كان يستمتع بمزج الألوان على طريقته الخاصة بداخله .. لا يركز كثيراً على الأسود، يتحاشاه حتى في الرمادي من الأشياء يفصله بتفاؤل .. الأبيض فيه احتل مساحات شاسعة لفترات طويلة جدا .. بدقة أكثر .. منذ ميلادهـ الذي أصر ألا يمجده مجددا في سجـل كل التواريخ إلا (معها)، أسقطه كما الأبيض.. كما سقطت نواياه في حوامته المعهودة استفزته عدسة سوداء ضخمة معروضة في إحدى الفترينات الزجاجية .. تفحصها بعناية فهي ملائمة للمرحلة مزيج من الأسود الوردي والأسود القاني جدا كما يراهـ بمزاجه اللوني . انتبه لدرجات الأسود بداخله اتخذت عدة أشكال منذ أعوام قريبة وهو الضليع في تشكيل الألوان ـ يمكن أيضاً أن يخلط فيها .. العدسة .. الألوان وفق مزاجه السابق قبل أن (تعكره) بغير ضمانات كافية انتهت بخسارة فادحة في النفسيات ـ كانت العدسة تستوعب وتعكس تفاصيل المارة بكامل ألوانهم رغم سوادها.. العدسة..، بعضهم يمرون ويبتسمون مسقطين الرقابة الداخلية للعقلانية.. بعضهم يرونهـا حجراً اسوداً يحتمل التطواف والالتصاق والتقبيل بنية سليمة وغيرها، سيدات بحجم المعاناة يتحسسن مخلفات عوامل الزمن .. صغار يفلتون أصابعهم الصغيرة من بين الأيادي فجأة ويشخبطون بها ما علق من أمنيات ويعودون للتشبث مرة أخرى .. آنسات يتدللن أمامها ويتوددن يسجلن ملاحظاتهن في الذاكرة.. بعد خطوات تعاود البودرة تغطية الخلايا بكثافة عند اقرب ملف ويمرر (قلم الحواجب) شاطبا ما دٌوِّن من (ملاحظات في الذاكرة) .. هكذا احتملت ما التصق بها من أمنيات.. العدسة.. وابتسامات وقبلات وأحمـــر للشفاه.. وأمنيات.. صارت عدسة سوداء للأمنيات الورديـة. في تحديقه اليومي فيها .. العدسة.. عبرته قنينة عطـر أنيقة .. تدفقت أنوثتها فواحة .. عطرت عدسته باللون البنفسج .. واحتلت مكانا خاصاً.. اختارها عدسته اللاصقة بلون البنفسج.. كان يمزج بها كل الألوان يرى بهـا.. يلامسها بحاسة الشم يغازلهـا مكتمل الحواس كان يعشقها بحواسه العشـرة..
في تحديقه اليومي فيها .. أحبها بجنون ـ اصطحبته لكل الأمكنة ـ وقفت عند العدسة السوداء .. أمام المحل التجاري ـ تركت صندوقاً ضخماً لفته بحرير عطرها الفواح .. كتبت: لك وحدك أضمر الجــراج .. يفتح بعناية .. بداخله بعض رحيقي.. فتحـــه .. بلهفــة .... كرتونـة .. من النظارات السوداء ..
05-28-2008, 10:51 AM
walid taha walid taha
تاريخ التسجيل: 01-28-2004
مجموع المشاركات: 4199
Quote: ليت العدسة تتسع بقدر أرحب لتكبر ما(نُصّغره) من الأمور ليبدو كبيراً بحجم الحقيقية حينها يمكن ان ندرك او لا ندرك. تحية لكل الألوان
.. ليتها (كـــان) في نيتها الاتساع .. بضيقهـا، أدركت أن كل العدسات متشابه .. مقعرة على محدبـة .. صفراء أم زرقـاء ام من غير .. يظهـر أنو المسالة محتاجة لي خلط الالوان كلها مع بعض .. كلللهـا .. ح تديك جوطة عجيبة مش كدا ..؟
وليد طــه .. حمد الله على السلامة .. الرياض نورت .. يا هلا بييك.. قالو لي مكربن عديل كدا .. حقك علينا .. المهم عايزين نشوفك ..
05-28-2008, 05:47 PM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
Quote: اختارها عدسته اللاصقة بلون البنفسج.. كان يمزج بها كل الألوان يرى بهـا.. يلامسها بحاسة الشم يغازلهـا مكتمل الحواس كان يعشقها بحواسه العشـرة..
ألألوان خلق الله البديع فى الطبيعة....تخيل يا اخى..كيف يتحول شعورك من تلفزيون ابيض وأسود إلى تلفزيون ملون..
..وأظنك يا تمبس حضرت التصوير أبيض وأسود..ما تقوم تعمل لى فيها سعنبوتى..ومولود أمبارح..شوف الصورة رغم وقتها كانت لها معنى إلا أنها ومع عوامل التقانة.زى ما بتديك قرب الحقيقة
وألألوان تدل على الشخصية......وبصراحة..أنا مكسر فى البنفسج......
مودتى...
إسماعيل محمد احمد عباس..
06-04-2008, 10:43 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: وأظنك يا تمبس حضرت التصوير أبيض وأسود..ما تقوم تعمل لى فيها سعنبوتى..ومولود أمبارح..شوف الصورة رغم وقتها كانت لها معنى إلا أنها ومع عوامل التقانة.زى ما بتديك قرب الحقيقة
.. والله يا سمعة نحمد الله التلفزون الابيض واسود حضرناهو .. بتاع الفورمايكا الكبير دا ابو صباعات .. اضف لذلك لعبنا زنق البصلة .. والحركات دي كلها عملناها .. الواحد شغال خبرة ساكت في الدنيا دي.
Quote: وألألوان تدل على الشخصية......وبصراحة..أنا مكسر فى البنفسج.....
بالضبط يا اسماعيل .. الالوان وسيلة فعالة جدا تستخدم لكشف الشخصية .. الرسم والتلوين من انجح الوسائل البتكتشف شخصية الطفل .. البنفسج يساوي سخونة الأحمر وهدوء الأزرق .. لو استعملناهم بمقدار عقلاني .. بتطلع لينا خلطة بنفسجية جدا .. ولو ط فصلناهم من بعض .. افضل الأحمــر القاني .. عندما ترتديه ......... فعندها تظهر عظمة الخالق في الجمال ..
06-04-2008, 07:25 PM
Emad Abdulla Emad Abdulla
تاريخ التسجيل: 09-18-2005
مجموع المشاركات: 6751
درسونا في الرسم إنو مافي أسود .. و لا في أبيض .. الأسود هو إنعدام اللون .. و الأبيض هو اللا لون .. على كده يبقى الرمادي صاع .. ( هذا .. و أنا ضد النظرية و النص المقدس على طول الخط .. و إلى الجحيم بكل القوالب ) .
بعيد عن باليتة ألوان الإحساس .. و النساء القاهرات الجبارات اللائي يمزجن المزاج على كيف كيفهن .. بعيد عن ده .. قال لي " السر بلفة " مرة و هو ( مستكين ) .. : إنت يا " غُرجي " لو كنت باريت الرسم ده كان بقيت زول .. خليني أمررها ليك : لو ختيت الرحمن في قلبك يا أصلي .. و كتبت بالمزاج العالي ده .. ح تعدل لينا حال رويحاتنا البيض دي .. و تاخد فينا الأجر .. ياخي الغنا و الكتابة و الرسم و النقة السمحة مع الأصحاب و القراية الرايقة .. أنا مقتنع المحن دي بتبقي الزول ( مواطن صالح ) .. قول أنا مقتنع .. إنت البيقنعك شنو ؟
....... ده نص بطال بطال .. و ظبط لي مزاجي .. فأنا الآن متكيف 24 قيراط .. فياخي شكرا ياخ . كما نفيدكم بأنك بقيت زي تراجي .. جنك وشوش صفرا .
06-09-2008, 09:02 AM
tmbis tmbis
تاريخ التسجيل: 10-19-2002
مجموع المشاركات: 24862
حكاية اللون دي غريبة يا اصلي .. قبل كم يوم كان في يوم التشكيليين عملوهو الشباب هنا في الرياض .. كان حاجة عجيبة جدا .. تعرف والناس بتلملم في العدة ورسومات الشفع وشغل الزيت والموية والباستيل ، كان في تربيزة مفروشة فيها الالوان والحاجات دي .. تخيل إنو الالوان دي جاطت مع بعض كدا .. في التربيزة دي .. وعملت عمايل .. طلعنا ليك منها مليون بورترية .. في شافع كدا لوان جدا وشاف .. تخيل طلع ليهو عجلـة من التربيزة دي .. عجلة غريبة جدا انـا طلعت لي بورترية (جكسايتين) وآخــر لي جلابي بي عمه .. وطلعت لي مفـتاح تخيل من التربيزة دي ذاته .. على كدا يا فرده انا بتفق معاك في تحريك الالوان العملتو لي دا .. بس يجزيك الهل خير لو نزلت لي اي لون للعدسة دي يا غرجـي .. العدسة دي حساسة جدا بالنسبة لي فهمتني ..؟
Quote: خليني أمررها ليك : لو ختيت الرحمن في قلبك يا أصلي .. و كتبت بالمزاج العالي ده .. ح تعدل لينا حال رويحاتنا البيض دي .. و تاخد فينا الأجر ..
تعرف زي ناس "السر بلفه" ديل يا اصلي ديل البزرعو فيك الامل انك تطور حتى فهمك للحياة .. لما يشوفو فيك حاجة سمحه ويدردقوك ليها دردقه .. زمان في الابتدائي كان اخواني الاكبر مني في المدرسة بنتظروا وكت يذيعوا النتيجة علشان اكنن في العشرة الاوائل .. وما حصل خذلتهم .. بي بلادتي الشايفه قدامك دي .. لكن طعم الحاجة دي لحدي الآن موجود في لساني .. لكن يا غرجي وين في البورد دا من (الدربكــه) الشغالة دي .. ياخي ديل كان ما مشيت ليهم بتلقاهم شايلين صورتك بيهتفوا بيها في لافته كبيرة .. علشان كدا خلينا في القصة بتاعت الحرب المقدسة دي .. والواحد لما يدخل السستم .. يجي يكب العندو بي غبارو دا
Quote: ده نص بطال بطال .. و ظبط لي مزاجي .. فأنا الآن متكيف 24 قيراط .. فياخي شكرا ياخ . كما نفيدكم بأنك بقيت زي تراجي .. جنك وشوش صفرا .
شكرا إنت دا يا اصلي .. ممكن اعتبر دا زي الانتظار القلتو ليك فوق بتاع العشرة الاوائل دا .. وياريت المزاج طوالي الف .. يا عمدة وأرجو ان تنال وشوشنـا استحسانكم بقدر ما افرطنـا فيها من صفــار .. دي وشوش بكري كلها كدا .. الواحد تاني يجيب وشوش من بره ويجي داخل البورد دا ..
Quote: تم التعديل بحزف (ثرثرة) لا داعي لها .. وزي ما بقولو ( لا بتودي لا بتجيب )
حرام عليك يا عمران .. دا شنـو العملتو ..؟ ياخي كتابتي دي ما هي إلا ثرثرة طلعت في الوقت المناسب .. على الاقل بالنسبة لي .. احتمال كنت محتاج ليها لحظته .. لكن كيف تسول لك نفسك انك تثرثر هنا دا وتمسح .. المسالة ما علي كيفك والله .. تجيب الثرثرة نفسها .. يا تجيب ثرثرة غيره .. طالبك بسيدنا النبي يا عمران .. مش احتمال تكون شفت غير شوفي الشايفو انا ونضاراتك ابيض من نضاراتي السوداء دي ..؟
06-15-2008, 08:51 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
فوق لمزيد من التحنيس ... هيو ها ... إنت قايل (النجر) ده ساهل كده ؟؟ ياخي دي حالة (تجلي) ما بتجي طوالي كده ....!! وعايز لي جو معين فيهو درجة الحرارة لا تتجاوز الـ 20 درجة مع(همبريب) يداعبني (مرة مرة ) .. وسكون تام حولي حتى لا تتشتت (((أفكاري))) .. شفت كيف ؟؟؟؟ . . . . الثرثرة حافظنها في أرشيف الثرثرة بتاعنا بس زي ما قلت ليكـ ( شد حيلكـ شوية في التحنيس ) ... وغــــــــــــد ...
06-15-2008, 08:51 AM
tmbis tmbis
تاريخ التسجيل: 10-19-2002
مجموع المشاركات: 24862
Quote: وعايز لي جو معين فيهو درجة الحرارة لا تتجاوز الـ 20 درجة مع(همبريب) يداعبني (مرة مرة ) .. وسكون تام حولي حتى لا تتشتت (((أفكاري))) .. شفت كيف ؟؟؟؟
.. .. إنت قايل نفسك فريزيان بكري الفوق ديل واللا شنـو..؟ تعال (صلح وشـــك) في حي السفارات .. ونمشي السفارة السودانية نضرب الكركدي .. وكل البروسيجرس دي عليك طبعا .. معقولة يعني نشممك هوا ونشربك كركدي من السفارة وعايزنـا كمان ندفع .. ليه اصلو شنـو .. إنت قايل نفسك الخال سارة عيسى
غايتو كان عارفك سغيل كدا ولابد بالكتابة وعايز ليك امتيازات خاصة ,. والله ما كان حنستك
اكتب ياخ شايفك روحك محرقاك اليومين دي واصابعينك ماكـــلاك ..
06-15-2008, 09:45 AM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
أنا أصلو (قنعت) من خيراً فيكـ مما مشيت حي السفارات وبقت (خدودكـ) ناعمة وايدكـ أقله سلام (رجال) بيخرشة ليكـ وعرفت ان الغلابه والمهمشين خسروا (قلم) سنين . وأيِ كلام بعد ده (تكبوا) لينا هنا يبقى (ترف) مرتاحين ساكت يا وغد ياخي أنا شكلي حاقد عليكـ شديد في حكاية السفارات دي وعايز أتحلى من فرناغة شارع جرير دي
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
tmbis
walid taha
ismeil abbas
Emad Abdulla
عمران حسن صالح
فيس بوك
تويتر
انستقرام
يوتيوب
بنتيريست