ياخ السودان ده حبابو عدييييييييييل كده .. بلد المجازفات وحياة الترقب والإندهاش في أي لحظة .. أمبارح حضرت ليكم كورة السودان ومصر دون أي مجازفات وإندهاشات .. وقبل كم يوم حضرت الحلقة الأخيرة من مسلسل رسائل الحب والحرب السورية في أمانة الله .. وأكملت الأمريكان أيدول من طق طق للسلام عليكم وعرفت منو الفاز بيهو دون شلهتة وشحتفة .. بي صراحة كده الواحد فقد الشلهتة والشحتفة في هكذا مواقف .. إشتقت لي قطعة الكهرباء في الأوقات المرتقبة .. زمان الكهربا عندنا تكون شغااااااااالة تش وتكون كورة هلال مريخ بتبدا الساعة 7 ونص مسا .. بالله الساعة 7 و25 دقيقة طق الكهربا تقطع .. وما تجي إلا بعد نهاية الكورة بالضبط .. ياخ انا في مسلسل كنت متابعو زمان لحدي أسة ما عارف الحلقة الأخيرة الحصل فيها شنو لأنو الكهربا قطعت مع بداية الحلقة الأخيرة فما عارف هل تفيدة طلقوها ولا لسة .. زمان الواحد يكون عندو مواعيد في حدائق 6 أبريل يوم الخميس تلقاهو بيكوي القميص من يوم السبت خوفاً من المفاجأة .. والعجب لو عازم ليك ناس شاي مغرب .. الكيكة بتعملا قبل إسبوعين عدييييل كده عشان ما تدخل في أضافرينك .. الحاجات دي وبكل أسف الواحد فقدها الأيام دي ..يا كافي البلا في السعودية القريييييييبة مننا دي والما فيها خزانات وموية و و و و تقوم مطّمن الصباح وتكوي قميصك قبل دقيقتين من المشوار .. الكيكة تعملا لمن تضمن الضيوف وصلوا بيتكم .. الكورة دي تمشي مع صفارة الحكم تقعد في التلفزيون .. كنت أشفق على الجكس في الأعراس وهن يتكدسن في الأوضة الجوّانية لي بيت العرس ما بين أحمر أخدر أصفر وورد الخدود محمر بي البودرة والأحمر وفجأة تسمع ليك صرخات متضاربة ما بين الرقيق والغليظ لااااااااااا .. اححححححححححححححححححي انا الكهربا قطعت ..مااااااااا بالغتو يا ناس الإدارة ..ماااااا بصدق ..أكييييييييد ما قاصدة يا الكهربا .. يتوكّلن على الحي الدايم ويطلعن في الظلام ده ما بين مكرفسة الفستان وملخبطة زراير البلوزة وقد تصل مرحلة الرولا المنسية ما بين الشعرات التلاتة (ده ما عندو علاقة بي جبنة البقرات التلاتة)ويتلفّو حول الدلوكة ما بني تصفيق وزغاريد مستغلّين غياب المعلومة (الكهربا) وفجأة كده قوووووووويم يا الكهربا تعالي وعينك ما تشوف إلا (النور) والملامح اللي كنت راسمها ليهن في الضلام تزول بزوال المؤثر وأسترجع هنا النكتة القديمة (وما بايخة) لمن جات مرا لي ناس وعاملة فيها ظريفة في العشا وتاكل حتتة حتة بي طرف أصابعينا وكده ..في الأثناء دي الكهربا قطعت فزولتنا ما صدقت وخمشت ليها لقمة كبييييييرة جداً فيها لحمة على سجق على جبنة على شطة وودتّا على الخشم ..فجأة الكهربا جات فما كان من زولتنا إلا وقالت : هي كلبكم وينو ؟ الندّيهو اللقمة دي !!!
أستمتع جداً بي المداعاة اللي بيتم توجيها لي ناس الكهربا بي عفوية شديدة وفي نفس اللحظة : الله يلعن يومكم ياناس الإدارة .. الله يقطع رقابكم .. ثقيييييييييل وبايخ بس.. صاحبي شغال في محطة من محطات الكهربا دي حلف لي وقال لي يا عمر مرة كيس الصعوط وقع من جيبي في مفتاح قطع كهربا منطقة معينة والله أبيت أرفعوا كيتاً فيهم .. بالرغم من إنها مبالغة لكن ما تستبعدها في السودان إنو يتم قطع الكهربا بي طريقة زي دي ..كيف لا وصديقي الأستاذ الجامعي في إحدى الجامعات يصحح كراسات الإمتحان في عملي مادة الفيزياء كالأتي : نفيسة جادين ؟؟؟ بالله في واحدة إسمها نفيسة جادين ؟ أقول ليك حاجة 3 من 20 ناريمان مخلص ؟ أووووووووو يا سلام ياخ !! ناريمان إسم حلو ..18 من 20.. نرجع للكهربا وأجمل وأمتع اللحظات في قطعة الكهربا بالليل ..فهي اللحظة الوحيدة اللي بيجتمع فيها كل أفراد الأسرة في الحوش أبوك وأمك وأختك وأخوك تجلسوا في مساحة ضيقة جداً بالرغم من وساع الحوش في جو حميمي تتمنى معاهو الكهربا ما تجي .. تستعيدو شريط ذكريات أحداث يسمعها الجميع لأول مرة .. ابوك بي كل أريحية يقول ليكم عندي ليكم لغز"غلوتية " البيحلّها عندو هدية .. أمك تحكي ليك عرست ابوك كيف .. اخوك يصرح تصريح خطير بي إنو بت ناس فلان عاجباهو كبرت وبقت سمحة .. أختك تحكي ليكم عرس ناس صاحبتا كان كيف .. ده يخكي نكتة .. ده يسألكم أسامي المحلات الفاتحة في شارع الظلط شنو ؟..كم عمارة على جنبات الطريق من سوق امدرمان لحدي اخر محطة .. تنبع فكرة البوش المصلح في تلك الجلسة ويتبرع كل واحد بي قروش مكدّسة في الدولاب وكل واحد يشيل الشمعة يدخل الأوضة ويجي مارق ليهو بي خمسمية جنيه .. ناس تشارك بي تقطيع البصل وناس فقط تملك القدرة على تقطيع العيش وناس تكتفي بي المشاركة بالأكل .. قطعت الكهربا قد تمتد فيها المتعة ليشارك الجيران معاكم في جلسة زي دي وقد يتم إصدار قرارات بيتية مفيدة جداً في يوم زي ده ..فلان تاني عليك تنضف الشارع ..فلانة تاني تغسلي العدة أمك دي تعبت منها ..وإنتي تقشي الحوش ..وأنت عليك مراسيل الجزارة والفرن ..وقد تمتد قطعت الكهربا لتتم مصالحة بين أخوين حرادنين ما بيتكلموا مع بعض بي سبب موضوع تافه ..
والا لما يجيبوا اذان العشاء في نص المسلسل تلاقي كل الناس بتلوح بيدها ( اها ياخ ) دليل على الزهج لقطع المسلسل
غايتو الشعب السوداني يا حليله السنة كلها هو في حالة انبساطة ( ده زمان شوية قبل تحسن احوال الكهرباء والموية الى حد ما ) تجي الكهرباء الناس تنبسط تجي الموية ينبسطوا
01-27-2008, 08:29 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: تجي الكهرباء الناس تنبسط تجي الموية ينبسطوا
بالجد كنت بستغرب جداً لي فرحنا بي جيّة الموية والكهربا وكأنها ما شي من حقوقنا وكأنه منّة علينا .. نحن شعب يتخلّى عن أبسط حقوقه بكل سهولة .. ياخ باقيك عند الكمساري بتخلّيهو ليهو بي كل بساطة .. بتاع البقالة يقول ليك ماف فكّة تقول ليهو ما مشكلة خلّيها معاك .. تخريمة : أقترح تقديم المسلسلات في الفترة ما بعد صلاة العشاء وحتى قبل صلاة الصبح
01-27-2008, 08:38 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22758
سلام يا زول ... غايتو كدة إنت إتفشيت من مغسة الـــ 3 صفر
Quote: صاحبي شغال في محطة من محطات الكهربا دي حلف لي وقال لي يا عمر مرة كيس الصعوط وقع من جيبي في مفتاح قطع كهربا منطقة معينة والله أبيت أرفعوا كيتاً فيهم .. بالرغم من إنها مبالغة لكن ما تستبعدها في السودان إنو يتم قطع الكهربا بي طريقة زي دي ..
ما مستبعدة حتى في أمور كثيرة تخص شئون البلاد و العباد .. بل هذا نموذج مصغر لما يحدث في بلد المليون
Quote: كيف لا وصديقي الأستاذ الجامعي في إحدى الجامعات يصحح كراسات الإمتحان في عملي مادة الفيزياء كالأتي : نفيسة جادين ؟؟؟ بالله في واحدة إسمها نفيسة جادين ؟ أقول ليك حاجة 3 من 20 ناريمان مخلص ؟ أووووووووو يا سلام ياخ !! ناريمان إسم حلو ..18 من 20..
في جهات في أي بلد .. لو دخل فيهم الغش و الخيانة و الظلم .. فقول على البلد و أهله السلام : القضاء الشرطة التعليم
دة بشكل خاص ... و باقي الجهات بشكل عام
دمتم
01-27-2008, 08:49 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
تعرف يا ريّس انا أهم حاجة طلعت بيها من الكورة دي شنو ؟ إنو بيت العزابة معتصم وتمبس إنضمّ لي قائمة بيوت العوارض وتاني ما بحضر فيهو كورة بعد أن إستبعدت بيت ناس حميّدة منذ فترة ليست بالقريبة .. الناس ديل تحضر معاهم كورة أقل شي بتاخد 3 .. البركة في بقايا فتاق تمبس .. والله يا ريس الما مشى بيت العزابة الأيام دي ما مشى .. امبارح شتات يفلّق بي الجاتو وتمبس اهدى البواب تورتة وكيلو لحمة ده غير العصائر اللي إنتهت مدتها وماف زول شربها ..والله انا قلت تمبس ده قام ليهو فتاق مش شالوهو منو ..
01-27-2008, 10:43 AM
ابو جهينة ابو جهينة
تاريخ التسجيل: 05-20-2003
مجموع المشاركات: 22758
Quote: امبارح شتات يفلّق بي الجاتو وتمبس اهدى البواب تورتة وكيلو لحمة ده غير العصائر اللي إنتهت مدتها وماف زول شربها ..والله انا قلت تمبس ده قام ليهو فتاق مش شالوهو منو ..
غايتو الظاهر إنو نحس العزوبية حيتفك من تمبس ... لسببين : الأول نحس الكورة و نحس العزوبية ما بيتقابلو مع بعض ( سالب و موجب ) الثاني : الفتاق دة كان كابس على تمبس .. ياداب حيتفرغ للإختيار
عقبال معتصم و بقية العصابة و على رأسهم شتات
01-28-2008, 09:00 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: غايتو الظاهر إنو نحس العزوبية حيتفك من تمبس ... لسببين : الأول نحس الكورة و نحس العزوبية ما بيتقابلو مع بعض ( سالب و موجب ) الثاني : الفتاق دة كان كابس على تمبس .. ياداب حيتفرغ للإختيار
عقبال معتصم و بقية العصابة و على رأسهم شتات
والله يا ريس شتات ده لا فتاق بيحلّو ولا مرارة بتحلّو ولا قاوت زاتو .. شتات ده خلاص باقي ليهو بس عملية الموية البيضا والحج وبعد داك يبقا زول حور عين ساي .. نسوان الدنيا ديل ما بيخارجن معاهو .. أقترح عليه التوجه للشيشان في أقرب وقت .. اما معتصم ده احسن ليهو تمارين الجرادية دي ومالو ومال الدقوهو وشالو قروشو ..
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
ابو جهينة
فيس بوك
تويتر
انستقرام
يوتيوب
بنتيريست