حافلة العازفين..

مرحبا Guest
اخر زيارك لك: 03-28-2024, 07:25 AM الصفحة الرئيسية

منتديات سودانيزاونلاين    مكتبة الفساد    ابحث    اخبار و بيانات    مواضيع توثيقية    منبر الشعبية    اراء حرة و مقالات    مدخل أرشيف اراء حرة و مقالات   
News and Press Releases    اتصل بنا    Articles and Views    English Forum    ناس الزقازيق   
مدخل أرشيف الربع الاول للعام 2008م
نسخة قابلة للطباعة من الموضوع   ارسل الموضوع لصديق   اقرا المشاركات فى شكل سلسلة « | »
اقرا احدث مداخلة فى هذا الموضوع »
02-06-2008, 07:23 AM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
حافلة العازفين..

    لا تقولوا لي زين عالم جميل ولا يحزنون ..
    اجمل عالم من إختيارك كان حافلة العازفين ..
    بالرغم من إني لا عازف لا فنّان لكني معجب أيما إعجاب بهذه الحافلة ..
    حافلة لا بتشبه حافلات المواصلات ولا حافلات الترحيل ..
    بالرغم من إنو نفس الحافلة دي بتلقاها شغالة بالصباح في المواصلات ..
    حافلة أنيقة ونضيفة في معظم الأوقات ..
    سواقها زاااااااتو ما بيكون بيشبه سواقين الحافلات العادية وكأنو يتم إختيارو حسب مواصفات معينة ..
    ما ان تظهر هذه الحافلة في شوارع حلّتنا حتى تتهلل الأسارير وتدب الحياة في الشباب بعد إشاعة مفادها إنو الحفلة دي ما فيها فنان ..
    والله قالوا عشا بس وغنا ماف ..
    العرس ده عقد وخلاص ..
    ظهور الحافلة ينفي الشاعئات ويبدأ الناس إستراق النظر عسى ولعل ملامح الراكب الأمامي تتبين ..
    مشهد جميل وإنت عينك للساوند مشعلق بي فوق وسماعات البيز كمان وكم شنطة كمنجة طايرة ..
    زمان لمن العازفين ديل ينزلوا من الحافلة وكأن اللي نازل رئيس دولة أو لاعبين كورة جايين بي كأس العالم ..
    إكتظاظ سكاني عجيب وكلنا يتفقد ملامح هؤلاء العازفين ..
    دايماً بيكون في غرام بين عازف البونقز والساكس والجيتار مع الجمهور إحتمال عشان الربة والهجيج ..
    عازف الكمان لا ينوبه من الحب جانب من العزابة لكن سبحان الله كل الجكس في الحفلة حايكون من نصيبو بعدين وكأنه يقول صبرت حتى نلت ..
    جو الحافلة يبدو عليهو إنو جو جميل جداً جداً دوماً ما كنت أشاهد حافلة العازفين والكل بداخلها في حالة ضحك وقرقرة وشريط ذكريات إما حفلة قادمة أو حفلة سابقة ومشهد لهذا وموقف لذاك ..
    حافلة العازفين كانت الملاذ الأخير لينا ونحن ضهب في حفلات بعيدة عن مساكننا ولمن خلاااااص يحير بي الدليل كنا نصاحب واحد من العازفين في الحفلة وفي النهاية نعتمد عليهو إعتماد كلي في خط الرجعة ..
    الغريبة العازفين ديل كانوا ناس طيبين خلاص ومستعدين يركبوا معاهم أي زول وينزلوهو في طريقهم ..
    كان الفنان دوماً يحتل المقعد الأمامي وفي حالة تلفت ما بين الشارع وما بين السواق وما بين العازفين في كل مداخلة ..
    كانت واحدة من أسباب نجاح الحفلة هذه الحافلة المدعوة حافلة العازفين لأنو الناس بتكون خلاص في مسافة الطريق بررفت وغنّت وفهمت شغلها كويس ..
    حتى السواق بيكون بقا عازف ولا فنان ..
    والأجمل صوت الشريط اللي طالع من الحافلة ..
    قمة الروعة كانت في توزيع العازفين ليلاً والناس نيام ..
    وأتوقع إنو العازفين المعانا هنا حا يكون عندهم طرائف لا تحصى ولا تعد ..
    يا يلاقيهم حرامي بيسرق في بيتهم يا قطاع طرق ..
    دوماً العافزين بعد ينزلوهم من الحافلة تسمعهم يغنوا بأعلى حس في الصمت الرهيب في الحي ..
    عن نفسي كنت أعرف إنو حمد الريح وعازفيه في حلتنا بعد أن أسمع صوت حسن جردل وهو يدندن بأعذ الألحان في تمام الساعة الثالثة صباحاً ..
    حافلة العازفين يبدو أنها في طريقها للإنقراض بعد أن اصبح لكل عازف عربية والجماعة بيتلاقو في الحفلة بس بعد ما ياخدو الوصف من الفنان ..
    اصبح العاذفين بال طعم ولا نكهة ..
    بدأت تختفي القفشات والحكاوي اللذيذة ..
    حتى عشا الفنانين بقا ما زي زمان ..
    أعيدوا لنا حافلة العازفين ..
                  

02-06-2008, 03:10 PM

ناذر محمد الخليفة
<aناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    بوستك لذيذ يا عمر ..

    وحافلة العازفين بقت ما بتشيل إلا الساوند سيستم ..

    وكل الجماعة بي عرباتم ودي مشكلة كبيرة تحسب على صاحب المناسبة ..

    عازف البنقز عربيتو قاطعة بنزين ورا العزوزاب !!

    عازف الساكس عربيتو بستمت في الفتيحاب !

    عازف الكمنجة عربيتو قطعت سير في اللفة !!

    والفنان زاتو عربيتو ضاربة زيت في أمبدة !!


    معقولة الكلام دا ؟؟!!!
                  

02-06-2008, 03:46 PM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    يا أبو النيز:
    Quote: وكل الجماعة بي عرباتم ودي مشكلة كبيرة تحسب على صاحب المناسبة ..

    عازف البنقز عربيتو قاطعة بنزين ورا العزوزاب !!

    عازف الساكس عربيتو بستمت في الفتيحاب !

    عازف الكمنجة عربيتو قطعت سير في اللفة !!

    والفنان زاتو عربيتو ضاربة زيت في أمبدة !!


    معقولة الكلام دا ؟؟!!!

    سيد المناسبة مقدور عليهو تراهو ماف حلّة ما فيها فنان قدّر ظروفك وأي واحد من الشباب مع أحلى أورغن والحفلة تتم ..
    لكن وين ليك مع الروفات البقى يعاني منها الفنانين زي التمرين بتاع اللاعبين ..
    يجيك بتاع البنقز ويغيب بتاع الساكس والكمنجة ..
    يجوك إتنين من العازفين وإنت يكون عندك بكرة تسجيل في التلفزيون ..
    عشان كده دايماً الشغل مكلفت وما رابط ..
    تخريمة :
    يا ناذر ياخ انا لمن جيت السودان ما حصل شوفت لي عربية قديمة وواقفة ومعطلة ..قلت يا حليل مكنيكية الكوبير ..ييبنشر منك لستك ساي يقول ليك جيب 500 الف ..
                  

02-06-2008, 04:32 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10754

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    ويا حليل العازفين زاتن
    تم تلخيصهم فى عازف واحد بتاع الاورغن
    والاغرب كمان ودى سمعتها بى اضانى
    لما الحفلة كانت بفنان معاهو عازفين يقول ليك
    دى حفلة بايخة
    لانها مافيها عازف اورغن

    زمان طبعا فى المعهد
    كان العازفين اصحابنا عندهم حافلة
    تنقلهم لمكان الحفلة
    وكم وصلونا معاهم
    وكم غنينا من الخرطوم للجزيرة
    كان فى مدنى ولا حليوة

    طبعا اجمل حفل زواج حضرته كان فى حليوة
    زواج صديقى الشاعر الجميل محمد طه القدال
    الحفلة بدت الساعة سته صباحا
    الفنان كان مشهور الوكت داك (محمد بخيت) ما بعرفو هسى وين؟
    ونحنا قاعدين للصباح لانه حافلة الفنان ماجات الا الساعة خمسة صباحا
    شفنا ليك الشفع جارين فرحانين
    الحافلة جات
    وبدا الحفل
    سيرة كدارى من بيت العريس محمد لبيت العروس امونه
    جينا لقينا ليك الصيوان متروس والفنان مصحصح
    وبالمناسبة دى كانت اول مرة ازور حليوة
    والشاى والمسواك معاك فى نفس اللحظة
    وبدت الحفلة الصباحية رغم انها كانت مفروض تكون بالليل
    لكن لانه حافلة الفنان اتاخرت بدت الحفلة صباح

    وقصص الحافلات كتيرة
    مرة عميرى الله يرحمه كان فى فنان جديد لنج
    جا الخرطوم وما بعرف عنها الا نادى الفنانين وبيته والاذاعة
    قام عميرى اجر حافلة وعازفين والفنان
    قال ليهم مافى زول يفتح خشمو مع الفنان دا
    اها كان العنوان الفيهو الحفلة كالاتى
    العمارات /شارع نمرةاتنين/سفارة السودان بالخرطوم
    والفنان يشيل ويسال
    لمن البنزين قرب يخلص
    قالوا ليهو
    ـ يا ابن العم دا مقلب من عبد العزيز العميرى
    اقعد عافية
                  

02-06-2008, 04:51 PM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: سلمى الشيخ سلامة)

    سلموز :
    يا سلام عليك وعلى مداخلاتك ..
    تتحفيني دوماً بمداخلات أجمل من بوستي نفسه ..
    Quote: ويا حليل العازفين زاتن
    تم تلخيصهم فى عازف واحد بتاع الاورغن

    وزي ما بيقولوا :
    زمان كان العازفين كتااااااااار والبيغنّي واحد ..أسة بقوا البيغنّوا كتااار والعازف واحد..

    تعرفي يا سلمى في زواجي إتمنيت إنو تكون الحفلة بي فنان وأوركسترا وحينها رشحت الراحل إبراهيم عوض قبل وفاته أو زيدان ..
    ناس البيت دقّوا لي جرس وقالوا لي يا تجيب فنان بي أورغن يا الحفلة حا تكون بايخة ..المشكلة انا من جيل الأورغنات وبجي بجي بجي مالو ما جا ..
    عندي فهم في إنو حفلة زواجك دي تاريخ وهيبة مفروض بعد سنيين وسنين لمن تحكي لي أولادك كان ربنا هوون تجي تقول ليهم شوفوا انا في عرسي جبت منو !!
    إتخيلي معاي إنو بعدين ولدك يقول ليك حفلتك كانت بي منو تقوم تقول ليهو كانت بي نجاة غرزة!!

    Quote: الفنان كان مشهور الوكت داك (محمد بخيت) ما بعرفو هسى وين؟

    إن كان محمد بخيت بتاع مدني فهو الان في كنف الإنقاذ يغني الأغاني الجهادية ويهجج بالريس عمر البشير في الخطابات الجماهيرية مردداً :
    أمريكا روسيا قد دنى عذابها ..

    Quote: والشاى والمسواك معاك فى نفس اللحظة
    .
    يا حليل الحفلات الصباحية والحفلة شغالة واللقيمات مدوّر ..
    والوش لا تعرفو صاحي لا نايم والعيون مورمة الصالون فيهو خرتومية شافع ملخبطين في سرير واحد أصوات الناس وهي تتنادى في الأجواء الصباحية بنغم صباحي مختلف يقع في الأذن بارداً ..

    يا حليل زمان وسنين زمان يا حاجة لو تتذكري!!!
                  

02-06-2008, 07:03 PM

ناذر محمد الخليفة
<aناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    عمر :

    Quote: حتى عشا الفنانين بقا ما زي زمان ..


    ذكرتني حاجة مهمة يا عمر ..

    البيضة البتكون في عشا الحفلات ..

    إختفت مشت وين ؟

    سنين طويلة والبيضة المسلوقة دي إختفت من صحن العشاء ! مهما كان العشاء فاخر بتلقى البيضة ما فيشة !!!

    تكون عشان بتوسخ المكان بي القشر ؟! ولا عشان منظر الزول وهو بيقشر فيها ما حضاري ؟!!
                  

02-06-2008, 09:39 PM

ALGARADABI
<aALGARADABI
تاريخ التسجيل: 12-30-2004
مجموع المشاركات: 5236

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    العزيز عمر
    دي نكتة عن الفنان الخالد خليل اسماعيل نسأل الله أن يرحمه ويغفر له:
    كان عندو حفلة في أيام الانقاذالاولي
    وحظر التجول كان من الساعة التاسعة
    بعد أن غنى فاصلين بدأ العازفون في لم العدة
    جا العريس قال ليهو لو سمحتا فاصل تاني يا أستاذ
    رد عليهو الاستاذ خليل:
    والله لو غنيت فاصل تاني العازفين ديل الا أوزعهم بي نبلة

    له الرحمة
                  

02-06-2008, 09:55 PM

سلمى الشيخ سلامة
<aسلمى الشيخ سلامة
تاريخ التسجيل: 12-14-2003
مجموع المشاركات: 10754

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: ALGARADABI)

    يا خى انا ضحكت ضحك ياقرضابى
    الله يديك الفى مرادك
    ورحم الله خليل اسماعيل

    ويا سيد البيت محمد بخيت بقى شنو كده ؟
    زى ما بقول عميرى (الله يقرفو )
    ما كان زول غناى وغناه جميل وصوتو حلو جدا

    عارف بعد العرس داك والبهجة ديك كلها
    مشينا نركب الحافلة او الباص عشان نرجع البيت فى امدرمان
    يا زول قول لقينا الحافلة
    لكن
    حصلت حاجة لطيفة جدا
    فى موقف الكاملين
    القى ليك عزالدين فضل الله العازف المعروف
    كمنجست (اسطى كبير)
    وعنده عربية اوبل قديمة لكنها بتوصل
    المهم ركبت معاهو
    وقولى كدى يا الكتاحة تعالى
    بقينا ماشين مشى الضباط فى الرملة
    طبعا فى عربات قدامنا جديدة وسمحة
    عزالدين اطال الله عمره روحه جميلة والنكته فى طرف خشمو
    عاين للعربات القدامو وقال
    ـ عليك الله عاينى ليهن خطراتهن زى شواية الشاورما هيييع
                  

02-07-2008, 05:14 AM

الفاتح ميرغني
<aالفاتح ميرغني
تاريخ التسجيل: 03-01-2007
مجموع المشاركات: 7488

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: سلمى الشيخ سلامة)

    الاخ عمر الفاروق
    شكرا على هذا البوست الـ " Nostalgic
    في مدينة الابيض الجميلة كنت أعزف على آلة البيز مع المبدع عمر بانقا. وفي ذلك الزمن الجميل كان صاحب الحافلة ليس بمجرد سائق فقط بل كان بمثابة مدير أعمال( جوكر عديل كده) يقوم بترتيب مواعيد اللقاء في فرقة فنون كردفان ونقل وتركيب المسرح وتوصيل السماعات وبعد إنتهاء الحفل يقوم بتوصيل جميع العازفين.
    ومن الطرائف التي حدثت لنا كنا " ضاربين عداد في حي بلدو بالإبيض"واذكر أن المجموعة كانت تتكون من:
    1-ابراهيم سنادة -أكورديون
    2- التجاني الصادق على آلة الكمان
    3- زين العابدين على آلة الكمان
    4- احمد المصطفى ابوشنب - على آلة الكمان
    5- ابراهيم حماد ـ طرمبة
    6- اسماعيل فضل - ساكسفون
    7 فتحي عبدالجبار- جيتار
    8-خالد الفحيل- اورغن
    9-عادل حسبو ايقاع
    10-عثمان الطويل - طبلة
    وعندما بدأنا الحفل لم يكن المسرح مثبتا بشكل جيد وبمجرد ما طلع عمر بانقا على خشبة المسرح إنهار المسرح وعينك ما تشوف إلا النور( بالرغم من أنه الوقت داك ما كان فينا بتاعين عبابير)إلا أن اول تعليق من واحد جمبي قال لصاحبه " الناس ديل الظاهر مسنسنين من الصباح". وده طبعا إعتقاد كان شائع بأنه الفنان لا بد يكون بتاع عبابير لذلك كان موضوع عشا الفناننين وعبابيرهم من الأشياء التي يحرص عليها أهل العرس قبل كل شيء.
    زمن جميل فعلا هيهات يعود
    وشكرا على هذا البوست.
                  

02-07-2008, 07:23 AM

نادر

تاريخ التسجيل: 11-27-2002
مجموع المشاركات: 3427

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    عمر الفاروق؟؟!! أول مرة أشوف صورتك
    تعرف شبهك ده في السودان كتااااااار خاصة في سوق الجلود، حسه كان لاقيتك في السوق بطلع ليك من الحايمين ساي زي مية وخمسين ما بتتفرزو من بعض ...
    انان عارف لسانك طويل ومتبري منك لووووووووووووووووووووووووول
    يا زول ما تزعل الكلام ده ضحك وهظار ساي وبعدين ذاتو الما لقى شبهو الله قبحو ...
    تحياتي ليك ولضيوفك الحلوين.
                  

02-07-2008, 08:35 AM

عبد السلام أبوشنب

تاريخ التسجيل: 09-18-2005
مجموع المشاركات: 0

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    Quote: عندي فهم في إنو حفلة زواجك دي تاريخ وهيبة مفروض بعد سنيين وسنين لمن تحكي لي أولادك كان ربنا هوون تجي تقول ليهم شوفوا انا في عرسي جبت منو !!

    ود الفاروق
    " صورة من حفل زفافكم مع تحياتي"
    /IMG]
                  

02-07-2008, 08:39 AM

عبد السلام أبوشنب

تاريخ التسجيل: 09-18-2005
مجموع المشاركات: 0

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

                  

02-07-2008, 09:37 AM

ناهد علي
<aناهد علي
تاريخ التسجيل: 08-16-2007
مجموع المشاركات: 517

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    ياعمر ياخوي
    هو شنو الماانتهاء
    ياحليل باصات السيرة والكبسيبة وركب لي ولدي مابمشي من غيرة ، ماكرفستي لي توبي
    وياحليل لمايكون العريس مغترب وعامل عرسة في النادي ويكون السواق ماعارف طريق النادي ويلف يمين وشمال والله الليلة الحفلة كان حصلناها عيبي نلقاها انتهت علة نرجع في حافلة العازفين والفنان يعوطنا
    وياحليل الحفلة البتنتهي مع الاذان..
    تقول لي شنو وتقولي منو (الحافلة بس )
    ياليتها تعود ايام
                  

02-07-2008, 09:50 AM

عصام دهب
<aعصام دهب
تاريخ التسجيل: 06-18-2004
مجموع المشاركات: 10401

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: ناهد علي)

    شكراً يا عمر الفاروق أشيقت أهجاني ..
    و شكراً لكل المتداخلين معك ..
    و شكر خاص لأستاذي / الفاتح ميرغني ..
    و حقيقة أستاذي الفاتح راجل فنان بحق ..
    فعلاً كان عازف بيز خطير ..
    تذكر يا أستاذ .. بلابل الدوح و ( أنيني ) ..
    و يا ما سهرنا معه و بقية الفرقة و الأستاذ/ عمر بانقا ..
    و كان أحياناً سواق الحافلة يا أستاذ الفاتح هو ( ود البديري ) ..
    و مع فرقة الشباب كان عازف الأكورديون عبد الله بدوي عندو برينسة ( بوكس ) ..
    و بعدين لما تباري الحافلة بتاع العازفين طبعاً أضمن مليون مرة من تباري بتاع الصيوانات ..
    و أذكر أن هناك واحد بتاع شربة كدة مشهور في الأبيض مزاجو بس إنو يكون المايسترو للعازفين ..
    و دايماً تلقاهو قائد للأوركسترا بمزااااج .. و لما ينتهي الفاصل بتلفت على الجمهور و يحييهم ..
    أيام ..
                  

02-07-2008, 12:44 PM

Elmosley
<aElmosley
تاريخ التسجيل: 03-14-2002
مجموع المشاركات: 34683

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    تعرف ياعمر انا معاك وضدك
    ===================
    معاك في الاوركسترا السودانيه تم افتقادها
    وان حافلة العازفين ولي زمانها بفضل محاولة توفير المال
    لان الاوركسترا مكلفه
    ========================
    ولكن لو آن السودان بخير لانتشرت المسارح في السودان
    ولاصبحت الحفلات العامه
    تلعلع في كل المدن السودانية
    ==================
    ليتنا عدنا الي الخلف ولو
    لزمن المتعهد المرحوم فارغات
    الذي ياخذ الفنانين في جولات تستمر طويلا في الاقاليم
    ====================
    وليت السودان كفي العازفين مغبة جوطة بيت العرس
    لارتفع الفن السوداني الي الذروة
    ===================
    كل الاعزاز
                  

02-07-2008, 02:29 PM

Abd-Elrhman sorkati
<aAbd-Elrhman sorkati
تاريخ التسجيل: 02-21-2003
مجموع المشاركات: 1576

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    أخونا عمر الفاروق لك الود

    بوستك فريد ...

    زكرتنا حاجات لذيذة جدا ...

    Quote: ياعمر ياخوي
    هو شنو الماانتهاء
    ياحليل باصات السيرة والكبسيبة وركب لي ولدي مابمشي من غيرة ، ماكرفستي لي توبي


    والصبحية كمان

                  

02-08-2008, 04:34 PM

ناذر محمد الخليفة
<aناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    فني الساوند الوحيد الحايفضل بدون عربية خاصة لترحيل العدة !!

    صنفرة :

    اللهم إلا يعمل ليو حافلة حقتو براو !!!
                  

02-09-2008, 06:35 AM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    يا ناذر:
    Quote: البيضة البتكون في عشا الحفلات ..

    إختفت مشت وين ؟

    البيضة والبيبسي تمثل خطر كبير خصوصاً على الجكس وخصوصاً لمن تكون الحفلة في النادي..
                  

02-09-2008, 08:32 AM

حمد اسماعيل

تاريخ التسجيل: 01-27-2005
مجموع المشاركات: 544

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    .
    يا ود الفاروق البوست جميل ورجع الواحد للزمن الجميل

    زمان(شوف زمان دى حلوه كيف) لما تجى بجنب نادى الفنانيين

    زى الساعه سبعه تفتكر نفسك جنب السوق الشعبى لانه بتاعيين

    الحافلات ضاربين عداد وطبعا أحسن من يكون شغال فى الخط ويلقطه حته حته.

    طبعا طلع قرار انه الحفله تنتهى الساعه حداشر والحفله كانت فى الفتيحاب

    وقفته عربيتى فى النادى( لزوم توفير بنزين وكده) وركبته مع الفنان ومشينا بشارع البحر

    وباقى الشباب ركبو الحافله المهم الحفله بدأت متاخره وسخنت فى الفاصل التانى والناس

    آخر بهجه وشايلين العريس فى الساعه دى ظهر بوليس قدام المسرح وقال للفنان وقف الغنا

    والناس آخر انبساط شايلين العريس فجاةالمزيكه وقفت , أبو العريس جانا وقال شنو يا شباب

    مالكم شباب الحله قالو ليه وقفه البوليس ابو العريس قال ليهم بوليس يوقف حفلة ولدى وكمان

    فى الفتيحاب ويلا القيامه قامت . الناس لمو فى عربية النجده دايرين يقلبوها واتضح انه الضابط

    جوه العربيه غايته ربك ستر( فى اللحظات دى بتاع الساوند لملم حاجاته) وكل زول فكر يتخارج

    جا العريس وابوه واعتذرو لما حصل والشباب ركبو الحافله وأنا رجعته مع الفنان ورجعنا بنفس

    الطريق الجينا بيه طريق البحر , وصلنى النادى ركبته عربيتى و مشيت بيتنا .


    الصباح فى الاذاعه عرفت من أحد العازفين الكانو معانا فى الحفله انه ناس البوليس لبدو ليهم

    فى شارع الظلط لانهم عارفين انه حافلة الفنانيين حتجى بهنا المهم وقفوهم وسألو من الفنان

    وعرفو انه الفنان ما فى الحافله وساقو الحافله بعازفينا لنقطة الفتيحاب وبيتوهم لغاية الصباح

    وفتحو عليهم بلاغ بالغنا( بعد تسعيرة الحكومه) بعد الساعه حداشر , وحددو ليهم محكمه فى نفس

    اليوم(محكمة العمد) المهم طلعو منها وبخصوص الفنان رسل ليه مدير البوليس لمقابلته بمكتبو

    لانه الضباط اشتكو منه ودى حصلت منه اكتر من مره , الفنان قابل مدير البوليس ووعد بان لا تتكرر.


    الفنان من الفنانيين الكبار رحمه الله كان يكن له الجميع كل احترام وتقدير .


    لضمان وجود كل اعضاء الفرقه الحافله مهمه لانه ياما فى عازفين طشو بعد الوصف لمكان الحفلة

    وبعدين ما تنسى توقف عربيتك فى النادى وتركب الحافله علشان توفر ليك بنزين ينفعك لقدام .


    بعدين يا عمر الفاروق المفروض أكون بعرفك لآنك زول بتاع حفلات وهجيج ( كان زمان) وبتعرف ناس

    كتار فى الوسط الفنى . الونسه طويله وآخر حافله بتاعت فنانيين ركبتها سنه 89 ومن ديك

    وعععععععععععععععيك .



    بجيك تانى
                  

02-09-2008, 06:37 AM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    القرضابي:
    صباحات الله بي خيرا..
    انا لو مكان الفنان خليل إسماعيل كنت شحدت من ابو داؤود النبلة بتاعتو القال عايز يفرتق بيها حفلة حمد الريّح الكلها حمام وادي وطير وقمري دي
    يديك العافية ..
                  

02-09-2008, 09:52 AM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    سلموز:
    Quote: عارف بعد العرس داك والبهجة ديك كلها
    مشينا نركب الحافلة او الباص عشان نرجع البيت فى امدرمان
    يا زول قول لقينا الحافلة


    واحدة من أجمل وأسوأ اللحظات اللحظة دي..
    تكون مبتهج وضارب الهم بي الفرح والبيشوفك تنطط وتنقّز في الحفلة يحلف يقول مفتاح الكامري في جيبك ..
    بالله بس تنتهي الحفلة بي جاي والشلهتة تبدا بي جاي ..
    تشوف ليك واحد قيافة كده وتمشي تتحكحك فيهو ويا أبو الشباب قميصك سمح ورقصتك إستايل وتووووشك تسألوا أها معاك عربية ؟ ساكن وين ؟ يقول ليك انا ساكن بحري ..تقول ليهو ما مشكلة خلاص نزلني معاك في المؤسسة ..
    شلهتت سنينك يا سلمى الرقيص الرقصتو يطير ليك كلو في راسك ..
    شكراً لي حافلة العازفين فكم وكم ملّحت معاهم ..أي نعم بتصل اخر واحد لكن أهو بتصل..
                  

02-09-2008, 10:56 AM

بابكر التوم
<aبابكر التوم
تاريخ التسجيل: 01-04-2008
مجموع المشاركات: 1580

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    الاخ عمر الفاروق
    سلامات
    بوست روعة طبعا رجع الناس للزمن الجميل والحفلات الصباحى
    لكن وين للزمن الاغبر الحالى اى فنان اليومين ديل عمل ساوند
    والسماعات الحديثة بتاعة الساونات الديناكورت الامريكية دى
    يختها ليك فى ضهرية العربية مع الفنى والجولات شغالة تش مع
    عازف الاورغن والموعد فى مكان الحفلة والعشاء فى الكوتش ولا
    ولا سندوشات فى اى من الكفتريات الشهيرة المنتشرة الان لتجمع
    الفنانين لشمارات فى بعضهم انتهت تلك الالفة والعلاقات الجميلة
    بين الفنانيين والعازفين وبتاع الساوند والحافلة . وهنا نحى
    من اشهر اصحاب الحافلات الرائع الوفى عزمى الحلفاوى بتاع
    عقد الجلاد الذى اصبح من العقد الفريد. وحاتك انا عندى ساوند
    الان فى السودان وتاكيد لما سبق حالة واقف الا نبقى مزيرة بعد دا
    Quote: تعرف شبهك ده في السودان كتااااااار خاصة

    بالمناسبة دى كلما يجى اسمك افتكرك عمر الفاروق السكرتير العام
    لاول اتحاد للتجمع بجماعة امدرمان الاهلية الله يطراة بالخير
    لك مودتى
                  

02-09-2008, 01:33 PM

ناذر محمد الخليفة
<aناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    عمر الفاروق ..

    هاك دي عشان تعرف إنو زي ما حافلة العازفين عندها نواقص برضو وبعد مرات الفنان أحسن ليهو يزوغ بي الركشة بدل يرجع معاهم :

    Quote: أواصل سرد المواقف الغريبة التي حدثت لي في المناسبات حيث سأعرج الأن لأروي قصة إعتقالي في منزل إحدى المناسبات لمدة ثلاثة ساعات بسبب فني الساوند ..

    أصل القصة أنه في إحدى الأمسيات إتصل بي أحد فنيي الساونات الذين أتعامل معهم وذكر لي أنه قد (ربط) لي حفلة بمنطقة الجريف وأنه قد إستلم مبلغ الحفل كاملا .. ثم طلب مني الحضور في زمان ومكان حددهما ...

    طبعا ذهبت للمكان ووجدت أن الحافلة في الإنتظار بعازفها وساونها وبعاميها فركبت فورا ومن ثم إنطلقت بنا الحافلة صوب الجريف حيث المأساة ..

    وقد أكرم أصحاب المناسبة وفادتنا ولكن عند بداية الحفل وتركيب الأجهزة اكتشفت أن فني الساوند ذاك قد أحضر معه سماعات ساوند (دينا كورد) وهي شديدة القوة في إصدار الصوت ولكنه في المقابل أحضر معه (راس) ساوند والذي يتحكم في الصوت لا يواكب سماعات الدينا كورد العملاقة !!!! وكنت حين أبدأ الغناء يفصل الساوند على الفور وحين يبدأ عازف الأورغ العزف يفصل الساوند أيضا !!

    ومن ثم نظرت إلى فني الساوند نظرة ما معناها (ضيعتنا يا فردة شوف لينا طريقة للمخارجة) .. ومن ثم بدأ التململ واضحا لدي اصحاب الحفل والذين تهيأوا لحفلة كاربة فتفاجأوا بعد صعودي للمسرح ومرور أكثر من نصف ساعة أننب لم أغني ولا كوبليه واحد ..

    وهنا تقدم ثلاثة من العمالقة الحاضرين (شفوت أولاد الحلة وكدة) وبدأوا في الأسئلة بخشونة : الحاصل شنو يا أخوانا ؟؟!! الحركات بتاعتكم دي شنو ؟؟ .. وقد حاول فني الساوند مداراة الموقف فحاول يبرر لهم بقوله أن الكهرباء ضعيفة في الجريف ..

    ولكنه تفاجأ بأن أحد هؤلاء الشفوت هو فني ساوند سابق وقد صرخ قائلا : إنتو قايليننا مواهيم ولا شنو ؟ جايبين لينا شماعات دينا كورد دايرين تشغلوها لينا بي أدابتر الإستريو دا ..!!!

    وهنا تيقنت تماما أن الكارثة قادمة لا محالة إذ أعتزر فني الساوند على الفور وذكر أنه سيذهب ليعود ب راس ساوند جيد .. وهنا زمجر هؤلاء الشفوت وهاجوا وماجوا إذ فجأة رفع أحدهم يده و (قطع ليكم كف في بتاع الساوند) وعندما إلتفتوا ناحيتي هرشت وذكرت لهم أنني لا أعرف شيئا... طلبني بتاع الساوند وجئت معه .. فسألوني بخشونة : كم شلت للحفلة دي؟ : فأجبت بإنهيار ورعب حقيقي : والله العظيم ولا تعريفة القروش كلها عند بتاع الساوند دا ولسه ما إتحاسبنا ..

    ولحسن الحظ تفهموا الموقف وكان أول ما فعلوه أن (قلعوا) العداد من بتاع الساوند والذي إستسلم لهم تماما ولكن ما مصير الحفل ؟؟!!!

    أرهبنا الشفوت بقولهم أنهم لن يسلمونا للشرطة ولكن علبنا الذهاب لإحضار راس ساوند لمواصلة الحفل مع تعويض عبارة عن (OVER NIGHT) .. وطبعا لم يكن بوسعنا في تلك الأجواء المتكهربة سوى الإذعان .. وعن نفسي شخصيا فقد أضمرت في نفسي عدم الرجوع مرة أخرى وسأدع بتاع الساوند يتصرف لوحده خاصة أنني لم أستلم مليما أحمر ...

    ولكن بما أن أولاد الحلة ديلك شفوت بحق وحقيقة فيبدو أن أحدهم قرأ ما يدور بخلدي فصاح في وحهي قائلا (الأستاذ دا ما يمشي يقعد معانا هنا لحدي ما صاحبو يرجع) ..!! وهنا واتتني قليلا من الشجاعة فقلت لهم (أقعد أعمل شنو !! أنا زاتي ما داير أغني ؟؟ في زول أداني تعريفة ولا داير مني حاجة)؟؟؟ ...

    وكان هذا بالضبط ما ينتظرونه إذ إنفجروا جميعا : إنتوا ناس صعاليك ولا شنو !! بوظتو لينا الحفلة وكمان بتتلامض !! أها الليلة دب إنتا ما طالع من البيت دا ...

    وبعد ذلك إقتادني عدد منهم وأدخلوني في غرفة منزوية في البيت وأغلقوا علي بابها من الخارج بإحكام في حين ذهب بعضهم مع بتاع الساوند حتى لا يهرب ..

    وطبعا كانت تلك لحظة رهيبة بالنسبة لي إذ وجدت نفسي معتقلا وحيدا في غرفة منزوية وخارجها يوجد نفر من الناس الغاضبين بسبب بوظان الحفل وصرت افكر عما سيجري لي إذا لم يجد بتاع الساوند رأس يعود به ...

    وبعد حوالي ساعة بالضبط فتح الباب وجاء أحدهم ووضع أمامي صحن عشاء وزجاجة بارد وهو يقول : هاك أكل تاكل السم .. فوجدتها فرصة وتمسكت به محاولا أن أشرح له الوضع وأنني لا دخل لي بما حدث وهو يحاول التملص والخروج .. لكنني لم أفلته وشرحت له لمحات من مسيرتي الفنية وبريته بإسهاماتي على الساحة وأنني فنان محترم ولا يصح سجني هكذا.. ثم عرجت أيضا للحديث عن الغناء السوداني ومحاولتي تأطير أدلجة المفاهيم المغلوطة في وجدان المستمعين ..

    طبعا كل ما قلته لم يشفع لي عنده فهرب من الغرفة وتركني وحدي أبرطم فيها

    المهم حوالي الساعة إتناشر منتصف الليل فتح باب المعتقل وجا الشفوت ومعهم بتاع الساوند وأخبروني أنهم قرروا الإفراج عني نهائيا وأحضروا فنانا أخر سيغني بدلا عني وأنني الأن FREE MAN وأستطيع الذهاب وأن مشكلتهم مع فني الساوند فقط ..

    حينها كدت أصيح يحيا العدل .. يحيا العدل .. ومن ثم عرضوا علي فقط البقاء معهم لحضور الحفل فإعتزرت لهم وأصريت على الذهاب ..

    وفي أثناء خروجي همس فني الساوند في أذني :

    (ما شي وين يا أبو النيز ؟؟ حا تخليني براي في نص الجماعة ديل؟؟!) ..

    فقلت له بغضب وحنق : (خليهم ....... أنا مالي ومالك) .. الكلمة مكان النقاط متروكة لفطنة القراء

    فخرجت فورا وركبت أقرب رقشة وذهبت إلى منزلي ومن يومها وأنا حالف ما أمشي لي أي حفلة إلا أكون رابطا براي وأتأكد بنفسي من سلامة الأجهزة قبل الحفل ..

    بقى أن أذكر أنه جاءني في اليوم التالي للحفل أنه بعد نهاية الحفل حوالي الثانية والنصف صباحا رفض أصحاب الحفل إعطاء فني الساوند عداده إنتقاما منهم لمحاولته التلاعب بهم إذ أعطوا العداد فقط لصاحب الأورغن والذي كان صامتا طوال زمن إعتقالي ولم يحاول التدخل ولم بعترض حتى على تعويض أهل الحفل بزمن إضافي ..


    ذكريات الحفلات في المناسبات : جلد بالسياط وزوغة بالعداد...مبيت في الحراسات ...
                  

02-10-2008, 07:05 AM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    ألذّ ما في حافلة العازفين فواكه البلاستيك المعلقة قدّام وتديك ألوان شي بنفسجي وشي أحمر وشي أخضر مع كل فرملة ..
                  

02-10-2008, 10:42 AM

محمد أبوالعزائم أبوالريش
<aمحمد أبوالعزائم أبوالريش
تاريخ التسجيل: 08-30-2006
مجموع المشاركات: 14617

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    الأخ عمر الفاروق .... تحياتي

    الغريبة مع كل البوست ده وبتقول إنك لا عازف ولا فنان.

    شخصياً عشت الجو ده فترة من الفترات .. والمواقف الطريفة فعلاً كتيرة، لو إتذكرت حاجة (أعذروا الذاكرة) حأجيك أكيد.

    Quote: دايماً بيكون في غرام بين عازف البونقز والساكس والجيتار مع الجمهور


    الحكاية دي مش كان تنبهنا ليها من زمان؟ يمكن كان الواحد إستثمرها لصالحه وكان أخوك (عازف ساكس) طالب بصولات زيادة حتى لو قطعت نَفَسو.

    صنفرة:
    يا ناذر لسة البعامات (المتطفلين) بياكلوا عشا الفنانين ويبيتوهم القوا؟
                  

02-10-2008, 11:00 AM

الرفاعي عبدالعاطي حجر
<aالرفاعي عبدالعاطي حجر
تاريخ التسجيل: 04-27-2005
مجموع المشاركات: 14684

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: محمد أبوالعزائم أبوالريش)

    أجمل من كدا مافي ...
    يافاروق ياأجمل ذاكرة هنا...
    تحياتي لك وأول مولود لك ح نجيب الحافلة ونجي ...
    تسلم ياجميل.
    ...............................................حجر.
                  

02-10-2008, 11:03 AM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    الأخ الفاتح:
    Quote: في مدينة الابيض الجميلة كنت أعزف على آلة البيز مع المبدع عمر بانقا.

    كنت ولا زلت من أكثر المعجبين بالفنان محمود عبد العزيز وفي أيام الصبا سعيت خلف شريط فيديو لمحمود ومعه فرقة كانت تسمى بفرقة الأبيض أعتقد أنها من أفضل الفرق الموسيقية أداء ..
    يا ربي كنت إنت معاهم ؟
    تحياتي..
                  

02-10-2008, 03:36 PM

ناذر محمد الخليفة
<aناذر محمد الخليفة
تاريخ التسجيل: 01-28-2005
مجموع المشاركات: 29251

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    أبو الريش ..

    Quote: يا ناذر لسة البعامات (المتطفلين) بياكلوا عشا الفنانين ويبيتوهم القوا؟


    الفنانين بقو حريفين الزمن دا ، الواحد فيهم لو ما إتعشى أول ولا بيطلع المسرح يغني ..
                  

02-11-2008, 08:29 AM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    نادر باشا:
    Quote: عمر الفاروق؟؟!! أول مرة أشوف صورتك
    تعرف شبهك ده في السودان كتااااااار خاصة في سوق الجلود، حسه كان لاقيتك في السوق بطلع ليك من الحايمين ساي زي مية وخمسين ما بتتفرزو من بعض ...
    انان عارف لسانك طويل ومتبري منك لووووووووووووووووووووووووول
    يا زول ما تزعل الكلام ده ضحك وهظار ساي وبعدين ذاتو الما لقى شبهو الله قبحو ...
    تحياتي ليك ولضيوفك الحلوين.


    ياخ ده حقد إجتماعي منك بس..
    انا عارفك بتكون متفاجئ بي النيو لووك حقي وكنت راسم لي صورة زول عيونو دقااااق والنخرة مترين بالعرض والإضنين كل فردة من بلد وتلاليش ..
    لكن خزلتك
    بعدين أقول ليك حاجة ..الما لقا شبهو الله قبحو وانا سبحان الله ماف زول بيشبهني وده مؤشر القباحة وكده ..
    تخريمة :
    صاحبنا جابو ليهو بنيّة سألتو أها البت كيف ؟ قال لي والله تماااااام بس عندها عيب واحد بس !
    قلت ليهو شنو ؟
    قال لي والله البت انا حاسي إني شايفا قبل كده في حتة ..
                  

02-11-2008, 11:08 AM

عثمان دغيس

تاريخ التسجيل: 01-14-2008
مجموع المشاركات: 1696

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    الأخ عمر الفاروق

    وناذر ..

    وكل المزيكاتية ..

    والله البوست ده غايتو عمل فيني عمايل ؟؟؟!

    ياخي ده عمر بي حالو ... وذكريات شوال عدييييييييييييييييييل كده ..!!

    شيئ الفنان يدقوه ليك ..
    وشيئ تسوقو كندورة ..

    وشيئ ما يدوك القروش ..

    بس أخطر ما لاقاني كان مرة عندنا حفلة مع واحد من أولاد مدني وكان الكلام ده حوالي سنة 1988 ولا 1990 ما عارف ,, الحفلة كانت في أبو قوته وكنا عندنا حفلة جوة مدني وإتفقنا معاهم نجيهم بعد الحفلة طوالي ..

    وده بإعتبار إنو أبو قوته دي كلها حوالي نصف ساعة أو ساعة من طريق مدني الخرطوم وتخديداً من قرية ود بلال ...
    أهااااا مشينا ونطلع كنار وننزل أبو عشرين ونلف كوبري ونلقى الموية مكسورة من الحواشة وقافلة الطريق ...
    وبعدين الدليل الجابوه لينا سكران طينة وما عارف يمين من شمال ...

    المهم وصلنا حوالي الساعة واحدة ونص صباحا ...

    وقوبلنا بالإحتجاج الشديد وبالبرد العنيف الذي لم أنساه حتى كتابة هذه السطور ..
    ياخي لدرجة طلبنا منهخم يجيبوا لينا كانون بي جمره ويختوه في المسرح .. عشان ( نحمس ) بيهو يدينا ونقدر نعزف بين كل لزمة والتانية ..

    المهم وبعد مباصرة عملنا ليهم تلاتة فواصل كاملة ...
    المشكلة ما كان في الحفلة زول واحد واعيي ...!

    وعند شروق الشمس قلنا ليهم شكراً جزيلا ...!

    بس القيامة قامت ... (إنتو جايين تتعشوا وتمشوا ؟؟؟) مع إننا إشتغلنا لحدي الساعة سته ونص ...! وكمان عشاهم كان بامية بي كسرة !! ومن شدة البرد وعشان تعرف ده ملاح شنو ، لازم تكسر لوح الدهن الأصففففففففففففففففففففر المتجمد فوق الصحن !!! قال تتعشوا قال ..!

    وبعدين رفضوا يدونا قروشنا ...

    قلنا ماشي .. إتحركنا وقلنا ( نحتسب ) زي ما بيقول الكيزان ..!! وتحركنا لكن المفاجأة كانت عند الطريق الرئيسي للحلة ...

    المفاجأة كانت وجود تلاتة شبان وشايلين ليهم كلاشنكوف عدييييييييييل كده ...! والله الكلام ده حصل بالضبط زي ما بحكي ليكم كده ؟؟!!

    فما كان من ( أبُو ) وكان إسم صاحب الحافلة إلا وأن طفق راجعاً ( بالله شوف طفق دي براها بي عداد سفري !!!)



    لأنو لو ما ( طفق ) راجعاً لكان طفقوه وطفقونا وطفقوا عربيتنا ...!!

    ما أحلى تلك الأيام وما أشقانا أيامها !!!

    (عدل بواسطة عثمان دغيس on 02-17-2008, 10:49 AM)

                  

02-16-2008, 07:57 AM

عمر الفاروق
<aعمر الفاروق
تاريخ التسجيل: 10-10-2005
مجموع المشاركات: 9669

للتواصل معنا

FaceBook
تويتر Twitter
YouTube

20 عاما من العطاء و الصمود
مكتبة سودانيزاونلاين
Re: حافلة العازفين.. (Re: عمر الفاروق)

    الأخت ناهد:
    Quote: ياعمر ياخوي
    هو شنو الماانتهاء
    ياحليل باصات السيرة والكبسيبة وركب لي ولدي مابمشي من غيرة ، ماكرفستي لي توبي
    وياحليل لمايكون العريس مغترب وعامل عرسة في النادي ويكون السواق ماعارف طريق النادي ويلف يمين وشمال والله الليلة الحفلة كان حصلناها عيبي نلقاها انتهت علة نرجع في حافلة العازفين والفنان يعوطنا
    وياحليل الحفلة البتنتهي مع الاذان..
    تقول لي شنو وتقولي منو (الحافلة بس )
    ياليتها تعود ايام

    ياخ السيرة دي واحدة من أهم مظاهر العرس في السودان ..
    عرس بدون سيرة زي الشرا في القندول
    السخااانة تكون ألف وأحمر الشفايف مع البودرة مع الفير بيعملوا ليك خلطة عجيبة ,,
    ناس ورا يشاغلوا ناس قدااااااااام :
    يا نااااااااس قداااااااام يا ناس قداااااااااام مااااااااااااالكم سكتّوا...

    يردوا ناس قدام :
    هيييي ين ناس ورا يا نااااااس ورا ..يا ناااااااس ورا أسمعوا ..
    وتسمع :
    الدق دق دق دق دق دق دق ..
    وسوووووووحي اليلالا بي الجمبة موووووووووحي اليلالا ..
    ويردوا ناس ورا :
    شطططططططططططططة شطططططططططة يام العروس ..
    شططططططططة جاييييييك عريس لقطططططططة يا ام العروس ..
    وما أجمل لحظات الوصول لي بيت العرس :
    ودوووووور بينا البلد ده أحرق الجزلين يلا يا منقة..
    دووووور بي حبيبي دوووووور بي ..
    وييييييييييييييييو ..

    هيييييييييييييييييييييييه يا سلام عليها من أيام ..

    تخريمة :
    أخونا عبد السلام شكراً على صورة العرس
                  


[رد على الموضوع] صفحة 1 „‰ 1:   <<  1  >>




احدث عناوين سودانيز اون لاين الان
اراء حرة و مقالات
Latest Posts in English Forum
Articles and Views
اخر المواضيع فى المنبر العام
News and Press Releases
اخبار و بيانات



فيس بوك تويتر انستقرام يوتيوب بنتيريست
الرسائل والمقالات و الآراء المنشورة في المنتدى بأسماء أصحابها أو بأسماء مستعارة لا تمثل بالضرورة الرأي الرسمي لصاحب الموقع أو سودانيز اون لاين بل تمثل وجهة نظر كاتبها
لا يمكنك نقل أو اقتباس اى مواد أعلامية من هذا الموقع الا بعد الحصول على اذن من الادارة
About Us
Contact Us
About Sudanese Online
اخبار و بيانات
اراء حرة و مقالات
صور سودانيزاونلاين
فيديوهات سودانيزاونلاين
ويكيبيديا سودانيز اون لاين
منتديات سودانيزاونلاين
News and Press Releases
Articles and Views
SudaneseOnline Images
Sudanese Online Videos
Sudanese Online Wikipedia
Sudanese Online Forums
If you're looking to submit News,Video,a Press Release or or Article please feel free to send it to [email protected]

© 2014 SudaneseOnline.com

Software Version 1.3.0 © 2N-com.de