|
|
 قناة هارموني وفلس أخواني !!
|
يااااااااااااااا حليل مغتربين زمان !!!
عبارة داهمني بيها أخوي الكبير الموجود في السودان وبعدها إضنيني ما سمعت إلا الفارغة ..
والسبب بكل بساطة قناة هارموني وهي تعلن لشرائط الكاسيت الموجودة حالياً بالأسواق !!!
كل ما يجيبو دعاية شريط كاسيت ترررررن تررررن تررررررررن أضرب التلفون ..أول أيام كانوا بيرحبو بي تلفوناتي أيما ترحيب :
الو ..إزيييك يا ابو صلاح ..
أووووووووووو ..أهليييييييين يا أبو عمير كيفك وصحتك وأحوالك..امورك والله مشتااااقيييييييين ..وييييين يا زوووووووووول طولت مننا كده ..والله ليييييييييك وحششششششة ..
والله يا بي الأكتر كيف إنتو وناس البيت ؟
نحن كويسييييييين وما عندنا أي عوجة إنت كيف طمنّا عليك ؟ ما محتاج ليك حاجة من السودان ؟
اي والله بس لو ما فيها كلفة ليكم عليك الله يا صلاح في شريط بتاع الجيلي الصافي نزل جديد رسلوهو لي مع أقرب زول جاي السعودية ..
جددددددددا يا عمر ياخ نحن عندنا كم عمر أصلو ..أخونا الوحيييييد المغترب ولازم ندلعو ..والشريط كلها بي 5 الف جنيه ..
بعد إسبوع لمن ضربت أسمع ليك صوت أخوي بقا واطي شوية :
ألو..إزيك يا ابوصلاح ..
الو..أيوة يا عمر ..كيف تمام ..معاك صلاح ..
ايوة يا صلاح عشان بس رصيدي حا يقطع سريييع كده عايز أقول ليك حاجة ..
ايوة معاك قول..
ياخ في شريط طالع جديد بتاع محمود عبد العزيز إسمو الحنين و علوية دي جاية بعد كم يوم كده عليك الله أمشي ليهم في الحاج يوسف أديهم الشريط ..
كويس يا عمر ما مشكلة ..
بعد إسبوع تاني ضربت ..
الو أهليين صلاح..
أيوة..
كيفكم وكيف ناس البيت والله مشتاااااااااااق ليهم شديييييييييييييد..
كويسين ..
بالله كيفك يا صلاح وأمورك وأحوالك وصحتك والشغل معاك كيف وجري السودان داك ؟..
غايتو ..
صلاح ياخ معليش بس في شريط بتاع معتز صباحي إسمو يا محتار شايفو نزل في السوق فعليك الله لو لقيت طريقة تمشي تشتريهو لي من شارع الدكاترة ومن هناك تمشي المطار وتشوف لو في رحلة قريبة ترسلو مع اي زول ..
شوف يا عمر والله إنت كرهتنا عديييييييييل كده ..والموضوع ده شايفو جرّ ..وانا والله شرايط ساي لحدي أسة دافع 150 الف ..بعدين تعاااااااااااال هنا إنت البيجيب ليك أخبار الشرايط دي منو ؟ والله نحن القاعدين هنا ما بنعرف الشرايط دي نزلت إلا منك ووالله ..
انا(متظارفاً ) ..عليك الله يا صلاح ما شفت شريط محمود ده سمح كيف والعجب لمن غنّا بعد الغياب..
شوووووف يا عمر والله انا الشرايط دي مش انا الإشتريتا ؟ لكن والله ما سمعت فيها شي (لهجة حادة)..ومواصلاً :أها ما قلت لي ده منو البيوريك الأخبار دي ؟
والله يا صلاح في الحقيقة بشوف دعايتهم في هارموني ..
والله يا عمر غايتو ناس هارموني ديل بالجد ما عملوا فينا خير ..أسة تلقاهم كل المغتربين هارين أهلهم بي جنس عمايلك دي والواحد منكم كان قالوا ليهو رسل مايكرويف ولا جيب لينا غسالة يعمل فيها الشبكة كعبة والخط بيقطع ..
لالالا ماف مشكلة يا ابوصلاح الشهر الجاي برسل ليكم المايكرويف ..اها وبي مناسبة المايركويف دي ندى القلعة عندها شريط شكلو مبااااااااااااالغة إسمو إتفقنا لو لقيت طريقة فضلاً لا أمراً ترسلوا لي..
قلللللللللللللللللللت شنووووووووووووووووووووو؟؟
لالالالا بس ندى القلعة عندها شريط جدي...
تييييييييت..تييييييييييييت ..تيييييييييييييت..
وبعد أقل من خمسة دقائق جاتني رسالة عبر الموبايل بتقول:
غايتو معتصم الجعيلي ده ما كسب فينا خير ..إن شاء الله يقفلوا ليهو قناتو دي في أول قرار لوزراء الإعلام العرب بعد ما وافقو يراقبو الفضاء والفضائيات !!
|
|
 
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
.
عمر الفاروق
تحياتي ...ومشتاقين
هارموني قناة جميلة جداً ...في لحظات بتخليك تطوف السودان كله
نتمنى للقائمين على امرها التوفيق .
..........
طبعاً الايام دي في شريط (ممتاز) والطلب عليهو مرتفع جداً والتوزيع
ماشاء الله .... ممكن ارسلو ليك ..
الشريط اسمو (الانسحــــاب) ... وجماعتك على حسب فهمهم مسمنو (واي واي مادايرين)
طبعاً (المحلن) ابدع خالص في الالحان الفانانين ثنائي (مجنسين) واحد قديم كان (شيال)
في فرقة الزعيم الموسيقية بقيادة (العجب حبيبي) ..وظل طوال السنوات الماضية( يشيل ويدينا)
لحدي ما انضم اليه مؤخراً (فردة كورس) في عيد (الضحية) الاخير اسمو (عمر ) وشال وادي (الضباح )
اما (الغناي) الجديد حيغني فقط في شريط الانسحاب ...لكن على (المسارح ) مافي طريقة كلو كلو .
لانو لجنة (النصوص و القواعد العامة) قالت مافي طريقة للثنائي يغنوا مع بعض ...
.........
يافاروق .... السنة دي فرقتكم كلها نشـــــــــــاز....
والشافكم غنيتو (بالرق) في (الشمس الحارة) ماكضب ...
.
| |
|
|
|
|
|
|
|
|
|
Re: قناة هارموني وفلس أخواني !! (Re: gamal elsadig)
|
عمر الفاروق
ازيك
ياخي جهجهتنا جهجهه شديدةة
(أخواني) دي ودتنا لي بعيد خلاس
اصلو بيني وبينك البورد ده فيهو كلام مبطن كده ما عرفتك قاصد شنو من العنوان يعني ياتو اخوان لحدي ما دخلت البوست وقريت
انا غايتو حليت موضوع الشرايط ده من زمان بدري قبال سنين ما بكلف لي زول يشتري لي شريط علا يكون مغترب يمشي اجازة ويجيبو لي معاهو
ولمن اسمع لي بي شرريط جديد بشوف منو من الاخوان او الاخوات
او لمن امشي اجازة بعد كم سنة بلقط لي شرايط من زمن الغنا السمح وزمن السمع بالاذنين مش زي غنا هسه ده البقى فيهو السمع بالعيون وكمانت بجيب معاي طلبات اصحابي المغتربين
الخمسة آلالف دي لي ناس هناك كثيرة عليهم بعدين خمسة في خمسة في خمسة في خمسة دي ما كثيرة خلاص
انا عن نفسي بشوف قناة هارموني دي انجح قناة سودانية وكل الشكر والتفدير للقائمين عليها وعلى رأسهم معتصم الجعيلي
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
جمال يا صادق:
ياخ والله ليك وحشة شديييدة ..ويين الحي بيك ..
الواحد قدر ما بطنو تطم من الكورة تجو إنتو تفتحوا لينا الشهيّة ..
أريت كل المريخاب جمال الصادق وسامي عبدالوهاب ..
أما بخصوص شريط (الإنسحاب ) الظاهر إنت قاصد شريط(السحاب) وححححدنا وما إنت انا لالالا وحححدنا نحن بس اسياد البلد ..
لينا خمسة سنوات في السحاب وإنتو في الأرض يا روحي حارقاكم هجير ..
أحتار انا ..!!!
نحن والله يا جيمي بس عيبنا واااااااااحد بس ياهو الملحن الأستاذ علي أحمد ده ..
غايتو كان خلّانا ما بتجينا عوجة وفرقتنا ما سائلة في عقد الجلاد اخر تناغم وتطريب ..
عندنا موسيقار الأوركسترا ماسك عصايتو وبيوزع في الألحان يمين شمال توزيعات خلعت ناس بيتهوفن وموزارد ..
وبعدين بالنسبة لي (ثنائي العامراب) فما عندنا مشكلة ممكن الحفلة يطلعا فنان واحد طالما التاني بيقبض العداد وبيني وبينك نحن عايزنهم اي واحد يطلع حفلة براهو لأنو الإتنين صوتهم جميل فأحسن أي واحد فيهم يغني براهو ..
كعبين إنتو البقيتو تفتشو لي رقيص(الدبكة) والواحد والله بقا لمن يخش ليكم كورة يشيل هم يكون في اللاعب لابس ليهو حزام ناسف بدل شنكار ..
مسعول من الخير يا جيمي إنتو ناسكم ديل سنّي وشيعي ولا الإتنين سنيين ولا سني وكردي ولا الحنك شنو بالضبط.؟
تخريمة :
شيطنا الجديد حا يكون في أغنية :
(ستة) و(ستة) جوني ..
من النوم صحوني ..
للمتاز شالوني..
في استادي دقوني..
وانا يا ناااس من توالي الليلة ..
وانا يا ناس من كليتشي الليلة..
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
.
| Quote: نحن والله يا جيمي بس عيبنا واااااااااحد بس ياهو الملحن الأستاذ علي أحمد ده .. |
ده كلام شنو يافاروق ؟؟ لكن الملحن ده ماسيد (الالحااااااااان ذاتها) يعني كان مااداكم
الالحان دي ماتعبتوا شديد ؟؟ ياااخ بعد ماهو معاكم انتو هسع شغالين (تحويل نغمات) لمن
يخليكم حيجيك الرد (هذا المشترك مفلس ) وباع (الشريحة) وركن (الموبايل) لانتهاء العمر الافتراضي
غايتو كان ده حالكم يافاروق ...بعد شوية اخوانك حيرسلو ليك (كرتونة) شرايط لكثير من (المداح)
بجلاليب (زرقاء) .
Quote: كعبين إنتو البقيتو تفتشو لي رقيص(الدبكة) والواحد والله بقا لمن يخش ليكم كورة يشيل هم يكون في اللاعب لابس ليهو حزام ناسف بدل شنكار ..
مسعول من الخير يا جيمي إنتو ناسكم ديل سنّي وشيعي ولا الإتنين سنيين ولا سني وكردي ولا الحنك شنو بالضبط. |
والله ضحكتني ياعمر ........
يازول نحن قوات اممية عديل كده ...بل نحن الامم المتحدة بعينها ...ولاماسمعت بموضوع (الطوابق ده)
طبعاً انتو في (الزريبة) لسع شغالين (خيش وشوالات) ...وتقول لي عيبنا في المحلن ياخ انتو عيبكم
وااااااااضح في (الشاعر) و(العازفين) بعدين انتو فرقه ليها 70 سنة شغالة (تقليد) فنانين زي ناس
(الزعيم) وكده ..والى الان ماعندكم اي اغاني خاصة ولاحاولتو تغنوا بالسلم (السباعي) ولاحتى عندكم
اي فكرة بالايقاعات (الافريقية) ....ولحدى هسع شغالين (بالمكرفون) وماعندكم (ساوند)..
Quote: تخريمة :
شيطنا الجديد حا يكون في أغنية :
(ستة) و(ستة) جوني ..
من النوم صحوني ..
للمتاز شالوني..
في استادي دقوني..
وانا يا ناااس من توالي الليلة ..
وانا يا ناس من كليتشي الليلة.. |
دي اغنية (هابطة) زي هبوطكم المتوقع لدوري الشمس الحارة
بعد شوية تلقي (عربية الدعاية) لافة في (الحواري) ....
اليوم وفي تمام الساعة الثالثة عصراً وعلى ملعب (سوق القش)
يلتقي فريق (هلال الملاليم) بفريق (ارقد ياعيش) ...
وطبعا( الدخول) اقصد الوقوف مجاااااااااااناً..
.
.
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
يا ود الفاروق كيفك
ياخى انت بتحب المزازيك دى كدا تقول كنت شغال سواق
( حافلة عازفين ) بعدين والله فعلا جننت ناس بيتكم ساى
ياخى الشرايط اول مكان ببدوا فيهو بالتوزيع (غبيرا)
يعنى ما فى داعى تطلبها من السودان صاحب ليك واحد فى
شارع غبيرا يمكن تلقى عندهم خدمة ( التوصيل مجانا )
ولا انت حتى الشريط عايزو ملح .
فعلا يا حليل مغتربين زمان !!!!!!!!!! ( وجوه محتارة )
أحمد العمار
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
والله البوست بتاعي ده حقو أسميهو كل(الجمال) شي جمال الصادق وشي جمال السنوسي وعقبال جمال حسن سعيد
جمال السنوسي:
| Quote: لمن امشي اجازة بعد كم سنة بلقط لي شرايط |
تعرف يا صديق النظرية دي فاشلة جداً ومكلفة للحد البعيد ..
صاحبي في لندن مرضان بي محمود عبد العزيز وطوّل ما نزل إجازة ..لمن نزل إجازة قام قال يعمل زي نظريتك دي ,,مشى الإستريو لقى محمود عندو 20 شريط !!!
دفع لي بتاع الإستريو 200 الف كاااااااااااااش وشال شرايط محمود ..
انا باقي لي بتعا الإستريو من بعدو ما باع لي زول تاني وقفّل الإستريو وإشترى ليهو أمجاد !!:
يا زول صدقني شغل التلاقيط ده سمح وتحنك ناس السودان خمسة الف فوق خمسة الف ماف زول بيجيب خبرك ..
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
عمر
مرات قليلة بمر على هذه القناة,,,
فى احدى زياراتى لها صادفت صاحبتك
والما بتغبانى ديك,,لابسة ليها كلوش
ومعاها شيلات كركيترات ابداع ابداع
بس المكياج قاعد يننطط قدام الكاميرا
لكن الولد البقلد محمد احمد عوض
اهـ يازمن يامعدى
تحياتى لاخوك
بس دى فكرة ما ترميها فى النت ساى
المغتربين كلهم زهجانين من اخوانهم,,
ما دام هنالك زهج عكسى,,لابد من تسويق الفكرة
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
ايوووووووووووووووووووووووووووووووي
المايكرويف دخل الثورة:
عقبال الالياف الضوئية ::
يعني تاني نتفرج في تسخين الويكة بالتزاكر :
سيحفظ لك التاريخ يا رشاشة انك اول من ادخل المايكرويف للثورات كاول مايكرويف محمول جواً :
يلا كورك سيدا البلااااااعد سيد البلااااعد!!:
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
ألأخ/عمر الفاروق
..................
الزول الهلالابى السمح....كيف حالك وليك مدة ما بنتا وفى إشتياق لى شوفتك..
........................................................................
والله البوست بتاعي ده حقو أسميهو كل(الجمال) شي جمال الصادق وشي جمال السنوسي وعقبال جمال حسن سعيد
...............................
أنا ما بقدر أغير إسمى وعشان تستمر فى موضوع تسمية البوست..............ربنا يرزقنا ولد ونسميهو
جمال إسماعيل محمد احمد..ويشارك معاك فى البوست..كل الجمال..
يا أخى إذا فلست بأخوانك أغلب الرموت على الشروق أو زول..
خالص مودتى...
إسماعيل محمد احمد عباس.................
| |
|
|
|
|
|
|
|
|
|
Re: قناة هارموني وفلس أخواني !! (Re: ismeil abbas)
|
.
| Quote: اي والله بس لو ما فيها كلفة ليكم عليك الله يا صلاح في شريط بتاع الجيلي الصافي نزل جديد رسلوهو لي مع أقرب زول جاي السعودية .. |
ياخ والله الجيلي الصافي ده مداااااااح خلاص ...وهارموني ابدعت في الاخراج ...
ويافاروق كلم لي صلاح اخول يرسل لي نسخة من الشريط ...اصلو نحنا زاتنا مغتربين بس جوه البلد.
طبعا ياعمر انا قلت الجيلي( مداااح) وماقلت (لعااااب) أحسن تفهموا غلط وتفكروا تسجلوه
...
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
أحمد العمار:
| Quote: ياخى الشرايط اول مكان ببدوا فيهو بالتوزيع (غبيرا) |
يا زول ناس غبيرا بيعتمدوا على الوهم الزيّنا ديل في توزيع الشرايط ..
يعني مغترب فارة زيّي كده يرسلوا ليهو الشريط يقوم يمشي غبيرا عشان يطبعو لي صحبو يقوم سيد المحل يتشربك فيكم وعليكم الله ادوني اطبعو والنبي فوقكم كان ما خليتوني اسجلو عشان في ناس طالبنو ..
وتقوموا تجو إنتو باقي الوهم تشيلو بواقينا
تحياتي يا جميل..
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
ابقوتة الحبيب:
| Quote: لكن الولد البقلد محمد احمد عوض |
يا سلااااااااااااام عليهو ياخ ..ده واحد من أسباب محبتي لقناة هارموني ..
إسمو مصطفى بخيت ولقبه الشهير والمعروف بيهو " ود أمبلينة " وهكذا يعرفه ابناء الثورة ..
ود أمبلينة ظهر بعد وفاة الراحل معشوق امدرمان وتحديداً مدينة الثورة الفنان محمد احمد عوض او الخال كما يحلو لأبناء الثورة مناداته..
هارموني اثببت بأنها قناة فعلاً تبحث عن النجوم وإن كنت أعيب عليهم بعض الفيديو كليبات لأشباه فنانين ولن تحسب لهارموني إكتشافهم بقدر ما ستحسب عليها..
هارموني التي إكتشفت الجيلي الصافي في طريقها لإكتشاف الكثير من النجوم ..
ويا سلام على ود أمبلينة ..
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
الاخ عمر الفاروق
تحياتي
لكن بصراحة انت جننت الشرايط جن وجننت اهلك معاك
وكمان معاها مشاوير للحاج يوسف والمطار عشان شريط جديد لمحمود عبدالعزيز!! ده حالة صعبة بالجد
( دي بمناسبة انا ما بحب اسمع ابدا لمحمود عبدالعزيز )
نصيحتي ليك انت اديها صنة يعني ما كل شريط تشوفه نزل تتصل طوالي تطلبه، اتصل بعد تجميع اربعة خمسة شرايط تكون شفت دعايتهم عشان تخفف الضيق من الطلبات
لكن صراحة دعايات شرايط قناة هارموني دي كلها شرايط ضاربة ساكت
| |
|
|
|
|
|
|
|
|
|
Re: قناة هارموني وفلس أخواني !! (Re: tmbis)
|
Quote: بند بدل المصائب دا يا عمر أخوك كان بستعملو (مخلب قط)** الغرض منو استثمارو في وقت الحوجة .. في الحالات الزي دي .. حالات الشرائط .. (حلاوة) مولد مثلا .. (شبط) جديد طلع في السوق ..إلخ..
|
الاخ تمبس
والله لقيتك صعب شديد ، يعني انتوا المغتربين ده نظامكم؟ ؟ والله اهلكم تعبانين معاكم
تقدموا كميات ( سبتات) عشان تلقوا كميات ( احدات )
على كدا بند بدل المصايب ده بيزيد في المواسم والمناسبات والاعياد
| |
|
|
|
|
|
|
|
|
 Re: قناة هارموني وفلس أخواني !! (Re: maia)
|
| Quote: على كدا بند بدل المصايب ده بيزيد في المواسم والمناسبات والاعياد |
.. لا يا مايسة هنا المسمى بختلف .. لانو دخلتي في بند يسمى (تحضيرية) ودي غالبا بتحضر ليها من بدري وهي بتتكون من شقين ..
الأول:
بدل مصايب ..
التاني:
بدل سفـر ..
غالبا المصدر بكون فتح اضانك من بدري أو (حضرك) نفسيا وفنيا من بدري .. وإنت وقتها ما بتكون ابديت اي مقاومة تذكر .. ترسل (التحضيرية) لكن لابد من اثباته في (الكشف) ضمن القائمة المذكورة في البنود الثابتة .. أو الأصول الثابتة.. شهرياً.معامل الضرب في التحضيرية بيكون عكس معامل الضرب في مصايب .. معامل الضرب في تحضيرية بيكون غالبا على راسك .. يا حبذا لو صادفت عيد ضحية ..أو عندكم مناسبة في البيت 
والأضرب من كدا .. إنها لا تحسب .. لا في بند صلاخية .. ولا في بند ما تم ذكره .. لانها بتكون لائصة كدا في النص .. ممكن تجبر لي اي طرف 
| Quote: تقدموا كميات ( سبتات) عشان تلقوا كميات ( احدات ) |
بلاي يا مايسه لو قاعدين نلقى (الاحدات) البتقولي فيها دي حسع عمر الفاروق دا كان جا أعلن افلاسمو هنا دا..؟
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
سامي الخصال:
لمن جيتك شبكتني الشقة التانية دي يا عمر بستقبل فيها الضيوف وشنو وشنو وشنو وهي تراها شقة الصطلة
أسة في ذمتك ده كلام زول نصيح؟
| Quote: سيحفظ لك التاريخ يا رشاشة انك اول من ادخل المايكرويف للثورات كاول مايكرويف محمول جواً : |
انا المايكرويف ده حا أخليهو زي كاس دبي يكون حاجة خفيفة كده من النوع أبو 100 ريال داك وزي ما بيقولوا هنا مايكرويف(داميج) بيكون مطرقع ومطفج وسعرو أبو الرايقة ..
بالمناسبة لمن انا جيت السعودية هنا كرت كرتونة وسمعت ليك المايكرويف وشوفتو قلت في سري:
بالله ده ياهو المايكرويف القادينا بيهو الرشيد بدوي والمرحوم علي الحسن مالك لمن ينقلو كورة لي الهلال أو المريخ ؟
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
إسماعيل عباس:
يا أيها المدافع الصلد
غايتو لو كن مع الفريق القومي في غانا ما اظن التلاتات دي كان جات ..
Quote: أنا ما بقدر أغير إسمى وعشان تستمر فى موضوع تسمية البوست..............ربنا يرزقنا ولد ونسميهو
جمال إسماعيل محمد احمد..ويشارك معاك فى البوست..كل الجمال.. |
يا زول الجمال ما جمال أسماء وبس وإنت الجمال زاتو ياخ ..(حنك بيش مش؟)
اما بالنسبة لنصيحتك بالتحويل للشروق فهي محرمة علينا أربعين يوماًبأمر من وزراة الداخلية خصوصا عند ظهور المذيعة سلمى السيد وفي بعض الاحيان سوركتي ..
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
العزيزة مايا وفي رواية مايسة والعهدة على الرواي الشيخ تمبس
| Quote: ( دي بمناسبة انا ما بحب اسمع ابدا لمحمود عبدالعزيز ) |
طبعا لولا إختلاف الاراء لبارت السلع والإختلاف لا يفسد للود قضية وانا ما حا اقووووم اضغط عليك واقول ليك محمود عنّاي وصوتو سمح و و و لكن بيني وبينك ياخ صوتو سمح
محمود ربما عصفت به العواصف والظروف المحيطة من حوله فأثرت عليه ولكن يظل هو الحنجرة الوحيدة التي تطربني بعيداً عن الكلمات والألحان وانواعها ..
| Quote: لكن صراحة دعايات شرايط قناة هارموني دي كلها شرايط ضاربة ساكت |
بالعكس ياخ ..لأنو شريط معتز صباحي طلع من الأشرطة الجمييييييلة جدا جدا جدا وفيهو كمية من التطريب لممممن بهناك وتنويع في الإيقاعات ما بين تم تم ودليب ومردوم حاجة عجييييبة خالص ..
الود معتز ده بيعمل في صوتو حاجات عجيبة جدا وعندو ملكة ما ساهلة ومهتم شدييد إنو شرايطو تطلع مجودة ومحسنة عشان كده ما بيسعتجل في الإنتاج ..
تخريمة :
غايتو من أسة أهلي دي كان دقو جرس وقالوا تاني ما بيرسلو لي فحا أسكك تديني عنوانك عشان تاني تشتري لي إنتي
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
| Quote: يعني لما ترسل المصاريف تقوم تعمل فوق ليها ( طاقية ) بتاعت خمسين ستين الف كدا .. |
تعرف يا تمبس صلاح أخوي قرا كلامك ده وقال لي أقول ليك إنو المشكلة في عمر إنو قاعد يرسل الطاقيّة وبينسى المصاريف
أسة في داعي يا تمبس تورطني كده والناس تعرف إني ما برسل مصاريف والطواقي زااااتا والله يا تمبس سايد كاب ومختوتة بي الجمبة زي حركات شفاتت حي الضباط ديلك ..
وزي ما بيقولوا والله مراسيلنا زااااااتا بقت زي(الجبّادة) مرة تصيب والف تخيب
ياخ اقول ليك حاجة بتصدق!! انا مرة طلبت رقعة من السودان
زماااااااان لمن جينا البد دي أمي وصتني أبعد من تلاتة حاجات عشان ألم القروش:
كنتاكي
اللموزين
والكبينة
وانت براك سيد العارفين التلااااااااااتة ما بيتفاتو خصوصا لمن الواحد كان في طور اليرقة ...
غايتو يا تمبس نصايحك دي حا أمشي بيها بس يا مان تعال نتفق انا أخليك ترسل المصاريف لي أهلك ولي أهلي وانا برسل الطواقي لي أهلك وأهلي ..
سمح؟
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
| Quote: غايتو يا تمبس نصايحك دي حا أمشي بيها بس يا مان تعال نتفق انا أخليك ترسل المصاريف لي أهلك ولي أهلي وانا برسل الطواقي لي أهلك وأهلي ..سمح؟ |
طيب يا عمر لو قالو لي:
وين يا (اب صفارة) طواقي المصاريف دي ؟ .. اقول ليهم دا اقتراح عمـر ..؟
مالك اديتني احساس كدا بي إنو الطاقية دي عامله زي (التبع) البدوك ليهو مع الطلب كدا..؟
ولو بتصدقني .. حسع دي رسلو لي رسالة انهم استلمو المعلوم (والتبع بتاعو) وبي طاقيتو يعني شرايطك دي لو عايزه تصل ليك .. ممكن تستثمر الشهادة بتاعت الخلو طرف حقتي دي لي شهر مارس بتوقيت أم القرى.. يعني حاليا انا في (الSيــــف) صايد وصلاحياتي (الطاقيتيه) نافذة لمدة خمسطاشر يوم من تاريخه ..
استثمر وقتك وجيب لي معاك شريط لي عميري من غبيرا بالعود علشان نجيب ليك الاشرطة العايزه دي .. يعني زي ما شايف استثمرنا معانا .. (سبتات واحدات) ( مايسة ) دي بالطريقة القانونية ..
أهـا يا مايسة:
بختك دخلتي الاستثمار من اوسع ابوابه .. والماسينجر رجع عايزين لينا (جبنة مضفرة) .. وتلاتة (مراكيب) فاشرية..
اتحركي معانا شوية..
| |
|
|
|
|
|
|
|
|
|
Re: قناة هارموني وفلس أخواني !! (Re: tmbis)
|
انت يا عمر الشرايط دي ما وصلتك من زمان ..
ضارب لناس السودان ليه ..
..
..
بتشوف الدعاية وبتضرب لي انا .. وما قاعد اقصر معاك ..
..
..
قلت الاصلي تسجيله ما ذي المنسوخ .. ياخي دا شريط ولا ( حديث حسن ) ..!! 
..
..
بالمناسبة .. ياقي الشرايط جات .. الجيلي الشيخ .. معتز قرافي .. وعلوية بلنجات .. ونعمات داوود ..
تعال امشي غبيرة سجلهم براك .. انا بنزين ساي كرهتني ولحقتني صلاح اخوك ..
| |
|
|
|
|
|
|
|
|
 Re: قناة هارموني وفلس أخواني !! (Re: humida)
|
Quote: بالمناسبة .. ياقي الشرايط جات .. الجيلي الشيخ .. معتز قرافي .. وعلوية بلنجات .. ونعمات داوود ..
تعال امشي غبيرة سجلهم براك .. انا بنزين ساي كرهتني ولحقتني صلاح اخوك .. |
.. بالمناسبة
أنا في الحتة دي بتعاطف مع عمر لانو الزول دا عندو مستقبل زاهـر .. وبعد فترة ح تسمعو بي (عمر الربـوة).. على وزن (عمرالعلميـن)
لذلك:
وديهو يجب الاشرطة .. عشان بعدين لما ترجع السودان يقوم يرسل ليك (اشرطتـو) من هنـا
يا عمر..
بالنسبة لي الحركة بتاعت (التبع) دي:
في واحد جا داخـل القهوة بتاعت السوق .. بعدين ضارب ليهو حاجة كويسة من الصباح .. لي الجماعة الشغالين في المشاريع دقو العيش .. ونزلو السوق كل واحد اشترى ليهو (راديو) وقاعدين يضربو في شاي الصباح داك وكل زول خاتي قدامو كباية شاي .. ومشغل ليهو محطة براهو ..
قام قال لي الجرسون:
جيب لي شـاي سـادة .. وجيب معاك (رادي) 
| |
|
|
|
|
|
|
|
|
|
Re: قناة هارموني وفلس أخواني !! (Re: tmbis)
|
يا حبيب...انت تاعي اخوكط بالتلفونات مالك..
اضرب لي صلاح غريبة...المذيع بهارموني...قالوا اي شريط يعلنوا عنه اول شي بيدوا المذيعين
نسخة مجانية...واتلقي صلاح ململم شرايط الدنيا والعالمين...وبعدين عندو شيفروليت نازلة
في كرتلة ...امكن يديك الشريط والكرتلة...
| |
|
|
|
|
|
|
|
|
|
Re: قناة هارموني وفلس أخواني !! (Re: nazar hussien)
|
الربوة الصغيرونة دي ..
ياخي قول ( عمر التل ) او ( عمر الهضبة ) او ( عمر الجبل ) علي وزن ( الهادي الجبل ) ..!!
..
..
الناس الفاتهم الاستماع للاسطاذ ( عمر الربوة ) في الحفل الساهر بـ( مخرج 18 ) .. الاتصال بنا لـ( مشاهدة الصور ) ..
والقحة ولا صمة الخشم ..
..
..
يا تمبس .. ما نسميهو ( عمر Exit 18 ) .. او ( عمر كلاسيك ) ..!!
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
عمر الفاروق سلام
البوست بتاعك لذيذ طبعآ
لما أخوك عريس
وصيت حرمنا المصون لي كم شريط تجيبن معاها
غايتو الوصية تلتلتا شوية
ولأنو الزمان كان حب وريدة وكده أصرت أنو تجيبن كلهن
والقائمة كانت كبيرة خلاص
هسة بعد ماخلاص الملايكة طارو مننا
بقت تخلص في قروشن بالأقساط
تخيل 00
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
تمبس يا حبيب:
| Quote: ولو بتصدقني .. حسع دي رسلو لي رسالة انهم استلمو المعلوم (والتبع بتاعو) وبي طاقيتو يعني شرايطك دي لو عايزه تصل ليك .. ممكن تستثمر الشهادة بتاعت الخلو طرف حقتي دي لي شهر مارس بتوقيت أم القرى.. يعني حاليا انا في (الSيــــف) صايد وصلاحياتي (الطاقيتيه) نافذة لمدة خمسطاشر يوم من تاريخه |
..
يا قريبك ما تعتمد على ناس السودان ..ده شعب يعشق المفاجأت وممكن عااااادي جداً وبعد ثقتك دي وغنهم إستلموا المعلوم يجيك إتصال وأول حاجة ينهروك نهرة لمن تحتار ويقولوا ليك :
ده شنو المرسلو ده ؟؟؟ والله ثروشك دي عيش ما بتجيبو ..
والمشكلة الأكبر إنهم مممكن يحكوا ليك عن أخوك الما مغترب وقاعد في السودان وإنو أمبارح بس جا داخل بي خروف وسلّم كل زول من ناس البيت 100 الف جنيه نظام بحبحو روحكم ..
هو إنت قايل قروشك دي قروش !!!
وما بكضب عليك يا تمبس انا مستفيد من حكاية التضخم الضاربة السعودية دي بي صورة مباااااااالغة لي درجة إنو الواحد بقا المواد التموينية يرسل يجيبوها ليهو من السودان فحم - زيت سمسم - جبنة البرقاوي - منقة - قريب فروت ..
يعني شويتين كده وجزارة ود الكندو بيجيبوها لي هنا
تخريمة :
بي مناسبة التضخم دي الواحد بقا لمن يجيكم في بيت العزابة التقول جاي يشيل فاتحة تقطعوا فينا الموية والشاي الأحمر في كباية ما مليانة ..ياخ إتصرفوا إنش اء الله أبو قوس
| |
|
|
|
|
|
|
|
|
|
Re: قناة هارموني وفلس أخواني !! (Re: عمر الفاروق)
|
يا حميدة :
Quote: انت يا عمر الشرايط دي ما وصلتك من زمان ..
ضارب لناس السودان ليه ..
بتشوف الدعاية وبتضرب لي انا .. وما قاعد اقصر معاك ..
قلت الاصلي تسجيله ما ذي المنسوخ .. ياخي دا شريط ولا ( حديث حسن ) ..!! |
مشكلتك زول كضّاب ونسّاي ..
والله إنت ما قصرت معاي لكن انت عارف نظرياتي في شرايط محمود تحديداً ولمن قلت ليك إلا ماستر قلت لي أببببشر يا عمر انا بشيل النسخة وبدّيك الماستر ونظام يؤثرون على أنفسهم ..
قايلني بقول لالالا لكن خزلتك وقلت ليك حباااااااابك والله انت الأول
والله يا قريبك لمن خلّيت لي الظرف وجيت إستلمتو أول ما لقيت الشريط تسجيل طوالي ضربت السودان وقلت ليهم ألحقوني بي الماستر ..
ولو مكضبنا ما مصدقنا أسأل اليارس النايمة فوق بيتنا ..
الماستر الان يشغل حيّز في الطبلون وما خليت لا محمود ولا معتز وفي الطريق ندى القلعة وود اللمين ..
ما قصرت يا حبة ..
| |
|
|
|
|
|
|
| |
عمر الفاروق
gamal elsadig
جمال السنوسي
abuguta
ismeil abbas
tmbis
وإنت هنا تكون ماسك العداد بتاعك تكون حاسبه طبعا بالملم المكعب حاصل جمع الصلاخيات دي في ضرب تلاتة (تطاتنيش) تحويل بتعمل ليك كم شريط كاسيت .؟!
Bakhaf
humida
nazar hussien
فيس بوك
تويتر
انستقرام
يوتيوب
بنتيريست