|
|
 العارف يجاوبني بالجد كدي وحاة النبي جد محتارة
|
كل سنة طيبين
والقابلة على امانيكم ان شاء الله
العارف يجاوبني بالجد كدي
هل ممكن دكتور وتخصصه طب يكون ما بيعرف الفرق بين الصداع ووجع الكراع؟
هل ممكن سواق تخصصه سواقة يكون ما بيعرف التعشيقة من الدركسون؟
هل ممكن فنان تخصصه غناء وموسيقى يكون ما بيعرف الكمنجة من العود؟
هل ممكن شاعر تخصصه كتابة ولغة وحروف ما يكون بيعرف الفرق بين الذال والزين؟
هل ممكن صحفي وكاتب تخصصه كتابة ما يكون عارف الهاء الفي آخر الكلمة من التاء المربوطة؟
كلما افتح التلفزيون
ولا اقرا المنتدى ده
القى حاجات تهري المصران
والناس تطبل وتنفخ
وحاة النبي جد محتارة
|
|
 
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
سلام ياايمان وعيد سعيد
ده زمن الجربندية وزمن(خطفن جرن).
ولمن نقول متخصص يعني متخصص وعارف البيسك بتاعة الشغلانة واصولها بطريقة مدروسة وعلمية
تتيح له التعامل مع كل اجزائها بدراية
اما ناس خطفن جرن ديل لو فتشتيهم شوية كده بتلقيهم عارفين ليهم حاجة حاجتين من طرف
ثم تشعبطوا في الشغلانة (والغريبة الزي ده دائما بكون مكابر وكضاب وقلبو كسواد الليل)
وكل الود
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
إيمان ســـــــاله
لك تحياتي
انا ما عارف بس بحثك
500% من البكتبو هنا وفي التلفزيون من غير الناطقين بالعربية
يعني اتعلموا العربي في المدارس "قسراً" جلد في حصة الاملاء
وفي الأقل "توبيخ"
والفرق بين المؤنث والمذكر ما بنفرزو الا في الزريبة
الغنماية ما عرفنا جمعها غنم .. وغنم دي مذكر ولا مؤنث
ياستي لي هسع ما عارفين!!!
كلو عند العرب "صابون"
" بردو" ما عارف وبحدثك
وكل سنة والقابلة طيبة
التاء دي كدا ولا مفروض "هـ"
شفتي المحن دي كيف!!!
أبوالشوش
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Hussein Mallasi)
|
_____________________
الأخت : إيمان صالح
كل سنة وأنت طيبة والأسرة الكريمة بألف خير
جزء من بحث الماجستير بتاعي كان بيتناول حاجة اسمها اللغة العقلية، أنا حجيب ليك مختصر هذا الجزء المنشور في مكان آخر وأتمنى إنو الرأي ده يكون فيهو إجابة شافية عن تساؤلاتك:
" اللغة العقلية مرتبطة بالفهم العقلي للغة عند أفراد هذه الجماعات الثقافية، لذا نجد أن أجناس بشرية مثل سكان الأمريكيتين وأوروبا مثلاً لا يستطيعون نطق بعض الأحرف العربية مثل: الحاء والعين والضاد وكذلك الحال بالنسبة لبقية الشعوب الأخرى إزاء لغات أو أصوات محددة في لغات أخرى. وبالتالي فإن الصوت الحرفي في مجتمع ما لا يمكن تعلّمه بل يتم ترسيخه في العقل. لأن نطق الأصوات اللغوية لا يتأتى فقط من مجرّد تحريك اللسان وحركات الشفاه والمراكز الصوتية.
وفي الأساطير المتعلقة بالديانة الهندوسية مثلاً يقال أن أول صوت أزلي هو ( أوم ) وهو صوت الإله أو الصوت الصادر مباشرة من الإله، ويقال أن جميع شعوب العالم قادرة على نطق هذا الصوت دون استثناء لأنها مرتبطة بالإله. وبمعنى آخر فإنها مرتبطة بالعاطفة الدينية وهو الأمر الذي يعـزز دعمها على المستوى العقلي الأمر الذي يمس وبصورة مباشرة مبحث دراستي حول اللغة الدينية
ونطق السودانيين لحرف (صوت) القاف غيناً (مثلاً) فهو مرتبط مباشرة بالعقل وليس باللسان، بدليل أن هنالك بعض النماذج السودانية التي يمكنها التفريق بين صوت العين والقاف بسهولة سواء في النطق أو حتى في الرسم (الكتابة) وعلى هذا فإن علاج هذه الحالات لا يكون بالمحاضرات أو التصحيحات اللغوية والإملائية التي تتم في المنبر كما نجد بل تتم عن طريق ما يمكن أن نسميه (التوجيه اللغوي الاجتماعي) وهذا بابه واسع ويحتاج إلى توافر إمكانيات مادية وكوادر بشرية متمرسة. وحتى إذا توفرت هذه الإمكانيات المادية والبشرية فإننا سوف نكون متفائلين جداً إذا توقعنا تغييراً على مدىً قصير أو قريب ، إذ أن هذا الأمر يتطلب وقتاً طويلاً، فعملية الإحالة العقلية لصوت بدلاً عن صوتٍ آخر ليست عملية سهلة على الإطلاق."
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: هشام آدم)
|
اختنا العزيزة إيمان كل سنة وانتِ طيبة وكل من تحبين .
عليك الله يا إيمان اكان لقيتي لي غلطة إملائية كلميني !!!
مرات الناس بتكون مستعجلة ومرات مفتاح الكي بورد ما بيشتغل
ومرات كمان الإنفعال بخلي الواحد ما يركز .
لكن الناس إعتادت علي كده والتصحيح يتم تلقائي .
لكن من هسع دي نشد حيلنا ونركز كويس .
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: هاشم أحمد خلف الله)
|
مرات الناس بتكون مستعجلة ومرات مفتاح الكي بورد ما بيشتغل
ومرات كمان الإنفعال بخلي الواحد ما يركز
ازيك يا هاشم ياخوي
وكل سنة وانت طيب
لا ياخوي
القصة قصة عدم عرفة
ما قصة استعجال وعدم تركيز
والعفو
انا ما قاصدة افتش غلط الناس
ولا اصحح غلطاتهم
انا بس بتساءل
عشان جد محتارة وحاة النبي
الناس جننونا بالنفخ والتطبيل
الشاعر الكبير
الصحفية الناجحة
الشنو داك ما بعرفه
وتجي تلقى الشاعر الكبير ده
ما عارف الجنية من الجنيه
وكلهم عنده جنيه
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: هشام آدم)
|
وعلى هذا فإن علاج هذه الحالات لا يكون بالمحاضرات أو التصحيحات اللغوية والإملائية التي تتم في المنبر كما نجد بل تتم عن طريق ما يمكن أن نسميه (التوجيه اللغوي الاجتماعي) وهذا بابه واسع ويحتاج إلى توافر إمكانيات مادية وكوادر بشرية متمرسة
هشام ياخوي كل سنة وانت طيب
نان كلامك ده بينطبق على كل الناس؟
حتى المتخصصين؟
اها الشعراء والصحفيين ديل
ما مفروض يكونوا عارفين الفرق بين الزكريات والذكريات؟
وكان قلنا الزين هي الفي البال
المذيد دي تطلع شنو؟
وكان ديل ما عارفين
المخليهم شابكيننا الشاعر والجاعر شنو؟
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: هشام آدم)
|
إيمان كل سنة وإنتى طيبة وسالمة وغانمة
زى القاصدانى أنا بالـ الذال والزين
يختى نحنا هنا تلاتة "كاتوقرى"
كتاب "أدباء .. وصحفيين"
شعراء
وبوردااااااب ... يعنى بنبردب ساااكت .. شى سياسة .. ورياضة .. و "إستمتاع بالأدب"
وكتابة الشكل .. أريتا بقت فى الـ ذال والزين
يعمل .. تبقى يمعل .. والصلاحية تبقى سلاحية .. وعييييك
أعملى نايمة
أها زول زى هشام آدم بى ماجستيرو الليل العربى .. لابدين ليه إتنين .. لكن عافى منو
أرقدى عافية
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
____________________
Quote: نان كلامك ده بينطبق على كل الناس؟
حتى المتخصصين؟
اها الشعراء والصحفيين ديل
ما مفروض يكونوا عارفين الفرق بين الزكريات والذكريات؟ |
ما قلنا إنو الموضوع ما عندو علاقة باللغة وبالعلم والدرجة الأكاديمية يا إيمان، الموضوع اجتماعي في مقامو الأول يعني ناس قاعدة تكتب زي ما قاعدة تتكلّم، أها كان الكلام اتعدل بتتعدل الكتابة طوّالي. وبعدين عليك الله يا إيمان زولاً من قام وهو بينطق ال(ذ) (ز) وينطق ال(ق) (غ) أها دا دايراهو يكتبن كيف؟ علّ يقوم يتخصص في علم اللغويات ويعرف مخارج الأصوات والكلمات. ويفهم ميكانيكية النطق دي بي طريقة علمية صحيحة. ما ممكن نطالب الناس دي كلها إنهم يعرفوا المسألة دي، مش؟ أنا معاكِ إنو الشغلة تمغس، بس اللغة يا إيمان مما بدت تتحوّل من لغة إلى لهجات محكية، وهي ضايعة، يعني حسي عليك الله كلمة (ضايعة) دي بتتكتب كده؟ وفي كلمة في اللغة العربية اسمها (نان) زيّ اللي انت كاتباها فوق دي؟ هي الشغلة وقفت على ال(ذ) وال(ز)؟
خليها على الله بس
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: هشام آدم)
|
ايمان كل سنة وانت طيبة
انا الشاغلني كمان يا ايمان ادعاء المعرفة
اكثر من المتخصصين احيانا
Quote: هل ممكن دكتور وتخصصه طب يكون ما بيعرف الفرق بين الصداع ووجع الكراع؟
هل ممكن سواق تخصصه سواقة يكون ما بيعرف التعشيقة من الدركسون؟
هل ممكن فنان تخصصه غناء وموسيقى يكون ما بيعرف الكمنجة من العود؟
هل ممكن شاعر تخصصه كتابة ولغة وحروف ما يكون بيعرف الفرق بين الذال والزين؟
هل ممكن صحفي وكاتب تخصصه كتابة ما يكون عارف الهاء الفي آخر الكلمة من التاء المربوطة؟ |
فتجد الصحفي مثلا بيعرف الطب عندنا هنا اكثر من الطبيب ومستعد يعلمه كمان
وتجد النقلتي عندنا بدي السواق دروس في استخدام التعشيقة
وتجد السواق يشرح للفنان انواع السلم الموسيقي ويغلطه كمان
وهكذا
القاب بدون استحقاق
وادعاء معرفة اكثر من صاحب التخصص
سبحان الله
وتسلمي كمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Waly Eldin Elfakey)
|
فتجد الصحفي مثلا بيعرف الطب عندنا هنا اكثر من الطبيب ومستعد يعلمه كمان
وتجد النقلتي عندنا بدي السواق دروس في استخدام التعشيقة
وتجد السواق يشرح للفنان انواع السلم الموسيقي ويغلطه كمان
وهكذا
القاب بدون استحقاق
وادعاء معرفة اكثر من صاحب التخصص
سبحان الله
والي الدين كل سنة وانت طيب
اها وحاة النبي الادعاء ده كمان بيفرس اكتر من عدم المعرفة
والطنقعة المع عدم المعرفة
الواحد لا بيعرف ولا عاوز يعرف
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: هشام آدم)
|
يا هشام ادم ياخوي الرسول فوقك تفهمني
انا ما قاصدة الكلام العام
وكتابة الونسة
انا بتكلم عن البيكتب موضوع صحفي في جريدة
ولا قصيدة بالفصحى
ويكتب ليك الزكريات
الكلام العام ده ما شغالة بيه انا
انا بتكلم عن مشكلة عدم المعرفة ذاتها
من زول مفترض يكون ده مجاله
ويكون عارف ذركيات دي بتتكتب كيف
مهما كان نطقها في مجتمعه
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: نادية عثمان)
|
قد يخطئ ويكتبها هكذا (زكريات) كما اخطأتى وكتبتيها(ذركيات) بتحصل عادى يعنى !!
نادية عثمان
عيدك اسعد ان شاء الله
وكل سنة وانتي طيبة وسعيدة
يا نادية يا بت امي افهميني
افهموني ياخواني
انا ما قاصدة الغلط يا جماعة الله
انا قاصدة عدم المعرفة
البيغلط ده يا نادية
ما بيغلط في كل كتاباته للكلمة دي
ما ممكن يغلط في كل مرة يكتب فيها الكلمة دي اكتر من خمسين مرة
عاد اصله ده غلط شنو المعلق وما بيفك اصله ده؟
هسه انتي كتبتي الياء الفي آخر الكلمة كلها غلط في كل المرات هنا
(أخطأتى وعادى ويعنى وتسلمى)
اها دي معقول تكون صدفة؟
دي معناها تعويدة ما غلطة لسهو
اها نحن بنناقش التعود على الكتابة الخاطئة ده
هل قاعد يتعمل بعدم معرفة
ولا باهمال
اها يعني زي اهمال دي انا ما عارفة يعني فيها همزة ولا لا؟
ده الاهمال
لكن الاهمال ده ما مفروض يجي في الكتابة التخصصية
يعني هنا ولا في ضحك ولا ونسة مقبول
لكن ما ممكن في كتاب ولا خبر ولا قصيدة يكون مقبول
وتسلمي انتي يا الظريفة ولطيفة
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
ايمان بت امى جيتك تانى ومنكم نستفيد ياحبيبة
Quote: هسه انتي كتبتي الياء الفي آخر الكلمة كلها غلط في كل المرات هنا
(أخطأتى وعادى ويعنى وتسلمى)
اها دي معقول تكون صدفة؟
دي معناها تعويدة ما غلطة لسهو
اها نحن بنناقش التعود على الكتابة الخاطئة ده
هل قاعد يتعمل بعدم معرفة
ولا باهمال |
والله ممكن تقولي صدفة على حبة اهمال على شوية تعوّد قولى لى كيف ؟!!
اقول ليك
مثلا فى الكى بورد ده فى تلاتة يايات(ى وي وئ) اهاانا ماحافظة مكانهم كلهم والبتجى تحت يدى لما اكون دايرة اكتب ياء بكتبها ده بالنسبة للمنبر طبعا لكن فى الجريدة فى مصحح لغوي طبعا .. اها هنا ممكن تسميه تعود او اهمال او مرات صدفة والله !!
لكن انا عاجبانى غيرتك على اللغة العربية وجميل انو نتعلم منك البتعرفيهو ويبقي الامر انه فوق كل ذي علم عليم ونحنا هنا برضو بنتعلم ويسعدنى التعلم منك سيدتى ..
| Quote: لكن ما ممكن في كتاب ولا خبر ولا قصيدة يكون مقبول |
طبعا معاك الف حق فى دى وعشان كده رغم التدقيق فى دواوينى قبل اخراجها فى شكلها النهائي وطباعتها برضو بديها لمصحح لغوى لمراجعتها
واسمحى لي بأن امدد اقامتى هنا للاستفادة والتزوّد بالمعرفة .
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: نادية عثمان)
|
لكن انا عاجبانى غيرتك على اللغة العربية وجميل انو نتعلم منك البتعرفيهو ويبقي الامر انه فوق كل ذي علم عليم ونحنا هنا برضو بنتعلم ويسعدنى التعلم منك سيدتى ..
وووووووووووب علي يا نادية
غيرة شنو يا بت امي
وتتعلمي مني شنو؟
انا ياختي من ناس قريعتي راحت
ووحاة النبي العربي ده جني وجنه
وكان خلونا علي النوبي والمحسي والدنقلاوي والدينكاوي والهدندوي والبجاوي والزغاوي كان حالنا انستر ياختي
انا في الفلسفة والطنقعة والتطبيل
وشابكيننا العملاق والمتالق والمتنفش
وهو يخربه
لا عربي لا دين
جعجعة وانفتاحة فارغة
والناس البيعرفوا ماسكين خمشهم عندهم ورايقين وهاجعين في واطاة الله
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
Quote: وووووووووووب علي يا نادية
غيرة شنو يا بت امي
وتتعلمي مني شنو؟ |
كل زول فينا أكيد عندو الماعند غيرو وانتى لو مازعلتك الكتابة الخطأ للعربية ماكان فتحتى ليها بوست كامل يبقى قريعتك راحت كيف ياخ بطلى تواضع العلماء ده  
| Quote: وكان خلونا علي النوبي والمحسي والدنقلاوي والدينكاوي والهدندوي والبجاوي والزغاوي كان حالنا انستر ياختي |
انا بعرف أرطن حبة انتى بتعرفى عشان نفكنا من العربى ده على قولك ؟
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
بري يا بت امي
ما بعرفها طفشت وين
قدر ما عاينت ليها جاي جاي ما لقيتها
بالنسبة للقريعة انا شفتها قبيل تحت عنقريب حبوبة بتول فى الراكوبة البي قادى اجيبها ليك ؟ (وجه ضاحك ابا يطلع من الايقونات) !!
وبالنسبة للغة ال(نوبقولاوسي)؟
ااااي بالحيل بعرف اسويها اها رأيك شنو ..قولي وانا أقول وجه (كيف كيف) !!
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: نادية عثمان)
|
بالنسبة للقريعة انا شفتها قبيل تحت عنقريب حبوبة بتول فى الراكوبة
وبالنسبة للغة ال(نوبقولاوسي)؟
ااااي بالحيل بعرف اسويها اها رأيك شنو ..قولي وانا أقول وجه (كيف كيف) !!
عاد الليلة الله يستر
الولية المخرفة دي ما تختها تحت عنقريبها للتفاف
سمح اها ميس كونقولي
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
ايمونة
Quote: عاد الليلة الله يستر
الولية المخرفة دي ما تختها تحت عنقريبها للتفاف |
كدي صحي بما انو البوست ده للاستفادة والتثقيف من كل نوع دايرة أسالك ليه الحبوبات السودانيات فى كل مكان بكون عندهم (علبة تفاف) وهل هى عادة سودانية بس ولا فى ثقافات غيرنا من الشعوب برضو موجودة؟
| Quote: سمح اها ميس كونقولي |
كبو شديد ان هال مندي
لقيتيني كيف فى اللغات الميس كونقولية
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
السلام عليكم
الأخ هشام آدم
كل سنة وأنت طيب
خلصت في بحثك الى هذه النتيجة
| Quote: فإننا سوف نكون متفائلين جداً إذا توقعنا تغييراً على مدىً قصير أو قريب ، إذ أن هذا الأمر يتطلب وقتاً طويلاً، فعملية الإحالة العقلية لصوت بدلاً عن صوتٍ آخر ليست عملية سهلة على الإطلاق." |
ليس لي في هذه العجالة أن أحكم على بحثك
ولكن التطبيق أثبت أن الصعوبة التي تقول بها ليست موجودة على أرض الواقع
فالمغتربين في دول الخليج وبعد عدة سنوات من التعامل مع العرب الآخرين – خاصة لو عملوا في بيئة معظم زملائهم مواطنين عرب - يتعلمون التفريق بين الثاء والسين وستلاحظ وسترى لسانهم خارجاً بكل سلاسة حين نطق الثاء.
ربما في موقف انفعالي معين يستدعي العقل الباطن يرجعون لأصل نطقهم الخطأ
ولكنها في غالب الأحيان تأتي صحيحة حتى تكاد تكون طبيعية
......
تحياتي لصاحبة البوست وكل سنة وأنت طيبة
.............................
وما الناس إلا هالك وأبن هالك *** وذو نسب في الهالكين عريق
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
الاخـت إيـمان صـالح
عـيد مـبارك عـليك وكـل سـنة وانـت طـيبة.
اظـن انوا الـحكاية كـلها مـرتبطة بالـعامية وتأثيراتها عـلى كـتابتنا. فـعاميتنا مـتأثرة بـشكل كـبير بلـغات الـسودان الاصـلية مـثل الـنوبية وغـيرها..
انا طـبعا مـا مـتخصص ولا حـاجة لـكن الـعامية الـسودانية لاتـظهر فـرق واضـح فـي نـطق بـعض الاحـرف مـثل :
الـثاء والـسين
الـذال والـزاي
وابدال الـقاف لـ Ga.
يـعني اي زولة اسـمها ثـريا بـناديها سـريا واي عـثمان عـسمان والـعجب بالانـكليزي يـقول لـيك سـانكيو لـ ثـاكنيو.
الذال بـنقلبها لزاي مـثل ذنـب بـنقولها زنب، إعـتذار بـننطقه إعتـزار وعـشان كـدة بـتجوط الـقصة فـي الكـتابة.
وفـي الاصـل كـلنا عـجم مـتعربنين سـاكت
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
إزيك يا إيمان وكل عام وإنت وأسرتك بألف خير
ذكرتيني كلام قريته زمان لنزار قباني في نثرياته عن اللغة العربية وأعتقد أنه كلام نزار دا ممكن يفك حيرتك وحيرتنا كلنا! نزار قال ...
"أول ما شغل بالي حين بدأت أكتب ، هو اللغة التي أكتب بها. وبالطبع ، كانت هناك لغة ، بل لغة عظيمة ذات إمكانيات وقدرات هائلة. لكن اللغويّين فرضوا عليها إحتكاراً رهيباً وأقفلوا عليها الأبواب ومنعوها من الإختلاط والخروج إلى الشارع. كانت اللغة (أملاكاً خصوصية) ، واللغويون (جمعية منتفعين) ، وكانت الفتوى بشرعية كلمة أو تعريب مصطلح علمي أو تقني ، تستغرق المجامع اللغوية ثلاث سنوات من التنجيم والإستخارات .. والألوف من كؤوس الشاي ومحلول البابونج ..
إلى جانب هذه اللغة المتعجرفة التي لم تكن تسمح لأحد أن يرفع الكلفة معها ، كانت اللغة العامية تقف في الطرف الآخر ، نشيطة متحركة ، مشتبكة بأعصاب الناس وتفاصيل حياتهم اليومية. بين هاتين اللغتين كانت الجسور مقطوعة تماماً. لا هذه تتنازل عن كبريائها لتلك ، ولا تلك تجرؤ على طرق باب الأولى والدخول في حوار معها. ومن هنا كنا نشعر بغربة لغوية عجيبة ، بين لغة نتكلمها في البيت ، وفي الشارع ، وفي المقهى ، ولغة نكتب بها فروضنا المدرسية ، ونستمع بها إلى محاضرات أساتذتنا .. ونقدم بها إمتحاناتنا..
فالعربي يقرأ ويكتب ويؤلف ويحاضر بلغة ، ويغني ، ويروي النكات ، ويتشاجر ، ويداعب أطفاله ، ويتغزل بعيني حبيبته بلغة ثانية" .. إنتهى كلام نزار
أعتقد أن اللغة التي نستخدمها الآن هي لغة ثالثة أو مزيج من تلك اللغتين التي تحدث عنهما نزار .. ما نذار
يديك العافية
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Amir Omer)
|
هي يا امير
كل سنة وانت طيب
والسنة الجاية ان شاء الله شعرك قايم ومسرح
بسسسسسس جيتني في القاصداه
اها شفت كلام نزار
حق العربي يقرأ ويكتب ويؤلف ويحاضر بلغة ، ويغني ، ويروي النكات ، ويتشاجر ، ويداعب أطفاله ، ويتغزل بعيني حبيبته بلغة ثانية ده؟
اها انا قاصدة البيكتبوا ويؤلفوا ويحاضروا ديل
شعراء وصحفيين وادباء وكتاب وفطاحلة وكواهلة وبرنو
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
اولا كدي نقول ليك كل سنه وانت طيبه
تانيا مسألة اللغه دي عندي علاقه كبيرة بالتكوين الفكري والاجتماعي للفرد
اذا كان هناك مخرج مثلا لا يعي ولا يفهم اللغه المكتوب بها النص فحتما ستواجهه اشكالية عدم التفسير وتقديم العرض المطلوب.وبذلك يكون العرض وان تم عرضه ...باهتا ورتيب
اما اذا كان شعرا لا يعي لغته فلا يمكننا ان نطلق عليه شاعرا
وان كان مثقفا لا يعرف كيف التعامل مع اللغه فان كلامه سيكون مبتورا وغير منطقي في حواراته كمثقف
الصحفي وهو من اخطرهم فان لم يكن يعرف كيف يتعامل مع اللغة فأنه سيساهم في تربية مجتمعية خاطئة ايضا
اذن لا بد من الفهم الصحيح للغه
ويسلام علي الشيخ البرعي عندما كتب:
علم النحو والاعراب...
هيا بينا ياطلاب...
لا يفوتنا اول باب ..
من كلامنا العربي...علم النحو والاعراب لغة المصطفي العربي
وتري كيف تحدث بلغة بسيط غير معقدة وكيف احببناها
المذكر السالم
والمؤنث السالم
والمجرور
والمبتدأ
يا ســــــــــــــــــــــــــــــــــلام
(هسه خليتنا نكتب في حذر شديد عشان مانغلط كمان في همذاء ولا تاء مربوته ولاء ث ثمك او د درابه )
عليش
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: الطيب برير يوسف)
|
آمل أن تستوعب قيمة الشموس
ومعنى الضوء
دون حرج أو (تحسس)
يمكن لهذا المقام أن يعلو شامخًا متى ما تخلّص من ظنون (التّقصّد) وعوالق (التّربّص)
استاذنا المقتدر المتمكن الطيب برير
عيدك طيب وسعيد يا يابا
اريتهم يا يابا المنفتحين ومتشعلقين في الشعر والكتابة كان زيك
كان الحال انستر
وكان بقت لينا قيمة جد ما نقة فارغة
وما في تحسس في العلم والاستفسار والتقويم
وانت سيد العارفين
يا سيد القلم الرصين
وبزيارتك بيتنا نور
واريتك يا الطيب الطيب طيب
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
الاخت العزيزة ايمان
تحية طيبة وسلام
وكل عام وانتي بالف خير وعافية
المسالة فعلا شائعة وصارت شبه عمومية للاسف
وافتكر الحل انو نعود نفسنا لما نكتب ونراجعه اولا
واذا عرفنا سبب المشكلة او الكلمات الممكن تكون هي
المشكلة فاكيد بنخلي بالنا منها وبقدر المستطاع بندرب نفسنا
وبتكون في حساسية او منبه داخلي بنبهنا ليها
ولما نتعود بنلقى فعلا الكلمات دي لما تتكتب غلط (بتضرسنا)
مثلا رغم اشاعة او مشاعية الخطأ في قول الكثير(شكرا يا زوق) بغيرذوق
و(انشاء الله) انشاء وليس مشيئة و (معزرة ) بغير معذرة وغيرها من الاخطاء الشائعة
نجد انها مزعجة وبتدريب انفسنا مممكن ان نتلافاها وبسهولة
ودي وتحياتي وشكرا لي البوست ودمه الشربات
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: الطيب برير يوسف)
|
استاذنا الطيب برير
سلامات وعيدك مبارك
Quote: شكرًا لهذه النّافذة
آمل أن تستوعب قيمة الشموس
ومعنى الضوء
دون حرج أو (تحسس)
يمكن لهذا المقام أن يعلو شامخًا متى ما تخلّص من ظنون (التّقصّد) وعوالق (التّربّص) |
نعم شكرا لنافذة الأستاذة ايمان المفيدة بكل تأكيد
وشكرا لكلماتك الحكيمات عاليه ..
وارجو أن تكون رسالتي فى الخاص قد وصلتك ؟!!
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
Quote: اها انا قاصدة البيكتبوا ويؤلفوا ويحاضروا ديل
شعراء وصحفيين وادباء وكتاب وفطاحلة وكواهلة وبرنو |
إزيك تاني يا إيمان
البكتبوا وبحاضروا ديل أنفسهم جزء من الصراع اللغوي اللي ذكرته
ليك في المداخلة الأولى. اللغة في المقام الأول ممارسة أكثر من كونها
قواعد مُتبّعة وبلاغة وجناس وطباق ...الخ!
كوننا نتحدث بلغتين (لغة الكتب ولغة الشارع) فهذه مشكلة تدعوا للتشويش
لأن معظم المخزون اللغوي سيبقى (سماعي) ويترسخ سماعياً! كما ذكر الزووول في
مداخلة أعلاه أن السوداني لما يمشي الخليج بعد فترة ببدأ يستخدم الثاء والذال
بصورة طبيعية(لكن) في لحظة الإنفعال بتطلع الثاء (سين) والذال (زاي) لأن
الطبع يغلب التطبع ، والطبع هنا هو اللهجة وليس اللغة!
أعود وأكرر أن الموضوع ليس له علاقة بالتعليم والدرجات العلمية الرفيعة بقدر ما هو
مرتبط (بعادات الكتابة) وتجويد ما نكتب!
بالمناسبة ، الخطأ وارد من الصيدلي والطبيب والمحامي كما هو
وارد من اللغوي. وأتذكر أننا في كلية الصيدلة درسنا فصل كامل عن أخطاء الوصفات
الطبية وكيفية معالجتها! ما عارف أكون وصلتك ليك الفكرة ولا طينتها زيادة؟!
مودتي
أمير
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Amir Omer)
|
ما عارف أكون وصلتك ليك الفكرة ولا طينتها زيادة؟!
يا يابا طينتها طين السواد والرماد
حسي بس النسالك مثلا
حسين ملاسي الحي وقاعد قدامك ده
ورجاء العباسي
وناس تانيين
امشي شوفهم واقرا كلامهم
شوفهم بيكتبوا غلط
ولا بيغلطوا في تهجية
مالهم باقي الناس الليهم علاقة باللغة وبالكتابة كتخصص
مالهم سايطين وجايطين؟
بعدين يا امير ياخوي
الموضوع ما موضوع التعود
الموضوع موضوع عدم العرفة
انا وحاة النبي بغالط لي في كم زول شهور
في قصة الهاء الفي اخر الكلمة وبين التاء المربوطة
ناس مدرسه ودوله ومدينه وقريه وقاره وبحيره وجزيره
احي عليك النبي خليني بس
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: عواطف ادريس اسماعيل)
|
الأخ هشـام أدم،
الموضوع دا ياخى بسيط.. الناس ما غالبهـا تنطق الغين واللا القاف، أو الزاى والذال،
لكن المشكلـة فى اللخبطـة.. يعنى هم قادرين ينطقوا الحرفين ما فى مشكلـة فى دى،
لكن المشكلـة فى أنهم يختوا دا محل دا. يعنى فى الصلاة بيقولوا "قل أعوذ برب الفلق"
وليس غل أعوذ.. لكن فى مواقف أخرى يلخبطوا.. بعدين المشكلـة برضو مافى النطق، حتى
من ينطق خطأ المفروض يكتب الحرف الصحيح.. يعنى المصريون يقولون (أل) لكن يكتبونهـا
صحيحـة "قال".. لكن ترى من يكتب فى المنبـر "الذمن الزى مضى"، هـذه هى المشكلـة
المطروحـة. فهـذا إذا ليس له علاقـة بالحبال الصوتيـة، لأن الموضوع كتابـة وليس
قراءة.
ســؤال جانبى يا دكتور (فى الطـوة):
هل باب الإجتهـاد فى قواعـد النحو فى اللغـة العربيـة قفل أم ما زال مفتوحـاً؟
أسـأل هـذا الســؤال لأنى قمت بتحليل بعض الكلمـات العربيـة وخرجت بنتائج أريـد
أن أستوثق من أنهـا لم يتطرق اليهـا أخرون من قبل.
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Abureesh)
|
بعدين المشكلـة برضو مافى النطق، حتى
من ينطق خطأ المفروض يكتب الحرف الصحيح.. يعنى المصريون يقولون (أل) لكن يكتبونهـا
صحيحـة "قال".. لكن ترى من يكتب فى المنبـر "الذمن الزى مضى"، هـذه هى المشكلـة
المطروحـة. فهـذا إذا ليس له علاقـة بالحبال الصوتيـة، لأن الموضوع كتابـة وليس
قراءة.
وحاة النبي ريحتني يا ابو الريش
ووصلت لي كلامي زي ما هو
من قبيل انا الت واعجن مع هشام ده
كل سنة وانت طيب ياخوي
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Nasr)
|
ما سمعتي كم واحد سقطوا في إمتحان قيد الصحفيين، والخارجية؟؟؟
نحن أبناء بخت الرضا(والتي يقال أنها كانت من أفضل معاهد تأهيل المعلمين في العالم) وديل أولاد شنو ما عارف
كل ضحية وانت طيب يا نصر
سمعت بيهم السقطوا في امتحان قيد الصحفيين
لكن نعلهم بس ياهم ناس الصحفي الهمام والشاعر ابو عرام؟
انتم ابناء بخت الرضا
وديك اولاد التاباني
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
يا أخى أمين عمـر،
ياخ كلمـة "ذمن" لتعنى (زمن)، هـذه ليست كلمـة لغـة كتب ولا لغـة شـوارع.. هـذه
مسـخ للإثنين معـا.. يمكن أن تعذر من يكتب بالعامـية، مثلا يمكن تقول:
"ود اللزين زهجان" ولكن لا يمكن أن تقول "ود اللزين ذهجـان"
أرجو التنبـه الى المشكلـة المطروحـة، فهى ليست عامية ضـد فصحى.. وإنما هى مشكلة
من نوع يحيـر فعلاً.. لا هـذا ولا ذاك.. بح فى النص.
لو قلت يمكن ديل حناكيش، لكن تلقى الكثيرين منهم دراب.. ناس أنتقورمـو، وناس
مرقنبو قرنبو!
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Abureesh)
|
أرجو التنبـه الى المشكلـة المطروحـة، فهى ليست عامية ضـد فصحى.. وإنما هى مشكلة
من نوع يحيـر فعلاً.. لا هـذا ولا ذاك.. بح فى النص.
لو قلت يمكن ديل حناكيش، لكن تلقى الكثيرين منهم دراب.. ناس أنتقورمـو، وناس
مرقنبو قرنبو!
الليلة عاد ابو ريش عافية منك قايم على الناس قومة السواد
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Ishraga Mustafa)
|
إيمان ازيك يابتاعة المريخ كل سنة وإنتى طيبة ومريخك منتصر باذن واحد احد !!
الليلة عاد ياخواني شفتوا السوتها ام واصل؟
سويتيه الليلة مريخي؟
وكمان بدعواتك؟
انتي يا يمة خوتك خوة التابى الوليدات لي حدهم
انا حسي دا ما انقرش بي وراء الهلال
مالك ياختي غبيانة؟
حسي انا شبهي ده شبه مريخ الرسول فوقك؟
اجي معاكن وين بعد ده عاد؟
ما طايرة
امشن سيبني في سجمي ده
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
وووووووب على يا ايمان انتى براااااااك عارفانى مابتاعة كورة وحاتك فارقتها من زمن الطفولة ومن يوم حبوبتنا الداقين ليها شلفوتها دى قالت لى هووووووووى يابت انقرعى وماتلعبى مع الوليدات...
حسع عليك الله الدق ده مش بيتناغم* مع {الشلوفة} دى - حسع النبى فيك دقينها مالها مايخلوها زى مالله خلقها يابت امى الهلابيبة.. اها كمان قولى لا حسع اوديك المورده!!
* يتناغم دى غايتو ده مامحلها لكن بس عشان رضاك!!
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
الأخت إيمان
كل سنة وانت طيبة
انا اتفق معك تماما في الكلام البتقولي فيه دا لانه مثلا الصحفي والشاعر إذا كان ما بيقدر يفرق بين (ذ) و(ز) وبين (هـ) و (ة) وبين (ق) و (غ) ... الخ في كتاباته يخلي القارئ العادي في حيرة وشك وإحتمال يفتكر الخيارين صحيح خاصة في حالة (هـ) و (ة) وفي (ي) و (ى) لذا يجب على الشغلانيتهم الكتابة ذي الصحفيين والشعراء ان يكتبوها بطريقة صحيحة
وتحياتي
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: محمد علي آدم)
|
الأخت العزيزة إيمـان،
زمان الواحـد فينـا لما ينسى يخت الهمزة فوق الألف، فى حصـة الإملاء، تكون مشكلتو
كبيـرة! يعنى لو كتبتى "راى" بدل "رأى"، دى طوالى تحتهـا خط بالقلم الأحمـر (قلم
التصحيـح).. يعنى الكلمـة كتبت غلط.. يعنى خسـارة 10% (واحد من عشـرة).
وزى ما نسبـو لحمـودة (رحمـه الله)، زمان الطالب كانت عنده هيبـة، ذكاء وقاد
ومعرفـة دقيقـة بكل ما يدرس له.. لكن طلبـة الزمن دا بقـو فطاحلـة سـاكت!!
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: محمد علي آدم)
|
انا اتفق معك تماما في الكلام البتقولي فيه دا لانه مثلا الصحفي والشاعر إذا كان ما بيقدر يفرق بين (ذ) و(ز) وبين (هـ) و (ة) وبين (ق) و (غ) ... الخ في كتاباته يخلي القارئ العادي في حيرة وشك
محمد علي كل سنة وانت طيب
شك كبير ياخوي
شككوني في روحي ديل
يعني بكلامك ده كلمة تذويقية ديل يسووها تزويغيه
تبقى اسم فرنسي عديل
ايمان
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
أستاذة إيمان
تحياتي
(شفتي الهمزات دي كيف؟)
قلتى اكتبو بالمحسي والدنقلاوي)
أها جاكي ود جبريل بالشايقي
خمي وصري
هوي يالمطموس ديل نحن ما معاهم
خليك بعيد زيي ما يجيك الرشاش
(الراء فوقها شدة والشين ساكنة)
ما تودونا في داهية
(عشان كدي كتبت قصة صبي المونة بي لغة المكنيكية دابي عرفت ما "خلست"ليه..
أبوالشوش
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: إيمان صالح)
|
Quote: هوي يالمطموس ديل نحن ما معاهم
خليك بعيد زيي ما يجيك الرشاش
(الراء فوقها شدة والشين ساكنة)
ما تودونا في داهية
(عشان كدي كتبت قصة صبي المونة بي لغة المكنيكية دابي عرفت ما "خلست"ليه..
أبوالشوش |
ابو الشوش يا حبيب
انا عار نفسي ما منهم
يا زول هوي نحن ناس مطاميس ساكت
ناس طلب وبنايين ساكت
وكرهتي في الدنيا كانت نائب الفاعل دة
وزي ما قال كيكي نحن يا زول جربندية ساكت
ووكتين الناس الفاهمين هنا يتكلموا
جملة الايمان نقهي جنس قهيا
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Hussein Mallasi)
|
الأخة العذيذة اللزيزة إيمان صالح
صدقيني أنا لو بتفرج في التلفزيون وما شفت وسمعت جلطة كبيرة بتجيني أنا جلطة وبحس إنو الدنيا غلط .. يظهر نحن خلاص أدمنا
يعني لو ما سمعت المذيع بدل غانا قال قانا وبدل قانا قال غانا بحس إنو خريطة العالم ما واضحة وما بفرز إسرائيل من كرة القدم
وبستمتع جداً لما الدراما تتصاعد في كلمات مثل.. غرق .. غلق .. غسق..
أما مشكلة ال ز وال ذ فما بستمتع بيها كلو كلو لأني ما بفرزهم!
يظهر انهم تخصص دقيق..
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: nourelhadi awad)
|
Quote: وووووووووووب علي يا ابو ريش
انت ياخوي من زمن حمودة العركي حلاق الجامعة؟
سجم خشمنا
ايمان |
إيمـان،
عارفـة، انتى الوحيـدة الداير أستثنيهـا من قاعدتى فى هـذا المنبـر.. ولكن بالرغم
من دا، برضـو ما حأرد على تعليقك دا، لكن كلمـة واحـدة (بث)
ما تزعلى سمح؟
غايتـو..
طريقـة كلامك دى كانت شـايعـة زمان.
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: Abureesh)
|
الأخت العزيزة ناديـة،
دى لغـة سـودانيـة بحتة..
لو عاوزة شـرح على أتـم استعداد.
1- أنتقورمو = أضربه أرميه. و يستعمل هـذا التعبيـر فى ديار الشايقيـة
2- مرقنبوقرنبو = خرجن به ليقرأن كتبهن عليه! ويقال أنه كان لأحدى طالبات
الجامعـة عنقريباً عجيباً، أرجله من الســلم، ومروقه من الصندل.. وكانت صديقاتهـا
يزرنهـا للتمتـع برائحـة الصندل المنبعثـة من هـذا العنقريب.. فطلبت إثنتان من
صديقاتهـا منهـا يومـا أن تعطيهمـا العنقريب ليخرجن به الى الحوش، حتى يذاكرن
فى جو هـادئ استعدادا لإمتحانات الأدب الإنجليزى التى ستقام غـداً، فأذنت لهما،
فأخذتا العنقريب الى الخارج.. وبعـد سـاعـة من الزمان، زارتهـا صديقـة أخرى
وبسـرعـة سـألتهـا عن العنقريب، فردت عليهـا، شـالنو مرقنبوقرنبو
| |
|
|
|
|
|
|
|
|
|
Re: العارف يجاوبني بالجد كدي وحاة النبي جد محتارة (Re: خالد حاكم)
|
| Quote: انا بعرف أرطن حبة انتى بتعرفى عشان نفكنا من العربى ده على قولك |
يا نادية عثمان اختى
سريناقمندو
انت عارفة برضو نحن نكون حريصين على لغتنا النوبية اللى حتما حنكتب بيها فى يوم من الايام كما كانوا اسلافنا من قبل حملة عبدالله بن ابى السرح , ونقوم نحترمها ونناديها باسمها الصحيح (اللغة النوبية) بدلا من الرطانة , واكيد خطا لفظ الرطانة الناس ما قاصدها , زى ما برضو ماقاصدها تكتب حروف الذال والزين والهاء المربوطة والتاء المربوطة خطا !
وكل سنة وانتى طيبه
| |
|
|
|
|
|
|
| |
إيمان صالح
عبدالكريم الامين احمد
showgi idriss
Hussein Mallasi
هشام آدم
هاشم أحمد خلف الله
رأفت ميلاد
Waly Eldin Elfakey
عبدالله شمس الدين مصطفى
الزوول
Muna Khugali
Ahmed Alim
Amir Omer
Mohamed Ahmaed Olyesh
الطيب برير يوسف
Nasr
عواطف ادريس اسماعيل
Abureesh
محمد الأمين موسى
طارق جبريل
Ishraga Mustafa
Elawad Eltayeb
فيس بوك
تويتر
انستقرام
يوتيوب
بنتيريست