السيد المحترم أبو "حراز" ، والله يبدو انى مصّر على تسميتك كده لحد ما الامريكان يجوا يسقطوا حجرك عموما ، البوست ده ما فتنة ولا حاجة ، وانا جني وجن الفتن انت جنك وجن شنو؟ الحكاية يا سيدي انو انا قريت بوست لى تماضر بتقول فيهو ماشة اجازة وبي تحت تحت وبي علاقاتي الصحفية عرفت انو تماضر بدت تعمل زي نجوم امريكا يعني الصيف فى جزر الكناري او هاواي وقالوا حاجزة ليها جناح بعد مشاركتها فى مهرجان كان وحصولها على " السعفة الذهبية " ومليون دولار " انشاء الله يا رب ، فعلا يتحقق الحلم ده وتفوزي بجائزة عالمية وترفعي راسنا " المهم فى الموضوع يا ابو حراز ياخوي عشان ما اطول عليك انا عارفك مستعجل وشفقان ماشي تحصل فتة الفول فى البغدادية ، انا قلت لى تماضر عليك الله اكان ما سقتي معاكي ابوحراز بس عشان يشوف جزر هاواي دي ، ويجي يهوس البورد مدة سنة لى قدام بى سفرتو دى البت النصيبة دى حلفت بالتقطعها كراعك ما تبراها شبر اها انا قلت انقل ليك الكلام ده بدل ما تقضي الصيف فى جدة ، انا وانت نمشي مع تماضر انشاء الله توم آند جيري مش برضو نجوم سينما
"مع الاعتذار للمبدعة شيري على الهترشة دي والتحية والمحبة للعزيزين تماضر وابو "حراز " ما قلتت ليك انا مصر؟
الحبيب خالد سلام ابو حراز دة باقي ليهو شهر يلبس العقال إنت داير توديهو مع القديرة تماضر...إحتمال يروح او يحرن تاني ما يجي ... كدي اسألك سؤال سري هي تماضر دي ماشة هاواي ..ولا بهاما ؟
ابو القدح بعرف محل بعضي اخو
05-28-2003, 05:44 AM
ابوحراز ابوحراز
تاريخ التسجيل: 06-27-2002
مجموع المشاركات: 5537
خالد عويس قرأت حديثك وكنت أشاهد وقتها جائزة السعفة الذهبية وهي تمنح للفيلم الضخم الفيل 00 كنت اتلصص عليهم وأشاهد بشغف لأرى نيكول كيدمان 00 لكنها لم تأت 00 ولم يأت حتى ذكر لفيلم الساعات الذي صعدت على أكتافه لتتسلق على منصة كان 00 ولم تأت كينيت وينسليت الغارقة مع تايتانيك 00 ولكن فجأة قفزت بنت سمراء بوجه طفولي 00 انها سميرة مخلباف لتتسلم جائزة التحكيم عن فيلمها مابعد الخامسة عصراً 00 وكنت قد شاهدت نفس هذه اللحظات عندما صعدت هذه الشابة لتتسلم جائزة اللوح الأسود أو السبورة السوداء لتعطي طعماً رائعاً لتفاحتها التي كانت بداية افلامها 00 تذكرت حينها ان لدينا مخرجة بقامة سميرة مخلباف 00 انها تماضر شيخ الدين 00 ربما لو توفرت لها الإمكانات فلما لانجدها وقد تسلقت هذه المنصة 00 أليس الحبل الذي فاس في قرطاج ببعيد 00 خلاص أكتفي بهذه الجدية ولنعود الىالرحلة التي ستأخذني معها فيها الى جزر الكناري أو هاواي لا ادري 00 قرأت انها قالت ابوحراز ماعاوزاه يباريني 00 لكنني عندما علمت انها ستزور هذه الجزر سبقتها الى هناك على طريقة سيك سيك معلق فيك 00 اعرف انها تقول ذلك لكنها لاتستطيع 00 ليس حباً في جضومي بل لأن قلبها يحمل كل السودانيين قلب بمساحة السودان وبقوة السنديان انها تقول لا في كثير من الأحيان ولكنها تأتي بكوبها لتسقي من تقول لهم لا تسقيهم ماء غير آسن ولبن لم يتغير طعمه وفوق هذا وذاك تسقيهم نخب هذا الحب ان أخذتني معها فسأذهب دون تردد وأحمل لها حقائبها وإن لم تأخذني معها سأسافر عبر كلماتها لأطوف كل العالم وهذا يكفي !!!!!
05-28-2003, 12:34 PM
خالد عويس خالد عويس
تاريخ التسجيل: 03-14-2002
مجموع المشاركات: 6332
تسلم يا ابوحراز يا اصيل وتسلم لينا تماضر والله انا بحلم زيك كده بفيلم سوداني تتولاه تماضر ويترشح لى جوائز عالمية نحن عندنا حياة غنية جدا وتنوع مدهش واساطير وحكايات لكن ...!! عموما يمكن يجي اليوم ده لكن ما قلت لى انت كنت منتظر نيكول او وينسليت ليييييييييييييييييي؟؟؟ انت يا شقي خطيبتك دى ما عارفة تلصصك ده ؟ انا تابعت زيك سميرة مخلباف وكنت سعيد من اجلها وشفت جزء من فيلمها بس طبعا ما جابوهو كامل
05-28-2003, 07:31 PM
Mutwakil Mahmoud Mutwakil Mahmoud
تاريخ التسجيل: 04-13-2002
مجموع المشاركات: 470
ياخالد عويس ياصحفي ياقدير وصديقي العزيز أبو حراز أبوشلاضيم ليك وحشه يازول أها ياالحبان علي بالطلاق طماطم دي ماتسوقكم معاها لجزر هاواي المشي علي والحجل بالرجل بس علي شرط واحد ياخالد أنو أبو حراز ده يخلي شلاضيمو الذي لقيمات الصدقه ديل ذي ما بيقول زميلي وصديقي رحمه الله د.عوض دكام يخليهم جنب الكعبه المشرفه والا ما حيسمحو ليكم بالدخول هنا لمن تجوني في لوس أنجيليس مدينة الملائكه سامع يا أبو حراز يعني شواطين سودانيين وجايين من السعوديه لاحول ولاقوه تماضر تقع بيكم وين جرت منكم لآخر نقطه في أطلس الجغرافيا وبرضو عايزين تلحقوها أرحموها ياأخوانا عليكم الله واقعدوا جنب اللغوات حقنكم ديل وبالله ياساطور ماتنسي أخوك متوكل لمن تجي تعرس لأبو حراز نسيت أيامنا الخوالي في لوس أنجيليس والا أيه؟ ودمتم وفي الأنتظار أخوكم د.متوكل
05-28-2003, 09:17 PM
ابوحراز ابوحراز
تاريخ التسجيل: 06-27-2002
مجموع المشاركات: 5537
تعرف يادكتور متوكل بمناسبة شياطين السعودية واحد جانا من السودانالمرةالفاتت في بدايةرمضان وأنا استقبلتو في المطار اولماسلم علي قام قال لي هووووووي ياناس رمضان ماثبتوه عندكم طبعاًبكل براءة قلت ليه ياخوي ثبتوه ليه يومين قام قال لي لكن مالك حايم هنا مفروض يكتفوك مع الجماعة
هل تصدق ياخالد أن حلمي عندما كنت عجوزا أن أصبح مخرجا سينمائيا وعندما صرت طفلا ضاع عني الحلم وكنت احلم أن أخرج فيلم كبير عن الحضارة النوبية القديمة بطله الملك أركاماني أو تهراقا أو ليس مهما فجأة تجد أن الدنيا تسوقك لدربها وأنت لا تدري مثل ما قال الطيب ود صالح في بندر شاه ما ندري بكره البكا على ايه على الراح ولا على اللجاي أنا أقول أنو البكا سيكون على اللجاي فالراح راح عموما لو أردات تماضر أن تدخل في موضوع كان أعني مهرجان كان فأنا مستعد لأن أعيد التفكير في حلم الطفولة وأحاول أجدع كل الحاجات وأتفرغ سنتين لدراسة الإخراج السينمائي وأبوحراز لن يقصر في تقديم نصائحه للجميع
نحن مشكلتنا سينما وسياسة واقتصاد وووو لا نعرف من أين نبدأ واين ننتهي ويبدو أن صوفيتنا الضاربة في جذور ذواتنا الخجولة هي المشكلة
05-29-2003, 07:28 AM
shiry shiry
تاريخ التسجيل: 07-05-2002
مجموع المشاركات: 3511
كوكو كو: اجر السلكه وادخل ياناس البيت .. هذه عادتي ولست بشاراياها ولاحاجة .. من يهترش غيري ما ان اجد مساحة للهترشه تمدد امامي الا ونطيت فيها عستها شبرا شبرا تعرف يا خالد نحن ينقصنا فعلا ان نعيد ترميم _المزيرات القديمات على طريقة الازاير المرصوصة جمب جامعة القاهرة وراء كلية التجارة يعين جنب اسلاك السجون واشلاق البوليص تعجبني جدا هذه اللوحة كنت ولا زلت اعتبر هذه اللوحة على الاطلاق من اجمل اللوحات التي شاهدتها في كل مدن العالم التي زرتها بصحبة والدي هل تدري انهم حينما علموا ولعي بالازيار واكشاك الحاجة الباردة ماذا فعلوا اصدقائي اعني .. جاءتني ام مازن تهرول يا بت الحقي الحقي والله في مزيرة في شارع الوادي قبل شارع الدومه وعرفت ان هذا المنزل من اشهر بيوتات امدرمان وتاريخه ناصع جدا انه منزل الطهار اسماعيل هكذا سمعتهم يسمونه نحن تنقصنا ان نعيد سيرة هذه الازيار في كل شوارع الخرطوم وبحري وامدرمان لا ادري ماعلاقة سعفة كان وكيدمان ومخلباف ومابعد الخامسة عصرا وسفر ابو حراز الذي اره يبكي ويتنخج محنسا ومجعرا ومرعدا ومتباكي عسى ان تحن عليه البت الحديقة تماضر وتسوقه معاها الى جزر الكاريبي التي اصلا لا اعرف كيف يصلوها خاصة ابوحراز . خاصة مع هذه الطائرات التي تخطف كل ثانية والثانيه ولا اعرف لما اصلا انا هنا . قد تكون رايحه لي هترشه وقد اكون لم اشرب شاي العاشره صباحا بعد وقد يكون هذا كله من نقصان معدل الجزر في دمي اذ للهترشه في اوقات كثيرة علاقة ما بين ما احسه من دبرسه وبين ما احسه من حالات الفقد الكموني لفارق التهميش الذي تمارسه حروفي مع احاسيسي فاقول ما لا اعني واكتب ما يجوس في وشكلي كده ح البخ وسلمت كلكم حتى الحلوه نانسي بت عجرم شكيتا على الله
05-29-2003, 04:36 PM
خالد عويس خالد عويس
تاريخ التسجيل: 03-14-2002
مجموع المشاركات: 6332
حبيبي احمد ساطور عرس ابو حراز ده نحيا ونشووووف عرس يحيي غايتو انا شاكي انو اصلا ابو حراز ده يكون خاطب من اساسو مجنونة منو دى البتقبل بيهو ؟ حبيبي الفاتح ابو حراز وعقال فوق راسو الغليد ده ؟ كده قولي يلقو ليهو عقال قدر راسو ده وين وكان لقوهو ، البتاعة السوداء الفوق العقال دى بيسموها شنو ، يلقو واحدة قدر راسو كيف الا يجيبوا لستك عربية "هوندا" ولا "كوريلا " ويختوهو فوق العقال د. متوكل ، صديقي الجميل انتوا رايكم شنو نرسل ليكم ابو حراز ده امريكا نعمل ليهو فك تسجيلات من السعودية يجي يوريكم شبهكم فى امريكا غايتو انت والموصلي ما كان حيفضل فى راسكم شعرة واحدة ده مجننا هنا جن ما تتخيلو كلو كلو كلما نقول خلاص راق ينط بى موضوع جديد يدخلنا فى الجهجهة هوبليس الحبيب هو بلا الخدمة الالزامية المطفشنا انا وابو حراز من السودان شنو ؟ بعيدن زى جنيات تماضر ديل بيتمسكوا باقيلك ؟ عماد الرائع رايك شنو تعمل فيلم يكون بطله ابو حراز بس بى شرط بطلة الفيلم تكون نيكول كيدمان شيري بس ما هترشنا شوية يا اختي الا جيتينا ناطة بى جنس شقاوتك دى ؟ بعدين الشلاقة العليك شنو ، هسع افرضي ابو حراز نط ليكي فى الموضوع ، البيحلك منو منو تاني ؟ والله يفرج عليكي الله وخلايقو ؟ انتى رايك شنو بالمناسبة تجي معانا الرحلة دى ؟؟ انا وابو حراز وانتى وتماضر؟ نهترش لما ناس الكاريبي كلهم يقتنعوا بالجن الما شافوهو قبال كدى طبعا ما حننافسك ابدا الا ابو حراز حيشتاق للفتة بتعرفوا تسووها انتى وتماضر غايتو انا من هسع علىّ سواة القهوة وغسيل العدة وابو حراز قال حاجز يكون ديك العدة
اصدقائي جميعا لكم التحايا جميعا ومعليش لو بدرت مني كلمة غلط جاى ولا جاى
05-30-2003, 03:31 AM
emadblake emadblake
تاريخ التسجيل: 05-26-2003
مجموع المشاركات: 791
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
alfatih
ابوحراز
Mutwakil Mahmoud
emadblake
shiry
فيس بوك
تويتر
انستقرام
يوتيوب
بنتيريست