رغم ان زيارتنا للسودان كان فيها كثير من المعاناة خاصة فى الاسبوع الاخير ودى حا افرد ليها بوست خاص رغما عن ذلك عشنا أيام وسط الاهل وتسلحت من جديد ضد غربتى
واصل ولدى عمره اربعة سنوات، مشيت بيهو اول مرة كان عمره سنتين ونص وفى المرة الاولى لم تتركه الملاريا اللعينه فى حاله، مرتين جاته فى خلال اسبوع ام هذه المره فقد استمتع بشكل افرحنى رغم مرض مرافىء الشديد
واليكم تفاصيل طرائف واصل:
كان مندهش للغاية بانه الكلاب بتمشى براها فى الشارع من غير زول وذادت دهشته لمن شاف كديسه ومد يده الصغيره معلقا بدهشه وبعربى كان مكسر،ماما شايفه كنيسه براه ويقصد بذلك كديسه براها
كان يوم عصريه والاهل متلمين وكانوا فرحين لمحاولاته وهو يتحدث بالعربى ولما ضحكوا فيهو علق بغضب طفولى مرح وباللغة الالمانية بما معناه مافى حاجة تدعو للضحك ولما ترجمت ليهم كلامه ضحكوا اكثر وبعدها غضب واصل مهددا اياهم بالالمانى بانه حا يكلم ليهم البوليس
كان يجرى وراء الذباب ويطارده حتى يتخيل الواحد منا انه جارى وراء فراشات
يوم عيد ميلاده كان مندهش بانه الاطفال المدعويين يرمون قشر الموز والبرتقان فى الشارع يعنى مافى الزباله وكان راسه الصغير يتحرك كمروحه وكان الطفل الوحيد اللى خلى القشر فى صحنه واداه لاختى عشان ترميهه فى الزباله وزعل لمن رمت اختى القشر فى الواطة وعلق واصل حزينا يا ماما كده ما كويس
سؤاله المكرر عن قطوعات الكهرباءومن يقطعها وحقيقه تكرار ذلك زهجهم فهم اعتادوا خلاص على هذه الهموم فردت اختى: دى الحكومه ياواصل قطعتها ورد وكأنه يعرف معنى ما قالت، رد باللغة الالمانيه بما معناه بان هذا غباء يدعو للسخريه قضينا شهر فى السودان مشى فيهم واصل ثلاثه حضانات مختلفات حسب تنقلنا للاهل ومايفرحنا بانه يدرك تماما بان له لغتين وانهما لغتين مختلفتين تماما وكنا منذ ولادته متفقين ان لا نحكى معه الا بالعربى ولما جاء راجع من السودان يكرر ما كنا نقوله فى البيت عربى بس وفى الروضه المانى
فى الاسبوع الاول جنن أختى لانه يوميا عاوز بيتزا هوت وطبعا هى غاليه جدا فى السودان وعلقت لمن بدأ يكرر امنيته وكل مرة تشتريها ليهو وسألتنا انتوا يا جماعة قاعدين كم عشان استلف ماهية الشهر الجاى عشان بيتزا واصل ولمن ضاقتها امى علقت يا يمه اكل اليابا وليداتى وهك
كان ناس بيتنا مغيوظين بانى بقطع كلامى معاهم لمن واصل يسألنى سؤال وارد ليهو كأنه زول كبير ولمن يزعل منى يكرر ماما اعتزرى وفعلا لمن اكون أخطأت بعتزر ليهو واخواتى شايفيناها قلة أدب وعلقوا ادى الولد قرصة خليهو يطلع ليك راجل
القصص كتير وهى محاولة لرصد تصرفات اطفالنا المولودين فى اصقاع الدنيا
لكم محبتى ام واصل ومرافىء
03-27-2003, 10:57 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
يا إشراقة.. بقولوا ود الحلال عند ذكروا ببان.. وأعتقد أن هدهد يفهم ما أقوله.. أشرقتي علينا منذ أمد لازلت أذكره من خلال قصة هدانا إلى وجودها أستاذنا د.ياسر الشريف.. هي أشبه بخاطره عن الجمهوريات وحملات بيع الكتب.. انا جمهورية، لكني لم أحظ بذلك الشرف.. كنت في ذلك الوقت في علم الغيب.. وحين خرجت وجدت الأمر قد اختلط حاله..
حكايات واصل اللزيزة أضحكتني.. يتنبه صغيرك إلى أشياء نشعر نحن بعاديتها.. الكلاب في الشارع.. الموز الملقى .. الكهرباء المقطوعه.. تألمت قليلا مع صغيرتك والملاريا.. الواحد بالله لما يكون برّه يقول متييييين أمشي السودان.. يمشي السودان تدقوا الملاريا والبعوض والضبان والكتاحه.. يمرق جاري جري.. سيراً مرن.. لكن رائحة الدعاش وهمبريب المغربية.. وأنسام النيل تجعله ينتظر يوم العودة من جديد... أعجبني أيضاً ما تمنحيه من قيمة لإبنك.. وأضحكنتي الدعوة إلى (قرص الولد) رغم اختلافي مع المبدأ.. لكن السودانيين لايزالون يحتفظون بنكهة مثل التي كنت أستغرب لها.. وهي أن الشاب لا يجب أن يستخدم كريم ولا شامبو.. عشان يطلع خشن.. التحبة لواصل ومرافئ ولوالدهما... التحية لك إشراقة.. وحمدا لله على السلامة
مريم ينت الحسين
03-27-2003, 11:09 PM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
حاجة غريبة يا بت الحسين كنا وابو واصل بنحكى عنك فعلا بت حلال سعيدة بمعرفتك وباضافاتك، انا بحب الجمهوريين جدا فهم بداية انطلاقى لاعرف نفسى كا امراة وكتب الاستاذ هى الوحيدة التى اقنعتنى وحسمت كثير من الجدل الفكرى حول وضعية المرأة فى القرآن
لك معزتى ولنا حوارات دافئه
ام واصل
بالمناسبة مرافىء ما جاءتها ملاريا المسألة كانت أكبر جاءتها كتكوته اى سعال ديكى ربنا كتب ليها عمر جديد ، عمرها كان ثلاثة شهور اخدت فى السودان 23 حقنه واكسجين وهلمجرا
03-27-2003, 11:22 PM
مريم بنت الحسين مريم بنت الحسين
تاريخ التسجيل: 03-05-2003
مجموع المشاركات: 7727
ألف ألف ألف سلامة يا أم مرافيء.. حمدا لله على سلامتها... بمناسبة أم مرافيء دي.. انا الكبيرة عند أهلي.. وطبعا عايشه في الأردن.. الأردنيين عندهم عادة التسمية بالإبن الأكبر.. فأهلي أخذوا الأمر ده.. وبقوا أبو مازن وأم مازن.. بمشيها مع الأردنيين وبحتج مع السودانيين.. انا طول بعرض ما عاجباكم!
التحية للجميع.. وأكيد لنا الكثير لنتحدث عنه
مريم بنت الحسين
03-28-2003, 02:49 PM
الجندرية الجندرية
تاريخ التسجيل: 10-02-2002
مجموع المشاركات: 9450
اشراقة حمد لله على السلامة اطفالنا من جنينا عليهم كما قال المعري زدناها بالغربة فبقت مركبة احس كلما ذهبوا وادهشهم مايراه الغير عادي يسار اول مرة سافرنافيها كان بقول للمروحة هيلكوبتر سلام لواصل ومرافي وابوهم
03-28-2003, 08:39 PM
waleed500 waleed500
تاريخ التسجيل: 02-13-2002
مجموع المشاركات: 6653
اشراقة المصطفى توامة الايوبى لك تحياتى وسعيد جدا بان واصل لم يصب بالملاريا للمرة التانيه وده يقودنا لى مدى التطور الصحى والذى كاد ان يقضى على الملاريا نهائيا او قد تكون الملاريا استحت من ابننا واصل وجعلته يمر بدون اى وعكه صحيه من تغير الجو ما بين النمسا والسودان الشى الاخر فرحت اكتر كون الكلاب والكدايس بتمشى من دون مقيد وده لعمرى قمة الحريه حاولت اعمل مقارنه ما بين تربية الغرب وتربية سوداننا وايهما افضل اطفالنا هنا الواحد لو ضحكت معاهو من دون سبب نجده ضاحك لدرجة القهقه وما عارف الشى ده كويس ام لا والشى العجبنى كونه احتفظ بقشرة الموز فى مكانها الطبيعى ولو التزمو كبارنا وصغارنا بالطريقه دى لصارت الخرطوم انظف من باريس وبنتمنا فى النهايه ان يعود ابننا واصل للمره التانيه ويجد الكهرباء قد امتلكت العافيه وانارت شوارع الخرطوم ليل نهار فى الختام لا اطيل فى الحديث منتظر بقية يوميات واصل مابين فيينا والخرطوم تحياتى للصغيرة مرافى ومفروض اخونا بكرى ابوبكر يعطيها شهادة بورديه لانها عائيشت البورد قبل ان تتولد ما عارف وجدت نفسى مستمتع بيوميات واصل واتمنا ان لا اكون خرجت شويه من لب الموضوع
03-28-2003, 09:26 PM
Ishraga Mustafa Ishraga Mustafa
تاريخ التسجيل: 09-05-2002
مجموع المشاركات: 11885
شكرا ياوليد 500 ربنا يسمع منك ويحقق امنياتك واكيد حا نرجع تانى حتى لو مافى كهرباء المهم واصل ومرافىء يعرفوا البلد اللى انجبتنا انت ما طلعت من الموضوع بالعكس اثرت نقاط توسع من النقاش لان الهدف من هذه الطرائف هى تحليلها فى النهاية والوصول لوسيلة متوازنة فى تربية اطفالنا بطريقة تحقق لهم توازانهم النفسى سأعود مرة أخرى لملاحظاتك لاحقا
اتزكرت واحده من طرائف واصل
فى ايامنا الاولى مشينا لناس أهلنا عندهم ما شاء الله عيال بالكوم وبتكلموا كلهم بصوت عالى وفى لحظة واحدة سألنى واصل ياماما هم بيفهموا بعض، كلهم وما يتكلموا بصوت عالى عشان الجيران
لمن جينا راجعيين لفيينا بقى سؤال واصل المتكرر يا أمى ليه ما جايين ضيوف، حا نأكل برانا
أجمل حاجة بقى يقول لى أمى مش ماماى اللى كانت غايظانى من جوه
بيندهش لمن يسمع زول يتكلم عربى وبفرح يصرخ امى ده بيتكلم عربى
فى السودان بيحاولوا الاهل يعملوا ليه الحاجات والاكلات اللى بيحبها ومرة قال عاوز بيض هل تصدق انو غالى جدا وجداد الحى شاخ ومافى أمل يبيض، بيعملوا ليهو صحن بيض وينادوه عشان يأكل لوحده لانو البيض غالى ومافى طريقة يعملوا صحن بيض لكل الناس وواصل الله يديهو العافيه يرفض يأكل البيض لو ما أكل كل الناس ذى ما بسميهم ، مرة مشى معاى محل اتصالات وكنت عاوزه استخدم النت واصل احتج لانه عاوز برضو يتخدم الانترنت، أحتج صاحب المحل وقال لى ما ممكن اسمح لطفل يبوظ لى جهاز، واصل زعل وبرطم وما زال يبرطم لمن يتزكر الحكاية دى
علي هذا الاهداء الجميل اصبتني في عشق هذا الولد الجميل وكم انا مشتاق اليه
اوفدر ذم يا واصل
كده صاح اللغة دي سوف احاول جاهداَ ان اجيد هذه اللغة لأجلك واصل
انا لا زلت اتمنى أن ارى صورته مع الطيب صالح ويا ريت لوفي صور من السودان بالذات مع امي عائشة
طبعا انا مارديت كنت قاعد اعاين للناس للناس واعاين لي واصل ودايرك تحكي اكتر لكن قلت لو واصل مشى الصفحة البغادي الحقوا اقبضوا واحيبو راجع للحته الفي الواجهة
ادهشني جدا هذا العقل السمح وما ستغرب لمن تكوني انتي امو
لكن انا بطني فايرة عليه داير ابوسو واجضموا واقول ليه الموز ده شرك بزلق الناس وبعدين ناس السودان يا واصل ماعندهم شىء غير اتكلموا واظن حتى الكلام ممنوع في بعض الاحيان
لكن يا شوشو راي شنو في الصعود ( التنباك) ما قال ليك ليه ياماما الناس دي بتاكل شوكلاته كتير كده ليه
وطبعا مشى لقى نيل مختلف عن الدانوي
وسوف اواصل ياواصل بس المهم امك تجكي
تحية عميقة لكل من عمق الحوار في هذا البوست
03-29-2003, 08:01 PM
تراث تراث
تاريخ التسجيل: 11-03-2002
مجموع المشاركات: 1588
حمد الله على سلامتك وسلامة الأولاد يااشراقة لقد قلقنا كثيراً على مرافي ، ونحمد الله كثيرا على سلامتها . التحايا كلها والقبلات للولد الراقي المتحضر واصل . نشاركك السعادة في زيارة الأهل والوطن , ونتقاسم معك الحزن على ماهم عليه من ضنى . لازالت استنكر عدم قدرتنا على التوصل مع ايوب ، امنحينا عنوانه في البريد الالكتروني وسنفرض أنفسنا عليه .
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
Ishraga Mustafa
مريم بنت الحسين
الجندرية
waleed500
تراث
فيس بوك
تويتر
انستقرام
يوتيوب
بنتيريست