دعواتكم لزميلنا المفكر د.الباقر العفيف بالشفاء العاجل
|
|
 انتو ما شايفين المنبر بتاعكم دا .. فيهو ركشات .. !
|
اها طوالي كدا ..
قلت ليهو لكن يا بروف ..
الانبعاجية الاساسية في المنظومة الآحادية الجانب ..
بتتجه صوب تمركز القوي العاملة في دول شمال الكاريبي ..
مما يؤدي الي ارتفاع مؤشر داو جونز الي معدلات قياسية ..
قد تحدو بدول شلة اوبك .. بأدانة العنف في منطقة البحيرات ..
وهو ما دعى الرابطة الاوربية بقيادة الحكم كردش بفرض سياسة فك الارتباط ..
والتي أدت نتائجها الي فركشة خطوبة سهير .. !
بعد ما دقت الحاجة كلتوم .. الثكلي .. وقالت العريس دا جنسو شنو ..
والله عمتو دي .. فيها إنة .. ؟؟!
عايني ليها عليك الله يا بت امي شعراتها ديل ..
كل خمسة عاملات اجتماع ..
بري .. بري .. يا بوش ..
خطة الطريق دي ما بتفع معانا .. اخير منها فك الارتباط .. !
وشال عصام .. دلاقينه وفرتك ..
وهبطت اسهم سهير بشدة .. في بورصة اولاد الحلة .. !
نطط عيونو ..
وقال لي يا حميده يا ولدي ..
مالك .. دا شنو الكلام البتقول فيهو دا ..
انا ما قلت ليك البنقو والطرق الصوفية ديل بجيبوك لورا ..
هي لكن يا بروف انا ما حدثتك ..
طرق صوفية شنو ..
انا ما بقيت مثقف .. وشيوعي ذو اتجاهات لبرالية منفتحة علي سياسات السوق ..
من جهة ..
وجمهوري فدرالي .. منشق الي نصفين .. جناح معارضة .. كلاشنكوف سفروك ..
عضلات تبش ..
من جهة آخري ..
وفي الاوفرتايم .. بشتغل مرات لجبهة تحرير الجضاض .. في هنولولو .. !
وهسع مقدم لجوء سياسي .. في بعض الدول الاسكندنافية ..
نظام عمرة .. وزوغة .. وكدا .. !
والله يا بروف ..
زمان كنت بقرأ جرايد ...
اها قلت الجماعة ديل بتفلسفوا كدي .. عشان بدوهم قروش ..
واكل العيش ما هين ..
اها جينا في العنترنت دي ..
لقيت ليك الناس دي .. كل زول سايق ركشتو في اتجاه معين بزاوية حادة ..
ويجدعوا فينا بالكلام ..
شيء نفهمو .. وشئ نقول ليهم ( ...... ) .. للضمان يعني .. !
تصدق يا بروف ..
في اتنين متشكلين في سياسة الانغلاق الحر في مرتكزات الديمقراطية لشعب الغابون ..
الكيبورد قرب يقوم جاري ..
هسع عليك الله لو استفادو من امكانياتهم دي ..
ومشوا شافوا ليهم محل طباعة .. واشتغلوا فيهو ..
وجو دفعوا قروش الضرائب المتأخرة عليهم دي ما احسن ..
منها يقدروا يرجعوا يشوفو اهلهم .. ومنها يكونوا دخلوا قروش لناس الجبهة ..
اصلو باقي ليهم ذي تلاتشر حرامي كدا لسع ما اغتنوا .. وتنتهي القصة ..
وتجي حكومة جديد .. تستلم العفش ..
رغم انه المعلوم صراحة .. ان العفش داخل البص مسئولية صاحبه ..
لكن صاحبه ذاتو قام جاري .. ومشا اغترب ..
لانه العفش القديم دا .. ما فيهو ملايات امريكية ولا تياب سويسرية ..
اها مشا يجيبهم .. ولي هسع ما رجع ..
اصلو العشرة سنين الاولي في الغربة .. بتكون حارة ..
وبعدها بتتعود .. والرجعة ذاتها بتبقا صعبة ..
وذاتو عليك الله يرجعوا لمنو ..
عم ابشر سيد الطابونة ذاتو جا عمرة .. وزوغة ..
تاني الراجعين ليها شنو .. الطابونة وقفلت ..
حتة نقيف فيها صف بقا مافي .. الا صف شباك الألزامية ..
وبعدين تعال هنا ..
دحين البشرية دي .. خلي بالك علي قدر فلسفتها الكضابة دي ..
ما بتقدر تسويها في البلد دي .. الا يمشوا الواق واق .. ويجونا بالبدع ..
الناس هنا معروفين .. هم شنو .. لكن في البلد الباردة ديك .. حدث ولا حرج ..
الواحد يقعد يطق الحنك .. لمن يرجع ليهو الصدى .. ما في زول بقول ليهو ام بق بق ..
عليك الله هسع شفت فصاحة .. شروم ود السرة ..
لقيتو منجعص وسط الجماعة وشابكهم ليك .. والله الهويمن رايس دي شيتن عجيبة بالحيل ..
قال لاقاها في شارع الشافولزيه .. في اول درب التبانة .. جنب طرمبة شل ..
وشل زاتو كان ساكن جارهم ..
وشيتن عجيب وغريب يا بروف ..
كلو معارضة .. وكلو مناضل .. وكلهم طلعوا كلاب الحكومة ساكاهم ..
شوف عيني تلاتة ارباعهم .. عملوا ليهم حفلة وداع .. ما جا فيها غير عسكري ...
كايس حق العشا ..
ما سمعنا بزول هرب بالحدود .. غير مولانا .. !!
ودا زاتو قالوا بتحت تحت .. الجماعة اساسا كانوا دايرنو يتخارج ..
كلو طلع بالمطار يا بروف .. وبجواز سفر .. ماضي فيهو عبد الرحمن ود حسين ..
وبطاقة بتاعت بلاستيك .. مكتوب فيها .. يسمح له بما عدده واحد سفرة .. وعيشة ذيادة
بس يتلب بيغادي ..
يقول ليهم شفتو قميصي المقطوع .. كان متشعلق فيهو عسكري ..
يا كافي البلا .. بلد كاملة ما فيها مناضل .. يضرب بيهو المثل ..
يقعد يتعذب لمن يعرف انه الله حق .. عشان يبقا قدوة ..
كلو قام جاري يا بروف ..
ولمن كشونا في دفار الألزامية .. قالوا علينا جبهجية ..
ها يا ناس .. ها يا طير ..
ما لنا ما نبقا جبهجية .. ما برضو كايسين الطرطيبة ذيكم ..
بس نحمدو ونشكرو .. رطبنا في توريت ..
علي الحرام البعوضة تقيف وتناضمك .. تقول ليك انت بني آدم ..
ولمن تقرصك .. والله يا بروف لمن تحس بطنها طامة ..
بس مجبورة .. اكل العيش ما هين ..
وبعد دا يجيك واحد .. راسم صورته في الحيطة ..
وخانق رقبتو .. بفوطة .. والشعر كيمان .. كيمان ..
ومركب نضارات .. ذي فانوس الفلوكسواجن ..
ويقول ليك .. ينبغي في ظل المرحلة ..
يا زول .. ينبغي في ضل المزيرة ..
قوم امشي شوف ليك شغلة .. !!!
وبرضو تقول لي الشمالية للشماليين ..
والله دي لو فكيت فيها ضب .. يقعد يبكي ويقول ليك داير امي ..
عملتوا لينا .. قلق عضوي في منهاتن سيتي .. !
مش برضو في حاجة بالشكل دا .. !!
|
|
 
|
|
|
|
|
|
|
 Re: أنت قصدك بتانية ولا بتارية ! (Re: humida)
|
فلسفة المواجهة وراء القضبان!
للإحتلال الصهيوني مدرسته العنصرية الفاشية التلمودية في التحقيق مع المعتقلين واستخدام مختلف الوسائل للحصول منهم على معلومات، الهدف منها تثبيت إدانتهم بالتهم الموجهة إليهم، ثم استعمال المعلومات التي يحصلون عليها في التحقيق، لكشف جوانب العمل السري المتعلقة برفاقهم، ومحاربة المناضلين الآخرين، وقهر الشعب الفلسطيني.
لذلك,
ومن أجل تثقيف المناضلين، قامت مجموعة من الأسرى الذين خبروا التحقيق والسجون، قبل عدة سنوات، بإصدار كتاب بعنوان، (فلسفة المواجهة وراء القضبان). يحدد مجموعة من المفاهيم والبديهيات، ولخص مجموعة من التجارب، ويبين الأساليب المختلفة التي يتعرض لها المعتقلون في معتقلات العدو الصهيوني، في محاولة منهم لتسليح المناضلين ضده، بالمعرفة المسبقة والعلمية حول التحقيق واساليبه، لمساعدتهم على الصمود والتحدي امام المحققين، ولحماية الثورة والمناضلين والمجاهدين الآخرين، وذلك بتعريفهم عما ينتظرهم في أقبية التحقيق، وشرح أفضل الطرق للتعامل مع المحققين، فلا يفاجؤون مفاجأة قد تدفعهم إلى الإنهيار.
أذن,
فعليك به يا حميدة...
عساه يصدر شعاعاً
هنا:
http://www.freearabvoice.org/arabi/intro.htm[/B]
| |
|
|
|
|
|
|
|
|
|
Re: انتو ما شايفين المنبر بتاعكم دا .. فيهو ركشات .. ! (Re: humida)
|
رسمتك زرارة فى جيب القميص
بشيلك نفس سجارة خريف
واشوتك
واشوتك
واشوتك
عشان يوم خميس
وبرضو تقولو لى الموناليزا فارشة مديدة دخن فى شيبردبوش
اهم حاجة ياحميدة لم تقرا الشعرالذى دا تكون بتعاين للسماء وتطقط اصابعك ولو فى حتة مقفولة ماتعاين لى فوق عشان مايقولو مهجوم بى مروحة السقف ولا كاسرة فيك ضلعة النجفة.
انور:جبتا لينا الهواء فى بوستك بتاع الثقافة ماخليتنا نتوهط جونا الجهابزة اياك والمحاولات التخريبية لهذا الاندياح
| |
|
|
|
|
|
|
|
|
|
Re: انتو ما شايفين المنبر بتاعكم دا .. فيهو ركشات .. ! (Re: wadaldeem)
|
ود الديم .. النحوي ..
سياسة الانزراع الفكري الحايمة في البلد دي ..
اهم اعراضها الحمي المخملية التي تصيب مشط القدم ..
مما يؤدي الي انتفاخ في الاوداج من اثر الفورموست والدويكسين
الناتج عن الدجاج المبرد ..
ولاحظ معاي يا اخينا .. الدجاج .. ما الجداد ..
في ذات الهم .. نجتمع ..
وكل زول يقعد يتفلسف .. لمن نقدها ..
شكرا ..
| |
|
|
|
|
|
|
|
|
|
Re: انتو ما شايفين المنبر بتاعكم دا .. فيهو ركشات .. ! (Re: humida)
|
حميدة
تحايا ابقوتاوية..مع زرات من مطر الرياض المفاجىء
انا من اسبوع متابع الركشات... مع انو عارف المشى وراء الركشات برمى فى الحفر
ودى المعلومة الوحيدة التى استفدتها من دراستى فى الهند..لان الركشة...بتلف وتتركك فى الشارع..زى لما تكون عاوز تدفر باب واخر فتحه قبلك...كدى جرب الحركة دى فى المبنى الشغال فيه اها ياحميدة...كل يوم بتابع فى بوستات المنبر بفتش.. لبكرة فى زول قديم حامل فى قليبه حب الاخرين..واحترام الشلة البوردية واكرام مسامعهم من سقط الكلام..لان القدامى تادبوا بادب الاختلاف...وهذا الدرس لا تفهمه الا بعد شكلة ليها ضل...ثم تحرد وتدخل واسطات ويفتحو ليك بوست عشان تجى راجع...رجوع القافية لقصيدة النثر....وتفككيك الاصم لادب الفيا....
اها كيف ناس الدمام..عاملين..مشتاق لى كوستا...ذو الادب الجم...ونايل كمان قالو جاكم بهناك.....لكن تحليلى لكلامك المربط دا...انو الركشات ديل جو من مكان واحد حاملين معهم
خلاف المقاهى...وتربيزة الكيرم...وما ظنييتهم تجمع طلاب...ولكن لمة لناس بفتشو فى مخرج...
خرجو من بوابة واحدة وتفرقو..فى دول عالم اخرى... حاملين معهم الحلم المستحيل...والوطن المغلوب على امره...فكانت لفات الركشات المفاجئة...على رصيف البورد المنجل....وغياب العاشقين فى بحر المتع..خليهم يلفو انا عامل حسابى....لكن الحق صاحبك بحيرى وقع فيها
لوووووووووووووووووووووووووووول
ابقوتة_فى ساعة الدوام
| |
|
|
|
|
|
|
|
|
|
Re: انتو ما شايفين المنبر بتاعكم دا .. فيهو ركشات .. ! (Re: abuguta)
|
ابا قوتة ..
حياك الله .. بمطرة الساعة سبعة ..
تصدق كنت حاضرها ..
اما عن عزيزنا كوستا ..
فالعلم لله .. فص ملح وداب ..
ام عن هؤلاء .. فالمخرج واحد وتعددت السبل ..
فكانت الرؤيا .. ذات اتجاهات ..
وكل يلقي بعصاه .. لعلها تلقف ما يهترشون ..
فتأتي تلك .. كما قيل فيها .. ما أنزل الله بها من سلطان ..
او كما قيل .. وكله وارد في الاثر ..
وفي القريب العاجل .. سأريك بتجربة عملية ..
اننا .. طقاقين حنك .. !
اتمني ان تستطع معي صبرا
| |
|
|
|
|
|
|
| |
humida
AnwarKing
Hussein Mallasi
mohammed alfadla
Sidig Rahama Elnour
حبيب نورة
abuguta
فيس بوك
تويتر
انستقرام
يوتيوب
بنتيريست