فنّان أنيق.. فنّان مهذب.. فنّان راقي.. فنّان صاحب حنجرة طروبة وصوت عذب يتخلخل في دواخلي وينساب كما الدماء في عروقي.. أرتاح لطلته عبر الشاشة أيما راحة .. وأستمتع بصوته والأداء أيما إستمتاع .. تلامس حركاته وجداني وإنفعالته تجبرني على الإندماج في بحور الأغنية .. هو فنان من الزمن الجميل ينتقي كلماته والحانه بدقة .. ويختار أغاني الغير بعناية فائقة .. معجب به انا أيما إعجاب .. وبالأمس إزدادت مساحاته في داخلي وهو يكرّم زعيم أمة الهلال الراحل الطيب عبد الله في حلقة عبر النيل الأزرق وهو يحكي فيها علاقته اللصيقة بالراحل الطيب عبد الله وصداقته للزعيم .. وعندما تغني بأغنية الراحل العملاق العطبراوي " صابر عليك " قال إنها كانت الأغنية المفضلة التي يحب سماعها الراحل الطيب عبد الله بصوت الطيب مدثر.. بالأمس تغنّى بها الطيب مدثر كأحلى ما يكون بمصاحبة فرقته الموسيقية ولكن وللأسف لم أتمكن من تسجيلها .. عموماً الشكر لراكوبة فقد تحصلت على تسجيل بالعود لهذه الأغنية من موقع سودانيز دوت نت وهنا التحية للقائمين بأمر هذا الموقع أيضاً ..
05-23-2007, 08:25 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
مخلوقة إنتي تعيشي فوق..وتكوني فوق.. تكوني فوق ما جمبنا .. ما ست سماحة ..وست جمال .. ما زيّ بناتنا وزيّنا .. تعبانة ليه ما تسألي ..مجبور عليك اسأل انا ..
لكن خطر لي سؤال أثناء مقطع مخلوقة إنتي تعيشي فوق..وتكوني فوق.. تكوني فوق ما جمبنا .. ما ست سماحة ..وست جمال .. ما زيّ بناتنا وزيّنا .. تعبانة ليه ما تسألي ..مجبور عليك اسأل انا ..
إنو كلمة ما التحتها خط دي بمعني ( عكس ) أو بمعني ( شبه ) يعني المحبوبة مختلفة عن بناتنا ولا بتشبه بناتنا؟؟؟؟؟؟؟؟؟؟؟؟؟؟؟؟؟؟؟؟؟
أفيدوني يرحمكم الله
لأنو إشكالية المعني دي بتلاقيني طوالي فى الأغاني السودانية
مودتي فضل كرار
05-23-2007, 08:35 AM
walid taha walid taha
تاريخ التسجيل: 01-28-2004
مجموع المشاركات: 4244
لك التحية على هذا البوست الجميل و انت تتحدث عن هذا الفنان صااحب الصوت الشجى الطروب ... فعلا فناان يجبرك للاستمااع اليه لم يتعجل الشهرة بل فرض نفسه بامكانياته الصوتية الكبيرة... استمعت اليه فى عدة اعماال اخرى لا يقل ادائه فيها عن اغنية العطبراوى صاابر معااك... اضااف لاغنية العزيزة الما بتسأل عن ظروفنا نكهته الخااصة فى التطريب فخرجت منه كاحسن ما يكون... ايضا فى اغنية الرااحل رمضان زائد انا ليتنى زهر اظهر مقدرة فاائقة فى التطريب العاالى الذى ادى به هذه الاغنية... و له ايضا الكثير من الاعمال الخااصة الجميلة جدا و بالتحديد الاغنياات التى كتبها له الراحل حسن الزبير...و لى عودة انشاء الله فى هذا الموضوع..
لك التحية اخ عمر الفااروق مرة اخرى وانت تجعلنا نبدأ هذا اليوم مع الفنان صاحب الصوت الانيق..
كل مودتى... و مرفق اغنية صاابر معااك بصوت الفنان الطيب مدثر بالاوركسترا..
05-23-2007, 09:11 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
وليد طه يا حبيب: يا زول والله فعلاً كلامك صاح !! ياخ المعنى إتغير كلّو وبقا حاجة تانية مختلفة تماماً.. لكن بيني وبينك كده كل ما أتذكر مشاوير بندة والسوق بلقى إنو انا فعلاً قاصد صابر عليك
05-23-2007, 09:19 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الأخ عبد الله صديق: شكراً ليك كتير على المرور وتسجيل الإعجاب بهذا الصوت الدافئ..
الأخ فضل كرار:
Quote: يعني المحبوبة مختلفة عن بناتنا ولا بتشبه بناتنا؟؟؟؟؟؟؟؟؟؟؟؟؟؟؟؟؟؟؟؟؟
انا أتوقع المقصود إنها ما بتشبه بناتنا ديل .. طبعاً اي زول محبوبتو بيكون شايفها ما بتشبه البنات التانيات ديل .. وفعلاً كتير من الأغاني السودانية الفنانين بيغلطوا في مخارجها فبيقوم يختلف المعنى تماااااماً والأمثلة كتيرة .. شكراً ليك ياخ..
05-23-2007, 09:22 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الأخ محمد عثمان : شكراً كتير على الأغنية بي الأوركسترا بالرغم من إنها سريعة شوية بس اداء مميزر خالص.. وزي ما قلت الطيب مدثر لديه من الأعمال الخاصة ما ينافس به الفنانين الكبار من حيث الكلمات والالحان .. وهاهو يقدم لوحة غنائية راقية من كلمات الراحل حسن الزبير والحنه أغنية (الصورة) التي أعتبرها واحدة من الأغاني التي تحمل لحناً شجياً وكلمات بسيطة مفعمة بالمعاني الكبيرة .. والأصل مااااااااااا ببقا صورة ..
05-23-2007, 09:35 AM
abuguta abuguta
تاريخ التسجيل: 04-20-2003
مجموع المشاركات: 8276
Quote: وليد طه يا حبيب: يا زول والله فعلاً كلامك صاح
والله لكن ياوليد زولك كمان قال بتاع فن وبتاع كورة
ياخى الطيب زى عافية حسن بتلصق فى الغناء..حارس التلفزيون 24 ساعة وما قاعد يجدد...الزول من بلدياتى اهل عوض من جبل اولياء وقريب الهادى الجبل
لكن حيرنى الطيب عبد الله ..انا قيلو بتاع كروة ساى..لكن زولك طلع ادارى محنك ورجل قدير له بصماته فى الوزارات...واجمل ما تضحكنى نكة عمك بريمة قبل انقاذ الجماعة ديل وكان بجد فكاهة السهر...اما ناسك الضيفوف..غير تيسير والريح قاعدين كنب ولا شغل الادارين زى كدا ما بعرف... عموما الاغنية للعطبراوى..وسمعتها اول مرة من نصر الدين الفاضل من شباب الهند ومن اولاد الثورة...شاب مبدع مبدع مبدع.. ودى لك
05-23-2007, 09:28 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8629
حبيبنا أبو ذر: ياخ والله دخولك لي بوستاتنا ده غير الهوا ما بيجيب لينا شي!!! لأنو الناس لمن تشوفك خشيت بوست لي عمر الفاروق يا قالوا عمر ده الليلة إتقطّع عديييييل كده يا كمان ابوذر ده بقا من ناس زعيط ومعيط
Quote: ك. رونالدو مش قال مدد
انت قاصد مدّد كرعينو يعني ؟ يا اخوي بعد ادانا الدوري ما مشكلة يجيكم عشان انتو كمان حبايبنا وعايزين ليكم ترجعو من جديد لي منصات التتويج الشي يا كافي البلا لا دوري لا كاس لا شامبينز !!!!! ما وريتنا رايك في الصدارة المدريدية دي !!!!
بالمناسبة الطيب مدثر عامل حفلة لي السير فريجسون في بيتو بمناسبة الدوري ونجاح بت فريجسون في مرحلة الاساس بمدرسة شمال لندن..
05-23-2007, 10:02 AM
أبوذر بابكر أبوذر بابكر
تاريخ التسجيل: 07-15-2005
مجموع المشاركات: 8629
لأنهم سمعو بى تحت تحت كده إنه "اليزابيث التانية" حلفت طلاق لى فيرجسون إنه السنة دى ما تسوو ليكم شى فيهو فائدة إلا ناديكم ده نبيعه ليكم فى "صالة ثوذبى" بتاعة المزادات ديك
اها قلنا ليهم ياخى ساعدو الجماعة ديل وتعالو على راحتكن
يعنى الكاب نو ده طاير ولا طاير
اسمع رايك شنو
نفك ليكم "ترام" بى كم حبه كده
الايام دى نحن محتاجين "للفكه" العملات العندنا كلها كبيرة
وتقبل تحيات زمبروتا
اها قبل ما انسى
بالنسبة لتصدر ناس سانتياغو برنابيو
دى يا اخوى قالو اوامر عليا من صاحب الجلالة ملك اسبانيا
قال لى ناس برشلونة خلو الجماعة ديل يتفسحو السنة دى
الطيب ود ام نعيم هذا صدبقى ياعمر ساعود لاحدثك عن الطيب الانسان لا الطيب الفنان فتلك اعترف بها كل الناس الطيب انسان من معدن لايصدأ الطيب النبيل الوديع عاشرت كثير من المشاهير ولكن لم اعرف فنان اكثر تواضعا من الطيب عمر عائد انا هذا البوست ..ومهما يقول البعض ان شهادتى فى الطيب مجروحة ساعود بعد ان وجدت من يزيح ترددى عن افتح بوست عن صديقى الطيب
05-23-2007, 09:52 AM
الرفاعي عبدالعاطي حجر الرفاعي عبدالعاطي حجر
تاريخ التسجيل: 04-27-2005
مجموع المشاركات: 14684
شكرآ الفاروق الجميل كدا رجعت الفاروق البنعرفو ينثر الفرح أينما حط وحيثما كان بدوري وبعد أن سكرت طربآ من الصوت الشجي الطيب مدثر (وعلى فكرة ده رأيي في الزول الفنان ده من زمان_يعني انت لسه شافع)بدوري أهدي الأغنية للأخ السماني وصديقه اللدودهشام شيخ الدين ومن يازول يازول الي أساسي القبل الكراسي كما يقول الفاروق وشكرآ مجددآ عمرالفاروق.
05-23-2007, 10:00 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
Quote: لكن حيرنى الطيب عبد الله ..انا قيلو بتاع كروة ساى..لكن زولك طلع ادارى محنك
الزول ده لمن قرا جامعة ما كان إسمها جامعة ولمن نضم إنجليزي أظنو اليزا بيث زاتا ما كانت بتعرف تتكلم !!! ده البابا والزعيم ياخ !! بس مشكلتو كان زول بعيد من الأضواء والإعلام .. الحلقة يا ابقوتة كان ممكن تكون اجمل من كده لو زمنها كان أطول والإستعداد ليها كان أفضل.. لكن ما وريتنا رايك في المشجع الهلالي بريمة وهو بيقول انا اتغديت مع نميري..
05-23-2007, 10:04 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
اخوي وعمي وصديقي صديق الموج والله بقيت ليك زي محمد عادل مع مبارك الفاضل)
Quote: ساعود لاحدثك عن الطيب الانسان لا الطيب الفنان فتلك اعترف بها كل الناس الطيب انسان من معدن لايصدأ الطيب النبيل الوديع عاشرت كثير من المشاهير ولكن لم اعرف فنان اكثر تواضعا من الطيب عمر عائد انا هذا البوست ..ومهما يقول البعض ان شهادتى فى الطيب مجروحة ساعود بعد ان وجدت من يزيح ترددى عن افتح بوست عن صديقى الطيب
انت يا موج حركتك البايخة دي ما حاتخليها ؟؟؟ أسة تقوم تزوغ وتلبد وتشحتفنا زي ما شحتفتني زمان في بوست عن الحقيبة وشبكتني جاييك يا عمر وحا أحكي ليك وحا أقول ليك ومن ديك وعييييييك .. اها يا موج البوست ده عليييييييك الله كان ما جيت حكيت فيهو عن الطيب مدثر وبي التفصيل الممل .. امانة فييييييييي ذمتك يا موج ما تزوغ .. وعليك علي كل يوم أعمل ليك (مس كول) أذكرك
بس أوعا تجي تقول لي الطيب مدثر عمل عملية الراحل العميري في الحرم وقال (أجي!!!)
05-23-2007, 10:09 AM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
عمنا الخلوق الرفاعي (مش شبكتني لمن كنت انت شافع اها خم وصر)
تحياتنا ليك وللأسرة من خلالك والإهداء ده بدل تديهو لي ناس يا زول كان الأةلى يمشي النيل في الجهة الغربية ومن شندي وانت طالع والبنطون وانت ماش .. ولا شنو ؟
05-23-2007, 10:13 AM
عاطف عمر عاطف عمر
تاريخ التسجيل: 11-26-2004
مجموع المشاركات: 11152
ونحن في المرحلة الثانوية كان إعجابي بالفنان الأستاذ عثمان حسين قد قارب من مرحلة الهوس . شراء للأشرطة ، حفظ للأغنيات ومعرفة شعرائها ومتى تغنى الأستاذ بها لأول مرة . تضايقت الوالدة الحبيبة يوماً ( أو ربما تملكتها غيرة ) من هذا الحب الجنوني . فيوماً وأنا مندمج مع أبو عفان قفلت المسجل وخاطبتني " هسع عليك الله غير الراجل المخرف دا ما لقيت ليك فنان تدوشنا بيهو ؟؟ " فرددت عليها " دي جديدة يا حاجة . بس في ذمتك غناهو ما عاجبك ؟؟؟ " فردت على طول " يا ولدي الذمة حااارة ، لكين الأولاد القدرك ياهو مبارين ناس زيدان وأبوعركي " ففهمنا الطرفة في إطارها . مرت السنين وجدتها يوماً ( متلبسة ) بانسجام عجيب مع الفنان الطيب مدثر وكان في سهرة تلفزيونية فكانت فرصتي " أها يا حاجة أنا عرفت أنو ( المخرف ) عثمان حسين ما من جيلي ، هسع دحين إنتي الولد دا من جيلك ؟؟ فردت وعلى الفور " والله ياولدي مع غناهو السمح التقول بغنيهو لى روحوا دا ، عاجباني ( غرودة ) عيونو دي "
Quote: فنّان أنيق.. فنّان مهذب.. فنّان راقي.. فنّان صاحب حنجرة طروبة وصوت عذب يتخلخل في دواخلي وينساب كما الدماء في عروقي.. أرتاح لطلته عبر الشاشة أيما راحة .. وأستمتع بصوته والأداء أيما إستمتاع .. تلامس حركاته وجداني وإنفعالته تجبرني على الإندماج في بحور الأغنية .. هو فنان من الزمن الجميل ينتقي كلماته والحانه بدقة .. ويختار أغاني الغير بعناية فائقة .. معجب به انا أيما إعجاب ..
الفاضل الفاروق... هذا الفنان المرهف المبدع يصعب أن تخطئه الأذن إلا إذا كان بها صمم.. والمريخ كعادته ينجب الأفذاذ.. التحية والتقدير للطيب مدثر.. وخالص الود.
05-23-2007, 11:51 AM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
يا عمر يا فاروق ايها الجميل مالك علينا مهيج الاشجان ؟ احب العطبراوى جدا ، كنت متوقعاك تخلينا نسمع واحدة من اغنيات الفنان الطيب لانى بالجد ما سمعت الفنان دا من قبل، امكن ظهر فى سنوات الغياب حقتى المهم انه صوتو جميل رغم انه الاغنية حزينة ، لكن اداؤه جميل، حقا جميل ، لانه الاغنية تتيح للصوت ان يتمادى فى التطريب ولان العطبراوى فنان مطرب عالى التطريب له الرحمة وللفنان الطيب مزيدا من النجاحات وشكرا لك هذا الالق (الصباحى ) (0فارق التوقيت)
05-23-2007, 12:29 PM
ahmed khidir ahmed khidir
تاريخ التسجيل: 03-20-2003
مجموع المشاركات: 1004
عمر الفاروق سلام يا زول يا راقى عن اذنك ارد على سلمى الشيخ سلمى انت بى جدك الطيب مدثر غنى فى مهرجان الثقافة الثالث ( ليلة الواعدين) فى تلك اليله على سبيل المثال غنى / مصطفى سيد احمد , الخالدى ,عثمان الاطرش الامين عبد الغفار ومجموعة كبيرة من الفنانين. غربتك طالت يا سلمى بالله من الزمن داك انت فى امريكا يديك العافية ويرجعك لينا بالسلامه.
Quote: انت يا موج حركتك البايخة دي ما حاتخليها ؟؟؟ أسة تقوم تزوغ وتلبد وتشحتفنا زي ما شحتفتني زمان في بوست عن الحقيبة وشبكتني جاييك يا عمر وحا أحكي ليك وحا أقول ليك ومن ديك وعييييييك .. اها يا موج البوست ده عليييييييك الله كان ما جيت حكيت فيهو عن الطيب مدثر وبي التفصيل الممل .. امانة فييييييييي ذمتك يا موج ما تزوغ .. وعليك علي كل يوم أعمل ليك (مس كول) أذكرك
عمر الغالى وحاتك كان ما كلامك ده ومكالمة تلقيتها من اخونا الطيب وكلفنى ان اشكرك شخصيا وكل المتداخلين كنت حاازوغ زوغة .. ولا سبب غير المشغوليات... اول شىء الطيب ده زول ود قبائل من جبل اولياء وهو يفخر بذلك كثيرا ويقول ليك انا الطيب ود مدثر ود محى الدين اهلى من الجبل كله كان قلت (عسال) اهلى ..(المسرة )اهلى..(قبل جاى) اهلى.. ويدين بالفضل لفنانه من جبل اولياء توفيت الى رحمة الله فى العام 2004 اسمها الحاجة بت حسين و هى من ديم البساطاب كان لهذه المرأة فضل كبير على الغناء بالمنطقة وعليه شخصيا...وايضا يثنى على فنان عموم جبل اولياء الفنان النعيم نور الدائم ولكن من وضعه على عتبات الفن هو استاذه فى المدرسة الابتدائية الفنان وعازف الكمنجة المشهور الاستاذ مبارك سعد موسى...ايضا كثير ممن اخذوا بيده وهم الاستاذ برعى محمد دفع الله الاستاذ على ميرغنى الراحل ابوداؤد عليهم الرحمة والاستاذ يوسف حسن الصديق....والطيب انسان وفى لاصدقائه. الطيب بدا بقصر الشباب والاطفال ولكن لم يكن يغنى بل كان عازف ساكسفون مقتدر. وانتقل بعدها لمركز شباب امدرمان ومثل المركز فى مهرجان الثقافة الثالث كمغنى تغنى للعديد من الشعراء و للطيب اعمال فنية كثيرة جلها للمرحوم حسن الزبير اذ له عشرة اعمال من شعره . ايضا من الاشياء المهمة والتى لابد من ذكرها ان نقول ان اغنية السيرة المشهورة (يمه الخير بريدو) والتى يرددها الاستاذ الطيب هى اغنية تراثية من المنطقة ولكن عولجت بواسطة الاستاذ يوسف حمد وقد ادخل عليها بعض الابيات وهو والد الاستاذاحمد يوسف صاحب شركة حصاد للانتاج الفنى. موعدون انتم فى خلال الايام القادمة بحلقه مع الاستاذ الطيب مدثر فى برنامج ليالى النغم..
جدير بالذكر ان نشير الى ان الاستاذ الطيب تخرج من معهد الكليات التكنولوجية (جامعة السودان حاليا) شعبة المحاسبة،،، عمر اها نزل الشغل الفنى انت....
عمر كلفنى الاخ الطيب ان انقل لكم عميق شكره على هذا البوست التوثيقى ايضا يشكر صاحب وامين الموقع الاستاذ بكرى ابوبكر وهو مستعد للتعاون مع بورداب العالم اين ماكانو..... التحية لك اخى الفاروق على هذا الجهد المقدر والاحتفاء بالمبدعين والطيب واحد من الذين يحملون هم فن الغناء فى السودان،،،
05-23-2007, 03:27 PM
عصام دهب عصام دهب
تاريخ التسجيل: 06-18-2004
مجموع المشاركات: 10401
أستاذي العزيز عاطف عمر: ياخ مش في ناس الزول بيريدهم ساي بلا شغلة ؟ أها الله يعلم انت واحد منهم .. من يوم ما كنت بتونس مع شاكر جيتار وجات سيرتك في الكلام وما حكاه شاكر عنك وانا زي البعرفك لي سنة ضوئية كده .. غايتو الليلة إنت وابوذر دخلتو البوست ده فأكدتو لي إنو الطيب مدثر فنان راقي ما بيسمعوهو إلا الراقين ..
Quote: والله ياولدي مع غناهو السمح التقول بغنيهو لى روحوا دا ، عاجباني ( غرودة ) عيونو دي "
تعرف يا عاطف تعبير والدتك ده انا كنت بحاول أكتبو في بداية البوست وغلبني أكتبو عشان ما قدرت أعبر عليهو .. بالجد ده تعبير عجييييييييب وعمييييييييق انا العامل فيها قريت جامعة ده قاعد لي ساعة كاملة عشان أكتبو ولمن غلبني خليتو .. يا سلااااااااااااام ياخ ده وصف عجيب بالجد ..
05-23-2007, 04:14 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
عاد ده كلام ده .. امبارح الطيب قاعد في حضرة روح زعيم الهلال الطيب عبد الله وطلع صديقة الشخصي وتجي تقول لي مريخابي.. لكن بيني وبينك انا امبارح كلامو ما ريحني المزيع قدر ما يقول ليهو الهلال والكورة يكش ويقول ليهو والله انا هلالابي من بعيد لي بعيد كده .. الزول ده يكون إرتدّ ؟
05-23-2007, 05:47 PM
عمر الفاروق عمر الفاروق
تاريخ التسجيل: 10-10-2005
مجموع المشاركات: 9669
الأستاذة سلمى الشيخ سلامة : بالجد بتديني إحساس بالزمن الجميل حق منتصف الثمانينات داك الناس المتصالحة مع نفسها ديك واللي كانت جنها حب ديك تلاقي الواحد منكم عندو أغنية واااااااحدة وفنان واااااااحد بيحبو وبتكون الأغنية دي بالجد بتعني ليهو حاجة ومتى ما يسمعها يا سرح يا بكى يا جاهو الألم الممتع داك !!! الحاجة دي جيلنا أسة إفتقدها الواحد مننا عايز ينطط ويجبجب والنبق النبق وجب جب جب .. زمنكم كان سمح يا سلمى عشان كده سمعكم كان سمح وذوقكم كان اسمح .. الطيب مدثر واحد من فناني الزمن الجميل وربما يكون هو اخر العنقود الفني وبعده جاءت الموجة إياها وتقلبت الأذواق واختلفت الأمزجة وصار الناس يختلفون على الفنان .. الطيب مدثر من الفنانين الذين لا يمكن ان تختلف على عذوبة صوتهم وروعة الاداء فيهم .. هو فنان ما ان تسمعه إلا وتردد : " ياااااااه الزول ده غنّاي عدييييييييل كده " .. وأتمنى أن تتابعي التلفزيون وكما بشرنا صديق الموج بسهرة سحر النغم والتي تبث كل خميس كسهرة في تلفزيون السودان فما عليك إلا ان تلبدي للتلفزيون كل خميس وتنتظري لتستمتعي لهذا الفنان وتتذوقي حلاوة الفن وطلاوة الصوت وقبل كل ذلك جمال المظهر والهندام ..
الطيب فنان حرمتنا الغربة منه لفترة ولكنه عاد والحبيب مهما طال غيابو لابد يرجع لي أهلو وصحابو.. ولكن ماذا نفعل للعصافير التي هاجرت في موسم الشوق الحلو ؟؟
Quote: كنت متوقعاك تخلينا نسمع واحدة من اغنيات الفنان الطيب
05-23-2007, 06:38 PM
عصام دهب عصام دهب
تاريخ التسجيل: 06-18-2004
مجموع المشاركات: 10401
Quote: تلاقي الواحد منكم عندو أغنية واااااااحدة وفنان واااااااحد بيحبو وبتكون الأغنية دي بالجد بتعني ليهو حاجة ومتى ما يسمعها يا سرح يا بكى يا جاهو الألم الممتع داك !!!
و الله يا عمر كلامك صحي ..
ياخي أنا هسع عندي أغنية كدة كان دايرني أبكي ليك بكاء السنين بس شغلها لي .. لكن ما حا أوريك ليها ..
و أغنية زي ( حاجة فيك ) لما أسمعا بتخليني زي شنو كدا أنا ذاتي ما عارف لكن زي التقول عندي جوانح و مستمخ جوة حناني دا ..
05-23-2007, 09:03 PM
عمران حسن صالح عمران حسن صالح
تاريخ التسجيل: 11-26-2004
مجموع المشاركات: 10159
عمر الفاروق تحياتي ... تعرف ياعمر الفاروق في العام 1986م تعرضت لإصابة ..(عارف التاريخ حا يجيب لي الهواء ، ما عايز أي أسئلة إنصرافية ) أجلستني هذه الإصابة في البيت أكثر من شهر ..!! تصدق كان رفيقي الطيب مدثر ...؟؟ في أول شريط له .. ورغم رداءة تسجيل ذلك الزمن ( الشريط مهكر بواسطة هواة وليس تسجيل لشركة ) كان الوالد يسألني بإستهجان ده منو الـ .... البتسمع فيهو ده ..؟؟ وكانت أغنية العطبراوي منذ ذلك التاريخ لها نكهة خاصة عند الطيب ... ومنذ ذلك التاريخ أستمع لهذا الطيب بكل وجداني .. لعمق الصوت والهدوء الذي يملكه ... لك التحية أخي عمر فقد أرحتني هنــــــــا (رمي طعمية وكدة يعني ...........)
05-24-2007, 03:19 AM
سلمى الشيخ سلامة سلمى الشيخ سلامة
تاريخ التسجيل: 12-14-2003
مجموع المشاركات: 10754
(وأتمنى أن تتابعي التلفزيون وكما بشرنا صديق الموج بسهرة سحر النغم والتي تبث كل خميس كسهرة في تلفزيون السودان فما عليك إلا ان تلبدي للتلفزيون كل خميس وتنتظري لتستمتعي لهذا الفنان وتتذوقي حلاوة الفن وطلاوة الصوت وقبل كل ذلك جمال المظهر والهندام ..) انت بى صحك؟ التلفزيون ياتو يا خوى ؟ يا ريت ، تتصور انى من زمان فى خصام مع التلفزيون؟ نحنا ناس اذاعة ومعليش واكرر اسفى انى ما سمعت بالفنان دا امكن لانه بغنى فى التلفزيون وتانى حاجة تلفزيون السودان دا عشان تشترك فيهو (عييييييييييك ) تكاليف ، تقول تشوفو ولا ترسل لى اهلك ؟
05-23-2007, 06:58 PM
ismeil abbas ismeil abbas
تاريخ التسجيل: 02-17-2007
مجموع المشاركات: 10789
(العزيزة) ياعمـر لما يغنيهـا الطيب طوالي بتشعر بأنك طيب والله راضي عليك (العزيزة) يا فاروق لما تسمعا منو الناس كلهم ببقو عزاز عليك ياخي كمية كدا من التطريب, وبتدفق..اي والله بتدفق وببقى رقراق كمان فلو عندكم اللوحة التطريبية دي اجدعونا بيها واكون عنكم من الراضـين.
اقول قولي هـذا واشهـد انك لمن السمعين ياعمـر (بضم العين والراء)
ودي.
05-24-2007, 07:01 AM
محمد الأمين موسى محمد الأمين موسى
تاريخ التسجيل: 10-30-2005
مجموع المشاركات: 3470
Quote: لكن بيني وبينك انا امبارح كلامو ما ريحني المزيع قدر ما يقول ليهو الهلال والكورة يكش ويقول ليهو والله انا هلالابي من بعيد لي بعيد كده .. الزول ده يكون إرتدّ ؟
تعرف يا ابن الفاروق.. أنا خايف لو بحثنا ربما نجد إنك أنت كذلك مريخابي ولكن بتمارس ما يسمى بالكاميرا الخفية!
05-24-2007, 10:21 PM
عماد شمت عماد شمت
تاريخ التسجيل: 12-02-2004
مجموع المشاركات: 3857
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
عمر الفاروق
Fadl Karrar
walid taha
abuguta
أبوذر بابكر
صديق الموج
الرفاعي عبدالعاطي حجر
والله بقيت ليك زي محمد عادل مع مبارك الفاضل)
عاطف عمر
محمد الأمين موسى
سلمى الشيخ سلامة
ahmed khidir
عصام دهب
عمران حسن صالح
ismeil abbas
Alsa7afa_30
الخير محمد عوض
عماد شمت
خالد علي محجوب المنسي
Abd Alla Elhabib
شكرا ليك ياخ.
فيس بوك
تويتر
انستقرام
يوتيوب
بنتيريست