|
دعواتكم لزميلنا المفكر د.الباقر العفيف بالشفاء العاجل
|
|
 Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
الفاروق سـلام.. وممـكن تعـتبرني مـن محبي الطـرب الجمـيل ومعـك ننتظـر الأخ استاذ المـوصلي.. لكـن أنا ما شـدني للإستماع للجابري فعلا هو عبقريته اللحنية والبراعة الكبيرة في عـزفه للعـود أكـثر من كـونه مغني بارع.. برضـو تجـد أن الفنانين أصحاب الأداء والألحان المتميزة إنو المقلدين يتجنبون أعمالهم.. فالكثيرين جدا قلدوا أو أدوا أعمال وردي ومحمد الأمين أو مصطفى سيدأحمد الخ.. لكن قليلين هـم الذين غنوا للجابري (عمار السنوسي) أو لصلاح محمد عـيسى..
| |
 
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
الأخت مايا (لي جغلومية سنة بكتب إسمك مايا وما عارفو صاح ولّا لأ )
| Quote: لكن حقيقي بشوف الفنان الجابري فنان لم ينال حظه من الاهتمام |
تعرفي يا مايا إنو معظم الفنانين يعتبرون الأستاذ الجابري مدرسة قائمة بذاتها ويهتمون بأعماله ربما أكثر من أعمالهم وكما ذكر الأخ عيسى فانا أعرف مثلاً أن الأستاذ عمار السنوسي يعتبر الجابري واحد من أعظم الفنانين ويغني كثيرا(وجميلا) أغاني الجابري..
الجمهور يطرب كثيراً لأغاني الجابري ولكن ربما لأنهم إستمعوا لها من فنانين شباب وسأفرد مساحة لبعض هذه الأغاني لاحقاً ..
| Quote: الاستاذ الجابري فنان له سمة مميزة ، طريقة غناهو مختلفة ، بيطوع اللحن والكلمة بابداع شديد وهو نوع من الفنانين زي ما قلت صوته بيجيب الملايكة |
وبرضو تقولي لي ما مختصة وما ذوّاقة ؟
إنتي لحقتي ابوي عديييييل كده
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
يا عمر ..
صباح الخير ..
البيننا شين من زمن .. بعترف ..
إنت البادي .. أنا الخاتي , الله أعلم ..
لكن بعتذر عني و عنك ..
و هسه جابني ليك الجابري , و جابتني الخنقة المخنوقة بيها الناس و ترّعت و إتدشت في بورد بكري ده ..
جيتك فراراً من العك و الهامش و المركز و العبيد و السادة و الجلابة و الغرابة و المرتزقة و الغزوة و البقعة و تشاد .. و السجم اليكيل حالنا ..
أمبارح قلت لإنعام عبدالحفيظ نفسي في غنا يغسل الزول و يمرقنا من جحر أبو الدرداق ده ..
لقيتها حالها أضل من حالي ..
و حال الكتيرين : شرحو .
قعدت أسمع عثمان حسين , و إبراهيم عوض و وردي و العاقب و الشفيع ..
يشهد الله إتحسنت حالة الطمام .
المهم يا عمر ..
الجابري كوم براهو ..
شهد عليهو الزول الجميل أستاذنا محمد ميرغني , قال : الوحيد في المطربين البيجمع بين الغليظ و الحاد بسهولة و عذوبة .
المتابع لغنا الجابري و ألحانو بيندهش لثراء المفردة اللحنية عندو و تنوعها ..
الجابري بيجيب الملايكة ( أبوك ليهو حق ) ..
و بيجيب شبع كامل لما تسمع غناهو ..
و يا عمر .. مستعد أسمع ( تنسونا ) و أعيدها و أكررها مليون مره بالتسجيل القديم .. و القانون و الكمنجات و الفلوت ..
و برضو ما أشبع منها على الرغم من بساطة كلماتها و صدقها الجميل .. لكن ألحان الجابري خلقت منها فتح لحني و أسطورة نغمية نادرة في كتاب الغنا السوداني .
يكفي الجريف و اللوبيا الزول يسمع منها مقطع واحد ما تعرفو بياتو سلم هو .. سباعي مخمس و للا خماسي مسبع و للا ياتو جن واحد ده !!
حميمية مشاعر أهلنا في أبسط قوالب الكلام و أصدقها هو البيخلق منها حالة الشجن البيدخلنا بدون إستئذان ..
يا بحر حلتنا
في رمالك ذكرى
لا بتشيلا الموجة
و لا بتفارق الفكرة
...
مره الطيب صالح , كتب ينعي صلاح أحمد إبراهيم قال :
صلاح العبقري المتمكن من اللغة و أسرارها .. كان يدمع و لا يستطيع الكلام لما يسمع :
كان طلعت القمرة ألخير يا عشانا تودينا لي أهلنا .. بسألوك مننا .
ـــــــــــ
تاني مرة يا عمر ..
شكرا للجابري .. و ليهو الرحمة قدر ما أسعدنا و جمّل ..
و ليك بعتذر .
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
الأخ عيسى(كده صاح؟:
| Quote: عبقريته اللحنية والبراعة الكبيرة في عـزفه للعـود أكـثر من كـونه مغني بارع.. برضـو تجـد أن الفنانين أصحاب الأداء والألحان المتميزة إنو المقلدين يتجنبون أعمالهم.. |
يا سلام عليك ياخ ده كلام زول مختص عديييل..
دوماً ما الاحظ أن الحان الجابري وطريقة عزفه للعود قريبة للحد البعيد من السلالام اللحنية العربية أكثر منها السودانية فأشعر وكأنها الحان خليجية ..
| Quote: فالكثيرين جدا قلدوا أو أدوا أعمال وردي ومحمد الأمين أو مصطفى سيدأحمد الخ.. لكن قليلين هـم الذين غنوا للجابري (عمار السنوسي) أو لصلاح محمد عـيسى.. |
كان لي شرف الجلوس مع الفنان المحترم والمثقف والمتعلم الفنان عمار السنوسي..
والله ما إستمعت لشخص يحب هذا الفنان بقدر عمار السنوسي وكم أتمنى لو عمار السنوسي (عضو المنبر) أن يجد الفرصة ليتداخل ويكتب لنا عن هذا العملاق ولكن يبدو أن المشغوليات ستحرمنا هكذا مداخلة من الفنان الذوق عمار السنوسي..
المقلدون الذين حاولوا تقليد الجابري بصراحة لم يحالفهم الحظ كثيراً وإن كان هناك أحد الفنانين لا أذكر إسمه(مقعد) نوعا ما يغني للجابري وإن كان يكثر من الحركات أكثر من الصوت ..
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
عماد عبدالله :
الزول السمح ابو شنب ولا انا غلطان وتشابه علي البقر؟
Quote: البيننا شين من زمن .. بعترف ..
إنت البادي .. أنا الخاتي , الله أعلم ..
لكن بعتذر عني و عنك .. |
والله يا عمدة أكون كضاب لو قلت ليك البينا شين وأكون ستين كضاب لو متذكّر إنت بتتكلم عن شنو تصدق يا صديق انا البورد عندي يزول بزوال المؤثر مع ضغط المفاتيح لعمل LOG OFF ..
ياخ لو ما أخاف الكضب إنت مرة كتبت كلام سمح في بوست انا كتبتو عن الشاعر سليمان عبد الجليل(ما متذكر ده إنت ولا صلاح عبد الله) ..
Quote: و هسه جابني ليك الجابري , و جابتني الخنقة المخنوقة بيها الناس و ترّعت و إتدشت في بورد بكري ده ..
جيتك فراراً من العك و الهامش و المركز و العبيد و السادة و الجلابة و الغرابة و المرتزقة و الغزوة و البقعة و تشاد .. و السجم اليكيل حالنا .. |
والله يا عمدة ولأجلكم فقط عملت البوست ده فانا أعرف أكثر من عماد يحتاج لهذه الراحة من التشاداب والإنقاذاب والخليلاب والزغاواب وما أدراك ما ساس يسوس ..
| Quote: و يا عمر .. مستعد أسمع ( تنسونا ) و أعيدها و أكررها مليون مره بالتسجيل القديم .. و القانون و الكمنجات و الفلوت .. |
أها دي حا تكون عربون صداقة وهدية مني ليك بس شيل الصبر وكلو بيجيك بس أبقا عشرة على البوست ده وأحرسو لي..
| Quote: يكفي الجريف و اللوبيا الزول يسمع منها مقطع واحد ما تعرفو بياتو سلم هو .. سباعي مخمس و للا خماسي مسبع و للا ياتو جن واحد ده !! |
والله يا عمدة عشان الحتة دي تحديداً انا إخترت الأغنية دي عشان نبدا بيها عبقرية الجابري..
الأغنية دي تسمعها بي العود على الرايق تحلف تقول لحن عراقي وبعود عراقي في زمن هارون الرشيد وما ادراك ما الجواري وقليل من النبيذ ..
Quote: تاني مرة يا عمر ..
شكرا للجابري .. و ليهو الرحمة قدر ما أسعدنا و جمّل ..
و ليك بعتذر . |
إعتذارك ما بيفيدك العملتوا كان بي إيديك ..
هو إنت قلت لي عملت شنو؟
معقولة يا عمدة ...حبابك الف وابقا داخل ..
نقطة ..سطر جديد..
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
Quote: يا بحر حلتنا
في رمالك ذكرى
لا بتشيلا الموجة
و لا بتفارق الفكرة |
التحية للفنان احمد الجابري ولقريبي الشاعر الصادق الياس.. فلقد عشنا صدق وحنين هذه الكلمات معايشة حية مع اهلنا الحنان فى الجريف غرب واذكر فى لقاء اذاعي مع الطيب صالح طلب أغنية الجريف واللوبيا وقال انها تزكره بمنطقته والبيئة التى نشأ فيها.. التحية عبرك يا فاروق لكل اهلنا فى الجريف الذين اعطو هذه الاحاسيس الجميلة للشاعر الصادق الياس..
سيف
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
راكب حافلة الصحافة شرق ماشي العمارات شارع واحد وستين الساعة حداشر ظهر علي ما اظن برنامج ما يطلبه المستمعون في راديو الحافلة اول طلب كان الجريف واللوبيا لي الفنان احمد الجابري , سمعت الطلب الغريب دا وضحكت ضحكة خبيثة وانا بردد( ايلي الجريف واللوبيا) الغنية الاسمها غريب دي بعد شوية اشتغلت الاغنية .. خلفيتتي اخوي الاصغر مني ما مباشرة في بيني وبينه واحد الكلام دا وقتها انا امتحنت للجامعة ومنتظر نتايج القبول اها اخوي في المتوسطة , اخوي الفي المتوسطة دا عنده حس موسيقي غريب , بيعرف يسمع شنو الوحيد الفي البيت الاتخيل لي عنده ايقاع  وما اشتر اها اخوي دا هو في المتوسط سالته قلت ليهو فنانك المفضل منو؟ قال لي الايام دي بسمع الجابري؟؟ وبالذات اغنية الرسائل؟ الزمن داك لما قال لي كدا اتذكرت ليك الجلاكيم طوالي والناس بتاعين الستينات ديلك ؟ قلت ليهو انت جادي بتسمع الجابري , قال يلي يا ابو سمنة ياخي ركز معاهو الزول دا لو جواك احساس بالموسيقي والالحان حتي لو واحد في المية الزول دا بطلعوا منك وبدغدغ مشاعرك واضاف طبعا دا لو بتمتلك الحاجة الاسمها مشاعر دي ؟ طبعا رديت عليهو كعادتي ( جابري شنو يا وهم الخاتي كراعو في الكرسي وبغني ؟ واضفت ما فاضل ليهو الا يطلع كراعه التانية في الكرسي ويحل مروحة السقف حقت الاستديو ) .
اها اشتغلت في الحافلة القبيل ديك موسيقى اغنية الجريف واللوبيا وانا داخلها ليك بنفس احساسي التهكمي من الاسم وكانت اول مرة اسمعها فيها . الموسيقي حسيت بيها غريبة , حاجة مختلفة , حقيقة قلت في اللحظة ديك ادي نفسي فرصة اسمعها بي اضان اخوي القالها لي ديك , والموسيقي ما تزال مختلفة ودخل الجابري في الاغنية . الكلام دا كان في شارع 15 بداية حي الزهور انقر ما نزلت من الحافلة في محطة الباراميل وركبت حافلة تاني راجعة لي واحد وستين ؟ ومن يومها الاغنية دي داقة في راسي ما سمعتها الا الان منك انت يا وهم , علا اضانك نجيضة زي اخوي
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
ابو السيوف:
| Quote: التحية عبرك يا فاروق لكل اهلنا فى الجريف الذين اعطو هذه الاحاسيس الجميلة للشاعر الصادق الياس.. |
التحية لأهلنا في الجريف ولكل الجرّافة ..
الشاعر الصادق الياس في لقاء إذاعي قال وبكل أسف قصيدته كلها عبارة عن إستفهام وتساؤل عن ماضي منطقة بدت تفقد ملامحها فكانت كلها إستفسارات:
وين رمال حلتنا ؟
وينا موية نيلك ؟
وينو صوتك مالو؟
وينو قارع مويتك؟
ووين غسيل النيل؟
ووينو ماضي الحلّة ؟
وين ومين الشالو؟
ووين ووين ويين ؟؟؟
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
أساسي القبل الكراسي :
| Quote: راكب حافلة الصحافة شرق ماشي العمارات شارع واحد وستين الساعة حداشر ظهر علي ما اظن برنامج ما يطلبه المستمعون في راديو الحافلة اول طلب كان الجريف واللوبيا لي الفنان احمد الجابري , |
يا سلام على الإستماع والإستمتاع بالموسيقى في الحافلات لكن يا اساسي في بتاعين حافلات ثقيلين من الصباح بدري يشغل ليك شريط شايقي
| Quote: اخوي الفي المتوسطة دا عنده حس موسيقي غريب , بيعرف يسمع شنو الوحيد الفي البيت الاتخيل لي عنده ايقاع وما اشتر اها اخوي دا هو في المتوسط سالته قلت ليهو فنانك المفضل منو؟ قال لي الايام دي بسمع الجابري؟؟ |
تعرف يا قريبك في ناس كده بيكونوا مشاترين في البيت ...ودائماً تلقى ليك واحد بيكون عندو إستايل مختلف من كل ناس البيت ..يعني لو كلهم جواطين بتلقى واحد رايق ومرات تلقى ليك واحد نظام من هو صغير عندو دولاب براهو وبيستحمّ مرتين في اليوم ايام الموية ماف ديك وبيغسل ويكوي حاجاتو براهو وبيكون عندو صحبان غريبيين كده ماف زول بيعرف عنهم أي حاجة وبيقوم يسمع فنانين ما حقين جيلو ..
| Quote: الموسيقي حسيت بيها غريبة , حاجة مختلفة , حقيقة قلت في اللحظة ديك ادي نفسي فرصة اسمعها بي اضان اخوي القالها لي ديك , والموسيقي ما تزال مختلفة ودخل الجابري في الاغنية . ا |
كده بقينا تلاتة انا وانت وعماد وعشان كده راجين الموصلي والمختصين ..
تخريمة :
ياخ انا كل إمتحانات الجامعة كنت بزاكر ليها في المواصلات ..والله يا قريبك بركب دفار أو حافلة للحاج يوسف من الثورة مرورا بالشهداء ثم السوق العربي فالحاج يوسف وبالعودة بدون ما اكون ماشي لي زول بالجد بكون قرضت ليك المنهج وبجي زول نوم بس
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
أبو اللول :
يا جميل يا راقي إحساسك ..
مشتاقون ياخ ..
أمبارح في سيرتك والله جاني مصعب وقال لي كنت مع لؤي وشباب حلوين وكالعادة سألتو من الشُرّاب اللبني
لابد يا مان شكلك مزنوق وكده ..
ولي ود المهدي أحمد قول ليهو والله أهو دي الأعمل بتاعت الجابري تسمغ في كلامك وكنا منتظرين الموصلي يجي ينتهي لينا من الحصة الأولى عشان المقرر ما يكتر على الناس
لكن بعد ده الما قرا درس اليوم بي اليوم حا نردم ليهو المقررات ولي ود المهدي نهدي الأغنية الجاية ..
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
| Quote: كلام عماد ده مؤشر خطير لي إنك من السادة الذوّاقة والواحد ممكن يلجأ ليك إذا حمي الوطيس ولو كركبت تاني حا تكوني ملازناومن اسة أنفضي مكتبتك وجهزي لينا من بيت الكلاوي.. |
ياعمر انا بسمع وبس ما تتخمى فيني ياخ 
وبيت الكلاوي دا تخصص ناس تانين نحنا ما بنطولهم أبداً
شوف زي ناس محمد عثمان ديل
انت أمسك فيهو وما ح تندم 
واسأل عماد عبد الله
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
الحبيب عمر الفاروق
والله و والله
أول ماشفتا البوست خطر علي بالي الحبيب عماد عبدالله (أولاد دفعة) بس ما قدري عايد 6 مرات
أنا شخصيا أعجابي بالجابري بدأ بعماد عبدالله
كان يقلد لنا الفنانين في الفسحة والحصص الفاضية
دوما كان يقلد الجابري و محمد الأمين
وكما كتبت في بوست سابق كل مااسمع الجابري أتذكر عماد عبدالله وهو يغني لنا:
الليل الليل الليل الليل الليل الليل الليل
يهود بي
يهود بي
يهود بييي
ويبقي تلت أخير
الرحمة والمغفرة لهذا الفنان الرائع
و الريدة القديمة لحبيبنا عماد عبدالله
وتحية هلالية ليك يا عمر
وهات يا زمن
هات يا زمن
شيل كل أحزانك تعال جيب المحن
وطول يا أسي طول يا أسي
وفجر ينابيع المحن
جرعني كاس جرعني كاس من لوعة من آهات
ما المحبوب خلاس
خلاني ليك أنا يا زمن
خلاني ليك أنا يا زمن
وخلي الشجن
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
المقدمة الموسيقية تتكون من عبارتين الأولى تتجه إلى أعلى في مجملها والثانية تتجه إلى اسلفل إلى مستقرها الصوتي
ثم يدخل الجابري ليغني المقدمة الشعرية التي نسميها المطلع أو (المذهب) والغريب والجميل في الأمر إن العلاقة وثيقة بينه وبين الفكرة الرئيسية مع اختلاف منطقي يكفي للتعبير عن المعنى الخاص بالكلمة.
ثم تعود الموسيقى مرة أخرى ليعقبها الكوبليه الاول الذي يعتبر تطورا ملحوظا مأخوذا من المطلع الاول
لتدخل موسيقى جديدة خماسية تعقبها الموسيقى في المقام الصغير مستندة إلى الفكرة الخماسية ولكنها تغيير المود تغييرا
كبيرا وهنا تأتي عبقرية هذا الرجل الفنان الجميل رحمه الله فهو يختلف عن مجموعة كبيرة من فنانينا الذي لايستطيعون كسر الجو أو المود إلا بموسيقى لاعلاقة لها بالفكرة الأساسية
أما الجابري فهو يتخذ اسلوبا حديثا حقيقيا في كسر حاجز الرتابة استخدمته الموسيقى الكلاسيكية وتستخدمها الموسيقى الغربية الشعبية الآن في أحدث أغانيها
ثم تعود الموسيقى الكاسرة مع تغيير فيها قليل يؤدي إلى عودة الخماسية لتمهد له الدخول في عالم الطرب وينو صوت الساقية أداء قمة الدراما التي يتخفى الإحساس بالخجل فيها دون أن يدري بأنه خجل مرئي وباين للعيان
ويستمر الطرب وصولا إلى وين جداول المويه الجايه منو السيل
ويفاجئنا الجابري بالعودة للخماسي بقوله يابحر حلتنا في رمالك ذكرى الخ وينتهي العمل تدريجيا بما نسميه فيد أوت
Fade out
يا له من عبقري فقد أدهشني وشكرا لك جزيلا ياعمر على إتاحة الفرصة
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
أخي الفاضل عمر الفاروق والزوار الافاضل
ياسلاااااااااااااااااام علي البوست الجميل والذي أتمني أن يتواصل في مشوار توثيق أعمال الجبار أحمد الجابري...
Quote: إرتباطي بحب هذا الفنان كان منذ الصغر ولفت إنتباهي له موقف طريف فوالدي متعه الله بالصحة والعافية لا يحب الموسيقى زول مصلاية كل ما يلقاني بصفّر يقول لي يا ولد دي بتجيب الشيطان ..
خلسة وجدته ذات مرة يدندن داخل غرفته ويضع المسجل جانباً مع كوم شرايط للفنانين فقط هما احمد الجابري واحمد المصطفى ..
قلت ليهو يا حاج اها ديل بيجيبو الملائكة ؟ |
هو فنان بكل ماتحمله الكلمة من معني...لا أدري ولكنني وكلما إستمعت لصوته الشجي أشعر بعبرة تكاد تفتك بي...أشعر بإنسياب كلماته وألحانه مباشرة إلي حيث يكمن الألم...
ومن أغنياتي المفضلة سيد الاسم...
أنا في العيون ببنيلو دارين من مودة ومن مني..ياسلااااااااااام
وتعجبني ...
من طرف الحبيب..
ياما قال كلاااااااااااام ومالي دخل بيه..
إني بروح لغيرو وبهواه وبصطفيه
إنشاءالله حياتي تفني أنا لو فكرت فيه..
ومانسيناك...
ماكفاه العذاب ال هو فيه ليه تزيد آلامو أكتر..
وليه عيونو العمرها ماخانتك تبكي وتسهر
الحديث عن الجابري يطول ويطول ...فهو هرم فني كبير ظل وسيظل مقامه بين النجوم...
رحمه الله رحمة واسعة..
ومتع الوالد بالصحة والعافية وأن يتمتع بسماع أولئكةالملائكة
مودتي وتقديري ومتابعين معاكم
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
الأستاذ الموصلي:
ياخ شكراً جميلاً على هذا الجهد المقدر والإهتمام والتوضيحات والتدعيم بالنوتة التي لم ولن أفهمها ما حييت
حقيقة وطيلة إستماعي لهذه الأغنية كنت أتوقع أنها من السباعي أكثر منه للخماسي ودوماً ما أقوم بتركيب صوت محمد عبده مثلاً أو أي فنان خليجي فأجد انها تتوافق مع اصواتهم ودرجاتهم الموسيقية فهل هي خماسي مية المية أم خماسي مسبع وسباعي مخمس كما قال أحد الزملاء؟
الحاجة التانية هل الأستاذ الجابري يلحن بالفطرة أم بطريقة علمية وهو سؤال دوماً ما أسأله عن الفنانين السابقين فهل هم يقصدون هذه الطريقة العلمية في التحليل أم هي الصدفة والعبقرية التي لاحقاً ما يدعمها العلم من قبل المختصين !؟
السؤال الثالث يتعلق بتوزيع مهام الالات اثناء العزف أكورديون ساكس كمناجت وفي الخلفية استمع لصوت (الدرمز) ومدى النجاح في توزيع المهام ؟
تحية قلبية ليك يا موصلي..
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
Quote: :
ياخ شكراً جميلاً على هذا الجهد المقدر والإهتمام والتوضيحات والتدعيم بالنوتة التي لم ولن أفهمها ما حي.. |
تعرف ياعمر لو كنت درست الموسيقي كنت حتكون النقد نمبر تو
بعد العبد لله
طبعا اخوك متقنزح ومتطنقع وما بتنازل
المهم نمسك الخشب حسك عالي جدا
ثانياالجابري يلحن بالفطرة الا انه سميع
بيسمع الموسيقي العربية تحديدا كثير جدا مثله في ذلك مثل جيله المتآثر بها
امال اغانينا زمان طويله ليه
الاستماع للموسيقي واعمال الاخرين مهم جدا للفنان فلم يمز عمر الشاعر علي اقرانه او مجايليه
الا تلك المكتبة العامرة التي تزين بيته واذنه كذلك
التوزيع الذي تتكلم عنه اسمه التوزيع الالي الذي لايخرج عن تقسيم ادوار اللحن بين الالات
بينما التوزيع الاهم هو الاوركسترالي
كل الود ياعمر
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
كتب العزيز / عمر الفاروق
ردا للغالي / عماد عبد الله
| Quote: والله يا عمدة أكون كضاب لو قلت ليك البينا شين وأكون ستين كضاب لو متذكّر إنت بتتكلم عن شنو تصدق يا صديق انا البورد عندي يزول بزوال المؤثر مع ضغط المفاتيح لعمل LOG OFF .. |
عارف ياعمر ....
والله مع احترامي للبوست ولصاحب البوست ولمن كتب من اجله البوست وبرغم عشقي للفنان الخالد الجابري الا انوا كلامك ده ذادك ارتفاعا .... ولو كل واحد طبقه علي نفسه كانت الحكاية بقت جميلة خلالالالالالالالالالالالالالالاص .
الاحترام والتقدير لك ولقريبي صلاح عبد الله
مع التحايا
هارون دياب
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
الأخ عمر الفاروق
تحية طيبة....
شكرا يا آخي لإيرادك لهذا المغني الشامخ الباذخ هنا.....
عندي ملاحظة أن هذا هو تسجيل الإذاعة الرسمي و قد دخلت عليه بعد التعديلات...
أرجو لو تكرمت إيراد بعض المعلومات عن هذا....
و سؤال عام....
ماهو الموقف قانونا من مثل عذه أعمال....و أين الحق المادي و الأدبي للموسيقيين الذين نفذوا هذه الأعمال في الإذاعة.
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
رأي الصحفي الرياضي الساخر محمد عبدالماجد في الجريف و اللوبيا
نقلا عن صحيفة قون
Quote: * من كلمات الشاعر الصادق الياس غني الفنان الراحل اغنية (الجروف واللوبيا) ، الاغنية تغرق فى عاطفة كبيرة رغم الشغب الذى يثيره الاسم ·
* يهم ان نقول ان احمد الجابرى نجح فى ان يرسم بها رومانسية غائبة عن خارطة الاغنية ·
* نجاح الجابرى فى العزف بالكلمات على طريقة نزار قبانى عندما قدم مرسومته (الرسم بالكلمات) فادهش بها شُعاب المدارس التشكيلية قبل ان يدهش بها جموع الواقفين على الرصيف لتخرج منها مثل هذه المدهشات·
* كان غريباً ان ينجح الجابرى فى اخراج اغنية غارقة فى الرومانسية ، رغم غلظة (اللوبيا) التى تبدو فى الاسم·
* يعرف عن الجابرى ان حباله الصوتية كانت (اوتار عود) تخرج الحاناً مسكونة بشئ من الوجل ، او هى عصب كمان لا تنطق إلا لحناً·
|
| |
|
|
|
|
|
|
|
|
|
Re: الأستاذ الموصلي وسادتي الذوّاقة فضلاً لا أمراً ..احمد الجابري! (Re: عمر الفاروق)
|
استاذنا الموسيقار الموصلي:
| Quote: يا ابو الزهور ياخي ابوعمير ساب البوست ده ومشي فتح واحد جديد |
والله ماااااااا خليتو وماااااااااااا نسيتو يا استاذ ..والبوست ده تحديداً أنا معوّل عليهو كتييير وتصوري ليهو لسة ما إنتهى لكن ما بكذب عليك يا موصلي عايز تجيني ليهو موود كتابة معين حتى ادخل اواصل ..
ما عايز اجي اكشح الناس بي شكرا يا رائع وما قصرت يا فلان وووو..
الليلة قامت علي جنونة لمن سمعت غنى الكحلاوي بيتبشتن وزعللللت عشان بحبو الزول ده ..
قامت شالتني الهاشمية وعلى قولك (ابوووك يا هديل)
البوست ده يا موصلي راجيك فيهو شغل كتيييييييير واغاني كتيييييرة ..
بس ما تخزلني ..
والعتبى لكل المشاركين اللسة ما جيتهم ..
| |
|
|
|
|
|
|
| |
عمر الفاروق
Emad Abdulla
Saifeldin Gibreel
اساسي
لؤى
انعام عبد الحفيظ
Elmosley
ALGARADABI
نهي محسن أبوراس
haroon diyab
Azhari Nurelhuda
فيس بوك
تويتر
انستقرام
يوتيوب
بنتيريست