ورحل ايضا اسامه نصر الدين

Quote: تانى قام واحد جميل فى بلدنا ... ماتْ وكان بغنى للمساكين .. والمسولتين .. والحفاتْ وكان بغنى للمنافى .. والعصافير .. والرعاتْ وكان بغنى لى بلد فى الحلم ... جاي .. أغنياتْ وكان بطنبر .. وكان بدوبى .. للحياةْ تانى قام واحد ملك ... روّح .. وفاتْ وكان ملك فى الريد ... وإنسان فى الصفاتْ وكان مهاجر فى دموع كل البكاتْ وكان وتر مشدود ... ومسكون دندناتْ وكان - عليه سلام - تقول مازول حياةْ يا اسامة ..... فاكر الجماعة الكانوا ساكنّك دوام من منفى لى منفى ومن عود ... لى سفرْ فاكر العصافير المسافرات دون جواز فاكر اللى داجّين فى المطرْ .... عبدالرحيم ... وهلم جرْ فاكر القطر فاكر النخيل .. فاكر الحراز ... الليلة كانوا جميع هناك قسماً يمين .. كان الجميع باكين عليك كان المطار فارش عليك كان الجميع مشتاق إليك ياسلام عليك لمّان تكون زولاً عزيزْ عنْ ناس عزازْ يعنى كان لازم تفوتْ والحزن مشرور فى البيوتْ والدنيا مازال فيها حوتْ .... وفيها لسع .. عنكبوتْ !! .... يعنى كان لازم تفوتْ وتخلّى أوتارك سكوتْ ولسة عندنا ريد جديدْ ولسة عندنا ليك قصيدْ ...... يعنى كان لازم تفوتْ وتخلى هذا الحب يموتْ ! ياسلام عليك لمّان تكون زولاً عزيزْ عنْ ناس عزازْ يا سلام عليكْ انا لله وانا اليه راجعون ولاء

Quote: الحزب اللليبرالي السوداني ينعي فقيدي الشباب محمد أبراهيم المهدي قنقو وأسامة نصر الدين تنعي رئيسة واعضاء المكتب التنفيذي للحزب الليبرالي السوداني وكافة عضوات واعضاء الحزب ببالغ الحزن والاسى فقيد الشباب الديمقراطي محمد ابراهيم المهدي قنقو، بعد مصارعة لعدة ايام في غرفة الانعاش بمستشفي الخرطوم اثر حادث حركة تم يوم الاربعاء الموافق 13/2/ 2008، حيث توفي متأثرا بجراحه يوم الجمعة 15/2/2008. الفقيد محمد ابراهيم المهدي من ابناء دارفور ومن خريجي طب جامعة كردفان العام الحالي ، ومن خيرة الشباب الديمقراطيين الذين تعول عليهم اسرهم والبلاد. التعزية مبذولة لصديقه الزميل عبد المجيد صالح ولاسرته واصدقائه ورفاقه ولجميع ابناء السودان في هذا الفقد الجلل. كما تنعي رئيسة واعضاء المكتب التنفيذي للحزب الليبرالي السوداني وكافة عضوات واعضاء الحزب ببالغ الحزن والاسى الفقيد الكبير أسامة نصر الدين المعروف بأزهري ابو نضارات، والذي رحل عن عالمنا متأثرا بجراحه بعد حادث حركة اليم. الفقيد أسامة نصر الدين من ابناء السكوت المحس وهو من قامات العمل التربوي والوطني. عرفناه مناضلا ديمقراطيا في السودان وعلى الجبهة الشرقية وفي جنوب السودان. كان مثقفا عظيم الاطلاع وصديقا محبوبا لجميع معارفه وانسانا ثوريا يتوق الى الجديد. تعازينا لاسرته واصدقائه وجميع رفاق دربه ولكل اهل السودان في هذا الفقد العظيم. امانة الثقافة والاعلام الحزب الليبرالي السوداني 28/2/2008