|
|
 ستغنى سبأ احتفاء بشفاء عاصم البهاء
|
ترميكم الخرطوم بفلذة كبدها ... عليكم الله خلو بالكم من عاصم
تعرفه شهر فيتملكك ابد الدهر ...
ود بلد سوداني بسيط ... سمح .. . صبوح ...وبتشوفو
حاجزنو للبلد دى ... وسمناهو بشريط ابيض من شعر مريومة فى يدو الشمال
وربطنا ليهو حريرة حبيبتو (الوطن) فى يدو اليمين
وابشر بالخير ا عاصم
يهز معاك شدر شارع بيتكم وتتهز الارض وتكشحك بشبال منسوج ومرصوص من ذرات ترابها ونسيّرك لاعند مقرن النيلين وونذكّرك انو مافى زمن يقدر يفرق النيلين بعد ما فاتن المقرن
نقعد فى طرف البحر بعد نشتت عيش كرامة سلامتك ونغسل طرحنا من اثر الزمن الملح ونشقهن النص ونصر ليك كمون اسود وهين تراب ونربطن ليك رحط ( وتحت تحت وبلغة الزمن دا حزام ناسف ) ينسف بلاك ياعاصم ويحميك لبلدك ويرجعك سالم غانم ...
دخرى البلد انت وامل اصحابك ، وبالمناسبة ماتشيل هم شيل كيمات الحب الحتكون زوادتك ، واحد من اصحابك اهدانا عصايتو قال تتوكأ عليها وهو حيقعد يرجاك تحت ضل حيطة المطار ويناجى زمن الفرح الجاى
امانة عليك ياعاصم كان تنسى تجيبا معاك عشان خاطر صاحبك العجوز
وعشان خاطر ملكة سبأ الحتغنى ليك يوم جيتك
وحتوسع ليك نفاج الفرح من هسع
على حسب وصيتك
| Quote: وخلّو بالكم من ارواحكم الطاعمة .. وكترو من الاغانى والبوستات المليانة فرح وتهانى |
ووســـع ياجـــدع
ويشهد الله بقدر مايحمل قلبنا من فرح ورجاء بأن هيأ الله لك فرصة انك تبقى طيب يؤلمنا ونجد من الصعوبة ان ناتى الآن لنقول لك الى اللقاء ... فالى اللقاء ياعاصم وسوف نكون معك دائما بقلوبنا وبكل وسائل الاتصال ورجاءا لاتقطعو اخباره عنا وياعاصم زى ماوعدت وربنا يديك العافية وطمنا اول بأول ...
|
|
 
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
أختي العزيزة ملكة سبأ
كنت متماسكا طيلة الليالي السابقة لأكون قويا لعاصم
ولكن مقالتك جعلتني أذرف الدمع سخيا
وأنا وأعوذ بالله من هذه ال أنا رجل عصي الدمع
فنهضت من ضعفي وتقبلت القبلة وناجيت ربي في هذه الأيام المباركة من بعد رمضان
الهي نقف ببابك فلا تطردنا ولاتردنا خائبين مهزومين ولاخزاي ولامحرومين
نسألك فأجبنا وندعوك فأستجب لنا
ألهي أنت قلت وقولك الحق ...وأذا مرضت فهو يشفيني
أصبغ علي عاصم شفائك
وأسبغ عليه نعمائك
وأشمله برحمتك التي وسعت كل شئ
ورده الي أحبائه عافيا معافي
وأحرسه في رحلته هذه بعينك التي لاتنام
وأجبر خاطرنا في أتمام جميلك فيه
ياعظيم ويا مرتجي لكل عظيم
أنت علي شفائه قادر
وهو عليك ساهل
اللهم بك نحاول
اللهم بك نقاتل
اللهم بك نصاول ونجاول
أنقطع الرجاء الأ منك
وخابت الأمال الأ فيك
فأكتب لنا وأيدنا بنصر وشفاء من عندك...
وأجعل ملكة سبأ جذلة فرحة ممتنة لك بعودته معافي من كل بلاء...ياذا المن والكرم...آمين
خبريه ياملكة الملوك أن مقرن النيلين قد أتسع ليشمل كل العالم وأنا في أنتظاره عند هذا المقرن الجديد ومعي قلوب كل الذين أحبوك وعشقوا حبيبتك الوطن
أبشر يا عاصم
دمتي ياملكة سبأ
أخوك د.متوكل
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
حلمت فى النوم جونى ناس مريومة ومعاهن راجلين عجاز بسألو من عاصم
كلمتهم عاصم فى صحبةال لا نام ولا اكل الطعام وحيلاقو اخوان الصفا حبان القسا ...
تأوهت مريومة وطنطن الراجل العجوز وهو يسند اخو او يسند بعضهم البعض فالزى عاصم كانو داخرنو عكاز زمن ، واحتجت مريومة انها جاءت تحمل مساهمتها فى علاج عاصم ونزلت (طبقها) من فوق راسها ووجدت ان الحب والتقدير وقلوب ناعمة رقيقة حلت محل الفول والتسالي ...
اخبرنى هدهدى انه يرى وردا يسير ... تحرينا الامر فوجدنا انهم اصحاب عاصم وحبايبو يزحفون نحونا يطلبون وداعه ... ارسلت الهدهد يطلب النجدة والعمليات وكما توقعت اتى على راسهم من لاندرى كيف نشكرهم ( المهندس + ابوساندرا + دريمز)
واخذنا من الراجلين العجاز عصاياتهم وقسمنا الراجل فى جهة والنسوان فى جهة وركبنا ... وشهد سماء الخرطوم حدث لم يشاهده من قبل
وصلنا ارض المطار وعاصم يتأهب للمغادرة فتحلقنا حوله وغنينا
هوى بى هو بى
عاصم الحنين يالله تتمو لى
وهز الرجال وعاصم يرسل قبلاته ويرسم علامة النصر
وترتسم الدهشة وتلون انحاء الفضاء فكم انتم عظماء يااهل بلادى
غطى الصخب والضجيج على جرس منبهى فلم انتبه من نومى فى الوقت المناسب وعندما اسرعت نحو الهاتف اخبرنى جدو شقيق عاصم انه اقلع الآن
ترافقك السلامة ياعاصم
ويصحبك الينا الشفاء التام
وفى رعاية الله
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
حتمآ سنغني معك ،يا الملكة الكامل كمالك
كلهم كانوا هناك حتى مطلع الفجر أوان مغادرته تحفه الدعوات ، *المهندس،فاردآ ابتسامته الوضيئة ،
** دكتور قرنق توماس بحنية الطبيب المداوي يوزع التعليمات ومنتهى العناية
**أسلام عبدالرحمن ،دخل في نسيج الاسرة وتصدى للاستقبال والواجبات
** رشيدة ، مشهرة امومتها الطاغية وبناتها ساندرا وماهيتاب
** عمر خليل ، و وليد عمر انتقل توترهما الى الاوتار وغنوا حتى الاذان
** مامون التلب ،قرأ قصائد الامل والتفاؤل
** سامي عبدالرحمن ،يداوي الحزن بالضحك المعافى
** اسماعيل ميرغني ، تسربل بالهدوء والصمت
**أسعد صفوان ، تمامآ مثل بوستاته المميزة
** أخوة عاصم ، محمد الذي ارهق الامجاد بالمشاوير ، وزوجته الحادبة توزع عنايتها ، سليمان ، متحزم ومتلزم منتبه تمامآ للواجبات ، احسان ملاك الرحمة الحنون ، مشاعر سكرتيرته الهميمة
** دريمز ، قائد من خلف الكواليس وغالبآ امام الصفوف توجه وتتحرك وتنجز وتكون موجودة عند تمام الحوجة ،تخفي قلقها وتركز وتركز على المفيد وتصحح اخطائنا بهدوء لا تقرع ولا تنتقد ،مايسترو حريف وشفيف ، وبحضورها المذهل تعرف المطلوب وتفعله ، لحظت ان عاصم انفتحت فيه جراح فقد الام فافتقدها في هذه الظروف ، حست وعرفت وعلى التو وجدت الحل احتمت بأمها ولما تعرفه عنها من حنان وامومة محتشدة احضرتها ولم يملك عاصم الا ان يغرق في دموع المحبة والعرفان
وكنت انت حاضرة رغمآ عن انف الظروف التي غيبتك
ولا انسى ، كان هناك الهميم دكتور متوكل معنا بالموبايل خطوة بخطوة وبانجليزية مهنية تحاور مع دكتور قرنق
المجد لهم جميعآ
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: أبو ساندرا)
|
شكرا يالله
شكرا ابو ساندرا
شكرا شلة الوهج
احبكم جميعكم
وكلنا نحب عاصم
ارح نلحنها ونغنيها...
وماتقولو كلام مشاتر
كدى جيبو سيرة عاصم وشوفو الحروف دى حتترص كيف
وفى احلى من رصتكم دى ؟؟
وانشاء الله كلنا حضور فى مهرجان الفرح
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
بي بركة الحب اللمانا
وبي بركة سودانيتنا الجامعانا
وبي بركة عزتنا التامانا
وبي بركة خوتنا الضامانا
نتلم في شفا عاصم
ونتلم لي سلام عاصم ونتسارع في قلد عاصم
ونبارك لي اهل عاصم
نبارك سلامتو
ونبارك شفاهو
نبارك غلاوتو
ونبارك مناهو
يسلم من كل بلى
يسلم من كل شر
يسلم حبيبنا
يسلم طبيقنا
يسلم اخونا
يسلموا حبان قساي
التلقاهم .. الكل بي جاي
نحن متكولين عليهم بعد خالقنا
نحن مسنودين عليهم في لمتنا
انتو ابقوا عشرة على المبادي
ختوا اخواني ايديكم في الايادي
دي سودانيتنا البتهيب الاعادي
الف ومرحب بيكم شباب بلادي
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ود عقاب)
|
العاصم السعيد
هاهي الملكة تغوص في التواريخ لتعدل حالها المايل فتجمعنا أيادي سبأ، وكل حروف اللغة الرصينة تضج لوداعه في مطار وتسبقه لتهدأ بإستقباله في مطار آخر، والكريم يستجيب لضراعات كل هؤلاء المحبين.
فاللهم أدم عاصم علينا نعمة، وأشفه، وأفتح عليه ببوست مليء بالفرح.
اللهم آمين....يارب العالمين
والتحايا لكم ولملكة سبأ و لدريم
| |
|
|
|
|
|
|
|
|
 Re: ستغنى سبأ احتفاء بشفاء عاصم البهاء (Re: ملكة سبأ)
|
البوست دا حلو كيف
دكتور متوكل دا رائع بجد و انشاء الله الاجراءت تتم حسب المتفق و البنتمناه وعاصم يكون تحت رعايه دكتور متوكل قريب جدا عموما عاصم لو وصل عندنا هنا ما بتكون في مشكله
يا ابو ساندره اظنك ما لاقيت سينتمنتال هناك هو قال لي الناس كانوا كتار والبيت زحمه ما قعد كتير واظنه خجول كمان
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
راويه العباسي
صحيح لم التق سنتمنتال ،تعاقبنا ، حضرت بعد خروجه ، وكان تعليق الجميع انه خجول ،وما بيشبه مساهماتو
أم سهى
اتاري انت وخالد العبيد لماكم الشعر ، قصيدتك اعلاه رائعة ومعبرة ، وياريت علاء سنهوري ينتبه لها ويلحنها عند عودة عاصم معافى نغنيها
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
العزيز أبو ساندرا
لك التحية
انا بالمناسبة ما بكتب شعر - بس مرات تجيني رغبة اني اكتب وبتكون الكتابة وليدة اللحظة وهذا ما حصل لي في هذا البوست انا كنت بقرأ فيهو وبعدين لقيت نفسي بكتب في شنو ؟ ما عارفة بس عندي رغبة اني اعبر عن دواخلي واحساسي في تلك اللحظة وتصور انا ما قريت اني كتبت شنو الا الليلة لمن فتحت اللنك
فحرام تقارنن بين خالد الشاعر وبين زول (ظلنطحى) (انشاء الله تكون قدرت تقراها) لك التحية
| |
|
|
|
|
|
|
|
|
|
ام سهى (Re: ملكة سبأ)
|
العزيزة ملكة سبأ
لك تحيات الورد
عاصم محظوظ لانو ساكن مع الهدهد وبتكتب ليه ملكة سبأ
وكمان ازيدك ساكن هسه في حتة اسمها الملك الصالح ومجاور للسيدة زينب
الحيطة بالحيطة.
مشكلتنا نحن في القاهرة مع عاصم انو هو عايز يرجع السودان من المطار
قال لي انا راجع محجوب شريف قال لي ترجع بسراع عشان مشروع النفاج بدينا العمل فيه !!!!!
وكمان قال لي وهو في اشد لحظات المه وهو بيبكي وكان متكي على كتفي يا خالد البلد كيف
عاصم بالمناسبة ما ببكي من الم المرض ببكي من الفراق بتذكر الناس واحد واحدة
قال لينا الكتور محلو وين قلنا ليه في الدقي قال الدقي دي الجنب الصحافة
خيالوا مل فارقكم دقيقة
وبعدين يا ام سهى اولا بالتبادي انت كنتي وين ،
ويا ناس البورد اجمعين سافل وصعيد والحاضر يكلم الغايب ام سهى دي شاعرة بالدس وانا الكلام ده كنت داسيهو من زمان لكن هسه ما بسكت عليه وزمان كانت ما بتقول الشعر الا في اضان زهير لكن الليلة الكيل فاض وكمان ازيدكم في القصيد بيتين ام سهى دي بت بيت المال الاصيلة لو ختيتوها في الجرح يبرى عشان كده نحن حا نرسل ليها هوا لي عاصم الحزين تنجدو وتفزعو وتمرق مرضو ذي السبيبة ما بتمرق من العجين . وانا يا ام سهى كان بديت اكتب عنك ناس البورد ما بريحوك اخير براااااك تمسكي الشعر من قرونو
وخليتكم عافية
وانا جاري هسه للحزين
ودعواتك يا ملكة سبا
خالد العبيد
| |
|
|
|
|
|
|
|
|
|
Re: ام سهى (Re: خالد العبيد)
|
شفت كيف ياخالد
وانه لسليمان وانه حنين حميم
كما سليمان يتربع على عرش الكلمة لتنقله الى عرش القلوب قبل ان يرتد اليه طرفه ليفعل بامره مايشاء
نتمنى سلامته وتمام شفائه وندعو له ليل نهار
وسلم على عاصم ياخالد وقول ليهو البلد مشتاقة ليك اكتر منك
وقول ارجع بسراع عشان ناس النفاج
ودمتم اخوان الصفا
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
بسم الله الشافى الكافى
الى الاخ العزيز عاصم الحنين
سلام من الله عليك ونحن فى اتم حالات الطمانينة وانت فى صحبة الكرام سنهوري والعبيد ورجاء وسيد البيت هدهد
اما بعد
ناس البيت بسلمو عليك اما ان دار محور سؤالك عنهم فهم بخير ولا ينقصم شى سوى رؤياكم الغالية
البلد ماعندها عوجة وبتسأل عنك وبتتمنى ليك العافية
فطومة ست الشاى اليومين ديل بترجع بيتهم بدرى سمعت انها بتوفر فى سكر الكرامة
شايفين رجوية قالت ناس القاهرة زادو واحد، دايرة اكتب ليها اقول ليها مية ما واحد نطت لى مريومة فى حلقى وشعيراتا المطايرات حمنى اشوف قدامى ، مسكتها لميتن ليها ومسحت ليه وشيها وضميتها لقيت قلبها بدق شديد قلت ليها قولى بسم الله يامريومة عاصم جاى مشى ليهم ضيف ساكت بتعالج ويجى انشاء الله ، نسيتى شريطك الموسمنو بيهو ؟
البت بالله مسكتنى ودورت بى السوق العربي والناس ديل اتلمو من وين وين ومريومة ترقص وانا اصلى ابيت اغنى عشان راجياك لمن تجى ياعاصم..
ما اشتغلو بى وغنو براهم وجو المداحين التحت النيمة القدام الجامع الكبير مدحو زييين .... وناس (سللللللللللوا على النبى ياجماعة ) سامعاهم زى البقولو (ادددددددعو لعاصم ياجماعة) وانا اقول يارب يارب
ومرات مرات اسمعهم يقولو (ويننننننننننننننو عاصم ياجماعة)
رديت ليهم عاصم كويس ومرتاح وقال كراعو فى الواطة ماقعد ينزلها واصحابو كان داير لبن الطيرة قاعدين يجيبو ليهو _ كانت فى طيرة شمشارة راكة قريب لى ماعجبا الكلام نفضت ريشا ورشت على جبينى سائل ابيض وانا عارفاهو مالبن وهى دايرة تنبهنى لكلامى المبالغة داك ، حدرت ليها واتحديتا وقلت ليها انا متأكدة انهم بجيبو انتى مابتعرفيهم وكان شفتى البسو فيهو كلهم كان اقتنعتى ... ودخلنا فى مناقشة وانحاز لى واحد من اهلها استغليت تعاطفو معاى ورسلتو وقلت ليهو فى هدهد واحد تانى تمشى بيتهم تكلمهم وتحنسهم يخلو عاصم يمد لينا راسو نسالمو ويسالمنا، نناضمو وينضم يطمنا كلنا... ويطمنا عليهو رب العاملين من فوق
قولو آمين
وفى الختام ارفع قلمى مستأذنة وليس مستغينة وتقبل فائق احترامى وبلغ سلامى لشلة الصفا بدون فرز
والسلام
اختك/ ملكة سبأ
الخرطوم 1/12/2003م
* ملحوظة :
طبعا كلام يجى يتكلم هنا دى بناء طلبو قبيل يا علا وخالد وامين ورجا ولو فيها اى تأثير على صحتو يبقى بلاش ومعليش ياعاصم صحتك بالدنيا ونحن فى ومنتظرنك
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
1- ملكة سبأ
فصاحة حارساك من حبوبتك مهيرة بت عبود ، وشفافية بني شايق من سماعين ود حد الزين لي عند حميد ،الليلة بتشبهي لي بت خالتك سليلة الوراريق رقية التي تسربلت بالصمت الفصيح ، وبشوف فيك ملمح من ود ست الجيل ساعت يكتب أو يحكي ويسرح
2- بورداب القاهرة
( ما احلاهم ، شالو معاهو الهم بالجملة )
| |
|
|
|
|
|
|
|
|
 Re: ستغنى سبأ احتفاء بشفاء عاصم البهاء (Re: hala guta)
|
دعونا نردد سوياً هذا الدعاء العظيم
الهي نقف ببابك فلا تطردنا ولاتردنا خائبين مهزومين ولاخزاي ولامحرومين
نسألك فأجبنا وندعوك فأستجب لنا
ألهي أنت قلت وقولك الحق ...وأذا مرضت فهو يشفيني
أصبغ علي عاصم شفائك
وأسبغ عليه نعمائك
وأشمله برحمتك التي وسعت كل شئ
ورده الي أحبائه عافيا معافي
وأحرسه في رحلته هذه بعينك التي لاتنام
وأجبر خاطرنا في أتمام جميلك فيه
ياعظيم ويا مرتجي لكل عظيم
أنت علي شفائه قادر
وهو عليك ساهل
اللهم بك نحاول
اللهم بك نقاتل
اللهم بك نصاول ونجاول
أنقطع الرجاء الأ منك
وخابت الأمال الأ فيك
فأكتب لنا وأيدنا بنصر وشفاء من عندك...
وأجعل ملكة سبأ جذلة فرحة ممتنة لك بعودته معافي من كل بلاء...ياذا المن والكرم...آمين
[red/]
اللهم آميييييييييييييييييين
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: haneena)
|
تعرفى ياحنينة
الغنا زاتو رايح منى
المشاعر والاحاسيس والحاجات الجوا دى كلها محتليها الفرح
يلا ارح انتو معاى
وكلمو لى ناس موصلى وحمزة
وتمبس يجى يسجل
ومهرجاااااااااااااااان كبير وملون بكل الوان الفرح
| |
|
|
|
|
|
|
|
|
 Re: ستغنى سبأ احتفاء بشفاء عاصم البهاء (Re: hala guta)
|
ياااااااااااه معقولة المظاهرات دي فاتتني يا بلقيس
كنت حاضر لحظت انا طلع البوست في الصفحة الاول ..ٌ قريتو
قريت رد د. متوكل .. كنت محاصر بين حنينة وهاله قوته . وانفعالاتهم النبيلة ..
في اللحظات ديك عرفت انو في حاجه اسمها دموع في البني آدم .. كنت قايله مافي
كنت معاكم يا بلقيس .. ويا كل الناس الجميلة .. وياكل الخير الفي الدنيا ويا كل القلوب المليانة محنة وحنية .. وياكلكم .. انتو اجمل ناس
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
وإنتي قايلة أنا بقول ليك ملكة البورد ليه؟؟؟؟
ما عشان غناك ونضمك السمح دا ومشاعرك الدفاقة وروح الأخوة والطيبة الكاسياك .. تسلمي يا ملكة البورد
أملي كبير في المولى عز وجل في شفاء عاصم وعودته سعيداً معافاً وليس ذلك على الله بعزيز فهو الشافي له الحمد وله الشكر وله النعمة وله الثناء الحسن الجميل
سوف أتابع مع الأخوة بورداب مسقط ونقوم بما يلزم
ولكي وللشفيف أبا والجميلات بنات العباسي والمرهف أبو ساندرا والمعتق خالد العبيد كل الود
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
بصاتك يا الملكة ما وقفن عندى من كترة الناس البتبارك
الا انا بحس الغنا عرفتهن وعرفت محلهن وبقيت مارقة عليهن
انا بس يا اخوانى مشكلتى ما قادرة اتحمل الفرح دة براى
اول ما اتكلمت مع رجاء وكلمتنى كان فى ذهنى كل الناس الحنان الهنا ديل
كان نفسي الاقيكم واحد وواحدة
جربت كل التلفونات العندى حنينة..تمبس..دريمز
وكلهن اتامرن على
يمنى فى الجامعة
ما عرفت اودى روحى وين
يا ربى اكلم الخواجات جيرانى ديل؟ بيفهمونى ؟ ودة يشرحوا كيف بالانجليزى
غايتو ترانى فى رجا بصات السيرة دى اجى اتمو معاكم هناك فى الخرطوم
الغربة انشاء الله تعقرى
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
ملكة سبا
سلام مربع
حقيقي كنت محتاجة اتسند على كتفك واغسل بدموع فرحك وفرحي
احزاني وكثير احباطاتي
لكن معليش اهو الايام التي تدخر لنا امثالكم لم تقصر معنا تب
راجينكم بالعديل والزين
وراجع عاصم الى لستكه في زاوية بيتهم
يشاغب مثلما اعتاد بتاع الركشة ، وكمساري الدفار
وموية النيل
لكي من كل انسجة شراييني قبلات الفرح
وتبريكات السلامه التي حتما هو اهلا لها
وانشاء الله ما عدمناكم يااااارب
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: shiry)
|
ملكة سبا انشاالله فالكم قايل لعاصم عديلة وزين ، وما عدمنا دربك يا محنة، تسلمي يا الملكة وكل الناس الطيبين العامرة قلويهم بالمحبة
انشاالله تدوم دخري لناس البورد وقت الشدة ومعاكم انشاالله .
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: shiry)
|
شيري الحبيبة
تعالى نرتمي فى احضان بعض ونفتح للفرح الف باب
نسيتى اننا صحبة الورد ؟
كنتى حصيفة وشفافة وقلتيها صاح
ناس البورد ديل رائعين جدا
وكل ماتشعري باحباط تعالى واقيفي فى خشم الباب وشيلى من بركاتهم
حمد لله على سلامة عاصم ياشيري
وربنا يتم ليهو الشفا
وتعالى سوا نسوى العديل والزين
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
افتقدناك اليوم يشدة ياعاصم
كان الجميع اغلبهم حضور
والامنيات الطيبة لك بتمام العافية كلها حضور
نتمنى ان نراك معافيا قريبا بيننا
لك اصدقاء كما الورد
وهل يسعهم الا ان يكونوا كذلك ؟
انهم اصدقاء عاصم وكفى
لك التحية والامانى
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
1- ملكة سبأ
يا وسيمة كلما نقترب منك تتضطح الصورة لنا تمامأ ، تواضع منك ان تعدي نفسك كويم تراب في سفح البركل اوكثبان رملية عند اقدام الاهرامات ، قيمتك عندنا عالية تناطح كرنكاكول جبل الصلاح ،وتواضعك يزيدك علوآ ورفعة وسمو ،ونهيئ الاذان في انتظار الهديل يا حمامة السلام والوئام
2- بدر الدين شنا
بدر حلا ، شكرآ على المشاركة ،واهتمامكم وسؤالكم رفع من معنويات عاصم وبها صار قادرآ على مواجهة المرض وهزيمته
| |
|
|
|
|
|
|
|
|
 Re: ستغنى سبأ احتفاء بشفاء عاصم البهاء (Re: أبو ساندرا)
|
يا مليكة
نحتاج أن نفرح فقد طالت أحزاننا
ولا نريده فرح مسروق
فرحا يشوبه الخوف
أعتدنا حين نضحك نقول اللهم أجعلو خير...
وأحس بدعاش الفرح وما أظنه إلا ماطرا
وسوف أنظف سبلوقاتي
وأهيئ نفسي لأعرض وآخد شبال
وأضرب الأرض برجلي...
وما أراني إلا راكبا في بصات السيرة هذه
ولو لم تحتاجوا (سواقين)
نكتفي بي (مساعدية)...
ولنواصل جهودنا حتي يكتمل البدر
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: aba)
|
ونغطغط التميرات يابا
وكان بقينا عليهن فدا عاصم
لكن اخوانه والحمد لله ما حوجونا
ولسة دايرنكم معانا يا اخوان عاصم لمن عافيتو تقول (احي)
وماكن ناس وصية ومابتقصرو
اركب يا ابا البصات ديل سايقات براهن
تعال اعرض وماتخليلك شبال
وبالمناسبة الفرح هنا حيتكلم بكل اللغات
والناس جماعات جماعات
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: ملكة سبأ)
|
مليكتنا الجميلة ،
يفرحني أن تكون مشاركتي الأولى بعد غيبة قسرية لتنسم عبير فالك السمح للأخ عاصم العاشق ، ففي كتاباته التي تمكنت من قراءتها بالبورد يضج هذا المعنى / الزخم ، الأمنيات الحلوة والمحبة له وسنتابع مع بقية الأخوات والأخوان.
| |
|
|
|
|
|
|
|
|
|
Re: ستغنى سبأ احتفاء بشفاء عاصم البهاء (Re: أبو ساندرا)
|
يا الله يا أبا ساندرا ، عندي معاك كلام كتير في دائرة الخاص أو الشخصي المتربص بالعام حول زيارتك الجميلة دي ، والتعبير من عندك ، أعود هنا أو في مكان تاني ، لكن الشوق لك ولأخبار السودان لا يوصف وكل سنة وانتوا بألف خير.
| |
|
|
|
|
|
|
| |
ملكة سبأ
haneena
aba
إيمان أحمد
Mutwakil Mahmoud
أبو ساندرا
أم سهى
doma
أبنوسة
Rawia
خالد العبيد
الجندرية
Raja
Ishraga Mustafa
HOPEFUL
HAMZA SULIMAN
elsharief
Tumadir
tmbis
بدرالدين شنا
shiry
عشة بت فاطنة
فيس بوك
تويتر
انستقرام
يوتيوب
بنتيريست