مدخل جانبي .. قالو لي ارجع خلاص قلت ليهم انا ما جيت في بيتكم عشان تقولو لي ارجع قالو لي امشي اتخمد واتلم عند اهلك قلت ليهم انا ما عايز معاكم يا وهم .. !! ذي ديل البدخلو في الحاجة الما عندهم بيها اي دخل يقولو عليهم شنو.. !؟؟
ديمقراطية حادة .. كل بني ادم في الكرة الارضية او حتي علي متن المحطة الفضائية الدولية له الحق في ان يفعل ما يريد وان يقول ما يريد ولكن هذا الحق محدود بحق الاخرين فمثل ما لك من حقوق فعليك واجبات وهي تجاه الاسرة والمجتمع وقبل كل ذلك تجاه ربك لا يحق لاي شخص باي حال من الاحوال ان يقول لشخص ما لم فعلت ما فعلت الا في حدود الاستفسار واذا تعدي الامر ذلك الي جانب الاملاء فهنا يجب ان تكون النهاية ويجب ان يوقف كل عند حده ..
النظرية القردية .. الفهم قسم اساس النظرية وكان الله ما اداك فهم مرات بديك علم ومرات مابديك لا فهم لا علم ويقوم يديك مال ودة الغالب الاعم انو مال بلا فهم ولا علم يعني لما تكون مخك تخخخخخخخخخخخخخخخخخخخخخخخخخين وعلمك قلييييييييييييييييييييييييييييييل وما عارف حاجة بس ميزتك الوحيدة انك زول مقرش الغريبة انو الناس كلها تحترمك لكن يكون عندك مخ فهمان ووجيب تعبان زول يقول ليك الله يجيرك مافي ولو قال ليك بكون قال ليك بي شماتة .. سلوك قردي جدا .. !!!
فلسفة الوجود .. لما تكون زي الما عارف وتقول انك عارف تبقي مشكلة ولما تكون ما عارف وتعمل روحك عارف تبقي دي مصيبة ولما تكون عارف وما عارف انك عارف تبقي حكاية ولما تكون عارف وعارف انك عارف وساكت علي كدة مع احترامي الشديد تكون زول حمار وعايز الضرب ..
قصة قصيرة .. كان عندي زول صاحبي مثقف كدا لمن غلط يعني بعرف ليك حاجات كدا غريبة لي ابعد حد بعرف حاجات لي فيكتور هوجو وحاجات كدا ماجات البلد كان مثقف ثقافة عامة اصلو ما كملت مدد كان بيفهم في التداعي ويتكلم عن الق التصوف وابتهالات التلاقي ما بيزهج من الثقافة كان بينكتب شعر منثور زي درر كان بيرسم لوحات زيت وموية اصلو ما شافوها البشر كان بيتفلسف بي كلام سقراط وينقد لي فكر ابقراط ذاتو كان بقول في الحكمة كلمة وفي الشعر الحديث كان عندو كلمة كانت ثقافتو من بلدنا خالية من تعالي واندفاع ما بيتفاخر علينا ما بيحاول يورينا علمو ولا بيتشدق بالفراغ كان كلامو موزون في محلو كان مثقف كان مهذب كان مؤدب ما بحط من قدر غير لي مجرد شكل برة الا هسع وناس زمنا لينا الله والله يستر يا اهلنا كل زول شافوهو قالوا جاهل امي لا بيقرا ولا بيكتب ما بفرقوا بين زول وتاني الا بي شكة وجاهة قشرة براني شكل خارجي مافيه جوهر والمثقف عندهم يقدر بي شكة حلوة وجزمة تلمع وعربية تبهر وكم كلمة من كتب ابن المقفع قالها ثعلب او حتي جرقاس بي ضنبا ملولو ما مهم قالها كيف او حتي ليه المهم قالها وخلاص يا خسارة ويا خسارة سجم ام البلد الراجية العقاب وتفو يا زمن
فلسفة الارتقاء .. كيف تمتطي جردل البلدية وتحارب به ؟ كنت بسال نفسي السؤال دة لحدي فترة قريبة كيف تعمل كدا وبتكون كيف احاسيسك وانت معنقل فوق جردل البلدية وبتحارب في قامات وما قادر تحصل ربع مستواها كنت بقول انو الزول البيعمل العملية دي اكيد وقطع شك عندو خلل في مخو او زول عايز يوصل لي اماكن ما كان يفكر انو يوصلها واهو وصلها بي وساطة شيخ بيل قيتس وناس البنتاغون والجيش الامريكي البدا ليه الشبكة البتفاصح فيها دي المهم في الموضوع شعورنا نحن وهو بنثر لينا في اوساخ جردل البلدية علي قارعة الطريق .. انها الديمقراطية .. يا رجل
11-14-2003, 07:20 AM
humida humida
تاريخ التسجيل: 11-06-2003
مجموع المشاركات: 9806
علامة تعجب .. لقد وقع حائط الجالوص على السرير .. الأمطار كانت غزيرة .. النيل ذاته فاض وخرج إلينا من مجراه .. في أوروبا المطر دائماَ ما يكون ثلجاً .. !!!!
11-14-2003, 07:26 AM
humida humida
تاريخ التسجيل: 11-06-2003
مجموع المشاركات: 9806
نعي أليم .. رحمة الله عليه .. لقد بكاه الكثيرون في ذلك المساء الشتوي القارس ، فقد قفز من سور المستشفى هارباً منها بعد ان مكث فيها شهراً كاملاً ، وكان الممرضون يلاحقونه لإعادته ، لكن نشلته الأقدار وهو يجري قاطعاً الشارع وهو يصرخ بعد ان استعاد حرية النطـق في تلك اللحظة فقط .
11-14-2003, 07:33 AM
humida humida
تاريخ التسجيل: 11-06-2003
مجموع المشاركات: 9806
امتطت صهوة الحلم اربعين عاما لم تكن تعلم انها إنما تمتطي فراش مخملي جفل والقى بها عندما تناثرت التجاعيد في وشها المكرمش عرفت وقتها انها كانت مجرد وسادة وفرحت برغم قساوة النهاية ولكنها جعلتها بداية
11-16-2003, 07:58 PM
humida humida
تاريخ التسجيل: 11-06-2003
مجموع المشاركات: 9806
.. لو كنت الرئيس .. أضرب جرس لى ناس السودان كلهم .. الخمسة وعشرين مليون .. شيبهم وشبابهم وشفعهم .. اسوقهم كلهم أمشى بيهم لى صحراء العتمور .. أقيف أنا فى كوم تراب عالى .. وأقول ليهم أبقو لى كومين .. الناس الأكبر من خمسة سنوات يجونى بى هنا .. و البقية يقيفو لى هناك .. الفوق للخمسة .. أكب فيهم جاز و احرقهم .. أخم رمادهم و أكبو فى النيل .. أكورك بى طول حسى .. دا الرماد الكال حماد .. أشربو وأكلو يا أولا بمبة .. ألم الأطفال الأبرياء ديل و أشتت بيهم لى أوربا .. مش أوربا كلها .. أكتر خمسة دول راقية .. وكندا و أمريكا .. أقول ليهم ليكم اللحم ولينا العضم .. أجى راجع السودان .. أجيب لى مقشاشة كبيرة وأكنس .. ,ادفق الوسخ بى غادى للبحر الأحمر .. و أقول ليهم خمّو وصرّو .. بعد خمسة و عشرين سنة بكون نضفت الأرض كلها .. أرسل كنفوى طيارات .. أجيب الشباب ديل .. لمن الطيارات تهبط بب فى مطار الخرطوم الجديد .. أكون كملت الافتة الكبيرة فى صالة الوصول .. هذى بلدكم فأبنوها .. أنتم بنوها .. أتوجة على مصفى الجيلى .. أجيب فنطاز كبير مليان بنزين .. أنط جواهو و أشخط عود الكبريت
11-19-2003, 07:57 AM
humida humida
تاريخ التسجيل: 11-06-2003
مجموع المشاركات: 9806
اتمنيت كتير اصبح الاقي نفسي يا دنياي كفيف عشان مليت اشوف الناس مواكب زيف يجي من بعدو زيف يجوك نضاف تعاين تلقي كيمان الوسخ ملفوفة بالتوب النضيف وتلقي اللص يتاوق ليك من عين الشريف فجور الدنيا، كل الدنيا في العامل عفيف!! تصور! كيف يقالدك زول تقبل تلقي في ضهرك مركب ليك سيف
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
humida
aba
فيس بوك
تويتر
انستقرام
يوتيوب
بنتيريست