|
دعواتكم لزميلنا المفكر د.الباقر العفيف بالشفاء العاجل
|
|
 Re: قصيبة المُرنـَع السايقات ########يسك (Re: munswor almophtah)
|
بشكرك كتير استاذ حنفي على هذا الشعر الرصين الذي يعكس تراث وثقافة بلدنا ودائما اجد في شعرك كل المدراس الشعريه منها كلاسكية البارودي وتجديدية التجاني يوسف بشير ورومانسية خليل مطران وهذا يدل على ان باديتنا غنيه بالتراث من حيث الطبيعه والاحتفاظ بالمخزون اللغوي الذي اندثر في معظم بوادي ومدن السودان ولكن لازال موجود في باديتنا وبطانة ابو سن. وانا اعتبر كما تقمدت سابقا وانا طالب بالجامعه بدراسة مقارنه واعتبرت ان الدوبيت في السودان هو امتداد للشعر الجاهلي وبالفعل لقيت ان الامتداد الحيقيقي في البطانة وبادية الكبابيش والكواهله وايضا هنالك تقارب بين عرب باديتنا و عرب البطانه
من حيث الاهتمام بالشعر والمراعي وتربية الابل والمهاجره (مهجراوي) وجلسات الشعر ولكن في البطانه ووجدت سوق عكاظ في الصفيه والصباق وريره والذي كان له قهاوي تديرها نساء قادرات على ثرد الشعر والنقد مما ساعد على ارتقاء شعر البطانه من التشبيه الى الاستعاره التصريحينه الي المكنيه والسبب يرجع للاستاذ احمد عوض الكريم ابو سن والحردلو وطه والشلهمه ود سميري وود الفكي حمد ووشوراني والتاية بت الامين ودخير والخ......
ولكن أنا بشكرك كتير رغم الظروف التي لم توافي للشعر في باديتنا وانا اجدك في قائمه رواد الشعر وكما اجد الاخوه علي الشيخ وسيف الدوله وبقيه شعرانا كذلك وعندما اقول الظروف المتواتيه هي الجلوس للشعر والقعده لان الشاعر عندنا يقول قصيده ولم يجد الحاضرين لتقييمها من حيث النقد والإعجاب لكي يزيد من تنقيح شعره ويرتقي بالشعر حسب اذن السامع .
بالنسبه لمقارنتي التي أجريتها :..
قول سويد ابن ابي كاهل اليشكري في عينيته
تسمع الحداث قولا طيبا.
واذا أرادوا عيره لن يسمع
يقابلها قول شاعر البطانه
يا الدرعاء المسايسك دورنلك لوب
ندماكي التلول النايبهن بالوب
فمك ما لفظ عاجز برا المطلوب
جيدك كالبراق كفلك بلاعب التوب
في المقارنه اجد الفتاه الجاهليه والفتاه البدويه لم تتحدث الا بطيب القول ولم تردعلى الجهلاء الذين يريدون غير ذالك
فالشاهد هنا فتجد شاعرنا في باديه الكابيش او البطانه متمسك بقيمه وموروثاته العربيه التي جاء بها اجداده من جزيره العرب ولازال يحافظ على اللغه العربيه التي زجت في قياهب افريقيا السمراء واختلطت باللهجات النوبيه والافريقيه المختلفه
ولكم مني التحيه
عيسى احمد محمد مضوي
الامارات العربيه المتحده. دبي
| |
 
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
عزيزي عيسى
السلام مبتدأ وختام
اشكرك على رفدك لبريدي بهذا الزخم التراثي .. مع ان قصيدة الجميل حنفى قد وصلتني في اوانها , وهو دائما ( نقاط زيرو) ما بنقطع من ملفه طرفى .. واود ان اشكرك ثانيا عل جميل التواصل ..
كتبت لك وانا على عجاله من امري .. ولكن الوعد ان يكون حبل التواصل ممدودا كما الود
وعبر هذه الرساله دعني احيي حنفى وكل الجميلين
مودتي
Adam Saad alla Abu Rijal
Moroz Co. Ltd.
BKT off -Highway Tyre Solutions
Sales Technical Support Mgr.
Khartoum - SUDAN
Telefax: +249 - 183 - 469106
Mobile Phone : +249 - 9 - 12311095
[email protected]
| |
|
|
|
|
|
|
|
|
 Re: قصيبة المُرنـَع السايقات ########يسك (Re: munswor almophtah)
|
التحية لك يا زول يا جميل والتحية عبرك لحنفي ودكتور صديق وكل من يري الوجود جميلا. منصور أنت واحد من الذين يجعلون لهذا المنتدي طعم ولون ورائحة كمان فلك الشكر.
==
تخريمه
هوي يا بكري القـ....واديس جمع قادوس مالا عامل عليها كمية بتاعت كروسات فيها شنو بالله كدي عيبا لي (غايتو الفي قلبو الحرقص ....).
منذ أيام قلائل كنا راجعين من الجزيرة كجبي بعد عناء يوم طويل من العمل ، فنحن كما تعلم نعيش أيام حصاد محصول البطاطس (برغم قيمتها الغذائية العالية إلا أن سعرها في السوق ما أنفك سجم وواقع في الواااااطه) لكين نسوي شنو عاد (هذا م وجدنا عليه أباؤنا) فقد أصبحت تجري منا مجري الدم – أها ونحا سادرين للحله قال لي ود قرشي المطرطش إنت خابر أهلنا ديل ماهم ساهلين تب برضو أكان عندهم فوازير إنت قايل الفزوره شني مي الغلوتيه إلا مسمحنها ساكت بالموسيقي والخلفيات والإضاءة أو ماا يعرف زندقة بالفيدو كليب (أها يقوم في الحه دي ###### ناس ود الشطيطه ينبح).
فلان زول الدشيناب قال لي خالو لأمسخ من موية التمس حجيتك ما بجيتك خالو قال ليهو خيرا جانا وجاك
قال لي خالو رقاق سيقانو ومسيخ في لسانو وأدروج لا عرانو.... عرفتو لي
فما كان من خاله إلا أن قال له دا مو خالك ا ود ..................
====
آسف لما أحدثته من أذي للمقال فقد هيجت أشجاني فلك العتبى حتى ترضي.
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: almulaomar)
|
Quote: على باقى البنات والله ما اقيسك
ليهن يا ام عروض غادى وبعيد ميسك
اتى حكايه ما أنفكــّت نواميسك
وفى خلق الله ما ظهرت مقاييسك
نايم صاحى مشغول بى هلاويسك
ولى هسّـــاعة ما تمت كراريسك
|
يا سلااااااااااااام علي هذه الروعة
واصل ......لا فض فوك
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
المنصور حبابك
قبل شهور تعد فى اصابع اليد الواحد فى نهاية السنة الماضية، كنا نتحلق حول مائدة من الطعام انا ورهط من اعمامى بينهم العم دكتور صديق امبده، فى مناسبة زواج ابن الفريق ادم حامد موسى بضاحية كافورى، و للوهلة الاولى تعتقد انك فى بادية الزيادية بكل ما تحمل من تراث وثراء وليس بضاحية كافورى، بيت الشقاق كان حاضرا، عرضة الخيل وعرضة الابل التى نطلق عليها "القطير" كانت حاضرة بكل تفاصيلهاوسط غابة من الاسمنت ودهشة العيون التى اطلت من شرفات الفلل، اضافة الى السيرة التى يعتلى فيها العريس الحصان, (والجلد "الدق" ما يديك فرقه، وكذلك الرصاص)، والحاضر دائما وابد الجرارى , والهسيس، وام سقيردو الخ...، ما اذكره من حديث ويدى بين ضلع وشطة، هو التوثيق للتراث وابرز المناسبات التاريخية التى حدثت وغيرها من التفاصيل الاخرى، ولا شك ان دكتور صديق من المحبين للتراث والبادية وادابها، واقترحنا وقتها بعض المقترحات تتعلق بالتوثيق وما الى ذلك...
ارجو شاكرا ارسال ايميلك او حسابك فى الفيس بوك على الخاص
جايك صاد
تحياتى
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: محمد المختار الزيادى)
|
يحكى ان زعيم الكبابيش الشيخ محمد علي التوم (المر) اخذ بعير احد الكبابيش لبعض المشاكل وكان البعير من اصائل الجمال جمالا وسرعة (ورقل) وكان الكباشي شاعرا مجيدا فذهب الكباشي الي فرقان الشيخ المر بمنطقة ام سنطة ريفي حمرة الشيخ حيث دكتة العامرة وشاهد بعيرة مربوط فمشي الكباشي نحو بعيره فالفه البعير وعرف صاحبه (فرزم) وهنا تذكر الكباشي صولاته وجولاته وهو علي ظهره وتذكر محبوبته وشيومه فانشد قائلا :- ود ابل العكاكيم الضراعو مشنق
طيراحكّم الربدة وقعد بتخنّق الليله آ الرقل قلب المشارف رنّق علي قصيبة الدهاريب الصبيبو نقنّق فقال له الشيخ المر وكان شاعرا مجيدا ايضا حلف ما تركب عليه مرة اخري الا تجيب غنوة بيضاء فصاح الكباشي هانت وفرجت وانشد في الحال
بيضاء علينا كيف سنون ام عاج
وكبف تبر الضحي وقمر العشي الوجاج
خيطا تم حسابو وواقع النسّاج
وقطنا فوق فروعو مفقّع النباج تحدييييييييييي غنوة بيضاء ما في سواد فقال له الشيخ المر شوق جملك تستاهلو وهاك معاهو فروة وسوط
ولكم الود والمحبة العبيد الطيب بادية الكبابيش
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
لك الشكر الاخ منصور وهذه نافذه طيبه يكون لي عبرها الشرف بمعرفتك الغاليه ويكون لنا الشرف بمعرفة سودانير اون لاين وانا عيسى احمد محمد من ابنا امبادر وتربيت فيها وترعرعت في وديانها وقيعانها وجبالها واصطدت ارانبها وحباريها وغزلانها وبعاشيمها ودرست بها .اما عن الاخ. حنفي ربنا يجعله زخرنا لنا جميعا مصورا لوحاته الرائعه عن سحر وجمال المنطقه وتراثها.
وعبرك بحي جميع الاخوه بالفورورد
ولكم شكري وتقديري عيسى احمد محمد مضوي
الامارات العربيه المتحده دبي
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
الابل هي الحرفه ألرئيسيه للقبائل في امبادر وحمره الشيخ وعموم الناس في بادية الكبابيش .ومن ضمن هذه القبائل قبيله عيال حماد من الكواهله فاعتادو الرحيل مع الابل جنوبنا حتى السكه حديد و خزان ودعه بما يسمى عندنا في بادية الكبابش بالصعيد ويقول البدوي البل صعدت وايضا الشمال البل سفلت شمال حمره الشيخ ويقول البدوي البل جازت يعني مشت الجزو حتى وادي هور وزرد البرد فشائت الأقدار واستقرت قبيلة عيال حماد بامبادر بقرية عديد دردق عام ١٩٩٣ وحينها جربو الزراعة زراعة الدخن في قوز المرخ وهنالك احتجت البدويه علي امتهان هذه الحرفه التي لم تعرفها من قبل وانشدت قائله :----
القلبني بي حشو ان شا الله يموت في قشو
دوب للساقو ونشو وحلبو فواق واتعشو
وحقيقة ان البدويه استنكرت الزراعه ودعت عليها بالتلف والحريق قبل ان تثمر ولكنها تذكرت ماضيها
وابلها والساقو ونشو الذين يسرحون بالابل و حلبو الفواق هو اول الحليب من الناقه ويقال الناقه فاقت اي أدرت الحليب وعطفت
ولكم شكري وتقديري
عيسى احمد محمد مضوي -- امبادر
الامارات العربيه المتحده دبي
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
Subject: دراويش
Date: Tue, 12 Apr 2011 19:15:44 +0300
العزيز الاديب منصور المفتاح
لك التحية والسلام
شكرا لك وانت تطوف بنا فى سياحة جمالية فى الطببيعة بلغتك المتفردةا
لسق أن إطلعت على تطوافك وصحبك فى بادية الكبابيش
وقراته قبل قليل من بريدى وعجبت ودهشت من جمال الوصف والمفردة ولى عودة لرد مطول
وليس لدى حار او بلولة لماعونك الممتلئ دسماً حالياً ولكن لدى كما قال أحد المغنين وإسمه منصور أبضأً
فهو يغنى الدوبيت لكنه مشهور بأغانى البنات فحين يفج البنات ويصدح باغانى الجرّارى تجد له العذر
ويكفى أن شبيهه (بابا) أهدانا يابابا قول النعيم دراج
ذات مره التقيته بمشروع جريح السرحة وتكلمنا بالشعر فقال لى
ْأنى المولى لى هوّن
غنا رجالى ونسوّن
وكان النجوم ضوّن
بجيب منطوق ملوّنْ
ما اروعه فى الحالتين حبن يغنى معنا مرة ومع الفتيات مرة
هذه المقدمة لأقول لك نحن أيضا تنتابنا حمى شعر المتمدنين والحضر
فتقبل منى شئ من بضاعتكم
ردت اليكم لانك تدروشت فى باديتنا واظهرت جمالها
فهل تسمح بأن نرتدى ثوب البنادر ونغنى لحوائها ؟
مرفق بعض القصايد
وشكرى
محمد الطيب حنفى
تأشيرة دخول
الخلّدك لوحه ورسوم منحوته فى قلباً وفــىْ
لمّن أباشرِكْ بى السؤالْ تِْتضارىْ فى النَعـَـمْ النَفِــىْ
وأستفتىَ جُوَّاكى الأنيـقْ الحاضِنْ المَعنى الخَفـِـى
سَاكُنْ يَنابيعِكْ يهيجْ تَنْضـــُمْ عُيونِكْ وأكتَـفى
قوليلىْ أيـهْ داعِى النُجومْ والقَـَمرَا مادامْ إنتِى فىْ؟
لحظة تكون قاعِد معاىْ وَهِِجْ الكواكِبْ بـِنْطَفى
بلقاكى فى الخاطرْ سؤال لمّا الحقايق تـِنتفى
وألقانىْ مُشتاقْ النَعاسْ وكتين طُيـوفِكْ تِختـَفى
وصفِك مكانْ ( السَجـدةْ) فىْ ( مـَتـْـنْ ) القَصيده المُحْتـَفى
ونـَمّــةْ مَساديرِكْ نَشيدْ ناساً بِتََعرِفْ تِصْطَفى
أشْتـَمَّ رِيْحِكْ وأستعيدْ رَفّـَـةْ شِراعِى المُنْكَفى
وحاسِسْ صقيعْ الغُــربه زادْ دايرلُو مِن شمسِك دِفــِـى
سِرْ بَهجَةْ الناسْ بىء لِقاكْ صِدْقْ التواصُلْ والقُبولْ
قُدرَةْ بَشاشاتِكْ تَشيلْ مَعناكِى لىْ كُــل العُقول
وأقدرْ أزيدْ فىْ شِعْرِىْ بيــتْ ( بـَـرّانىْ ) وأتْفاخـَرْ وأقولْ :
أنا فى عيون الناس لقيتْ إيمانى بيك زايدنى طُول
أشواقى لو عَبرَتْ سَماكْ مايعترِضْ مَسْراها زول
ماليها من ريدتك فَكاكْ نديانةْ فىْ كُل الفُصــول
جَدِّدْ ( جَوازاتها ) المعاكْ وأكتِبْ تَواريخْ الوُصول
وأختـِمها بىْ (طَابعء ) هواكْ وأدّيها تأشِبرةْ دخول
محمد الطيب(حنفى)
الدمام نوفمبر 2004
مكتول هواك أنا مرّتــين
أصعب سؤال فى الإمتحانْ يوم بُكره ناوى تكونو وين؟
وأنا قلتَ فيكْ يا كـــــــــــردفان لَكنُّه كانْ صُبحاً حزينْ
نَغــم العصافـــــير إِستكانْ لى صوتْ غُراب شُوماً لعين
وعرفتَ إنو البــْـين وكــان مافيها شَك صابتنى عين
وفالو المقدّر ليك بصيب
ماقُلت بعد كـــرَم الزمــان تفْجُرْ خُصوماتْ السنين
وأحَزِمْ حقايبى من المَكان الكُلُّ يومْ فى العين بـِـزِين
مرتَع صـِـباىْ مَركزْ عَصاىْ حِبَّانْ قساى ( ضُّلِى الرَهينْ)
أهلى البُساط والإنبساطْ الحاشا ما صـَـرّوا الجَبين
لى ضيفْ هُجوعْ حاديهو جُوع نازُلْ رُبوعْ المُخلصين
الودّهُنْ صافى الحليبْ
ولو ساءله والشوق لىّ زادْ با ( أُم مُرامْ) والمؤمنينْ
خايض مداستى بلا جوادْ فى صحرا والزاد كان ضَنين
لاخطوه بتقــِّرب بُعاد لا ضىْ صباحاتِك بِبينْ
والغُربه يا أنبل فؤادْ قَسّت قليباً كانْ حَنين
رشّتْ على اللوحةْ السوادْ زمَّـتْ نَفَسْ حـَرفاً رصينْ
وعِرفتَ مأساةْ الغريبْ
يوماتى مُشتاق دمعى صابْ والله كاتلنى الحنين
لى قََـعدهْ فيها الناسْ صِحابْ ضَمّاها دُكّان ( اللََّمينْ)
اسمِعلِى نـَمَّاتْ أو رَباب قُدّامي فتُنجانْ ( بِتْ أمينْ)
متباهى مالينى الشباب والساعه فى اليد اليمين
ماشايله أفراحى التِياب (طاقيتى) فى نُص الجَبين
والليله مبعاد الحبيبْ
الراجى لمّـن راسى شابْ يفهم كلامى الما رطين
وينزِل من أطرافْ السحابْ لى هُوجْ عواصفْ الريد يلين
ومن قلبو يتحدَّر تَسابْ دَفَّاقْ وما ناضُب مَعين
ويكشف معاىْ سِترْ الحِجَابْ ويْبَدِّلْ الشّكْ بىْ اليقين
وأكسب رهانيء مع الشباب وأجمع حَصاد زرْعْ السِنين
فى قيفْ هلالْ قلبُو الخَصيب
وأنا فى ليلى الإغتراب غنّيتو( مُسدارى) الحزين
رسّلتو فى أوَّل خِطاب لى ناعِس الطْرفْ الرَزين
وَصيتُو ما يهزَّك غُياب أنا لسه حافظَك ياحنين
رغمْ الحواجِز والضبِابْ من ضَيْ ملامحَكْ بَستبينْ
رَسِمْ الخرايطْ والمآبْ لى كنزَك الدُخـرى الخَزين
يا أقربْ الناس القُراب بختِم غُناىْ بىْ نَمّــتين
لو غنَّا زولْ (مكتول هواك) مكتول هواك أنا مرتبن
مكتول هواك يا كردفان مكتول هواك أنا من سنين
وما ظنّى من ريدك بطيب
حنفى
مدينة الجبيل السعودية
أغسطس 2003
أم مرام : شقيقة الشاعر
اللّمين : الأمين قدوره تاجر وصديق بالبلد
بت أمين : زبونة القهوه الفنجريه
عــــذراً
عذراً إذا داخل شمال غافلتَ ريمْ فى مَخْدَعُو
محزون وشاطِح بَىْ خَيالْ رَدَّدْ صَداكى ورَجَّعـــُـو
أنا أصليْ رايحْ لَى غَــزال ْ يوماتْى وَدْعِىْ بَجَدِّعـُــو
ولابجاوِبْ الوَدِعْ السُؤالْ لا زولْ عــِـرِفْ لَىْ مـَرْتَعـُــو
زولاً بشابِهك فيْ الخُصـــال رافِضء عـَبيرو يَوزِّعــو
ويرحَم نزيفْ حِبْريْ الليْ سَالْ أنهارْ وشَنّـَــفْ مَسْمَعو
غايِظنيء زىْ نَخَلْ الشِمــالْ لـَمّـَــنْ سَبـَيطـُــو يـَفـَدِّعــُــو
ويْجْبُرني بيْ بُعْدْ المـَنـــالْ أمْسِكْ حُجَــارِيْ وأجَدِّعــُــو
قـَـرِّبْ مَسامعَكْ لـــيْ تعـــال سْرْ فيْ دواخلَك بَوْدِعـــو
شَتْلاً زرَعتو حِذاكْ مُحـــالْ ريْحَك تشيلو وتـَقْـلعـــو
جاييكى مِنْ بابْ الجـَمال الفيكى مولاىْ أبْدَعو
تَهدينى حـَبـَّــةْ رْيدَه شالْ تَـهزِمْ شِتايا وتردَعو
حنفى
الهفوف مايو 2007
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
الاخ الحبيب الاحب الامجد لك الود والتحايا علي قدر الاشواق وقبلها سلام لك والاخوان ولاسرتك الكريمة ياخي الجابك لي الشعر والغناء دي شنو ماتخليك في البزنس حقك ومادام جاني ايميلك من حنوف عاد خليني النبل ليك ماعونك ما يرجع مني يابس مرة الشيخ المر خرط جمل البري الغناي والجمل كان سمح وخباب والعربي كان مبشتن الدنيا والعربي جي لي دكة ناس الشيخ لقي جملو مربوط فقال ليه ودابل العكاكيم الضراعو مشنّق*طيراعكّم الربدة وقعد بتخنّق* الليلة آالرقل قلب المشارف رنّق*علي قصيبة الدهاريب الصبيبو نقنّق شوفالموسيقي وشوف الجرس وشوف الحركة اربع ابيات معلقة كاملة فرد عليه المر حلف عليل تجيب غنوة بيضاء حتان تسوق جملك وكان المر شاعرا فقال البري بيضا علينا كيف سنون ام عاج* وكيف تبر الضحي وقمر العشي الوجاج*خيط تم حسابو وواقع النسّاج وقطنا فوق فروعو مفقّع النبّاج *شوف السواها العربي في في ناس الشيخ فرد عليه المر سوق جملك تستاهلو وهاك معاهو فروة وزسوط يا عيسي طيرا عكم الربدة وقعد بتخنق دي دايرة الطيب صالح في موسم الهجرة عشان اللغة دي جابها من البدو وقلب المشارف رنّق دي مابتشرح بس تحسها حس وتزوقها
ولك من الود وانشاء الله ايامك ابيض من سنون ام عاج
العبيد الطيب السعودية الرياض
الاخ الغالي العبيد لك الود والاحترام ومشكور على بلل ماعوني وهذا في حد ذاته قيم اصيله متورثه في باديتنا وكان علي إلزاما ان ابل ماعونك ايضا واليك قول البدوي وهو يخاطب في جمله وكيفيه الوصول الي الحبيب مشبها له بأسرع مافي الحياه البريه وهو الاضليم واحيا الهضليم وكله سمعته من فيه كبارنا إليك النص :....
يا ديك الاضاليم النفر جيزانوا
أبوك تيس المسافات الفرق كيعانو
النوق جضى في مراحو وكتر حننانو
سيبو عشانا في رطبا بعاد فرقانو
مما لا شك فيه ان الجمل سريع مشبها له بالهضيلم وهو فحل النعام وديار المحبوبه بعيده ولكن هذا الجميل اصيل وأبوه جمل معروف بقطع المسافات البعيده وعندما يقال الجمل افرق الكيعان يعني كوعه بعيد من الزور هذا يدل على ان الجمل بشاري او عنافي وكل هذا يدل علي انه جمل سريع ويتحمل قطع هذه المسافه البعيده الي ديار الحبيب.
اما عن البري رجل شاعر وذكي اما عن الشيخ المر رجل عادل وشاعر
وشكرا جزيلاً
أخوك عيسى احمد
:
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
سلام واحترام عالي لشخصكم الكريم منصور
و
بالله عليك
أقبل بنا
وسامحنا على ظلمنا أنفسنا
فيما مضى
يا الله
تأشيرة دخول
الخلّدك لوحه ورسوم منحوته فى قلباً وفــىْ
لمّن أباشرِكْ بى السؤالْ تِْتضارىْ فى النَعـَـمْ النَفِــىْ
وأستفتىَ جُوَّاكى الأنيـقْ الحاضِنْ المَعنى الخَفـِـى
سَاكُنْ يَنابيعِكْ يهيجْ تَنْضـــُمْ عُيونِكْ وأكتَـفى
قوليلىْ أيـهْ داعِى النُجومْ والقَـَمرَا مادامْ إنتِى فىْ؟
لحظة تكون قاعِد معاىْ وَهِِجْ الكواكِبْ بـِنْطَفى
بلقاكى فى الخاطرْ سؤال لمّا الحقايق تـِنتفى
وألقانىْ مُشتاقْ النَعاسْ وكتين طُيـوفِكْ تِختـَفى
وصفِك مكانْ ( السَجـدةْ) فىْ ( مـَتـْـنْ ) القَصيده المُحْتـَفى
ونـَمّــةْ مَساديرِكْ نَشيدْ ناساً بِتََعرِفْ تِصْطَفى
أشْتـَمَّ رِيْحِكْ وأستعيدْ رَفّـَـةْ شِراعِى المُنْكَفى
وحاسِسْ صقيعْ الغُــربه زادْ دايرلُو مِن شمسِك دِفــِـى
سِرْ بَهجَةْ الناسْ بىء لِقاكْ صِدْقْ التواصُلْ والقُبولْ
قُدرَةْ بَشاشاتِكْ تَشيلْ مَعناكِى لىْ كُــل العُقول
وأقدرْ أزيدْ فىْ شِعْرِىْ بيــتْ ( بـَـرّانىْ ) وأتْفاخـَرْ وأقولْ :
أنا فى عيون الناس لقيتْ إيمانى بيك زايدنى طُول
أشواقى لو عَبرَتْ سَماكْ مايعترِضْ مَسْراها زول
ماليها من ريدتك فَكاكْ نديانةْ فىْ كُل الفُصــول
جَدِّدْ ( جَوازاتها ) المعاكْ وأكتِبْ تَواريخْ الوُصول
وأختـِمها بىْ (طَابعء ) هواكْ وأدّيها تأشِبرةْ دخول
محمد الطيب(حنفى)
الدمام نوفمبر 2004
عِدني من الحاضرين دوماً -إن بقينا في هذه الفانية-
في أي محفل للجمال تأتي به
شكراً لا يقدر في أي ميزان على الثراء والجمال الذي تمدنا به
وتحية عبرك إلى كل من يدوزنون الأرواح
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: بله محمد الفاضل)
|
الاستاذ الاديب الاريب الشيخ منصور المصباح الدكتور الانسان (الربيع) صديق ام بدة الدكتور الحبيب عبدالله علي ابراهيم الاخ محمد المختار الزيادي مرفق لكم حجوتين في اغنيتين من الدوبيت
بت الناس عديلي وكحلي
وليك المولي يا القالبك جدية محلي
يا الضارباني في جوه الورايد النحري
ويا ام فرا بجوازوبو القرض لي السحري
* البت جميلة وقوامها رشيق ولم تكن من النساء الدائرات ولكنها بتشبه عارضات سان اف لوران كما
يقول المبدع نزار قباني وعيونها زرق وكحيلة بلا دلال وما حلقت الحواجب ويحفظك الله من عين خلق الله يا البشبهي صيد الخلا والصحراء لكن ماذا فعلت وما ذنبي لتقتليني بهذة النبال والسهام لتضربي بسهميك في اعشار قلب مقتل! وكمان نبالك بصيد الا في ورايد النحر وبسمتك يا سلام جميلة وبيضاء ما كي زي مقدمات برامج التلفزيون الواحدة تضحك ضحك راجل نامن المكياج والشعر المستعار يقع اللغز هنا البجاوزوبو يعني البخلضوه مع القرض وببخرو بيهو المعيون وشبه بيهو بسمت حبيبتو دي شنو ؟
العرب الفي ملمات الدروب الساهلي
جينا الليلة شفناهن كبيرة وجاهلي
مشيتا روقا ما المستخفي وراحلي
جلدا شوفتو كيف ريع ا######## المتماحلي* العرب العرب الفي ملتقي درب البوادي كما يقول صاحب سليمي علي ان سما طرفي لنار يشبه لها بزي الارطي وقود يا سلام البت مشيها هادي وفيهو تيه وزهو ماها زي بنات الزمن ديل زي ما قال شاعرنا الجميل الدكتور ود باديي كتوفهن مابقول عكفت سروج لاكن بشوف فوقهن مخالي ومشيهن نقره نقره ما بخلن من اتر واطيات علي المشطوف وعالي وقصّاصهن ينقر بي عصايتو ما بفرق دربهن من بين دريبات القماري وماها زي هريرة هركولة فنق درم مرافقها كأن اخمصها بالشوك منتعل بربك شوف ماها المستخفي وراحلي! المشيهو هادي اكيد طبعو بكون هادي وجلدا ابيض ودقاق وناعم بيضاء باكرها النعيم فساقها بلباقة فادقها واجلها ماها (مجلبطي) بالكريمات لا تعرفها بيضاء والله صفراء و الله العظيم بنات الزمن دي (برق) الواحدة تشوف وجهها ابيض تسلم عليك تلقي ايدينها سمر شوف البهدله دي الوجه ابيض اللدين سمر والرقبة صفراء والكرعين سود وكمان دخلت ثقافة جديدة ودخيله اكل (الساندوتشات) والواحدة ماشة وراكبة الحافلة مابتصبر شوية تاكل داخل المطعم عشان ماتزعج الناس جوه الحافلة تاكل والمكياج سايل علي خشمها التقول علبة الوان ياناس الوان وكمان بعدها تدخين سجائر وعلي فكرة الشيشه دي كمان جابوها من وين البنات تلقاهن يدخّنن فيها ودخاخينهن مولعة تقول محطة قطر ورحم الله شاعرنا الكبير شيخ العرب ود ابوسن لقد تنبأ بافعال بنات الزمن دي
عنز ام شومر الفي ريرة ضامنة خريفا
ما اكلت سندوتش جبنة ومعاها رغيفة
ماشربت سجارا وبيها تمت كيفا
كشكيش الجزالين منو باقية عفيفة
بس الايام دي الرغيف معدووووووووووم وشوفتو بقت غالية بلحيل والدخن عندنا في كردفان من الغلاء بياكلو زول زول عندنا واحد بعد الغلاء الحاصلة دي وتعب بلحيل قال يا جماعة حلف قبل الانقاذ كنا بندي العصيدة الكلاب الحين اولادنا ما شبعوا فيها وهنا اتذكرت نكتت الرباطاب مع المرحوم اللواء الزبير عندما زارهم في ديارهم ومعه صلاح الدين كراروسألهم الزبير قائلا كيف الانقاذ فردوا علية بخفة ظل والله الانقاذ دي متل (تيس) ام عزين الجابوهو يولد الماعز قبل عليها رضعهاو وكمان في خبر اسود الضهب والجن الصادنا نحن السودانيين دي شنو بمناسبة كشكيش الجازلين دي الناس كلها بقت مادية الاخ يتعامل مع اخو بالمادةوالصديق كذلك والخطيبة خلت الكلام المنقنق المعسول الرومانسي الجميل وبقي همها القريشات والله ولدك اذا رسلتو البقالة او الدكان الباقي ما برجعوليك ومابسالك وخاصة جيل الانقاذ مواليد من 1990 الي 2010 النقول الشي دي من المشروع الحضاري والله عدوة الفساد بقت انفلونزا انتقلت من الكبير الي الصغير نرجو الاجابة من اختاصي التربية وعلماء علم الاجتماع نرجع الي الحجوة واللغز ريع ا######## المتماحلي الذي شبه به جلد محبوبتة دي شنة ؟؟ منحرقي*
الديف المو شوقارة وجرت مندرقي
لي ساسيت واليت النقيق يا الشرقي
بطانك ساج وبدانت حشاك منحرقي
وتسلهكت عروسا ربعنت لي المرقي؟
الوادي ااب غديرا حابسو
اديك بتعلو شقاقو وجروفو ويابسو
الليلة اصبحت كاكك وبردلوبك لابسو
علي البي خيط حرير سبل الزمام في حوابسو الشاعر الكبير المتبي ذكر ان محبوبتة لها شنف في رائعتة لجنية ام لوحشية لكن ماذكر الحرير البشبلو بيهو الزمام شوف بعير الكباشي كاكك وبردلوبك يعني استان باي وشوف الابداع في الوصف بطانك ساج وبدانت حشاك منحرقي واسلهكت عروسا.....والله العروس عندنا في بادية الكبابيش بعد الااربعين يوم وتطلع علي اعمامها بتطلع قمر السبعتين ولكم من الود والمحبة وانشاء الله ايامكم ابيض من سنون ام عاج
العبيد الطيب بادية الكبابيش
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
| Quote: يحكى ان زعيم الكبابيش الشيخ محمد علي التوم (المر) |
يا سلااااااام ياخ
شيخ (المر) صديق جدى والد والدى جمعة ود حسب الملقب ب(سكين الجوع)، من اكرم الرجال واعزهم
ورث من والده مع اخوانه ابل ما ليهن حد ولا عد، وتوفى الى رحمة مولاه فى بداية التسعينات،
كان لجدى حصان يسمى (تمساح) وهو من الخيول العربية التى يضرب بها المثل، عندما استمع للوالدة
وهى تحكى لى عن هذا التمساح يتأكد لى انه ليس ابن ذاك القرن بل من خيول الجاهلية الاولى، فهو
لا يشبه خيول زمانه لا فى حجمه ولا حتى صهيله الذى كان يتميز به بين جميع الخيول،ولشدة جموح هذا
الحصان كانت جدتى اسماء ابنة الامير جادالله ود عساله، احد امهر رجال الامام المهدى فى ركوب الخيل
حيث كان يركب ظهر جواده وهو منطلق باقصى سرعة له، كانت المرحومةاسماء تخشى ان يسقط هذا التمساح
جدى (سكين الجوع)، و والدى (ابنها) عندما يمتطيه احدهما، فهو من احر خيول زمانه جامح بطبعة،
سريع فى جريه، عالى القفزة، سرق ذات وكان سارقه ينتظر متعقبيه(الفزع)وهو مربوط حتى يدنون منه،ليقوم
بعدها منطلقا حتى يختفى من الانظار، وهكذا الحال حتى اسخن الحصان مؤخرة الرجل وتركه مربوطا عند احد الجبال
سمع شيخ (المر) بالجواد، وارسل فى طلبه من صديقهعندما حضر احدى مؤتمرات الصلح، وبالتأكيد رجل كشيخ
(المر) لا يرد له طلب، فكان له ما اراد، وارتاحت اسماء بت جاد الله من الحصان الذى لطالما تمنت له
تلك اللحظة... الحصان مات معيونا عند اهلنا الكبابيش.
Quote: ود ابل العكاكيم الضراعو مشنق
طيراحكّم الربدة وقعد بتخنّق
الليله آالرقل قلب المشارف رنّق
علي قصيبة الدهاريب الصبيبو نقنّق |
بصراحة يستاهل جملو من هنا.. لكين شيخ المر كترها... والزول قبل التحدى
Quote: بيضاء علينا كيف سنون ام عاج
وكيف تبر الضحي وقمر العشي الوجاج
خيطا تم حسابو وواقع النسّاج
وقطنا فوق فروعو مفقّع النباج |
يا سلام، يا للروعة....
واترككم مع عمنا احمد عباس المورتانى حتى اعود بمزاج لهذا البوست وذكرياته فى بادية الكبابيش
الرابط
http://www.youtube.com/watch?v=GwnEDj4Zzs8[/B]
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: محمد المختار الزيادى)
|
الأخ علي الكرار هاشم
السلام ورحمة الله
بوادى كردفان هى منابت الجمال ومواطنه الرخيه
ومواطن الرجال والكرم والذكاء الفطرى لا بل
هى من أثرى مناطق التراث الشعبى ومن أغنى بقاع
السودان ثورة بإحتياطيها العالى بالإبل
وإن جذبتك فقد فعلت فينا أكثر من ذلـك من
قبل فالشكر لك.
منصور
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
الأخ محمد المختار الزيادى
سلام قولا من رب رحيم) وسلام من الله عليك
يا الزيدى أنت ليس بمشحود على أت تساهم فى هذا البوست
الذى يأتيك بأطلالك وكل أسباب تداعى ذكرياتك فى فجر
طفولتك وحين إخضر فيك غسن شبابك الباكر فتداعى
ما تشاء من إنفعالات بتلك البوادى وآتنا لخبز منها
وآتنا بسمن وقارص وآتنا بكد إبلها وكيد جمالها,
ولك السلام
منصور
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
الحمد لله إن تلاقت حوافر خيولنا عند تلك البوادى الساحره
أخى بله محمد الفاضل والحمد لله أن كلفنا عشقها وتملكنا حبها
وحب من فيها من ظباء البر والفرقان وأشجانا لحون قماريها
وكرفنا عبق محريبها وتمامها وشيحها والخزام تلك التى كلفها
العباسى وطرب للحون قماريها وأهداها من لحنه ببنت الضاد
بعد أن أهدته لحونا بترداد فأبدع سيمفونيته مليط التى إن
ذاع صيتها وترجمت لنالت ما لم تنله يد فيا مرحى ومرحك بها
تلك البوادى ديار ريح ينادى الصبا.
ولك السلام والشكر
منصور
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
سلام خندريس الحين طريت زولا جميل بلحيل وطاعم وعزيز خلاس الاخ الاديب الشاعر الشيخ ابراهيم الدلال الشنقيطي نرجو ان تتعرفوا عليه عن قرب فهو علي الرغم من تعليمه الجامعي وتخصصه في العربية فهو من الذين عاصروا الدكتور عبدالله الطيب ومن تلاميذ و اصدقاء شيخ الشعراء عبدالله الشيخ البشيروكذلك هو عصارة شيوخ الشناقيط الذين اكرموا السودان بعلومهم الغزيرةفهو نهل العلم منهم ومن والده الشيخ العلامة محمد محمود وكذلك هو ابن بادية الكبابيش يعني بلغة اهل الوست (مربوطة مكربة)
لونك خندريس الدن*
ووصفك حير الشعراء وجرارق الفن
ياخلبوسة الوادي اب دباسا طن
صعيب الزكري لو طارق خيالك عن
سوارك فوق معاصمك رن
وشبهك في الدحاميس بي البياحات قن
عاشقك دوبا ليك وحن
وشعرك سدفت الليل اب ظلاما جن
لو يجمعنا لوكان في الخيالات كن
وطنبور شوقنا بي مر المواجيد ان
قارحك سوي ليهو مصن
وسربك واقع النقعة ونهارك صن
وكمان يا استاذ الشيخ محمد سعيد نورالدايم الطيبي وهوشاعرمجيدوصديق للدلال بقول :
هبن لين الرشايم فوق عقابات صيفو
ونوار سمرو صراهو الدعاش في طريفو
الناس الكبار حضروا الزمان بي عريفو
ما قالولنا لاقاهن جدي بي شنيفو
واذا نزار قباني قال زيديني عنفا زيديني فيا المصباح زيدوني دروشتا زيدوني
ولكم المحبة
العبيد الطيب السعودية
بادية الكبابيش
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
الاخ الاستاذ الاديب منصور المفتاح لك الود بعد ان ارسلت لك رائعة الرائع الشخ ابراهيم الدلال وانا اصتفح ارشيف سودانيز2003 وجدت قد نسبت هذة القصيدة لبخيت عبدالمولي هذا خطأ وتقول وهذة القصيدة للاخ الدلال وانا ابن بادية الكبابيش واعرف المرحوم بخيت عبد المولي واحفظ اكثر شعره فهو شاعر وصوته جميل ولكن هذة من روائع ونوادر ودررالدلال واهل مكة ادري بشعابها الاخ الشاعر المرحوم بخيت شاعر دوبيت فحل ولكنه امي وهذة الدرة الرائعة عصيه عليه ولا يقدر عليها الا الشيخ الدلال او صديقه السيخ محمد شريف الطيبي والاخت التي نشرت القصيدة وترمز لنفسها ببنتي زولا في 2003 جزاها الله خيرا لكن يلزمها التمحبص والتدقيق في المصادر وحتي شرحها وتعليقها صاحبتة بعض الاخطاء الفادحة مثلا شرحت الدحاميس بابن الغزال الكلام دي جبتيهو من وين الدحاميس كلمة بالدراجة الشنقيطيةوتعني المغارب وانا اجتمعت بالشناقيط بل ودرست في مدرستهم اكثر من اربع سنوات واحببتهم جدا ونهلت من علومهم الغزيرة اديبا منصور نرجو توضيح ذلك في سودانيز مع نشر القصيدة
ولكم المودة العبيد الطيب
بادية الكبابيش
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
مسدار القمــــــــــّرية
كان أستاذاً لللغةِ الإنجليزية بمدرسة حَمرَة الوِز حين كانت أهم الروافد المغذية لطيبة الذكر خور طقت، وهو إبن ذاك الزعيم الشهير و الجالس على كرسي السلطة والثروة لقبيلة الكبابيش ، شاعرنا على الشيخ محمد على التوم( ود المُــر) لم يكن طالب ثروة وسلطه إنما طالب علم وجمال ، وحتى عهدى القريب به لم تتغير أشياؤه فأول ما يسأل عنه مجلة أو كتاب ، كان مثالاً لدماثة الخلق والتهذيب والتواضع ، لم يُصعِّر خدّه للناس كما يفعل البعض ، إبتدع هو وأصدقاؤه المعلمين مدرسة جديدة فى شعر الدوبيت أدخلو فيها مفردات ومعانيَ جديده أصبح رائدها بلا منازع ، حين وقع بين يدىَّ أول كاسيت به تسجيل صوتى له تمنيت لو أنه أكثر من رباعياته الغزلية تلك فقد سجَّله لبعض خاصته ومنهم أمير الكبابيش الحالى صديقنا التوم حسن التوم ولأن الأخير صديق لأخي الأكبر أيضاَ وصنى التسجيل وما زلت أحفظ كل ما قاله وكانت تلك بداية أعجابي بشعره خاصةً ما قاله في تلك الفتاة التي أسموها ( عيون الصيد) .
أنا دايماً بطوف بى دياركْ
وإنتي ما بتحنّــى يا عيون الغزاله خباركْ؟
عشان ياشتلة الباوقه الشبك نوّارك
مغرم بيكى والقلب إنحرق بى نارك
زى ما ماتوا قيس ليلى وجميل بى الريد
أنا كيفهن عشقتك َياعيون الصيد
حواجبك دُعجْ وعـَيّانِك سوادها شديد
صديرك فيهو رُمان الجنينه نهيد
على الشيخ إنشغل بى ريدك
ورب العزه صوّر بى براعه خديدك
عنقاً باهى زى قـَرْنْ العِجيله نْهيدِكْ
أميرةْ جيل زمانك يا البنيَّه وحيدك
طبيعةْ حالهُن اهلك يا أم حَدَقْ رحاَّله
عرب بادية وبجازو وفى الخريف شوقاره
إتى عيون ديفة الفيهن حـَقُو وشُمّاره
ولاّ قصيبة الباوقه الشَبَكْ نوارا
خزينة الما بتفارق مكتبو السمّاعة
بكيرة الوسمو حَلقـَه يسار وإمينْ طُـبّـاعة
عنقك زى قزازة الببسى والعين ساعة
ونهدك قرن عجيلة سالم الرضاعة
كـِفيلْ النـّشُّلو السَياسْ
عيون الفى الهليفْ راقد مِغريِدِ وحاسْ
أنا الكاتلنى حـُبك يا أميرةْ الناس
وآه يا العرطمك زى قطعة الأناناس
عيونك زى عيون الصيد
حديثك أحلى من عزف الموسيقى بعيد
مهما يكون جفاك يا الما بتحن وعنيد
لا والله غيرك لابجب لابريد
شديرة الهُنْبُكْ المِنلَبكِى
عيون الصيد مـِتيليبَةْ عُجول السـَبكى
ياصْهيبَة بـِكارْ الدامر المِْنحَبكِى
النعناع على بليدكُنْ بـِحـِنْ وأنـَى بـَبْكِى
والنعناع هو جمل الشاعر
وله روائع خالدة مع جِِمالِه خاصةَ الغرنوق وود كسلا ( الكسلاوى)
وأدهشنى حواره مع جمله الغرنوق يوم أن غادرا ديارها ليبتدر أستاذنا المجادعة بسؤال الغرنوق :
ياقلبى المشارف لى البريريب روقْ
أصلو الحظ معاكسك شان بقيتلو عشوق
زولى المافى تمثيل ليهو فى مخلوق
قـَبــُلْ ما تواعدو عـَفــَّشْ قـمتَ يا الغرنوق؟
ليرد الغرنوق :
البكا سيبو ياسيدى النويح ما بجيبْ
قـِصِّيره السفره بتـْتــِّم والمسافه قريب
زولاًً فمــو زى عنب الجنينه رطيب
بنرجع ليهو والحارس الخــِزينه بغيب.
عذرا على التصرف، لايمكننى تتمة الحوار حتى يأذن رغم أن هذه الروائع أصبحت ملكاَ للآخرين حين خرجت.
مع وعد بالكتابة عن مرثيته لود كسلا أو بالأحرى مناحتة حين أهداه الى صديقة محى الدين ابوصفيطة أبن الإسرة الليبية الشهيرة بتصدير الإبل بالفاشر والذى أصرَّ بدفع قيمة خرافيه لإمتلاك ود كسلا ليصر على الشيحإهدائه مجاناً ( ثم كبَّ الجرسة )
محى الدين حات عشاك وجناكا
منو البلسك على ود أُم وريل وهداكا
سريع الخـَب وطايع ولى الركوب بتَّتاكا
وما سِبـْتَا القبايل بى وراكْ تتباكا
الكسلاوى داك ماببيعو
طامس قلبى بى بارد الخبيب ونجيعو
إضليم حمرا كولا الفى خلاهووريعو
يوم ساقوهو لندن زاتها حقــّو تزيعو
المسدار طويل وجميل وصادق وقد ختمه برباعية وجهها إلىَّ زاعماً أن مرسلها هو ود كسلا بعد وصوله الفاشر :
كم لوليتَ بيك الكورْ لمِن غنيت
وكم هاجمت بيكْ الصنعتا الكـَبريت
ناس حنفى البعرفو روايع الدوبيت
قول ليهن خلاص من دار على إتعديت
يا للجَمال ويا للجُِمال هاردلك أستاذنا نحن ننتمى لهذا النظــــم :
قصيبة المرنع السمحه ومـنضفه بُورتك
مهيرة المجقنى الغالية وعزيزه مَهورتك
كان شفتينى ياديفة الخلا البى شورتك
افتح شنطتى ابكى وأغازل صورتك
ليرد عليه زميله محمد طريبيش:
فى عمر الزهور لاكين كمان الميزه
لجناء بتنطق ال R بى طريقه لذيذه
الفى أندادا قالو بتوجوها عزيزه
لو ( دافنشى ) شافك ما رسم موناليزا
لنغنى بعدهم:
سنبن زارع سنابلك والسحاب متكوّن
ولامتين ارجى وابلك لى الصحارى يلوّن
دام حارق قنابلك فى الفؤاد بتدوّن
براى ياتو البقابلك وفى قصايدو بدوّن؟
طلع وجه أم سماح شقّا الغمايم فاجْ
رجع عشقاً قديم لى نمّـــتى البى مزاج
أعزّل فى الكلام وأعمل نجوم فى تاج
أجمّل بيهو مين والزوله ما بتحتاج؟
قول لى ناس على الشيخ والبحبو غناى
فاقد الليله سواقة النجوم فى سماى
من كتبت تواريخ لى الجمال جواى
بقيت شعر الغزل بعرف روايعو براى
حسِّب كل النجوم طرفى الحزين ما لاقا
راجع لى حسير قال فاقدك آ السواقة
عقد نادر قصيد ناظم حديثو دقاقه
عربون عشقى ليك تهديهو لى الزواقة
الخلانى ارجع لى ليلى غرامك
قوامك وإحتشامك وإبتسامك وشامك
يا ست ريدى با الزعلك بحــَلَّى كلامك
انْظُــرى فى قضيتى الطوَّلتْ قدامك
وهكذا غزل في بلد أولوية الشعر فيه الحرب والقتل ، فبرغم حسيته أحياناً إلا أنه غاية فى الروعة .
ليطالعنا العاطلون عن الفهم بفرية أن هذه اللغة لا تشبه البادية وغريبة على الناس وعصية على الفهم ، عساك ما فهمت أيها الواقف في وجه تيار التطور والحداثة ، فلإنْ وقف الشعر في عهد ولغة امرؤ القيس لما سمعنا بالمتنبئ وأبا نواس وأنتهينا بمحمود درويش ومريد البرغوثى وغيرهم .
أعجبنى ماقاله الأخير فى أحدى اللقاءات أن النقاد قومُ بائسون وقولهم أن الناقد غالباً ما يكون شاعر فاشل دعنا من هذا وأعتذر عن هذه الحدة مع ( فاقعى المرارة) هؤلاء البائسون حقاً لأنهم ببساطة نجحوا فى إسكات هؤلاء المبدعين أو كادوا.
كنت أنوى الكتابة عن الغزل لإنه الأصدق والأجمل لولا أن الموضوع مسدار القمرية.
فحين الشاعره ( أم ضعينه دياب) إختفاء القمرى من البئر فى صيف العام 84 المسمى بعام الجفاف ( سنة النشاف) أسوة بإبل والدها أخذت تغنى مخاطبة صديقتها :
القمريه با أم وضيب جابت كلا عجيب
قالت مباريه الضيب وبتحاكى فى الإنقيب
( الوضيب هو الشعر)
(والضيب هو شقيقها دياب)
قمرية الرهـــّاد
معَ أسياد أبو عقّاد
واواى المابشيل زاد
يشق تمرة الفؤاد
( الما بشيل زاد هو الإنقيب وزاده هو ما بضرع ناقته من حليب )
ولام ضعينة دياب شِعر جميل خاصةَ حين تمدح خالها المر
بحر خالى مو ترعه
مشطو بشيل فى السرعه
المر حنضل الجــُرعة
سوَّى بلودكم مُرعى
وحين بكته وافتقدته
من مات المستعد
قردود ظهر لى الند
الأرض والشجر بتحد
فاقدات خليفة الجد
وقردود ضابط شرطه بام كدَّاده كان يعترض الكبابيش كثيرا ويصادر أسلحتهم :
وتقول مخاطبة الناقة ومشيرة لما يفوم به قردود من مصادرة .
إتشوَّمتى وحالك كُـــر
ومات العليكى بصُـــر ( بصر وجهه غضباً )
أقيش جُلتى وفاقده المــُر
سلاحك مصادر ضُر
وهذا دليل على ثورية ونضال المرأة الكباشية فهى تدخل بقوة فى صنع الأحداث والسياسة وقد قرأت مرة أن المرأة الكباشية كانت من أول المحرضين ضد الإستعمار الإنجليزى وذلك حين أصر المفتش الإنجليزى لحامية كتم مور والذى سماه الأديب حسن نجيله بطاغية كتم هذا المفتش كان يمنع الناس من مراعى الجزو والتى توجد بإقليم دارفور تنفيذا لسياسة الفصل العنصرى مما حرم الإبل من أجود النباتات ممثلة فى نبات الدَرْما لتصدر الحكامة أمراً للرجال أن يرعو ( قجيجة مور) أن لم يجدوا عشبة الدرمة
الدرما أن مالقيتوها
قجيجة مور أرعوها
وهذه أم ضعينة (ظعينة) تحرض شاعرنا على الشيح ليقول :
وين مديـــــتى يا القمرية؟ قالت كنت ناجعه مع السراتها قويَّه
لنقبنا الصعيد دار موسى والماهريه والإنقيب بواوى و عـِشِّى سرجْ وحوَّيـه
قمرية الرهيد أم طــــــوق لقيتها الليله فى روب الفريعات فوق
سألتها وين مشيتى يا عديمة الزوق ؟ قالت شلت دار موسى وبريت النوق
ما تلوّمنـــى يا الغنّـــــاى كان بى هوّى ما بتعدى من ها خلاى
الداراصبحت جايحه وبريت أم راى ونجعت معاها كان أتعلّم الواوى
الدار أصبحت جايحه وملوك مو فيها وأُم زورْ علقت ناجعه ورَزَمْ حاشيها
قمتَ معاها بارياها ومسكتِ التيها فى دّو الهشاب واويتْ معا راعيها
لى دار المساليت مـَدّتْ وَردتْ بابنوسه وفى الحفاير دقـّّـت
أنى مبارياها وين ما علّقت وإتعدتْ ومن واواى أناقيبها الكبيده إنشقّت
دمرتَ معاها فى ( الخزّانْ) مشينا بلود أهلْها بـِطْيِّعوأ التيرانْ
حوارك طـَنْ وسيدك علّـَق أم نيشان بتين با أم قُــلّه نرجَع لى العـَرب عُقبان
قـَبُلْ ما قلتْ أقومْ كـَلّمْتَها أم كـُـزّامه ماشين الصعيد قُتْ ليها أنى وشرّامه
ما تتوَصوا عـُقْبِى معاكُن آ الحكَّامه خليتَ البلومه وبِتْ أعَمِّى حـَمامه
خليت البلومه والقديل والحـُوَّه نجعتَ مع بناتْ شـَرمه وسعاية القُوّه
دخلنا بلد زغاوه وناس جديرى وكـُوّه ورعينا عضاوةْ القوزْ والدواخلْ الجُوّه
الخزّان والأضيه وناس ( بـَياضْ) ولقاوه دمرنا هناك أنى وجَقله وِرعينا عضاوه
فــرّتْ ودجـَّت أم زورْ فى الهشاب تِتحاوى وأنا قوقيتا والإنقيب حزمها وواوى
أنى وجبّادةْ الشايل البــَرَمْ عـُلّـيفو نجعنا أحلالي من بلد البـِضوِّى شنيفو
قَعوىْ سـَقَّ اى ( أبودَكـَنه ) المِحمــِّر قـيفو يسعلنى الله واواى اللنقَّبْ كيفو
بحر جانقى البعيد شرمه ام صرار مدتلو سيدها تملّى هو ناس الجُبال بتكتلو
نجعت معاها هبّارة الممنّع فتلو الحمد لى الله أنعم سافلا ورجعتلو
لقت قفـــل ( المخرّق) وفرّت وسويت عشّى وام زور لى الحوير درّت
من دار الصعيد أنى والسراتها أنزرّت ربنا جابنا قبّال السموم ما حرّت
طلبت (حمره كولا) ( وهَرْما ) دارت تلوى فى العاطفه وسروح الدرمه
ما يقدر بطير عكس الهبوب ياشرمه معاكى سلامه وانا منك بقيت منكرمه *
*منكرمة : أى متأخرة
وهذا ما دعانى لأرسل من أم درمان مستفسراَ قمرية بلدنا عن رحلتها مع اللبّاعة :
قمرية يلدنا الغايبه كيف أخبارك؟ وكتين البلد جاحت نجعتى خبارك؟
وكت باريتى جقله أم راى وسبتى ديارك كدى ورينى كيفن قلتى فى مسدارك؟
سكتت طولا قالت لىَّ مالى ومالكْ زمنك كلُّو لاكْ طارينى لا فىْ بالك
معليش ياخى ما بقدر بَجاوبو سؤالك أمِش وأسألْ (على الشيخ) جا وسأل قُبَّالكْ
قالت لى بعد تحنيس واخوى واخوك سنة عمنوّل الفاتت تقع فى عدوك
بعد جاحت بلدنا ومافى لينا ملوك انا وهبّاره قالولنا الصعيد مبروك
ونجعنا حلالى من بلد النعامه الربدى وخلينا المفرّرع ديسها يادوب مبدى
أنى ولبّاعه فى بلداً بعيدةً جبدى وواواى اللباسو فريده شقّا الكبدى
كان بى هوّى يا الغنّاى وكان بى ريدى ما بتعدا من بلد النعام والصيدى
ما وصونى قمتا معاها جقله وحيدى وبشق الكبده واواى اللباسو فريدى
كان بتصدقد هو كلامى كل صبحاً جديد هباره قالجه حرامى
وواوى الأناقيب بنسمع قدامى يسالنى الله كيف زمبارة الغنّامى
وكت جاحت بلدنا وفى الحقيقة شفقنا أخدنا أيام و من دار موشى شلنا رزقنا
لاجوع لاعطش لاطالقونا سرقنا وكضب غنّامى كان قال فوق لقاوه لحقنا
لى دار الصعيد أنا والأهلها حدارنا نجعنا حلاى من بلد أم حواجباً قارنه
كان ماها البلد جبدى وبعيد مشوارنا هاداك البريق الشال بصب فى دارنا
قال ليها الدليل أنى فى الصعيد سرّحتك وفى دار العداوه المجرمين سلّحتك
أدينى البشاره الليله كان فرحتك دارنا استنعمت يا ام قلّه بختى وبختك
وبعد ما قمنا صادين لى العرب والدور آح يا راحه من بلد الركوبهن تور
عقدو الشوره ناسك وعلّقو الجيم فور وغصباً عنو قردود* جينا بى دار فور
ولقت قفل المخرّق والسعات الشابك ويادار الصعيد ارتحنا من قلّابك*
سويت عشّى أرعى ودجّــى بى معرابك قبّال السموم مولانا جابنى وجابك
طلبت حمره كولا وهرهه والقداما بلد مافيها عيل بقر الوحش وأم شامه
أنى عكس الهبوب مابمشى يا شرّامه دربى ودربك أتفرقن معاكى سلامه
* قردود ضابط شرطة بدارفور كان معادياً للكبابيش ويمنعهم المرعى ويصادر اسلحتهم ,
* ما وصلنى هو مسدار رحلة الصعيد وحتى العوده للبلد ومسدار السافل ألفه أستاذنا بعد 4 أشهرمن الأول ولم أجاريه .
مسدار القمرية ( رحلة الجزو ـ السافل) على الشيخ
والرواية بلسان القمرية التى قررت التخلف والرجوع الى المزارع ( اللقّاد)
أهلك درَّبو الجـُبخانى دايره تْنَاطرى بلد الدَرْمًه والسَعدانى
مو بى خاطرى أفارقكْ يا أم علوياً بانى رب العــزّه يجمع بى الشمل عقبانى
ريسك قال ضروعك زاد ولفح أم تاج على ود ألبل الشرّاد
ياعانس الرشيد يا سمحة المُمداد فى وداعة الكريم وأنى راجعه لى اللقّّاد
خلاس إتوجهت سافلها وماتسوقو إلا الحلوتو مسبلها
حربى وجندى والجيم فى الشعب تاكلها ودامج قلبو كان جات حارتك بدبلها
رحلت وأخرتْ ناس ســِلّى بى ( دْبَابْ القـَفل) جات يازَعـَم مِنْهـَلِّى
قطعتْ (وادى مجرور) الحنينها بسَلِّى و عندْ ( أُمّاتْ لَعايتْ) تـَقّلوها تدلّــى
كتالة كليب وابو زيد ناقة العــزّه جيابت الطرب والريد
ما بتبارى كان سوِّتْ رحيل الكـِيدْ ومن ناس ( عنزْ وتيسْ) نزلت (بحير الصيد)
تقلت فى( الزِرَد) قول ياعـَفو وهبابْ وكونيبها أنعرشْ وَقفتْ سراتها جْراب
يا الباعجك بلالى وحميتك نوراب أهلك لفـُّو قانصين قالوا لى أبو حراب
رعاية السمر والشاو رمايةْ الشِبَكْ قالت عَضى ( كويعْ باوْ)
أرح ياسيدى كان داير عفو الأجزاو ربّاى لي المـَربَّعْ وبسمّن الحشَّاو
على ناس( العـِريجه) حَدرتى أهلك صابرو وبقى بالك المرمتّى
ما بقّيتى فى بكان العضاوة سدرتى وحلاك الله من وقعان زراعة برتى
مدت كم شهر فى السافل البعنو ونمت الصيف حكم أصلو الحكاية شنو؟
رويان دونكى ود ريد وقول غفيره منو؟ (آدم ود سعيد ) و(بريمه ود تجّو)
وين يا ناقه وين ياناقه جيداّ جيتى لى بلود البكجرو الطاقه
يارعّاية الجرح الخشينو دقاقه من فارقتك أنا لى ربعتك مش########
(الحاضه) ( وغريده)( وخاطره) ( والكنتوش) بيهن طفتى يا ناقة الرباعه ام شوش
حرشك كلو جيم فور أوعى من خرطوش (ود ريد)* حاتى ماتسقى أم عبل بى قروش
• مابين الأقواس اسماء أماكن .
• ود ريد هو محمد ريد محمد توم كاتب دونكى أم سنطه .
حنفى ابريل 2009
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
جمال فى القول وجمال فى الوصف وجمال فى الموصوف وجمال فى ألبل وفى ركوبهن وفى سرحتهن
وفى حليبهن وقارصهن وفى عضمهن وفى لحمهن وفى كبادهن جمال من فوقه جمال ومن تحته
جمال وعن يماينه جمال وعن شمايله جمال الله يا حنفى والله من حنفيتك تقول لى عد
لا بل قل لهم عدوا أى أمسكوا العدد وأمسكوا الخشب.
منصور
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
التويه يا حانفى جاتنى ومانى خابر سيدها وصبرت عليها وعقبان شلختها ووسمتها
بوسمى وأضفت إليه الجزء الركيك فيها فى المؤخره
أريتها الناقه لا تنكس
ولا فى مراحها يوم تندس
جدية العقده خاتمه تبس
مبحر فوقها صابنى دبس
بدور لى حكيم إشوف لى مس
بدور لى صليح يقول لى عدس
وهى طويله شاق حفظها شيقة موسيقاها عميقة دالة معانيها
لك الود والسلام
منصور
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: محمد المختار الزيادى)
|
البكره الجكا راعيها
العقده الجضه قمريها
بدق تويه وأتاتيها
أريت الناقه لا تنكس
تقع فوق رقبتا وتنقص
العمه الهوا اتنفس
والطاقى الحدى قنطس
والسروال للتراب بلحس
والمركوب قطع مردس
والسكين دى عودها بقس
جاى تلحس وجاى تلحس
وداخل فى الضلع تلبس
والشملوخ أعمى وأطرش
الكوب الفوق كراسيها
إن مت عفريتى بتجيها
سلام تسلم حمامة البر
أم طوق هسكة عجول الكر
سموها القايده تنفل
على نقش الدهب أصفر
كربا تنتنو مشدر
وفى دكانو ما شاف حر
أم جذرا بالمداين فر
ركب تكسى القزاز أخدر
وحلق فوق السراها كمر
أم شلخا كيف مجارى السيل
أم عينا كيف نجوم الليل
ويا يابى الفكى كوكجير
تقيف لى بت سعيد أم خير
خدرة الضى التروس مرسى
والفجر سيدو قام يسقى
وحات ربى وحات سيدى
ديسها عبرتو بى إيدى
تلات أشبار وزايد شى
أريت الناقه بالغده
تقع فوق إيدها تتمدا
عقب مردوخه لا أنشد
أحوم بالثوره وأمبده
وأشيل المتبخ أتغدا
وأشيل عكازى واتفضى
وأكوس لى أم حاجب الندا
كس الناقه لا تنكس
تقع فوق إيدها تتقصقص
نحن نقيف مخمس بس
داب الكسوه والملبس
العمه الهواء إتنفس
والطاقى الحدى كرس
والجبه أم محيدر بس
والسروال للتراب بلحس
والتوب بى تنيتو شال القش
والسكين دى عودها بقس
جاى تلحس وجاى تلحس
وداخل فى الضلوع تلبس
والصوط ضنيب العجيل القص
أريتها الناقه لا تنكس
ولا فى مراحها يوم تندس
جدية العقده خاتمه تبس
مبحر فوقها صابنى دبس
بدور لى حكيم إشوف لى مس
بدور لى صليح يقول لى عدس
أريتها الناقه لا تنكس
تقع فوق رقبتا وتنقص
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
اخي حنفي دائماً نحن بنسعد باشعارك الحلوه التي ترسلها لنا والتي أجدها على صفحه منبر سودانيز اون لاين وايضا أشعار الاخوه محمد احمد حاج الطيب وانا بحييه كتير وبشكره على الأبيات الرائعه التي وجدتها مع قيصبه المرنع بحييك يا ابو البرعى كما احي وعزيزي عبيد المقدم وبشكره كتير وصراحه يا عبيد قصه البري مع شيخ المر كانت رائعه وانت صورت لي حاله البري بكاميرا الديجتال و هو حزين علي جملو المربوط والذي كان عونا له في الوصول الي المحبوبه وبصراحه الأبيات التي سمعتها من شاعرنا حنفي واخوتي ابو البورعي وعبيد المقدم حركت في وتر الدوبيت وذكرتني ابيات سبق ان اجريت عليها دراستي الانتقاديه المقارنه في الشعر الجاهلي والدوبيت في بادية الكابيش والبطانه وهذه الأبيات كانت مجادعه بين مجموعه من شعرء البطانه وهي أيضاً تمجيدا للجمل وتأصيل له وحثه على سرعت الوصول لديار الحبيب و اليكم هذه المجادعات التي أتمني من شاعرنا وأستاذنا حنفي والأخوة جميعاً الحكم في من الفائز من بين هؤلاء الشعراء؟
١-الصادق ود امنه :- كتح الصافي علاك يا السنابك رك
أبوك فارط الجري القاد الروينه وجك
علي ست الصبا الدكانها قاطع اليك
رايق وفكك الهسكه ابد حديداً شك *الصافي الفتيريته *الهسكه صريمة حديد تربط للجمل العاصي ٢-ود عمر سليمان :-
المتل أماتو نجاً من دقمه قاطع الشك
جدو اللربد السابق خيول المك
الرمى الحجير من النزيل الفك بعيد يا عربد الشرق المجارب السك
*دقمه صياد معروف
٣- العاقب
يا كول المجازات الخريفهن رك قبال تبقى نايب للوقر جرك حشيم المنطق المنو القميض انعك. اهجمو اليله يا السمع الميسلو مدك ٤- ود حسب ربه:- يا صايع المرابطين للعويله ترك نوايب جدك السوسيو عليها عرك عاشقي منزه الحظ العليهو الرك بعيد يا غايس البرق اب هطيلاً تك
٥-ود شوراني:-اب صلعه القطابي الطار بعد ما ركاسرع منو كول هرع البروق لا شك علي دكك الجنيبه الراجيه مك من مكسوى جري الهوى القالع بعد ينفك * هرع البروق اسم لجمل الشاعر ود شوراني ٦-ود نايل :- فروجا عنالوا مقيل طريلو مدك اسرع منو يالعنافي زوعا وفك
٧- كرار :.. بعد ما اتباعض الجماله سوطي جبك
جريك عن ومسارعك برق ونايبك كك
عند دور ام مراتا مني أبت تنفك هجمت كاتم متل راكض الحباره برك
إخوتي لكم الشكر والتقدير
عيسى احمد محمد مضوي
دبي الامارت العربيه المتحده
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
لاخ الحبيب عيسي لك المحبة مالك هجت الشجون وزكرتنا اهلنا اليادية و الحين لعب الفار فوق عبنا و ووزي ما قالت البت السمحة فوق اخونا شيخ اللندرابة بلل التوم التلّل تحت الكتري * وخايفالك الفكري * نمن جبت الزكري* لعب الفار فوق حكري* وزي ما قال المبدع حسن دياب عربان عبلة نزلو الدو جمالهن دلّت* ونيران عبلة فوق قلب المتيّم تلّت* قصة ريدنا قولو اتعقدت مان انحلّت* وآخر طلقة من هدف البريريب جلّت وبالمناسبة ربنا اكرمني ان اعمل مدرسا مع هؤلاء العرب الجميلين 13 عاما مما مكنني ان احفظ كثيرا من اشعارهم ومناسباتها وبعدين ياخوي بعد الشيخ المر ما اعطي البري بعيره التفت الشيخ الي ابن عمه وصديق عمره حمد ودلولاو فقال الشيخ :- تفاح دنقلا البلغ النضاج فوق اكلو* طامس واحدين ضوقو وعجايب شكلو* همهاد ديسو فوق نهادو مشّربكلو* واني عارفو ببهدل الكاشم نديدو وضحكلو* وهنا يقصد البري فرد عليه ود لولاو قائلا:- ليمون سودري الفوقو السواري اترادن* الني ضاربو النسّام فروعو اتقادن* ديفت الطاردن وادي الفتيق ما عادن** وآح من جمرت الخطواتو ما بنصادن* عليك الله شوف ابداع مشايخ العرب ديل همهاد ديسو واح من جمرت الخطواتو دي ياعيسي ما بنقدر نشرحها الا نتزوقها ونحسها ونفهمها بعقلنا الباطني وبالرجوع الي شعراء اليطانة وفي المجادعة التي بدأها ودامنه وهو متفرد جدا كتح الصافي علاك يا السنابك رك تشبيه بليغ يا السنابك رك والله ود امنه دي سحار وعمر ود سليمان ابدع في جدو اللربد السابق خيول المك ماها خيول عريب ساكت والعاقب اتفرد في السمع المسيلو مدك السمع من اسرع الحيوانات الي مسافات طويله وود حسب ابدع في بعيد يا غايس البرق اب هطيلا تك ودي ياعيسي شوف تصويرها سبه جملو بي السارية اولا تشوف البرق ثم تسمع الرعد ثم يهطل المطر ودي ابلغ بان بعيره جمل مسافات طويله اما ود شوراني وانا اعتيره امبراطور الدوبيت في البطانه فهو مدرسة متفردة جدا اب صلعة القطاب وهو من اقوي واسرع الصغور واسرع منو كول هرع البروق يا الله وعلي دكك الجنينة الراجية مك فوق مك وسوس جري الهوي القالع بعد ما انفك اما كرار مبدع لكن بدايتو ما عجبتني بعد ما اتباعض الجماله سوطي جبك العنافي والجمل الحر مابسوقو بالسوط لكن اخره جميل هجم كاتم متل راكض الحباره برك وختاما هاك واحدة فريدة لاحد الشعراء الليله الصعيد امس بروقو بوجن* وشال المزني فوق سحبو الكبار ما بفجّن* اساع ناس عاشه ديفت البي البياييح دجّن* قاعدات بره فوق تنية بعض بتحجّن
ولكم من المدودة
العبيد الطيب السعودية
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
الاخ الحبيب عيسي الاديب منصور الدكتور صديق الاخ الزيادي الدكتور عبدالله الاديب علي هاشم الاخ بله الجميل حنفي الخال صديق الشيخ وكل ناس سودانيز اون لاين لكم المودة الشيخ محمد سعيد نورالدايم وهو مدرسة دوبيت متفردة بقول:-( تيس قنة الصي المتاتن سرقو* وقصدو يهاجم المن المدامر مرقو* ريل اب نادم القلب بي النواضر حرقو* جبينو وصبري والنوم من عيوني اندرقو* )لله درك ياشيخ المتاتن سرقو رقل الجمل ودائما شعراء الدوبيت يرمزون للجمل بالتيس المن المدامر مرقو يعني الوقت شوقارة واول الخريف دعاش+ همبريب+ريم +الروائح الاخري وانت بتعرفها ياعيسي (الكبريت) لكن آه بينك وبنيها الخليج وبيني وبينها ها البحرالكبييير متسادرريل ابنادم والله ريل لكن شوف جبينو يعني شوفتو وصبري والنوم من عيوني اندرقوالثلاثة فرقهن مؤلم لكن فراق شوفتو وطيت جمرة ورحم الله جده الشيخ الشاعر محمد سعيد العباسي وان كان شاعر ا مجيد بالفصحي فهو ايضا شاعر دوبيت مجيد بيقول ( الوادي الغزير شقلو وغديرو مسرّف* ياريت ان قبيل بيهو الزمان ما عرّف* الضيب العلي راس القلع بتكرّف* رزم واتشابا لي ليم الغروب بتشرّف* )الغروب يعني الغرب ديارنا ومرتع صبانا ياعيسي حيث يقول العباسي يابرق طالع من ربي الحمراء وزهرتها اسقي المناشط قيداقا فقيداقا الي ان يقول ومن اذا سمعوا نحونا خبر والليل داج اقاموا الليل ايراقا لله درّك يا سليل الدوحة الطيبية الي ان يقول استعفر الله لي شوق يجدّده زكر الصبا والمغاني اي تجيد* ان زرت حيا طافت بي ولائده يفديني فعل مودود بمودود * وكم برزنا الي لقيايا في مرح وكم ثنينا الي نجوايا من جيد- وهنا اتزكرت قول المبدع حسن دياب( نشّف ريقي هم البدري لي ابّادرن* بردن في الغدير متخفّيات وابسادرن* بخاطرن بي رويحاتن بجني يخابرن* بلولحن لي رقيباتن بعد مايقادرن *) (اسّاع ناس عاشه ديفت البي الصناقير دجّن* قاعدات بره فوق تنية بعض بتحجّن ) ليردعلي الشاعر الشيخ العباسي صديقه الشيخ حاج المهدي الشيخ الكباشي ( جبّال العريفات والقليع اب شاو* ما بمشولوفقّارن ركوبهن حاو* حيل ود العنانيف اب ضميرا هاو* يمتّع سيدو في البلح النضيف موجاو* ) يامنصور كما يقول الشاعر درويش متعلّق في قدمي مولاه انت دروشتنا لكن المشايخ ديل اظنو دروشوك ونختم بالرائع علي ابراهيم (الليل بوبا والجو صقّع * الناس ناموا والنجم المدمّس فقّع* حليل زولي المركرك الفي مشي بتفدّع* حليل فاطنة ام كزم فول ليها عاشقك ودّع*) انت قايل هركولة الا عند الاعشي ايضا علي ابراهيم يلّقب بالاعشي
يا ناس ودعتكم الله انا مدرّس والمدرّس كلامو كتير وان تابعتوني ببطل شغلكم وبسفّهكم مع الود والمحبة العبيد الطيب السعودية السودان بادية الكبابيش
| |
|
|
|
|
|
|
|
|
 Re: قصيبة المُرنـَع السايقات ########يسك (Re: munswor almophtah)
|
حدثني محمد سعيد بن شاعر البادية الشهير عبدالوهاب فضل اللة سعيد صاحب ( كرسي الفي مكانتو عزيز )
وذاك شبل من ذياك الأسد فلاة الشعر البدوي بنداوته .. حدثني ونحن مقيلين امام دكانه في المقيرينات على جهات فوجا ( أم خضار جنة ) - تبا للإسترسال - فقال : ان سرب من فتيات تلك النواحي حضرن للسوق ذات يوم وبينهن محبوبته الأثيرة .
وطال إنتظاره متوقعا ان تمر عليه ولو بالسلام .. ولكن هذا لم يحدث ربما خوف الرقيب
وحين الأصيل تبضعن وغادرن ...
فأصابه الأسى والشجن ....
فأنشاء يندن :
" الأمَاتوُ فوق أُم أمَات لَعَايت ردَنْ
ومِن حدَق العيون حتَى الخِديداتْ نَدَنْ
قَمَارِي الوادِي مِن حالة المفارق ْ حَدَنْ
وخبَار ناس رِيلا ما جِن سالمِني وصدَنْ "
وستجد ذات المعنى والمبنى عند حسن محمد دياب وهذا يسمى تناص او ماشابه... وتلك قصة أخرى
ِ
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
الأخ عبد القادر العطا
لك السلام والتحية
إن أعجبتك الأبيات فإليك المناسبة :
بعد ثلاث سنوات غربة بالسعودية وصلت الديار وجيبى كإبط الربداء الباحث فيه عن درهم كالطامع فى ريشة من إبط النعامة ، كم هو بليغ هذا التشبيه ( أخوك جيبو أباط ربدى) هكذا يقول المثل البدوى قال صوف ورل قال.
لم أتوقع ما وصلت اليه النظره المادية للناس تلك الدرجة، فقد عشت بينهم مفلساً فى سِنى الدراسة وما قبل الإغتراب شبه بطل محلى ، أبن أسره محترمة لاتعوذه بعض وجاهه ، كابتن كرة قدم ُحريف الوست والشطرنج وحتى لعبة الضالة وشاعر كالعباسى يطأ الثرى زهوأ ويستهوى الحسان بعض الأحيان , وقبل كل هذا شخص يفاخر بكثرة أصدقاءه .
ضلّلنى من قال ( أنى بلا نعلين سوقى جايب )
شاعر التويه الذى رد على فتاة سخرت من حذاءه البلاستيكى ( الشدّة) وهى حذاء يلبسة الرعاة ( الكريان) فقط وليس أصحاب الثروة فحين دخل الحفل مبشرأً وهازاً ضحكت فتاة ساخرة ً من حذاءه :
لتفاجأ يه يضع يديه بكتفى صاحبيه ويستخدم عصا تويته :
ياقدوم الحارس الزرايب
أنى بلا نعلين سوقى جايب
وعصا التويه بيتان يرددهما الكورال الممسك بأكتاف بعض بعد كل مقطع .
و الحبس الزرايب يقصد به الضبع أو ال###### كلاهما يصلح .
وبلا نعلين سوقه جايب يقصد أنه حتى لو مشى حافياً فزبائنه كـُثرْ , لكن مقولة هذا الشاعر المكابر الطيف لم تصدق معى فلم أجد زبائنا .
إلاها تلك الحنينه طيبة النيه بيضاء الضمير (بت من بياض غرر الغمام قدرت ضميرها تفصلو )
ألاها من أعطتنى أحساس بأننى مازلت نجماً لا يمكن أن ينفرط عقد كواكبه ( ظلت وحيده على مدار نجما كواكبو إتنصلو)
على كل بعد سته أشهر قضيتها بالسودان تقاسَمتْ هى مع صديقى أبو الحسن على مولاى قيمة تذكرة الرجوع لمغتربى وكان أول قرار إتخدته أغلقت هاتفى وفتحت حساباً بمصرف الراجحى وبدأت مشروعى الخاص لمكافحة الفقر وبعد عام كامل من رص الريال فوق الريال شعرت بأننى صرت برجوازياً فى الطريق ( تعادلها مرتبة مَهـْدىّ فى الطريق عند المتصوفه) حينها فقط فتحت هاتفى وكتبت هذه الرساله .
( ُلى نجمه ) ...
بَكتـِبْ بمُفتـَتـَحْ الكـَلامْ مُجْمـَلْ غـُناىْ ومـَفـَصـَّلو
أنا شوقى والريد والسلام ما أظِنْ رِساله تـَوَصـِّلـُو
والخَلاّ شـِعـْرىْ حُضورو تام وأدَّاهو لــــون ومْـعـسِّلـُو
يـــِتْ من بـَيـَاضْ غُـــرَرْ الغـَمامْ قـِدْرَتْ ضَميرا تـَفـَصِّلـو *
وفـُرْقـَتنا مـَرَّ علـيها عام زمـَن الرجوعْ بـَتـْوَسلـو
لى ْ الضاربـه فى جـُوّاى خـِيامْ وعـِرْفـَتْ وجـْودا تـَأصِّـلو
ولو ما بَخـافْ طـِيْبْ المـَقامْ جـَنْبْ العــَزيزه يَّكـَسـِّلو
ويسكــُنْ مـَعاها على الدَوام أنا قلبى ناوى أرَســّلو
لى نجمة : بـِتْضـَوِّى المـَسار وجهاً صَبْوح أتـْمـَثـَلـو
مالى المَحطاتْ إنتظار كانْ مـَرُّه وَجهى تحصلو
رفضتْ تواريخ إنكسار وهـَزَمتْ توالى مُسلسَلو
وظلَّتْ وحيده على مَدار نجماً كـَواكبو إتنصَّلو
دى القـَسوه كـُل ما تـَزيدْ جِدار جـِسْرْ المَحـَنَه تـَوَصِّلو
وتَكـْنـُسْ مـِن الروحْ الغـُبار وتمسـِكْ فـُؤادى تـَغـَسِلو
ولمَّا الزَمـَنْ فـَرَضْ الحِصارْ والناس مـَعاىْ إتـْفـَسَـلو
شالتنى فى عيوناً كبار كم هدهدونى وعســّلو *
غرر الغمام : الخطوط البيضاء التى تكون بأعلى السحب ومفردها غُــرّة
البدو يشبهون بها غرر الأسنان : ( سنّانك غُرَرْ واحداً بقوم لا القيلى) غرر السحاب الذى يتكون بعد الظهر
عسّلو : نعسو
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
والدنا وعمنا وحبيبنا المرحوم الشيح علي سالم علي التوم رحمه الله رحمة واسعنا قد كان دمث الاخلاق شهما عابدا متواضعا عفيفا رشيقا انيقا مميزا في لبسه وهندامه وحتي في جماله التي كان يمتطيها وقد كان حلو المعشر سمح السجايا وهينا تستخفه بسمة الطفل قوي يصارع الاجيال كما يقول ادريس جماع وقد كان عمه وصديقه شيخ جامع عندما افترقا في بعض السنين يشتاق اليه ويخاطبه بعلي العرضان وقد كان خفيف الظلّ اذا قابلته وجلست معه وانسته لا تشتطيع الا ان تنحني له اجلالا واعجابا وذات مرة من المرات وهو عائدا من رحلة الجزو ومعه ابن عمه الشاعر المجيد محمد ودمهلف من اولاد عوض السيد واراد الشيخ ان يمازح ويجادع ابن عمه ودمهلف وكانت قبيلة ود مهلف يقطنون بشرق ام سنطة بمنطقة النويقة فقال الشيخ شوفت الغناي قال شنو ؟ لا قال شنو يا شيخ العرب فقال الشيخ :- عتمور النويقة الليله شوفتو جميلة * بي صعيدو وصباح لي ام سنطة نازله قبيلة * تفاح البلد تسلاتنا بيهو قليلة * وفي شان الطويل عنقو وبسك التيلة* لله درك ياشيح العتمور معروف وهو المكان العالي من الارض واليوم منظره جميل لماذا؟ لان حطوا ونزلوا وضربت بجنوبه بيوت وخيام قبيلة عزاراها جميلات تفاح البلد اي حسان البادية لا نتغزل فيهنّ كثيرا لاننا لانهوي ولانحب الا واحدة فقط طويل عنقها وبسك التيله وهنا اراد الشاعر ودمهلف ان يرد علي شيخه وابن عمه و ودمهلف من الشعراء المجيدين وقد دونت منه درر عندما كنت معلما في مدرستهم العامرة انذاك ولان ابن عمه شيخا اراد ود مهلف ان يستعمل دهاءه ومكره فقال :- لكن يا شيخ العرب الجملتو ما وجبتو وما اديتو حقو يعني ما غنيت عليهو فقال الشيخ :- انت مو غالبك فقال ود مهلف:- اديني امن الله فقال الشيخ:- اديتك الامان فقال ود مهلف:-
مطلوق من رشاش تتربّا * وحبست الخلفة من مطر الضراع ما صبّا * في الخط سادرك محزوم طريقك خبّا * هجّام دكة البادية ام نحاسا دبّا* لله دركم يا مشايخ منذ فصل الرشاش لم تسرج مطر الضراع الكبابيش يعرفون النجوم ويحسبونها جيدا ويعرفون بها وقت نزول الامطار وعندهم عينة الضراع احر الصيف واول الحريف المحزوم عند الرمالون (شوف الخيرة يا رمّالي) بعد ما يسادرك ومعه طريق مارق حتما سوف تسافر وهنا يخاطب في الجمل سادرك محزوم ويقصد الشيح علي سالم وطريقك خبا يعني سوف تسافر الي مسافات طويلة هجام دكة البادية ام نحاسا دبا (اي صاح) وهنا بيت القصيد يقصد دكة وفرقان الشيخ علي فقال له الشيخ :- ما سويتها فوقي يا ابو شنب ما اديتني الامان فضحكا وتعانقا الا رحمهم الله رحمة واسعة فانتم لعمري قوم نجلّكم ونحبّكم وننحني اجلالا لزكراكم العطره الست ابن الالي سعدوا وبادوا ولم يلدوا امرأ الا نجيبا
وما ريح الرياض لها ولكن كساها دفنهم في الترب طيبا
ولكم منا المحبة العبيد الطيب بادية الكبابيش
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
الاخ الاديب منصور المفتاح والدكتور صديق والاخ عيسي والاخ الزيادي والاخ كرار والملا وكل الاخوه لكم الود والتقدير نسبة لاننا تاخرنا من اضافة كوز لقصيبة المرنع اليوم اضف لها صطلا كاملا لان قراءها اصبحوا كثيرون وخاصة ابناء البوادي وعشاق ومحبي الدوبيت ولانكم توثقون لهذا الفن الرائع شعر الدوبيت
امس وانا اشاهد احدي الفضاءيات الخليجية برنامج الشعر النمطي واحد الشعراء طلب من احد الامراء بيتا في قصيدة رائعة وهنا تزكرت الشاعر الكباشي محمد فضل الله العايدي عندما يريد ان يطلب من المشائخ ابناء السير الشيخ علي التوم بقرة او بعيرا يقدمه في غنوة رائعة وها هو يطلب بعيرا من الشيخ عوض السيد علي التوم.......
يابادي النجوع ماشفت خير السيد
قطّاع الفجاج فوق المصاعو جديد
شلع (ام حوش ) وقام من ( الطويشة) صعيد
ودي الولد البصوقر في البطيحة رشيد
عبد الخير ركب ليها وبقالها عقيد
دليل البل بقول المرقة في الويحيد
يا ناقا اصبري براق (دوانة) بعيد
هبّارت الزرار امانا عندك سيد
سلطان بي جوابات الكتابة بفيد
ابو يعقوب جليس الفاها موتقليد
الفي شقّك بخيت الفارقك جليد
نقّارتك تقح نزلك علوهو بعيد
وابوالتوم جليس ا مشورة عنز الليد
نزلت (ام قوز) نحاسك للقبيلة بكيد
ابوعلي فارس ام دروع وحديد
وعجل ام ناطح الفي الجبهة قرنو فريد
وبحر المالح الفوق الكباري بزيد
وناس البيه ضلّلو وهاداك عوض السيد
بلازمل العقال خرب المصافي هديد
عتلكم بقلح الرفة وعليها شديد
وقدحكم بشبع الالفين يوم العيد
وميزانكم تقيل في الدايرة مالو نديد
وانا الدارس العلوم في راسي عندي قصيد
داير لي قعودا بي الرسن عريد
كان اركب مورّك وكان اكوسلو شديد
لله درك يا العايدي من شاعر مجيد ولعمري كل ماقلته في هؤلاء المشايخ لحق وحقيقة ولصادق واكرمني الله ان عاصرتم جميعا بعضهم وانا طالب ابتدائي وبعضهم انا طالب متوسطة كالشيخ محمد علي التوم (المر) والذي يعتبرونه المؤرخون والذين عاصروه من اقوي رجالات الادارة الاهلية في السودان عامة وفي الكبابيش خاصةوالذي كناه الشاعر بابي يعقوب تيمنا بعمه فارس النوراب المشهور محمد ودالتوم شقيق الشيخ السير علي التوم ويحكي لنا كبار القبيلة بان الشيخ محمد ودالتوم كان شجاعا مقداما وكريما شهما وقد كان يلقب الشيخ المر ايضا بازرق وكثير من الشعرا ء يزكرونه بازرق وفي زلك يقول الشاعر الكباشي محمد احمد سعيد :-
كان زاينتو ماتقدر تكمل زينو
وكان خاصمتو خط سنتين بينك وبينو
تمساح بحر موجة الكتير عنينو* تصاقر الشّم ولا اللزرق تحامرك عينو بربك شوف هذة البفصاحة ان زاينتو أي ان صادقتة وسكنت بجواره والزينه أي العشرة الكريمة والمحبة الصادقة وان خاصمتو اجعل المسافة التي بينك وبينه سنتين أي خارج المألوف تمساح بحر موجة الكتير عنينو تصاقر الشّمس أي تنظر محدقا الي الشمس ساعات طويلة ةلا تستطيع ان تنظر الي الشيخ المر
الف شقك أي في جوارك بخيت الفارققك جليد وانه لصادق فقد كان الشيخ المر رجلا شجاعا كريما وكان يحب الغرباء ويعاملهم كابناء عمومته بل واكثر وهذة صفة موجوده في كل فروع النوراب وشخصي يشهد علي ذلك
ازرق يادقر كردة النوايحك فاحن
ويا ضلّي وضراي وكت الديار الجاحن
ودايما الكبابيش يكثرون من زكر الضل والضرا في اشعارهم ويشبهون بها مشايخهم وفرسانهم وكرماءهم وحتي المرأة تقول لاخاها ضرايا او ضلي او عشايا او خيري وهنا تخضرني الرواية الكبابيشة عن الشخصية المحببه اليهم قصة ابو زيد الهلالي عندما قال ابو زيد لزوجته انت بت (اللضينه) أي ضعيف الراي وان ماكي بنت اللضينة اذهبي الي والدك واسأليه عن الضل الرهين؟ وسمح الاثر؟ وحلو الشّم ؟ فذهبت الي والدها وسالته فقال لها :- الضل الرهين شجر الحمر وسمح الاثر درب الكديس في الرمل وحلو الشم العطر ورحعت فرحة لكي تنفي التهمه عن والدها وفي الطريق قابلها ابنها (بريقع) الذي هو ابن ابوزيد فاخبرته بالقصة فقال لها تمام جدي اضيني اذهبي الي والدي وقولي له :- الضّل الرهين هو الرجال وسمح الاثر هو المطر وحلو الشّم هو الجنا او الاطفال زكور ام اناث وحقيقة لقد كان الشيخ المر ضل الكبابيش وضراهم وكان خيرهم وعشاهم وضل وضرا حتي للقبائل المجاورة ولقد رايت بعيني ناظر الكواهلة المشهور الاعيسر وناظر الزيادة المشهور ودجزو وملك الميدوب وعمدة بني جرار يبكونه بحرقة ولوعة وقالو فيه اروع المناحات معددين صفاته وكرمه وشجاعته وحسن جواره سوف نتطرق لها لاحقا بالتفصيل الشاعر العايدي بدا قصيدتة بي يا بادي النجوع والنجوع هو فترة ذهاب الكبابيش ببهائهم الي الجنوب دار برتي وحمر واحيانا الي دار الرزيقات كما يسمونها دار موس مادبو ناظرهم الشهير واحيانا الي بحر العرب وكما يسمونه بحر جانقي وكما يقول الاستاذ علي الشيخ ودالمر بعد يومين بحر جانقي البعيد مدتلو * وسيدها تملي هو وراعي الجبال بتكتلو وخير السيد المشهور دليل ابل الشيخ المر ولان الشيخ المر هو الرجل الاقوي بدا القصيدة به قطاع الفجاج أي المسافات ام حوش والطويشة والبطيحة اسما اماكن بديار قبيلة برتي دليل البل بقول المرقة أي الرجعة في الويحيد احد الشهور دوانة منطقة خصبة المرعي بين ديار الكبابيش والزيادية هبارة الزار أي العقال وهي الناقة امانة عندك سيد ويقصد به الزعيم المر وسلطان بي جوابات الكتابة وحقيقة الشيخ المر كان سلطانا وكان له مناديب قبل فترة النجوع يرسلهم الي اخوانه النظار امثال ناظر الزيادية وناظر البرتي وناظر حمر وناظر الرزيقات وسلطان المساليت وملك الميدوب وناظر زغاوة وكل القبائل التي تجاور الكباببش ابو يعقوب جليس الفاها موتقليد والكبابيش يلقبون الرجل الشجاع او الرجل الكريم اخو فاطنة او اخو شكلة او اخو كلتومة كما يقول عمنا الشيخ جامع علي التوم امد الله في عمره نحن اخوان كليتيمة وحليما وحوّه جبناهن مراحا ليهو جضة وعوّا الفي شقك أي جوارك سعيد ولعمري صادق وهذا شي تعرفه كل القبائل نقارتك تقح ونزلك علوه بعيد ولقد شاهدت وعاصرت الشيخ المر لا يسكن الا في الاماكن العالية في حله وترحالة والي الان محكتمة في منطقة راحة في اعلي التلة وفي ابوزعيمة ايضا اعلي مكان محكمته وفي حمرة السيخ اعلي مكان هو محكمتة وفي منطقة ام سنطة اعلي مكان هو دكتة العامرة وهذة دعوة بحث لابناء القبيلة المتعلمين ان يبحثوا هذه الظاهرة في تاريخ الشيخ المر لا يسكن الا في اعلي القمم ثم زكر الشاعر الشيخ الناظر حسن التوم وكناه بي ابو التوم والتوم هو الامير الحالي لقبيلة الكبابيش امد الله في ايامه فهو خير سلف لخير خلف فقد كان عهد الشيخ الناظر حسن التوم عهد خير وبركة علي الكبابيش ازدات البهايم وانعدمت الحروب وعمت البركة والرخاء كل ديار الكبابيش وازكر وانا صغيير اشاهده وهو يمازح الصغير والكبير نزلت ام قوز وهو المنهل الشهير ملتقي قبائل الكبابيش والكواهلة والزيادية والميدوب والبرتي وحمر نحاسك للقبيلة بكيد والنحاس لا اسكت الله له صوتا فهو رمز عزة القبيلة وكبرياءها وشموخها وعندما تدق طبولة علي امتداد السمع تجد الناس تطرب وتهتز فرحة وكنت اطرب حتي الثمالة عندما اسمع عز الحي تشدو بي
اسيادي واسياد عزازا
يعجبوك يوم البرازة
ولي الخصيم كي وغيازة
وكراعهم ماها فزازا
ويا منصورة فوق اسيادي ومنصورة هي احدي اجزاء النحاس الاربعة
ثم يمدح العايدي الشيخ ابراهيم علي التوم السياسي المخضرم والرجل الداهية ولقد ربطتني علاقة وطيدة بهذا الجبل الشامخ وانا طالب ثانوي ويشهد الله اني احببته واحبني ولعمري هو اكرم المشايخ قاطبة نعم كلهم كرماء ولكن ابوعلي نادر ابو علي فارس ام دروع وحديد وعجل ام ناطح الفي الجبهة قرنو فريد وحقيقة الشيخ ابراهيم كان رجل القبيلة الاول في الملمات والمؤتمرات القبلية وكانو شعراء القبيلة يلقبونة بسيف النصر بحر المالح الفوق الكباري بزيد وهذا من اجمل الابيات في القصيد وناس البيه ضللو والبيه هو الشيخ فضل الله علي التوم نائب رئيس اول برلمان سوداني ومن النواب الذين اعلنو ا الاستغلال من داخل البرلمان وكان محبوبا عند كل الكبابيش وكان كريما مضيافاورحم الشاعر ودعبيدالله حين يقول البيه سيخنا جاب البي اللجام ردّاس ودو لي السبق تمّاها لينا خلاس وهاداك عوض السيد وهو احد اضلاع المربع الذي تبقي من العقد الفريد ابناء السير الشيخ علي التوم الشيخ عوض السيد والشيخ جامع علي التوم الرجل الفارس المشهور وكل ابناء عمومته يعرفون ذلك وحدثني عمنا الحاج صالح ودحمد وهو صديق شيخ جامع منذ الشباب فقال لي ان شيخ جامع من اشجع الرجال في بداية الكبابيش ولهو مواقف وبطولات مشهودة ومرة حكي قصة ظريفة عن شيخ جامع في نهايتها انتصر شيخ جامع وكان يقول انا كورينا معجبا بفارس بني جرار المشهور كورينا الذي عندما قتله احد فرسان النوراب وهو يحتضر ارسل غنوة الي اخته يقول ان دارت الشديد دانولها ابو سنينه واندارت اللبن احلبولها بارينا وان قالت اتو الوقع قولوها كورينا والشيخ جامع سياسي مخضرم وشاعر مشهور وله مسادير وملاحم شهيره نشر بعضها اخونا حنفي في جريدة الوان جزاه وجزا عنا ناس الوان خيرا والشيخ حمد علي التوم السياسي المعروف والرجل الذي مشي راجلا وترك سيارة الجمعية التاسيسة الفارهة خدمة للوطن وهو امد الله في عمره رجلا كريما عفيفا مستقيما ذو اخلاق رفيعه عابدا متواضعا والشيخ قسم الله علي التوم دليل الابل المشهور ورجل القبائل امد الله في ايامهم
قسم الله الرقٌيق شد ابوقران
ابو عنجة المصوع بي الزمام حران
وهاداك عوض السيد بلازمل العقال خرب المصافي هديد نعم الشيخ عوض السيد من اثرياء البادية المعدودين ورجلا شجاعا دمث الاخلاق عادلا مستقيما ورعا وتستطيع ان تمشي في بادية الكبابيش من شرقها وغربها وجنوبها الي شمالها وحتي القبائل المجاورة ولا تجد احدا ان يقول لك اساء الي الشيخ عوض السيد او ظلمني ابدا وهذا الرجل يقول النصيحة والحق ولو علي نفسة انظروا الي الختام عتلكم بقلع الرفة وعليها شديد وهذة هي القوة وقدحكم بقرع الالفين يوم العيد وهذا هو منتهي الجود والكرم
وفي جفنة مايغلق الباب دونها مكللة لحما مدفقة ثردا والثريد الكبابيش يسمونه التريد زي اثرم اترم وهذا من فصاحتهم وميزانكم تقيل في الدايرة مالو نديد ؟ وانه لصادق من الذي يستطيع ان يباهي ابناء السير الشيخ علي التوم فهم ورثوا الغزة والشموخ كابر عن كابر ختم القصيدة بالشيخ عوض السيد لانه يريد منه بعيرا داير لي بعيرا بي الرسن عريد كان اركب مورك وكان اكوسلو شديد أي كان امتطيه بسرج او بدون ولقد اعطاه الشيخ عوض السيد البعير لانه ابن
الست ابن الالي سعدوا وبادوا ولم يلدوا امريء الا نجيبا
وما ريح الرياض لها ولكن كساها دفنهم في الترب طيبا
الا رحمهم الله الميتين منهم رحمة واسعة وامد الله في اعمار اعمامنا الشيخ عوض السيد والشيخ جامع والشيخ حمد والشيخ قسم الله لكم منا الود والمحبة الصادقة
العبيد الطيب (ودالمقدم) السعودية الرياض بادية الكبابيش
بادية الكبابيش
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: Mohamed Abdelgaleel)
|
التحية لك يا زول يا جميل والتحية عبرك لحنفي ودكتور صديق وكل من يري الوجود جميلا. منصور أنت واحد من الذين يجعلون لهذا المنتدي طعم ولون ورائحة كمان فلك الشكر.
كلام المولى عمر هو عين الحقيقة
دائما المنصور يهبنا المتعة الصرفة في فنون التراث
له المحبة والمودة النقية
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: محمد سنى دفع الله)
|
بغني بشكرك يا سمحة الاطباع
ويا ام روبا نزل منو البرد وقاع
وجهك زي تماتيل القمر لماع
وسنك بيضة الفوق الفروع فقَاع
وصدرك شايل الجوز والدهب ترباع
ولونك في صفا المن الشمس موَاع
وكتفك من خروسك بي المتر مو ضراع
مشيت العانس الحاشيها مولسَاع
وشيلوني البترس في الهليف رضَاع
ويا الصَل النزل فوق خشة الفرَاع
ووريد اللنتنب شاف الرواحل زاع
ات متلابة الموارك لي نشل بي الباع
واماتك بجن من العشية شباع
ولا حميلت القام بيها مونجاع
لله درك يا ابو البرعي من شاعر اشعر لا فض فوك علي طريقة واعجاب الاستاذ الاديب نايف الرشدان فانت شاعردوبيت متفرد في مفرداتك لانك دليل ابل وانت لا تقل روعة وابداعا وشعرا عن شقيقك الشاعر الجميل حنفي ولعمري كما يقول شيخ الشعراء عبدالله البشير عن المحجوب والمجزوب المحجوب اشهر والمجزوب اشعر فانت قامة شعرية لا تقل عن حنفي بل انت وهو كفرسي رهان كما قال:- الشيخ العبيد ودبدر قدس سره عندما سأل رحمه الله عن الشاعرين المجدين في المديح النبوي الشيخ ابوكساوي والشيح ابو شريعة واحيانك اجدك تسبق حنفي بمفرداتك واستعاراتك وتشبيهك وقوة سبكك لانك بدوي صرف وهذه بشهادة حنفي وايضا بشهادة الشاعر الاديب الشيخ الدلال
بغني بشكرك يا سمحة الاطباع أي امراة شاملة للصفات الجميلة خلقا وخلقا (ام عروض ) يافضل الله ما قلت ام غروض اتشنت تقول في دورها ما ولدا معاها بننّت بننت جمع كثرة لبنات والكلمة دارجية لكن كما يقول:- الاديب الاستاذ الامين بدوي ودكاكوم اذا كان عند علماء النحو جمع تكسير ايضا عندنا نحن في البادية جمع تفجيح مثل وللد وبززر وبننت وعككزوما شابه ذلك انتهت طرفة ودكاكوم) كما تقول الحكامة يوم الكلام شوك شوك بستعزو بي السهوك عككز بزرنا الجوك قران بقر مجوك ويا ام روبا نزل منو البرد وقاع الروب شعر المراة والكبابيش يسمونه ايضا الديس او الكربيل وشوف الروعة النزل منو البرد هو المطر واذا رايت المطر عندما تهطل في مكان قريب منك تستطيع ان تتزوق المعني وتستشفه وجهك زي تماتيل القمر لماع يعني قمر 14 بيضاء باكرها النعيم وساقها بلباقة فادقها واجلها ولونك زي صفا المن الشمس مواع وهو السمن الم اقل لكم
ان الشاعر ابن بيئته وكتفك من خروسك بي المتر مو ضراع
الخروس الاذنين او شحمتها وتسميها الكبابيش الخروس لانها تعلق عليها نوع من حلي الذهب تسمى الخروس تشبه الحلق ولكنها دائرية وحجمها كبير وكناية علي طول العنق كا يقوا اخونا ابوعرفه:- وريد الساف الرقبة ضراع والديس هدل الاكتاف ومشيت العانس أي الناقة وكناية علي ان مشيها بطئ مشيتا روقا ما المستخفي وراحلي وشيلوني أي صغير الغزال الرشا او الجؤزر والهليف نوع من النبات يرقد تحته الجدي كما يقول الشاعر الجاهلي وترنو بعينيها الي كما رني الي ظبية وسط الخميلة جؤزر ويا الصل النزل فوق خشة الفراع والصل هو الدبيب او الثعبان والكبابيش كثيرا في اشعارهم كالدوبيت والتوية يشبهون المراة الجميلة بالثعبان فبربك استشف معي كلمة الثعبان مخيفة اما كلمة الصل فلها وقع جمالي
والخشة هي الكثيف من الشجر كما يقول المبدع حسن دياب او الشاعر المتفرد عمنا الزعيم الشيخ جامع السير علي التوم فكلاهما مبدع ولكن الزعيم الشيخ جامع امبراطور دوبيت ديفة الروبزن دخلن كويع الخشة * اجمل خلقة من صل الدبيب الوشه* يا ام نهدا متوقر لا انكسرلا انفشه*لي البارح طريتك ودمعي ساساق بشه* بشه أي سال وتدفق كما في اغنية الدلوكة او الربة الفرقة حراقا والدمعة ساساقا انا يا روحي مشتاقا لي السافر مالاقا الله ما اجملها حين تشدو بها حسان قرية ام سنطة فلهن مني المحبة والاشواق بربكم يا متزوقوالدوبيت شوفوا الروعة والجمال في هذه التحفة الشعرية يا ام نهدا متوقر أي عالي وشامخ لا انكسر لا انفشه به عناد وهذه الفتاة بكرلم تتزوج بعد ورحم الله الشاعر الشيخ سليل الدوحة الطيبية الشاعر الناصر الشيخ قريب الله قدس سرهم يحين يقول:- وفتاة لقيتها ثم تجني ثمر السنط بانفراد الغزالي
تمنح الغصن اسفل قدميها ويداه في صدر اخر عالي
فيظل النهدان في خفقان الموج والكشح مفرط في الهزال
لله درك من شاعر مبدع وقدس سرك من شيخ وبالرجوع الي رائعة ابو البرعي يا سمحة الاطباع حين اصل الي هذا المقطع وادندن به بصوتي الابح الاشتر
عانس الناوا دايما لي الصعيد نجاع
وفوق حيماوي دارع من يمين نزاع
بحطر بكرو في القش البقوم انواع
وفوق قوز الخشين بصبح سريبو رتاع
قلّعهن من جواديل الزرد مناع
واوطاهن قمر درب الرشد مو مضاع
قرن حيطانها خطالهن سفاف القاع
والرق قارن الحوض والزمل مصَاع
عندما اصل الي هذا الجزء الرائع من هذه الدرة اتزكر الدليلين الفارسين الشيخين اللذين قل ان تجد مثلهما في بادية الكبابيش يستحيل ان يلدن نساء البادية مثلهما من مروءة وكرم وشجاعة واقدام ونبل وخبرة بمناهل المياه واماكن الرعي من الحدودالليبية والتشادية شمالا الي اقصي جنوب السودان وكأنّ ابو البرعي يقصدهما في اغنيتة السابقة الاول خالي المرحوم ابو البشر الشيخ موس ابو المرضية(الشرتاي) كما يسميه والده الشيخ ابو المرضية قدّس سره ولان ابو البشر خالي وشهادتي فيه مجروحة ولكن اترك اخباره ومدحه للقبائل المجاورة كالزيادية الذي كان صديقا لهم وخاصة الشيخ المرحوم موس ود ام حمد احمد وقبائل التنجر وخاصة صديقه العم درهم ولاصدقاءه واحبابه دويح امثال الدليلين بارود ومحمد علي ودحمد *عقدو الشورة ناس بارود ولفح الكور علي ابوسنينه موهوقعود* اهل عفاست القام بضري مو مردود* لي المسكين براشو وبرقعو المقدود*ولاخواله واهله بي جرار امثال الدليل وديوسف احمد وابن عمه حسن الذي تقول فيه الحكامة
- ام دربا بي تلاتو* وام ضيلا بي كناتلو* احمد قلبك كاتلو * وحسن الخوف مو خاتلو*( هذه الاغنية مهداه للدكتور صديق ام بده يادكتور شوف الحكامة دي كيف صورة الناقة) ولاصدقاءه واهله الكبابيش عامة وخاصة النوراب اولاد فحل ونا س قريش ولكنني حزين لان كل شئ انتهي معه .......! نعم كل شئ..............! الا رحمك الله فعندما كنت تسافر الي مصر عبر الصحراء وانت صنديها (وضيبها) واتزكر في مرة من المرات وانا صغير اردفتني علي بعيرك فئ رحلة الي الختيماية وانت تدندن بهذة الاغنيةواحدين الدغم حرسوهن* واحدي نبي الفنقة والبياحة مقوهن* دار اللنجليز شقوها ما ساموهن* وعيبا شرعي يا زينوبا كان ساقوهن* الا رحمك الله كل شئ انتهي معك حتي ال........... هذا اتركة لاحبابك واصدقائك! وكأنّ الشاعر الجاهلي بجير بن عامر عندما كان يمدح نفسه كأنّه يشير لك ولصديقك عمنا والدنا الفارس والدليل المشهور الحاج صالح الشيح محمدالكارس الفكي صالح سليل الدوحة الرازقية وحفيد النوراب من امه كأن بحير يمدحكم في هذا
ومستنبح بات يستتيهه الصدي الي كل صوت فهو في الرحل جانح
فقلت لاهلي ما بقام مطية وسارت اضافته الكلاب النوابح
فقالو:- قريب طوحت به متون الفيافي والسنون الطوارح
فقمت ولم اجثم مكاني ولم تقم مع النفس علات البخيل الفوضح
نعم كلاكما كان غياث للملهوف حين يقل الزاد وحين تكون السنين طوارح وطوالح
نعم عمنا الحاج صالح كان كريما مضيافا بشوشا مهيبا عليه وقار يحفظ كتاب الله ومتصوف وكان دليلا خبيرا برعي الابل واماكن مناهلها في اقصي الجنوب ايام فترة الشوقارة الي اقصي الشمال والشمال الغربي ما يسمي برحلة الجزوء فلست هنا بصدد الكتابة عن ذلك فكل بادية الكبابيش وشيوخها وصناديدها وفرسانها يعرفون الحاج صالح الشيح والرجل الدليل الفارس الكريم المضياف ولعمري هذا الرجل قل ان تجد صفاتة في أي شحص من بادية الكبابيش قاطبة واسأل عنه قبائل القرعان والبديات وزغاوة وميدوب والبرتي والرزيقات والزيادية وحمروالكواهلة وبني جرار فهو علم في راسه نار طويل العماد رفيع النجاد كثير الرماد اذا ما شتا ولكني في هذه العجالة اتطرق لحاج صالح الشاعر حيث يقول
ما اتلومت يا قلبي البقيت تتهبل
وما اشبكت في الخزنة الزقاقها مطبل
ياخنتيلة النخل ام زبيطا عبل
بقسم ليكي نوم عيني العليكي مسبل
(اخبرني الاخ الباشمهندس عماد صالح ان الشيخ الشاعر المتفرد صاحب تيس قنة الصي وصاحب ماقالولنا لاقاهن جدي بي شنيفو الشاعر الشيخ محمد سعيد الطيبي عندما سمع هذه الاغنية وقبل ان يعرف صاحبها قال:- هذا الشاعر شيخ ومن اصحاب النفس اللوامة وهذة المحبوبة بنت ملوك من حراستها وقد قسم اليها اعز مايملك وهو نومه المعدوم اصلا)
وعماد ومحمد الحسن لم يخبراه بصاحبها نعم الرحل بل والشيخ دليل ابل ودليلي علي ذلك تشبيه الزبيط بعبل الابل يا النخلة ام زبيطا عبل
واذا لم اشطح بعيدا فاظنه يقصد ليلي ام جمالا حالي يا ليلي ليلك جنه معشوقك نوح وغني علي طريقة الشيح المكاوي ..........! ايضا يقول عمنا حاج صالح :-
فوق الدونكي جات ام نايط
وشالت الكاس بدبورة و3 شرائط
يا عبلوجة اللنقيبها جك بعايط
لونك حضرة القايم دقاق مو شايط
الم اقل لكم ان الرجل دليلا ...يا عبلوجة اللنقيبها جك بعايط وكثيرا مانجد الشعراء في السودان يتغنون بالحضرة اخضر جميل عاجبني لونو
خضار التاكا جوه ربيعي
محلف منو ما خدين بصمتي وتوقيعي
يا الفرهودة لا بتليني لا بتطيعي
واهلك معلنين حالت الطواري طبيعي كما يقول المبدع حنفي وهذه لك يا منصور ودكتور صديق الكرار وبقية العقد الفريد
ايضا يقول عمنا الحاج صالح:-
ياالحيماوي سرجك نوّي
والمخلوفة من رقليك بتاخد عوه
يومو اللنوي لي ام فاطرا بروق الضوي
بخلي الفروة جنحين القطابي الخوه
الا رحمكم الله رحمة واسعة بقدر حبي لكم فانتم احفاد
الست ابن الالي سعدوا وبادوا ولم يلدوا امرئ الانجيبا
وما ريح التراب لها ولكن كساها دفنهم في الترب طيبا
ولكم مني المحبة العبيد الطيب بادية الكبابيش
السعودية الرياض
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
السنى يا أيها السنى ياصانع الجمال وواهبه للناس دوما
نحن لا نفعل أكثر من إتباع أثركم ومن تبع أثر أهل
الإبداع وصل ولكن بعدهم بسنه ضوئيه فأنت يا صاحى
من الذين يضيئون برابخ هذا المكان ويهدون الضال
فيه إلى سواء السبيل- الشكر لك والسلام والتقدير
والسلام للمله.
منصور
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
أسفا على الشعراء
ماكى الهبيلْ ماكى البديلْ / رُقََّابةْ العيشْ التـَقبلْ / مزروعة فى دارْ الضَليلْ / مُتْلابهْ فى بـَقراَ نَحيرْ / زَرْوبها فى (كـََربْ السرير / أو بـّقرها يوتْ تافْ الغـّدير / فـَرع الدُباغْ الفى (الوَكيل) / قايِم رَبـُوْ ونـَبـٌوتْ عديل / دِيساً على الأكتاف بَهيلْ
كـَفّاى أبو قْصَيـْرهْ الغزير* / عـَلولها فوقْ سـَمحْ الهـّدير / رَحلوبها مِن ( أُمـَّاتْ حرير) / نزلوبها عـِداً حوضو جـيـر
عـَشـّوها فى أمْ الصـَغير / كـَتـَلتْ مـَرِىْ ومـَطعونة ضـِير / راجل البيان حسن الكبير / يورينى بيتها إن كان أطير
*( الكفاى ريش الجناح وأبوقصيره الإضليم وبالجناح أغزر الريش وأسوده) ومابين الأقواس أسماء أماكن منها وادى الوكيل منبت شجر السنط حيث وجد الناصر قريب الله الكاهلية تجنى القرض من فرع الدُباغ.
ماكى الهبيلة ام قرقراب / ماكى الخفيفه أُم ربّقابْ / ام قودة نوّارة الشباب/ نصافية ماكى المِنتلاب / أو بـَقـَرها عـِمصاً جوكناب / تفََّّ ( أُم عَمَد ) واصبح غواب / عبلوجة الفـَتقـَن غـَواب / مسدارها فى قش الدُباب /علولها فوق عُنجْ الرَقاب / رحلوبها رحله أُم الكـَلاب / نزلوبها فوق (عـِد الرهاب )
وعشوها فى الشوش أُم عـِصاب
شآبيب الرحمة تتنزل عليك شاعرنا ود المصايد وأسفى عليك كثيرأ
هذا النوع من شعر البادية يسمى بغناء الجالسة وهو شبه مندثر وكنت ولم أزل مأخوذُُ بجرسة وموسيقاه
لذا سأكتب بعض ما حفظته منه وعن شعراءه المتوفى آخرهم الشيخ موسى على التوم صاحب الرائعة التالية :
راقْ السَحابْ رَوَّقْ رِدَمْ / ومن الصعيد جـَن العِجَم / راعى البقـر راعى الغنم / وإتهوَّل الطنبارى هـَم / كم يا أم سوالِفْ وكم وكـَمْ / يا النـَذرى قطّاعة العَشم / حـَدباتها مافيهن مَجَمْ / جـَدْيه ومراقدك فى السَلَـَمْ
رُقابه قـندولها أنبرَم / بَكرة رشيدْ فى أًُماتْ كــَزَمْ / خلبوسة فى وادى البـَشم / ضَربـِك على الشرشوفْ سَهم / كتبـِك شـِراع عـّضبَك عـَلم / يا ناري هِـِبِّى الليلْ قــَسَم / وين الزُلال سمح النغم /عسل النحل حالى الطعم / جُرعتها بِتـّداوى السقم / سالكة عيوب خـّلاَّقها تــَمْ / والله كان فــَره وبـَسـَمْ / شرطاً بقول ترمبلها دم .
هذه القصيده حسادة فقط لن أبشرحها هذا جمال يحس فقط أوكما قال الشاعر ود بادى إذا لم تستحسن المعنى فلنستحن اللفظ . فقط الكتب والعضب هى جزء من مكونات زينة الهودج أولهما شبهه بالشراع والثانى بالعلم وياله من تشبيه .
وبرحيل هذا الشيخ الشاعر إحترقت مكتبه كاملة من شعر الكبابيش، وصدق القائل أن موت أى مُسـِنْ أفريقى يعنى إحتراق مكتبه . ( مافى زول يقول لسنا أفارقة)
تأَسف معى على شعراء الباديه ثم استمع للشاعر موسى ود محمد ود عبدالله والد أستاذنا الفاضل بلو موسى
اسمعه وهو يعاتب أولاده البـَّله وعـَلاّوْ حين تركوه وحيدا مع الإبل كما ترك قبلهم مُحمد والده الشاعرالباباى ليستمتع بحب الحسان
والباباى شاعر كبير بقى إسمه فقط يطلقه البدوعلى كل شاعر (فلان هذا بابى أى شاعر) .
ارسل البابى وصية لابنه مُحمد مفادها :
قول لى مَحمَّد ألبـِِل بـَهدلـِن بى شايبو
ولفح الكور على شوشة البـِصرِّج نايبو
بنات اللدرع الشـُمارتو فاصلة حقايبو
ما يغشنك الريدهن نتاج مو جايبو (بنات الأدرع يعنى الصيد) فإن ترك محمد والده الباباى من أجل محبوبته فلماذا ترك علاو والبله والدهم ؟
ناس علاّو أبوهن لى دَوادريبهــِنْ
ومعروف يارفيق أنى من زمانْ ضِيبهنْ
وحالف ما بَحــوِّد من عــَراقيبهن
وفوق ود السَهيتْ بَعَـرِفْ مَضاريبهنْ
وفى الصيف والسموم بـَمرُقْ كــَوانيبهنْ
وكان ما الدِلقْ وَقــَع لى أم جــِيره ما أجـِيبهن
انت فعلاً ذئب خلاء تعرف الإتجاهات يوم تسرج ود السهيت باحثاً عن مرعىً يجعل سنامهن يظهر فى الصيف ( يمرق كوانيبهن) وصعب أن تسمن الإبل فى سموم الصيف .
وأن لم يلقحن جميعا وتنتفى الحاجة للصرار( الدلق وقع) فلا عودة لبئركم (أم جيره)
وهذا لابنه البله .
ويا طير ان مشيت سَلِم على البَله / أُ ما تقول ليهو أبوكْ من السروح كَلا / مرات فوق قعود مراتاً إتدلى
وكـَرَّاب الدُغـُش لا الليله ما أنحلا / وفوق ود السهيت الإيدو مى شَله / كم طليت بغيلاً قَبلى ما انطلا .
ومن يصل قبلك لمراعى تنبت البغيل ؟
ثم وهو يعاتب ربعه (بلل ومحمد) على تأخرهم من رحلة الجزو ولم يكونو كحيدوب وصحبه الذين وجدوا مرعىً جعل الجمل الذى تحمل فيه ام زانوق هودجها ( تِعـَلِى الُروب) يهيج ( يحشِّر) حتى يطرد بالضرب من الإبل لكى لا يحل محل الفحل الذى غالباً ما يكون بمواصفات خاصه .
يا طير إنْ مشيت بـَديك جّوابْ مكتوبْ / سلـِّم لى بَلـل ومُحمِّد الشبشـوب / الهداييهن رقد من همهُن مغلوبْ /
قوم أركب تعال شوف مـرعى ناسْ حـِيدوب / فى القـّش البِحـبـِنو النفوسْ مرغوب / دَشـَرهُن عـَزَّلوهْ ومَسَكْ العـَضاوهْ بلوب / والتيس العليه ( أم زانوقْ) تِعـَلِّى الروب /أصبح عيل يِحشــِّرْ ومنهن مضروب / اصبُر يوم نِجيبهن ليكِ زى الطوبْ
وقلبكْ كان يجيك من أُم جوروه تتوب .
هذا الشاعر جَد صديقنا المسلمى البشير الكباشى الكاتب والصحفى مديرمكتب قناة الجزيره بحالها وهذه مناسبة لاعتب على ابناء الكبابيش العاملين بالحقل الاعلامى وعلى راسهم أخى المسلمى وصديقاى وزميلا دراستى بحمرة الوز وخورطقت العبيد احمد مروح وحسن محمد صالح الأول كان رئيس مجلس الصحافه والمطبوعات والثانى مديرا للتحرير بصحف كبرى لماذا لا تكتبون عن تراث هذه البادية وأدبها وانتم الأكفأ ؟ أأخذتكم السياسة بعيدا عن الأدب أم صحيحة مقولة أن الإبداع حركة يسار ، وثلاثتكم أخترتم اليمين ؟
(يمينكم عود ) ـ منى عن حسن نية مع وجه ضاحكـ ـ هذه العبارة ( يمينك عود ) رجحت عندى خيار الغربة حين قذفها بمسمعى عسكرى التعليم بمعسكر الخدمة الوطنية.
دعونا مع ود المصايد أذكره فى العقد السابع من العمر ينتظر كوب شاى من تلك التى قال لى أنه أسماها نِمْرَةْ واحد (No1)
ثم نظر اليها وقال
نِمْرَة واحدْ الفى السوق وَقَـَفْ زابونِكْ
الجِيل المِدايفْ كـُـلُّو قـَصــَّرْ دُونِكْ
عــَنّافيَة أبوروف الرقيق شنشونك
بيض القوق سنونك والمَلاقى عيونكْ
يقول أنها الاولى التى تقاصرت دونها كل الشابات ( الجيل المدايف) من الديفه وهى الجدية لم تبلغ سن الغزال بعد
يا من تشبهين البكرةالعنافية الضامره ( رقيق شنشونك) ياذات الاسنان الشبيه ببيض القمرى
وذات العيون التى يشبه سودادها مِلاقى القطران ومفردها ملقاة وهى إناء دائرى يتلقى عصارة حريق الحب حين يصير قطراناً ولكم أن تتخيلوا ذاك السواد ، وقفت طويلا عند هذا التشبيهه كتوقفى عند تشبيه أحدهم لمِصاع جمله بحاجب حبيبته عائشة فى مقطع التويا
العذب الرَقْ لى الفــِريشه
وجــَلـَخْ بى مايــِق عــِشيشه
هذه الرباعية البديعة مقابل كوب شاى فقط إذ لم يعد هذا الشيخ ذلك الفتى القائل فى صباه :
انا لو كان حُضَّور قـَبْلْ الصُفاح والعايِط
كـُنتِ بَحـَجـْنـِكْ آ عـَـنــْزْ الدُباغ أُم نايـــطْ
نقدم شكــوى يا النَخله المَلانه سبايــِطْ
ونـِستـَلــِم القـَضية ونـَبقى فبها عــَبايط
قالها يوم عاد من رحلة الجزو الطويله مع إبله ليجد أن معشوقته قد تزوجت .
قل معى أنت أيضا أسفا على الشعراء فى هذه المنطقة وشكرا استاذنا انيق الحرف عبدالقادر الكتيابى فأنت القائل
أسفاً على الشعراء فى زمن التهكم والمزاح .
ود المصايد كان كنز شعر لم نتنبه له حتى إرتحل .
يومها استدرجته ليحكى عن شبابه وهى نابعة لمحبتى الخاصة لشعر الغزل فهذا الجانب مُهمل تماماً لدى البدو فالشعراء والحكامات بوقات الحرب وطبولها .
إستدرجته حتى قال :
أنا ليشْ يا أُم عـُروضْ بــَتـْضوَّحْ ؟
ما ساسقتِ بى دَربــِكْ عَملتَ تـَنـَوَّحْ
ما تفيدينى يابْكبرة الحــَزمِهن وروَّح
وماتبقيلى زى مَطراً صَبيبو شــَلَـوَّحْ
لا قوة الا بالله يقول : لماذا انا مثل الضائحة التى لا صاحب لها فتطرد من كل الحياض .
لماذا وانا الذاهب الآتى بطريقكم (مساسِق) حتى اصبحت على كل لسان ( عملت تنوح من نايحة)
لماذا لم تتعطفى ياشبيهة بكرة الرشيد
وحين قال: ( ماتبقيلى زى مطراً صبيبو شلوَّح ) كدت أمسك به وأقول : لقد سرقت هذا المعنى من كثير عـّزَّة ياود المصايِد فقد قال كـُثير :
وإنى وتَهيامى بِعـَزةََ بعدما تَخليتُ مِما بيننا وتـَخـَلَتِ
لكالـُمرتَجى ظـِل الغَمامة كُلَّما تـَبوأ منها للمقيل إضمحلت
كأنىْ وإياها سَحابة مُمحـِل رَجاها فلَّما جاوَزتُه إسْتهـَلتِ
لولا يقينى أنه ولم يسمع بعزة وكثيرها .
خرجت من عنده ملئ به وبهذا المعنى على راى الدكتور بشرى الفاضل
مرددا وماتبقيلى زى مطرا صبيبو شلّوح وللأمانة ربما كنت أعيش ظرفاً مشابها وكل ما اريد قوله
ماتبقيلى زى مطرا
بنهاية تلك الليلة وجدتنى قد كتبت :
سمحة سماحْ وناجحه نَجـــاح
وكـَتفـِك من خـُروسك كانْ ضـِراعينْ صاحْ
وَجهـِك فى تماتيلْ القـَمر وَضـــّاحْ
وصدرك فيهو جوز من أروعِ التـُفـــاح
وقادر ربنا الوَزّع مقاسـِــك صـــاح
كفيل الدابو قــَــوّاد وبى اللجام ما أنْلاحْ
وقالب الفدوه بـِقـْرُنْ فى الضَمير مـُرتاح
وضَى البسمه كيفْ بـَرق أُمْ رِويقْ اللاح
حـَريرْ لى النـُص مقاسمك ديسك المـَــوّاح
وما خـَلاًّنى أقعـُد عطرك الفــَـوّاح
إنى متلابة الموارِك لى نـَشـِلْ طْوطَاح
وأمــّاتك بِجـَنْ من العِصـير مـُرواح
ولاّ حْميلة البِهَجِعْ معَ البــــَّواح
مَعشوقِك فقد عقلو وصِبح مــَـدّاح
والزاروهو ما طارين عليهو نَصـــاح
جودى وحــنّى ما تقوليلو حقك راح
وماتبقيلو زى مطر البطين شلواح
أنا من غيبتها لامِن ديكى جَاتنى صَباح
بـَقـَـلـِّّب فوقْ هـُموم الحـَـيّرتنى سـَماحْ
صيدها لقيتو بى سافلْ الكـْريبَه مـْـراح
ســِلـِم مِنْ طَلقتى وشــَــبًّع كلابى قـَمــَــاحْ
ليلتقط القفاز أخى الأشعر محمد احمد ( ابو البرعى) ويقول :
بغنـــّى بشكّرك ياسمحة الأطباع
ويا أم روباً نزل منّو البَرد وقـــّاع
سنك بيضة الفوق العشوش فقـــّاع
وكتفك من خروسك بى المتر مو ضــراع
لونك فى صفا المن الشمِش مــوّاع
وصدرك شايل الجوز والدهب تــَرباع
مشية العانس الحاشيها مو لســّاع
شيلونى البترّس بى الهليف رضّاع
ويا الصل النزل من خشة الفـــّراع
ووريد اللنتنب شاف الرواحل زاع
والجـــيم البقســّم ولى الولع فرزاع
أتى متلابة الموارك لى نشل بى الباع
وأماتك بجـن من العشية شبــّاع
ولاّ حميلة القام بيها مو هجـــّاع؟
عبلوجة التقال ماهن خفاف قطـــّاع
وعانس الناوى دايماً لى الصعيد نجـّاع
فوق حيماوى دارع من يمين نزاع
بِخَطــِّر بَكـْرو فى القش البقوم أنواع
وفوق قوز الخِشين بِصبِح سـَريبو رِتــاع
قـَلَعِهـــن من جواديل الزِرَدْ مـُنـــّاع
ووطاهنْ قمـــر ـ دَربْ الرِشِدْ ـ مو مضاع
قـَرنْ حيضانها خَطَّالِهن سُفاف القاعْ
والرِقْ قارِنْ الحوضْ والزَمِلْ مُصـــَّاعْ
جاتك تاره يا ود عمتى ( ود المقدم)
حنفى 28/6/2011
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
يا مفتاح
فتح الله عليك ,,,
قمة في التذوق والجمال برغم ضياع بعض معاني المفردات لدي
وقلة ثقافتي في هذا الضرب إلا ان المتعة حاصلة يا ذوق تسلم
..... يابكري مصحح اللغة عندك سخيف جداً ومتجني ومتهم في اخلاقه
هسع العنوان دا ذنبو شنو لولا سوء الظن في المصحح الرقيب السخيفة
قـــــــــواديسك .
.................................................................حجر.
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: الرفاعي عبدالعاطي حجر)
|
الأخ الرفاعي عبدالعاطي حجر
السلام ورحمة الله عليك وأنت تتبضع فى سوق عكاظ بوادى الكبابيش
فطورك من كلد الإبل وغداك من السنام والأوراك وعشاك لبنها
حليبا وقارص. نعم المتعه تلحقك عابرا وجالسا ومارا من
حوله ذلك السوق فبضاعته أصلية غير مغشوشه لا شئ جلب إليه
من الغير بل كل شئ بدوى إلى ما شاء الله وكيف لا تستبيـك
معروضاته وجميعها من إنتاج فطاحل تلك البوادى وعن عباقرتها
ولذة المتعه دون معرفة المعنى لألذ وأعمق وكم نطرب للقرآن
دون أن ندرك أسباب التنزيل ومداليل الآيات ومعانيها
الظاهره الباطنه تفسسراوتأويل ياخ عبرت بما لا يعطى مجالا
للشك عن جودة تلك الكتابه ففتح الله عليك وعلمك من علمه
المفيد ولك السلام ثانية.
منصور
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
مغترب قرر العودة بعد مقالين بالوان وقصيدتين للاستاذ حسين خوجلي والاستاذ وددوقة
Date: Thu, 28 Jul 2011 08:51:11 +0300
متعك الله بالصحة والعافية ابو ملاذ انت الذي اعادني الي قراءة الصحف والجرائد رغم انفي بعد ان طلقتها (بالتلاتة) هي و اغاني وهرطقات انصاف المطربين الجدد و الشاشة البلورية لتلفزيون السودان مع خطابات الحكومة ووزائها والساسة السودانيين وكل يوم لقاء مع شخص لانعرفه ولم نسمع به ويعرفه لنا المذيع بي الخبير السياسي الخبير الاقتصادي ومساكين نحن لم نكن نسمع به من قبل ورحم الله العلامة عبدالله الطيب كان عندما يشرح اللغة يقول هذا المعني زكره الشاعر الفلاني في قصيدتة المشهورة ويقراها ولم نكن سمعنا به قبله ولعمري هذا يشبه اناشيد دجاجي يلقط الحب ويجري وهوفرحان و لي قطة صغيرة سميتها سميرة وعندما ينتهي اللقاء مع هذا الخبير والله لم يضف اي جديد ولم نكتشف منه شي الا اننا اغبياء مثله لاننا شاهدنا هذا اللقاء وهنا تحتضرني نكته اضحك معها كيف ما تشاء جهرا اوسرا في الثمانينات زارنا بحمرة الشيخ الحاكم الاقليمي السابق المرحوم الفاتح بشارة وعندما انتهي من خطابه لكزني عمي الذي بجواري قائلا:- والله الحاكم فصيح وكلام كلام (اامو اهو اهاااااااا)هذا كل مافهمه من خطاب الفاتح بشارة وهذا كل مافهمناه نحن من خطابات الحكومة والمؤتمر الوطني وعمي هذا اراد ان يرشح ابن اخيه لانتخابات سنة1986 عبر حزب الامة قائلا ( اني داير ارشح ولدي فلان هو قارئ لي رابعة كتاب لكن مداقش المدن مشي لي القاهرة) في بادي الامر استخففت بعمي ولكن بعدما ما رايت بعيني الذين كانوا يحرسون ويمسكون اكواب المياه(ياورات) لعرابي اركان نقاش طلاب الحركة الاسلامية في الثمانينات امثال الاستاذ محمد طه محمد احمد والاستاذابن عمر محمد احمد والاستاذحسين خوجلي رأيت ياورواتهم هؤلاء وزراء وولاه ومستشارين لرئيس الجمهورية وصدقني يا استاذ حسين لم اعرف منهم احد ولكن بارك الله في الشاعر القدال عرفنا علي( ديك الجن وعتيد الرماد) و هنا تزكرت اغنية الحكيم البدوي التي زكرها اخونا ابن سرحتها الشاعر الجميل حنفي في مقال سابق بالوان الجميلة (بعد ما كنت دليل الردن الهدجيبي
بقيت عاطلا بحلق في الككرلا الغيبي
اصلها الدنيا يادخري البخورهن شيبي
مره فتية مره عروس ومره عزيبي)
ولكن دنيتنا بالسودان لم تكن فتية اي بكرلانها فقدت عزريتها منذ امد بعيد وكأن الشاعر المبدع مظفر النواب يشير اليها عندما يقول الكل ضاجعها رجل الدين والسكير والطبال و....ولم تكن فتاة لان عمرها اكثر من اثنين وعشرين وظهر الشيب علي راسها وتجعدت خدودها وتكورت بطنها واصبح وجهها كالحصير ولم تكن عروسا لان العروس يفوح منها الند والكافور والبخور والكبريت والعروس تتوشح بالحلي والحناء والثياب الجميلةوالعروس يتم عقد قرانها علي واحد فقط ودنيتنا رائحتها نتنة يفوح منها الدم والفساد والنفاق والكذب والفتنه والزيف ولا ندري هل هي تم زواجها شرعا علي كتاب الله وسنة رسولة ام زواج مسيار او زواج متعة او علي طريقة الافرنج بعد انجاب الاطفال ثم تبدا مراسم الزفاف ولكن دنيتنا اظنها ثيب (عزبة) واشهر ثيب او (عزبة) علي طريقة موسوعة (غنيس)لانها تزوجت من كل الرجال الاسلامي والشيوعي والانصاري والصوفي والكافر والغريب في الامر ان جميع الذين تزوجوا منها قد انجبوا ابناء من نساءهم الاخريات الا هي لم تنجب ابنا واحدا وقد سالت احد المعرين عن السبب فاخبرني عندما سمم الزعيم الازهري خلط لها الماء مع مشروب الكركدي مع الحلو مر مع البارود وهذه طريقة عرفها ضباط العسس الاتراك والانجليزحيث كانو يسقونها لخيلهم لكي لاتلد ومن يومها اصبحت سوداننا عقيما ولا امل في انجاب ابنا واحدا شرعيا حتي ولو عبر اطفال الانابيب ما يهمني اني عدت قارئا نهما مع الوان الحق والجمال والان هذه الوان التي عهدناها منذ الثمانينات امتعني هذا المقال بكل مافيه واعني الذي بعنوان الضحك سرا وجهرا وانا من الذين يتحدثون مع انفسهم ويجابرونها بلغة اهل الخليج وهذه ايضامجادعة ردا علي مجادعتك انت والشاعر الجميل وددوقة ولاني ابن بادية وبعيد عن الديار والاحبة وعندما دندنت بمجادعتكم والوقت بالسودان خريف تزكرت الرحيل والنشوق وطاف بي طيف من هم بالديار من الاحباب والاهل ولاحت امام ناظري الهوادج والعطاف وعزفت اوتار قلبي مع اجراس الرحيل لحنا حزينا وقلت:-
امس استاذ حسين وودوقه جابو الَزكرِي
قالو قصيد علي خنتيل جناين عَبرِي
مبرومة الحشا الفي قوامها ماهاالفزري
عوداً صب وشارفة شوف ماها الشّوح ولاها البتري
عالية رداف وضامرة هاف وسهما مبري
كحيلة عين ونايرة خَد ولوناً تبري
من نجد الرياض سارق دعاشاً بدري
حلات في كرفو نُوّار السِّعات والكِترِي
سقّد مايقي ساهرت لا طلوع الفجري
والقلب شاشا شاق وشقاتي جلول فِكرٍي
والروح شوقرت شالت (العريد) من بدري
جراساً بنقرن كيف عياط البَزرِي
دليل عطّاف رحيل ضي ناس ابوه البدري
عِزاز في قبايلن ماهن عريباً مكري
بقشٌّو الدمعة حين جور السنين هن دُخرِي
وسريعين نهمه عند قولت حلف وابشرِي
رحلو مغربين طاردين شبوباً بجري
ومادا ضعينتم منصمه قاطعه الفزرِي
وفوق قوزا عضي ويا دابو بتّق بضرِي
نار ام روبا تلت وولّعت فوق صدري
واتوتل فريق ناس ام لهيجا تمري
واتشبح متل هرع الصباح البدري
وبعد ما سوّوا لي المفطوم وسادت الخُمرِي
لولوا ورقّدوا وما بصحا قبل العصرِي
مرقوا يسايلو لي زولاً مخنجك غجري
هو ما ودعنا يوم سافرنا خانقا العَبرِي
اشرنا لينا لولح لينا بي ايدينو داخل الكُجرِي
ياطيرة الخلا القوقايا كر ياقمري
علي الغربة العلي الليلة وجيت جمرِي
قال لي ياولوف ارجع ديارك بدرِي
وطريقة العوده دام مافيها شيتاً جبرِي
فزت من بعيد قدله واخير ليك تجري
ونويت الرجعه عيل في ظنّي ودرت عُمرِي
والقيد انشبل والفارنقز فوق حكرِي
عبيد الطيب (والمقدم)
السعودية الرياض – السودان بادية الكبابيش
(العريد اوام حايمة منطقة جنوب غرب ام سنطة مابين الكبابيش والزيادية وهومكان مخارف كثير من قبائل الكبابيش السعات والكتر من الاشجار ذات الرائحة العطرة في الخريف وسادة الخمره قماش يخلط به عطر الصندل والقرنفل والضفرة والمحلب وتربط في عنق الطفل بضري اي بضرة وهو الخضار الذي ينبت جديدا
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
هنا توجد للقراءة متعه وهنا يوجد للقراءة مذاق وهنا يوجد لها معان عميقه ويوجد
لها دلالات موحيات للكثير وبذكاء حاد_أساتذة من الباديه نشأوا فيها ورضعوا حليب
نوقها آكلة الإكسير وسرحوا بسعيتها وغزلوا شعر ووبر أنعامها ونجروا وبرو خلالات
بهمها ودبغوا جلودها وصنعوا منها السقايا والقرب والجربان وجالسوا فصحائها
وتعلموا أوزانها وصاغوا فيها دررا من كلام ثمين _ ونالوا كما الحضر العلم فزادهم
بسطة فى العطاء والإبداع ومكنهم من المواكبه والتعمق والإضافه إلى مفرداتها الكثير
المثير الخطر _ ففى هذا البوست تجدون موائدا من أدب راق وفن عالى الجوده وتجدون مفردة
غير متبرجه ببلامة ساحرة جاذبه وتجدون عبارة ممشوقة فارهة يطمح صدرها ويضيق خصرها حاملا
لما يليه ولها من العيون ما يسبيك ويسلب كهربانه بصرك عيون كعيون الأرايل فى تلك
الصحارى _الأعزاء الأماجد هنا توجد وجبة دسمه فيها ما طاب وما لذ وما تشتهيه الأنفس من
زاد الروح الجبار وهنا توجد ثقافة كامله وسقاية راويه وتوجد حياة زاهيه فمتعوا أنفسكم
متعكم الله بالصحه.
منصورمنصور
| |
|
|
|
|
|
|
|
|
|
Re: قصيبة المُرنـَع السايقات ########يسك (Re: munswor almophtah)
|
البيطري جمعه محمد سعيد (الكباشي البري) وهو شاعر دوبيت جميل
•ومبدع ويحفظ كثيرا من تراث البادية وشعرها واغانيها ومناسباتها لانه ولد بها وتربي فيها وسرح باغنامها وابلها في وديانها وهضابها وتلالها واستنشق رائحة خزامها وقيصومها وحسكنيتها ونوار كترها وسعاتها وسمرهاواصطاد غزلانها وطيورها وارانبها ولكن كغيره من ابناء البادية بعد ان تخرج من جامعة الخرطوم طب بيطري هاجر الي السعودية والان مقيم بمدينة الاحساء واظنه الان يكتب كتاب عن الدوبيت في بادية الكبابيش وجميعنا متشوقين لان نراه قريبا فالتحيه له من علي البعد والتحيه لكل الذين يدوزنون ارواحنا والتحية لشعراء باديتنا حنفي وعلي الشيخ والشيخ جامع علي التوم والدكتورجمعه والاستاذ سيف الدوله والباشمهندس عماد وابو البرعي والجميع ولكم مني المحبة الصادقة عبيد الطيب (ودالمقدم)
•
•
البرق البعقلولو العطيش في حرور
جاب لينا الدعاش قال الصعيد ممطور
اصبح نملو فوق كوم الدباب منشور
وطربان طيرو هبالو النسيم كافور
اتراحل هرع من غادي جي مدفور
واتحين وقف منلم جميع مضفور
اشابيب النحاسي وصبها المخبور
نزلت ديس فلاني الشبلولو سيور
عينة النترة ساقت وخرف العتمور
والضحوي البعم في صبو ديمة صبور
السيل وهط العالي وعني الشختور
واتخلط رحل عاد كبو مو معبور
الوادي الرفس سقايو في الصنقور
ضهبان سيلو في سدرو الشدر مدفور
متدرع رقبتو وممغي ممسور
وفار جنحينو متمدد بعيد مفرور
لا بتشوف درو ولا بنفرز كرور
ولا بتعرف مفاصل ولا عدل مخبور
صبح رهادو متقرن بعيد ممسور
واتخلط جررب في مشافو بحور
قعوي حبوسو والعك المع الزرزور
بخلفن كيف مزازيق العزف طمبور
يوم التالتة شقاقا قبيل مغبور
شق خضارو من تحت الترا الممطور
سنون البضرة تتلاصف مع الحيمور
تقول زينة عروسا سووا ليها سبور
قرين حشاش الاعب في جنا الزرزور
وتلقى ام قيردون بتنق مع الصقور
داك يوم ام شرولو الحارسة ليها جحور
ومرات في الفروع بتحاكي ابو المنقور
حبال الضريسي اللنشبك سرور
وشوف الدمبلاب كيف الحرير مشرور
الشرا وام اصابع غطن الصنقور
والغف راكب الروب وانشبك طابور
حنتوت المرانع دوو مو محجور
والندي في الفروع برقش تقول بلور
المعراب مجرجخ حارسو ابو الزنبور
ووديان السعات تريانة فايحي عطور
هباب الضهور فوقو النعم مترور
وبتكاسع رتوع بعزل قدر ما يدور
فراع الشدر بتحجنو ام كنجور
ومنزلها السمح قول يا سحي وخافور
بتسرح فوق مضاريب النعام وام شور
وبتجدد عفويا مو عقاب ديور
الربع الدقاق حير غنم كبسور
لا دبسيب بخافو ولا بتروحلو عبور
البرقة ام جرس في شوفها مو دردور
كرالها ونقز في القوز ابو عجور
مع الزمبارة والدمر البقالو بخور
بجر اللودة بتهوزز تقول دقسور
حس الجضي والدك المع الجاعور
دي ام بوح خرفت مرعاها جنو مطور
صعيد سقاينا وعارو انعمس بقور
وبي غربو الفريق شوف طاقو بشلع نور
ضعن السمحة شال واتيامن الواعور
ونزل فوق علويا مو عقاب دامور
ود العمدة قال الليلة عندو طهور
وفي قمرة وخريف عز الشباب طمبور
للصفقة ام رسيس وقفن بنات الحور
وكيف رص القزاز بتلامعن في النور
كفل البرمي سيدو وباللجام مهجور
فيهن بينة كيف شوف المنارة ام سور
مرقت منهن راخي القدم في فتور
وبتوازن رزيز الهزة والحنجور
الديس جر فوق حجلا رطن معصور
وشبال ام سماح حرمان على البزور
تتمايح فريع بانة وحرير مجرور
وتتفدع تقول دابي و سديرها نفور
خريف باديتنا عم من الله خير موفور
وحد ما تشوف عيونك ظني بيك مسرور
يا خضرة وسماحا حدو مو معبور
ويا هرعا بيوشل لاسن القنطور
| |
|
|
|
|
|
|
| |
munswor almophtah
almulaomar
علي الكرار هاشم
محمد المختار الزيادى
بله محمد الفاضل
محمد امين مبروك
Mohamed Abdelgaleel
محمد سنى دفع الله
الرفاعي عبدالعاطي حجر
فيس بوك
تويتر
انستقرام
يوتيوب
بنتيريست