعلمجي شبرين من الواطه اسمو الزاكي
الزاكي دا بقا تحفه المعسكر
زول عسكري جد جد
يعني لما يقولوا لزول انت عسكري مفروض يخت صورة الزاكي دا في زهنو ويبكي باقي عمرو
طبعا أمي ميييييييح
ودي حنجيها بعدين في موضوع تاني مع عاصم نصرالدين
المهم صاحبنا ميح افندي الاسمو الزاكي دا علي ما اظن والله اعلم جابوهو مخصوص عشان يمغص الناس بالكلام الاشتر
انتو عارفين يا جيش
انا شايفكم زي زي زي
يا اخي زي حبة الرز
الرز دا عارفنو بزرعوهو وين
طبعاً اكيد ما عارفين
ما بهائم العرفكم شنو
المهم القمح السمح
عشان الطير بتكيف منو
والطير دا ما انتو يا بهائم الله
يا رباط البوت يا شبه الشلوت
وطول الليل ونحن في الكلام دا ولاحظوا انو الدنيا برد عز الشتاء والشتاء في فتاشه اضربو في عشره
المهم يتبادلوا فينا الأدوار وكل واحد اتحف من التاني
لحدي ما يجي دور الرقيب ابو شنبات ويتم الناقصه بباقي الليل داك وبعد كد يصرفونا
دخلنا العنبر ورجولنا مخدرات من طول الوقفه
وكل واحد بيلعن في اليوم الرماهو في الشغلانه دي
ونغوص في نومه عميييييييقه استعداداً لصحية بكره بدري وطابور الصباح
| |
|
|
|
|
|
|
|
|
 Re: زكـــــريات فـــي فتاشــــة .. فتاشــــة الـــرجال (Re: SAMIR IBRAHIM)
|
Quote: يعني ادخل للقاضي اقول ليهو حضرات الفرد المعلم دا ما ناقش حاجه عشان كدا دقس في الشغلانه دي وما كان قصدو
بعده القاضي يعدموا ويعدمنى معاهو |
gir gir gir gir
فقعتني بالضحك لكن
بالله كدا استطرد في الحكي
في حاجات كتيرة في معسكرات التعذيب دي محتاجة لوقفات
وقفة اولى: موضوع الحلاقة/النزف/تسمم الجروح/الايدز/التهاب الكبد المعدي
يلا واصل
| |
|
|
|
|
|
|
|
|
|
Re: زكـــــريات فـــي فتاشــــة .. فتاشــــة الـــرجال (Re: rummana)
|
العزيزه رمانه
سلام واحترام
يا ستي المعسكرات دي ما تتخيليها بالقبح دا برغم ما فيها من الام لكن تظل الزكري المحببه الي قلوبنا لما فيها من حياة جديده وتغير جزرى في حياة الفرد
بالمناسبه الامواس كل واحد بيحلق بموس جديده بس بيركبه علي عود أما عن بقية الأمراض .. فعلي قولهو الجيش مصفح دا انا رايح احكي الشراب كيف ومن وين والاكل وقت الغضب بيكون كيف وما تحتاري
تحياتي يا خاله يا عزيزه
| |
|
|
|
|
|
|
|
|
 Re: زكـــــريات فـــي فتاشــــة .. فتاشــــة الـــرجال (Re: HOPELESS)
|
الزمان 1994
المكان معسكر الدفاع الشعبى الدخينات
الكتيبة الرابعة السرية الثالثة
التعلمجى : ابراهيم بابنجيدا
سينتمنتال يلج بوابة المعسكر حاملا الشنطة ومتاخرا ثلاثة ايام.
يصيح به التعلمجى: ما شاء الله ما شاء الله اولاد نمرة اتنين ضاربين تلاجات الحيط (المكيفات) وعاملين فيها جايين الجيش. افرش متاعك يا مجاهد. طحنية وبلح رغيف ناشف سكر صابون وقروش وبنطلون قميص الخ. الله الله جاى حفلة قايل نفسك. ارفع الشنطة دى فوق وارنب استعد يا مجاهد. نطتك نطتك لحدى مكان الطابور. ارفع الشنطة فوق يا مجاهد واجمع قدام القناية دييك ووريها متاخر ليه.
نواصل
| |
|
|
|
|
|
|
|
|
|
Re: زكـــــريات فـــي فتاشــــة .. فتاشــــة الـــرجال (Re: HOPELESS)
|
....الساعة تقترب من التاسعة مساء وسينتمنتال ما زال يرفع الشنطة ويخاطب القناية.ثم
انت ما حالق مالك.
سعادتك حالق من البيت.
لا ....تحلق تانى.
جيتك جيتك صلعة فى صلعة.
يلا اجمع مع اخوانك فى الطابور يا كرور.
طابور تسعة..
برد يجنن وسينتمنتال يرتدى ابوجلمبو او الكفن كما يسمونه احيانا.
طيب يا مجاهدين الليلة حنتكلم عن البوت. البوت عبارة عن حذاء عسكرى يرتديه الجندى حتى يقى قدمه من الشوك والطين والوسخ الكتير ده اخترعه نابليون ....بتعرفو نابليون يا جهلة ... طبعا لا لانكم مجاهدين دلاقين ساكت.....به 12 قدا عشرة منها تستخدم للرباط. تعرفوا الاتنين الباقية لى شنو.
سعادتك انا.
يا مجاهد يا دلقان انا هنا بسال وبجاوب انت تسمع بس. طيب انا زاتى ما عارف عشان كده خلينا نتظر نابليون عشان يجى يوضح لينا النقطة دى.
وحاتكم منتظرين نابليون لحدى ما صاح الديك ولى هسى ما جاء.
| |
|
|
|
|
|
|
|
|
|
Re: زكـــــريات فـــي فتاشــــة .. فتاشــــة الـــرجال (Re: HOPELESS)
|
الاستيقاظ مبكراً علي صوت تلك الصافره المزعجه درجه الرعب والفزع من النوم
ملحوظه هنا
تعتبر الخدمه الوطنيه في العام 1996 أفضل فترة من ناحية التظيم والاهتمام وتوفر احتياجات المجند
اما بعد ذلك فحدث ولا حرج
نذهب الي الميدان كالعاده بعد أن لبسنا لبس الدموريه الجديد الذي اتي به مسئول السريه من امين المستودع
تبدأ التمارين الصباحيه اولا بقطع مسافه مقدره بحوالي السته كيلو حول معسكر فتاشه
ثم طابور البياده وقد خصص لنا نحن السبعه احدهم ليلحقنا بالركب
والبياده طبعا كما هو معلوم هو الحركه العسكريه التى يصاحبها تعليمات من التعلمجي يمين يسار خلف در وما الي ذلك
كما اسلفت بأنو نحن اكتر دفعه مرت علي الخدمه الوطنيه حظاً طيباً
كان يتوفر لنا كل صباح الحليب بباقه الزيت الكبير ولا أبالغ انو كان في زي غرفه مبنيه حوالي متر مليانه قريب فرت وما بتفضه اصلا نعمل منها العصير وناكل منها
المهم فعلاً معسكر 96 كان معسكر مكتمل ومرتب من كل النواحي بالرغم من العدد الهائل المتواجد وكان حوالي خمسة كتائب بعضها اتى من منطقة جبل الاولياء للتخرج وكتيبه مفصوله بعيد ومعسكرهم مرتب وقدام كل خيمه طوب مرصوص في شكل مدخل بصوره مرتبه وجميله وشجر في مرحلة النمو الأولي
سالنا الناس القدام
ديلك ليه معسكرهم جميل كدا ومرتب
وبالليل المعسكر الوحيد العندهم تلفزيون
ديل الشماسه البيقببضوهم من الشارع بيجيبوا ليهم هنا اخصائيين حقين تربيه .. وفي اللحظه دي كل واحد بيتمنى يكون شماسي عشان يدخل في المعسكر دا ويتمتع بش من الدلع الهم فيهو ويتفرج تلفزيون معاهم
انتهت الطوابير بخيرها وشرها ووزعونا للبناء
وكان وقتها بيبنو في عنابر جديده اضافيه
الطوب في اخر الدنيا
ومن حظنا وقعنا مع الناس البيجيبو الطوب
تمشي في ساعتين وتقيف وتسوي نفسك بترص في الطوب وترميهو مره تانيه وترصو كم مره بالطريقه دي
وبعدين تشيل ليك طوبه في يدك اليمين وتانيه في اليسار وتجرجر كرعينك وتمشي
ما عسكريه والعسكريه تصرف زي ما بيقولوا
من ضمن السبعه الاتحركنا كان معانا اخو فاضل جداً خريج ام درمان الأسلاميه وتبدو عليهو علامات التدين وكان زول مسكين لمن تشفق عليهو
المهم وقع مع الناس البيجهزوا الطين للبناء
الزول دا كل ما اخد دورتي لجلب الطوب الاقيهو شغال بجد ونشاط ما عادي
المهم كل مره يا فلان يازول الناس ديل بقتلوك حاول زوق نفسك تعال معانا جيب الطوب المهم زولنا يقولينا لا العمل لازم يكون بضمير واخلاص
يا فلان العسكريه مافيها ضمير واخلاص
العسكريه تصرف ما بتسمع البشر ديل بيقولوا في شنو
لا يا ناس دا غش انا ما بسويهو
المهم الدنيا حرت والشمس بقت تلهج زولنا لسانو مرق بررررره
مشينا جيبنا دور طوب رجعنا نفتش صاحبنا سماء ارض ما لقيناهو
المهم بعد ما خلصنا
رجعنا لقيناهو متغطي ببطانيه وناااائم
يا زول خلوك كيف
ديل بخلوا زول انا اتصرفته براي
والضمير وما ادراك ما الاخلاص
يا زول والله ديل لا معاهم لا ضمير لا اخلاص
انا اقتنته من الليله العسكريه تصرف
ومن يومنا داك بقا اكتر واحد بيتصرف فينا
**
من ضمن السبعه برضو واحد اسمو محمد صديق من اولاد شمبات الاراضي
ودا موسوعه شغب
وقف المعسكر علي كراع واحده زي ما بيقولوا
طبعاً حوادثو كتيره وقضى فترة التدريب كلها جزاءات وعقوبات
اول عقوبه ليهو كانت لما جات العصريه في زي سوق صغيرونى جنب المعسكر فيهو الصعوط والسجائر والبسكويت والحاجات دي عاملينو سكان القريه المجاوره في المعسكر
محمد صديق اشتري كيسين صعوط
خلعه بس مع انو كيس واحد كان بيكفيهو لكن من خوفو بكره يكون مافي ولا شنو ما عارف
المهم وهو بيشتري في الكيسين التعلمجي من بعيد شايفو وحفظ شكلو
وشافو وين دساهن
في طابور تسعه الموضوع كان محمد صديق طبعاً
يا مستجدين يا طير
المعاهو صعوط يجيبو يرميهو هنا
زوووول قال ليهو أنت بتقول في شنو مافي
يعني مافي زول بسف صعوط
زووووول قال ليهو الله يرحمك مافي
محمد صديق الي الأمام سر
تمام ساعادتك
محمد صديق طلع الصعوط العندك
صعوط شنو يا سعادتك انا ما بسف
العسكر يرفع قميص محمد صديق ومن مجري تكه السروال يطلع كيسين صعوط محمد صديق المدنكلات
دا شنو يا مجند يا طيره
والله ما عارف يا سعادتك يكونن جن مع اللبس نحن صرفناهو الليله
الطابور كلو عاوز يضحك بس يا ويلك لو نفسك انسمع
العسكري يشق الكيسين من النص ويركب كل كيس في اذن لمحمد صديق
يا مجند يا طيره لف الطابور دا كلو وبلغ الطيور ديل انك سفاف صعوط
محمد صديق الداهيه اصبح كالبقره الضاحكه في الجبنه
يجي في وشك وبأعلي ما عندو من صوت انااااا سفاف الصووووووووط
ويا ويلك لو فتحت فمك ولا بانت سنونك وانت بتتبسم
بعد أن تم محمد صديق دوره كامله علي المجندين في محاوله منه لجر معه واحد أو اثنين للعقوبه المرتقبه ولكن هيهات من يجازف في هذا الليل الشتوي بتعريض نفسه لعقوبه
وبعد المحاضره في الكلام الفارغ وتبادل الادوار ومراحل التسليم والتسلم المعتاده ينصرف الطابور ويقاد محمد صديق لمكان العقوبه المعلومه
انه موقع الكركون والله لا يوريكم
ولا يجمعكم معاهو في لحظه
الكركون طبعا عسكري تشريفي شايل سلاحو وواقف وقفه عسكريه طول الوقت لا يلتفت يمين لا يلتفت يسار في منطقه مرصوفه علي شكل مربع كبير يتوسطها العلم
جابو ود الحرام شيلوهو محمد يلولوي فيهو
سكت الولد دا لغايت امو ما تجي
وطبعاً امو ممرضه في السلاح الطبي
وعارفين ود الحرام دا شنو؟
وما ود الحرام الا دانه مفرقه ومحشيه تراب
تشيلو الولد في كتفك مره وفي راسك مره وفي صفحتك مره وكل دا وانت واقف وشك في وش الزول اللا بيتحرك لا بيرمش دا
وطول الليل محمد صديق علي الحاله لحدي ما يصبح الصباح ويواصل مع الناس طابور الصباح
| |
|
|
|
|
|
|
|
|
|
Re: زكـــــريات فـــي فتاشــــة .. فتاشــــة الـــرجال (Re: HOPELESS)
|
جيش فتاشه ما بخاف من جون قرنق
جون قرنق ... جون قرنق
لا اله الا الله جون قرنق غدار
من احب الأناشيد الي نفسي
وطبعاً كل وضع وكل ساعه عندها اناشيد مناسبه ليها
والنشيد دا بيكون في حاله البياده والسير الاعتياد مع الضرب بالرجل علي الأرض في مشهد جميل واحساس انك ممكن تدمر أي عدو قدامك في اللحظه دي
سمرا يا سمرا
الطالب الحربي يا سمارا
امو تبكي عليه يا سمارا
**
الله فوق زوزو يا حلاة زوزو
زوزو عيانه يا حلاة زوزو
زوزو مرضانه ياحلاة زوزو
هاهاههااااهو يا حلاةو زوزو
اوووه اوه اوه اوه يا حلاة زوزو
**
ست الشاى قبلي جاى
............
,,, الي الخ
ودا ما حا اكملو عشان ما انحظر من البورد
طبعاً الاناشيد الاخيره دي بتكون في حالة الهروله وبتنقال بصوره سريعه والناس مهروله في التمارين الرياضيه
والأناشيد فيها الديني وفيها الفاجر وفيها العادي ومن كل بستان زهره
قمنا من الصباح علي صوت الصفاره المزعجه كالعاده وعندك حوالي الربع ساعه عشان تجهز نفسك وتحضر نفسك في الميدان صحيت لقيت اخونا محمد صابر المحامي مجهز عصير قريب فرت في كورة كبيره ومع الظلام ما شايف حاجه شربت القريب ببزورو وطلعت علي الميدان .. بعد التحضير والجمع بدينا الهروله الصباحيه وقطعنا حوالي ثلاثه كيلو متر عن المعسكر وبدينا نرجع وقتها حسيت بألم فظيع في الجهة الشمال من بطني .. رجلي اليمين ما قدر احركه وقعته في الأرض والناس جاريه ... انتبه التعلمجي بعد لحظه رجع الطابور كلو وهم بيرددو في الأناشيد دي ومع الحماس شالوني في كتوفهم وجرو بيه مع أنو حجمي لا بأس به .. لكن الحماس الظاهر كان علي وصلنا المعسكر وأنا متألم الم شديد وأستفرق كل العصير بحبو ويزيد الألم
وضعوني علي نقاله قدام خيمة المساعد الطبي .. ووقتها ما كان متواجد ولا نائم ما عارف اللهم انو جا التعلمجي الشبر المدعو الزاكي ويقعد ينظر فينى يضغطني ليك في بطنى ويفك وأنا من شدة الآلم ما قادر اتكلم
لا لا دي نفخة صقط ساكت .. خلوهو شويه
محمد صديق ما مقتنع بالكلام دي يا سعادتك مبادئ زايده
يا مجند يا طيره انت العرفك بالحاجات دي شنو؟ دي نفخت صقط
صح سعادتك دي نفخة صقط
ما مافي طريقه غير يصحح كلام الزول دا ويأمن عليهو دا لو قال ليك الشمس مربعه لازم تقتنع انها مربعه
المهم انا علي حالتي دي ممكن ساعه ومحمد قلقان شديد ربك رب الخير يجيب المسئول عن المعسكر الرائد كوبار وكان زول محبوب جداً من المجندين بصوره كبيره وكان زول فعلاً يستحق الأحترام.
المهم يجي يعاين ليه ومن أول نظره عرف الحاصل طوال قال يركبوني العربيه حقتو ويطلع معاي ملازم وملازم دي هنا ما معناها رتبه معناها زول يلازم المريض ويقوم علي خدمتو في مرضو وطوالي نط محمد صابر يا ساعادتك انا بلازمو
وطبعاً كانت فرصه ليهو يغير جو المعسكر
وصلنا السلاح الطبي
وبعد عمل فحوصات سريعه قرروا تكون العمليه في العصر وأمروا محمد أني ما اتناول أي شئ في الفتره دي
محمد طبعاً مشى كلم ناس بيتنا
وزار ناس بيتهم ورجع
واتعملت العمليه فعلاً في مواعيده
وطبعاً كانت فرصة العمر لينا الاثنين للهروب عن المعسكر اكبر فتره ممكنه
| |
|
|
|
|
|
|
|
|
|
Re: زكـــــريات فـــي فتاشــــة .. فتاشــــة الـــرجال (Re: HOPELESS)
|
كيفينك يا هوبلس
تداعى مذكراتك هذه نقلتنى توا الى اجواء( الكشافة والكديت )سنوات العام والعالى, والتى اشار اليها ايضا اخونا ابو جهينة, واضيف انها كانت جزءا من( منظمات المجتمع المدنى السودانى!) التى كنا نلتحق بها عن طيب خاطر , ودونما اى( رغبة او رهبة بفعل فاعل ), والحق اقول لقد نقلتنى ذكرياتك تلك الى اجواء الصبا والشباب التى تداعت وانا اتابع وقائع ايامكم الجميله فى تلك المعسكرات , وقد وجدت فيها تشابها كوقع الحافر بالحافر فيما يخص حياة الجندية والعسكرية و(الظبط والربط )و(تنفيذ الاوامر) و(هلم) - خاصة ان علمت ان مهنة والدى عليه الرحمة كانت فى الآصل جنديا بالقوات المسلحة السودانية ! وقد ترعرعت واخوتى فى اجواء هذه المهنة , حيث ان اغلب عيشتنا كانت فى بيوت الجيش ( الاشلاقات ) كما يسمونها , وقد راق لى سردك الممتع لتلك التجربة التى دلفت اليها
الغريب فى الآمر اننى لاحظت من خلال سردك - وآخرين- اجواء اخرى لها علاقة بمعتقلات النظام الحالى فى السودان ! , بمعنى ان كثير من المعتقلين السياسيين قد ادلوا فى افاداتهم الحية عن صورة مقاربة للحياة التى عشتها انت وانا فى تلك المعسكرات !, ولكن مع فارق بسيط , وهو ان ما نقلته لنا وبعض المشاركين فى هذا البوست عن اجواء تلك المعسكرات, قد جاء بصورة او اخرى وكأنه لا يشبه تلك المعسكرات التى عهدناها , حيث جائت مشابهة تماما الى روايات اؤلئك الضحايا الذين تلقوا (عذاب الويل) فى بيوت الاشباح مثلا ! , من شاكلة (ارنب نط وست العرقى والطياره قامت) وهلم من تلك الفظائع التى يحكيها اولئك الذين جابهوا مثلها
اسمح لى ان ادلف الى ملاحظتى المتواضعة , وهى ان ما عايشتموه من اجواء كهذه لم تكن بهذه الصورة , حيث كانت مهمة مثل هذه الانشطة العسكرية منذ ان خلق الله السودان هو آمنة , وجل ماكان يبغيه قادة تلك (الفيالق العسكرية) ينحصر فى مهمة تعريف (المواطن المدنى) بقواعد الضبط والربط , وكانت في مجملها محاولة لتأسيس منهج متفق عليه مدنيا وعسكريا فى كيفية تأهيل الناشئئة, وتمكين البلاد من الاستفادة من قطاع كبير ومؤثر وسط من يستطيع حمل السلاح ذودا عن وطن الجدود( ان كان لهذا الوطن من مهددات !) بعد ان استقل الوطن, ومن ثم اصبحت للبلاد مهام اخرى لتنفيذها ! , ولكنى للآسف الشديد وجدت ان مثل هذا الذى( يلقن كأومر عسكرية) قد دلف الى مهام اخرى ليست لها علاقة بهذا الذى وصفوه لنا( بمصنع الرجال) حينما اختار كل واحد منا بكامل تفكيره الانضمام لمثل ذاك التجنيد العسكرى
اختتم بتكرار اعجابى بالبوست يا هوبلس , وبتداعى سردك الذى نقلنى مباشرة لكى احكى ما حكيت .. وفى خاتمته اهدى طرفة لك و للمدتداخلين فى بوستك هذا الذى اعجبنى اضافة لما سردته لنا من تجاربك , وهى
اذكر فى احدى معسكرات (الكديت)بمنطقة فتاشه بامدرمان , ان نفد اللبن فى شاى الصباح !, جاء احد زملاء الدفعة للقائد الاعلى فى المعسكر ويسمى( بالصول) , وقد كان فكها لماحا ظريفا جدا يرحمه الله .. وقف زميل الدفعة بالتحية العسكرية بعد ان اكتشف ان اللبن قد انتهى محتجا وهو يقول : افندم, انا متعود اشرب شاى الصباح باللبن !, .. رد عليه الصول بلغة عسكرية حازمة : اللبن انتهى , وعندما عاود صاحبنا الكرة مرة أخرى, بادره عمنا الصول , ذاك الظريف الذى كم كنا نحبه قائلا : - يا ابنى ما قلنا ليك اللبن خلص .. يعنى دايرنى احلب ليك من شطورى؟! )ه
مع تحياتى ليك
(عدل بواسطة حسن الجزولي on 08-15-2003, 02:56 AM)
| |
|
|
|
|
|
|
|
|
 Re: زكـــــريات فـــي فتاشــــة .. فتاشــــة الـــرجال (Re: حسن الجزولي)
|
دكتور حسن الجزولي ... تحياتي
اسعدتني جداً مداخلتك التي تحمل الكثير من ماهو مفيد وجميل ومشجع .. وهكذا أنت دوما في جميع مداخلاتك
مثل هذه التجارب التي تعمل علي تغير نمط الحياة في كثير من الناس الذين خاضوا مثلها تظل قابعه في الذكره لا تبارحها لما فيها من جمال وتجربه ثره بكل مافيها ... وأنا عن نفسي اعتبرها فترة يحتاجها كل انسان في مسيرته
مرة أخرى اشكرك علي هذه الكلمات الطيبه والحديث الجميل والقصه الممتعه ... احتراماتي
| |
|
|
|
|
|
|
|
|
 Re: زكـــــريات فـــي فتاشــــة .. فتاشــــة الـــرجال (Re: HOPELESS)
|
العيلفون جنة عدن
من الصباح طابور رياضة
جبة سويدي وكمان بيادة
التمرين الاول معاي ومع الدليل اااايب تادي
واحد نين تلات ارباع
أسلمة العسكر والمشروع الحضاري يدخل عالم الميري والجلالة طلعت من زوزو والزنداوية لي التسبيح والتهليل في جكة الصباح ووالوا الذكر والجو عطر,ويظهر
إنو أسلمة الجلالات اللبنة الأولى والآخيرة الوقف عليها المشروع
التلاوة وقيام الليل القياس والإنتماء وندوة الجماعة نص الليل وإدارة المعسكر في ليل هضيليم وتوزيع الغنايم القرقوش والعجوة والعصير الفوستر كلو جوة الشنطة وشنطة الجماعة جوة المعسكر مليانة بي ميز وتعيينات باقي الجماعة , حصة كل واحد في شنطة واحدة وبقى زاد المية في المشروع يكفي واحد
انا المستجد الحلب غنماية اللوا
اللمبة الشهيد
الست فلة
مواضيع الإدارة وأقدمية البوت علي حسب طلوع الرجل الشمال في الحركات العسكرية قبل اليمين , مفهوم أقدم منك أرجل منك وتباااااااااااااه وسهرة صاح للصباح وفنان اليوم تيمان عطبرة لحدي ما لحدي ما تجي تعليمات اليوم التاني , التضافات والحمامات وقصة السبعة الكسروا البمبر , وا أي سؤال؟
طيب حنعمل للناس إنصراف
أي سؤال ؟
طيب في زول شاف لي زول عندو سؤال ؟
طيب في زول شاف لي زول بفكر يسأل سؤال؟
أحسن تسألوا , ولو ما سألتوا نحنا حنسأل , ولو سألنا سؤالنا حيطول ولو سؤالنا طال الناس حتمل , ولو الناس ملت حتحصل لخبطة , وده المطلوب
أي سؤال ؟
إنشاء الله في جنون البقر
أي سؤال ؟
سعادتك
مبروك أخوكم عندو سؤال , أيوة يا مستجد سؤالك أيه ؟
رأسي لف
لف عكسو يا مستجد
سعادتك عندي كلى ولازم أشرب موية
أنت داير توريني الطب يا مستجد ؟ الطب انت قايلو شنو ؟ عشان قريتوا يعني ؟ اها العسكرية دي اصعب من الطب , الطب كلو كتابين المرض والدوا
ملاريا كلوروكين
نزلة امبسلين
التهاب بنسلين
تعال شوف العسكرية , البيادة , الرياضة ,السلاح فك وتركيب واستخدام و و و
سعادتك وقع نوديهو السمتشفى؟
أنتوا يا مستجدين السمح ليكم تتكلموا منو ثم تانيا العسكرية فيها خسائر عشرة في المية وانتوا لسة تامين وده معناتو نحنا مقصرين , كرور , عارفين دورة حياة الحشرة , الحشرة بتمر , سعادتك الزول ده تعبان , يا مستجد ارنب استعد , مافي زول يقاطعني , الحشرة بتمر في تكوينا بي خمسة مراحل , البيضة , المستجد ,اليرقة , العذراء , حشرة كاملة التطور يا حشرات
أقدم منك أرجل منك
ومات في الصباح وعلي حسب ما ذكر الطبيب الشرعي سبب الوفاة طبيعية وتم تسليم الجثة لي أهل الطالب
من الصباح طابور رياضة
حبة سويدي وكمان بيادة
أسلمة العسكر وغياب المعارضة وكأنها سلمت من دواعي الديمقراطية القادمة بلد بلا عسكر خوفا من إنقلاب الليل , هاجس الإنقلاب ليلا ولو على صفحة أي منهم ليلاً فهو إنقلاب عسكري , وتمضي المؤسسة كحال بقية المؤسسات الأخرى ,الميت ميت مادام رفع البندقية في وشنا , وما يهمنا لو كان مغصوب او مجبور من الظروف الحرن , شهيد ولا ما شهيد ؟ غلاط ومغالطة البيضة ولا الدجاجة في مأتم اللمبة الشهيد
زنداوية , لا لا لا دي بتحظرك في البورد
طيب سررررررررررررريييييح
انا ماشي نيالا أوو اوااوو , نيالا فيهاتمرد وموت
طيب لي غرام وأماني في سموك ومجدك عشت يا ..... أكمل الفراغ بالكلمة المناسبة
أبنوسي
| |
|
|
|
|
|
|
|
|
|
Re: زكـــــريات فـــي فتاشــــة .. فتاشــــة الـــرجال (Re: tabaldy)
|
الصديق الحبيب تبلدي
سلام واحترام
انت عارف قصة العشره في المئه خسائر دي عمليه ثابته في المعسكرات يعني يقولوا ليك لو ما ماتوا عشره في الميه اكيد في خلل والتدريب ما مظبوط .. واشنع حالة موت شفتها كانت لمجند هرب بالليل من المعسكر واتجه ناحية ام درمان والدنيا ظلام دامس وعشان ما يتوه سلك طريق العربات المتجه من المعسكر لامدرمان وفي نص الطريق تعب والدنيا برد .. رقد في مجري الطريق عشان يتدفئ من البرد قبل الفجر جاء لوري الخدمه الالزاميه بتاع الامدادات طلع من فوق ليهو
الله يرحمو
وانحسب من العشره
و(يقال) أن هناك مقابر لمن يتوافاه الله من المجندين غرب فتاشه ولكن للحق لم اراها بعيني
--
تسلم يا شفيف علي مداخلتك الجميله وتناولك لأسلمة الأناشيد والتحول الكبير في الجلالات
تحياتي
| |
|
|
|
|
|
|
| |
ابو جهينة
oudenoord
rummana
nazar hussien
Deng
altahir_2
WADKASSALA
حسن الجزولي
بدرالدين شنا
فيس بوك
تويتر
انستقرام
يوتيوب
بنتيريست