|
|
 رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه )))
|
ست سنوات بالتمام والكمال وأنا أرسم لنفسي خطة الوصول براً الى مدينتي بورتسودان ،،،
ست سنوات وأنا أخط على الورق رحلة العمر هذه ،،،
ست سنوات وأنا أرسم فى مخيلتي تفاصيل دقيقة لقادم آت فى المستقبل المجهول ،،،
ست سنوات وأنا أتوق لتوثيق مسيرة رحلتي ما بين الدوحة وبورتسودان لمسافة تمتد لآلاف الكيلومترات ،،،
الفرصة أتتنى أخيرا هذا العام 2008 ،،، وقد تكون بالفعل رحلة العمر ،،،
رحلة تحوي بين طياتها أحلام الشباب إن لم يفتنا هذا الحلم وأعني بها إكمال نصف الدين كما يحلُم الكثيرون ،،،
رحلتى هذه المرة للسودان عبر المملكة العربيه السعوديه قد تكون فأل خير لى لتخطي هذه العقبة وكسر هذا الحائط ،،،
رحلتى تأتى وسط أُنس أألفه للمرة الأولى ووسط صداقات جديدة طرحت زهرها عبر منبر الإنسانية سودانيز أون لاين ،،،
صداقات أعتز بها جدا من بينها وجوه لم أرها حتى الآن وأخرى أحلم برؤيتها والتعرف عليها ،،، وثالثة حزنت كثيرا لتأخر تعرفي عليها ،،،
رحلتى لبورتسودان مدينتي ستكون توثيقا لصداقات قادمة عبر متواليات الأيام ،،، ستكون حلما قادما فى حياة إنسان أضناه البعد عن عشقه السودان ،،،
على بركة الله أغادر أمسية الخميس القادم الموافق 29 مايو 2008 متوجها الى السودان عبر المملكة العربية السعوديه وفى الخاطر أشياء كثيره أسأل الله أن تتحقق ،،،
دعواتكم لى بسلامة الوصول والعوده ستكون ونيسي فى طريق الرحلة الطويل نحو بورتسودان ،،، ونحن معاً على موعد مع التوثيق الكامل لهذه الرحلة منذ لحظة المغادره وحتى العوده بمشيئة الله ،،، قلوبكم معى هى دافعي نحو الهدف المنشود ،،،
مع عظيم محبتي وتقديري وإمتناني ،،،
|
|
 
|
|
|
|
|
|
|
 Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: محمد خليل ساني)
|
محمد خليل ,, يازول معجون من صندل ومحلب ,, ياطيب ,,
والله حنفتقدك كتير كتير كتير ,, وأخيرا إتكلموا فوقك ؟ إنشاء الله ربنا يتمم على خير ,
ومن القلب ليك التهنئه الحاره وتمشى وتجى بالسلامه عشان نمد الافراح من معيذر وحتى
جسر البحرين الجديد مرورا بالخور ,, رحله بريه موفقه إنشاء الله .
وماتنسى العمره بالله , أصلوا قالوا الحلفاويين دائما بنسوها ,, غايتو العرس لو فى
يوليو قطع شك بحضروا ,, بس رسل لينا رقم التلفون من هناك ,,
تحياتى وأمنياتى الطيبات ,,[/B]
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: كمال سالم)
|
الزعيم كمال سالم ،،،
يا أول العابرين عبر هذا المكان ،،،
كلماتك تنم عن ذوق كبير وحب لا محدود وإحترام دفين ،،،
لو كنت اعلم أن مثل هذا الكلام سيقال فى هذا المقام ،،،
لقررت السفر منذ زمن بعيد ،،،
 ضحكتني والله ،،، مين اللى غشاك وقال ليك إن الحلفاويين بينسوا العمره ،،،
ما تصدق يا زول أهلنا أكتر ناس بـ يحجوا ويعمرّوا كمان ،،،
والعمره طبعا من الحاجات اللى مودياني بالبر ،،، وربنا يتممها لينا ويقبل قول آمين ،،،
وإنشاء الله ربنا يسهل موضوع العرس ونفرح كلنا مع بعض فى السودان والدوحه والسعوديه كمان ،،،
لك التحيه عزيزي وعبرك لأهل بيتك الكرام ،،،
وسنكون على تواصل دائم ،،، مع محبتي وتقديري .
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: MOHAMMED ELSHEIKH)
|
العزيز ذو المقام الكبير محمد الشيخ ،،،
تحياتي لك من دوحة الخير لتصلك وسط جبال عسير البهيه ،،،
تمنيت أن يكون الطريق يسير عبر ذلك الدرب حتى أمتع عيني برؤيتك ،،،
لكن الأيام القادمة بمشيئة الله ستمتعنا بهذا اللقاء ،،،
حاولت قبلك مع أسامه الدرديري عشان يأجل الزواج حتى أتمكن من الحضور ،،،
لكن إظاهر إنى حأحصل توابع هذا الزواج من صبحيه ورحلات وخلافه ،،،
أتمنى إننا نتلاقى فى لحظة خير وسعاده ،،،
وأكيد التوثيق سيكون بالكلمه والصوره لكل تفاصيل الرحله ،،،
مع عظيم محبتي وتقديري .
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: محمد خليل ساني)
|
الله معك
ودربك اخضر
يسهل طريقك
وينور دروبك
ويجمعك بمن تحب
تبل شوقك
الجميع سينتظرك
عصام الجيلي
وحسين عوضاي
في المنطقة الشرقية
الريس ابو جهينة
وعلاء تمبس وهاشم خلف الله
وابوقصي
وعبد السلام ابو شنب
وجميع بورداب الرياض
البطحاني الموقوف موقتا
عمر الفكي
في مكة
اجمل بورداب في المدينة المنورة
واخيرا بورداب جده ( عروس البحر )
وشقيقة بورسودان
وفي سواكن ستجد الحبيب ابوبكر علي
ينتظرك عند البوابة
ليزفك الي عشقك الابدي بورسودان
حيث تجد في انتظارك العزيز اسامه دهب
وبقية بورداب بورسودان
يابورداب طريق الرحلة
جاييكم زول جميل
في زمتكم وفي رقبتكم لامن يصل اهلوا
وانتوا اهلوا
لانزكيك علي احد
ولكن منذ ان عرفناك
عرفنا معني الاخوة الحقة
سنتابع معك خطوات هذه الرحلة الميمونة
باذن الله وستجدنا معك خطوة بخطوة حتي تعود
سالما غانما
بالعمرة المقبولة
وملاقاة الاهل الطالت
والزواج السعيد باذن الله
سنتواصل
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: haroon diyab)
|
الزول السمح ،،،
أخ الجميع ،،،
حبيب الكل ،،،
الزول الورده ،،،
هااااااااااارون دياب ،،،
يا زول ده شنو ده ،،،
ما كسرت (ضهرنا) عدييييل كده ،،،
عليك الله الكلام ده ما بيقص الضهر قص كده ،،،
عقدتونا بالحيل يا أخ الرجال ،،،
إنشاء الله يوم شكركم ما يجي ،،،
والله الواحد سعيد بشكل يا هارون عشان هو محاط بحب الناس الطيبين ديل ،،،
أتاري سودانيز أون لاين دى لامه الطيبه والجمال والناس السمحين ،،،
الواحد ما عارف يقول شنو ،،، إحساس جميل جدا من الإلفة والمحبه والترابط ،،،
شعور ما بيحس بيهوا إلا الواحد اللى قاعد فى نصوا وأنا الآن فى نص الدايره ،،،
طبعا الرحله سيكتمل ألقها بلقاء البورداب فى كل مكان عبر الطريق الطويل ،،،
و زى ما قلنا توثيق بالكلمة والصوره لرحلة العمر والتى أتمنى أن تكون كذلك ،،،
طبعا الزاد الوحيد لهذه الرحله هو الدعاء الصالح والتمنيات الطيبة بسلامة الوصول والعوده ،،،
و طبعا دى ما أظن إنكم حـ تبخلوا علينا بيها مش كده يا شباب ،،،
لك التحية أخى هارون وعبرك لأهل بيتك الذين أتعبناهم بالأمس وسط تلك الوليمة الدسمه ،،،
ما تفتحوا خشومكم كده ،،، الوليمه رااااحت ،،، قراصه حاره بملوحة دناقله وحاتكم ،،،
الناس ما كان عايزه تقوم من مكانها ،،، بس تقولوا شنو ،،، الكرعين تعبت تب ونمّلت كمان ،،،
شفتوا ده هو الشديد القوى اللى قومنا من مكانّا ،،،
مع عظيم محبتي وتقديري .
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: عبد اللطيف السيدح)
|
الزميل الغالي عبداللطيف السيدح ،،،
لك ودى وتقديري من على البعد حتى اللقاء فى أعظم بقعة على وجه الأرض ،،،
سعدت كثيرا بكلماتك ونصائحك الغاليه فى طريق السفر الطويل ما بين الدوحة وجده ،،،
إنشاء الله سأتبع التوصيات والتعليمات حتى الوصول سالما لمحطة الختام بورتسودان مدينتي ،،،
العمرة من الأسباب الرئيسة التى دفعتني للسفر عبر البر لذا كانت رحلة العمر هى العنوان الأمثل ،،،
يا ليتنا نجمع بين العمرة وليلة العُمر ،،، حتى ننعم بخير الدارين ،،،
اشكرك كثيرا على دعوتك الكريمة لى فى مكة المكرمة وتحياتي عبرك للأسرة الكريمة وإنشاء الله سنكون على إتصال دائم معكم حتى ننعم برؤيتكم الكريمه ،،، تم حفظ الرقم ايها العزيز السيدح ،،،
مع عظيم محبتي وتقديري ،،،
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: ebrahim_ali)
|
الحبيب إبراهيم على ،،،
تسلم على الكلمات الطيبه ،،،
دعواتك ستكون زادي فى رحلتى نحو بورتسودان مدينتي ،،،
إنشاء الله سيكون الود ممتدا بيننا فى كل سكناتنا وخلجاتنا ما كان فى العمر بقيه ،،،
التوثيق سيكون حاضرا بمشيئة الله فى رحلة العمر كما أسميتها بس إنت تابع معانا ،،،
بورتسودان فى إنتظارك متى ما حضرت عبرها وستجدني فى إنتظارك فى الميناء مع حبيبنا أبوبكر على ،،،
داخل النص ـــــــــــــــ
المعلومات ستكون عندك حاضره عبر هذا البوست متى ما توفرت فقط الرجاء إعلامي بمواعيد الإجازة والسفر ،،،
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: essam&amal)
|
العزيزه أم وضاح ،،،
يدي فوق راسي من قبيل لحدي الآن ،،،
كلامك سمح بالحييييل ،،، يعطيك العافيه ،،،
ما أصلو الكلام الزين فصّلوه عليكم تفصيل ،،،
الخرطوم والسودان منور بوجودكم ولأنكم حته منّو ،،،
حلفا هى الأصاله والخلق الرفيع وكل الحاجات الجميله ،،،
عشان كده ما غريب إنه زوله رائعة زيك يكون القريبين منها من حلفا ،،،
لك التحيه والتقدير ،،، وألف حمدالله على السلامه وقدّر ولطف ،،،
والحكايه تِمامتها لمن ربنا ييسّر لينا الشوفه ،،،
كونى بألف خير وعافيه ،،،
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: حسين عوضاى)
|
الحبيب حسين عوضاي ،،،
يا أصدق من لم تراه عيناي حتى الآن وتتوق لرؤيته فى كل وقت ،،،
لك التحية والود والحب والتقدير من أرض الدوحة الطيبه ،،،
الحكاية تأخرت يا حبيب نتيجة لظروف قاهره ونسأل الله أن يقدر لنا الخير أينما كنا ،،،
بالتأكيد عزيزي عوضاى سنكون على موعد للتلاقي فى الدمام لنجتمع مع كل الأحباب هناك وفى مقدمتهم الرائع عصام الجيلي ،،،
يا ريت محمد الطيب يكون معاى فى الرحله دى بس الراجل مطنش الموضوع خالص ،،،
قول لعصام الجيلى ما تشيل هم ،،، شيلة العروس ،،، شيل شيلتك ،،، أو أى شيلة تانيه ،،، سأكون بمشيئة الله معكم والتفاصيل معكم أول بأول ،،،
إنشاء الله بعد المستجدات الأخيرة السفر سيكون مساء الأحد القادم بمشيئة الله ،،،
مع عظيم محبتي وتقديري .
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: Alsa7afa_30)
|
محمد كيفنك؟؟
وان شاء الله رحلة موفقة وتصحبك السلامة
واحذر السواقه وانت نعسان او مرهق لازم تنتبه زي ما وصوك ناس كثر هنا.
وضحكني كمال سالم القال:
Quote: ,, غايتو العرس لو فى
يوليو قطع شك بحضروا , |
كمال سالم انت قنعان من روحك؟؟بورتسودان في ويوليو؟؟!!
يازول عايز تبقى فسيخ؟؟
دي بلدنا ونحن بنعرفها حدك سنكات لو فكرته تتحاوم بهناك في ويوليو
وبنات بورتسودان ذاتهم ما بيحبوا يعرسوا في ويوليو..لان العروس
ومعازيمها كلهم بكون مكياجهم سائح من كثر الحر
يا اخي عرس في اكتبور نوفبمر ديسمبر...لكن يوليوي ...لا الا كان في السعوديه معليش!
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: Tragie Mustafa)
|
يا تراجي
انتي من زمن حر بورسودان الزمان داااك بتاع السبعينات ياحليلك
ما سمعتي بالتغيرات المناخية و السنة الفاتت المطرة كسرت ديم جابر وهمش كموش.
يعني اتساوت الكتوف مع ناس الخرتوم واتبرة.
بعدين ودساني راجل مغترب ممكن يأجر صالة مكيفة من صالات الجماعة الطيبين وكدى.
اسجل لك صوت لوم لعدم حضورك للعزاء في بوستي بتاع عادل أمام.واحد صاحبي قال لي غايتو كان مرقت من تراجي تاني ما بتجيك عوجة.
(بالمناسبة تراجي هي أول من رحب بي على المنبر عشان كدى ما بنساها
"كل ديل وكفاحا")
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: Tragie Mustafa)
|
الأخت العزيزه تراجي ،،،
شكرا ليك على مرورك اللطيف ودعواتك النابعة من القلب ،،،
والله لو تعرفي مقدار السعاده اللى حاسس بيها بعد دخولك على البوست ،،،
دعواتك زاد الطريق ،،، وياريت لو تكترى منها يا تراجي ،،،
كمال سالم داير يجامل بس ما عارف إنو شهر يوليو ده بيتلتل ،،،
جنس جرسه وسخانه ورطوبه ،،،
عشان كده حبيت أمشي بدري نوعا ما حتى ألحق آخر الأيام الحلوه ،،،
والله إنت عارفه يا تراجي دى حكايه عويصه جدا حكايه الميك آب ده والسخانه ،،،
والله ضحكتيني شديد جدا ،،، ما إنتى عارفه حال البلد والمناخ فى يوليو ،،،
مع عظيم تقديري وإمتناني.
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: كمال ادريس)
|
عزيزي كمال إدريس الرجل الزين ،،،
يا زول الله مشتاقلكم بشكل ما تتخيلوا يا رجل ،،،
الواحد سعيد جدا إنه حيلاقي الوجوه الطيبة الحلوة فى طريق الذهاب الى بورتسودان ،،،
يا زول أقوليك شنو ،،، أيه حكاية الطلاقات الى ضربت دي ،،،
إنت عارف أنا مغادر السودان عشان أحاول إكمال نصف الدين وجماعتك ديل دايرين يحلفوا يطلقوا ،،،
وياريت يكون طلاق رجلين بس لا غير
ما تنسي تجهزّ لينا مواعيد فتح وإغلاق جميع محلات المعصومه فى جده ،،، عشان نعرف نوقّت الموضوع صااااح ،،،
مع عظيم محبتي وتقديري .
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: ابوبكر على)
|
بالسلامه يا ساني
وسلم على كل وجه سوداني يقابلك في الطريق الجميل
وعند وصولك لبورتسودان سلم لي على الأخ الشاعر الجميل / محمد عبد الله محمد بابكر من اتحاد أدباء بورتسودان .
وما تنسى الملوحه (قال ملوحه قال)
الغشه الدخلتنا في بيت صاحبك الدنقلاوي الرائع (هارون) الشبع الطير والحديه وكمان عمل (دلفري) ملوحة لي بيت صاحبك ود القريش (تركين)
يا صاحبي قدر ما شربت مويه ما رويت يا كافي البلا الحصل دا شنو
والحمد لله بقت علي العطش وما لخبطت البطن
لكن بيني وبينك صاحبك هارون دا زول كريم بس عيبو الوحيد (بتو النجاضة .. داخله ومارقه ... فيناحتى كدت أن أقول أنها عروس المستقبل لي صاحبنا صحافه) .
يلا سلم على جميع الأهل
لخبطت ليك البوست كلو (بالملوحه)
تاني لو إنتو رجال نادوني لي ملوحه وأنا حا أعلن عن الملوحة الشايله في سيارتك
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: عادل التجانى)
|
استاذ الجميع / عادل التجاني
اولا :
مازالت اركان منزلنا المتواضع تتمايل طربا لتشريفك لنا...
ومااحلي ساعات اللقاء
عادل التجاني
معتز القريش
محمد الطيب حسن
حسام الدين ( صحافة 30 )
الاخ ناجي حمزة
الاخ خالد دياب
والمحتفي به الرجل الجميل
محمد خليل ساني
مع اتصالات جميلة وطويلة من كل من
الحبيب / عصام الجيلي
الحبيب / حسين عوضاي
الرائع / حاتم جيمس
مع بعض الاتصالات المتفرقة من الزعيم / كمال سالم
وكانت ليلة من ذات الليالي
تشريف ساذكره دائما وانتم بمعيتنا.
وبي زيارتك بيتنا نور ....
ولازلت اردد كم اسعدتني زيارتك وتشريفك لنا ايها الحبيب الغالي
ادام الله المعروف بيننا ووثق اواصر المحبة بين الجميع
ونتلاقي قريبا لنفرح مرة اخري بالزميل العزيز ساني وهو متابطا يد شريكة حياته .
وقال ملوحة قال....!
والملوحة ياعمك في انتظارك دائما
وساني لمن يرجع بي السلامة يجيب معاه مؤنة سنة .
وجه ينطق بالفرح
كل الود
هارون دياب
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: عادل التجانى)
|
الزول الرائع بروعة الأيام عادل التجاني ،،،
آآآآآآه لو تدري مدى التقدير والإحترام الذى أكنه لشخصك الكريم فى دواخلي ،،،
والله العظيم ضحكتني بشكل ما تتخيلوا ،،،
مالك والهضربه دى يا زول ،،، ما دام بقت على العطش بس هينه الحكايه ،،،
بس بى كلامك ده إظاهر الحكايه ما قصة عطش بس ،،،
الحكايه أكبر من كده ،،، ياااخ إنت فتيت أى حاجه فت ،،،
ما نسيت حاجه ما قلتها ،،، قلت الحمدلله الحكايه وصلت للنهايه وما راح تجيب سيرة الملوحة اللى فى الضهريه ،،،
لقيتك وإنت ماااري على الختام وبتّودع المداخله ،،، جبت السيره ،،، شفت كيف ،،،
قال عطش قال ،،، متأكد إنه عطش بس بعد ده ،،،
والله العظيم كانت جلسه جميله جدا ،،، سعدنا بالطبع باللمه الحلوه دى ،،،
ويااااريت تتكرر تاني يا صِحاب ،،، محتاجين زي اللمات دي تاني يا شباب ،،،
أسعدتني كلماتك جدا جدا يا راقى إحساسك ،،،
مع عظيم مودتي وإحترامي وتقديري.
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: ابوبكر على)
|
الحبيب أبوبكر على ،،،
الحمدلله معتصم ود الجمام قدر يطلعك من مخبئك السري ،،،
مالك كنت بعيد مننا كده وما قاعد تدخل المنبر ،،،
سألنا عليك كتير فى تجى تتعرف يعقدوا ليك وبرضو ما فى فايده ،،،
الحمدلله إطمئننا على إنك بخير وبصحة وعافيه ،،،
إنشاء الله سأعلمك بتفاصيل الرحله أولا بأول سواء عبر هذا البوست أو عبر الهاتف ،،،
بعدين تعال هنا يا زول ،،، شنو حكايه الأسماك اللى مافى دى ،،،
إنت عايز تهرب من عزومة السمك الكاربه ولآ شنو ،،،
على العموم العزومه سيك سيك معلقه فيك ،،، يعني مافى مهرب يا ماااان
تسلم على المرور الكريم وإنشاء الله سنلتقي على الخير والمحبه ،،،
سؤال برئ جدا يا أبوبكر ،،، جهّزت لى العروسه تحت السلم ولآ طنشت الموضوع ،،،
مع عظيم محبتي وتقديري وإمتناني.
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: عصام الجيلي)
|
الحبيب عصام الحاج ،،،
أولا سعدت كثيرا بمحادثتك عبر الهاتف قبل أن نتمتع برؤيتك الكريمه ،،،
طبعا البلاد منوره بوجودكم ،،، ونورها بيزيد بحاجاتكم الجميله اللى بتستقبلوا بها الزوار ،،،
من دار آل ثاني سنتحرك لكم إنشاء الله الى دار آل سعود يوم الأحد ،،، وربنا يكتب السلامه ،،،
وطبعا أجمل ما فى هذه الرحله وفى طريقها الطويل قبل الوصول لمكة المكرمة هو رؤيتكم والتعرف عليكم عن قرب ،،،
وربنا يديم هذه المعرفه ويديم المحبه والتواصل الأخوي الصادق ،،،
مع عظيم تقديري وإمتناني .
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: محمد خليل ساني)
|
العزيز عصام الجيلي ،،،
العزيز حسين عوضاي ،،،
على فكره المداخله اللى فوق دى مقصوده وبالاسم ده بالتحديد ،،،
عاااارفين ليه لأنه أخونا عوضااااى أمبارح طول الليل شابكني عصام الحاج قال وعصام الحاج فعل ،،،
طوالى قمت أعدل ليهو المعلومه وأقول ليهو اسمه عصام الجيلي ،،، يجى تاني يقول لى عصام الحاج ،،،
قلت عوضاي ده صاحبي وما فى طريقه تجيب سيرة الموضوع ده تاني إلا بالكلمه دى ،،،
ضحكت فى سري وقلت خلاص حأعملها بس تانى رجعت غيرّت رأيي وقلت يمكن عصام الجيلي يزعل ،،،
وفى النهايه نزلت زى ما فكرت فيها أول من غير ما أقصد
شيخك قوى يا حبيب ،،، وده عشانك يا ود الجيلى عشان تشوف صحبك الجديد عوضاي بيقول شنو
مع عظيم محبتي وتقديري.
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: محمد خليل ساني)
|
إذن ستفتقد الدوحة صديق المشاهير
رحلة موفقة يا محمد يا راجل ياظريف ولازم تجلس معى لتأخذ " الهدايات " وتستفيد من خبرة أربعة سفرات مماثلة
خاصــة أننى بدأت الآن الإعداد للخامسة
أى أنتم السابقون ونحن اللاحقون
وإن شئت نحن على الدرب سائرون
وقبل ما يجوا " الذين يحرفون الكلم عن موضعه " درب السفر ومش درب العرس ياسانى ( وبنا ما بنا لذاك من أشواق )
تمشى وتجى بالســـلامة . . . يا حمــادة مع الســـلامة
رافقتك الســـلامة فى حلك وترحالك عزيزى وربنا يتمم ليك الفى مرادك بالسلامة .
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: عادل سهل)
|
شيخ العرب عادل سهل ،،،
لك التحايا يا عزيزي الغالي على كلماتك ودعواتك بالخير وسلامة الوصول ،،،
طبعا الخبره منكم وأنتم أصحاب الريادة فى هذا الأمر ،،،
كنا منتظرين مجيئك فى الفروسيه مساء اليوم خلال الجلسة الودية الحلوة التى جمعتنا جميعا نحن ومجموعة من البورداب ،،،
تمنيت فعلا أن تكون حاضرا لتكون الإستفادة فورية من نصائح قبل السفر ،،،
مالك يا شيخ العرب شنو الجقلبه دى ،،، ما تخلي الدرب زى مايكون يكون ،،،
درب عرس ،،، درب سلامه ،،، درب جلكوز ،،، كلها فى الدرب شرق ،،،
الحكايه مفهومه ما عايزه فهامه ،،، وبطّل الجغليب ،،،
دعواتك زادي فى رحلتى نحو مدينتي بورتسودان ،،،
مع محبتي وتقديري .
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: محمد خليل ساني)
|
كثيرا ما يقولون القدم ليهو رافع ،،،
وكثيرا ما يقولون أيضا كل تأخيره وفيها خيره ،،،
وأنا أضيف لكل هذا وأقول ،،،
ما زالت لدي بعض الأيام لأقضيها فيك يا دوحة الخير والمحبه ،،،
بعض الظروف القاهره والإجراءات التى لا تنتهى تأخرت رحلتى نحو السودان عبر السعوديه ،،،
كنت أتمنى أن يكون النحرك مساء الخميس إلا أن الله أراد أن يكون هناك موعد آخر للإنطلاق وهو أمسية الأحد ،،،
الحمدلله فى الأولين والحمدلله فى الاخرين ،،، قدّر الله وما شاء فعل ،،،
مع محبتي وتقديري لكل المتداخلين عبر هذا البوست ،،،
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: Alsa7afa_30)
|
سلامات
وعوافي
محمد خليل ساني ..
ياصديق ..
ستريق علي امتداد المسافة الدموع .. والقلب الخفوق طيار بالشوق والحنين ..والدرب ستطويه طي العاشقين العاجلين ..
متر متر .. نحو اتجاهك حيث الشمس ترفض المغيب في "سرها".. نحو اتجاهك "بيت الله العتيق" والروح مليئة بحب الكريم الرحيم والايادي مرفوعة علي استار الكعبة واللسان يرتل دعاء الملتزم والبكاء يطوي صمت المكان ..النشيج .. النضيف ..ياالله ..يا لفضلك وكرمك الفياض .. "والروضة الشريفة" ريانة باللطف والكرم الالهي الجزيل ...
طيبٌ مسراك يا عزيز "ثم بلغ سيدي الحبيب وانت تقف علي قبره لتسلم عليه محبتي وسلامي" وقل له "ودرملية قال ليك بحبك شديد" ..
وما تنسى تحياتي لكل وجه صبوح علته سحنتنا الفريدة ولسواكن ولبورتسودان خصوصا "مطعم البرلمان" ..
العمرة وزيارة المدينة ياحبيب ماتفرط فيهم ...
بعدين كان لاقيت معتصم دفع الله في الرياض قول ليهو تلفونك مالو "عيان" ..
معزتي وتصل بالسلامة ..
ياخي حسامو دا حكايتو براها والله يا محمد الزول دا بيعرس متين عشان نوريهو كتابنا معاهو بالطريق الصحيح ..
حسام ازيك ياخي ..
وصدقني يا محمد دي رحلة ما حتنساها وح تمسخ عليك ركوب الطائرة لي يوم الدين ..
ابقا عشرة علي البر ..
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: ودرملية)
|
الحبيب ود رمليه ،،،
كلماتك تبعث الطمأنينة والسعادة فى النفس البشريه ،،،
لا أدري ماذا أقول فأنت قد أكملت جميع الكلمات ،،،
لم تترك لنا كلمة نحتمى بها وسط هجير التنقل المستمر من موضوع الى آخر ،،،
سأعمل إنشاء الله على زياره المدينة المنوره فى طريقي الى مكة لأداء العمره ،،،
أو قد أعكس الأمر ،،، أكمل عمرتى أولا والذهاب للسودان ،،، ثم العمرة مرة أخرى فى طريق العودة والذهاب الى المدينة المنوره وأنا أعود أدراجي صوب مدينة الدوحه ،،،
أخي ود رمليه ،،، تأكد متى مازرت الأماكن المقدسة دعواتك ستكون هى الأولى فى سيرة الدعاء الطويله ،،،
شكرا على نصائحك الغاليه ،،، وسأكون بمشيئة الله عند حسن الظن بنا ،،،
مع عظيم تقديري وامتناني .
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: ابوبكر على)
|
الغالي أبوبكر على ،،،
والله يازول من كترة شوقنا ليك ،،،
بقيت أى بوست اشوف فيهو اسمك بعمل مداخله على طول ،،،
فى شوق يا أخوانا أكتر من كده ،،،
والله يا ابوبكر بقيت واجهه مشرقه جدا لابن ولاية البحر الأحمر فى منبر بكري ،،،
ما بتعرف الشعور اللى كنت حاسي بيهو وأخونا معتصم ود الجمام فتح البوست باسمك ،،،
تتصور الفرحه ما شالتني من الأرض ،،، إحساس جميل جدا جدا ،،، تسلم على الأريحيه ،،،
عزيزى خلاص جايييك يا أب شرا ،،، شفت كيف متذكر بعض الكلمات ولآ النسيان ضربنا ،،،
التفاصيل ستكون بحوزتك أولا بأول بس إنت تابعنا من على البعد ،،، وما تطول الغياب عن المنبر ،،،
مع عظيم تقديري.
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: محمد خليل ساني)
|
الاحساء (الهفوف) منطقة آثار قديمه وكانت بها دولة القرامطه الذين سرقوا الحجر الاسود وحاولوا بناء كعبة فى بلدهم وبقى الحجر الاسود معهم لمئتى عام قبل اعادته لمكه....
ولابد انك ستكون ناوى العمرة وفى هذه الحاله ميقات احرامك سيكون بالطائف وهو ميقات السيل إن لم يتم فتح طريق الهدا الممتع الذى يمر عبر جبال الهدا الشاهقه وهو الأقصر ولكنه مغلق للصيانه وعموما ميقاته عند وادى محرم اذا تم فتحه....
وفى السيل الكبير (ميقات أهل الطائف ويسمى ايضاً قرن المنازل) نزل سيدنا جبرئيل على نبينا الحبيب (ص) ليواسيه بعد أذى بنى ثقيف الذين جاءهم مستنجداً بهم من أذى القرشيين فيخبره عند قرن المنازل وهو مكان مسجد الميقات ويقول له (السلام يقريك السلام ويسألك إن شئت أطبقت عليهم الاخشبين)
وبعد قرن المنازل وانت محرم للعمرة فى الطريق لمكه المكرمه ستمر انشاء الله بقرية صغيرة اسمها اليمانيه وهى بين الجبال وكان بها صنم العزى الذى أرسل له سيدنا رسول الله (ص) خالداً ين الوليد ليهدمه فذهب وهدمه ولما عاد سأله النبى (ص) عما وجد فذكر ماصادفه وما فعل فطلب منه أن يعود مرة ثانيه لأنه لم يفعل وفى عودته وجد عجوزاً شمطاء واقفه فشج رأسها وقتلها وعند عودته أخبر النبى (ص) يالامر فقال له لقد فعلت ....وقد أوصى النبى (ص) بالاسراع عند مناطق الهلاك بس مش سرعه كبيرة طبعاً
ولما تصل مكه المكرمه انشاء الله أخبرنا عشان نمتعك بالباقى وربنا يتقبل منك ومن معك ...
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: sourketti)
|
Quote: الطريق ممتع وأقصر خط من سلوى على الحدود السعوديه القطريه الى الهفوف ثم تأخذ طريق خريص وهو الاقصر الى الرياض وبعد خريص بقليل تجد مفرق طرق ياخذك للطريق السريع الرياض الدمام ....
نصيحتى لك أن تحاول بقدر الامكان ان تسير فى الطريق بين سلوى والهفوف بالنهار لسببين الجمال والشاحنات التى تمر ليلاً وربنا يكتب سلامتك
حاول ان تستمتع برحلتك ولا تأبه للوقت وسر على مهلك ولا تزيد عن 100 باى حال وحذارى من السواقه وانت مرهق او نعسان |
العزيز سوركتى
ياخى سانى ده عزيز علينا ليك على اطلع استقبلوا فى منفذ سلوى الحدودى ومعاهو لمن اسلمو ليك الاخوان فى الرياض . ما تشيل هم يا عزيز .
الزعيم هارون دياب .. ياخى انشاء الله بيتك ديما عامر يا جميل سعدت بمحادثتك انت وكل الزملاء
الافاضل معتز القريش وحسام والحبيب محمد الطيب .
فائق المحبه والتقدير
حسين
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: sourketti)
|
العزيز سوركتي ،،،
والله ما عارف اقوليك شنو ،،،
معلومات مشوقه للغايه وما بتتمل ،،،
ياريت تواصل الحديث والكلام الطيب الحلو ده ،،،
تأكد نصيحتك الغاليه دى ما حأهملها أبدا أبدا ،،،
وبعدين الشباب ناس حسين عوضاي قالوا حيكونوا معاى فى الصغيره والكبيره ،،،
والحمدلله منبر بكرى ده والله لاميّ الناس على الخير والشئ الطيب ،،،
تعرف فى ناس كتيرين جدا ومن بينهم عوضاي عرفتهم من المنبر ده بس ،،، تصدق ،،،
بس ما بقدر أبدلهم بعد ده بأى حاجه فى الدنيا ،،،
يلا يا سوركتي ،،، منتظر تفاصيلك حول هذه الرحلة من واقع تجربتك العمليه ،،،
فى إنتظارك ما تطول علينا ،،،
مع عظيم تقديري ومحبتي.
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: hamid abdalah)
|
العزيز حامد عبدالله
لك التحايا من أرض الدوحه ،،،
ياااااخ رجعتنا لسنوات رائعة من سنوات إذاعتنا بورتسودان ،،،
رجعتنا لأيام علم الدين حامد وشلكاوى والنيّل وأبوالحسن أحمد وعبدالحكيم طه وعباس محمود والسر عثمان والقائمة تطول ،،،
أيام حـ تظل محفوره فى دواخلنا كلنا ما دامت الأيام ،،،
تعرف الواحد مبسوط بشكل وخاصه وإنى بلاقي عبر منبر الأحباب ده معارف كتير فى وسط سنوات الإغتراب ،،،
عشان كده بشكرك كتير على كلماتك وشعورك الرائع الفنان تُجاه شخصي الضعيف ،،،
وأيام بورتسودان دى ما بتتنسي أبدا ،،،
تتصور بالأمس كان فى بورتسودان عرس زميلنا أسامه الدرديري على زميلتنا سهام كنت ناوى أحصل العرس ده ،،،
بس تقول شنو الحمدلله على كل حال ،،، القدم ليهو رافع ،،،
إنشاء الله خليك متابع معانا الرحله ،،، عشان حتوثق لحاضر ومستقبل مدينة بورتسودان وما حدث فيها من تغييرات ،،،
ومنتظرين ذكرياتك الجميله عن بورتسودان وما فيها ،،،
والله الحمدلله إنى فتحت البوست ده عشان ألاقيك فيهو ،،، وسنكون دوما على تواصل عبر العام والخاص وسلك التلفون ،،،
مع عظيم محبتي وتقديري.
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: haroon diyab)
|
كان يوما من الأيام الجميلة الخالدة فى دفتر الذكريات ،،،
يوم لا ينسى من أيام بورداب الدوحه ،،، او قُل فى أيامي بالتحديد ،،،
يوم تجمع عدد من البورداب محتفلين بمقدم ملكه ووزير ووداع عضو من أعضاء المكان ،،،
شكرا يا شباب على هذا التوثيق الرائع الذى يسعد الدواخل ،،،
شكرا صحافه 30 على هذه الصور يا صاحب العدسة البلوريه ،،،
شكرا هارون وحرمه المصون ،،، شكرا كمال سالم ،،، شكرا محمد الطيب الذى لم أره ،،، شكرا حسامو ،،، شكرا كمبوره ،،، شكرا سعد الدين أحد المحتفى بهم ،،، شكرا منى خوجلي يا من أحدثتي إنقلابا فى ليالي الدوحه ،،،
مع عظيم محبتي وتقديري.
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: محمد خليل ساني)
|
ياسانى وين انت الان ؟؟؟واليك النشرة بالتفصيل شويه ...لو كنت مواصل
فى سلوى توجد استراحة آمنه تتبع لساسكو يمكنك المبيت بها حتى الصباح
ثم تتجه صوب الاحساء باذن الله فى الصباح الباكر حتى تشاهد بعض آثار المنطقه على يمين الداخل للمدينه وذلك قبل الظهر وحتى تتغدى فى واحد من مطاعم السودانيين بها انشاء الله ....
ومن الاحساء (الهفوف) يمكنك الانطلاق صوب الرياض عبر الطريق الاقصر وهو طريق خربص وعليك التزود بالوقود (يعنى أملأ التنك فى الهفوف) ...
بعد خريص يشويه تشاهد على يمينك مفرق الطرق الذى ذكرته لك وتشاهد السيارات المسرعه على الطريق السريع الدمام- الرياض ...والتى اتوقع ان تصلها بالمساء بين المغرب والعشاء (لكن لا تتقيد بوقت وسر على مهلك ...
وربنا يكتب سلامتك ومن معك والى اللقاء
| |
|
|
|
|
|
|
|
|
|
Re: رحلة العمــــر ((( توثيق بالكلمة والصورة لرحلتي ،،، ما بين الدوحة والسودان عبر السعوديه ))) (Re: ناهد علي)
|
الأخت ناهد علي ،،،
تسلمي على الكلمات الحلوه دي ،،،
يا سلام على شعورك الطيب ده ،،،
معقول يا أخوانا فى هناء أكتر من كده ،،،
توب السرتي والجلابية السكروته والحنه الاولى عندكم في أمبده ،،،
بعد ده كله تقولوا لى السودان ما فيهو خير ،،،
معقول الإحساس الطيب ده بين ناس فى منبر واحد من غير ما يكونوا بيعرفوا بعض من قبل ،،،
تسلم بكري أبوبكر على هذا التجمع السوداني الكبير من سودانيي الداخل والخارج ،،،
تسلمي ناهد على ،،، كلماتك أسعدتني كثيرا ،،، وبارك الله لك فى كل ما تحبين ،،،
مع عظيم تقديري وامتناني.
| |
|
|
|
|
|
|
| |
محمد خليل ساني
كمال سالم
Elsanosi Badr
MOHAMMED ELSHEIKH
haroon diyab
essam&amal
محمد الطيب حسن
ebrahim_ali
عبد اللطيف السيدح
عصام دهب
رشا سالم
كمال عكود
شهاب الفاتح عثمان
حسين عوضاى
البشير دفع الله
Alsa7afa_30
Tragie Mustafa
كمال ادريس
كمال مبارك
معتصم ود الجمام
james
عصام الجيلي
عادل التجانى
عادل سهل
ودرملية
Sayed Bekab
Hatim Salih
sourketti
محمد عبد الماجد الصايم
hamid abdalah
ناهد علي
BADRELDIN MAHMOUD
??
فيس بوك
تويتر
انستقرام
يوتيوب
بنتيريست